മാറ്റിവെക്കപ്പെടുന്ന ആത്മഹത്യകൾ

 ...

കഴിഞ്ഞാഴ്ചയാവാം എന്ന് കരുതിയതാണ്
നടന്നില്ല.
കത്തിയും ബ്ലേഡും മൂർച്ചയോടെ
കരുതിവെച്ചതാണ് .
പനിക്കിടക്കയിൽ മകൻ
പൊള്ളുമ്പോൾ എങ്ങനെ?

കഴിഞ്ഞ മാസത്തിലൊരു
കയർക്കുരുക്ക് വളച്ചു വെച്ചിരുന്നു.
അച്ചനുമമ്മയും അന്നാ
വിരുന്നെത്തിയത്
പിന്നെങ്ങനെ?

ഞായറാഴ്ച നല്ലൊരുക്കം
നടത്തി കാത്ത് നിന്നതാണ്
മൂക്കിലടിച്ചു കേറിയ നാറ്റമുള്ളൊരു
മരുന്ന് .
പായസം വെച്ചിരുന്നതിലാവാമെന്ന്
മധുരിച്ചു .
അവനുമവളും അത്
കുടിച്ചു തീർത്തെന്നാൽ
പിന്നെങ്ങനെ?

കുളിച്ചൊരുങ്ങിയിരുന്നാൽ
നേരെയങ്ങ് പോകാം
വീടിനടുത്ത് പുകയാവാതെ
ചൂളയിലെ നാക്കിനു നക്കാൻ
കൊടുക്കലാവും
നല്ലത് .
ചുവന്ന ചാന്തിൽ ഒരുങ്ങിയതാണ്
അന്നപ്പോൾ
തുറന്ന വാതിലിൽ
ഇഷ്ട നിറത്തിലെ പട്ടുമായി
കെട്ടിയ ആൾ .
പിന്നെയാവാമെന്ന്
ഉള്ളിലാരോ പറഞ്ഞു.

ഇനിയുമുണ്ടല്ലോ
ഞായറും തിങ്കളും .
മാർക്കിട്ട ഉത്തരക്കടലാസുകൾ
തിരിച്ചു കൊടുത്തിട്ടാവാമിനി.
ആരുമൊരിക്കലും
ചെയ്തു തീർക്കാൻ ഇത്തിരി
ബാക്കി വെച്ചിട്ടു പോയെന്ന്
പറയരുത് .
സമയമുണ്ടല്ലോ .....

Sreelekha
2019/9/22