വൈറൽ ഫീവർ

പനി പേടിച്ചു മുഖത്തു മാസ്ക്കുമായ്
കരിമേഘത്തിലൊളിച്ചൊരമ്പിളി
തനിയേ നിന്നു വിറച്ചു താരകം
മഴയിൽ ലൈവിതു പാടെ വൈറലായ്...

തല കീഴായ് മരുവുന്ന വാവലിൻ-
തലയിൽ വെള്ളിടി വെട്ടി വീഴവേ
പഴവും പാതി കടിച്ചു വെച്ചവൻ
പകരും ജീവിതമാകെ വേവലായ്...

കിണർവെള്ളത്തിന് ക്ലോറിനേഷനും
അണുനാശത്തിനു കോമ്പിനേഷനായ്.
ഹതഭാഗ്യങ്ങ,ളതീതശക്തിയെ-
പ്രതി ചേർത്താണ്ടു കടന്നു പോകിലും

അറിയാവ്യാധിക,ളാത്മഹത്യകൾ
അണയും ജീവിതദു:സ്സഹാധികൾ
അനിയന്ത്രിത ഭോഗകാംക്ഷയിൽ
പനി ബാധിച്ചു വിറച്ചിരിക്കയാം...

ശ്രീനിവാസൻ തൂണേരി