Showing posts with label Sabaries. Show all posts
Showing posts with label Sabaries. Show all posts

അവനെന്റെ നീട്ടി പിടിച്ച കൈ..........

അവനെന്റെ നീട്ടി പിടിച്ച കൈ വെള്ളയിൽ ഉമ്മ വെക്കുമ്പോൾ എനിക്ക് പൊള്ളി
"എന്തൊരു ചൂടാണ് മനു ?എനിക്ക് പൊള്ളുന്നല്ലോ
"ഇതിനേക്കാൾ വല്യ ചൂട് നിനക്കറിയാഞ്ഞിട്ടാടി !!! അവൻ കണ്ണിറുക്കി ചിരിച്ചു
ഉവ്വ ഉവ്വാ ഇതിനേക്കാൾ വല്യ തീയ് ആണ് എന്റെ നെഞ്ചിൽ "പപ്പയോടു ഞാൻ എന്തോ പറയുമെന്നോർത്തിട്ടാ !!!
നാളെ പെണ്ണുകാണാൻ വരുന്ന ആരാണ്ടു അമേരിക്കക്കാരന്റെ മുൻപിൽ അപ്പനെ നാണം കെടുത്തണല്ലോ എന്നോർത്തിട്ടു"
"ടി അവനെ കണ്ടു കഴിയുമ്പോൾ നീ എന്നെ മറക്കുമോടി ?"
"ഇല്ലെടാ ഞാൻ വരുന്ന ആളോട് പറഞ്ഞോളാം !!പക്ഷേ നീ ഇതിനു എത്രയും പെട്ടന്ന് ഒരു തീരുമാനം ഉണ്ടാക്കണം "
"അതു ഞാനേറ്റെടി"
റേഡിയോ സ്റ്റേഷനിൽ നിന്നു ഇറങ്ങിയപ്പോൾ മനു ബൈക്ക്മായി വെയിറ്റ് ചെയ്യുന്നുണ്ടായിരുന്നു
നാലു വർഷത്തെ പ്രണയമാണ്. രണ്ട് പേർക്കും പാട്ടിനോടാണ് കമ്പം, ചെറിയ ഒരു വിത്യാസം ഉണ്ട്
അവൻ റോക്ക് ആൻഡ് റാപ്പ് മ്യൂസികിന്റെ ആളാണ് !!ഞാൻ മെലഡിയുടെയും
അതു കൊണ്ടാണ് അറിയപ്പെടുന്ന ഒരു എഫ് മ്മിലെ മെലഡി ടൈമിൽ ജോലി കിട്ടിയപ്പോൾ സന്തോഷത്തോടെ ഏറ്റെടുത്തതും
അവൻ ഒരു പുതിയ ബാൻഡിന്റെ തുടക്കത്തിന് ഉള്ള പ്ലാനിൽ ആണ്
. ഇതിനിടയിൽ ആണ് പ്ലാന്റർ മത്തായിച്ചന്റെ ആക്രമണം !!അക്രമം ഒന്നും അല്ല കേട്ടോ സത്യം പറഞ്ഞാൽ അപ്പൻ ഒരു പാവമാണ്
പക്ഷേ റബറിന്റേം കാപ്പിടേം മണമുള്ള അപ്പനു എന്തോന്ന് കലാ ബോധം ?!"അല്ലെങ്കിൽ പിന്നെ പാട്ടുകാരിയായ എനിക്ക് ഡോക്ടറെ കണ്ടു പിടിച്ചു തരാൻ അപ്പന് തോന്നുമോ
മമ്മിയും അങ്ങനെ തന്നെ !!കഞ്ഞിയും കൂട്ടാനും, അപ്പനും കുർബാനയും പിന്നെ ഞാനും ആണ് ലോകം
മനുവിന് നല്ല ടെൻഷൻ ഉണ്ട് പാവം. എന്നതാണേലും അവനെ മറന്നേച്ചു ഒരു ജീവിതം ഇല്ല
ആലോചിച്ചു നടന്നു വീടെത്തിയത് അറിഞ്ഞില്ല
പപ്പയും മമ്മിയും വല്യ സന്തോഷത്തിൽ ആണ്
ദീപക് പെണ്ണ് കാണാൻ വന്നത് മുണ്ടും ഉടുത്തു അമ്മച്ചിയേം അമ്മാച്ചനേം കൂട്ടിക്കൊണ്ടാണ്!!
വെളുത്തു മെലിഞ്ഞൊരു താടിക്കാരൻ
നല്ല ചൊക ചൊക എന്നൊരു അമ്മച്ചി ! മകനും ഉണ്ട് അമ്മയുടെ നിറം
അമ്മച്ചിക്കു എന്നെ ഇഷ്ടപ്പെട്ടു, എനിക്ക് അമ്മച്ചിയേം !!പക്ഷേ പറഞ്ഞിട്ട് കാര്യം ഇല്ലല്ലോ
അതു കൊണ്ടു ചെറുക്കനും പെണ്ണിനും വല്ലതും മിണ്ടാൻ ഉണ്ടേൽ ആയിക്കോട്ടെ ! എന്നു കേൾക്കണ്ട താമസം ഞാൻ മുറ്റത്തേക്ക് ചാടി
"ദീപക് പിന്നാലേ വന്നു.
പരിചയപ്പെടുത്തൽ കഴിഞ്ഞ ശേഷം ദീപക് നേരെ കാര്യത്തിലേക്കു വന്നു "വർഷക്കു എന്നെ അറിയില്ലായിരിക്കും ! പക്ഷേ വർഷയെ എനിക്കറിയാം
പ്രോഗ്രാം കേൾക്കാറുണ്ട്, വർഷ ഇടക്ക് പാടുന്നതും, എനിക്കിഷ്ടമാണ് പാട്ടും പിന്നെ പാട്ടുകാരിയെയും "
എടുത്തടിച്ച പോലെ അയാളുടെ മുഖത്ത് നോക്കി എനിക്ക് വേറെ ഒരാളെ ഇഷ്ടമാണ് എന്നു പറയേണ്ടി വന്നതിൽ ചെറിയ ഖേദം ഉണ്ടായിരുന്നു എങ്കിലും
മനുവിനെ മനസ്സിൽ ധ്യാനിച്ച് ഞാൻ ഉള്ളതങ്ങു പറഞ്ഞു ! ദീപക്കിന്റെ മുഖത്തൊരു നിരാശ വന്നെങ്കിലും
ഒരു ചിരി എടുത്തു ഉടുത്തു അങ്ങോർ "ശരി അപ്പോൾ വർഷയുടെ ഇഷ്ടം പോലെ !! ഞാൻ എന്തെങ്കിലും പറഞ്ഞോളാം അമ്മച്ചിയോടു
എന്നു പറഞ്ഞു മുൻപിൽ നടന്നു
അവര് പോയ ഉടൻ മനുവിനെ വിളിച്ചു അറിയിച്ചു, എത്രയും പെട്ടന്ന് ഒരു തീരുമാനം ഉണ്ടാക്കണം എന്നു പറഞ്ഞപ്പോൾ
"അടുത്ത ആലോചന വരുമ്പോൾ നോക്കാം "എന്നൊരു ഒഴുക്കൻ മറുപടി കേട്ടെനിക്ക് കലി വന്നതാണ്
അതിന്റെ കയ്പ്പും മനസ്സിൽ ഇട്ടൊണ്ടാണ് അടുത്ത ദിവസം പ്രോഗ്രാമിന് കയറിയത് !!!പക്ഷേ പ്രോഗ്രാം തുടങ്ങിയപ്പോൾ അതു മറന്നിരുന്നു
അവസാനത്തെ കാൾ വിളിച്ച ആൾ ഒരു പാട്ടിന്റെ രണ്ട് വരി പാടാമോ എന്നു ആവശ്യപ്പെട്ടു കൊണ്ടിരുന്നപ്പോൾ ആണ് കൈയ്യിൽ ഇരുന്ന മൊബൈൽ വിറച്ചതു
അയാൾക്കു പാട്ടു പാടിക്കൊണ്ടിരിക്കുമ്പോൾ വന്ന ഡിസ്റ്റർബൻസ് കാരണം ഫോൺ മാറ്റി വെക്കാൻ ശ്രമിക്കുമ്പോൾ മെസ്സേജ് ഓപ്പൺ ആയി
"ഡാ നീ എനിക്കൊരു കാർ സംഘടിപ്പിച്ചു തരണം, വര്ഷയേം കൊണ്ടു എവിടേലും പോയി പെട്ടന്നു കാര്യം നടത്തിയാലേ അവളുടെ തന്തയോട് നാലു ചക്രം മേടിക്കാൻ പറ്റത്തൊള്ളൂ !!!
അല്ലാതെ ഒറ്റ മോളെ അയാളിപ്പം എനിക്ക് കെട്ടിച്ചൊന്നും തരാൻ പോണില്ലെന്നു എനിക്ക് അറിയാം
എനിക്ക് കാശു തന്നേച്ചു അങ്ങോര് വേണേൽ അവളെ അമേരിക്കക്കു വിട്ടോട്ടേ "
തൊണ്ടയിൽ ഉമിനീർ കുടുങ്ങി പാട്ടു മുറിഞ്ഞു. അയാളോട് എന്തോ പറഞ്ഞു ചോദിച്ച പാട്ടിനു പകരം ഏതോ പാട്ടു വെച്ചു കൊടുക്കുമ്പോഴേക്കും അറിയാതെ രണ്ട് തുള്ളി കണ്ണിൽ നിന്നു തുളുമ്പി
പ്രോഗ്രാം തീർന്നതും ഇറങ്ങി ഓടി,ഓട്ടത്തിനിടയിൽ അവനെ വിളിക്കാൻ ശ്രമിച്ചു,കാൾ പോകുന്നില്ല !!
മെസ്സേജ് മാറി അയച്ചത് മനസിലായി നമ്പർ ബ്ലോക്ക് ചെയ്തിരിക്കുന്നു !!വൃത്തികെട്ടവൻ
എന്നാലും വിശ്വസിക്കാൻ പറ്റുന്നില്ല!കുമരകത്തിനു പോകാം ഒരു ഹൌസ് ബോട്ടെടുത്താലോ എന്നുള്ള ചോദ്യം എത്ര തവണ അവന്റെ തമാശ ആയി ചിരിച്ചു തള്ളിയിരിക്കുന്നു !!!
രണ്ടു ദിവസത്തെ ലീവ് പറഞ്ഞിട്ട് കിടക്കുമ്പോൾ പപ്പാ അടുത്ത് വന്നിരുന്നു
"ദീപക്ക് പോണെങ്കിൽ പോട്ടെടാ !!അവൻ അമേരിക്കക്കു പോകാൻ ഇരിക്കുന്നല്ലേ ഉള്ളു, പപ്പാ അമേരിക്കയിൽ സ്ഥിര താമസം ഉള്ള ആരെയേലും കൊണ്ട് വരും എന്റെ മോൾക്ക്‌
കരയണം എന്നു തോന്നി! പിന്നെ അപ്പനെ വിഷമിപ്പിക്കണ്ടാന്നു ഓർത്തങ്ങു കടിച്ചു പിടിച്ചു, മത്തായിച്ചനു പരുക്കൻ മുഖം വീടിനു പുറത്തെ ഉള്ളൂ
അവനെ അങ്ങനെ വെറുതെ വിടാൻ മനസ് വരുന്നില്ല!! അപ്പനോട് എങ്ങും പോകരുത് ആവശ്യം വന്നാൽ വിളിക്കുമെന്ന് പറഞ്ഞിട്ട് ഇറങ്ങുമ്പോൾ ചിലതു തീരുമാനിച്ചിരുന്നു
പടികയറി ചെല്ലുമ്പോഴേ കണ്ടു അവൻ മുൻവശത്തു തന്നെ ഉണ്ട് അവനിട്ടു നേരെ ചെന്നിട്ട് ഒഴിഞ്ഞു മാറുന്നതിനു മുൻപേ ഒന്നു പൊട്ടിച്ചു
അന്തം വിട്ടു നിന്ന അവന്റെ അമ്മച്ചിയെ മൈൻഡ് ചെയ്യാതെ അവന്റെ മെസ്സേജ് അവന്റെ പെങ്ങളുടെ മുഖത്തിന്‌ നേരെ തുറന്നു പിടിച്ചു
നിന്റെ ആങ്ങള സമ്പാദിക്കുന്നത് എങ്ങനാണ് എന്നു അമ്മച്ചിയോടു കൂടെ പറഞ്ഞേക്ക് !!!
പിന്നെ അവിടെ നടക്കുന്നത് ശ്രദ്ധിക്കാതെ ഇറങ്ങുമ്പോൾ ഒരു സമാധാനം തോന്നിയിരുന്നു എങ്കിലും വിഷമം ഇല്ലാതിരുന്നില്ല
പ്രോഗ്രാമിന് കയറുമ്പോൾ എല്ലാം മറക്കും. രണ്ട് മാസത്തിനു ശേഷം ഒരു ദിവസം വൈകിട്ട് അവസാനത്തെ കാൾ ആയിരുന്നു എടുത്തതെ അയാൾ സംസാരിക്കാൻ തുടങ്ങി
"ഞാൻ മറ്റെന്നാൾ അമേരിക്കക്ക് പോകുക ആണ്
ഈ പാട്ടു ഞാൻ സ്നേഹിക്കുന്ന പെൺകുട്ടിക്ക് വേണ്ടി ആണ് !!
അവൾക്കു വേറെ ഒരാളെ ഇഷ്ടം ആണെങ്കിലും എനിക്ക് മറക്കാൻ കഴിഞ്ഞിട്ടില്ല !!!
രണ്ട് വരി ഞാൻ പാടിക്കോട്ടെ ?
എന്റെ സമ്മതത്തിന് കാത്തു നില്കാതെ അയാൾ പാടി തുടങ്ങി
"കായാമ്പൂ കണ്ണിൽ വിടരും "
പാട്ടു വെച്ചു കൊടുക്കാൻ സമയം തികയാതെ പരിപാടി മുഴുമിപ്പിച്ചു ഇറങ്ങുമ്പോൾ അപ്പനെ കെട്ടിപിടിച്ചു ഒരുമ്മ കൊടുക്കാൻ തോന്നി
റോഡിന്റെ മറു വശത്തു ദീപക്ക് എന്നെ കാത്തു നില്പുണ്ടായിരുന്നു കാറിൽ ചാരി നീല ഷർട്ടും ഇട്ട് മുണ്ടും ഉടുത്തു ചെറിയൊരു ചിരിയോടെ കണ്ണുകളിൽ നിറച്ചു സ്നേഹവും വാത്സല്യവും ആയി
സ്നേഹപൂർവ്വം ശബരി

എന്റെ കുടവയർ

ചെരിപ്പിടാൻ ശ്രമിച്ചിട്ടു കാണാൻ പറ്റുന്നില്ല. അത്രക്കുണ്ട് എന്റെ കുടവയർ !!!
കുടവയർ മാത്രം അല്ല പ്രെഷറും, ഷുഗറും, കൊളസ്ട്രോളും ഉണ്ട് കൂട്ടിനു.. പക്ഷേ കുറ്റം പറയരുത് !
ഞാൻ കൃത്യമായി മരുന്ന് കഴിക്കുന്നത്‌ കൊണ്ട് എല്ലാം ഒരു വിധം കൺട്രോളിൽ ആണ്
ഒടുവിൽ അന്ധനെ പോലെ അതു കാല് കൊണ്ട് തേടിപ്പിടിച്ചു ഇട്ടിട്ടു പതിയെ ബാത്‌റൂമിൽ പോയിട്ട് വന്നു.
ഒരു ഹെർണിയ സർജെറിക് ശേഷം ഉള്ള ലീവിലാണ്. അടങ്ങി ഇരുന്നു ശീലമില്ലാത്ത കൊണ്ട് തന്നെ വീട്ടിലിരിപ്പ് മടുപ്പാണ്
മക്കൾക്കു രണ്ടു പേർക്കും രണ്ടു ദിവസം കഴിഞ്ഞാൽ മധ്യ വേനലവധി തുടങ്ങുമെന്നതായിരുന്നു ആശ്വാസം.. ചട്ടിയും കലങ്ങളുമായി തട്ടിയും മുട്ടിയും ഇരിക്കലോ
അങ്ങനെ അവരുടെ കൂടെ ഇരിക്കുന്നത് സ്വപ്നവും കണ്ടിരിക്കുന്ന എന്റെയടുത്തേക്കു രണ്ട് പേരും വെളിയിലേക്കു പോകാൻ ഉടുപ്പും മാറ്റി, ഒരു ബാഗും തൂക്കി വന്ന കണ്ടു ഞാൻ ഞെട്ടി
"അച്ഛാ അപ്പൂപ്പന്റെ അടുത്ത് പോയിട്ട് വരാം "മകളാണ് ... പ്ലസ് ടു കാരി
എല്ലാ അവധിക്കും അങ്ങോട്ട്‌ പോണത് രണ്ട് പേരുടെയും പതിവാണ്. എനിക്കും അവൾക്കും അവധികൾ ഇല്ലാത്തതു കൊണ്ട് അവര് തന്നെയാണ് പോക്ക്
"നിങ്ങൾക്കിന്നു തന്നെ പോണോ ?ഞാൻ ഒരു ആന്തലോടെ ചോദിച്ചു
"പിന്നെ ഇല്ലാതെ!... അപ്പൂപ്പന് വാക്ക് കൊടുത്തിട്ടുള്ളതാ".. മകൻ ആണ്
ഹോ എന്റെ വാക്കാണെങ്കിൽ പഴയ ചാക്കിനേക്കാൾ കഷ്ടം ആണ്. ഇന്ന് വരാം നാളെ വരാം എന്ന് പറഞ്ഞത് കേട്ടു മടുത്ത കൊണ്ടാകണം അച്ഛനിപ്പോ എന്നോട് വരാൻ പറയുന്നത് ചുരുക്കമാണ്
"അതേ ഇന്ന് നിങ്ങളെന്റെ കൂടിരിക്കു. അച്ഛൻ ഒറ്റക്കിരുന്ന് മടുത്തിട്ടല്ലേ ??ഞാൻ മോളെ നോക്കി.. അവൾക്കാണ് എന്നോടിത്തിരി ചായ്‌വ് കൂടുതൽ
എന്നാൽ ഞാൻ തീരെ പ്രതീക്ഷിക്കാത്ത ഒരു ചോദ്യം അവൾ തിരിച്ചു ചോദിച്ചു കളഞ്ഞു
"അച്ഛൻ അപ്പൂപ്പന്റെ കൂടെ ഒന്നിരുന്നിട്ട് എത്ര നാളായി ???വേണ്ടാ . അപ്പൂപ്പനെ എപ്പോഴാ അവസാനം കണ്ടത് എന്ന് അച്ഛൻ ഓർക്കുന്നുണ്ടോ ????
അതു ഞാൻ ഓർക്കാൻ ശ്രമിച്ചു. പിന്നെ "നിങ്ങളുടെ അപ്പൂപ്പനോട് ഞാൻ ഇവിടെ വന്നു നമ്മുടെ കൂടെ നില്കാൻ പറഞ്ഞിട്ട് കേൾക്കാഞ്ഞിട്ടല്ലേ ??? ഒരു പ്രതിരോധത്തിന് ശ്രമിച്ചു
"പിന്നെ എന്നിട്ട് വേണം അച്ഛനെ പോലെ അപ്പൂപ്പനും ഇവിടെ വന്നു അച്ഛനെ പോലെ തലക്കും തോളിനും ഇടയ്ക്കു കഴുത്തെന്നു ഒരു സാധനം ഇല്ലാത്ത കോലത്തിൽ ആകാൻ !!!
"എന്റെ പൊന്നച്ഛ, അപ്പൂപ്പനെങ്കിലും അവിടെ സുന്ദരൻ ആയിട്ടിരുന്നോട്ടെ !!! മുടി മൊത്തം നരച്ചാൽ എന്താ അച്ഛന്റെ പോലെ മൊട്ടത്തല അല്ലല്ലോ... ഹോ ഇപ്പോഴും എന്താ ഗ്ലാമർ "
ഞാൻ ഞെട്ടി പോയി. എന്റെ പരവേശം കണ്ടിട്ടു ഒടുവിൽ മകനാണ് പറഞ്ഞത് " എടി ചേച്ചി നീ അച്ഛന്റെ ഗ്ലാമറിൽ തൊട്ടു കളിക്കാതേ !!!പുള്ളിക്കതു പിടുക്കൂല്ല
"ശരി നിങ്ങൾ പോയിട്ട് വാ " ഞാൻ അവശതയോടെ കണ്ണടച്ചു
പെട്ടന്ന് മകൾ കുനിഞ്ഞു എന്റെ മൂക്കിൽ പിടിച്ചു വലിച്ചു കവിളിൽ ഒരുമ്മയും തന്നിട്ട് പറഞ്ഞു
"അച്ഛൻ വിഷമിക്കേണ്ട, അപ്പൂപ്പന് അച്ഛനെ കാണണം എന്ന് പറഞ്ഞു !"
ഞങ്ങൾ അപ്പൂപ്പനേം കൂട്ടി രണ്ട് ദിവസത്തിൽ ഇങ്ങു വന്നേക്കാം !!
അവര് യാത്ര പറഞ്ഞു ഇറങ്ങി പോയി. വാതിൽക്കൽ എല്ലാം കേട്ടു ഭാര്യ നിക്കുന്നു
അവളെന്റെ മനസ് വായിച്ചിട്ടെന്ന പോലെ അടുത്തിരുന്നു, എന്റെ കൈ എടുത്തു തോലോടിക്കൊണ്ട് പറഞ്ഞു
"അച്ഛന് മാത്രം അല്ല നിങ്ങളുടെ മക്കൾക്കും ഉണ്ട് ആഗ്രഹം, നിങ്ങളുടെ കൂട്ടിരിക്കാൻ, അവരിങ്ങു വരും "
അതിനു മുൻപ് നിങ്ങൾ വീണ്ടുമൊരു ഓട്ടം തുടങ്ങാതെ ഇരുന്നാൽ മതി !!!
ശരിയാണ് അച്ഛന് ആഗ്രഹങ്ങൾ ചെറുതായിരുന്നു
അന്നത്തിനു മുട്ടൽ ഉണ്ടാകരുത്, മക്കളെ നന്നായി പഠിപ്പിക്കണം, ഒരു മകളെ കെട്ടിക്കണം !!!ഇത്ര തന്നെ
അതുകൊണ്ട് അച്ഛന് സമയം ഉണ്ടായിരുന്നു.
ഞങ്ങളെ സ്കൂളിൽ വന്നു കൂട്ടാൻ. വരുന്ന വഴിക്കു അന്നത്തെ സ്കൂൾ വിശേഷം മുഴുവൻ കേൾക്കാൻ
ജീവിതത്തോട് സ്നേഹം ഉണ്ടാക്കി തരാൻ. എന്റെ ചോദ്യങ്ങൾക്കു ഉത്തരം തരാൻ
കൗമാരത്തിലും യൗവനത്തിലും എനിക്ക് വരുന്ന മാറ്റങ്ങളെ ശ്രദ്ധിക്കാനും, എന്റെ കാലിടറാതെ കാക്കാനും
നിലാവുള്ള രാത്രികളിൽ അച്ഛനും അമ്മയും വെളിയിൽ പോയിരുന്നു തമാശകൾ പറഞ്ഞു ചിരിക്കുന്നതും കണ്ടിട്ടുണ്ട്
ഞാനോ, മക്കൾ ഉറങ്ങി കഴിഞ്ഞാണ് മിക്കവാറും വരവ്. റൂമിന്റെ കതകൊന്നു തുറന്നു രണ്ടാളും സമാധാനം ആയി ഉറങ്ങുന്നു എന്ന് കണ്ടാൽ എന്റെ ജോലി തീർന്നു
അവർക്കു വല്ലതും വേണമെങ്കിൽ അമ്മയോട് പറഞ്ഞു എന്നെ അറിയിക്കാൻ ഏല്പിക്കൽ ആണ് പതിവ്
അവർക്ക് വലിയ സ്കൂളിൽ വിദ്യാഭ്യാസം നൽകുന്നു, വിലയേറിയ വസ്ത്രവും, ആഹാരവും കൊടുക്കുന്നു !!!
ഇത്രയും കൊണ്ട് എന്നിലെ പിതാവ് മഹാൻ ആണെന്ന് സ്വയം കരുതുന്നു
എനിക്ക് സ്വയം പുച്ഛം തോന്നി
ഞാൻ കണ്ണ് തുറന്നു അവളെ സൂക്ഷിച്ചു നോക്കി കണ്ണിനടിയിൽ കറുപ്പ് പടർന്നിരിക്കുന്നു, തലയിൽ അവിടിവിടെ വെള്ളി
എന്റെ നോട്ടം കണ്ടു അവൾ പറഞ്ഞു "നിങ്ങൾ വിഷമിക്കാതെ അവരിങ്ങു വരും "
"നീ അവരോടു വരണ്ടാന്നു പറഞ്ഞേക്ക് !!!
അവൾ തുറിച്ചു നോക്കി
"നമുക്ക് പോകാമെടോ, സമ്പാദിച്ചത് മതിയായി, എനിക്ക് കുറച്ചു സമയം വേണമെടോ, തന്റെ കൂടെ, നമ്മുടെ മക്കളുടെ കൂടെ, എന്റെ അച്ഛന്റെ കൂടെ "
അവരിനി നാട്ടിൽ പഠിക്കട്ടെ !! ഞാനും താനും പഠിച്ച കോളേജ് അവിടെ തന്നെ ഉണ്ടല്ലോ "
അവളെന്നെ കെട്ടിപിടിച്ചു നെറ്റിയിൽ ഉമ്മ വെക്കുമ്പോൾ അവളുടെ കണ്ണീരു വീണെന്റെ നെറ്റി നനഞ്ഞപ്പോൾ എനിക്ക് മനസിലായി അവളും അതു തന്നെ ആഗ്രഹിക്കുന്നത് എന്ന്
എന്റെ മുറിവ് ചെറുതായി നോവുന്നുണ്ടായിരുന്നു. പക്ഷേ അതൊരു സുഖമായിട്ടാണ് തോന്നിയത്
എത്രയോ നാളുകൾക്കു ശേഷം ആണ് അവളിങ്ങനെ ആവേശത്തോടെ എന്നെ ഒന്ന് ചേർത്ത് പിടിക്കുന്നത്
Sabaries

ഒന്നും ശാശ്വതം അല്ല

അവന്റെ ബെഡ്‌റൂമിലെ കാഴ്ചകണ്ടു ഞാൻ ഒന്നു ഞെട്ടി . ഓടി കയറി വന്ന ഞാൻ പിടിച്ചു കെട്ടിയ പോലെ നിന്നു
തലയുടെ രണ്ട് വശത്തുമായി രണ്ടു ഫോൺ !! കണ്ടാൽ പുതിയത് പോലൊന്നും ഇല്ല
ഫോണിൽ പെട്ടന്ന് ഒരു കാൾ വന്നു "വൃന്ദ കാളിങ് "എന്റെ കൂട്ടുകാരി ആണ്. ഇവളെന്തിനാണ് ഇവനെ വിളിക്കുന്നത്
അവൻ ഉറക്കം പോകാത്ത കണ്ണുകൾ വലിച്ചു തുറന്നു ഒന്ന് നോക്കി, എന്നിട്ട് മുഖത്ത് വന്ന അനിഷ്ടം സ്വരത്തിൽ വരാതിരിക്കാൻ ശ്രദ്ധിച്ചു കൊണ്ട് കൊഞ്ചുകയാണ്
"ലവ് യൂ റ്റൂ ഡി "!!!എന്റെ സപ്ത നാഡികളും തളര്ന്നുണ്ടോ ?!!
അടുത്ത ഫോണിൽ മെസ്സേജ് വന്നു ! അവൻ കാൾ കട്ട്‌ ചെയ്യാതെ തന്നെ ടൈപ്പ് ചെയ്കയാണ്
ഗുഡ് മോർണിംഗ് വർഷ മൈ സ്വീറ്റ് ഹാർട്ട്‌ !!
കരഞ്ഞു കൊണ്ട് അവിടെ നടക്കുന്ന ഇക്കിളി വർത്തമാനങ്ങൾ കേൾക്കാൻ ശക്തി ഇല്ലാതെ ഞാൻ ഇറങ്ങി ഓടി. എനിക്ക് പറയാൻ വന്നത് ഒന്നും ഇനി പറയണം എന്നില്ല
ഇന്നലെ ആണ് ബാങ്ക് ടെസ്റ്റിന്റെ റിസൾട്ട്‌ വന്നത് അര മാർക്കിന് ഞാൻ തോറ്റിരുന്നു.
എഞ്ചിനീയറിംഗ് കഴിഞ്ഞിട്ടും ജോലി ഒന്നും ആകാത്തതിനാൽ ബാങ്ക് ടെസ്റ്റ്‌ എഴുതാൻ കോച്ചിങ്ങിനു പോകുന്നുണ്ടായിരുന്നു. ഇത് മൂന്നാം തവണയാണ്
രണ്ടിൽ ആർക്കെങ്കിലും ഒരു ജോലി ആയാൽ ഒന്നിച്ചു ജീവിക്കാൻ ആരംഭിക്കാം എന്നായിരുന്നു ഞങ്ങൾ തമ്മിൽ ഉള്ള വാക്ക്
അതിനിടയിലാണ് മദ്രാസിൽ ജോലിക്കാരൻ ആയ മനുവിന്റെ ആലോചന വരുന്നത്. നല്ല കുടുംബം ആണെന്ന് അമ്മ പറഞ്ഞു നടക്കുന്നുണ്ടായിരുന്നു
നല്ല ശമ്പളം ഉണ്ടെന്നു അച്ഛനും, അമ്മാവന്റെ അകന്ന ബന്ധു ആണ്!! അതു കൊണ്ട് സ്വഭാവ സർട്ടിഫിക്കറ്റ് പുള്ളി കൊടുത്തു
അനിയത്തി പൊക്കി പിടിച്ചു കൊണ്ട് വന്ന അയാളുടെ ഫോട്ടോ കണ്ടപ്പോഴേ എനിക്ക് ഓക്കാനിക്കാൻ തോന്നി ! കുറേ പൊക്കം, ഇരുണ്ട നിറം, ചുരുണ്ട മുടി !!!
വെപ്രാളത്തോടെ അവനെ ഫോൺ വിളിച്ചു അറിയിച്ചു ! തത്കാലത്തേക്ക് ക്ഷമിക്കാനും എതിർപ്പൊന്നും വേണ്ടാന്നും, ഉറപ്പിക്കൽ നടക്കട്ടെ എന്നും ആയിരുന്നു അവന്റെ ആശ്വാസ വാക്ക് !!!
"ഡാ അതു തെറ്റല്ലേ ?? എനിക്ക് വേറൊരാളുടെ കൂടെ ജീവിക്കുന്ന കാര്യം ആലോചിക്കാൻ പറ്റില്ല "എന്നു കരഞ്ഞപ്പോൾ
ഡി പൊട്ടി നിന്നെ ഞാൻ ആർക്കെങ്കിലും വിട്ടു കൊടുക്കുമോ ? ബാങ്ക് ടെസ്റ്റിന്റെ റിസൾട്ട്‌ വരട്ടെ, എന്നിട്ട് എങ്ങോട്ടെങ്കിലും പോകാം
ഇപ്പോഴേ എതിർത്താൽ വീട്ടിൽ സംശയം തോന്നും, എനിക്ക് ജോലി ഇല്ലാത്ത കൊണ്ട് അവർ സമ്മതിക്കാനും പോണില്ല !!!
ശരിയാണ് ! അങ്ങനെ ആണ് മനു കാണാൻ വന്നതും, സംസാരിച്ചപ്പോൾ " എന്നെ ഇഷ്ടപ്പെട്ടോ" എന്നു രണ്ട് തവണ ചോദിക്കുക ഉണ്ടായി !
അപ്പുറത്തെ മുറിയിൽ ചെവിയോർത്തു നിൽക്കുന്ന അമ്മയേം അമ്മായിമാരേം ഓർമ വന്നപ്പോൾ ചുമ്മാ തല ആട്ടി കാണിച്ചു
അങ്ങനെ ആണ് നിശ്ചയം നടന്നത്. അതിനു ശേഷവും മനു ചോദിച്ചിരുന്നു" എന്താണ് മിണ്ടാൻ ഒരു മടി പോലെയെന്ന് ?
ബാങ്ക് ടെസ്റ്റിന് പഠിക്കാൻ ഉണ്ടെന്ന മറുപടി അയാൾ വിശ്വസിച്ചോ ആവോ ?
ഇന്നലെ ആണ് റിസൾട്ട്‌ വന്നത്. അവനും ഞാനും തോറ്റിരിക്കുന്നു. അച്ഛനോട് ഒരിക്കൽ കൂടി എഴുതി കിട്ടുന്നത് വരെ കല്യാണം മാറ്റിവെക്കാമോ എന്നു ചോദിച്ചു പോയി
"നിന്നെ വളർത്തിയിട്ടു ഇത് വരെ ഒരു പ്രയോജനവും ഉണ്ടായിട്ടില്ല !!! മൂന്നാമത്തെ തവണ ആണ് നിന്നെ ഞാൻ കോച്ചിങ്‌നു വിട്ടതും
എക്സാം ഫീസടച്ചതും !!!ഇനി നിന്റെ കല്യാണം വരെ നടത്തണം
അവരൊന്നും വേണ്ടാന്ന് പറഞ്ഞാലും എനിക്കൊരു അന്തസില്ലേ ?ഇനി കല്യാണം കഴിഞ്ഞു മനു പഠിപ്പിച്ചാൽ പഠിച്ചാൽ മതി !!!""
അമ്മയും പറഞ്ഞു കണക്കിന് ചീത്ത ! നീ മാത്രം അല്ല ഒരു വയസിനു താഴെ ഒരുത്തി കൂടി ഉണ്ട് "
അവളെ കൂടി ഇറക്കി വിടേണ്ടതാണ് !!!
അതു കൊണ്ടാണ് അവനെ വിളിച്ചു നിർബന്ധിച്ചത്. "നമുക്ക് എങ്ങോട്ടെങ്കിലും പോകാം "
"നീ എന്തു പൊട്ടത്തരം ആണ് പറയുന്നത് ?? എങ്ങനെ ജീവിക്കും എന്നാ ? നീ ക്ഷമയോടെ കേൾക്കണം "
നീ അവനെ തന്നെ കെട്ടുന്നതാണ് നല്ലത്!!! രാത്രി പറഞ്ഞതാണ്
അച്ഛനും അമ്മയും അവനും മാത്രം അല്ല ദൈവം വരെ എനിക്ക് എതിരാണെന്ന് തോന്നിയ നിമിഷം
അതു കൊണ്ടാണ് രാവിലെ എണീറ്റ ഉടൻ അവന്റെ വീട്ടിലോട്ടു ഓടിയത്
വീടിന്റെ വാതിൽക്കൽ എന്താണ് ആൾകൂട്ടം !!എന്താണ് വലിയ നിലവിളി ??
അച്ഛൻ അല്ലേ തലയ്ക്കു കൈ കൊടുത്തു നിലത്തിരിക്കുന്നത് !!! ബോധം കെട്ടു കിടക്കുന്ന അമ്മയുടെ മുഖത്ത് ആരോ വെള്ളം തളിക്കുന്നു
പത്തിൽ പഠിക്കുന്ന അനിയൻ അല്ലേ കാറി കരയുന്നത് ? അനിയത്തി അവനെ കെട്ടിപിടിച്ചു നിലത്തിരുന്നു, അവളും കരയുന്നുണ്ട് !!
ചുറ്റും ആൾക്കാർ കുശുക്കുന്നു "അവൾക്കു വല്ല ഗർഭവും ഉണ്ടായിരുന്നോന്നു ആർക്കറിയാം
മുറ്റത്തേക്ക് ഒരു പോലീസ് ജീപ്പ് വന്നു നിന്നു
എവിടെയാടോ ബോഡി ? പോലീസ്‌കാരൻ കൈയ്യിൽ കെയിൻ ഇട്ട് കറക്കി കൊണ്ട് മുന്നോട്ടു വന്നു. കൂടെ ബാക്കി ഉള്ളവരും
ആരോ അവർക്കു വഴി കാട്ടി. എന്റെ റൂമിലേക്ക്‌ ആണ് !!!
ഞാൻ !ഞാനല്ലേ തൂങ്ങി കിടക്കുന്നതു !!!!
പോലീസ്‌കാർ അളക്കലും പിടിക്കലും കഴിഞ്ഞു എന്നെ താഴെ ഇറക്കി
ഓരോരുത്തരെയായി വിളിച്ചു മൊഴി എടുക്കാൻ തുടങ്ങി ! അച്ഛനെ ആരോ താങ്ങി പിടിച്ചു കൊണ്ടേ ഇരുത്തി
"നിങ്ങളുടെ മകൾക് ആരോടെങ്കിലും പ്രേമം ഉണ്ടായിരുന്നോ ?അതോ അവളെ ആരെങ്കിലും പീഡിപ്പിച്ചോ ?ഈ സമയത്തുള്ള ചോദ്യം ചെയ്യൽ നിങ്ങളെ വിഷമിപ്പിക്കും, അറിയാം പക്ഷേ ഇത് ഡ്യൂട്ടി ആണ്
അച്ഛന്റെ നെഞ്ച് തകരുന്നതും,തൊലി ഉരിയുന്നതും എനിക്ക് മനസിലായി
വാവിട്ടു കരയുന്ന അമ്മയെ അനിയത്തി ചേർത്തു പിടിച്ചു
അയൽക്കാർ എന്റെ സ്വഭാവം ശരി അല്ലെന്നും, ഗർഭിണി ആണോന്നു സംശയം ഉണ്ടൊന്നും പറഞ്ഞു
ഇഷ്ടമില്ലാത്ത കല്യാണത്തിന് പീഡിപ്പിച്ചു സമ്മതിപ്പിച്ചത് കൊണ്ടാണെന്നു ഒരാൾ
പോലീസ് കാർ എന്നെ കൊണ്ട് പോകുകയാണ്, മുട്ടൊപ്പം പൊങ്ങിയ എന്റെ നൈറ്റ്‌ ഡ്രെസ്സിനിടയിൽ കൂടി ആരുടെയൊക്കെയോ കണ്ണുകൾ എന്നെ ഊറ്റി കുടിക്കുന്നു !!!ചായ്
എന്നെ വലിച്ചു കയറ്റുന്നതിനിടയിൽ ഒരു പോലീസ്‌കാരൻ കേട്ടാൽ അറക്കുന്ന തെറി വിളിച്ചു പറഞ്ഞു
ആശുപത്രിയിൽ എന്നെ കൊണ്ട് പോയി ഇറക്കുമ്പോൾ പുച്ഛവും, സഹതാപവും, ദേഷ്യവും നിറഞ്ഞ നൂറു നൂറു കണ്ണുകൾ ചുറ്റും
മുങ്ങി മരിച്ചു മൂന്നാം ദിവസം കിട്ടിയ വീർത്തു പുഴു അരിച്ചു കിടക്കുന്ന ഒരു ശവത്തിന്റെ കൂടെ ആണ് ഞാനും കിടക്കുന്നതു
ആ ശവത്തിന്റെ മേലേ നിന്നൊരു ഈച്ച എന്റെ മേലേ പറന്നു ഇരുന്നു
ആരും കാണാത്ത തക്കത്തിൽ ഒരു മാനസിക രോഗി എന്റെ വസ്ത്രം മാറ്റി എന്റെ നഗ്നത കണ്ടു കോരിത്തരിക്കുന്നു !! അവന്റെ മുഖത്തേക്ക് കാൽ പൊക്കി തൊഴിക്കുവാൻ പോലും എനിക്ക് കഴിയുന്നില്ലല്ലോ ദൈവമേ
സുന്ദരം ആയി ഞാൻ സൂക്ഷിച്ച എന്റെ ശരീരം അവർ വെട്ടി നുറുക്കി തിരിച്ചു തുന്നി കെട്ടി കൊടുത്തു
മനു എനിക്കും മനുവിനും താമസിക്കാൻ എടുത്ത ഫ്ലാറ്റിൽ മേശയിൽ തലവെച്ചു കണ്ണീരൊഴുക്കുന്നു
മനുവിന്റെ അമ്മ എനിക്ക് വേണ്ടി മനു വാങ്ങി വെച്ചതെല്ലാം കൂട്ടിയിട്ടു കത്തിക്കുന്നു !!"ഇതൊക്കെ ഇനി ആർക്കു വേണ്ടിയാ ???
ഒരു പെങ്കൊച്ചില്ലാത്ത വിഷമം അവളെ ഇങ്ങു കൊണ്ട് വന്നാൽ തീരുമല്ലോ എന്നോർത്തിരുന്നിട്ടു ആ പെണ്ണെന്റെ ചെറുക്കനോട് ഇങ്ങനെ കാണിച്ചല്ലോ
കൂട്ടത്തിൽ എനിക്ക് ലണ്ടനിലേക്ക് കൂടെ പോകാനായി പാസ്സ് പോർട്ട്‌ അപേക്ഷിക്കാൻ ഉള്ള കടലാസുകൾ ! അനിയന് പഠന സഹായികൾ, എല്ലാവർക്കും വസ്ത്രങ്ങൾ എല്ലാം ഉണ്ട് !!!
എന്നെ മാത്രം അല്ല എന്റെ വീട്ടിൽ ഉള്ളവരെയും മനു സ്വന്തമായി കണ്ടിരുന്നു !!!!
ഞാൻ സ്നേഹിച്ചവൻ ഞാൻ ഒന്നും എഴുതി വെച്ചിട്ടില്ല എന്ന വല്യ ആശ്വാസത്തോടെ വൃന്ദയെ സമാധാനിപ്പിക്കുന്ന തിരക്കിൽ ആണ്
എന്നെ മറവു ചെയ്ത ഇടത്തു നിന്നും രാത്രി ആയിട്ടും പോകാൻ കൂട്ടാക്കാതെ നിന്ന അച്ഛനെ ആരോ പിടിച്ചു വലിച്ചു വീട്ടിലേക്കു കൊണ്ട് പോയി
എവിടെയോ കിടന്നു ഉറങ്ങിയ അനിയത്തി രാവിലെ എഴുന്നേറ്റു മുറിയിലേക്ക് പോയി. കുറേ സാധനങ്ങൾ വലിച്ചു കീറി നശിപ്പിച്ചു.
ഫോൺ തുറന്നു സിം കാർഡ് എടുത്തു രണ്ടായി ഒടിച്ചു !!കൺകോണിൽ ഉരുണ്ടു കൂടിയ ഒരു തുള്ളി എന്തോ നിശ്ചയിച്ച ഭാവത്തോടെ തുടച്ചു കളഞ്ഞു
അടുക്കളയിലേക്കു പോയി ചായ വെച്ചു, അരി കഴുകി അടുപ്പത്തിട്ടു
ചായയും ആയി ചെന്ന് അമ്മയെ താങ്ങി എണീപ്പിച്ചിരുത്തി. അച്ഛന്റെ മുന്പിലേക്കും ഒരു ഗ്ലാസ്‌ നീക്കി വെച്ചു
അനിയനെ തോളിലേക്ക് ചാരി ഇരുത്തി ചായ ചുണ്ടോടു അടുപ്പിക്കുമ്പോൾ എനിക്ക് ചെറിയ ആശ്വാസം തോന്നി
അവൾ ഉത്തരവാദിത്തം ഉള്ള പെൺകുട്ടിയിലേക്കു അനുഭവം നൽകിയ വെളിച്ചവുമായ് ചുവടു വെച്ചിരിക്കുന്നു
പക്ഷേ എനിക്ക് എന്നോട് പുച്ഛവും വെറുപ്പും തോന്നി "എന്റെ അൽപ ബുദ്ധിയും അവിവേകവും എടുത്തു ചാട്ടവും എനിക്കും എന്നെ സ്നേഹിച്ചിരുന്നവർക്കും ഉണ്ടാക്കിയ നഷ്ടങ്ങളെയും വിഷമങ്ങളെയും ഓർത്തു
കുറച്ചു കൂടി ക്ഷമിച്ചിരുന്നെങ്കിൽ, അച്ഛനെയും അമ്മയെയും മനുവിനെയും മനസിലാക്കാൻ ശ്രമിച്ചിരുന്നെങ്കിൽ !!!ഞാൻ സ്നേഹിച്ചവന്റെ ഉള്ളിലെ വിഷത്തെ തിരിച്ചറിഞ്ഞിരുന്നെങ്കിൽ
എന്റെ അനിയത്തിക്ക് അതിനു കഴിയട്ടെ വിഡ്ഢിയായ ഞാൻ കാണിച്ച മണ്ടത്തരം മനസിലാക്കി അവൾ വീടിനു വിളക്കാകട്ടെ
(ഇത് പ്രണയ പരാജയം അനുഭവിക്കേണ്ടി വന്ന പെൺകുട്ടികൾക്ക് വേണ്ടി മാത്രം ഉള്ളതല്ല.എല്ലാവർക്കും വേണ്ടിയാണു ജീവിതത്തിൽ പരീക്ഷണങ്ങൾ അനുഭവിക്കാത്ത ആരും ഉണ്ടാകില്ല. മാതാപിതാക്കൾ ശകാരിക്കുന്നത് മക്കൾ നന്നാവണം എന്ന ഉദ്ദേശത്തോട് കൂടി ആണെന്നും, ജോലിയും സ്വന്തം കാലിൽ നിൽക്കേണ്ടതും അത്യാവശ്യം ആണെങ്കിലും, ഒരു അവസരം നഷ്ടപെട്ടാൽ അതിനേക്കാൾ വലുത് നിങ്ങളെ കാത്തിരിപ്പുണ്ടാകും തീർച്ച, മനസിലാക്കുക, കുറച്ചു ക്ഷമ കാണിക്കുക, ഒരു പരീക്ഷ അല്ല ജീവിതത്തിന്റെ അവസാനം.ആത്മഹത്യ ഒന്നിനും പരിഹാരം അല്ല, നമ്മളെ നോവിച്ചവരുടെ മുൻപിൽ അപമാനിച്ചവരുടെ മുൻപിൽ ജീവിച്ചു കാണിക്കാൻ ഉള്ള അവസരം നഷ്ടപെടുത്തുക മാത്രം ആണ് അതു കൊണ്ട് ഉണ്ടാകുന്നതു, കൂട്ടത്തിൽ സ്നേഹിച്ചവരോട് നന്ദികേടും "തമിഴിൽ ഒരു ചൊല്ലുണ്ട് "ഇതുവും കടന്തു പോഗും "...ഒന്നും ശാശ്വതം അല്ല സുഖം ആണെങ്കിലും ദുഃഖം ആണെങ്കിലും സ്നേഹ പൂർവ്വം ശബരി) ( Sabaries RK)

നാളെ മുതൽ

Image may contain: 1 person

ഐശ്വര്യയുടെ തുടുത്ത വിരലുകൾ ഹരിയുടെ ദൗർബല്യമായിരുന്നു.
വെളുത്തുരുണ്ട ആനക്കൊമ്പ് പോലെ തോന്നിപ്പിക്കുന്ന കൈയ്യിലെ തിളങ്ങുന്ന വിരലുകളും, ചായം പൂശാത്ത ഇളം ചുവപ്പ് നിറമാർന്ന നഖങ്ങളും കാണുമ്പോൾ അതിലൊന്ന് തൊടാനും നുള്ളി നോക്കാനുമുള്ള കൊതിയെ അവൻ അടക്കിയെങ്കിലും അതിലേക്കു നോക്കാതിരിക്കാൻ അവനു കഴിഞ്ഞിരുന്നില്ല
വിരലുകൾ നോക്കി നടന്ന അവൻ അവളുടെ കണ്ണിൽ പെടുന്നതോ വിരലുകളെക്കാൾ തുടുത്ത അവളുടെ മുഖത്ത് വെറുപ്പ്‌ നുരയുന്നതോ അവൻ അറിഞ്ഞതുമില്ല
അത് കൊണ്ടായിരിക്കണം ഒരു കർക്കിടകത്തിലെ മഴയിൽ ആരോ ഓടി കയറുമ്പോൾ ചവിട്ടി കയറ്റിയ വെള്ളത്തിൽ പടി ഇറങ്ങി ഓടി വന്ന അവന്റെ കാല് തെറ്റിയതും
എതിരെ വരികയായിരുന്ന അവളെയും തട്ടിയിട്ട് കൊണ്ട് നിലത്തേക്ക് മറിഞ്ഞ അവനെ തള്ളി മാറ്റിയിട്ടു ചാടിയെണീറ്റത്തിനോടൊപ്പം അവൾ അതേ വിരലുകൾ കൊണ്ട് അവന്റെ കരണത്തു ആഞ്ഞടിച്ചതും
അടിയുടെ വേദനയേക്കാൾ സഹപാഠികളുടെ നടുവിൽ വെച്ചു ലഭിച്ച അടിയുടെ കൂടേ അവൾ ചവച്ചു തുപ്പിയ വാക്കുകൾ ആണ് അവനെ തകർത്തു കളഞ്ഞത്
"നിന്റെ നോട്ടം കണ്ടപ്പോഴേ ഞാൻ മനസിലാക്കേണ്ടതായിയിരുന്നു നിന്റെയൊക്കെ കൈയെത്തുന്ന അകലത്തുന്നു മാറി നടക്കണമായിരുന്നു എന്നു "
ആഭാസൻ !!!
അന്ന് ഒരു ക്ഷമയും പറഞ്ഞു ഓടി രക്ഷപെട്ട ഹരി പിന്നെ ഐശ്വര്യ വരുന്ന വഴികളിൽ നിന്നു പോലും ഒഴിഞ്ഞു നടന്നു
ആരോ പറഞ്ഞറിഞ്ഞു വിഷയം പ്രിന്സിപ്പൽ വരെ അറിഞ്ഞെങ്കിലും രണ്ടു പേരെയും റൂമിലേക്ക്‌ വിളിപ്പിച്ചപ്പോൾ
"എനിക്ക് പരാതി ഇല്ല, ഹരി അറിയാതെ വീണതാണ് "എന്നു പറഞ്ഞു അവൾ അവനെ ഞെട്ടിച്ചു
ഒരു നന്ദി പറയാൻ ചെന്ന അവനോടു
"ഞാൻ അങ്ങേരോട് അങ്ങനെ പറഞ്ഞെങ്കിൽ അത് ഞാൻ നാണം കെടാതെ ഇരിക്കാൻ വേണ്ടി മാത്രമാണ്, അല്ലാതെ തന്നോട് ഒന്നും തോന്നിയെന്ന് ഓർക്കേണ്ട "
എന്നു കടുപ്പിച്ചു പറഞ്ഞവൾ തല വെട്ടി തിരിച്ചു നടന്നു

പിന്നീട് പലവട്ടം കണ്ടെങ്കിലും അവൾ ഒരിക്കൽ പോലും അവനെയോ, അവൻ അവളെയോ ശ്രദ്ധിച്ചതും ഇല്ല
ബിരുദ പഠനം കഴിഞ്ഞു അവളെവിടെയിരുന്നു എന്നും അറിയില്ല !!
പിന്നെ വർഷങ്ങൾ കഴിഞ്ഞു കാണുമ്പോൾ സ്കൂട്ടറിൽ നിന്നു വീണ അവളെ ആശുപ്സ്ത്രിയിലെ ഐ സി യുവിലാണ്
അവൾക്കു ബോധമുണ്ടായിരുന്നില്ല. തലച്ചോറിൽ ഉണ്ടായിരുന്ന രക്തസ്രാവം തടയാൻ സർജറി നടത്തി കൂട്ടി കൊണ്ട് വന്നപ്പോൾ
തോളിൽ നിന്നു താഴെ വരെ ഇട്ടിരിക്കുന്ന പ്ലാസ്റ്ററിൽ പൊതിഞ്ഞ കൈയ്യുടെ നീളകുറവ് ഹരിയെ ഞെട്ടിച്ചു കളഞ്ഞു
ബോധം വരുമ്പോൾ അവളുടെ അടുത്ത് ഹരി ഉണ്ടായിരുന്നു. മുറിച്ചു മാറ്റിയ കൈപ്പത്തി കണ്ടവൾ ആർത്തലച്ചു അമ്മയെയും കെട്ടിപിടിച്ചു കരയുമ്പോൾ നിറഞ്ഞ കണ്ണുകൾ ആരും കാണാതിരിക്കാൻ ഹരി തിരിഞ്ഞു നടന്നു
തുടർന്നുണ്ടായ അവളുടെ രണ്ടാഴ്ച നീണ്ട ആശുപത്രി വാസത്തിനൊടുവിൽ പഴയതൊക്കെ മറന്നു കൂട്ടുകാർ ആയി
കരയുന്ന അവളുടെ അമ്മയോട് ചോദിച്ചപ്പോൾ ആണ് അവളുടെ നിശ്ചയിച്ചു ഉറപ്പിച്ച കല്യാണം മാറി പോയത് അറിയുന്നത്
വലതു കൈ ഇല്ലാത്തവളേ വേണ്ടത്രേ !!!
ഇപ്പോൾ ആറു മാസം കഴിഞ്ഞിരിക്കുന്നു.
തനിക്കും ആകെയുള്ള അമ്മയ്ക്കും അവളുടെ വലതു കൈ ആകാൻ കഴിയുമെന്നുറപ്പിച്ച ഹരി നേരെ അമ്മയെയും കൂട്ടി അവളുടെ വീട്ടിൽ ചെന്ന് പെണ്ണ് ചോദിക്കുകയായിരുന്നു
നാളെ അവരുടെ കല്യാണമാണ്. അവളുടെ വലം കൈയ്യാകുന്നത് സ്വപ്നം കണ്ടു അവനും
പണ്ട് ഹരിയുടെ കരണതടിച്ചത് ഓർമ വന്നത് കൊണ്ടോ അതോ സന്തോഷം കൊണ്ടോ നിറഞ്ഞൊഴുകിയ കണ്ണുകൾ നനച്ച തലയിണയിലേക്കു മുഖം അമർത്തി അവളും ഉറങ്ങാൻ കിടന്നു
നാളെ മുതൽ ഒരുമിച്ചുറങ്ങാൻ വേണ്ടി
Sabaries RK Kjipmer

ഒരു ചെറിയ സംശയം ""അതെന്താണപ്പാ ഈ ആദ്യ രാത്രി""????

ഒരു ചെറിയ സംശയം ""അതെന്താണപ്പാ ഈ ആദ്യ രാത്രി""????
ഞാൻ അന്ന് രണ്ടാം ക്ലാസ്സിൽ പഠിക്കുകയാണ്. എന്റെ വലിയ അമ്മാവന്റെ കല്യാണം ആണ് .ചെറിയ അമ്മാവൻ എന്നെ പറഞ്ഞു പറഞ്ഞു കൊതിപ്പിച്ചു വെച്ചിരിക്കുകയാണ്. കല്യാണത്തിന് നിറയെ ആള് വരും,
പക്ഷെ അത് ആ നാട്ടിലും, ബന്ധുക്കളുടെ ഇടയിലും , കുടുംബ സുഹൃത്തുക്കളുടെ ഇടയിലും ആയി ഉള്ള സുന്ദരിമാരെ എല്ലാം കൺകുളിർക്കെ കാണാനും , അസ്വദിക്കാനുമുള്ള വീർപ്പുമുട്ടായിരുന്നു അതെന്നു പാവം എനിക്ക അന്നു് എങ്ങനെ മനസിലാകാൻ!!!

തലേന്നു ഒരു മേളം ആയിരുന്നു.ഒരു ഓർഡറിൽ കുട്ടികൾ ഓരോരുത്തർ ആയി മറ്റുള്ളവരുടെ കൂട്ട ആക്രമണത്തിന് വിധേയരായി കൊണ്ടിരുന്നു, എന്റെ പല്ലായിരുന്നു പ്രശനം എങ്കിൽ, മീനുകുട്ടിക്കു പ്രശനം അവളുടെ ചേട്ടാനുമായി താരതമ്യപ്പെടുത്തുമ്പോൾ ഉള്ള ലേശം നിറക്കുറവായിരുന്നു.കാക്ക കറുമ്പി എന്നെ വിളിയെ അവൾ എട്ടു ദിക്കുമാറുള്ള നിലവിളിയോടെ നേരിട്ട് , വിളിച്ചവർക്കെല്ലാം അടി വാങ്ങി കൊടുത്തു
ഒരു വശത്തു ഇതൊക്കെ നടക്കുമ്പോൾ മറുവശത്ത് സാധനങ്ങൾ വാങ്ങാൻ ഉള്ള ഓട്ടത്തിൽ ആയിരുന്നു മുതിർന്നവർ. കല്യാണതിന് ഇടാനുള്ള പൂമാല, ബൊക്കെ, വണ്ടി അലങ്കരിക്കാനുള്ള പൂവ് ഇതേല്ലാം വാങ്ങുന്നതിന്റെ കൂടെ , ചിറ്റ പറഞ്ഞ ഒരു കാര്യം ആണ് എന്റെ ചെറിയ സംശയത്തിന് കാരണം.
സംശയം വന്നാൽ ഉടനെ അത് പരിശോധിച്ചു നോക്കി തന്നെ തീർക്കണം എന്ന് നിർബന്ധം ഉള്ള ആളാണ് ഞാൻ. അല്ലെങ്കിൽ പിന്നെ തല മുട്ടിയാൽ വേദന എടുക്കും എന്ന് അമ്മ പറഞ്ഞു തല തിരിക്കുന്നതിനു മുൻപേ "ഈ തല മുട്ടിയാൽ വരുന്ന വേദന എങ്ങനെ ഇരിക്കും എന്നറിയാൻ മുട്ടി നോക്കുകയും, പിന്നെ പൊട്ടികരയുകയും ചെയ്യില്ലല്ലോ.
പിന്നീടൊരിക്കൽ വിളക്കിന്റെ തിരി നാളത്തിൽ തൊട്ടാൽ പൊള്ളും എന്ന് അമ്മൂമ്മ പറഞ്ഞതും എനിക്ക് വിശ്വാസം വന്നില്ല. അങ്ങനെ കേൾ്കുന്നതെല്ലാം വിശ്വസിക്കാൻ പടില്ലലോ അല്ലെ!!!
എന്നാണേലും വിളക്കിന്റെ തിരിക്കുള്ളിൽ വിരൽ വെച്ച് പൊള്ളൽ എന്താണെന്നു ഞാനും, കൊച്ചിനെ ശരിക്കു നോക്കഞ്ഞിട്ടാണെന്നു പറഞ്ഞു അച്ഛന്റെ കൈയ്യിന്റെ പൊള്ളൽ പാവം അമ്മയും അറിഞ്ഞു.
പിന്നെ ഒരിക്കൽ മരിച്ചു കഴിഞ്ഞാൽ എന്താ സംഭവിക്കുക എന്ന കടിച്ചാൽ പൊട്ടാത്ത ചോദ്യം ഞാൻ അച്ഛനോട് ചോദിച്ചു. അറിയാവുന്ന ഭാഷയിൽ എന്തൊക്കെയോ പറഞ്ഞു തരാൻ ശ്രമിച്ച ,എന്റെ സ്വഭാവം അറിയുന്ന അച്ഛന്റെ ഭയം ഞാൻ മരിച്ചു നോക്കി കളയുമോ എന്നായിരുന്നു!!!എന്താണെങ്കിലും അച്ഛന്റെ നിരീക്ഷനത്തിൽ ആയിരുന്ന ഞാൻ അതിനു മെനക്കെട്ടില്ല.
ഇനി കാര്യത്തിലേക്ക് വരാം. സാധനങ്ങൾ വാങ്ങുന്ന കൂട്ടത്തിൽ ആദ്യ രാത്രിക്ക് മുറി അലങ്കരിക്കാൻ ഉള്ള പൂവ് കൂടി വാങ്ങിക്കോ എന്നായിരുന്നു അത്."ആദ്യരാത്രി" അങ്ങനെ ഒരു സംഭവത്തെ പറ്റി ആദ്യമായി കേൾക്കുകയാണ്.എന്തായാലും എന്റെ സംശയം അപ്പോൾ തന്നെ ദൂരികരിക്കാൻ ഞാൻ തീരുമാനിച്ചു.
അതെന്താ ചിറ്റെ ഈ ആദ്യ രാത്രി????.
എന്നായിരുന്നു തൊള്ള തുറന്നുള്ള എന്റെ ചോദ്യം!. കഴുകാൻ എടുത്ത നിലവിളക്കു ചി്റ്റടെ കൈയിൽ നിന്ന് നിലത്തു വീണു!!!.
പാത്രം കഴുകി കൊണ്ട് നിന്ന ജോലിക്കാരി പെണ്ണുങ്ങൾ അത് താഴെ ഇട്ടു മൂക്കത്തു വിരൽ വെച്ചു.
ചെറിയമ്മാവന്റെ മുഖത്തെ ഭാവം ഇപ്പോൾ ഓർത്താൽ വലിയ അമ്മാവനെക്കാൾ മുന്നേ ചെറിയമ്മവനെ ആയിരുന്നു കെട്ടിക്കേണ്ടി ഇരുന്നത് എന്ന് തോന്നും .
ആ ബഹളത്തിനിടയിലും എന്റെ സ്വരം തിരിച്ചറിഞ്ഞ അമ്മ അപമാനത്തോടെ "എടാ മോട്ടെന്നു വിരിഞ്ഞില്ല അതിനു മുൻപ് അവന്റെ ഒരു സംശയം"!!! എന്ന് പറഞ്ഞു മനഃസാന്നിധ്യം വീണ്ടെടുത്ത് എന്നെ അടിക്കനായി കൈയിൽ കിട്ടിയ തവിയുമായി പാഞ്ഞു വന്നു.
സംഭവം എന്തോ വശപിശക് ആണെന്ന് മാത്രം മനസിലാക്കിയ ഞാൻ ഉള്ള ജീവനും കൈയ്യിൽ വാരി കൊണ്ട് ഓടി!!
പിന്നെ എന്നെ നോക്കുന്ന എല്ലാവർ്ക്കും ഭയങ്കര നാണം. കല്യാണം കഴിഞ്ഞു. പിന്നെ മേൽ പറഞ്ഞ ആദ്യ രാത്രിക്ക് വേണ്ടി മുറി ഒരുക്കൽ തകൃതിയായി നടക്കുന്നു.
"ആരും പറഞ്ഞു തന്നില്ലെങ്കിൽ വേണ്ട ഞാൻ ഇന്ന് എല്ലാം കണ്ടു മനസിലാക്കിയിട്ടെ ഉള്ളു!!! എന്ന ചിന്തയോടെ ഞാനും അവരുടെ കൂടെ കൂടി. രാത്രി ആകാൻ കാത്തിരുന്നു.
കരഞ്ഞു കൊണ്ടിരുന്ന പുതിയ അമ്മായിയെ എല്ലാരും കൂടി അശ്വസിപ്പിക്കുന്നതും, വിളിച്ചിരുത്തി ഭക്ഷണം നിർബന്ധിച്ചു കഴിപ്പിക്കുമ്പോഴും എല്ലാം" മതി ഒന്ന് നിർത്തൂ , എന്നിട്ടവരേ ആദ്യ രാത്രിക്ക് വിടൂ" എന്ന് പറയണം എന്നുണ്ടായിരുന്നെങ്കിലും തലേന്നത്തെ പുകിൽ ഓര്മ ഉണ്ടായിരുന്നതിനാൽ അതിനു മുതിർന്നില്ല.
അമ്മായി പെണ്ണുങ്ങളുടെ അകമ്പടിയോടെ കുളിച്ചിട്ടു വന്നു. എല്ലാരും കൂടി സാരി ഉടുപ്പിച്ചു, പൂവ് വെച്ച്, കണ്ണെഴുതി പൊട്ടു വെച്ച് സുന്ദരി ആക്കുന്നത് ഞാൻ അക്ഷമയോടെ നോക്കി നിന്നു. ഒടുവിൽ അടുക്കളയിൽ നിന്ന് ആരോ പാലുമായി വന്നു അതും കൈയിൽ കൊടുത്തു കൂട്ടത്തോടെ ആനയിച്ചു കൊണ്ട് പോയി.ഉത്സാഹത്തോടെ ഞാനും,
അമ്മായിക്ക് മുൻപേ മുറിയിലേക്ക് ചാടി കയറാൻ ശ്രമിച്ച എന്നെ ആരോ പിടിച്ചു മാറ്റി. എന്നെ ഞെട്ടിച്ചു കൊണ്ട് കതകു അടഞ്ഞു!!!!
ഒന്ന് വിളിച്ചു തുറക്കാമോ ഞാനും കൂടി വന്നോട്ടെ എന്ന് ചോദിക്കാൻ ആലോചിച്ച എന്നെ എല്ലാരും കൂടി നിനക്കിനി എന്താണ്ടാ ഇവിടെ കാര്യം അപ്പുറത്ത് പോടാ എന്ന് ഓടിച്ചു
എല്ലാരും ഉറങ്ങാൻ കിടന്നു.വെട്ടം അണഞ്ഞു.സംശയം മാറാതെ എനിക്കുറക്കം വരുമോ.അത് കൊണ്ട് ഞാൻ ആരും കാണാതെ മെല്ലെ എഴുന്നേറ്റു. അമ്മാവന്റെ മുറിയിൽ മാത്രം ആണ് വെട്ടം ഉള്ളത്.അത് ലക്ഷ്യമാക്കി നടന്നു..കതകു തുറന്നു പുറത്തു ഇറങ്ങി ജനാല വഴി പിടിച്ചു കയറാൻ ശ്രമിക്കുമ്പോഴാണ് ആ സംഭവം!!!
ദാഹം തോന്നിയ സുലു അമ്മായി വെള്ളം കുടിക്കാൻ എഴുന്നേറ്റു വന്നപ്പോൾ കതകു തുറന്നു കിടക്കണൂ.
വെറുതെ പുറത്തേക്കു നോക്കിയ അമ്മായിയുടെ നിലവിളി കേട്ട് കിടന്നവർ എല്ലാം ചാടി എണീറ്റു, ലൈറ്റുകൾ കത്തി.
ആദ്യ രാത്രി ആഘോഷിക്കാൻ ഇരുന്നവർ വരെ മുറി തുറന്നു പുറത്തു ചാടി!!!
ദയനീയമായി എന്റെ അമ്മയുടെ മുഖത്തേക്ക് നോക്കിയ ഞാൻ ഞെട്ടി!!! കൈയിൽ കിട്ടിയതൊക്കെ വെച്ച് എന്നെ അടിച്ചു , ആരൊക്കെയോ ചേർന്ന് രക്ഷപെടുത്തി കൊണ്ട് വരുമ്പോഴും എന്റെ സംശയം മാറീര്ന്നില്ല!!!!!! എന്നാലും എന്താ ഈ ആദ്യ രാത്രി
Sabaries RK Kjipmer

""കണ്ട പെണ്ണുങ്ങൾ എല്ലാം കൂടി വന്നു എടുത്ത് പൊക്കിയപ്പോ ""

അതേയ് വണ്ടി വാങ്ങിയപ്പോൾ നിങ്ങളെന്നോട് ഡ്രൈവിംഗ് പഠിപ്പിക്കാമെന്നു പറഞ്ഞതല്ലേ.. എന്നിട്ടിപ്പോ എത്ര നാളായി ?
ആകെ കിട്ടിയ ഞായറാഴ്ച ഉറങ്ങി തീർക്കാൻ ഉള്ള ശ്രമത്തിനിടയിൽ ആണ് അവളുടെ കുലുക്കൽ
ഇന്ന് അവധി അല്ലേ റോഡിൽ തിരക്കുണ്ടാകില്ല. വാ പോകാം എണീക്കു
"പണ്ടത്തെ തോടിന്റെ കരയിലോട്ടാണേൽ ഞാൻ വരാം "
ഞാൻ ഒരു ചിരിയോടെ പറഞ്ഞു തീർന്നതും "അവൾ നഖങ്ങൾ എൻറെ പുറത്തു കുത്തി ഇറക്കി "
ഒന്ന് കൊടുക്കാൻ ചാടി എണീറ്റ എന്നെ നോക്കി ആഭാസൻ എന്നു വിളിച്ചിട്ട് അവൾ അടുക്കളയിലേക്കു ഓടി
കെട്ടിയ ഉടനെ അവളുടെ അച്ഛൻ എന്നോട് പറഞ്ഞു "ഉരുളി കമിഴ്ത്തി ഉണ്ടായ സന്താനം ആണ് അത് കൊണ്ട് ഞാൻ അവളെ വണ്ടി ഓടിക്കാൻ ഒന്നും പഠിപ്പിച്ചിട്ടില്ല "
പിന്നെ കടുക് പൊട്ടുന്ന പോലുള്ള അവളുടെ നടത്തം കണ്ടപ്പോൾ എനിക്കും തോന്നി. വണ്ടി ഓടിക്കാൻ പഠിപ്പിച്ചാൽ ഞാനവളെ കടുക് പെറുക്കുന്ന പോലെ പെറുക്കി എടുക്കേണ്ടി വരുമെന്ന്
ഒടുവിൽ അവളുടെ നിർബന്ധം സഹിക്കാൻ വയ്യാതെ ഞാൻ അവളോട്‌ വണ്ടി കിട്ടുവാണേൽ ഓടിക്കാൻ പഠിപ്പിക്കാമെന്നു ഏറ്റു
ലോകത്തിൽ കണ്ടവരെ എല്ലാം ഫോൺ വിളിച്ചു ചോദിച്ചു.ഓടിച്ചു പഠിക്കാൻ എന്നു പറയുമ്പോൾ എല്ലാർക്കും പേടി
ഒടുവിൽ അമ്മാവനോട് എവിടെയോ രണ്ടു പേർക്കും കൂടി പോകാൻ ആണെന്ന് പറഞ്ഞു കാല് പിടിച്ചു വണ്ടി ഒപ്പിച്ചു
അച്ഛന്റെ കൂർത്ത നോട്ടങ്ങളെ അവഗണിച്ചു ഞാൻ താക്കോൽ വാങ്ങുമ്പോൾ അമ്മാവൻ പറയുന്നുണ്ടായിരുന്നു
'"അമ്മായിടെ പുത്തൻ വണ്ടി ആണ്.. ഒരു കേടുമില്ലാതെ ഇതിങ്ങു തന്നേക്കണം.. അല്ലെങ്കിൽ നിങ്ങൾ പോകുമ്പോൾ എന്നെ കൂടി കൊണ്ട് വരേണ്ടി വരുമെന്ന് "
ഇതികർത്തവ്യതാ മൂഢനായി നിന്ന അച്ഛനെ നോക്കി നാക്കും നീട്ടി കാണിച്ചു അവൾ തുള്ളി ചാടി വന്നു എൻറെ കൂടേ സ്കൂട്ടറിന്റെ പിറകിൽ കേറി ഞെളിഞ്ഞിരുന്നു പൊന്നു
ഒടുവിൽ ആളൊഴിഞ്ഞ ഒരു ചെറിയ റോഡ് കണ്ടപ്പോൾ ഞാനവളെ പിറകിന്നു മുന്പിലാക്കി ഡ്രൈവിംഗ് പരിശീലനം തുടങ്ങി. റോഡിന്റെ ഒരു വശം പാടമാണ്. ഒരു വശത്തു തോട്
ആടാതെ ഇരിക്കാൻ പഠിപ്പിക്കാൻ അര മണിക്കൂർ വേണ്ടി വന്നു.
എൻറെ വായിലിരിക്കുന്നതു മൊത്തം കേട്ടിട്ടും മിണ്ടാതിരിക്കുവാണ്‌
ബ്രേക്ക്‌ പിടിക്കാൻ പറയുമ്പോൾ ആക്‌സിലെറേഷൻ കൊടുക്കുക, ആക്സിലറേറ്റ് ചെയ്യേണ്ടിടത്തു സഡൻ ബ്രേക്കിടുക എന്നിങ്ങനെ പോയി അവളുടെ കലാ പരിപാടികൾ
സഹികെടുമ്പോൾ ഓരോ പിച്ചും കുത്തും കൊടുത്തപ്പോഴും ഒന്നും മിണ്ടിയില്ല
ഒടുവിൽ മൂന്ന് മണിക്കൂർ കഴിഞ്ഞപ്പോൾ സ്ത്രീകൾ ഓരോരുത്തരായി വലിയ തുണി കെട്ടുമായി വരുന്ന കണ്ടപ്പോൾ ഞാനവളോട് പോകാമെന്നു പറഞ്ഞതാണ്
ആത്മാർത്ഥത മൂത്ത അവൾ രണ്ടു റൗണ്ട് കൂടി നോക്കാം എന്നായി
അങ്ങനെ വീണ്ടും അവളുടെ അടുത്ത റൗണ്ട് പോകുമ്പോളാണ്. മുന്നോട്ടു നോക്കിയിരുന്നു വണ്ടി ഓടിച്ച അവൾ തല വെട്ടി പുറകോട്ടു തിരിച്ചതും
"ദേ മനുഷ്യാ അവിടാരാണ്ടൊ കുളിക്കുന്നുണ്ട് നിങ്ങളങ്ങോട്ട് " ഇത്രയേ കേട്ടുള്ളൂ
ഓർമ വന്നപ്പോൾ എന്നെ ഒരു ഒറ്റ മുണ്ട് ഉടുത്തു കുളിച്ചോണ്ടിരുന്ന ഒരു അമ്മച്ചി വലിച്ചു കരയിലേക്ക് കയറ്റുവാണ്
ഓടി കൂടിയവർ എല്ലാം ചേർന്ന് വണ്ടിയും പൊക്കി തന്നു ഞങ്ങളെ കയറ്റി വിടുമ്പോളും ആ അമ്മച്ചി അവളെ ചീത്ത പറയുന്നുണ്ടായിരുന്നു
"നീയാ പാവം ചെറുക്കനെ കൊല്ലാൻ കൊണ്ട് നടക്കുവാണൊന്നു "
പെയിന്റ് പോയ വണ്ടി തിരിച്ചു കൊടുക്കുമ്പോൾ അമ്മാവനോട് എന്ത് പറയും എന്നു ടെൻഷൻ അടിച്ചു വണ്ടി എടുക്കുമ്പോൾ ആണ്
അവളുടെ അടുത്ത ഡയലോഗ്
"ഹോ എന്നാലും നിങ്ങളോട് അങ്ങോട്ട്‌ നോക്കരുതെന്നു പറഞ്ഞതിനിടക്ക് ഈ വണ്ടി ഈ പണി കാണിക്കും എന്നോർത്തില്ല "
എന്തായാലും നിങ്ങൾക്കു സന്തോഷം ആയി കാണുല്ലോ !!!!
""കണ്ട പെണ്ണുങ്ങൾ എല്ലാം കൂടി വന്നു എടുത്ത് പൊക്കിയപ്പോ ""

Sabaries

ഓമനത്തമുള്ള ഒര് ഇരുപത്തി നാലുകാരി ആയിരുന്നു....

ഓമനത്തമുള്ള ഒര് ഇരുപത്തി നാലുകാരി ആയിരുന്നു അവൾ ഞാൻ ആദ്യം കാണുമ്പോൾ. നല്ല വിദ്യാഭ്യാസവും, ജോലിയും.
പുറമെ നിന്നു നോക്കിയാൽ യാതൊരു കുറവും കാണാൻ ഇല്ല
വിവാഹിത, പ്രണയ വിവാഹം. രണ്ടു വർഷം ആയി. ആശുപത്രിയിൽ വന്നിരിക്കുന്നത് ഇപ്പോൾ ഒന്നര മാസം പ്രായമുള്ള ഗർഭസ്ഥ ശിശുവിനെ വേണ്ടാന്ന് വെക്കാൻ
ഞാൻ കാരണം തേടി. ഉടനെ വന്നു ഉത്തരം. ഞങ്ങൾക്ക് കുട്ടികൾ വേണ്ടാ എന്നാണ്. ഇതിപ്പോ കോൺട്രാസെപ്റ്റീവ് ഫെയിലൂർ ആണ്
എനിക്ക് അദ്‌ഭുതം തോന്നാതിരുന്നില്ല. ഭർത്താവിന്റെ മുഖത്ത് ഒര് വൈമനസ്യം ഇല്ലാതില്ല
ഇവൾക്ക് പ്രസവിക്കാൻ പേടിയാണ് എന്നയാൾ എൻറെ മുഖത്തെ ആകാംഷക്ക് ചോദിക്കാതെ ഉത്തരം തന്നു
പിന്നെ അവിടെ നടന്നത് എന്നെ തന്നെ ഞെട്ടിച്ചു കളഞ്ഞു
"ഇതെല്ലാം കണ്ടിടത്തെല്ലാം വിളമ്പേണ്ട കാര്യങ്ങൾ അല്ല എന്നും, നമ്മളിതു മുൻപേ പറഞ്ഞുറപ്പിച്ചതായിരുന്നു എന്നു അവളും "
എൻറെ വീട്ടുകാരെ വിഷമിപ്പിച്ചു കൊണ്ടാണ് നിന്നെ കെട്ടിയതു.. ഇനി എൻറെ കുഞ്ഞിനെ കാണാൻ പറ്റാതെ കരയുന്ന അവരെ കണ്ടില്ലെന്നു നടിക്കുവാൻ കഴിയില്ലെന്ന് അയാളും
ഒടുവിൽ അവളെ ഞാൻ പറഞ്ഞു സമാധാനിപ്പിച്ചു പരിശോധന മുറിയിൽ കയറ്റി, അയാളോട് പുറത്തിരിക്കാൻ ആവശ്യപ്പെട്ടു
അവളോട്‌ ഒറ്റക് സംസാരിച്ചപ്പോൾ മനസിലായി അവൾക്കു അമ്മ ഇല്ല. പ്രസവത്തിൽ മരിച്ചു പോയത് ആയിരുന്നു. അമ്മക്ക് വേറെ കുഴപ്പങ്ങൾ ഒന്നുമില്ലായിരുന്നു താനും
അവളെ സ്കാനിംഗ് ചെയ്യാൻ അയച്ചിട്ടു അയാളോട് ചോദിച്ചു. കല്യാണത്തിന് മുൻപ് എന്ത് കൊണ്ട് കുട്ടി വേണ്ടാ എന്നു തോന്നിയെന്ന്
എനിക്കവളെ വല്യ ഇഷ്ടമാണ് സർ. അമ്മ ഇല്ലാതെ വളർന്ന കുട്ടി അല്ലേ. സമ്മതിച്ചില്ലെങ്കിൽ അവളു കെട്ടാൻ സമ്മതിക്കില്ലെന്ന് തോന്നി. പിന്നെ പതിയെ പറഞ്ഞു മനസിലാക്കാം എന്നു കരുതി
അയാൾ കരയുന്നുണ്ടായിരുന്നു
അവളോട്‌ എന്ത് പറയണം എന്നെനിക്കു രൂപം ഉണ്ടായിരുന്നില്ല.എങ്കിലും അവസാന പ്രതീക്ഷ എന്നോണം ഞാൻ അവളെയും കൂട്ടി വാർഡിലേക്ക് നടന്നു
അവിടെ എല്ലും തോലുമായ ഒരു ഗർഭിണിയെയും, അവൾക്കു കഞ്ഞി വാരി കൊടുക്കുന്ന കണ്ണിനു ചുറ്റും കറുപ്പ് നിറം ബാധിച്ച അവളുടെ ഭർത്താവിനെയും കാണിച്ചു
എന്നെ കണ്ടതും അവൾ ബെഡിൽ നിന്നു എഴുന്നെല്കാൻ ഒരുങ്ങി
ഇരിക്കാൻ കൈ കൊണ്ട് കാണിച്ച എന്നോട് അവൾ "ഇന്ന് സ്കാൻ ചെയ്തു, കുഞ്ഞ് ആരോഗ്യത്തോടെ ഉണ്ടെന്നാ മാഡം പറഞ്ഞത് എന്നു പറഞ്ഞു "
അയാളുടെ മുഖത്തും ഒര് ക്ഷീണിച്ച ചിരി ഉണ്ടായി
"എനിക്കെന്റെ കുഞ്ഞിനെ ഒന്ന് കണ്ടിട്ട് മരിച്ചാലും മതി എന്നു പറഞ്ഞ അവളുടെ വാ അയാൾ പൊത്തി
ഒന്നും മനസിലാകാതെ നിൽക്കുന്ന അവളെയും കൂട്ടി അവരെ കരയാൻ വിട്ടിട്ടു ഞാൻ നടന്നു
അവർക്കു ഹൃദയ വാൽവിന് തകരാർ ആണ്. ഗർഭിണി ആകാൻ പാടില്ലെന്ന് അറിഞ്ഞു കൊണ്ട് തന്നെ ഗർഭിണി ആയി. അവരെ ഈശ്വരൻ കാത്തെങ്കിൽ ആയി ഇത്രയും അവളോട്‌ പറഞ്ഞു
ചുവന്ന കണ്ണും മുഖവുമായി മിണ്ടാതെ നിന്ന അവളെ കൂട്ടിക്കൊണ്ട് പോകാൻ ഞാൻ അയാളോട് പറഞ്ഞു. രണ്ടാഴ്ച കഴിഞ്ഞു വരാനും.
ഒരാഴ്ചക്കുള്ളിൽ ഉപരി പഠനത്തിനായി അവിടം വിട്ട ഞാൻ പിന്നീട് അവരെ രണ്ടു പേരെയും വീന്നും ഇന്ന് കണ്ടു. നാലു വര്ഷങ്ങള്ക്കു ശേഷം
മുന്ന് വയസുള്ള മകളും ഉണ്ടായിരുന്നു കൂടേ. ഒന്ന് വീണതാണ്, താടിക്കു കീഴെ ഒര് കുഞ്ഞ് മുറിവ്, സ്റ്റിച് ഇടണം
മകളേക്കാൾ അധികം ഉച്ചത്തിൽ കരയുന്ന അമ്മയെയും കുഞ്ഞിനെയും വിട്ടു എൻറെ മുഖം തിരിച്ചറിഞ്ഞ അയാൾ ഓടി വന്നെന്റെ രണ്ടു കൈയും കൂട്ടി പിടിച്ചു
"സാറിനോട് എന്താ പറയേണ്ടതെന്ന് എനിക്കറിയില്ല സർ, ഇപ്പോൾ ഇതാണ് അവസ്ഥ മകളെ ഒരു ഉറുമ്പ് കടിച്ചാൽ പോലും അവള് ബഹളം വെക്കും "
അയാൾ കണ്ണുനീരിൽ കുതിർന്ന പുഞ്ചിരിയോടെ പറഞ്ഞു നിർത്തി

Sabaries

എൻറെ കുശുമ്പ് മാറുകയിലല്ല എന്റളിയ

എനിക്ക് ഈ ലോകത്തു പലരോടും, പലതിനും അസൂയ കുശുമ്പ് എന്നി വികാരങ്ങൾ പല പല അവസരങ്ങളിൽ തോന്നിയിട്ടുണ്ട്. അല്ല തോന്നാതിരിക്കാൻ ഞാൻ മനുഷ്യൻ തന്നെ അല്ലേ.
ആണെന്ന് ആണെന്റെ വിശ്വാസം. അച്ഛനോടും അമ്മയോടും ചോദിക്കരുത് "കാരണം ഇടക്കിടക്ക് നീ മനുഷ്യൻ ആണോടാ " എന്ന ചോദ്യം വരാറുണ്ട്
ചെലപ്പോ അവർക്കു സംശയം കാണും, !!
പക്ഷേ എനിക്കി ലോകത്തിൽ ഇപ്പോൾ ഏറ്റവും കൂടുതൽ കുശുമ്പ് എന്റളിയനോടാ !!!ഞെട്ടരുത്
കാരണം എനിക്കാകെ ഉള്ള പെങ്ങളെ തട്ടി എടുത്തവൻ ആണ്.. കാര്യം ഞാൻ തന്നെ കെട്ടിച്ചു കൊടുത്തതാണേലും
കലപിലാന്ന് പറഞ്ഞോണ്ട് എൻറെ പിറകെ നടന്നവൾ ആണ്. ഇപ്പോൾ എന്നെ ഓർമ ഉണ്ടോ എന്തോ
എൻറെ കൈ ചുമ്മാ തരിക്കുമ്പോൾ ഞാൻ അവളുടെ മണ്ടയിൽ ആണ് അത് തീർത്തു കൊണ്ടിരുന്നത്. എന്നു കരുതി ഞാൻ മാത്രം ആണ് ഉപദ്രവകാരി എന്നു നിങ്ങൾ ഓർക്കരുത്
കൂർക്കം വലിച്ചു ഉറങ്ങുമ്പോൾ വന്നു കിക്കിളി ഇടുക. മൂക്ക് മുട്ടെ തിന്നിട്ടിരിക്കുമ്പോ വന്നു വയറ്റത്ത് കുത്തുക,
കൊടും തണുപ്പിൽ കുളിക്കാൻ മടി പിടിച്ചിരിക്കുമ്പോ ദേഹത്ത് വെള്ളം കോരി ഒഴിക്കുക
വല്ല സുന്ദരികളെയും കണ്ടു ഞാൻ ഒന്നു കണ്ണെറിഞ്ഞാൽ ഉടനെ എനിക്കും അവൾക്കും ഇടയിൽ കയറി നിന്നു എൻറെ അന്നം മുടക്കി ആകുക
ഇങ്ങനെ ഒക്കെ കാണിക്കുമ്പോൾ എൻറെ കൈ അറിയാതെ തരിച്ചു പോകുന്നതാണ്
പിന്നെ എൻറെ കൈ എത്ര തരിച്ചാലും, കാറിയോ കൂവിയോ അച്ഛന്റേം അമ്മേടേം കൈ തരിപ്പിക്കാൻ അവൾക്കു പ്രത്യേക കഴിവുമാണ് !
പക്ഷേ ഇനി അവൾക്കിട്ട് രണ്ടു കൊട്ടണേൽ അവനോടു ചോദിക്കണം.
പിന്നെ എൻറെ പുറകെ നടന്ന വായാടി ഇപ്പോ മസിലു പിടിച്ചു വന്നു എടാ ചേട്ടാ നിനക്ക് സുഖമാണോ എന്നൊരു ചോദ്യവും ചോദിച്ചു പോകുമ്പോൾ എവിടെയൊക്കെയോ ഒര് വേദന
എന്തൊക്കെ ആണേലും അവളുണ്ടാക്കുന്നതു തിന്നേണ്ടി വരുന്ന അളിയനെ ഓർത്തെനിക്ക് സഹതാപമുണ്ട്
എന്നാലും അളിയാ എനിക്ക് നിങ്ങളോട് കുശുമ്പ് തന്നെ ആണ്. എനിക്ക് അഞ്ചു വയസുള്ളപ്പോൾ കിട്ടിയ കളിപ്പാട്ടം ആണ് അവൾ. ഉടയാതെ, നുറുങ്ങാതെ ഞാൻ കൊണ്ട് നടന്ന കളിപ്പാട്ടം
അവളെയും കൊണ്ട് പോയ നിങ്ങളോടെനിക്ക് അഞ്ചു വയസുകാരന്റെ കളിപ്പാട്ടം തട്ടി എടുത്തവനോട് തോന്നുന്ന അതേ വികാരമാണ്
എൻറെ മനസ്സിൽ ഇന്നും അവൾക്കു ഒര് വയസും എനികാറും.. ഇതൊരു കുറ്റമാണോ അളിയാ. . ആണെങ്കിൽ നിങ്ങൾ ഒന്ന് ക്ഷമീര്
എൻറെ കുശുമ്പ് മാറുകയിലല്ല എന്റളിയ

Sabaries

രാവിലെ എഴുന്നേറ്റപ്പോൾ തന്നെ ശ്രദ്ധിച്ചു ശ്രീമതിയുടെ മുഖം കുറച്ചു വീങ്ങി ഇരിക്കുന്നു

രാവിലെ എഴുന്നേറ്റപ്പോൾ തന്നെ ശ്രദ്ധിച്ചു ശ്രീമതിയുടെ മുഖം കുറച്ചു വീങ്ങി ഇരിക്കുന്നു
8 മണിക്ക് ആശുപത്രിയിൽ എത്തേണ്ട ഞാൻ 7.40നു എണീറ്റത്തിന്റെ കലിപ്പായിരിക്കും എന്നു കരുതി മിണ്ടാൻ പോയില്ല
പല്ല് തേച്ചു തേച്ചില്ലന്നു വരുത്തി ഒരു കുളിയും കഴിഞ്ഞു. ഞാൻ ഓടി രക്ഷപെട്ടു
അവിടെ ചെന്നപ്പോൾ ജൂനിയർ ഡോക്ടർ അങ്കിത വെളുക്കെ ചിരിച്ചു കൊണ്ട് വരുന്നു
ഗുഡ് മോർണിംഗ് സർ
ഗുഡ് മോർണിംഗ് !!!ഞാൻ അകത്തേക്ക് വെച്ചു പിടിച്ചു
അങ്കിത വിടാൻ ഉള്ള ഭാവമില്ല
"സർ ഇന്നെന്റെ ബർത്ഡേയ് ആണ് " ഒന്ന് വിഷ് ചെയ്തിട്ട് പോകു സർ
ഓഹോ സോറി അങ്കിത മെനി മെനി ഹാപ്പി റിട്ടേൺസ് ഓഫ് ദി ഡേ !!!

ഈവെനിംഗ് ചെറിയ ഒരു പാർട്ടി ഉണ്ട് സർ തീർച്ചയായും വരണം
ഓഹോ ഷ്വർ എന്നു പറഞ്ഞെങ്കിലും എങ്ങനെ എങ്കിലും ഒഴിയാം എന്നായിരുന്നു കണക്കു കൂട്ടൽ
കേസ് കഴിഞ്ഞു ഇറങ്ങുമ്പോൾ ആറര
ഐ സി യൂ ലേക്ക് മാറ്റിയ പേഷ്യന്റനെ കണ്ടിട്ട് ഇറങ്ങാൻ തുടങ്ങുമ്പോൾ ജൂനിയർ ഡോക്ടർ രാജീവ്‌ വന്നു പിടിത്തമിട്ടു
സർ അങ്കിതയുടെ പാർട്ടിക്ക് വരുന്നില്ലേ
ഓ ഇല്ല നിങ്ങൾ പോയിട്ട് വാ എന്നു പറഞ്ഞിട്ട് അവനുണ്ടോ വിടുന്നു !! കൂടേ ഉള്ളവർ കോറസായി സർ വാ വാന്നു !!
ഒടുവിൽ മുഖം മാത്രം കഴുകി അവരുടെ കൂടേ വെച്ചു പിടിച്ചു
എല്ലാരുടേം കയ്യിൽ ഓരോ പൊതിക്കെട്ടുകൾ !!!
ഹോ ഗിഫ്റ്റ് !!!
അല്ലെങ്കിലേ അവൾ പറഞ്ഞു വിഷ് ചെയ്യിപ്പിച്ചപ്പിച്ചു രാവിലെ ഇനി ഗിഫ്റ്റ് കൂടി ഇല്ലെങ്കിൽ മോശമാണ് !!!
വഴിയിൽ കണ്ട ഒരു ഗിഫ്റ്റ് കടക്കു മുൻപിൽ വണ്ടി നിർത്തി ഓടി പോയി ചേട്ടാ ഒരു ഗിഫ്റ്റ് എന്നു പറഞ്ഞപ്പോൾ
ആർക്കാണ് ?? ഒരു പെൺകുട്ടിക്കാണ് "ബർത്ഡേയ് ഗിഫ്റ്റ് "
അയാൾ കൈയ്യിൽ കിട്ടിയതൊക്കെ എൻറെ മുൻപിൽ നിരത്തി വെച്ചു
ഒരുമാതിരി പട്ടിക്കു മുഴുവൻ തേങ്ങ കിട്ടിയത് പോലെ ഒന്നും മനസിലാകാതെ നിൽക്കുന്ന എൻറെ മുൻപിലേക്ക് അയാൾ ഒരു പൂച്ചക്കുട്ടിയെ മാറ്റി വെച്ചു
സർ ഇത് നോക്ക്" വെളുത്ത പൂച്ച കുട്ടി, ചുവന്ന റിബ്ബൺ കഴുത്തിനു ചുറ്റും "
ഹാപ്പി ബര്ത്ഡേ ടു യൂ എന്നു പാട്ടും പാടും സ്വിച്ച് ഇട്ടാൽ
പെൺകുട്ടികൾ അല്ലേ ഇത് ഇഷ്ടപെടും എന്നയാളും
ആഹ് എന്തേലും ആകട്ടെ
പെട്ടന്ന് പൊതിഞ്ഞു വാങ്ങി ഓടി ചാടി ചെന്നപ്പോൾ എല്ലാരും വന്നു എനിക്കായ് വെയ്റ്റിംഗ്
ആരോ വാങ്ങിയ കേക്ക് മുറിച്ചു
കത്തിയും വെച്ചു, ഫുഡും കഴിച്ചു അവൾക്കു ഒരിക്കൽ കൂടി ബര്ത്ഡേ വിഷ് ചെയ്തു വീട്ടിലേക്കു വിട്ടു അപ്പോൾ മണി പത്തു
വീട്ടിൽ ചെന്ന് ബെല്ലടിച്ചപ്പോൾ കുളിച്ചു സുന്ദരി ആയി കേരളാ സാരി ഉടുത്തു മുല്ലപ്പൂവും വെച്ചു റെഡി ആയി നിന്ന ഭാര്യ എന്നെ നോക്കി ദഹിപ്പിച്ചിട്ടു തല വെട്ടിതിരിച്ചു ബെഡ്റൂമിലേക്ക് പാഞ്ഞു പോയി
കാര്യമറിയാതെ മണ്ടനെ പോലെ ഞാനും
എന്നോടുള്ള ദേഷ്യം സാരിയോട് തീർക്കുകയാണ്
എന്താടി എന്നു ചോദിക്കാൻ വാ തുറന്ന ഞാൻ ഞെട്ടി !!!
ബെഡിൽ നാലഞ്ചു ഗിഫ്റ്റ് പാക്കറ്റ്സ് !!!
പോരാത്തതിന് ബെഡിൽ കിടന്ന അവളുടെ മൊബൈലിൽ ഫേസ്ബുക്ക് ഓപ്പൺ ആണ്
"അങ്കിതയോടൊപ്പം കേക്ക് മുറിക്കുന്ന ഗ്രൂപ്പ് ഫോട്ടോയിൽ എന്നെ ഏതോ ദ്രോഹികൾ ടാഗ് ചെയ്തിരിക്കുന്നു !!!
അതിനു മേലെ താങ്ക് യൂ ശബരി സർ ഫോർ ദിസ്‌ ക്യൂട്ട് കിറ്റി ആസ് ബർത്ഡേയ് ഗിഫ്റ്റ് !!!!"
അങ്കിത ജനിക്കേണ്ടിയിരുന്നില്ല !!!അതോ ഞാനോ

Sabaries

ഗാന്ധി ജയന്തി

കല്യാണം കഴിഞ്ഞ സമയത്താണ് നമ്മുടെ ഭാര്യ ഒരു ആഗ്രഹം പറയുന്നത്. അവൾ ചോദിച്ചാൽ ചങ്കെടുത്ത കൊടുക്കാനും തയ്യാറായിട്ടാണ് നിന്നിരുന്നതെങ്കിലും അവളുടെ ചോദ്യം എൻറെ ചങ്കിടിപ്പിക്കുന്നതായിരുന്നു
എനിക്ക് കുറച്ചു കള്ള് വേണം !!
ഞാനൊരു ഞെട്ടലോടെ അവളെ നോക്കി എൻറെ ശ്രീമതി തന്നെയാണോ പറഞ്ഞത് ?? ദൈവമേ ഞാൻ ഒരു കുടിയത്തിയെ ആണോ കെട്ടിയതു !!!
ആദ്യം കാണാൻ ചെന്നപ്പോഴേ ഇവളുടെ അച്ഛൻ കുടിക്കത്തില്ലെന്നു ഗീർവാണം മുഴക്കിയപ്പോഴേ ഓർത്തതാ.. അങ്ങേരു തള്ളുവാന്നു !!!0
പണ്ട് അമ്മാവൻ കൊണ്ട് വന്നപ്പോൾ മിച്ചമിരുന്നത് അനിയത്തി എടുത്ത് കുടിച്ചിട്ട് കൊള്ളാമെന്നു പറഞ്ഞപ്പോൾ മുതൽ ഉള്ള ആഗ്രഹം ആണ്!!.
എൻറെ കണ്ണു തള്ളി.. എൻറെ ദൈവമേ ഇതെന്തു കുടിയന്മാരുടെ കുടുംബമോ !!!എന്നോടിത് വേണാരുന്നോ
ഇവളും, വാല് പോലിരിക്കുന്ന ആ അനിയത്തി പെണ്ണും കള്ള് കുടിക്കുമെന്നോ, അതും അമ്മാവൻ കൊണ്ട് കൊടുത്തിട്ടു !!!സ്കൂൾ മാഷായ എന്റച്ഛനിതറിഞ്ഞാൽ
ഞാൻ സംയമനം വീണ്ടെടുത്ത് കൊണ്ട് നേർത്തൊരു വിറയലോടെ അവളോട്‌ ചോദിച്ചു.അല്ല നീ ഏത് ബ്രാന്റാ ഉദ്ദേശിച്ചേ ???
ബ്രാന്റ് ഒന്നുമല്ല മനുഷ്യാ ഞാൻ കള്ളിന്റെ കാര്യമാ പറഞ്ഞെ !!മധുരക്കള്ളില്ലേ, അത് കുടിച്ചാൽ തംസ് അപ്പ് പോലുണ്ടെന്ന അവൾ പറഞ്ഞെ
എന്റെ ശ്വാസം നേരെ വീണു !
അപ്പോഴാണ് അടുത്ത കീറാമുട്ടി !!! അല്ല ഇനി ഇപ്പോൾ മധുര കള്ളിന് ഞാൻ എവിടെ പോകും... ഇതു ആലോചിച്ചു തല പൊകച്ചു നികുമ്പോഴാ അടുത്ത ഡിമാൻഡ്
"നിങ്ങളിതാരോടും പറയല്ലേ എനിക്ക് നാണക്കേടാ "
പിന്നെ ഇപ്പോൾ ഞാൻ പനയിൽ കേറി കള്ള് കട്ടോണ്ട് വരണമെന്നാണോ നീ ഉദ്ദേശിക്കുന്നത് ??ഞാനവളെ സൂക്ഷിച്ചു നോക്കി
അല്ലെങ്കിലും ഇതെവിടെ കിട്ടുന്നു എനിക്ക് അറിഞ്ഞു കൂടാ
അതേയ് നമ്മൾ വരുന്ന വഴി ഞാൻ ഒരു ഷാപ്പ് കണ്ടിരുന്നു
ഹോ അല്ലെങ്കിലും ഇവള് വേണ്ടാത്തതൊക്കെയെ കാണു!!
നിങ്ങൾ അവിടെ പോയി ഏതേലും ചെത്തു കാരനെ കണ്ടു പിടിച്ചു പറഞ്ഞാൽ അവര് കൊണ്ട് തരും !
ഭയങ്കരി !!!
കാണുന്നവരോടൊക്കെ കള്ള് കുടിച്ചാൽ കരളു വാടുമെന്നു പറഞ്ഞു ഉപദേശിക്കുന്ന ഞാൻ തന്നെ കള്ളും അന്വേഷിച്ചു കള്ള് ചെത്തുകാരനെ തേടി നടക്കുന്നത് നാട്ടുകാരറിഞ്ഞാൽ !!!
നീ തന്നെ പൊക്കൊന്നു പറയണമെന്ന് ഉണ്ടാരുന്നേലും അവളുടെ മുഖം കണ്ടപ്പോൾ പറഞ്ഞില്ല
ഒടുവിൽ ഷാപ്പിനടുത്തുള്ള ചങ്ക് ബ്രോയുടെ കാലിൽ വീണു കാര്യം പറഞ്ഞു.കള്ള് കിട്ടിയില്ലെങ്കിൽ ബെഡ് റൂമിൽ എനിക്ക് ഗാന്ധി ജയന്തി ആഘോഷിക്കുന്ന കുടിയന്റെ അവസ്ഥ ആയിരിക്കുമെന്ന് പറഞ്ഞപ്പോൾ ഒടുവിൽ അവൻ സമ്മതിച്ചു .. ഒരു ചെത്തു കാരനെ കണ്ടു പിടിച്ചു.
എത്ര കുപ്പി വേണം ???
കുപ്പി ഒന്നും വേണ്ടായിരിക്കും അല്ലേടാ ??ഇവന്റെ ഭാര്യക്കാ ചേട്ടാ വല്ല അര ഗ്ലാസും മതിയാരിക്കും !!! അവൻ എന്നെ നോക്കി
ഞാൻ തല ആട്ടി.
നാളെ വൈകിട്ട് ഞാൻ വീട്ടിലോട്ടു കൊണ്ട് വരാം കുഞ്ഞേ
അയ്യോ വേണ്ടാ ചേട്ടാ ഞാൻ വന്നു എടുത്തോളാം!! ഇനി കഷ്ടകാലത്തിനു അച്ഛനും അമ്മയും ഉള്ളപ്പോൾ കള്ളും കൊണ്ട് ഇങ്ങേരു വരണ്ട
അടുത്ത ദിവസം വൈകിട്ട് ഒളിച്ചും പാത്തും സന്ധ്യ കഴിഞ്ഞപ്പോൾ ഷാപ്പിൽ പോയി സാധനം എടുത്തോണ്ട് വന്നു
ഇന്ന് ഇതും കുടിച്ചു ആഘോഷിക്കാം എന്നു കരുതി പാട്ടും പാടി പതിവിലും നേരത്തെ ബെഡ് റൂമിൽ ഹാജർ വെച്ചു !
അതിങ്ങോട്ടു എടുക്കെടി എന്നു പറഞ്ഞപ്പോൾ ആ ദ്രോഹി പറയുവാണ്
അതേയ് അതെനിക്കിഷ്ടപെട്ടില്ല.. ഏതാണ്ട് ഒരു ചുവ!! ഇനി വെച്ചോണ്ടിരുന്നു അമ്മയെങ്ങാൻ കാണേണ്ട എന്നോർത്ത് ഞാനാ തെങ്ങിന്റെ ചുവട്ടിലോട്ടു ഒഴിച്ച് കുപ്പിയും കഴുകി വെച്ചു !!!!
ഞാൻ ഞെട്ടി.. സത്യം പറയെടി നീ ഒറ്റക്ക് വലിച്ചു കേറ്റിയിട്ടു കള്ളം പറയുന്നോ എന്നു ചോദിക്കണം എന്നുണ്ടാരുന്നേലും ഗാന്ധി ജയന്തി ഓർത്തു ഞാൻ കടിച്ചു പിടിച്ചു
പിറ്റേ ദിവസം എഴുന്നേറ്റു ചെന്നപ്പോൾ അച്ഛനുണ്ട് കനത്ത മുഖവുമായി മുൻപിൽ.അമ്മയുടെ മുഖത്ത് നാണം കെട്ട ഭാവം
നീ ഷാപ്പിൽ പോയി കള്ള് മേടിച്ചോ ???
ഞാൻ മിണ്ടിയില്ല. സത്യം പറയെടാ മേടിച്ചതും പോരാഞ്ഞിട്ട് നീ അത് അവൾക്കെന്നും പറഞ്ഞോടാ നാണം കെട്ടവനെ... എങ്ങനെ തോന്നി ??!!!
അത് അവൾ മധുര കള്ള് വേണോന്നു പറഞ്ഞപ്പോൾ ഞാൻ വിക്കി !!
അവർ ഒരു ഞെട്ടലോടെ അവളെ നോക്കി
സംഭവം ഇതാണ്
കള്ളും കൊണ്ട് ഷാപ്പിൽ കൊണ്ട് ചെന്ന ചെത്തു കാരൻ ചേട്ടൻ രണ്ടെണ്ണം അടിച്ചു കഴിഞ്ഞു മുതലാളിയോട് പറഞ്ഞതാണ്
""ഈ കുപ്പി നമ്മുടെ മാഷിന്റെ മോന്റെ കെട്ടിയോൾക്കുള്ളതാണ് !ആ കൊച്ചൻ വരുമ്പം കൊടുത്തേക്കണേ "
കേട്ട കര കമ്പികൾ എല്ലാം കൂടി മാഷിന്റെ വീട്ടിലെ പുത്തൻ പെണ്ണിന്റെ കള്ള് കുടി ഒര് നാട് മൊത്തം പറഞ്ഞു പരത്തി ഒടുവിൽ മാഷിൽ വരെ എത്തിച്ചു !
പുറത്തോട്ടു ഇറങ്ങിയാൽ ചായകടേലെ നാണു ചേട്ടൻ അടക്കി ചിരിക്കുന്നു. !!
ചിലരുടെ മുഖത്ത് സഹതാപം. ചിലർക്ക് പരിഹാസം, കുഞ്ഞു പിള്ളേർ വരെ ചേട്ടോ കുപ്പിയോരൊണ്ണം ഉണ്ട് എടുക്കട്ടോ ചേച്ചിക്ക് കൊടുക്കാന്നു !!!
അവൾക്കും കിട്ടി. നേരിട്ടും, ഫോണിലും എല്ലാം. ഗർഭിണി ആകുമ്പോഴേക്കും നിർത്തണെ എന്നു വരെ !!!!
എൻറെ കുഞ്ഞേ ഈ പൊട്ടനോട് പറഞ്ഞ നേരത്തു എന്നോട് പറഞ്ഞാർന്നെൽ ഞാൻ പാനി കാച്ചാൻ ആണെന്ന് പറഞ്ഞു ഇവിടെ വരുത്തി തന്നേനെല്ലോ എന്ന അമ്മയുടെ ചോദ്യം കൂടി ആയപ്പോൾ
എനിക്ക് പിന്നത്തെ രണ്ടാഴ്ച ഗാന്ധി ജയന്തി ആയിരുന്നെന്നു പ്രത്യേകം പറയേണ്ടതില്ലല്ലോ

Sabaries

DON'T MISS

Nature, Health, Fitness
© all rights reserved
made with by templateszoo