എത്രയും ബഹുമാനപ്പെട്ട കോവാലൻചേട്ടന് ,
ചേട്ടന് തോന്നുമ്പോ എടുത്തുതട്ടാനുള്ള ചെണ്ടയല്ല ഞാൻ.. ഇന്നലെവരെ ഇതൊന്നും ഞാൻ പറയാതിരുന്നത് അറിയാഞ്ഞിട്ടല്ല.. പക്ഷേ ചേട്ടനോട് അല്പം ബഹുമാനവും സ്നേഹവും മനസ്സിൽ സൂക്ഷിച്ചിരുന്നതുകൊണ്ടാണ്
ചേട്ടാ,
ചേട്ടാ,
ചേട്ടനൊരമ്മയുണ്ടോ, .. യ്യോ.. സോറി . മലയാളത്തിൽ ടൈപ്പ് ചെയ്തപ്പോൾ അങ്ങനെയായിപ്പോയതാ.. ഇനി അതിന്റെപേരിൽ ആ പണ്ടാരക്കാലി എന്റെ നെഞ്ചത്തോട്ടുകേറാൻ വന്നാൽ ഞാൻ നല്ല മടലെടുത്ത് അവളുടെ ചന്തിക്കിട്ട് കൊടുക്കും ..ന്ഹാ ഹാ .. എന്നോടാ കളി ! ചേട്ടനോർമ്മയുണ്ടോ എന്നാ ചേട്ടാ ഞാൻ ചോദിച്ചത്..
നമ്മടെ കല്യാണം കഴിഞ്ഞ നാളുകളിൽ എന്റെ തിരുപ്പൻവച്ചുകെട്ടിയ കോഞ്ഞാട്ടമുടിയിൽ തഴുകിക്കൊണ്ട്, ഞരമ്പുകൾ പാമ്പുംകോണിയും കളിക്കുന്ന എന്റെ കൈകളിൽ തലോടിക്കൊണ്ട് ചേട്ടൻ പറഞ്ഞിട്ടുണ്ട് . നീയെന്റെ ജീവനാണ്. .. നീയെന്റെ പൊന്നാണ് എന്നൊക്കെ. ല്ലേ ? ല്ലേ ?
അപ്പോഴും കൈകളിലെ പൊരിമാറ്റാൻ ഞാൻ വീക്കോ .. യ്യോ. വീക്കോ മോന്തയ്ക്കു തേക്കുന്നതാണല്ലോ ? വാസക്ടമി .. അതുമല്ല . കോപ്പ്.. വാസക്ടമി ചേട്ടനുള്ളതാണല്ലോ? വാസലിൻ പുരട്ടിക്കൊണ്ട് ചേട്ടനെ പുണർന്നപ്പോൾ.. ചേട്ടൻ പറഞ്ഞു കുറച്ച് നിവിയകൂടെ തേച്ചോ മോളെ.. നല്ല മണം കിട്ടുമെന്ന്. ല്ലേ ? ല്ലേ ?
അപ്പൊ ഞാൻ പറഞ്ഞു ചേട്ടാ .. എനിക്ക് നല്ല റേഷനരിയുടെ മണമാണ് ഇഷ്ടം.. ഇല്ലെങ്കിൽ കൊറച്ച് മണ്ണെണ്ണ വാങ്ങിത്തരൂ പ്രാണസഖാ .. ഞാനൊന്നു ആസ്വദിച്ചു മണക്കട്ടെ ന്നൊക്കെ പറഞ്ഞപ്പോ.. ഒരിക്കലും തൊറക്കാത്ത റേഷന്കടയിൽപ്പോയി അവരുടെ മാതാവിനെയും പിതാവിനെയും അല്പസ്വല്പം കഠിനപദങ്ങൾ പറഞ്ഞുകൊണ്ട് എന്റെ ചേട്ടൻ എനിക്കുവേണ്ടി ചാക്കരിയും, മണ്ണെണ്ണയും വാങ്ങിത്തന്നട്ടുണ്ട്.. ല്ലേ ? ല്ലേ ?
അതിലുമിഷ്ടം എനിക്കാ പഞ്ചാരയായിരുന്നു ചേട്ടാ .. എലിമുള്ളിയ റേഷന്കടയിലെ പഞ്ചാര മണത്തുനോക്കിയാൽ നിങ്ങളൊക്കെ രണ്ടെണ്ണം വിട്ടുവരുന്ന പ്രതീതിയാണ് ചേട്ടാ ഞങ്ങൾ പെണ്ണുങ്ങൾക്ക് .. അതൊക്കെ ചേട്ടൻ മറന്നു.. എനിക്കതൊന്നും മറക്കാൻ പറ്റില്ലല്ലോ ചേട്ടാ ?
മുളകുപൊടി വാങ്ങിവരുമ്പോൾ അതിൽ മുഴുവൻ ഇഷ്ടികപ്പൊടിയാണെന്നു അങ്ങേലെ കുട്ടപ്പൻചേട്ടൻ പറഞ്ഞപ്പോ .. വലിയകുടത്തിനകത്തേക്ക് പൊടി കൊടഞ്ഞിട്ട് വെള്ളമൊഴിച്ചുനോക്കി ഉറപ്പുവരുത്തിയ ചേട്ടനെ എനിക്ക് നല്ല ഓർമ്മയുണ്ട്..
മല്ലിപ്പൊടി വാങ്ങുമ്പോൾ.. ഉണങ്ങിയ ചാണകപ്പൊടിയാണ് അതിൽ മുഴുവനെന്നു കുട്ടപ്പൻചേട്ടൻ പറഞ്ഞപ്പോൾ.. കൊത്തമല്ലി വാങ്ങി ഉണക്കി പൊടിപ്പിച്ചിട്ട്, . ദാക്ഷായണിത്തള്ളയുടെ തൊഴുത്തിൽനിന്നു ചാണകം അടിച്ചുമാറ്റി വെയിലത്തുവച്ച് ഉണക്കിപ്പൊടിച്ച്, അതിനകത്തു ചേർത്തുതന്ന ചേട്ടനെ എനിക്ക് നല്ലതുപോലെ ഓർമ്മയുണ്ട്..
മാർക്കറ്റിലുള്ള സാധനങ്ങളൊക്കെ മായം കലർന്നതാണെന്നു പ്രചരിച്ചതോടെ, അതിൽനിന്നു രക്ഷനേടാൻ, എന്നാൽ സ്വന്തം ഭാര്യയ്ക്ക് പാക്കുചെയ്ത സാധനങ്ങളാണ് ഇഷ്ടമെന്നറിഞ്ഞുകൊണ്ട്, അവളുടെ ഇഷ്ടങ്ങൾ നടപ്പാക്കാൻ, സ്വയം ബലിയാടായി, ഇങ്ങനെയോരോന്നു കാട്ടിക്കൂട്ടിയ ചേട്ടനെ എനിക്കോർമ്മയുണ്ട്.. എന്നാൽ ചേട്ടനതൊക്കെ മറന്നുപോയി ചേട്ടാ.. ല്ലേ ? ല്ലേ ? എന്നിട്ട് എന്നെയെടുത്തിട്ടു ചവിട്ടിക്കൂട്ടി .. പലപ്പോഴും..
മൂത്തവൻ മോങ്കുട്ടനെയും ഇളയവൾ പങ്കജവല്ലിയേയുംനോക്കി, നാട്ടുകാർ പലരും മായംകലർന്നിട്ടുണ്ടല്ലോ ന്നൊക്കെ പാഞ്ഞപ്പോഴും ചേട്ടൻ കമാ ..ന്നൊരക്ഷരം മിണ്ടിയില്ല . കാരണം ചേട്ടനുതന്നെ അറിയാമായിരുന്നു മായം എവിടെനിന്നാണ് കലർന്നതെന്ന്.. ചേട്ടന് അതിനുള്ള കഴിവില്ലായിരുന്നെന്നു സമ്മതിക്കുന്നതിനുപകരം ചേട്ടൻ കൂട്ടുകാരുമായി വീട്ടിലിരുന്നു കുടിക്കുമ്പോ .. എനിക്കും തന്നു ശീലിപ്പിച്ചതും.. അവസാനം രണ്ടും മൂന്നും കുപ്പി കള്ളൊക്കെ ഞാൻ ഒറ്റയ്ക്ക് അകത്താക്കി മാണ്ടുകിടന്നുറങ്ങിയിരുന്നതും, മോങ്കുട്ടനും പങ്കജവല്ലിയും അതിന്റെ ബാക്കിപത്രങ്ങളാണെന്നുമൊക്കെ ഞാൻ പറയാതെതന്നെ ചേട്ടനറിയാമല്ലോ ..ല്ലേ .? ല്ലേ ?
ഇന്നിപ്പോ, ചേട്ടനോടൊരു ക്ഷമപോലും ചോദിക്കാതെ ഞാൻ കുട്ടപ്പൻചേട്ടന്റെകൂടെ ഇറങ്ങിപ്പോകുന്നു ചേട്ടാ.. കാരണം ചോദിക്കരുത്.. പറയാനെനിക്കൊരു കാരണവുമില്ല .. കുട്ടപ്പൻചേട്ടൻ അത്രയ്ക്ക് നല്ലവനാണ് ചേട്ടാ.. അല്ലെങ്കിൽ നമ്മുടെ ദാമ്പത്യവല്ലരി പൂക്കുന്നതിനും കായ്ക്കുന്നതിനുവേണ്ടി കഷ്ടപ്പെട്ട കുട്ടപ്പൻചേട്ടനെയല്ലാതെ ഞാൻ മറ്റാരെയാണ് ചേട്ടാ കൂടെക്കൂട്ടേണ്ടത്..
മോങ്കുട്ടനെയും പങ്കജവല്ലിയേയും പൊന്നുപോലെ നോക്കണം. അവർക്ക് അമ്മയില്ലാത്തതിന്റെ ഒരു ദുഖവും ചേട്ടൻ കൊടുക്കില്ല എന്നെനിക്കറിയാം.. എങ്കിലും പറയാതെ വയ്യല്ലോ.. പെറ്റവയറായിപ്പോയില്ലേ ചേട്ടാ. നോവും..
കുട്ടപ്പൻചേട്ടന് അസാരം ആസ്ത്മയുടെ ശല്യമുണ്ട് .. അതാണല്ലോ മോങ്കുട്ടൻ ഇടയ്ക്കിടയ്ക്ക് വലിക്കുന്നത്.. എങ്കിലും ഏതെങ്കിലും തണുപ്പുള്ളരാജ്യത്തോട്ടാണ് ടിക്കറ്റെടുക്കുന്നതെന്നാണ് ചേട്ടൻ പറയുന്നത്
പിന്നൊരു സങ്കടം മാത്രം .. ഏഴരയ്ക്കുള്ള 'ഭാര്യ ഒരു പൂങ്കാവനം' എട്ടിനുള്ള 'എണ്ണിയാത്തീരാത്ത കടങ്കഥകൾ' എട്ടരയ്ക്കുള്ള 'ദാമ്പത്യം സുന്ദരം' ഒന്പതിനുള്ള 'അവളൊരു ദേവത' ഈ സീരിയലുകളൊന്നും ഇനി കാണാൻ പറ്റില്ലല്ലോ എന്നോർക്കുമ്പോൾ .. പാതിവൃത്തയായ ഏതു പെണ്ണിനും വേദനിക്കും.. ചേട്ടാ..
പോട്ടേ ചേട്ടാ..
ചേട്ടന്റെ സ്വന്തം..
സുലോചന.
ഒപ്പ് ..
ഒപ്പ് ..
വേണു 'നൈമിഷിക'
