Showing posts with label HudaShabeer. Show all posts
Showing posts with label HudaShabeer. Show all posts

ഓള് വെടക്കാ.........

ഓള് വെടക്കാ.........
@@@@@@@@@@@@
"എന്റെ പെണ്ണേ, ഞാൻ കല്യാണം കഴിഞ്ഞ ഉടൻ അന്നേം കൂട്ടി ഗൾഫിലോട്ട് പോരും ട്ടോ. അടുത്ത ലീവ് കിട്ടാൻ വർഷം ഒന്ന് കഴിയും. നല്ല കാലം മുഴുവനും തമ്മിൽ പിരിഞ്ഞിരുന്നിട്ട് വയസാം കാലത്തു ഒരുമിക്കാൻ എന്നെ കൊണ്ട് പറ്റൂല "
ശരി, ഇക്കാ...
കല്യാണം കഴിഞ്ഞു കുറച്ചു ദിവസങ്ങൾക്ക് ശേഷം സമീറും ശബ്നയും പോകാനൊരുങ്ങിയപ്പോ നാട്ടാരടക്കം പറഞ്ഞു.
"ഓള് മിടുക്കിയാ, കെട്ടിയ ഉടനെ ഓനെ പോക്കറ്റിലാക്കി "
നാട്ടിലെ പെണ്ണുങ്ങളെല്ലാം സമീറിന്റെ ഉമ്മന്റെ സങ്കടത്തിൽ പങ്കു ചേർന്നു.
"ഓൻ പോയാൽ ഇങ്ങക്ക് ഒരു കൂട്ടാകുമെന്ന് വിചാരിച്ചു കെട്ടിച്ചപ്പോ ഇതിപ്പോ ഓള് ഓനെയും കൊണ്ടു പോയി ല്ലേ ? സൈനുത്താ "
അന്നേരം സമീറും ശബ്നയും അജ്മാനിലെ തന്റെ ഒറ്റ മുറി വില്ല വൃത്തി ആക്കുകയായിരുന്നു.
#########################
സീറോ ബാലൻസിൽ ജീവിതം തുടങ്ങേണ്ടി വന്ന സമീറിന് നാട്ടിലേക്കു പൈസ അയപ്പ് ചില മാസങ്ങളിൽ മുടക്കേണ്ടി വന്നു.
അതു സീറോ ബാലൻസ് ആക്കിയ കുടുംബക്കാർ അടക്കം പറഞ്ഞു :
ഓൻ ഇനി അയ്ക്കൊന്നുണ്ടാവില്ല , ഒക്കെ ഓളെ വീട്ടിലേക്കായിരിക്കും. ഓല് കഴിഞ്ഞ മാസം ഒരു സ്കൂട്ടി വാങ്ങിയ കണ്ടീലെ. ഒക്കെ ഓന്റെ പൈസ ആയിരിക്കും. ഓള് ഒരു വല്ലാത്ത സാധനം തന്നെ.
ആ സമയം തങ്ങളുടെ ഒറ്റ മുറി വില്ലയിൽ സമാധാനത്തോടെ സമീറിന്റെ നെഞ്ചിൽ തല ചായ്ച്ചു ഷബ്‌ന ഉറങ്ങുക ആയിരുന്നു. അല്ലെങ്കിലും സന്തോഷം, സമാധാനം തുടങ്ങിയ കാര്യങ്ങൾ പണത്തിൽ നിന്നല്ലല്ലോ വരേണ്ടത്, മനസ്സിൽ നിന്നല്ലേ ? അതവർക്ക് വേണ്ടുവോളം ഉണ്ടായിരുന്നു.
#####################
എടാ, പെരുന്നാൾ ആണ് വരുന്നത്. എനിക്ക് ഈ പ്രാവശ്യം കുറച്ചധികം പൈസ വേണം. ഓൾടെ വീട്ടിലേക്കു ഡ്രെസ്സ് ഒക്കെ എടുക്കണ്ടേ ??
അതെന്തിനാ ഉമ്മാ ? കല്യാണം കഴിഞ്ഞില്ലേ, ഇനി നേരിട്ട് അയക്കാമല്ലോ. അവിടെ ഉള്ളോരും എന്റെ ഉപ്പയും ഉമ്മയുമല്ലേ ?
ഓഹോ. അതെന്താടാ ഓൾടെ വീട്ടിലയക്കുന്നത് ഞാനറിയാതിരിക്കാനാണോ ??അയച്ചോ, മുഴുവനും അയച്ചോ..... ഒക്കെ ഓൾടെ കുത്തി തിരിപ്പായിരിക്കും. എനിക്കറിയാം. ഓളോടൊക്കെ പടച്ചോൻ ചോദിയ്ക്കും.
##############################
ഒരു പ്രവാസിയുടെ ഭാര്യ നാട്ടിൽ നില്കുമ്പോഴുള്ള അവസ്ഥയെ നിങ്ങൾക്ക് എല്ലാർക്കും അറിയുകയുള്ളൂ . ഭർത്താവിന്റെ കൂടെ പ്രവാസം വരിച്ച ഭാര്യമാരുടെ അവസ്ഥ അതിലും ഭയങ്കരമാണ് സൂർത്തുക്കളെ 😩.അതിലെ ചില അവസ്ഥകളാണ് മുകളിൽ എഴുതിയത്.
പിൻ കുറിപ്പ് : ഇത് എന്റെ കഥയാണോന്ന് ചോദിച്ചു ആരും വരണ്ട 😎.ഇതു പലരുടെയും കഥയാണ്.

ഒരൊന്നൊന്നര സമ്മാനം !

ഒരൊന്നൊന്നര സമ്മാനം !
$$$$$$$$$$$$$$$$$$$$$
ടി, ഇയ്യ് വെജാറാവണ്ട. അനക്ക് ലീവ് കിട്ടാത്തൊണ്ടല്ലേ. ഞാൻ ഇന്ന് പണിക്കു പോണില്ല. മോളെ കൂടെ അടിച്ചു പൊളിക്കും. ബാക്കി ഇയ്യ് വന്നിട്ട് വൈകുന്നേരം ആഘോഷിക്കാം... അടിപൊളി ബിരിയാണി ആയിക്കോട്ടെ ! എന്താ ഒക്കെ അല്ലേ ? ഞാൻ ഷൈബുവിനോട് വരുമ്പോ കേക്ക് വാങ്ങി വരാൻ പറഞ്ഞിട്ടുണ്ട്.
ഉപ്പ എന്റെ പിറന്നാൾ ആഘോഷിക്കാനുള്ള പ്ലാൻ ഉമ്മാനോട് രഹസ്യമായി പറയാനെന്ന മട്ടിൽ ഉറക്കെ ഉറക്കെ പറയുന്നുണ്ട്.
എന്റെ മനസിൽ അതൊന്നുമല്ലായിരുന്നു. ഇന്നാണ് ബ്രോക്കർ പറഞ്ഞ ചെക്കൻ വിളിക്കണ ദിവസം. എന്നാലും ന്റെ ബ്രോക്കറെ എന്റെ ബെർത്ഡേയ് ക്ക് വേണായിരുന്നോ ഈ ചതി. ഉപ്പന്റെ ഫോണിലായിരിക്കോ വിളിക്ക ? അതോ എന്റെ ഫോണിലേക്കോ ? ആവോ ആർക്കറിയാം !
ഏയ് ഞമ്മക്ക് പേടിയൊന്നുല്ല. ന്നാലും വീട്ടുകാർ പരസപരം ഇഷ്ടപെട്ട ആലോചന ആണ്‌. ഇനി എന്റെയും ചെക്കന്റേയും സമ്മതം മാത്രമാണ് ബാക്കി. അതും കൂടിയായാൽ അടുത്തത് കല്യാണം !ന്നാലും ഞമ്മക്കൊരു പേടി അല്ലാ ഒരു ടെൻഷൻ. ഒരുപാട് ആൺകുട്ടികൾ കസിൻസ് ആയും ഫ്രണ്ട്‌സ് ആയും ഉണ്ട്. പക്ഷെ, ഇതു അതു പോലെ അല്ലല്ലോ ! ഒരിക്കലും കാണാത്ത ഒരു ചെക്കൻ, ഭാവിയിൽ ഞമ്മളെ കെട്ട്യോനാവാൻ ചാൻസുള്ള ചെക്കൻ.
ഇതിപ്പോ അതൊന്നല്ല പ്രശ്നം. എന്റെ ഭാഷയാണ് പ്രശ്നം ! തമിഴ്നാട്ടിൽ പഠിപ്പും ജോലിയുമൊക്കെയായി അഞ്ചാറു കൊല്ലം അവിടെ നിന്നപ്പോഴേക്കും സംസാരം എല്ലാം തമിഴും, കേരളത്തിലെ എല്ലാ ജില്ലകളും ചേർന്നതായി.
ർണീം...... ർണീം.... ണീം.....
ഉപ്പാന്റെ ഫോൺ... ഗൾഫിലെ നമ്പർ !
പടച്ചോനെ എനിക്ക് വയറു വേദന എടുക്കുന്നു . നെഞ്ച് പുകയുന്നു . തൊണ്ടേല് എന്തോ കെട്ടി നിൽക്കാണല്ലോ ! ഫോൺ കട്ട്‌ ചെയ്താലോ ??
ന്റെ പടച്ചോനേ, ന്നെ കാത്തോളി......
ഹലോ, ആരാ ?
ഹലോ, അസ്സലാമു അലൈകും. എന്റെ പേര് ഷബീർ. ഇന്ന് വിളിക്കുമെന്ന് പറഞ്ഞിരുന്നു.
ഹോ എന്റെ കൂട്ടരെ, ഇത്രയും കേട്ടപ്പോഴേക്കും എനിക്ക് ചുറ്റും ആയിരം റോസാ പൂക്കൾ വിരിഞ്ഞ പോലെ തോന്നി. എന്തു നല്ല സുഗന്ധം !
ചെക്കൻ വീണ്ടും സംസാരം തുടർന്നു.
എനിക്കു ലീവ് അടുത്തൊന്നും കിട്ടാൻ ചാൻസില്ല. എനിക്ക് ഇയാളെ ഇഷ്ട്ടായി ട്ടോ. പിന്നെ ന്റെ ഫോട്ടോ കണ്ടല്ലോ ല്ലേ. അത്ര ഒന്നും കളർ ഇല്ലാട്ടോ . സ്റ്റുഡിയോന്നു എടുത്തതാ, അതോണ്ട് ആ കണക്കു വെച്ചു നോക്കിയാൽ മതി. ഇയാൾക്ക് ഇനി എന്നെ കണ്ടിട്ടാണ് തീരുമാനിക്കാൻ പറ്റോന്നു ഉള്ളെങ്കിൽ ഞാൻ എമർജൻസി ലീവെടുത്തു വരാം.
ചെക്കൻ പിന്നെയും സംസാരം തുടർന്നു. പക്ഷെ, ഞാനൊന്നും കേട്ടില്ല. കാരണം മ്മള് ഫ്ലാറ്റ് !
അങ്ങനെ ജനുവരി 29 നു ഉപ്പയും ഉമ്മയും എനിക്ക് ഒരു സമ്മാനം തന്നു. ഒരൊന്നന്നര സമ്മാനം !
ആ സമ്മാനം എനിക്ക് എപ്പോഴും കൂട്ട് തരും, അപകടങ്ങളിൽ ആ സമ്മാനം ഉറപ്പുള്ള ഒരു മതിലായി നിന്ന് രക്ഷിക്കും, സങ്കടങ്ങൾ വരുമ്പോൾ ആ സമ്മാനം ഒരു കോമാളിയുടെ വേഷം കെട്ടും, തണുക്കുമ്പോൾ സുഖമുള്ള ചൂട് പകരും, സ്നേഹം ഒരു പിശുക്കും കൂടാതെ വാരി കോരി തരുന്ന സമ്മാനം.
ഒരുപാട് തയ്യാറെടുപ്പിനു ശേഷം ഡിസംബർ 20 നു ഉപ്പ എന്റെ കയ്യിൽ വെച്ചു തന്നു ആ സമ്മാനം !
എന്റെ മരണം വരെ ആ സമ്മാനം കൂടെയുണ്ടാകും, ഒരിക്കൽ പോലും പിരിയാതെ..തീർച്ച !
#hudashabeer

പ്രവാസിക്കൊരു കഥ !

Image may contain: 2 people, people smiling, text

അയാൾ ഒരു ഇടത്തരം കുടുംബത്തിൽ ജനിച്ചു. ഏകദേശം ഒരു പതിനഞ്ചു വയസ് ആയപ്പോഴേക്കും പിതാവ് മരണപെട്ടു. അമ്മ കഷ്ടപ്പെട്ട് മകനെ പഠിപ്പിച്ചു. മകൻ വിദേശത്തു ജോലി സ്വന്തമാക്കി. ഇനിയാണ് ടെർണിങ് പോയിന്റ്, വളരെ പ്രധാനപെട്ട പോയിന്റ് !!!!
"അയാൾ ആ കുടുംബത്തിൽ മൂത്ത മകൻ ആയിരുന്നു "
കുബ്ബൂസും തിന്ന് തീപ്പെട്ടി കൂട് പോലെയുള്ള റൂമിൽ ഏഴ് പേരുടെ കൂടെ എട്ടാമനായി ജീവിച്ചു നാട്ടിലെ കടങ്ങൾ തീർത്തു. കടങ്ങൾ തീർത്തിട്ടും നാട്ടിലെ ആവശ്യങ്ങൾ കൂടി വന്നു. ഇരുന്നു തിന്ന് ശീലിച്ച അനിയനും അനിയത്തിയും ആവശ്യങ്ങളുടെ ആക്കം കൂട്ടി.
ഇടക്കു സ്ഥലവും വണ്ടിയും വാങ്ങിച്ചു. നാട്ടിൽ അയാളില്ലാത്തതു കൊണ്ട് അമ്മയുടെയും, വണ്ടി അനിയന്റെ പേരിലും വാങ്ങി. ഒട്ടും ടെൻഷൻ വേണ്ടല്ലോ. തന്റെ കുടുംബമല്ലേ ! പ്രായം മുപ്പതു കടന്നിട്ടും തന്റെ വിവാഹം അമ്മ മറന്നപ്പോൾ അയാൾക് വിഷമം ഇല്ലായിരുന്നു. പാവം അമ്മ, പ്രായം കൊണ്ട് മറന്നതായിരിക്കും !
എല്ലാ വെള്ളിയാഴ്ചയും ഫോൺ വിളികൾ വന്നു കൊണ്ടേയിരുന്നു. അയാളുടെ വസ്ത്രങ്ങൾക്ക് നിറം മങ്ങുകയും നാട്ടിലുള്ളവരുടെ വസ്ത്രങ്ങൾക്ക് നിറം കൂടുകയും ചെയ്തു. ഒരിക്കൽ എല്ലാ പ്രവാസികളെയും പോലെ അയാളുടെ ജോലിയും നഷ്ടപ്പെട്ടു. അപ്പോഴും കടലോളം ആഴമുള്ള വീട്ടുകാരുടെ ആഗ്രഹങ്ങൾ(അത്യാഗ്രഹങ്ങൾ ) ബാക്കിയായിരുന്നു. അതു പൂർത്തിയാക്കാൻ കഴിഞ്ഞില്ലെങ്കിലും അയാൾക് ആകെയുള്ള സമാധാനം തന്റെ അധ്വാനത്തിന്റെ ശേഷിപ്പുകൾ സ്ഥലമായും, വാഹനമായും നാട്ടിലുണ്ടല്ലോ എന്നായിരുന്നു.
അയാൾ നാട്ടിലെത്തി.
അതോടെ കഥ കഴിഞ്ഞു !!!
അയാളുടെയും കഥയുടെയും....
(ഈ അയാളെ നിങ്ങൾക് രാമനെന്നോ, അബ്ദുള്ള എന്നോ, വർഗീസെന്നോ വിളിക്കാം ! )
#hudashabeer

ട്രെയിൻ

Image may contain: 1 person

അവൾ പതിവ് പോലെ ബുക്കും പേനയും എടുത്തു. മുപ്പതു ദിവസത്തിലൊരിക്കൽ ഇതു പതിവാണവൾക്. ജീവിതം രണ്ടറ്റവും കൂട്ടി മുട്ടിക്കാനുള്ളെഴുത്തു.
ഹോ. ഈ മാസമെങ്കിലും കുറച്ചു പൈസ ബാക്കി ഉണ്ടാകും. രണ്ടു വർഷമായി എന്തെങ്കിലും ഒന്നെടുത്തു വെക്കാൻ ശ്രമിക്കുന്നു, ഒന്നും നടന്നില്ല. കല്യാണം കഴിഞ്ഞ തുടക്കത്തിൽ തന്നെ ഒരു കാര്യം മനസിലായി. ഇക്ക ഒന്നു തളർന്നാൽ താങ്ങി നിർത്താൻ താൻ അല്ലാതെ വേറെ ആരുമില്ല. പണത്തിന്റെ തൂക്കം വേണ്ടിയിരിക്കുന്നു ബന്ധങ്ങൾ നിലനിർത്താൻ!
ഇപ്പോൾ തന്നെ താനും മോളും ഇക്കാന്റെ കൂടെ ഇവിടെ സ്ഥിരം ആയപ്പോ നാട്ടുകാരുടെയും വീട്ടുകാരുടെയും വിചാരം ഇക്ക ഇവിടെ പണം കൊയ്യാണെന്നാ. അവർക്കറിയില്ലല്ലോ, എപ്പോൾ വേണമെങ്കിലും കറന്റും വെള്ളവും നിലയ്ക്കാവുന്ന നാല് ചുവരുകൾക്കിടയിലാണ് ജീവിതമെന്നു.
കഷ്ടപാടാണെങ്കിലും ഒരുമിച്ചു ജീവിക്കാമെന്നാണ് ആകെയുള്ള മെച്ചം. അല്ലെങ്കിൽ തന്നെ വിരഹ വേദനയും അനുഭവിച്ചു സാമ്പത്തികഭദ്രതയും ഇല്ലാതെ ആയുസ് തീർത്തിട്ട് എന്തു ലാഭം ഉണ്ടാവാനാണ്? ഒരുപാട് പേരുടെ ആഗ്രഹങ്ങൾ തീർത്തു തരുന്ന ഭൂമിയിലെ ദൈവമാണ് പ്രവാസി. അങ്ങനെ ഉള്ള ഒരു ദൈവത്തിനു സഹായമായി തണലായി ജീവിക്കുമ്പോഴല്ലേ ജീവിതം പൂർണമാകുന്നത് ?
ആലോചിച്ചു സമയം പോയതറിഞ്ഞില്ല. ഈ മാസം മുതൽ മിച്ചം വെച്ചാൽ വിവാഹ വാർഷികം ആകുമ്പോഴേക്കും ഇക്കാക്ക് ഒരു കല്ലു വെച്ച വെള്ളി മോതിരം വാങ്ങണം. ചെറുപ്പം മുതലുള്ള ആഗ്രമാണെന്നും ബാപ്പാന്റെ മരണത്തിനു ശേഷം ഉത്തവാദിത്വത്തിന്റെ ഒഴുക്കിൽ മുങ്ങി പോയെന്നും ഒരിക്കൽ ഇക്ക പറഞ്ഞിട്ടുണ്ട്. പിന്നെ നല്ലൊരു ക്യാമറ വാങ്ങണം. ഇപ്പോൾ എല്ലാരുടേം കൈയിൽ ഉണ്ട്. മുന്തിയത് തന്നെ വാങ്ങണം. ഒരു ഗൾഫ് കാരനായിട്ട് കൂടി ഇക്കാക്ക് വേണ്ടി ഒന്നും വാങ്ങിയിട്ടില്ല . ഈ പ്രായത്തിലെ ആണുങ്ങൾ എന്തൊക്കെ വാങ്ങി അടിച്ചുപൊളിക്കുന്നു !
ഈ പ്രാവശ്യം എന്തായാലും നടക്കും.
പെട്ടെന്നാണ് അവളുടെ ഫോൺ റിങ് ചെയ്തത്. ഇക്കാന്റെ ഉമ്മയാണ് !
ദാ, ഞാനാണ്. ഓനെ വിളിചിനു. കിട്ടുന്നില്ല. ഓനോട്‌ ഈ മാസം കുറച്ചു പൈസ അധികം അയക്കാൻ പറയണം. ഓന്റെ മാമന്റെ മോളെ കല്യാണം അടുത്ത് വരല്ലേ. മാമൻ സഹായം ചോദിച്ചിക്ക്ണ്. ഇങ്ങളിപ്പോ അവിടല്ലേ. വീടൊന്നും ഇപ്പോളൊന്നും ഉണ്ടാക്കാൻ പോണില്ലല്ലോ. ഓനോട്‌ കാര്യായി സഹായിക്കാൻ പറയണം. ഓനൊരു ആവശ്യം വരുമ്പോ സഹായിക്കാമെന്ന് മാമൻ പറഞിണ്ട് . ന്നാ, ഞാൻ വെക്കാ ട്ടോ. പൈസ ഇപ്പോ തീരും.
ഉമ്മ ഫോൺ വെച്ച് കഴിഞ്ഞപ്പോൾ അവൾ പേജു തീരാറായ ബുക്ക്‌ മടക്കി വെച്ചു.
അല്ലെങ്കിലും ആഗ്രഹങ്ങൾ ട്രെയിൻ പോലെയാണ് അവസാനമില്ലാത്ത ബോഗികളുള്ള നീണ്ട ട്രെയിൻ. അതെന്നായാലും ഒരിക്കൽ സ്റ്റേഷനിൽ എത്തിച്ചേരും തീർച്ച !

ഏയ്, ഒരിക്കലുമില്ല !


ഏയ്, ഒരിക്കലുമില്ല !
################
മോളെ, ന്റെ കെട്ട്യോളെ... എണീക്.
ദോശയും ചട്ണിയും ഉണ്ടാക്കി വെച്ചിട്ടുണ്ട്. വന്നു കഴിക്ക്, പനി ഒന്ന് മാറിയതല്ലേ ഉള്ളൂ.
രേണു എഴുന്നേറ്റു വന്ന് മേശയിൽ നോക്കിയപ്പോ ഞെട്ടി പോയി. കല്യാണം കഴിഞ്ഞു രണ്ടു വർഷമായി, ഇന്നേ വരെ അടുക്കള കാണാത്ത മനുഷ്യൻ എനിക്ക് വേണ്ടി ഫുഡ്‌ ഉണ്ടാക്കി വെച്ചിരിക്കുന്നു !
രേണു സന്തോഷം കൊണ്ട് രവിയുടെ കവിളിൽ അമർത്തി ചുംബിച്ചു.
അല്ലെടാ കെട്ട്യോനെ, ഇങ്ങളെ താടി വടിച്ചോ ? വല്ലാത്ത പതു പതുപ്പ്.
@@@@@@@@@@@@
ഡോ.... ഞാൻ ഓഫീസിൽ പോവാണുട്ടോ.
രവിയുടെ ശബ്ദം കേട്ട് രേണു പെട്ടന്നു ഉണർന്നു .
ശ്ശെടാ. അപ്പോ താൻ കണ്ടത് സ്വപ്നം ആയിരുന്നോ ? ഈ തലയിണയെ ആണോ ഞാൻ ചുംബിച്ചത്? അല്ലെങ്കിലും തനിക്ക് സ്വപ്നം കാണാൻ ആണ്‌ വിധി. പെണ്ണായി പിറന്നു പോയില്ലേ ? ഭർത്താവിന്, ഭർത്താവിന്റെ കൂട്ടക്കാർക്, മക്കൾക്ക് ഇവർക്കെല്ലാം വെച്ചു വിളമ്പി പുകഞ്ഞു തീരാനാണ് എന്റെയൊക്കെ വിധി.
അടുത്ത ജന്മത്തിൽ ആണായി പിറന്നാൽ മതി. ഒന്ന് ഓഫീസിൽ പോയി ഇരുന്നാൽ ശമ്പളം ആയി, അടിച്ചു പൊളിക്കലായി. ഈ പെണ്ണുങ്ങൾക് അങ്ങനെ ആണോ ? ഒരു ദിവസം എത്ര വിധത്തിലുള്ള പണികളാ ??
ഓരോന്നും പുലമ്പി കൊണ്ട് രേണു എണീറ്റു. ഡൈനിങ്ങ് ടേബിളിലെ മൂടി വെച്ച പാത്രങ്ങൾ കണ്ട് രേണുവിന് ദേഷ്യം വന്നു.
ഇന്നലെ കഴിച്ച ഭക്ഷണത്തിന്റെ ബാക്കി കളയാതെ മൂടി വെച്ചിരിക്കുന്നു. എന്റെ മടിയനായ കെട്ട്യോൻ.
എന്റീശ്വരാ.. ഈ മടിയന്റെ കൂടെ ജീവിക്കാൻ വയ്യ!ചത്താൽ മതി.
ഇത്രയും പറഞ്ഞു പാത്രങ്ങളുടെ മൂടി തുറന്നപ്പോൾ രേണു കണ്ടത് ആവി പറക്കുന്ന ദോശയാണ് !!!!
#######################
ഭർത്താവിനെ മുൻ വിധികളോടെ സമീപിക്കുന്ന ഭാര്യന്മാർക് ഈ കഥ സമർപ്പിക്കുന്നു

ഞാൻ പറഞ്ഞോ ?

ഞാൻ പറഞ്ഞോ ?
------------------------------
ഇക്കാ , എനിക്ക് പുതിയ രണ്ടു കോഴ്സിന് ചേരണം. 75000 രൂപ മാത്രേ ആവുള്ളൂ. ഈ മാസം തന്നെ അയക്കണേ.
അപ്പൊ ഇതിനു മുൻപ് ചേർന്ന കോഴ്സ് കംപ്ലീറ്റ് ചെയ്തോ ? അയാൾ ചോദിച്ചു.
അതു പിന്നെ ഇക്കാ, അതിനു ഇപ്പൊ സ്കോപ്പില്ലന്നെ. പിന്നെ എന്തിനാ ഞാൻ വെറുതെ കംപ്ലീറ്റ് ചെയ്തു സമയം നഷ്ടപ്പെടുത്തുന്നത്. 27 വയസുള്ള അനിയന്റെ ഈ മറുപടി കേട്ടിട്ട് ഫോണിൽ കൂടി രണ്ടെണ്ണം പൊട്ടിക്കാനാണ് തോന്നിയതെങ്കിലും അയാൾ ഒന്നും പറഞ്ഞില്ല. പറയാനാവുമായിരുന്നില്ല എന്നു പറയുന്നതാണ് ശരി. അവന്റെ ബാപ്പയും ഇക്കയും എല്ലാം താൻ ആണ്‌.
ഇനി അടുത്തത് ഉമ്മന്റെ ഊഴമാണ്,
മോനേ......
എന്താണുമ്മാ....
അളിയന്റെ പെങ്ങളെ കല്യാണാണ് ട്ടോ. ഞമ്മൾ ഒന്നിനും ഒരു കുറവ് വരുത്തരുത്. അല്ലെങ്കിൽ അന്റെ പെങ്ങൾക്കാണ് കുറച്ചിൽ. ഞമ്മക്ക് കല്യാണത്തിന് ഉള്ള അരിയും നെയ്യും കഴുത്തുമ്മലേക്ക് ചെയിനും വാങ്ങി കൊടുക്കാ ലെ.
എല്ലാം ഉമ്മാന്റെ ഇഷ്ടം പോലെ. ബാപ്പാന്റെ ജോലി കിട്ടിയേ പിന്നെ ഉമ്മാക്ക് വല്യ പത്രാസാണ്.ഉമ്മ എന്തെങ്കിലും കരുതി വെച്ചിട്ടുണ്ടാകും. ഹാ എന്തെങ്കിലും ചെയ്യട്ടെ. അയാൾ കരുതി.
മോനേ. ഇതൊക്കെ വാങ്ങാനുള്ളത് കൊണ്ട് ഈ മാസം സാലറി കിട്ടിയാൽ ഉടനെ അയക്കണേ. ഇതു കേട്ടപ്പോൾ 8 പേരടങ്ങിയ ac റൂമിൽ കിടന്നു അയാൾ ഒന്ന് വിയർത്തു.
വർഷങ്ങൾക് ശേഷം,
എനിക്കൊരു കൂട്ടാകുമെന്നു കരുതിയാണ് നിന്നെ കൊണ്ട് കെട്ടിപ്പിച്ചത്. അപ്പോഴേക്കും നീ ഓളെ കൊണ്ടോയി. നീ എന്താ ഇപ്പൊ ചിലവിനു പൈസ അയക്കാത്തതു ?
അപ്പൊ എനിക്കൊരു കൂട്ടു വേണ്ടേ ഉമ്മാ ? എന്ന് ചോദിക്കണമെന്ന് അയാൾക് തോന്നിയെങ്കിലും ഒന്നും മിണ്ടിയില്ല. തനിക്കു വേണ്ടി ഒന്നും കരുതി വെക്കാത്തതു തെറ്റായി തോന്നി. അതുകൊണ്ടല്ലേ ഈ ചുറ്റിത്തിരിച്ചിലിൽ ഉദ്യോഗസ്ഥയായ ഉമ്മക്ക് ഒന്നും അയക്കാൻ കഴിയാതിരുന്നത്.
പിന്നെ, ഉമ്മാ... എന്റെ കുറച്ചു സെർടിഫിക്കറ്റ്സ് അനിയന്റെ പേരിൽ അയച്ചിരുന്നു. അതിൽ കുവൈറ്റ് എംബസ്സി ന്റെ അറ്റസ്റ്റേഷൻ വേണം. എന്റെ അടുത്ത വർക്ക്‌ അവിടെയാണ്. നാട്ടിൽ നിന്നും ചെയ്താൽ പൈസ കുറച്ചു കുറയുമെന്ന് വിചാരിച്ചാ അയച്ചേ. അനിയൻ അതു ചെയ്തോന്നു ചോദിച്ചേ ??
എന്നെക്കൊണ്ടൊന്നും വയ്യ ഇപ്പൊ ചെയ്യാൻ. അവിടെ പോയാൽ ഒരു ദിവസാണ് പോവാ. ഈ ഇക്കാക്കനോട് ആര് പറഞ്ഞു ഗൾഫിൽ പോയി കിടക്കാൻ ?
ഉമ്മനോടുള്ള അനിയന്റെ മറുപടി കേട്ടപ്പോൾ നീണ്ട ഒൻപതു വർഷങ്ങൾ തന്നെ നോക്കി ഇളിക്കുന്നത് പോലെ തോന്നി.

കൂലി

കൂലി 
################
ഇക്ക, എങ്ങനെ ഉണ്ട് ഫുഡ്‌ ?
ഹോ... ഒന്ന് വായിൽ വെച്ചേ ഉള്ളൂ അപ്പോയെക്കും തൊടങ്ങി ഓൾടെ ചോദ്യം. ഒന്ന് തിന്ന് കഴിയട്ടെ !
പിന്നെ ശബ്ന ഒന്നും മിണ്ടാതെ സമീറിന് ഭക്ഷണം വിളമ്പി അടുത്തിരുന്നു അല്ലെങ്കിലും അതു ശരിയല്ലേ, തൻറെ അടുത്താണ് തെറ്റ്. ആകാംക്ഷ മൂത്ത് ചോദിച്ചു പോയതാ. മൂന്നു മണിക്കൂറോളം ഇക്ക ഭക്ഷണം ആസ്വദിച്ചു കഴിക്കുന്നത്‌ മനസ്സിൽ കണ്ടുണ്ടാക്കിയതാ. പാവം ഇക്ക വിശന്നു തിന്നാനിരിക്കുമ്പോഴാ തൻറെ ഒരു ചോദ്യം.
സമീർ കഴിച്ചെണീറ്റു. ശബ്നയും പിന്നാലെ ചെന്നു. ഇക്കാ, ഫുഡ്‌.......
ന്റെ പൊന്നു ശബ്ന, ഇയ്യെന്തിനാ എല്ലാ ദിവസവും ഇങ്ങനെ ചോദിക്കുന്നത്. സ്പെഷ്യൽ ഡിഷ്‌ ഒന്നുല്ലല്ലോ ഉണ്ടാകിയത്. എല്ലാ വീട്ടിലുണ്ടാകണതല്ലേ. സ്പെഷ്യലായിട്ടു ഉണ്ടാക്കുമ്പോ ഞാൻ അങ്ങോട്ട് തന്നെ അഭിപ്രായം പറയാം. ഇതിപ്പോൾ ഇവിടെ പച്ചവെള്ളം കുടിച്ചാൽ പോലും അഭിപ്രായം പറയണല്ലോ !
കുറച്ചു ദിവസങ്ങൾ കഴിഞ്ഞപ്പോൾ,
ശബ്ന, ഒരു കട്ടൻ എടുക്ക്. സമീർ പതിവിലധികം ക്ഷീണിതനായി സോഫയിലിരുന്നു.
എന്തു പറ്റി ഇക്കാ ?ചായയും കൊണ്ട് വരുമ്പോൾ ശബ്ന ചോദിച്ചു.
ഒന്നുല്ല..വല്ലാത്ത തലവേദന.രണ്ടു ദിവസത്തെ ഒരു വർക്ക്‌ എന്നെ കൊണ്ട് കുറച്ചു മണിക്കൂറുകൊണ്ട് ചെയ്യിച്ചിട്ടു ഒരു നല്ല വാക്ക് പോലും പറഞ്ഞില്ല, പോരാത്തതിനു നേരം വൈകി പോയെന്നു ബോസ്സിന്റെ വക ചീത്തയും . ഇരുന്ന ഇരുപ്പിൽ ഉച്ചക്ക് ഭക്ഷണം പോലും കഴിക്കാതെ പണിയെടുത്തിട്ട് ഇതാണ് സ്ഥിതി.
സമീറിന്റെ വാക്കുകൾ കേട്ടു ശബ്ന ഒന്ന് ചിരിച്ചു,
ഇക്കാ, കിട്ടുന്ന ശമ്പളത്തിനാണ് ഇങ്ങള് പണി എടുക്കുന്നത് എന്നിട്ട് കൂടി ഒരു നല്ല വാക്കിനായി കൊതിക്കുന്നു. ഇവിടെ പെണ്ണുങ്ങൾ ഒരു ശമ്പളത്തിനുമല്ലാതെ കുടുംബത്തിലുള്ളവരുടെ സന്തോഷത്തിനു വേണ്ടി അവകാശപ്പെടാൻ പ്രത്യേക വിശ്രമമോ ഇല്ലാതെ പണി എടുക്കുന്നു.പ്രതിഫലം ഒന്നുമാഗ്രഹിക്കുന്നില്ല പക്ഷെ ഉണ്ടാക്കുന്ന ഒരു ചായക്കു പോലും ഇങ്ങളെ അടുത്തു നിന്നും നല്ല വാക്ക് കേൾക്കാൻ ഞാനാഗ്രഹിക്കുന്നുണ്ട്. അതു കേൾക്കുമ്പോ വീട്ടിലിരിക്കുന്ന ഞങ്ങൾക്ക് ഇനിയും ആവേശത്തോടെ മുന്നോട്ടു പോകാനുള്ള ഊർജമാണ് കിട്ടുന്നത്.
അതൊക്കെ പോട്ടെ, ഇക്ക ഇങ്ങോട്ട് വന്ന് കിടക്കി. ഞാൻ മരുന്നു തേച്ചു തരാം. കുറച്ചു നേരം കിടന്നാൽ ഈ ക്ഷീണം മാറും.
#hudashabeer


രംഗങ്ങൾ

രംഗം 1
പാത്തു അന്റെ കല്യാണം ഒറപ്പിച്ചെന്നു കേട്ടല്ലോ, ചെക്കന്റെ ഫോട്ടോ എവിടെ ? ജാനുഏടത്തിന്റെ ചോദ്യം കേട്ടിട്ട് പാത്തൂന്റെ മുഖം നാണം കൊണ്ട് ചുവന്നു. ചെക്കന്റെ ഫോട്ടോ കണ്ടയുടനെ ചിരിച്ചു കൊണ്ട് ജാനു പറഞ്ഞു, ഈ ചെക്കനെ പട്ട ട്രൗസർ ഇടുന്ന കാലത്തെ എനിക്കറിയാം. ന്റെ കൂടെ അടയ്ക്ക പൊളിക്കാനൊക്കെ വന്നിട്ടുണ്ട് ! പാത്തു ഒന്നമ്പരന്നു ആൺകുട്ടികൾ ഈ പണിക്കൊക്കെ പോകോ ? എന്തിന്റെ സൂക്കേടായിരുന്നു മൂപ്പർക്ക് ? ആളെ കൊണ്ട് പറയിപ്പിക്കാൻ.
രംഗം 2
(ഒരു കല്യാണ വീട് )
പാത്തു, അന്റെ ചെക്കന്റെ ഫോട്ടോ ഫേസ്ബുക്കില് കണ്ടിട്ടോ, ഞമ്മളെ പി സി ബ്രോദേഴ്സിലെ കിളിയല്ലേ ??? ഇതു കേട്ടയുടനെ പാത്തൂന്റെ മനസില് ഒരു കൊള്ളിയാൻ മിന്നി. ഗൾഫിലെ മൂപര് ഇവിടത്തെ ബസിലെ കിളിയോ ? ഏയ് അല്ലാ. ഓരെന്തൊക്കെയോ പറയാ. പൊട്ടത്തികൾ !
ഇത്തവണയും പാത്തൂന്റെ മുഖം ചുവന്നു പക്ഷെ ദേഷ്യം കൊണ്ടാണെന്നു മാത്രം. നിലം ചവുട്ടിക്കുലുക്കി പെൺകൂട്ടത്തിലേക്കു പാത്തു പാഞ്ഞടുത്തു. ന്റെ മൂപര് ഗൾഫിലാ അല്ലാണ്ടെ ഇവിടത്തെ ബസിലെ കിളിയല്ല..... പാത്തൂന്റെ ഈ മറുപടിക്ക് പെൺകൂട്ടം മറുപടി പറഞ്ഞത് കഴിഞ്ഞ മാസത്തെ ഏറ്റവും നല്ല ബസിനു യുവ സമിതിയുടെ അവാർഡ് കിട്ടിയതിന്റെ fb പോസ്റ്റാണ്. അതിൽ പാത്തൂന്റെ മൂപ്പരെ അന്വേഷിച്ചു കണ്ടെത്താൻ വല്യ ബുദ്ധിമുട്ടൊന്നും ഉണ്ടായില്ല.
രംഗം 3
(സ്വന്തം വീട് )
ഈ രംഗത്തിലെ വില്ലൻ സ്വന്തം മാമൻ ! വിഷയം ചെക്കൻ പ്ലസ് ടു പഠിച്ചിട്ടില്ല. രണ്ടു മാസം ചെക്കന്റെ നാട്ടിൽ സി ഐ ഡി പണി നടത്തി കിട്ടിയ അറിവാണ്. പ്ലസ് ടു പഠിച്ചില്ലെങ്കിൽ അപ്പോൾ ചെക്കൻ പത്താം തരം ആണ്. പത്താം ക്ലാസിനു ഡിഗ്രിക്കാരി പെൺകുട്ടിയെ കെട്ടിച്ചു കൊടുക്കുകയോ ? അസംഭവ്യം. മാമന്റെ നിഗമനം കേട്ടയുടനെ പാത്തുന് പുളിച്ച നാല് വർത്തമാനമാണ് പറയാൻ തോന്നിയത്. ഈ കണ്ടുപിടിത്തമൊക്കെ കല്യാണമുറപ്പിക്കുന്നതിനു മുൻപേ പറഞ്ഞു കൂടായിരുന്നോ ? ഇതിപ്പോൾ മനുഷ്യന് ആശയും തന്നിട്ട് കല്യാണം മുടക്കാൻ വന്നിരിക്കുന്നു. അല്ലേലും കല്യാണമുടക്കികൾ സ്വന്തം ബന്ധുക്കാർ തന്നെയാണ്.
രംഗം 4
(ഭാര്യയുടെയും കുടുംബക്കാരുടെയും ഇടയിലേക്ക് പാത്തൂന്റെ ഉപ്പാന്റെ മാസ് എൻട്രി )
ന്റെ മോൾടെ ചെക്കൻ ബാപ്പ മരിച്ച കുട്ടിയാണ് അതുകൊണ്ട് അവനു ചെറുപ്പത്തിലേ പണിക്കു പോകേണ്ടി വന്നു ഉമ്മാനെ സഹായിക്കാൻ, കൂട്ടത്തിൽ പഠിക്കുകയും ചെയ്തു. പെട്ടെന്ന് ജോലി കിട്ടാൻ വേണ്ടിയാണു പത്തു കഴിഞ്ഞു ഡിപ്ലോമ എടുത്തത്. പിന്നെ പ്ലസ് ടു എഴുതിയെടുക്കുകയും ചെയ്തു. ഇപ്പൊ ദുബായിൽ അന്തസ്സായി ജോലിയെടുക്കുന്നതുകൊണ്ട് കുടുംബം മാന്യമായി ജീവിക്കുന്നു. കഷ്ടപ്പാട് അറിഞ്ഞു വളർന്നവനായത് കൊണ്ട് ലീവിന് വന്നാൽ അറിയുന്നവരുടെ കൂടെ പണിക്കു പോകും. കുടുംബം നയിക്കുന്ന മൂത്ത മക്കൾക്ക് ഒരിക്കലും വെറുതെയിരിക്കാനാകില്ല. ഈ ചെക്കനൊരിക്കലും ന്റെ മോളെ പട്ടിണികിടില്ലാന്നു എനിക്കുറപ്പുണ്ട്. ഈ ഉറപ്പു മതി കല്യാണം നടത്താൻ.
പിന്നെ ഇങ്ങളെല്ലാരോടും ഒരു കാര്യേ പറയാനുള്ളു, ഇനിയെങ്കിലും കല്യാണ ചെക്കന്മാർക്ക് എന്തെങ്കിലും കുറ്റമുണ്ടോ എന്നന്വേഷിക്കുന്നതിനു പകരം ആ ചെക്കന് എന്തൊക്കെ നല്ലതുണ്ടെന്നു അന്വേഷിക്കി. കുറ്റങ്ങൾ കണ്ടുപിടിക്കാനുള്ള തിരക്കിൽ കാണുന്നതെല്ലാം തെറ്റായി തോന്നും. അതിനു പിന്നിലെ ശരിയാരും കാണണമെന്നില്ല !
#Hudashabeer

അബല അഥവാ തബല.


സ്ത്രീ അബലയല്ല ! തബലയാണ്...... എന്റെ മാളോരെ, ഞാനൊരു തലയണ ആണുട്ടോ. ന്റെ കഷ്ടകാലമെന്നു പറയേണ്ടു, ന്റെ കൂടെ കിടക്കണത് ഒരു പെണ്ണാ. ആ പെണ്ണിന് കണ്ണീരൊഴിഞ്ഞു നേരമില്ല. നനഞ്ഞു നനഞ്ഞു എനിക്കു പനിയും ഒഴിഞ്ഞ നേരമില്ല.
നിങ്ങളൊന്നു ആലോചിച്ചു നോക്കീന്ന്.
കെട്ട്യോന് പറ്റാത്തത് ഭാര്യ വീട്ടുകാർ ചെയ്താൽ അപ്പൊ തുടങ്ങും ഓളോട് പുച്ഛം, കുത്തുവാക്ക്, വഴക്ക്.
കെട്ട്യോൻ ഓരുടെ അമ്മേടടുത്തു ഒന്നു കനപ്പിച്ചു വർത്താനം പറഞ്ഞാലും അപ്പോളും പണി കിട്ടാ ഓൾക്ക് തന്നാ.എന്താന്ന് വെച്ചാ, ദാ അതന്നെ. പുച്ഛം, കുത്തുവാക്ക്, വഴക്ക്.
തലയണ മന്ത്രക്കാരിന്നു പുതിയ പേരും കിട്ടും.
കെട്ട്യോനിപ്പോ ഭാര്യവീട്ടുകാരോട് ഒന്നു തർക്കുത്തരം പറയേ, മുഖം കറപ്പിക്കേ, ഇനി ചെയ്യേണ്ട ചടങ്ങുകളിൽ കെട്ട്യോൻ ഒരുപടി കുറഞ്ഞാലോ അപ്പോളും കിട്ടും ഓൾക്ക് പുച്ഛം, കുത്തുവാക്ക്, വഴക്ക്. ഇത്തവണ സ്വന്തം വീട്ടുകാരോടാണെന്നു മാത്രം.
ഇതിലിപ്പൊൾ ഒന്നിലും പെടാതെ നടക്കാ ഓൾടെ കെട്ട്യോൻ. ഓള് ഓനെ ദൈവത്തെ പോലെ കരുതുന്നു. ഓന്റെ അമ്മക്ക് ഓനെ പോലെ സല്പുത്രൻ വേറെയില്ല. മകൾക്കു അന്നം നല്കുന്നവനായതോണ്ട് ഭാര്യ വീട്ടുകാർക്ക് മനസ്സിൽ പലതുണ്ടെങ്കിലും ഓനെ തലേൽ കൊണ്ട് വെച്ചു നടക്കാണ്.
മൊത്തം പറഞ്ഞാ ഓളിപ്പോ ഒരു തബലയാണ്, ആർക്കും കൊട്ടാൻ പറ്റിയ തബല.
ന്റെ പടച്ചോനെ, ഓളെ കണ്ണീരൊന്നു ഒപ്പിക്കൊടുക്കണേ. എനിക്കിനി പനിച്ചു വിറക്കാൻ വയ്യേ........

മ്മളുണ്ടാക്കിയ നാരങ്ങാവെള്ളം...


മ്മളെ വീടിനടുത്തുള്ള L. P സ്കൂളിൽ വാർഷികാഘോഷം വന്നാ നാട്ടുകാരാണ് നടത്താറ്. അന്നു ഒരു വീട്ടിലും ആരുണ്ടാവൂല്ല. എന്തിനു ഈ വീടുകളില് കയറാൻ കള്ളന്മാരെ പോലും കിട്ടൂല.. കുഞ്ഞു കുട്ടികളെ ഡാൻസ് ഒക്കെ വിട്ടു ആരെങ്കിലും പണിക്കു പോകോ ??ഇനി ഈ പോസ്റ്റ് കണ്ടു ആരും അവിടെ കക്കാൻ പോകണ്ട.. ഇപ്പൊ മുക്കിനും മൂലയിലും cctv യാ cctv. മത്തിനെക്കാളും വില കുറവാണെ ഇതിനു.
അങ്ങനെ സ്കൂളിൽ വാർഷികാഘോഷം വന്നെത്തി , എല്ലാരും തിരക്കിട്ട പണിയിലെനു . കണ്ടപ്പോ ഞമ്മക്കും ഒരു പൂതി, എന്തെങ്കിലും പണിയൊക്കെ എടുക്കണമെന്ന്. കളിച്ചുനടക്കുന്നതിനേക്കാളും മ്മക്കിഷ്ടം വല്യൊരെ പണി എടുക്കാനാ . കഞ്ഞിപോരെലും സ്റ്റേജിനു ബേക്കിലും ഒക്കെ പോയി നോക്കി. എല്ലാടത്തും തിരക്കോടു തിരക്ക്. അപ്പോളാ ഒരമ്മൂമ്മ വന്നു ചോദിക്കുന്നു. മോളെ, കുടിക്കാൻ വെള്ളം കിട്ടൊന്നു.. ഞമ്മള് ചുറ്റും നോക്കി കുടിവെള്ളം എന്നെഴുതിയ സ്ഥലത്തു ആയമ്മേനെ കാണാനില്ല. വെള്ളം എടുത്തു കൊടുക്കാൻ പോയപ്പോ തൊട്ടടുത്ത് ബക്കറ്റിൽ കുറച്ചു വെള്ളം കണ്ടു..വെറും വെള്ളമല്ല..... "നാരങ്ങാ വെള്ളം ". വെയിലിനു വെറും വെള്ളത്തിനേക്കാളും നല്ലതല്ലേ നാരങ്ങാ വെള്ളം.. പിന്നെ ഒന്നും നോക്കിയില്ല, കുറച്ചെടുത്തു അമ്മൂമ്മക്ക്‌ കൊടുത്തു. മനുഷ്യന്മാരുടെ പൊതു സൊഭാവം ആ അമ്മൂമ്മയും പുറത്തെടുത്തു . മോളെ, ഇതിൽ കുറച്ചു മധുരം കൊറവാണല്ലോ... പിന്നെ, മ്മളെ സ്നേഹം കൊണ്ടുള്ള നോട്ടം കണ്ടപ്പോ അടുത്തത് പറയാനുള്ളത് അപ്പാടെ വിഴുങ്ങി, അമ്മൂമ്മ മുങ്ങി ;) . എന്തായാലും ഞമ്മള് ഹാപ്പിയായി. ഞമ്മക്കുമൊരു പണി കിട്ടിയല്ലോ.. പിന്നെ നാരങ്ങാ വെള്ളം കൊണ്ട് ഒരൊന്നന്നര കളിയെനു . ആളുകള് പിന്നെ വരിയായി നിക്കാൻ തൊടങ്ങി. വെയിലിനു അത്രേം ചൂടായിരുന്നു. ആയമ്മ വീണ്ടും ആ പരിസരത്തു പൊങ്ങിയപ്പോ, അറിയാതെ നാക്ക് വളച്ചു മ്മള് ചോദിച്ചു പോയി... എന്താ അന്വേഷിക്കണെ ??.മൂപ്പത്തി മ്മളെ മുഖത്തോക്കി പറയാ .. മോളെ, നാരങ്ങാ വെള്ളത്തിന്റെ ഗ്ലാസ് കഴുകി കൊണ്ടിരുന്ന ബക്കറ്റു കാണല്ല്യാ !!!!!!!!!! നിന്ന നിപ്പിൽ കാണാണ്ടാവാൻ തോന്നിപോയി മ്മക്ക്. പിന്നെഒരൊറ്റ മുങ്ങലാ... പൊങ്ങിയതോ ഉമ്മാന്റെ മടിയിലും. കാര്യമറിഞ്ഞപ്പോ ഉമ്മ കൊറേ ചിരിച്ചു. പിന്നെ പറഞ്ഞത് ജീവിതകാലമത്രയും മ്മള് മറക്കൂല.. നാരങ്ങാ അല്ലികൾ കണ്ടപ്പോ നാരങ്ങാ വെള്ളം ആണെന്ന് ഇയ്യ്‌ വിചാരിച്ചു. എല്ലാ കാര്യങ്ങളും കണ്ണു കൊണ്ട് കണ്ടാ മാത്രം ശരിയാവൂല...മോളെ... മുൻവിധികൾ എല്ലായ്‌പോഴും ശരിയാവണമെന്നില്ല !
ജീവിതം ഒരുപാടു കഴിഞ്ഞപ്പോ മനസിലായി അതൊരു നാരങ്ങാ വെള്ളത്തിന് മാത്രമുള്ള ഉപദേശമല്ലന്നു...

മ്മളും മ്മളെ ചെക്കന്മാരും !


മ്മളെ പെണ്ണുകാണൽ ഒരൊന്നൊന്നര സംഭവമാണ്. ആകെ കുറച്ചു ചെക്കന്മാരെ ഞമ്മളെ വന്നു കണ്ടിട്ടുള്ളു,എന്നുവെച്ചു ആരും തെറ്റിദ്ധരിക്കണ്ട ജോലിയെന്ന ലക്‌ഷ്യം മുന്നിലിണ്ടൊണ്ട് ഒന്നും വേണ്ടെന്നു വെച്ചെന്നെ ഉള്ളൂ. ഞമ്മള് ഏഴാം ക്ലാസ്സിൽ പഠിക്കുമ്പോ തന്നെ ആലോചന വന്നിട്ടുണ്ട്, അപ്പൊ ഞമ്മള് മൊഞ്ചത്തി ആയതോണ്ടല്ലേ ;) ? അതോ മ്മളെ സ്വത്തു പങ്കു വെക്കാൻ ആരുമില്ലാത്തതു കൊണ്ടാണോ ?? ആ.. ആർക്കറിയാം. അപ്പൊ പറഞ്ഞു വന്നതു പെണ്ണുകാണലിനെ പറ്റി.. ആകെ മൂന്ന് ചെക്കന്മാർ വന്നു കണ്ടിട്ടുണ്ട്.
ഒന്നാമൻ വന്നപ്പോ അടുക്കളയിൽ പോയി ട്രേ എടുത്തപ്പോൾ തന്നെ ചായ ഹാൾ വരെ എത്തൂലെന്നു മനസിലായി. അങ്ങനെ ഉമ്മ വളരെ കാലത്തിനു ശേഷം വീണ്ടുമൊരു പെണ്ണുകാണലിനു ട്രേ എടുത്തു. ;) .. ഉമ്മാന്റെ പുറകെ ഞാനും. ആദ്യമായുള്ള അനുഭവമല്ലേ, ഇല്ലാത്ത നാണം കൂട്ടികലർത്തിയുള്ള എന്റെ നോട്ടം ചെക്കനെ കണ്ടപ്പോൾ തന്നെ ആവിയായി പോയി. ഒരു ആജാനുബാഹു ! പിന്നങ്ങോട്ട് ചോദ്യശരങ്ങൾ ആയിരുന്നു ചെക്കന്റെ വക.ഒരു നിമിഷം ജോബ് ഇന്റർവ്യൂ ആണെന്ന് തോന്നി പോയി. തനിച്ചു സംസാരിക്കണോ എന്നുള്ള ഉപ്പാന്റെ ചോദ്യത്തിന്, അതൊന്നും വേണ്ട... ചോദിക്കാനുള്ളതെല്ലാം ഞാൻ ചോദിച്ചു എന്നു ആ പഹയൻ പറഞ്ഞപ്പോ ഒന്നുറപ്പായി ഓന്റെ വീട്ടിലെ ജോലിക്കുള്ള ആളെ സെലക്ട് ചെയ്യാൻ വന്നതാണെന്ന്. പിന്നെ, മൂന്നാന്റെ നിർബന്ധത്തിനു വഴങ്ങി ആ മസിൽമാൻ ഞമ്മളെ റൂമിൽ വന്നു. ഉള്ള ജോലി ഉപേക്ഷിച്ചു വന്ന മ്മളോട്
ഭാവി പരിപാടി എന്താണെന്നു ചോദിച്ചപ്പോ, ഉപ്പാന്റെ സഹായത്തോടെ നാട്ടിൽ ജോലി നോക്കണമെന്ന് പറഞ്ഞു. അതുവരെയുള്ള എല്ലാ പെണ്ണുകാണൽ സങ്കല്പത്തെയും കാറ്റിൽ പറത്തി അയാള് പറയാ, എല്ലാത്തിലും ഉപ്പാന്റെ കാല് പിടിക്കരുത്. സ്വന്തം കാലിൽ നിക്കണ പെണ്ണിനെയാ എനിക്കിഷ്ടം... അതു പറയുമ്പോ അയാൾടെ കണ്ണു ചുവന്നിരുന്നു, കൈയിലെ മസിൽ വിറക്കണ കണ്ടപ്പോ ഞാൻ രണ്ടടി പിന്നോട്ട് മാറി.. വിട്ടാൽ അയാളെന്നെ അടിച്ചേനെ ! ഞമ്മള് ഉമ്മാനോട് ഒരു കാര്യമേ പറഞ്ഞുള്ളു. അയാളെന്നെ കെട്ടിയാൽ ഉപ്പ മൂപ്പരെ കാലുതിരുമ്മി ഇരിക്കും , ഇങ്ങള് മൂപ്പർക്ക് എന്തു എന്തുണ്ടാക്കണമെന്നു അറിയാതെ ജീവിതം അടുക്കളയിൽ തീരും , ഞമ്മളോ എപ്പോ അടി വീഴുമെന്നറിയാണ്ടെ റൂമിലും ഇരിക്കും ! പിന്നെല്ലാതെ, ആദ്യമായി കണ്ട പെണ്ണിനോട് തന്നെ ഇഷ്ടമായൊന്നു ചോദിക്കാതെ.. തനിക്കിഷ്ടമായെന്നോ ഇല്ലെന്നോ പറയാത്ത ഇയാളെ പറ്റി ഞമ്മള് എന്തു പറയാനാ ??ഇങ്ങള് പറീംന്ന്...
രണ്ടാമത് വന്ന ആള് ഒരു ജേണലിസ്റ്റാണ്. വന്നു, സംസാരിച്ചു, ആളൊരു രസികൻ തന്നെയായിരുന്നു. റേഡിയോ ലു സംസാരിക്കുന്ന ആളെ പോലെ തന്നെ !! പക്ഷെ, മൂപ്പരെ ഡ്രസ്സ് ഇഷ്ടായില്ല ആർക്കും (എനിക്കും ; ) ). ജീവിതകാലം മുഴുവനും ആ തൂങ്ങിയാടുന്ന പാന്റ് വീഴാതിരിക്കാൻ നോക്കി നോക്കി ഞമ്മളെ ജീവിതം തീരുമെന്നെ. പോരാത്തതിന് ഒരു മാസം കൊണ്ട് കല്യാണം വേണം പോലും.. കല്യാണത്തിന് മുന്നേയുള്ള ചടങ്ങുകളൊക്കെ ഇല്ലതെങ്ങനെയാ ?? അങ്ങനെ അതിനും തീരുമാനമായി.
മൂന്നാമനാണ് ഞമ്മളെ ഖൽബ് കവർന്നുകളഞ്ഞത്.. <3
പതിവിനു വിപരീതമായിട്ടു കടപ്പുറത്തു വെച്ചാണ് കണ്ടത്. ആളെ കണ്ടപ്പോ തന്നെ മേലാസകലം ഒരുതരം തരിപ്പ്, നിവർന്ന തല അറിയാതെ താഴ്ന്നു പോയി.. അകലം പാലിച്ചാണ് ഇരുന്നതെങ്കിലും മൂപ്പരെ ചൂടടിക്കുന്ന പോലെ തോന്നി. മൂപ്പരുടെ വിയർപ്പിന് ഞമ്മളെ അത്തറിനെക്കാളും മണമുണ്ടായിരുന്നു. കടലിനെ സാക്ഷിയാക്കി ഞമ്മളോട് മൂപര്, ഇഷ്ടമായൊന്നു ചോദിച്ചപ്പോ ആയിരം റോസ് പൂക്കളിനു നടുവിൽ നിക്കണ പോലെ തോന്നി. അന്നാദ്യമായി മുഖത്ത് നാണം വരുത്തേണ്ടി വന്നില്ല.
അതെല്ലെങ്കിലും അങ്ങനെയാണല്ലോ നമ്മക്ക് വരേണ്ട ആൾ വന്നില്ലെങ്കിൽ കാണാത്ത കുറ്റങ്ങളുണ്ടാകില്ല, വന്നാലോ വരാത്ത വികാരങ്ങളുണ്ടാകില്ല 


By: 
Huda Shabeer

<3



By: 
sha

DON'T MISS

Nature, Health, Fitness
© all rights reserved
made with by templateszoo