തിരിച്ചറിവ്

ഈ യാത്ര തീരുന്നതിനുമുന്‍പ്
നിന്നെ ഒരു നോക്കുകാണണമെന്ന അടങ്ങാത്ത മോഹം..
എന്‍റെ നൊമ്പരങ്ങള്‍ വിങ്ങലുകള്‍
മറ്റാരോടും പങ്കുവയ്ക്കാനാവാതെ
കാലങ്ങളോളം...
നഷ്ടബോധത്തിന്‍റെ തീച്ചൂളയില്‍
ഉഴറി ഉരുകുമ്പോഴും നിന്നെ തിരയാത്ത
വാതിലുകളില്ല..

മുഖപുസ്തകത്തിലെവിടെയോ
നിന്‍റെ മുഖം വീണ്ടും കണ്ടപ്പോള്‍
വെള്ളിവീണ മുടിയിഴകളിലും
കാഴ്ചമങ്ങിയ മിഴികളിലും
വസന്തത്തിന്‍റെ തുടിപ്പ്
കാതങ്ങള്‍ക്കപ്പുറത്തിരുന്ന്
നീയൊരു ലഹരിയായ് വീണ്ടും ...

പക്ഷേ ,ശ്രീത്വം തുളുമ്പുന്ന നിന്‍റെ നല്ലപാതിയുടെ വദനം
എന്‍റെ മോഹങ്ങള്‍ക്കു ചിതയൊരുക്കി
എന്നോടൊപ്പം മണ്ണിലടിയട്ടെ നീപോലുമറിയാതെ..
തിരിച്ചറിവിന്‍റെ നൊമ്പരം

ഒന്നെനിക്കറിയാം,അവസാന നിമിഷങ്ങളില്‍
ബോധാബോധത്തിന്‍െറ പിടച്ചിലില്‍
എന്‍റെ നാവില്‍ നിന്‍നാമം മാത്രമായിരിക്കും
എന്‍റെ ചിന്തയില്‍ നീ മാത്രമായിരിക്കും
അത്രമാത്രം നീ എന്നിലലിഞ്ഞുപോയി..

രതിമോള്‍ ജിനി .