ദൈവത്താൻ

-----------------------

....സന്തോഷ് ജി. തകഴി.

എണ്ണയുംപനിനീരും പഞ്ചഗവ്യവുംതേനും,
ഉല്പന്നസമൃദ്ധമായ് നീരാടിയെന്നാകിലും,
ഉണ്ണുവാനരി റേഷനുണ്ടൊരുനേരം നേദ്യം
അന്നമായ്സമർപ്പിപ്പൂ മാസാന്ത്യദിനങ്ങളിൽ...

ശർക്കരത്തരിയ്ക്കായിശണ്ഠകൂട്ടുന്നു; പങ്കു-
തർക്കിച്ചു ചിതലും ചീവീടും പടയണി...!
പട്ടിണികൊണ്ടു നാവും തൊണ്ടയും വരളുന്നു,
കിട്ടിടാ പച്ചവെള്ളം സംക്രാന്തി ദിനം വരെ....!!

ദൈവമാണഖിലവുംനൽകുന്നനാഥൻ;സൃഷ്ടി
വൈഭവം വിളിച്ചോതും താഴികക്കുടക്കീഴെ,
'ഇത്തിരിവെട്ടം കിട്ടിയെങ്കിൽ ഞാനറിഞ്ഞേനെ -
കുത്തിയതാരെന്നെന്നെ പഴുതാരയോ തേളോ?'

ദൈന്യതക്കെട്ടഴിച്ചു കോവിലിൽ ലോകർവന്നു -
വന്യമായ് വിലപിച്ചും സങ്കടം വിളമ്പിയും,
കൈവല്യമൂർത്തിയ്ക്കൊരു വഴിപാടും 'വാഗ്ദാനമായ് '
ദൈവത്താരുടെ ദൈന്യമാരറിയുന്നു...ഭുവിൽ...!!