Showing posts with label PSAnilkumar. Show all posts
Showing posts with label PSAnilkumar. Show all posts

3G

 


അമ്മുമ്മ :- പുതിയ വീടിന് സ്ഥാനം നോക്കിയത് വാസ്തു നോക്കിയാണോ?

അച്ഛൻ - ഉം , വാസു നോക്കി.

അമ്മുമ്മ :- കിണറിന് സ്ഥാനം കണ്ടത് വറ്റാത്ത ഉറവയുള്ള ഭാഗത്താണോ?

അച്ഛൻ :- ഉം , അതും വാസു നോക്കി.

അമ്മുമ്മ :- അഗ്നികോൺ ഭാഗത്തു തന്നേയല്ലേ അടുക്കളയുടെ സ്ഥാനം.

അച്ഛൻ :- അതേ, അതും വാസു നോക്കിയിട്ടുണ്ട്.

അമ്മുമ്മ :- എന്റെ മോനേ വാസ്തു നോക്കുക എന്നെങ്കിലും തെറ്റാതെ പറയാൻ അറിയാത്ത നീ എന്തു മലയാളം വാദ്ധ്യാരാണ്.

അച്ഛൻ :- അതിനിവിടെ വാസ്തു നോക്കിയെന്നാരു പറഞ്ഞു, ഞാൻ പറഞ്ഞത് അമ്മേടെ പുന്നാര കൊച്ചു മോൻ വാസു എല്ലാം നോക്കിയിട്ടുണ്ട് എന്നാണ് , അവന് വേണ്ടി വയ്ക്കുന്ന പുരയല്ലേ , നമ്മളല്ലല്ലോ അവനല്ലേ പുതിയ വീട്ടിൽ സന്തോഷത്തോടെ കഴിയേണ്ടത്. അതുകൊണ്ട് എല്ലാം അവനാണ് നോക്കിയത്.

അമ്മുമ്മ:- അതിന് അവന് ഐറ്റി ഫീൽഡ് അല്ലാതെ വാസ്തു സംബന്ധമായി എന്തെങ്കിലുമെല്ലാം അറിയാമോ?

അച്ഛൻ :- വസ്തു സംബന്ധമായതും, വാസ്തു സംബന്ധമായ തൊന്നും അവന് ഒരു ഗ്രാഹ്യവുമില്ലെന്ന് അമ്മയ്ക്കറിയില്ലേ.

അമ്മുമ്മ :- നീയെന്താ ആളെ കളിയാക്കുകയാണോ, അവനെല്ലാം നോക്കി എന്നും പറയുന്നു, അവനതിനെ പറ്റി ഒന്നുമറിയില്ല എന്നും പറയുന്നു.

അച്ഛൻ :- അവൻ നോക്കിയത് നെറ്റ് ഫോർ ജീ, ഫൈവ്ജീ വൈഫൈ എന്നിവയെല്ലാം വീടിന്റെ എല്ലാ മുക്കിലും മൂലയിലും തടസ്സമില്ലാതെ എത്തുന്നു ണ്ടോ എന്ന കാര്യം പരിശോധിച്ചു എന്നാണ് പറഞ്ഞത്. അല്ലെങ്കിൽ ഫോർജീ ആയാലും ഫൈജീ ആയാലും ആകെ 3G ആയിപ്പോകും എന്ന് ആരോ കൂട്ടുകാരോട് ഫോണിൽ പറയുന്നത് കേട്ടു. അതെന്താണെന്ന് എനിക്ക് മനസ്സിലായില്ല.

അമ്മുമ്മ :- അത് എനിക്ക് മനസ്സിലായി, പണ്ട് മുത്തച്ഛൻ ദേഷ്യം വരുമ്പോൾ പറയുന്ന വാക്കാണ്. ഇപ്പോഴത്തേ 5G തലമുറക്ക് മുമ്പിൽ നമ്മൾ പഴമക്കാർ എല്ലാം 3G.

By PS Anilkumar DeviDiya

ഒട്ടകപ്പച്ച


കമ്മ്യൂണിസ്റ്റ് പച്ച കണ്ടറിഞ്ഞു വളർന്ന നമുക്കെന്ത് ഒട്ടകപ്പച്ച. എന്നാലും കമ്യൂണിസ്റ്റ് പച്ചയുടെ കാര്യമോർത്തപ്പോഴാണ് നമ്മുടെ ബാല്യകാലത്ത് കളിക്കിടയിൽ പറ്റുന്ന മിക്ക മുറിവുകൾക്കുമുള്ള ഏറ്റവും അനുയോജ്യമായ ഒറ്റമൂലി ആയിരുന്നല്ലോ നമുക്കന്ന് കമ്മ്യൂണിസ്റ്റ് പച്ച, അന്ന് ഞാൻ ഇടക്ക് ഓർക്കുമായിരുന്നു എന്താണാവോ ഇതിന് കോൺഗ്രസ്സ് പച്ച എന്ന പേര് ആരും കൊടുക്കാതിരുന്നത് എന്ന്. അങ്ങിനെയൊന്നും കമ്യൂണിസ്റ്റ് പച്ചയെ നമുക്ക് ഒരിക്കലും മറക്കാനാവില്ലല്ലോ. ചെറിയ വീഴ്ചകളിലെ വലിയ, ചെറിയ മുറിവുകളിലേക്ക്, കമ്യൂണിസ്റ്റ് പച്ചയുടെ കുരുന്നിലകൾ വലതു കൈവിരലുകൾ കൊണ്ട് നുള്ളിയെടുത്ത് ഇടതു കൈ വെള്ളയിലിട്ട് വലതു കൈപ്പത്തി കൊണ്ട് കശക്കിയെടുത്ത് നീരെടുത്ത് ആ മുറിവിൽ ഇറ്റിക്കുമ്പോൾ ഉണ്ടാകുന്ന സുഖകരമായ നീറ്റൽ ഇന്നും ഓർമ്മയിൽ ഒരു കുളിരായ് നിറയുന്നു. പിന്നീട് മുറിവ് കരിഞ്ഞുണങ്ങി പാടുകൾ മാത്രമായി മാറുന്നു, ചില മുറിപ്പാടുകൾ നമ്മളെ ഇന്നും എന്തെല്ലാമോ ഓർമ്മിപ്പിക്കുന്നു. പറഞ്ഞു പറഞ്ഞു ആകെ കാടു കയറി. കാടിലെല്ലാം നല്ല പച്ചപ്പാണല്ലോ പക്ഷെ നമ്മൾ പറഞ്ഞ വിഷയവും പറയാൻ പോകുന്ന വിഷയവും തമ്മിലുള്ള ബന്ധം കടലും കടലാടിയും തമ്മിലുള്ള ബന്ധം മാത്രമേ ഉള്ളു എന്നത് മറ്റൊരു സത്യം.
അല്ലെങ്കിൽ പച്ചയും ഒട്ടകവും എന്നെല്ലാം കേൾക്കുമ്പോൾ ഒട്ടകം തിന്നുന്ന ഏതോ പച്ചിലയാണെന്ന് ചിന്തിച്ചു പോകുന്നത് തികച്ചും സ്വാഭാവികമല്ലേ . എന്നാൽ നമ്മുടെ കഥയിലെ ഒട്ടകവും പച്ചിലയും ആയി മോരും മുതിരയും പോലുള്ള ബന്ധമേ ഉള്ളു നമ്മുടെ ഒട്ടകപ്പച്ചക്ക്. പാക്കിസ്ഥാനികളെ പച്ചകളെന്നും, ബംഗാളികളെ കിളികളെന്നും, ഇന്ത്യക്കാരെ ഹിന്ദികളെന്നും വിളിക്കുന്നതാണല്ലോ ഇവിടത്തെ പൊതുവെ ഉള്ള രീതി. അങ്ങിനെ നമ്മൾ പറയാൻ പോകുന്നതും ഒരു പച്ചയുടെ കാര്യമാണ്, നല്ല രസികൻ പേരിനുടമ, അബ്ദുൾ റഹിമാൻ, പക്ഷെ പറഞ്ഞിട്ടെന്താ ആ പേരാണ് മാഞ്ഞു മറഞ്ഞ് മറൊരു പേരായി മാറിമാറിപ്പോയത്.
സാധാരണ പാക്കിസ്ഥാനികളെല്ലാവരും ആവശ്യത്തിന് നല്ല ഉയരം ഉള്ളവർ ആണ്. നമ്മുടെ കഥാനായകന് വിവരമിത്തിരി കുറവാണെങ്കിലും ഉയരം ആവശ്യത്തിലും ഇത്തിരി അധികമാണ്. പൊക്കം കൂടുതൽ ആയതിന്റേതായ ചെറിയ ഒരു കൂനും ഉണ്ടെന്ന് പറയാം. പുള്ളി ചെയ്യുന ജോലി എന്താണെന്നാൽ വണ്ടികളുടെ ടയറിന് പഞ്ചർ ഒട്ടിക്കുന്ന ജോലി ആണ്. ഞാൻ പുള്ളിക്കാരനെ കാണുന്ന നേരത്ത് പുള്ളിക്ക് ജോലിയോട് ബന്ധപ്പെട്ടതായ പഞ്ചറുപച്ച എന്നൊരു പേരാണ് ഇവിടത്തെ നാട്ടുകാരുടെ ഇടയിൽ ഉണ്ടായിരുന്നത്. ഞങ്ങളുടെ പാർട്ട്സ് കടയിൽ നിന്നാണ് പഞ്ചറൊട്ടിക്കാനുള്ള കിറ്റ് പുള്ളി സ്ഥിരമായി വാങ്ങാറുള്ളത്. പഞ്ചറൊട്ടിക്കാനുള്ള കിറ്റിന്റെ പേര് ക്യാമൽപാച്ച് എന്നത് കഥയുടെ വഴിത്തിരിവിന്റെ മറ്റൊരു വസ്തുതയായിരുന്നു.
അങ്ങിനെ ഇരിക്കെ നമ്മുടെ പഞ്ചറു പച്ചയുടെ കടയുടെ അടുത്ത് മറ്റൊരു മലയാളി വന്ന് പുതിയതായി ഓയിൽ ചേഞ്ച് വിത്ത് പഞ്ചറുകട തുറന്നത്. അടുത്തടുത്ത് ഒരേ പോലുള്ള രണ്ട് കടകൾ ആകുമ്പോൾ അവർ തമ്മിൽ പരസ്പരം ഒരൊക്കച്ചക്ക ഉണ്ടാകുന്നതും സ്വാഭാവികം ആണല്ലോ. അങ്ങിനെ അവർ തമ്മിൽ അത്ര രസകരമല്ലാതെ തന്നെ പരസ്പരം രണ്ടു കടയുമായി മുന്നോട്ടു പോകുന്ന സമയത്താണ് നമ്മൾ നേരത്തെ പറഞ്ഞ ഒട്ടകപ്പച്ച എന്ന പേര് പ്രാബല്യത്തിൽ വരുന്നത്. മലയാളി ക്യാമൽ പാച്ച് വാങ്ങാൻ വരുന്ന സമയത്ത് പഞ്ചർ കിറ്റിന്റെ പേര് മലയാളീകരിച്ച് ഒട്ടകപ്പാച്ച് എന്നാക്കി മാറ്റുകയും ചെയ്തു തുടങ്ങി. പിന്നീടതെപ്പോഴോ ഒട്ടകപ്പച്ചയായി മാറി. ദിവസങ്ങൾ കഴിഞ്ഞു പോയപ്പോൾ പഞ്ചറു പച്ചയുടെ നീണ്ട രൂപവും, ലേശം കൂനും ചേർത്ത് പഞ്ചറുപ്പച്ചയെ ഒട്ടകം എന്ന വട്ടപ്പേര് ആക്കി മാറ്റിയെടുക്കാൻ മലയാളിക്ക് അധികം കാലതാമസം വേണ്ടി വന്നില്ല. പുഴയുടെ അടിത്തട്ടിൽ വീഴുന്ന കൂർത്തു മൂർത്ത കരിങ്കൽ കഷ്ണം പുഴയുടെ ഒഴുക്കിൽപ്പെട്ട് ഉരുളൻ കല്ലായി രൂപാന്തരം പ്രാപിക്കുന്ന പോലെ അബ്ദുൾ റഹിമാൻ കറങ്ങിത്തിരിഞ്ഞ് പഞ്ചറു കട തുടങ്ങി പഞ്ചറായി പിന്നെ ഒട്ടകമായി , പാക്കിസ്ഥാനി എന്ന വാക്ക് മാറി പച്ചയായി രണ്ടു പേരുകളും ചേർന്ന് പിന്നീട് ഒട്ടകപ്പച്ചയായി മാറി. ഇത്രയുമെല്ലാമുള്ളു ഒരു പുതിയ പേര് പതിഞ്ഞു കിട്ടാൻ എന്ന ഒരു അടിക്കുറിപ്പോടെ ഈ ചെറു കുറിപ്പ് എഴുതി നിർത്തുന്നു.

By: PS Anilkumar

ചമയം


ഡിസംബർ 31.
അവൻ കിടപ്പ് ഒന്നു കൂടെ ആയാസരഹിതമാക്കി, ഒരു തലയിണ കൂടി വച്ച് തല അല്പം ഉയർത്തി വച്ചു. കൈകാലുകൾ നന്നായി നീട്ടിവച്ചു. ശാന്തമായ മിഴികൾ സീലിംഗിലേക്ക് എറിഞ്ഞു, ഫാനിന്റെ ഇതളുകൾ ശാന്തമായി ഏറ്റവും താഴ്ന്ന വേഗതയിൽ കറങ്ങുന്ന തും നോക്കി കിടന്നപ്പോൾ ഉള്ളിലെ പടഹധ്വനികളും അമർന്നടിയുന്നതിന്റെ ആശ്വാസം അറിഞ്ഞു തുടങ്ങി.
മൊബൈൽ ഫോൺ ഓൺ ചെയ്ത് മൈമ്യൂസിക്കിൽ ചെന്ന് തിരഞ്ഞെടുത്ത കവിതകളിൽ നിന്ന് നാറാണത്ത്ഭ്രാന്തൻ കവിത തന്നെ തിരഞ്ഞെടുത്ത് പ്ളേ ചെയ്തു. ഇയർ ഫോണിലൂടെ മൃദുശബ്ദത്തിൽ കേൾക്കുന്ന കവിതയിലേക്ക് ലയിച്ചിറങ്ങി.
വലതു കൈ കൊണ്ട് ഇടതു പോക്കറ്റിൽ തപ്പി. കൈയ്യിൽ തടഞ്ഞത് തള്ളവിരലും, ചൂണ്ടുവിരലും കൂട്ടി പുറത്തെടുത്തു. പുറമെയുള്ള കവർ നുള്ളി പൊളിച്ചപ്പോൾ അതിനകത്തെ കട്ടി കുറഞ്ഞ പേപ്പറിനുള്ളിൽ തിളങ്ങുന്ന സ്റ്റീൽ നിറമാർന്ന മൂർച്ചയേറിയ ബ്ലേഡ് കൈയ്യിലെടുത്തപ്പോൾ എന്തോ ഒരു വിറയൽ മേലാകെ ഒരു മാത്ര പടർന്നു. കൈകൾ വിറച്ചില്ലെങ്കിലും കരളിലൊരു പിടച്ചിൽ . വലതു കൈയ്യിലെ ബ്ലേഡ് കൊണ്ട് ഇടതു കൈയിലെ ഞരമ്പിൽ ഒരേയൊരു വരയൽ. അതോടെ തീരും എല്ലാം. പക്ഷെ ഒറ്റയടിക്ക് തീരില്ലല്ലോ. വാട്ടർ ടാങ്ക് വൃത്തിയാക്കുമ്പോൾ തുറന്നു വിടുന്ന അടിത്തട്ടിലെ ടാപ്പിൽ നിന്ന് ആദ്യം ശക്തമായി ചീറ്റിത്തെറിച്ച് പിന്നീട് വേഗത കുറഞ്ഞ് അവസാന തുള്ളിയും പുറത്തേക്ക് ഒഴുകി തീരുന്നതു വരെയുള്ള വെള്ളം പോലെ ജീവന്റെ അവസാന ഒഴുക്ക്. പിന്നീട് ശാന്തമായ ഉറക്കം.
കാതിലിപ്പോഴും കവിത മൂളുന്നു
എല്ലാരുമൊന്നെന്ന
ശാന്തിപാഠം
തനിച്ചെങ്ങുമേ ചൊല്ലി തളർന്നും
ഉടൽതേടി അലയും ആത്മാക്കളോട്‌
അദ്വൈതമുരിയാടി ഞാനിരിക്കുമ്പോൾ
ഉറവിന്റെ കല്ലെറിഞ്ഞൂടെപിറന്നവർ കൂകി
നാറാണത്തു ഭ്രാന്തൻ:
അയ്യോ ഒരു കാര്യം മറന്നു, ചത്താലും ചമഞ്ഞു കിടക്കണം എന്നാണല്ലോ, ചമയാൻ മറന്നു. ബ്ലേഡ് തലയിണയിൽ വച്ചിട്ട് എഴുന്നേറ്റു. കണ്ണാടി നോക്കി ചീപ്പെടുത്ത് മുടിയൊന്ന് കോതിയൊതുക്കി. അല്പം പൗഡർ എടുത്ത് കൈവെള്ളയിൽ കുടഞ്ഞിട്ട് രണ്ടു കൈവെള്ളയും കൊണ്ട് തേച്ച് കവിളിൽ പുരട്ടിയപ്പോഴാണ് പഴയൊരോർമ്മ ഓടിവന്നത്. ചത്തു കിടക്കുമ്പോൾ മാത്രമല്ല ചമഞ്ഞു കിടക്കാൻ ശ്രമിക്കുന്നത്, പണ്ട് കുട്ടിക്കാലത്ത് പശു കയറും പൊട്ടിച്ച് പോയപ്പോൾ അതിനെ പിടിച്ചു കെട്ടി കൊണ്ടുവരാൻ
പോയപ്പോഴും താൻ ചമഞ്ഞൊരുങ്ങിയാണ് പോയതെന്ന് ഒരു കിംവദന്തിയുണ്ടെന്ന കാര്യം.
മരണത്തിന് തൊട്ടു മുമ്പും തനിക്കെങ്ങിനെ ഇത്ര ലാഘവത്തോടെ ചിന്തിയ്ക്കാനും പ്രവൃത്തിയ്ക്കാനും കഴിയുന്നു എന്നോർത്ത് ചിരിച്ചു.
സത്യത്തിൽ അന്ന് പശു കയറു പൊട്ടിച്ചു പോയി എന്ന് അമ്മ വന്ന് പറഞ്ഞപ്പോൾ താൻ കുളി കഴിഞ്ഞു വന്ന് കണ്ണാടിയുടെ മുമ്പിൽ ഒരുങ്ങാൻ നിന്ന നേരം ആയിരുന്നു. കൈയ്യിലെടുത്ത പൗഡർ കൊട്ടിക്കളയേണ്ടല്ലോ എന്നോർത്ത് മുഖത്തിട്ടിട്ട് ആണ് പോയത് എന്നു മാത്രം.
അതിനാണ് കയറു പൊട്ടിച്ച് പോയ പശുവിനെ പിടിക്കാൻ വരേ ചമഞ്ഞൊരുങ്ങി പോയെന്ന് എല്ലാവരും പറഞ്ഞു പരത്തിയത്.
എന്നാലും പശുവിനെ പിടിച്ചു കെട്ടിയില്ലേ. പൊട്ടിയ കയറിന്റെ തുമ്പിൽ പിടിച്ച് നിർത്താൻ ശ്രമിച്ചിട്ടും പശു തന്നേയും വലിച്ചു കൊണ്ട് മുന്നോട്ട്. പറമ്പു കിളച്ച് കൂമ്പലെന്ന് പറയുന്ന ചെറിയ ചെറിയ മൺകൂനകൾ ഉണ്ടാക്കി വച്ചിരിക്കുന്നതിന്റെ മുകളിലൂടെ തന്നെയും വലിച്ചു കൊണ്ടുള്ള ഓട്ടം. പോകുന്ന വഴിയിൽ അടുത്തു കിട്ടിയ കവുങ്ങിൽ ഒരു വിധം കയർ ചുറ്റിവരിഞ്ഞ് പശുവിന്റെ ഓട്ടം നിർത്തിച്ചു. കയറും പൊട്ടിച്ച് ഓടിപ്പോയ പശുവിനെ പിടിച്ചു കെട്ടിയത് എല്ലാവരും മറന്നെങ്കിലും പശുവിനെ പിടിക്കാൻ പൗഡറിട്ട് പോയത് മാത്രം ആരും മറന്നിട്ടില്ല, പിന്നെ ഞാനായിട്ട് എന്തിന് മറന്നിട്ടുണ്ട് എന്നു കാണിയ്ക്കണം.
ചത്തു കിടക്കുമ്പോഴും ചമഞ്ഞൊരുങ്ങിയില്ല എന്ന പരാതിക്ക് പരിഹാരമായി. സുഗന്ധദ്രവ്യങ്ങൾ വാരിപ്പൂശി, നാളെയ്ക്ക് ഇനി വേണ്ടല്ലോ എന്നോർത്ത് ബോഡി സ്പ്രേയുടെ അവസാന തരി വരെ ബോഡിയിൽ അടിച്ചു തീർത്തു. നാളെ വെറും ബോഡിയാകുന്നതിന്റെ ബാക്കിപത്രം.
പഴയ കിടപ്പ് വീണ്ടും കിടന്നു. തലയിണയിൽ നേരത്തെ ഉപേക്ഷിച്ച ബ്ലേഡ് വീണ്ടും വലത് തള്ളവിരലും ചൂണ്ടുവിരലും കൊണ്ട് മുറുക്കെ പിടിച്ചു. ഇടതു കൈ ചുരുട്ടി പിടിച്ചു. ഫിനിഷിംഗ് പോയിന്റ്, അവസാന ലാപ്പിലെ അവസാന നിമിഷം. കൈകൾക്കൊരു വിറയൽ, കൈപ്പിടിയിൽ നിന്ന് ബ്ലേഡ് ഊർന്നു വീണു.
അപ്പോഴും കാതിലേക്ക് ഒഴുകി എത്തിയിരുന്ന കവിത അവസാനിച്ചിരുന്നില്ല.
വീണ്ടുമൊരുനാൾ വരും
വീണ്ടുമൊരുനാൾ വരും
എന്റെ ചുടലപറമ്പിലെ തുടതുള്ളുമീ
സ്വാർത്ഥസിംഹാസനങ്ങളെ കടലെടുക്കും....
പിന്നീട് എപ്പോഴോ കവിത തീർന്നതിന് മുമ്പാണോ ഉറങ്ങിയത്, ഉറങ്ങിയതിന് ശേഷമാണോ കവിത തീർന്നത് എന്നറിയില്ല.
ചമയങ്ങൾ അണിഞ്ഞൊരുറക്കം. അതു മാത്രം ബാക്കി .
By PS Anilkumar

ഭൂമിയുടെ വികൃതി ആവരിക്കുക :-


ക്ലാസ്സ് തുടങ്ങുന്നതിനു മുമ്പുള്ള മണി മുഴങ്ങുന്നതിനു മുമ്പുള്ള ക്ലാസ്സ്റൂം കാളച്ചന്ത സമാനമായ് ആഹ്ലാദിച്ചർമ്മാദിച്ച് അക്കിത്തിക്കുത്താടി തിമിർക്കുകയാണ്. അന്തരീക്ഷത്തിൽ അങ്ങോട്ടുമിങ്ങോട്ടും പായുന്ന ഡസ്റ്റർ ആരുടെയെല്ലാമോ തലയ്ക്കു കൊള്ളുമ്പോൾ ഉയരുന്ന ചോക്കുപൊടി ക്ലാസ്സ് മുറിയെ വെളുപ്പിൽ നിറച്ചു. മണി മുഴങ്ങിയപ്പോൾ പൊടിയമർന്നില്ലെങ്കിലും ക്ലാസ്സ് മുറിയെ നിശബ്ദമാക്കാൻ അത് ധാരാളം ആയിരുന്നു.
കാക്കക്കൂട്ടിൽ കല്ലിട്ടപ്പോൾ കലപില കൂട്ടിയിരുന്ന കുട്ടിക്കുറുമ്പന്മാർ
മുൻഷി സാറിന്റെ തലവെട്ടം കണ്ടപ്പോഴെ കമാന്ന് ഒരക്ഷരം മിണ്ടാതെ വിനയകുനിതന്മാരായ് ഇരിക്കുന്നതു കണ്ടാൽ ബഹളം ഉണ്ടാക്കിയതെല്ലാം അടുത്ത ക്ലാസ്സിലെ കുട്ടികൾ ആണെന്ന് തോന്നിപ്പോകും.
ഇവിടത്തെ ക്ലാസ്സ് ടീച്ചറും കൂടാതെ ഈ കുട്ടികൾക്ക് സയൻസും സാമൂഹ്യപാഠവും പഠിപ്പിക്കുന്ന മുൻഷി സാർ ക്ലാസ്സ് റൂം ലക്ഷ്യമാക്കി നടന്നു വരുന്നു. കഞ്ഞിമുക്കി അലക്കിതേച്ച് വടി പോലാക്കിയ വെളുത്ത ഖദർ മുണ്ടും, ജുബ്ബയും ആണ് സാറിന്റെ സ്ഥിരം വേഷം. ക്ലാസ്സിൽ കടന്നുവന്ന സാർ കൈയ്യിലുള്ള അറ്റൻഡൻസ് റെജിസ്റ്ററും, പുസ്തകവും, ഉത്തര കടലാസിന്റെ കെട്ടും, വടിയും , ചോക്കും, കോഴിമുട്ടയുടെ ആകൃതിയിലുള്ള മൂക്കിപ്പൊടിയുടെ കുപ്പിയും എല്ലാം നിരത്തിവച്ചു. ചൂരലെടുത്ത് മേശപ്പുറത്ത് രണ്ടടി അടിച്ച് സൈലന്റ്സ്, സൈലന്റ്സ് എന്നു പറഞ്ഞത് കേട്ടാണ് നിശബ്ദമായ ക്ലാസ്സ് റൂം മൊത്തം ചിരിച്ചത്.
ഹാജറെടുത്തതിന് ശേഷം മുൻഷി സാർ കഴിഞ്ഞ ഓണപ്പരീക്ഷയുടെ പേപ്പറുകൾ ഓരോ കുട്ടികളുടേയും പേര് വിളിച്ച് മാർക്കും പറഞ്ഞ് കൊടുത്തു തുടങ്ങി. ആദ്യം കൊടുത്തതെല്ലാം ക്ലാസ്സിൽ കൂടുതൽ മാർക്ക് കിട്ടിയ കുട്ടികൾക്കായിരുന്നു. പിന്നീട് മുൻഷി സാർ എടുത്ത പേപ്പർ നമ്മുടെ ഗോപാലിന്റേതായിരുന്നു. സാർ പേപ്പർ എടുത്ത് മറിച്ചും തിരിച്ചും നോക്കി. പഴയ പോലെയെന്നുമല്ലല്ലോ ഇപ്രാവശ്യം ഗോപാലിന്റെ മാർക്ക് രണ്ടക്കം കടന്നല്ലോ?
എന്നാലും എനിക്കൊരു സംശയം ഗോപാലിന്റെ ഒരു ചോദ്യവും ഉത്തരവും ക്വസ്റ്റിൻ പേപ്പറിൽ പോയിട്ട് പാഠഭാഗത്ത് പോലും ഇല്ലാത്തതാണല്ലോ.
അതേതു ചോദ്യമാണ് സാറേ, കുട്ടികൾ ഒന്നടങ്കം ചോദിച്ചു.
ഇരുപത്തിമൂന്നാമത്തെ ചോദ്യം ഭൂമിയുടെ ആകൃതി വിവരിക്കുക എന്നതിന് ഭൂമിയുടെ വികൃതി ആവരിക്കുക എന്നാണ് ചോദ്യം എടുത്തെഴുതിയത്?
അത് ഒരു അക്ഷരം അങ്ങോട്ടും ഇങ്ങോട്ടും മാറി പോയതല്ലേയുള്ളു സാറേ അതിനിത്ര പറയാനുണ്ടോ ? നമ്മുടെ ഗോപാൽ അല്ലേ സാറേ, പാവം .
ചോദ്യത്തിന്റെ കാര്യമല്ല ഞാൻ പറയാൻ പോകുന്നത് ഉത്തരത്തിന്റെ കാര്യമാണ്.
ആദ്യം ആൾക്കാർ പറഞ്ഞു ഭൂമി പരന്നതാണെന്ന്, പിന്നെ നമ്മൾ പഠിച്ചു ഭൂമി ഉരുണ്ടതാണെന്ന് , അത്ര കൃത്യമായ ഗോളാകൃതിയല്ല, ഇത്തിരി നീണ്ട ഗോളാകൃതിയാണെന്ന്. ഇന്നു ചിലർ പറയുന്നു ഈ തരത്തിൽ ഒന്നുമല്ല തളികയുടെ രൂപത്തിൽ ആണെന്ന് എല്ലാം. പക്ഷെ നമ്മുടെ ഗോപാൽ എഴുതിയിരിക്കുന്ന ഉത്തരം കേട്ടാൽ നാസ ഇപ്പോഴേ വന്ന് വല്ല അവാർഡും കൊടുക്കും എന്ന കാര്യം ഉറപ്പാണ്. സംശയം ഉണ്ടെങ്കിൽ നിങ്ങൾ കേട്ടു നോക്കുക.
ഉ. ഭൂമിയുടെ ആകൃതി എന്നു പറയുന്നത് പല ദിവസങ്ങളിലും പല രീതിയിലാണ്. തിങ്കൾ, ചൊവ്വ ദിവസങ്ങളിൽ ഭൂമിയ്ക്ക് ഏകദേശം കോഴിമുട്ടയുടെ രൂപമായിരിക്കും. ബുധൻ, വ്യാഴം ദിവസങ്ങളിൽ ഭൂമി ചതുരരൂപത്തിലായിരിക്കും കാണാനാവുന്നത്. വെള്ളിയാഴ്ച ഭൂമി ഉരുണ്ട് നല്ല പന്തു പോലിരിക്കും. ശനി, ഞായർ ദിവസങ്ങളിൽ അവധി ആയതിനാൽ ഭൂമിയ്ക്ക് എന്താകൃതി ആയിരിക്കും എന്നറിയില്ല. പക്ഷെ പിന്നീട് ഉള്ള തിങ്കളാഴ്ച ചിലപ്പോൾ ഭൂമി കോഴിമുട്ട പോലെയോ അല്ലെങ്കിൽ ചതുരത്തിലോ, പന്തുപോലെ ആയിരിക്കുമോ എന്ന് ഇപ്പോൾ പറയാനാവില്ല.
ഉത്തരം വായിച്ചു കേട്ടതിനു ശേഷം ക്ലാസ്സിലെ പൊട്ടിച്ചിരി തീരാൻ ഒത്തിരി സമയം എടുത്തു. ക്ലാസ്സിലെ മൊത്തം കുട്ടികളുടെ കൂടെ ചേർന്ന് ചിരിയ്ക്കാൻ ഗോപാലും ഒരു പിശുക്കും കാണിച്ചില്ല.
എന്റെ പൊന്നു കുട്ടികളെ ഞാൻ ഇങ്ങിനെ നിങ്ങളെ പഠിപ്പിച്ചിട്ടുണ്ടോ ? നിങ്ങളുടെ പുസ്തകത്തിൽ എവിടെ യെങ്കിലും ഇങ്ങിനെ ഉണ്ടോ? പിന്നെ എവിടെ നിന്നാണ് ഗോപാലിന് മാത്രം ഇതു പോലുള്ള അറിവ് ലഭിച്ചത് എന്നറിയില്ല. ഇനി നമുക്ക് ഗോപാലിനോട് തന്നെ ചോദിക്കാം എവിടെ നിന്നാണ് ഇതു പോലുള്ള ഭൂമിയുടെ വികൃതികൾ അറിയാൻ സാധിച്ചതെങ്കിൽ ഒന്നു പറഞ്ഞു തന്നാൽ നന്നായിരുന്നു. ഗോപാൽ ദയവായി ഒന്നെഴുന്നേറ്റ് നിന്ന് ബാക്കി കുട്ടികൾക്കും മനസ്സിലാകുന്ന രീതിയിൽ ഭൂമിയുടെ വികൃതി ഒന്നു പറഞ്ഞ് കൊടുക്കൂ.
സാറു തന്നെയാണ് ഇങ്ങിനെയെല്ലാം പഠിപ്പിച്ചത്.
ഞാനോ അതെപ്പോൾ?
സാർ ഒരു തിങ്കളാഴ്ചയല്ലേ ഭൂമിയുടെ ആകൃതി പഠിപ്പിച്ച് തന്നത്. ഉദാഹരണമായി സാർ അന്ന് സാറിന്റെ കൈയ്യിലിരുന്ന കോഴിമുട്ടയുടെ ആകൃതിയിലുള്ള മൂക്കിപ്പൊടി കുപ്പി കാണിച്ചു തന്നിട്ട് ഏകദേശം ഇതുപോലെയാണ് ഭൂമിയുടെ ആകൃതി എന്ന് പറഞ്ഞു പഠിപ്പിച്ചില്ലേ?
അത് ശരിയാണ് ഭൂമിയ്ക്ക് ഏകദേശം ആ രൂപം ആണ് എന്ന് ഞാൻ പറഞ്ഞത് ഓർക്കുന്നു. എന്നും പറഞ്ഞ് ബാക്കി രൂപമെല്ലാം ആരു പറഞ്ഞു തന്നു .
ചൊവ്വാഴ്ചയും സാർ വീണ്ടും ആ പൊടികുപ്പി കാണിച്ചാണ് പഠിപ്പിച്ചത്. അതിനു ശേഷമുളള രണ്ടു ദിവസവും സാറിന്റെ പൊടിക്കുപ്പി ചതുരത്തിൽ ഉള്ളതായിരുന്നു അപ്പോൾ ഞാൻ ഓർത്തു പൊടിക്കുപ്പി മാറിയപ്പോൾ ഭൂമിയുടെ ആകൃതി മാറിയത് കാണിയ്ക്കാനായിരിക്കും സാർ പുതിയ പൊടിക്കുപ്പി കൊണ്ടുവന്നതെന്ന് . വെള്ളിയാഴ്ച പിന്നീടും ഭൂമിയെ പറ്റി പഠിപ്പിച്ചപ്പോൾ സാർ പന്തുപോലുള്ള പൊടിക്കുപ്പി ഉയർത്തി കാണിച്ചിരുന്നു. ഇതെല്ലാം കണ്ടാണ് സാറേ ഞാൻ എഴുതിയത് ഭൂമിയുടെ ആകൃതി ഇങ്ങിനെയെല്ലാം ആയിരിക്കും എന്ന്.
ഇപ്പോഴാണ് സാർ ശരിയ്ക്കും അസ്ത്രപ്രജ്ഞനായി എന്ന വാക്കിന്റെ അർത്ഥം ശരിയ്ക്കും മനസ്സിലാക്കിയത്..
BY PS Anilkumar Devidiya

സ്റ്റാറ്റസ്


ഇയാളുടെ ഫോൺ ഒന്നു തന്നേ, ഒന്ന് നാട്ടിൽ വിളിക്കാനാണ്.
അതെന്തു പറ്റി ബെന്നീ നിന്റെ വീട്ടിലെ വൈഫൈ കട്ടായോ അതോ ഫോണിലെ നെറ്റു തീർന്നോ?
നെറ്റും തീർന്നില്ല വൈഫൈ കട്ടായതുമില്ല, അതു രണ്ടും ഉണ്ട് പക്ഷെ അതിനേക്കാൾ വലിയ മറ്റൊരു മുട്ടൻപണി കിട്ടി, അതു പിന്നെ പറയാം, രാവിലെ തൊട്ട് വീട്ടിൽ ഫോൺ ചെല്ലാത്തതും നോക്കിയിരിക്കുകയായിരിക്കും റബേക്ക. ആദ്യം അവളുടെ പരിഭവം തീർക്കട്ടെ, നടന്ന കാര്യങ്ങൾ എന്നിട്ട് വിശദമായി പറയാം.
എന്റെ ഫോണിന്റെ വാട്സപ്പിനു മുകളിലായ് ഡെമോക്ലീസിന്റെ വാളുപോലെ തൂങ്ങിയാടുന്ന ഒരു സിംബൽ കണ്ടോ? അത് കൊണ്ടാണ് ഞാൻ നെറ്റും ഓഫ് ചെയ്ത് ഇങ്ങിനെ തെക്കുവടക്ക് ഓടുന്നത്.
ഒന്നും മനസ്സിലാകുന്നില്ലല്ലോ, എന്താണ് എന്നു പറഞ്ഞാലല്ലേ എന്തെങ്കിലും പരിഹാരം ചെയ്യാൻ പറ്റുകയുള്ളു.
അത് ഒരു വാട്സ്അപ്പ് സ്റ്റാറ്റസ് ആണ് അതൊന്ന് ഡിലേറ്റ് ചെയ്ത് തരാമോ?
അതിന് ഡിലേറ്റ് ഓപ്ഷൻ കാണുന്നില്ലല്ലോ, പിക്ച്ചർ സെന്റ് ആയാലേ ഡിലേറ്റ് ചെയ്യാൻ പറ്റുകയുളളു. ആദ്യം സെന്റ് ചെയ്യട്ടെ എന്നിട്ട് ഡിലേറ്റ് ചെയ്യാം.
അത് സെന്റ് ചെയ്യുന്നതിനേക്കാൾ ഭേദം എന്നെ തന്നെ അങ്ങോട്ട് ഡിലേറ്റ് ചെയ്യുന്നതാണ്.
നിങ്ങൾ കാര്യം പറ ബെന്നീ, എന്താണ് ഇത്രയും പ്രശ്നമുള്ള കാര്യം, ഇത്ര തല പോകുന്ന എന്തു കാര്യം ആണ് ഇതിനു മുകളിൽ ഉള്ളത്.
അത് പറയാം ആദ്യം ഇത്തിരി വെള്ളം തരുക. എന്നിട്ടു പറയാം രാവിലെ തൊട്ട് എന്നെ വെള്ളം കുടിപ്പിക്കുന്ന കാര്യം. സാധാരണയായി ഞാൻ രാവിലെ എഴുന്നേൽക്കുന്ന സമയത്ത് വാട്ട്സപ്പ് നോക്കാറില്ല. രാവിലെ എന്തെങ്കിലും ദുഃഖകരമായ സന്ദേശങ്ങൾ കണ്ടാൽ പിന്നെ അന്നത്തെ ദിവസം പോക്കാണ്. നെറ്റ് രാത്രി ഓഫ് ചെയ്തിരുന്നത് ഓൺ ചെയ്തു. കുറച്ചു നേരം കഴിഞ്ഞ് ചായ കുടിച്ചു കൊണ്ടിരുന്നപ്പോഴാണ് കൂടെ ജോലി ചെയ്തിരുന്ന സുഭാഷിന്റെ ഒരു മെസേജ് വന്നത്, ഓഫീസിലെ വല്ല അത്യാവശ്യ കാര്യമായിരിക്കും എന്നോർത്താണ് മെസേജ് നോക്കിയത്. അപ്പോഴാണ് തമാശ, ഏതോ ഒരു സിനിമാനടിയുടെ മുഖം വച്ച് മോർഫിംഗ് ചെയ്തെടുത്ത ചൂടൻഫോട്ടോ ആയിരുന്നു അവൻ മെസേജ് ചെയ്തിരിക്കുന്നത്. ഞാൻ അത് ഡിലേറ്റ് ചെയ്യാൻ നോക്കിയപ്പോൾ അത് തെറ്റി നേരെ സ്റ്റാറ്റസിലേയ്ക്ക് പോയി ഞാൻ എടാപിടീന്ന് നെറ്റും ഓഫ് ചെയ്തു, വാട്സപ്പിൽ വന്ന ചിത്രവും ഡിലേറ്റ് ചെയ്തു. ചിത്രം അയച്ച കൂട്ടുകാരനെ പത്ത് പള്ളും വിളിച്ചു , അവനോട് പണ്ടേ എത്ര വട്ടം പറഞ്ഞിരിക്കുന്നതാണ് ഇതു പോലുള്ള ചിത്രങ്ങൾ എനിക്കെന്നല്ല കുടുംബം ആയി കഴിയുന്ന ആർക്കും അയക്കരുത് എന്ന്. ഒന്നാമതെ മിക്ക വീട്ടിലും മാതാപിതാക്കൾക്ക് ഫോണിൽ വരുന്ന മെസേജ് കുട്ടികളാണ് മിക്കപ്പോഴും ആദ്യം കൈകാര്യം ചെയ്യുന്നത്. അതുകൊണ്ട് എന്തും ശ്രദ്ധിച്ച് മെസേജ് ചെയ്യണം എന്ന് എപ്പോഴും അവനോട് പറയാറുള്ളതാണ്. പക്ഷെ അതെല്ലാം പറഞ്ഞിട്ട് ഇനി എന്തു കാര്യം. എന്റെ വാട്ട്സപ്പിന്റെ മുകളിൽ നേരത്തെ പറഞ്ഞ രാജാവിന്റെ തലയ്ക്ക് മുകളിൽ തൂങ്ങുന്ന വാളുപോലെ സ്റ്റാറ്റസ് അപ്ഡേറ്റിംഗ് എന്നു കാണിക്കുന്ന സിംബൽ കാണുന്തോറും അവനോടുള്ള ദേഷ്യം ഇരട്ടിക്കുകയാണ്. മക്കളും, വീട്ടുകാരും, കൂട്ടുകാരും, ഓഫീസ് സ്റ്റാഫുകളും, മാനേജരും ഉൾപ്പെടെ ഏതാണ്ട് പത്തിരുനൂറ് പേരുളളതാണ് എന്റെ വാട്ട്സപ്പ്. അതിനിടയിലേക്ക് സ്റ്റാറ്റസിൽ ഇങ്ങിനെ ഒരു ചിത്രം ചെന്നാൽ പിന്നെ നാണം കെട്ട് ജീവിച്ചിരിക്കേണ്ട കാര്യം ഇല്ല എന്നുള്ളത് സത്യമായ കാര്യമാണ്.
അതിന് നിങ്ങൾക്ക് വന്ന ചിത്രം ഡിലേറ്റ് ചെയ്തില്ലേ അപ്പോൾ പിന്നെ സ്റ്റാറ്റസിലേക്ക് ഡൗൺലോഡാകില്ല എന്നത് ഉറപ്പാണ്
അതിപ്പോൾ കുറുപ്പിന്റെ ഉറപ്പ് പോലാകുമോ? സ്റ്റാറ്റസിൽ അതിന്റെ കണ്ടന്റ് ഇപ്പോഴും കാണിക്കുന്നുണ്ടല്ലോ എങ്ങാനും നെറ്റ് ഓൺ ചെയ്താൽ സ്റ്റാറ്റസിൽ ചിത്രം തെളിഞ്ഞാലോ?
എന്നാൽ നമുക്ക് വാട്ട്സപ്പ് ഡിലേറ്റ് ചെയ്തിട്ട് പുതിയതായിട്ട് വാട്സപ്പ് ഇൻസ്റ്റാൾ ചെയ്താൽ മതിയാ കുമെന്ന് തോന്നുന്നു.
പക്ഷെ നേരത്തെ ഫോൺ റീ സ്റ്റാർട്ട് ചെയ്ത് നോക്കിയിട്ടും ഫോണിന്റെ മുകൾഭാഗത്ത് ഡെമോക്ലീസ് അങ്കിളിന്റെ വാളിന് മാത്രം ഒരു മാറ്റവും കണ്ടില്ല. ഇനിയിപ്പോൾ ഉള്ള വാട്സപ്പ് കളഞ്ഞിട്ട് പുതിയത് ഇൻസ്റ്റാൾ ചെയ്താലും ഇതിന്നൊരു മാറ്റം ഉണ്ടാകുമോ എന്ന് ദൈവത്തിന് മാത്രം അറിയാം.
ഞാൻ ഏതായാലും നമ്മുടെ മൊബൈൽ റിപ്പയറിംഗ് ഷോപ്പിലെ പയ്യനെ കാണിച്ചിട്ട് വല്ല പരിഹാരവും ഉണ്ടോ എന്ന് നോക്കിയിട്ട് വരാം.
ബെന്നി യാത്ര പറഞ്ഞിട്ട് പോയി. അവന്റെ മാനസിക വിഷമത്തെ പറ്റിയോർത്തു. സത്യമാണ് കണ്ണിൽ കൊള്ളാനുളളത് പുരികത്തിൽ കൊണ്ടു എന്നു പറഞ്ഞാൽ മതി. നേരെ മറിച്ച് കൈ തട്ടി ആ ചിത്രം സ്റ്റാറ്റസിലേക്ക് പോയത് അവൻ അറിഞ്ഞില്ലായിരുന്നെങ്കിൽ ഉണ്ടാകുമായിരുന്ന ഒരവസ്ഥ ഓർത്തിട്ട് തന്നെ പേടിയാകുന്നു. ചെറിയ നാണക്കേട് മതി ചിലർക്ക് ജീവൻ പോലും കളയാൻ ഇന്നത്തെ കാലത്ത്. ദൈവമേ ഒന്നും സംഭവിക്കാതിരുന്നത് ഭാഗ്യം എന്ന് ആശ്വസിക്കാം.
അങ്ങിനെ ഓരോന്ന് ആലോചിച്ചു കൊണ്ടിരുന്നപ്പോൾ ആണ് തന്റെ ഫോണിലേക്ക് മെസേജ് വരുന്ന ശബ്ദം കേട്ടത്. എത്ര നോക്കണ്ട എന്നെല്ലാം ഓർത്താലും, മെസേജ് വരുന്ന ശബ്ദം കേട്ടാൽ എന്താണ് അതിന്റെ ഉള്ളടക്കം എന്നറിഞ്ഞില്ലെങ്കിൽ ഉള്ളിലൊരു തിക്കുമുട്ടൽ ആണ്. ഇനിയിപ്പോൾ ബെന്നി യുടെ വല്ല മെസേജ് ആണെങ്കിലോ? ഫോൺ തുറന്നു നോക്കി, ചിന്തിച്ചത് ശരിയാണ് ബെന്നിയുടെ മെസേജ് തന്നെയാണ്.
അളിയാ രക്ഷപ്പെട്ടു, വാട്ട്സപ്പ് ഡിലേറ്റ് ചെയ്യാതെ തന്നെ സ്റ്റാറ്റസിൽ നിന്ന് അതൊഴിവാക്കി. ഏതായാലും അതിനൊരു തീരുമാനം ആയി എന്നാലും അളിയൻ ഒന്ന് വാട്ട്സപ്പ് തുറന്ന് എന്റെ സ്റ്റാറ്റസ് നോക്കിയിട്ട് ഇപ്പോൾ എന്താണ് സ്റ്റാറ്റസ് ആയി കാണുന്നത് എന്നുള്ളത് ഒന്ന് എന്നെ വിളിച്ച് പറയണേ.
ബെന്നിയുടെ വാട്ട്സപ്പ് തുറന്ന് സ്റ്റാറ്റസ് നോക്കിയപ്പോൾ മനസ്സിൽ ഡിസംബറിലെ മഞ്ഞിന്റെ അല്പം കുളിരു വീണു. ഒന്നാം തീയതി അവൻ മാറ്റിയ സ്റ്റാറ്റസിന്റെ സ്‌റ്റാറ്റസ് കോ തന്നെ ഇപ്പോഴും നിലനിർത്തിയുണ്ട്. ജിംഗിൾ ബെല്ലിന്റെ പിന്നണി ഗാനത്തിൻ അകമ്പടിയോടെ മഞ്ഞിലൂടെ റെയിൻഡിയർ വലിക്കുന്ന വണ്ടിയിൽ ഇരിക്കുന്ന ക്രിസ്തുമസ്സ് അപ്പൂപ്പൻ. അപ്പുപ്പന്റെ താടിയ്ക്കും തലമുടിയ്ക്കും ഉള്ള നല്ലതൂവെള്ള നിറത്തിനു മുകളിലേക്ക് പെയ്തു വീഴുന്ന തൂമഞ്ഞിന്റെ തരികൾ വണ്ടിയിൽ നിറച്ചു വച്ചിരിക്കുന്ന വർണ്ണസമ്മാന പൊതികൾക്കു മുകളിലും പെയ്തിറങ്ങി കൊണ്ടിരിക്കുന്നു. ശാന്തമായ രാത്രി, ശുഭ്രമായ നീലാകാശത്ത് കണ്ണുചിമ്മി കാട്ടുന്ന നക്ഷത്രക്കൂട്ടങ്ങൾ ഭൂമിയിൽ സന്മസ്സുള്ളവർക്ക് സമാധാനം എന്നുരുവിടുന്നതായി തോന്നിയത് വെറും തോന്നലല്ലായിരുന്നു.

By: PS ANilkumar Devideviya

മാതാപിതാഗുരോദൈവം


സ്കൂൾ ബസ്സ് വന്നു നിന്നു.
അമ്മേ എന്ന വിളിയുമായി
സുന്ദ് ബസ്സിൽ നിന്നിറങ്ങിയപ്പോഴേ ശ്രദ്ധിച്ചു, കടന്നൽകുത്തേറ്റതുപോലെ മുഖം വീർപ്പിച്ചാണ് ഇന്നും വന്നിരിക്കുന്നത്. അല്ലെങ്കിൽ തന്നെ ചിരി കുറവാണ്. എന്തെങ്കിലും ചെറിയ കാര്യം മതി മുഖം ബലൂൺ പോലെ വീർത്തു വരാൻ.
ഇനി ഇന്നെന്താണാവോ പുതിയ പ്രശ്നം. കൂട്ടുകാരോട് വഴക്കിടാനാന്നും പോകാറില്ല. കൂട്ടുകാർ തന്നെ ഇല്ലെന്ന് പറയാം. എന്നും സ്കൂളിൽ പോകുക, നന്നായി പഠിയ്ക്കുക തിരിച്ചുപോരുക അതാണ് പുള്ളീടെ ഒരു രീതി.
എന്താണ് കാര്യം എന്നു ചോദിച്ചാലും ഇപ്പോൾ പറയില്ല. പറയാനുള്ള മൂഡ് വരുമ്പോൾ തന്നത്താൻ പറയും.
വീട്ടിൽ ചെന്ന ഉടനെ സുന്ദ് പതിവില്ലാതെ യൂണിഫോം പോലും മാറാതെ ടിവി ഓൺ
ചെയ്ത് കാർട്ടൂൺ ചാനൽ കാണാൻ തുടങ്ങി. ചായയും പലഹാരവും എടുത്ത് കൊടുത്തപ്പോൾ നല്ലകുട്ടിയായി കൈകഴുകി വന്നിരുന്ന് ഭക്ഷണം കഴിയ്ക്കാൻ തുടങ്ങിയതേയുള്ളു പെട്ടെന്ന്
അവസാനിപ്പിച്ചു.
അമ്മേ കൈ വേദനിക്കുന്നു.
വായിൽ വച്ചു തരുമോ അമ്മേ.
അതെന്താ കൈ ഇന്ന് വേദനിക്കുന്നത് മോളെവിടെയെങ്കിലും വീണോ?
ഇല്ലമ്മേ ടീച്ചർ അടിച്ചിട്ടാണ് കൈ വേദനിക്കുന്നത്, ഉച്ചയ്ക്കും ചോറുണ്ണാൻ പറ്റിയില്ലമ്മേ കൈ വേദനിച്ചിട്ട്.
സുന്ദ് വല്ല കുരുത്തക്കേടും കാണിച്ചോ, പിന്നെന്തിനാ അടിച്ചത്, ഏത് ടീച്ചറാണ്
അടിച്ചത്.
മീരട്ടീച്ചറാണ് അമ്മേ അടിച്ചത്.
അമ്മയല്ലേ പറഞ്ഞത് നല്ല മാർക്ക് മേടിച്ചാൽ ടീച്ചർക്ക് സന്തോഷമാകും. പഠിക്കുന്ന കുട്ടികളോട് ടീച്ചർക്ക് പ്രത്യേക സ്നേഹം ഉണ്ടാകും എന്നെല്ലാം. ഞാനല്ലേ അമ്മേ
ക്ലാസ്സിൽ ഏറ്റവും കൂടുതൽ മാർക്ക് മേടിച്ചത്. എന്നിട്ടാണമ്മേ ഒരു കാരണവും ഇല്ലാതെ എന്നേയും മറ്റു കൂട്ടുകാരേയും
അടിച്ചത്.
കഴിഞ്ഞ ദിവസം മുതൽ മീര ടീച്ചറിന്റെ വിഷയത്തിന്റെ പഠിത്തത്തിൽ പുള്ളി വലിയ ശ്രദ്ധ കൊടുക്കാതിരുന്നപ്പോൾ താൻ കാരണം തിരക്കി.
അമ്മേ ഞാൻ കഴിഞ്ഞ ദിവസം പാഠഭാഗത്തിൽ എന്തോ സംശയം ചോദിച്ചതിന് ടീച്ചർ അടിച്ചു.
ഇങ്ങോട്ട് ഒന്നും ചോദിക്കേണ്ട
അങ്ങോട്ട് പറയുന്നത് കേട്ടാൽ മതി എന്ന് .
അപ്പോഴാണ് താൻ മോളോട് പറഞ്ഞത്. നന്നായി പഠിച്ച് നല്ല മാർക്ക് വാങ്ങിയാൽ ടീച്ചർ നല്ല കുട്ടിയാണ് എന്നു പറയും
എന്നെല്ലാം പറഞ്ഞാണ് ഒന്നു പരീക്ഷയ്ക്ക് പഠിപ്പിച്ച് വിട്ടത്.
ടീച്ചറെന്താ റേഡിയോ ആണോ, പത്രപ്രവർത്തകരെ പേടിയ്ക്കുന്ന ചില ഭരണാധികാരികൾ റേഡിയോ
പ്രക്ഷേപണം നടത്തുന്ന
പോലെയാണോ വിദ്യാഭ്യാസം.
ഇന്നെന്തിനാ തല്ലിയത്, അമ്മ ടീച്ചറിനെ വിളിച്ച് ചോദിയ്ക്കാട്ടോ .
ഇന്നെല്ലാവരേയും തല്ലിയതിന് പ്രത്യേകിച്ച് കാരണമൊന്നും ഇല്ലായിരുന്നമ്മേ ,
ആൻസർ ഷീറ്റിൽ ക്വസ്റ്റിൻ എഴുതിയില്ല, ഓരോ ലൈൻ ലീവ് ചെയ്ത് എഴുതിയില്ല
എന്നെല്ലാം പറഞ്ഞാണ്
എല്ലാ കുട്ടികളേയും തല്ലിയത്. ഇന്നുവരെ അങ്ങിനെ ചെയ്യണമെന്നൊന്നും ഞങ്ങളോട് പറഞ്ഞിട്ടില്ലമ്മേ.
അങ്ങിനെയൊന്നും ഒരു നിയമമില്ലല്ലോ, ഇതെന്തൊരു ടീച്ചറാണ്. ഏതായാലും അമ്മ സീമട്ടീച്ചറിനെ വിളിച്ച് നമ്പർ വാങ്ങിയിട്ട് മീരട്ടീച്ചറേ വിളിച്ച് കാര്യം തിരക്കാം.
ഹലോ,
സീമട്ടീച്ചറേ എനിക്ക് ഒരു സഹായം വേണമല്ലോ. നമ്മുടെ മീരട്ടീച്ചറിന്റെ നമ്പർ ഒന്നു വേണമല്ലോ.
നമ്പർ തരാം പക്ഷെ നമ്പർ ഞാനാണ് തന്നതെന്ന് മാത്രം പറയരുത്. ഞങ്ങൾ ടീച്ചേഴ്സിന് എല്ലാവർക്കും അവരെ പേടിയാണ്. എന്തെങ്കിലും കംപ്ലെയിന്റു പറയാനാണെങ്കിലും അതുകൊണ്ട് കാര്യമില്ലെന്ന് മാത്രമല്ല അവർ അതിന്റെ പേരിൽ കുട്ടിയെ മാനസികമായും ശാരീരികമായും കൂടുതൽ പീഡിപ്പിക്കും. എന്തിനു പറയുന്നു ഞാനവരെ ഒന്ന് ഉപദേശിച്ചതിന് അവർ പകരം വീട്ടുന്നത് അവരുടെ ക്ലാസ്സിൽ പഠിക്കുന്ന എന്റെ കുട്ടിയോടാണ്. മാനേജ്മെന്റിലും അവർക്ക് നല്ല ഹോൾഡാണ്. അവർക്ക് പഠിക്കുന്ന കുട്ടികളേയും പഠിക്കാത്ത കുട്ടികളേയും എന്നു വ്യത്യാസമില്ല. ഒരു കുട്ടിയേയും ഇഷ്ടമില്ല.
ടീച്ചർ പറഞ്ഞത് സത്യമാണോ? ദൈവമേ ഇതു പോലുള്ള ചില ടീച്ചേഴ്സ് ആണ് പഠിപ്പിക്കുന്നുവെങ്കിൽ കുട്ടികൾ അനുഭവിക്കുന്ന
മാനസികസംഘർഷങ്ങൾ എത്ര കൂടുതൽ ആയിരിക്കും.
മാതാപിതാഗുരോദൈവം. എന്നു പറയുന്നതിൽ ഇതുപോലുള്ള ഗുരുക്കന്മാരെ
ദൈവമെന്ന് എങ്ങിനെ വിളിക്കും. എന്തു ചെയ്യാനാണ് ഇത്തരത്തിലുള്ളവരെ എങ്ങിനെ നന്നാക്കാനാണ്.
കത്തിക്കൊണ്ടിരിക്കുന്ന വിളക്കിൽ നിന്നല്ലേ ദീപം പകർന്നു കൊടുക്കേണ്ടത്. തമസോമാ ജ്യോതിർഗമയാ എന്നല്ലേ അദ്ധ്യാപകരെ പറ്റി പറയുന്നത്. ഇരുളകറ്റാനുള്ള വെളിച്ചമാകാതെ സ്വയം ഇരുട്ടാകുന്നവർ ആയാൽ എന്തു ചെയ്യും. പ്രകാശത്തിന്റെ , പ്രതീക്ഷകളുടെ ദീപാവലികൾക്കിടയിലെ ചില കരിന്തിരികൾ. നിങ്ങൾക്ക് എല്ലാ ടീച്ചേഴ്സിനും കൂടി ഒന്നിച്ച് മുകളിലേയ്ക്ക് പരാതി കൊടുക്കുകയോ, എല്ലാവരും കൂടെ ഒന്നുപദേശിച്ച് അവരെ നന്നാക്കി എടുക്കാൻ ആവില്ലേ ടീച്ചറേ.
എല്ലാവർക്കും സ്വന്തം
കാര്യം മാത്രമാണ് മുഖ്യം. ചില രക്ഷകർത്താക്കൾ പരാതി പറയാഞ്ഞിട്ടല്ല,
അതിനു ശേഷം പരാതി പറഞ്ഞവരുടെ കുട്ടികളെ അവർ ഒരു ദയാദാക്ഷിണ്യം കൂടാതെ മാനസികമായും ശാരീരികമായും പീഡിപ്പിക്കുന്ന എന്തോ ഒരു മാനസിക വൈകല്യത്തിന് ഉടമയാണെന്ന് തോന്നുന്നു . സീനിയർ ആയതിനാലും സ്കൂളിലെ പ്രശ്നങ്ങൾ തീർക്കാനായി മാനേജ്മെന്റ് അവരെ ഉപയോഗപ്പെടുത്തുന്നതിനാലും മാനേജ്മെൻറ് അവർക്കെതിരെ ഒന്നും ചെയ്യില്ല എന്ന അവരുടെ അഹങ്കാരവും ആണ്.
കുട്ടികൾക്ക് അല്ല ആദ്യം ഇത്തരം അദ്ധ്യാപകർക്ക് ആണ് കൗൺസിലിംഗ് വേണ്ടത് എന്നറിയാഞ്ഞിട്ടും പറയാഞ്ഞിട്ടും അല്ല. പക്ഷെ പൂച്ചയ്ക്കാരു മണി കെട്ടും. അടുത്ത പിറ്റിഎ മീറ്റിംഗിന് നിങ്ങൾ രക്ഷകർത്താക്കൾ എല്ലാവരും കൂടി ചേർന്ന് ഒരു പരാതി എഴുതി ഒപ്പിട്ട് മീറ്റിംഗിന് സമർപ്പിക്കുക, ഞങ്ങൾ മറ്റു ടീച്ചേഴ്സും നിങ്ങളുടെ കൂടെ ഉണ്ടാകും, ഉറപ്പ്.
ശരി ടീച്ചറേ അങ്ങിനെ തന്നെ ചെയ്യാം.
സുന്ദ് വിഷമിക്കാതിരുന്നോ , അമ്മ ടീച്ചറിനെ വിളിച്ച് ഒന്നു സംസാരിച്ച് കാര്യങ്ങൾക്ക് ഒരു തീരുമാനം ഉണ്ടാക്കാം. മോൾ ഭക്ഷണം കഴിഞ്ഞ് നാളത്തെ ഹോം വർക്കും ചെയ്ത് ബാക്കി പഠിക്കാനുള്ളതും പഠിച്ചു തീർത്തോളൂ, അമ്മ മീരട്ടീച്ചറേ ഒന്ന് വിളിച്ച് സംസാരിക്കട്ടെ.
ഹലോ, മീരട്ടീച്ചറല്ലേ
അതേ ആരാണ്
ഞാൻ ടീച്ചറുടെ ക്ലാസ്സിലെ ഒരു കുട്ടിയുടെ അമ്മയാണ്.
ഏതു കുട്ടി?
അതു പറയാം ടീച്ചറേ, കുട്ടിയുടെ പേരിനല്ല പ്രാധാന്യം ആദ്യം കാര്യം പറയാം പിന്നെ ആവശ്യമെങ്കിൽ പറയാം കുട്ടിയുടെ പേര്.
ശരി അങ്ങിനെയെങ്കിൽ അങ്ങിനെ ആദ്യം നിങ്ങൾ കാര്യം പറയൂ, എനിക്ക് ബാക്കി ഒത്തിരി പണികൾ ചെയ്തു തീർക്കാനുണ്ട്. നിങ്ങൾക്ക് ഏതു ക്ലാസ്സിലെ കാര്യം ആണ് അറിയേണ്ടത്. നിങ്ങളുടെ കുട്ടി ഏത് ക്ലാസ്സിലാണ് പഠിക്കുന്നത്.
എന്റെ 4th B യിലാണ് പഠിക്കുന്നത്.
ഓഹോ അപ്പോൾ കുരുത്തക്കേട് കാട്ടിയ കുട്ടികളെ എന്തിനാണ് തല്ലിയത് എന്ന് ചോദിയ്ക്കാനുള്ള വിളിയാണല്ലേ.
മറ്റു രക്ഷകർത്താക്കളെ പോലെ സ്വന്തം കുട്ടിയെ തല്ലിയത് എന്തിന് എന്ന് ചോദിയ്ക്കാനല്ല ടീച്ചറേ ഞാൻ വിളിച്ചത്, കുരുത്തക്കേടുകൾ കാണിച്ചാൽ തല്ലുന്നതിന് ഞാനും എതിരല്ല പക്ഷെ എന്തായിരുന്നു കുട്ടികൾ കാണിച്ച കുരുത്തക്കേട് എന്ന് ചോദിയ്ക്കുന്നത് തെറ്റാണോ?
അതോ അതു പറയാം. ഇന്ന് ഉത്തരക്കടലാസ്സുകൾ തിരിച്ചു കൊടുത്തപ്പോഴാണ് ശ്രദ്ധിച്ചത് കൂട്ടികൾ ആരും തന്നെ ചോദ്യമെഴുതിയിട്ടല്ല ഉത്തരമെഴുതിയിരിക്കുന്നത്. അതു പോലെ മിക്ക കുട്ടികളും ഉത്തരമെഴുതിയിരിക്കുന്നതും ഓർഡറിലല്ല . അവർക്ക് അറിയാവുന്ന ഉത്തരങ്ങൾ ചോദ്യങ്ങളുടെ മുൻഗണന നോക്കാതെ ആദ്യമേ എഴുതി വയ്ക്കുക ഒരുത്തരം കഴിഞ്ഞ് ഒരു വരി പോലും വിടാതെ അടുത്ത ഉത്തരം എഴുതുക അങ്ങിനെയെല്ലാം ചെയ്താൽ പിന്നെ എങ്ങിനെ അടി കൊടുക്കാതിരിക്കും.
ടീച്ചറേ ഒരു സംശയം ചോദിച്ചോട്ടെ, ഇതിന് മുമ്പ് ഇതെല്ലാം ഇങ്ങിനെ ചെയ്യരുത് എന്ന് ക്ലാസ്സിൽ പറഞ്ഞു കൊടുത്തിട്ടുണ്ടോ? പിന്നെ എങ്ങിനെയാണ് അവർ ചെയ്തത് തെറ്റായിരുന്നു എന്ന് അവർക്ക് ബോദ്ധ്യമാവുന്നത്.
എത്ര നാളായി അവർ പരീക്ഷ എഴുതുന്നു എന്നിട്ട് അവർക്കിതൊന്നും അറിയില്ലേ?
ഇത് ടീച്ചർ എന്നോടല്ല ചോദിക്കേണ്ടത് ഞാൻ ടീച്ചറോടാണ് ചോദിക്കേണ്ടത്. ക്ലാസ്സിലെ എല്ലാ കുട്ടികളും ഇങ്ങിനെ തെറ്റിച്ചാണ് ചെയ്തതെങ്കിൽ അതെങ്ങിനെ കുട്ടികളുടെ തെറ്റാവും , അവർക്ക് ഇതിന് മുമ്പ് ആരും ശരിയായ രീതി പറഞ്ഞു കൊടുക്കാഞ്ഞിട്ട് അല്ലേ അവർ അങ്ങിനെ തന്നെ ചെയ്തു കൊണ്ടിരിക്കുന്നത്.
ഒരു കാര്യം കൂടി ചോദിച്ചോട്ടെ ടീച്ചറേ, കുട്ടികൾ സംശയം ചോദിച്ചാൽ ടീച്ചർ അവരെ പ്രോത്സാഹിപ്പിക്കുന്നില്ല എന്നു മാത്രമല്ല അവരെ നിർദ്ദയം നിരുത്സാഹപ്പെടുത്തുന്നു എന്നും പറയുന്നല്ലോ.
അത് അനാവശ്യ സംശയങ്ങൾ ചോദിച്ച് ഒരു വിധത്തിലും ക്ലാസ്സ് മുന്നോട്ട് കൊണ്ടുപോകാൻ സമ്മതിക്കാത്ത കുറെ വിരുതന്മാരുണ്ട് അപ്പോൾ പിന്നെ പോർഷൻ സമയത്ത് തീർക്കാനാവില്ല. അതു കൊണ്ട് ആണ് ക്ലാസ്സിൽ സംശയം ചോദിയ്ക്കണ്ട എന്നു പറഞ്ഞത്.
ക്ലാസ്സിൽ സംശയം ചോദിയ്ക്കണ്ട എന്നു പറഞ്ഞെങ്കിൽ പാഠഭാഗങ്ങളിൽ എന്തെങ്കിലും സംശയമുള്ള കൂട്ടികൾ ടീച്ചേഴ്സ് റൂമിൽ വന്ന് ചോദിച്ചാൽ സംശയനിവാരണം നടത്തി കൊടുക്കാം എന്നു കൂടെ പറയാമായിരുന്നു. ടീച്ചറേ നമ്മൾ കൊയ്ത്തിന് ട്രില്ലിംഗ് യന്ത്രം ഉപയോഗിക്കുന്നു എന്നു കരുതി കള പറിക്കുന്നതിനും അതേ യന്ത്രം ഉപയോഗിച്ചാൽ പിന്നെ വിളവ് എടുക്കാൻ നേരത്ത് പാടം തരിശായിരിക്കില്ലേ. തെറ്റു ചെയ്യുന്ന കുട്ടികളെ ശിക്ഷിയ്ക്കുന്നതിന് ഞങ്ങൾ രക്ഷകർത്താക്കൾ എതിരല്ല, പക്ഷെ അനാവശ്യമായ ശിക്ഷ കൊണ്ട് ദോഷങ്ങൾ മാത്രമേ ഉണ്ടാകൂ, നമ്മളെല്ലാം പഠിച്ചിരുന്നപ്പോൾ ഉള്ള കാലമല്ല ടീച്ചറേ ഇപ്പോൾ ക്ലാസ്സ് റൂമിൽ വടി ഉപയോഗിക്കുന്നതും , കുട്ടികളെ മാനസ്സികമായി പീഡിപ്പിക്കുന്നത് ശിക്ഷാർഹം ആണെന്ന് ഞാൻ പറയാതെ തന്നെ ടീച്ചർക്ക് അറിയാമല്ലോ. എന്നാൽ വയ്ക്കട്ടെ ടീച്ചറേ, ടീച്ചറിന്റെ പണികൾ നടക്കട്ടെ .
ശരി, വിളിച്ചതിന് നന്ദി, ഇനി ശ്രദ്ധിയ്ക്കാം, ശുഭരാത്രി.
ശുഭരാത്രി ടീച്ചറേ

By PS ANilkumar

ചുവന്ന ഹെൽമറ്റ്


മിനിചേച്ചീ ഇത്ര പെട്ടെന്ന് പോയിട്ട് തിരിച്ചു വന്നോ ?
അനിതേ അതിനു ഞാൻ ഇന്ന് എങ്ങും പോയില്ലല്ലോ.
അപ്പോൾ ഇന്നു രാവിലെ നമ്മൾ തമ്മിൽ കണ്ടപ്പോൾ ചേച്ചി ഈ റോസ് ചൂരിദാർ തന്നെയായിരുന്നല്ലോ ഇട്ടിരുന്നത്.
അതിനു നമ്മൾ തമ്മിൽ ഇന്ന് കണ്ടേ ഇല്ലല്ലോ, ഇന്നത്തെ ദിവസം നേരം വെളുത്തിട്ട് ഞാൻ നിന്നെ ഇപ്പോൾ ആണ് ആദ്യമായി കാണുന്നത്.
അതാ ഇപ്പോ നന്നായത് നമ്മൾ ഇന്നു രാവിലെ വൈറ്റിലയിൽ വച്ച് കണ്ടില്ലേ, ചേട്ടൻ ഇന്ന് നീല ചെക്ക് ഷർട്ടും കറുത്ത പാന്റും അല്ലേ ധരിച്ചിരുന്നത്. എന്നാൽ ചേച്ചി എന്നെ കാണാഞ്ഞിട്ടായിരിക്കും ചേട്ടൻ കൈയ്യെല്ലാം കാണിച്ചിരുന്നു. ചേച്ചി പുറകിൽ ചുവന്ന ഹെൽമറ്റ് എല്ലാം വച്ചോണ്ടിരിക്കുന്നത് ഞാൻ കണ്ടിരുന്നു.
സോറി അനിതേ ഞാൻ കണ്ടില്ലായിരുന്നു. ഇപ്പോൾ അനിത വല്ല അത്യാവശ്യത്തിന് വന്നതാണോ ?
അല്ല ചേച്ചി,വെറുതെ ഇതിലെ പോയപ്പോൾ കേറിയതാണ്, കുട്ടികൾ വരാൻ നേരമായി ഞാൻ പോകട്ടെ ചേച്ചി.
അനിത യാത്ര പറഞ്ഞു പോയപ്പോൾ മുതൽ ആകെ ആധിയായി , ആരായിരിക്കും ചേട്ടന്റെ ബൈക്കിന്റെ പുറകിൽ ഉണ്ടായിരുന്ന പെൺകുട്ടി. ഓഫീസിൽ അങ്ങിനെ ഒരു ചുറ്റിക്കളി ഉള്ളതായിട്ട് കേട്ടറിവ് ഒന്നുമില്ല. ഇനി ഫോണിലൂടെ ചാറ്റിംഗിലൂടെ വല്ല കേസ്സു കെട്ടും ആണോ ? ആലോചിച്ചിട്ട് തല പുണ്ണാകുന്നു. ഫോൺ വിളിച്ച് ചോദിക്കാൻ രണ്ടു വട്ടം ഫോൺ എടുത്തതാണ്. ചേട്ടൻ വീട്ടിലേയ്ക്ക് വരുന്ന വഴിയിൽ ആയിരിക്കും. ടൂവീലറിൽ വരുന്ന സമയം മൊബൈലിൽ വിളിക്കാറില്ലല്ലോ. ഏതായാലും എന്നും എത്തുന്ന നേരം ആയി. വരട്ടെ നേരിൽ ചോദിയ്ക്കാം.
അല്പസമയത്തിനു ശേഷം പതിവു പോലെ ചേട്ടനെത്തി.
സ്വന്തം ഹെൽമറ്റ് ഊരി ബൈക്കിന്റെ ഹാന്റിലിൽ തൂക്കി, സൈഡിൽ കൊളുത്തിയിട്ടിരുന്ന ചുവന്ന ഹെൽമറ്റും ആയി വീട്ടിലേക്ക് കടന്നുവന്നു.
മുഖം വീർപ്പിച്ചിരിക്കുന്ന തന്നോടായിട്ട് പറഞ്ഞു.
പ്രിയേ ഇതാ നീ പറഞ്ഞ പോലെ ഐഎസ്ഐ മാർക്കുളള ചുവന്ന നിറത്തിലുള്ള നല്ല വില കൂടിയ ഹെൽമറ്റ്.
എനിക്കൊരു ഹെൽമറ്റും വേണ്ട, ഗില്ലറ്റും വേണ്ട,
ഇന്നാകെ കോപത്തിലാണല്ലോ ഭാവതി, എന്താണ് ഇന്നിപ്പോൾ വഴക്കടിക്കാനുള്ള പുതിയ കാരണം.
കാരണമില്ലാതൊന്നുമില്ല, എന്തേയ് ചുവന്ന ഹെൽമറ്റ് മാത്രമായ് കൊണ്ടുവന്നത്, രാവിലെ തൊട്ട് അതും വച്ച് നിങ്ങടെ കൂടെ കറങ്ങിയ റോസ് ചൂരിദാറുകാരിയെ കൂടെ വീട്ടിലേയ്ക്ക് കൂട്ടി കൊണ്ടു വരാതിരുന്നതെന്തേ? ഇപ്പോൾ പുറകിൽ ഇരിക്കുന്ന ആളും ഹെൽമറ്റ് വച്ചിരിക്കുന്നതു കൊണ്ട് നിങ്ങൾക്കെന്തുമാകാമല്ലോ. നാട്ടുകാരുടെ കണ്ണിൽ പൊടിയിട്ട് കള്ളക്കറക്കം കറങ്ങാമല്ലേ, ഞാൻ ഒന്നും അറിയില്ല എന്നാണല്ലേ കരുതിയിരിക്കുന്നത്.
എന്റെ പൊന്നു മിനീ എന്നെയൊന്ന് പറയാൻ സമ്മതിക്ക് , ഇന്ന് ബൈക്കിന്റെ പുറകിൽ ഒരു സ്ത്രീയെ ഇരുത്തി കൊണ്ടുപോയി എന്നത് സത്യമാണ്. അതു മറ്റാരേയും അല്ല നിനക്കും കൂടെ അറിയാവുന്ന ആളാണ് നമ്മുടെ ഓഫീസിലെ ഗായത്രി ആയിരുന്നു അത്. ഗായത്രിയുടെ മകൻ ക്ലാസ്സിൽ തല കറങ്ങി വീണപ്പോൾ സ്കൂളിൽ നിന്ന് ഹോസ്പിറ്റലിലേക്ക് കൊണ്ടുപോയി. സ്കൂൾ പ്രിൻസിപ്പാൾ വിളിച്ച് പറഞ്ഞതിനാൽ ഞാൻ അവരെ ഒന്ന് ഹോസ്പിറ്റലിൽ കൊണ്ട് ചെന്നാക്കിയതാണ്. പിന്നിലിരിക്കുന്നവർക്ക് ഹെൽമറ്റ് നിർബന്ധമാക്കിയതിനാൽ നിനക്ക് വാങ്ങിയ ഹെൽമറ്റ് അവർക്ക് ഒന്ന് വയ്ക്കാൻ കൊടുത്തു എന്നു മാത്രം. അതിനാണോ മിനി നീയിത്ര ചന്ദ്രഹാസം ഇളക്കുന്നത്.
അതായിരുന്നോ സംഭവം. എന്നാൽ ചേട്ടന് അതൊന്ന് പറഞ്ഞാൽ പോരായിരുന്നോ?
അതിന് നീയൊന്ന് പറയാൻ സമ്മതിക്കണ്ടേ . ദൈവമേ പുറകിലിരിക്കുന്നവർ ഹെൽമറ്റ് വച്ചില്ലെങ്കിൽ പോലീസുകാർ പിടിക്കും, വച്ചാൽ ഭാര്യമാരു പിടിക്കും, ഇതെന്തൊരു നിയമം എന്റെ ദൈവമേ .
ഇത് ചേട്ടനും ചേട്ടനെ പോലുള്ളവർക്കും ഒരു പാഠം ആയിരിക്കട്ടെ. ഞങ്ങൾ പാവം ഭാര്യമാരെ പറ്റിയ്ക്കാം എന്ന ചിന്ത വേണ്ട, എങ്ങിനെയെങ്കിലും ഞങ്ങൾ മണത്തു കണ്ടുപിടിക്കും നിങ്ങളുടെയെല്ലാം കള്ളത്തരങ്ങൾ, ജാഗ്രതൈ.

By PS Anilkumar

ഓം ശാന്തി, ശാന്തി


ചില ചോദ്യങ്ങൾക്ക് ഉത്തരമില്ല എന്നു പറയുന്നത് എത്ര സത്യമാണല്ലേ. ഇന്നത്തെ യുദ്ധം കഴിഞ്ഞു , നേരം പാതിരാവിനോടടുക്കുന്നു. കൗരവപാണ്ഡവയുദ്ധങ്ങൾ എന്നും സൂര്യനസ്തമിക്കുന്നതിന് മുമ്പ് അവസാനിച്ചിരുന്നു പക്ഷെ തന്റെ യുദ്ധങ്ങൾ തീരുന്നില്ലല്ലോ, എന്നു തീരും? സൂര്യനസ്തമിച്ച്, ചന്ദ്രന്റെ ഉദയവും പിന്നീട് പാതിവഴിസഞ്ചാരവും കഴിയുമ്പോൾ അടുത്ത യുദ്ധത്തിന് മുമ്പുള്ള വിശ്രമത്തിനുള്ള ചെറിയ ഇടവേള മാത്രം.
തൊട്ടു മുന്നിലുള്ള കറുത്ത പെരുമ്പാമ്പുപോലെ നീണ്ടുനിവർന്നു കിടക്കുന്ന നാലുവരി പാത സ്ട്രീറ്റ്ലൈറ്റിന്റെ മഞ്ഞവെളിച്ചത്തിൽ ഭ്രാന്തമായ എല്ലാ വേഗങ്ങളേയും ഉള്ളിലേക്ക് ആവാഹിച്ച് തിളങ്ങിക്കിടന്നു. പറന്നു നീങ്ങുന്ന വാഹനങ്ങൾക്കിടയിലൂടെ റോഡ് മുറിച്ചു കടക്കൽ പകൽ പോലുമൊഴിവാക്കിയതിനാൽ ഭൂഗർഭപാതയിലൂടെ മറുവശത്തെത്താനായ് താഴോട്ടുള്ള പടിക്കെട്ടുകൾ ഇറങ്ങാൻ തുടങ്ങിയപ്പോൾ ആണ് അല്പമകലെ ഏതോ അപകടത്തിന്റെ ബാക്കിപത്രം പോലെ അങ്ങിങ്ങായി കാണുന്ന ആൾക്കൂട്ടം. നാലു വരിപ്പാതയുടെ ഇരുവശങ്ങളിലും, നടുഭാഗത്തും കൂടാതെ സർവ്വീസ് റോഡിലും, തൊട്ടു മുന്നിലായ് ചെറിയ ഒരാൾക്കൂട്ടം, ഓടിപ്പിടഞ്ഞെത്തി അപകട സ്ഥലവും, ദൃശ്യങ്ങളും കാണാനും മൊബൈലിൽ പകർത്തലും ഒന്നുമില്ലാത്തതു കൊണ്ട് അങ്ങോട്ടുള്ള യാത്ര ഒഴിവാക്കി. അല്ലെങ്കിൽ തന്നെ ഏത് അപകടങ്ങൾ കാണുമ്പോഴും അവയെല്ലാം താനുമായി സാദൃശ്യപ്പെടുത്തി അതിനോട് ബന്ധപ്പെടുത്തി താരതമ്യം ചെയ്യുമ്പോൾ ഉണ്ടാകുന്ന തളർച്ച, അകാരണമായ ഭയം എല്ലാം തന്നെ അപകട സ്ഥലത്ത് നിന്ന് എന്നും അല്പം അകറ്റി നിർത്തുകയാണല്ലോ.
അടുത്തു കണ്ട ചെറിയ ആൾക്കൂട്ടം എന്താണെന്ന് വെറുതെ ഒന്ന് എത്തി നോക്കി. ആൾക്കൂട്ടത്തിനു നടുവിൽ ഇരുന്ന് പൊട്ടിക്കരയുന്ന ഒരു ചെറുപ്പക്കാരൻ, അവന്റെ മുന്നിൽ വച്ചിരിക്കുന്ന ക്രച്ചസ്സ് കണ്ടാലറിയാം, ക്രച്ചസ്സിന്റെ സഹായം ഇല്ലാതെ അവന് ഒരടി മുന്നോട്ട് നടക്കാനാവില്ല എന്ന്, എല്ലാവരും അവനെ ആശ്വസിപ്പിക്കുന്നുണ്ട്. പക്ഷെ അതു കൊണ്ടെന്തു കാര്യം. അവൻ കരച്ചിൽ തുടരുകയാണ്. കൂടെ നിൽക്കുന്നവരിൽ നിന്നാണ് അവന്റെ വിവരങ്ങൾ അറിഞ്ഞത്. രണ്ടാഴ്ച മുൻപുണ്ടായ ഏതോ അപകടത്തിൽ ആണ് അവന്റെ രണ്ടു കാലുകൾക്കും ഒടിവ് സംഭവിച്ചത്. അവന്റെ സ്പോൺസറെ കണ്ട് സംസാരിച്ച് വിദഗ്ദചികിത്സയ്ക്ക് നാട്ടിൽ കയറ്റി വിടുന്നതിനെ പറ്റി സംസാരിക്കാനാണ് അവന്റെ സഹോദരൻ അങ്ങു ദൂരെ നിന്ന് അല്പം മുമ്പ് അവനെ കാണാനായി വന്നത്. സഹോദരൻ റോഡിന്റെ അപ്പുറത്തെ സൈഡിൽ വന്നിറങ്ങി അവന്റെ അടുത്തേക്ക് വരാനായി റോഡു മുറിച്ചു കടന്നതും ചീറി പാഞ്ഞു വന്ന ഏതോ ഒരു വാഹനം ഇടിച്ചു തെറിപ്പിച്ചതും നിമിഷങ്ങൾ കൊണ്ടാണ്. അവസാനമായി ഒരൊറ്റ പിടച്ചിൽ എല്ലാം ഒരു നിമിഷം കൊണ്ടവസാനിച്ചു. ഒന്ന് ഓടി ചെല്ലാൻ പോലുമാകാതെ നിന്നിടത്ത് കുത്തിയിരുന്നു കരയുന്ന സഹോദരനെ എന്തു പറഞ്ഞ് ആശ്വസിപ്പിക്കാനാണ്. അന്തിമവിധി നടപ്പാക്കുന്ന ദൈവങ്ങളോട് ഒരേ ഒരു ചോദ്യം, എന്തിനീ ക്രൂരത?. വിധിയുടെ വിളയാട്ടങ്ങൾ, ഉത്തരമില്ലാത്ത ഒത്തിരി ചോദ്യങ്ങളിൽ ഒന്ന് മാത്രം. പ്രവാസദുഃഖങ്ങളിലേക്ക് എഴുതി ചേർക്കാൻ നോവിന്റെ ഒരേടുകൂടി നല്കുന്ന വിധിയുടെ വിളയാട്ടങ്ങളിൽ മനസ്സു തകരുന്നു.

By PS Anilkumar DeviDiya

വൺഡേ ടൂർ


മോളെ, സ്കൂളിൽ ചെല്ലുമ്പോൾ ഉടനെ തന്നെ ടീച്ചറുടെ കൈയ്യിൽ നാളത്തെ ടൂറിനുള്ള ഈ ആയിരം രൂപ കൊടുക്കണേ, ബാഗിൽ സൂക്ഷിച്ച് വയ്ക്കണേ, ബസ്സിൽ വച്ച് ഇടയ്ക്ക് തുറന്നു നോക്കി നോക്കി അവിടെ ചെല്ലുമ്പോൾ പിന്നെ പൈസ ഇല്ലാതെ വരരുത്. ഇപ്പോൾ പൈസയ്ക്ക് എല്ലാം ഇത്തിരി ബുദ്ധിമുട്ടുള്ള സമയം ആണ്. പിന്നെ ക്ലാസ്സിലെ എല്ലാവരേയും വൺഡേ ടൂറിന് കൊണ്ടു പോകുന്നു എന്ന് പറഞ്ഞതു കൊണ്ടാണ്.
എനിക്കീ പൈസ വേണ്ടമ്മേ.
അതെന്താ മോൾ ടൂറിന് പോകുന്നില്ലേ. മോൾ തന്നെയല്ലേ ടൂറിന് പോണം, പൈസ വേണം എന്നെല്ലാം പറഞ്ഞത് എന്നിട്ട് ഇപ്പോൾ പൈസ വേണെന്ന് പറയുന്നത്.
ടൂറിനും പോകണം , പൈസയും വേണം പക്ഷെ ഈ പൈസ വേണ്ട എന്നാണ് പറഞ്ഞതമ്മേ.
മനസ്സിലാകുന്ന രീതിയിൽ പറ മോളെ , എന്താണ് മോൾ ഉദ്ദേശിക്കുന്നത് അമ്മയ്ക്ക് മനസ്സിലാകുന്നില്ല. സമയം വൈകുന്നു , എനിക്ക് ഇത്തിരി ദേഷ്യവും വന്നു തുടങ്ങുന്നുണ്ട്.
അതേ അമ്മേ എനിക്ക് പോകുന്ന വഴിക്ക് ATMൽ നിന്ന് ടൂറിനുള്ള പൈസ എടുത്ത് തന്നാൽ മതി.
ഇന്നലെ അച്ഛൻ രാത്രി വിളിച്ചപ്പോൾ പറഞ്ഞില്ലേ മോൾക്ക് ടൂറിനുള്ള പൈസ അയച്ചിട്ടുണ്ട് രാവിലെ അമ്മ എടുത്തു തരും എന്ന്.
പൈസ എല്ലാം ഒന്നു തന്നെയല്ലേ മോളെ , ചിട്ടിക്ക് അയയ്ക്കാൻ വച്ചിരിക്കുന്ന പൈസ എടുത്ത് ടൂറിന് തരുന്നതും , പിന്നെ ATM ൽ നിന്ന് പൈസ എടുത്ത് ചിട്ടിക്ക് അടയ്ക്കുന്നതും തമ്മിൽ പൈസയ്ക്ക് വല്ല വ്യത്യാസമുണ്ടോ ? വെറുതെ രാവിലെ വാശി പിടിക്കരുത്.
രണ്ടു പൈസയും തമ്മിൽ വ്യത്യാസം ഉണ്ടമ്മേ. അച്ഛൻ ടൂറിന് പോകാൻ ബുദ്ധിമുട്ടി അയച്ചു തന്ന പൈസയിൽ സ്നേഹം അടങ്ങിയിട്ടുണ്ട് , അതും കൊണ്ട് ടൂറിന് പോകുന്ന സന്തോഷം അമ്മ ആദ്യം തന്ന പൈസയിൽ നിന്ന് കിട്ടുന്നില്ല അതു കൊണ്ടല്ലേ അമ്മേ പോകുന്ന വഴിയിൽ ഏറ്റിഎമ്മിൽ നിന്ന് എടുത്തു തന്നാൽ മതി എന്നു പറഞ്ഞത്. അമ്മ അധികം വാശി എടുക്കാതെ അതിൽ നിന്ന് എടുത്തു തന്നാൽ മതി.
അതെല്ലാം എടുത്ത് തരാം ദൈവമേ ഇന്നീ കാണിക്കുന്ന സ്നേഹമെല്ലാം ഞങ്ങളുടെ അവസാന കാലത്തും തിരിച്ചു തന്നാൽ മതി. അന്നിതെല്ലാം മറക്കുമോ?
അക്കാര്യത്തിലൊന്നും അമ്മ ഒരിക്കലും പേടിക്കേണ്ട . ഇതെന്നും ഉണ്ടാകും അമ്മേ. മോൾക്ക് ഒരു വാക്കേ ഉള്ളൂ, എന്നും എപ്പോഴും.
എന്തോ അതു കേൾക്കേ അമ്മയുടെ കണ്ണു നിറഞ്ഞു.

BY PS Anilkumar Devidiya

സുന്ദരസുരഭിലം


ഒറ്റ റിംഗിന് തന്നെ ഫോൺ എടുത്തല്ലോ, മുത്തെന്താ ഫോണിൽ ചുരണ്ടിക്കൊണ്ടിരിക്കുകയായിരുന്നോ?
അച്ഛനെന്താ അമ്മയുടെ വാചകം കടമെടുത്തതാണോ ഈ ചുരണ്ടൽ പ്രയോഗം, അമ്മ അങ്ങോട്ട് മാറിയപ്പോൾ അമ്മയുടെ ഫോൺ പെട്ടെന്നെടുത്ത് കൂട്ടുകാരുടെ വാട്ട്സ്അപ്പ് സ്റ്റാറ്റസ് നോക്കിയതാണേ, ഇപ്പോൾ തന്നെ അമ്മ ഫോൺ തിരിച്ചു വാങ്ങാൻ വരും.
മുത്തിന് സ്വന്തമായി ഫോൺ വാങ്ങുന്ന കാര്യം പറഞ്ഞപ്പോൾ വേണ്ടെന്ന് പറഞ്ഞിട്ടല്ലേ . മോളു തന്നെയല്ലേ പറഞ്ഞത് മോളെത്ര നിർബ്ബന്ധിച്ച് പറഞ്ഞാലും ഞങ്ങൾ വാങ്ങിത്തരണ്ട എന്ന്. അല്ലെങ്കിൽ തന്നെ ഫോൺ ക്രേസ് ആണ് അപ്പോൾ പിന്നെ സ്വന്തമായി ഫോൺ കിട്ടിയാൽ പിന്നെ പറയണ്ട, ഇതിപ്പോൾ അമ്മയുടെ ഫോൺ കുറെ നേരം ഉപയോഗിച്ച് കഴിയുമ്പോൾ അമ്മ തിരിച്ചു വാങ്ങിച്ചോളും അതാണ് നല്ലത് എന്നെല്ലാം പറഞ്ഞത് കൊണ്ടല്ലേ വാങ്ങാതിരുന്നത്.
അന്ന് അതെല്ലാം പറഞ്ഞത് ശരിയാണ്, എന്നാലും ഇപ്പോൾ തോന്നുന്നു ഒരെണ്ണം കിട്ടിയാൽ കൊള്ളാമെന്ന്.
എന്നാൽ ആമസോണിൽ നോക്കിക്കോ, ദീപാവലി ഓഫർ ഉണ്ടാകും ഒരു പത്തു വരേയുള്ളത് ഒരെണ്ണം നോക്കിക്കോ.
പത്തിന്റെ മുകളിലേയ്ക്ക് പോകണമെങ്കിൽ പോകാം
അങ്ങിനെ ഇപ്പോൾ പത്തിനു മുകളിൽ പോകണ്ട, പത്തിനു താഴെയാണെങ്കിൽ അതാണ് ഏറ്റവും നല്ലത്.
അയ്യടാ അച്ഛപ്പാ, എങ്കിൽ പത്ത് ഫിക്സ്.
സ്വന്തമായി ഫോൺ കിട്ടിയാലും അമ്മയുടെ ഫോൺ ആണന്ന് ഓർത്ത് ഉപയോഗിച്ചാൽ മതി, അല്പം സ്വയം നിയന്ത്രണം എല്ലാം എല്ലാത്തിനും വേണം. വൈകിട്ട് ആറു മുതൽ ഒമ്പത് വരെ പഠിക്കുന്ന സമയമാണ് അപ്പോൾ ഫോൺ മാറ്റിവയ്ക്കണം, കൂട്ടുകാരോടും പറയണം സ്റ്റഡിടൈമിൽ വിളിയ്ക്കരുത് എന്ന്.
മതി അച്ചാ, ഞാൻ നാളെത്തൊട്ട് നന്നായേക്കാമേ അച്ഛനോട് പയ്യെ ഒന്ന് ഉപദേശിയ്ക്കാൻ പറഞ്ഞപ്പോൾ അച്ചൻ സൂപ്പർ ഫാസ്റ്റ് പോലെ ഇതെങ്ങോട്ട് പോണന്റച്ഛോ. സമ്മതിക്കണം.
എന്നാൽ ബാക്കിയിനി നാളെയാകട്ടെ. അനിയത്തിക്കുട്ടി എന്തു ചെയ്യുകയാണ്. പഠിക്കുകയാണോ, ഒച്ച കേൾക്കുന്നുണ്ടല്ലോ.
പുള്ളി പഠിക്കുകയൊന്നുമല്ല, സന്ധ്യാനാമം ചൊല്ലുകയാണ്.
അതിന് അവിടെ സന്ധ്യ ആയില്ലല്ലോ പിന്നെന്താ നേരത്തെ ഭയങ്കര കീർത്തനാലാപനം.
അതറിയില്ല, പക്ഷെ അമ്മ ഫോൺ വാങ്ങാൻ വരുന്നുണ്ട്.
സ്റ്റാറ്റസ് നോക്കുന്നതിന്റെ കാര്യത്തിന് ഒരു തീരുമാനം ആയി.
പ്രിയതമയുടെ വീഡിയോകാൾ ആണ് അടുത്തതായി വന്നത്.
നിങ്ങളുടെ ഇളയമോൾ സന്ധ്യാനാമം ചൊല്ലി തകർക്കുന്നത് കാണുന്നില്ലേ.
കൊള്ളാമല്ലോ നന്നായി ചൊല്ലുന്നുണ്ടല്ലോ.
അതല്ല ആ കള്ളച്ചിരി കണ്ടോ, ഇത്തിരിമുമ്പ് കിച്ചണിൽ വന്ന് രണ്ട് മുട്ടയും തട്ടിപ്പൊട്ടിച്ചിട്ട് അടി കിട്ടാതിരിയ്ക്കാൻ ഓടി വന്നിരുന്ന് കീർത്തനം ചൊല്ലുന്നതാണ്, അല്ലാതെ ഭക്തികൊണ്ടൊന്നുമല്ല. അത് തീർന്നിട്ടു വേണം രണ്ടെണ്ണം കൊടുക്കാൻ. അതിനാണ് ഞാൻ നോക്കി നിൽക്കുന്നത്. കള്ളിപ്പെണ്ണ് അതിനാൽ നിർത്തുന്ന ലക്ഷണമില്ല.
അതേതായാലും നന്നായി, നോക്കി നിന്നോ, ഇന്നിനി കീർത്തനം ചൊല്ലൽ നിർത്തുന്ന മട്ടു കാണുന്നില്ല.
ഒരിറ്റു നേരം കൊണ്ട് ഓർമ്മകൾ തന്റെ കുട്ടിക്കാലത്തേയ്ക്ക് പറന്നു പോയി. അമ്മവീട്ടിൽ വളർന്ന ബാല്യകാലം. സ്ക്കൂൾ വിട്ടു വന്നാൽ പുസ്തകസഞ്ചിയും വലിച്ചെറിഞ്ഞ് നിന്ന നിൽപ്പിൽ ചായകുടിയും കഴിഞ്ഞ് വടക്കേ പറമ്പിലേയ്ക്ക് കൂട്ടുകാരുടെ കൂടെ കളിയ്ക്കാനുള്ള ഓട്ടം. സന്ധ്യ ആയാലും തിരിച്ചു വരാതാവുമ്പോൾ മുത്തച്ചന്റെ ആവർത്തിച്ചുള്ള വിളികൾക്ക് ചെവി കൊടുക്കാതാകുമ്പോൾ കപടദേഷ്യത്തോടെ തന്നെ അടിയ്ക്കാൻ ഓലമടലിന്റെ മാന്താം പൊളിയോ, ഓലക്കണയോ ആയി തല്ലാൻ കാത്തു നിൽക്കുന്ന മുത്തച്ചൻ. മുത്തച്ചന്റെ കണ്ണുവെട്ടിച്ച് കിഴക്കേ കുളത്തിൽ ചെന്ന് കൈയ്യും കാലും മുഖവും കഴുകി, അമ്മുമ്മ കത്തിച്ചു വച്ചിരിക്കുന്ന നിലവിളക്കിലെ നിറദീപത്തിന്റെ മുന്നിൽ ഇരുന്ന് രാമനാമം ജപിച്ചിരുന്ന് ഓട്ടകണ്ണിട്ട് മുത്തച്ഛനെ നോക്കിയിരുന്ന ബാല്യകാല സുന്ദരസുരഭില കുസൃതികളിലേയ്ക്ക് അറിയാതെ മനസ്സ് ഇറങ്ങിപ്പോയി. പിന്നീട് ഭക്ഷണത്തിനു മുമ്പുള്ള ഇടവേളകളിൽ മുത്തച്ഛൻ പറഞ്ഞു തരാറുള്ള കഥകൾ ചെവിയിൽ മധുവൂറുന്ന മധുരമൊഴികളായ് ഇപ്പോഴും പെയ്തിറങ്ങുന്നു..
By PS Anilkumar

ഒരു സ്നേഹത്തിന്റെ ഓർമ്മയ്ക്ക്


കടുകോളം സ്നേഹവും കരുതലും കൊടുത്തതിനു കടലോളം സ്നേഹവും കരുതലും തന്ന ക്രീമി.
തൂമഞ്ഞിന്റെ പതുപതുത്ത രോമങ്ങൾ ഉള്ള പൈമ്പാൽ നിറമാർന്ന വെളുവെളുത്ത പൊമേറേനിയൻ നായകുട്ടിക്കു അടുത്ത വീട്ടുകാർ മിൽക്കീ എന്ന് പേരിട്ടു വിളിച്ചപ്പോൾ ക്രീം കളർ ഉള്ള എന്റെ നായ്കുട്ടിക്കു ഞാൻ ക്രീമി എന്ന് പേരിട്ടു വിളിച്ചത് തെറ്റാണോ?. എന്താല്ലേ,
കഥയില്ലായ്മ ആണെന്റെ കഥ എന്ന് കരുതി നടന്ന കാലം. പാട്ടുകുളങ്ങര അമ്പലവും പടർന്നു പന്തലിച്ച ആൽമരത്തണലും പഞ്ചാര നിറമാർന്ന പാട്ടുകുളങ്ങര വെളിയും, ആ വെളിയിൽ നീലാകാശത്തിലെ നക്ഷത്രങ്ങളെ നോക്കി കിടക്കുമ്പോൾ കിട്ടുന്ന സുഖം. എത്ര സുഖ സുന്ദരമായിരുന്നു.
പാലോളിച്ചന്ദ്രികയുടെ നിലാവ് പൊഴിഞ്ഞു വീണ വെളിയിൽ പാതിരാവരെ നീളുന്ന സൗഹൃദ കൂട്ടായ്മകൾ. മതം രാഷ്ട്രീയം സിനിമ എന്ന് വേണ്ട സൂര്യന് താഴെയുള്ള എല്ലാ വിഷയങ്ങളും ചർച്ച ചെയ്തും തർക്കിച്ചും അങ്ങിനെ എത്രനേരം വരെ ഇരിക്കുമായിരുന്നു. പിന്നീട് മനസ്സില്ലാ മനസ്സോടെ എല്ലാരും അവരവരുടെ വീട്ടിലേക്ക്.
കൂട്ടുകാരോട് പിരിഞ്ഞു വീട്ടിലേക്ക് പോകുന്ന എന്നെ ഭയപ്പെടുത്താൻ വീരൻ എന്നൊരു നായ് ആ ഇടവഴിയിൽ എവിടെയോ ഒളിച്ചിരിക്കാറുണ്ടായിരുന്നു. ഒരു നിമിഷാർദ്ധത്തിന്റെ ഇടവേളയിൽ ഇരുട്ടിൽ നിന്ന് പെട്ടെന്ന് പ്രത്യക്ഷപ്പെട്ട് ഒരൊറ്റ കുരയിൽ എന്റെ മേലാസകലം പൂക്കുല പോലെ തുള്ളിക്കുന്നതിൽ വീരൻ വിരുതൻ ആയിരുന്നു. അവനിൽ നിന്ന് രക്ഷ നേടാൻ കല്ലും കത്തിയും വടിയും എല്ലാം കൊണ്ടാണ് അന്നെല്ലാമെന്റെ രാത്രി സഞ്ചാരം. എങ്കിലും അവന്റെ പേടിപ്പിക്കലും അതിനെ തുടർന്നുള്ള എന്റെ പേടിയും തുടർന്ന് കൊണ്ടേയിരുന്നു. എവിടെയോ പോയി തിരിച്ചു വരുന്ന
ദിവസം ഒരുച്ചനേരത്ത് കാക്കകളുടെ കൂട്ടമായ ആക്രമണത്തിൽ ദീനമായ്‌ ചെറുത്തു നിൽക്കുന്ന ഒരു നായക്കുട്ടിയെ ഞാൻ വഴിയരുകിൽ കണ്ടു. കാക്കകളെ ഓടിച്ച് വിട്ടിട്ട് ആ നായകുട്ടിയുടെ അടുത്തു ചെന്നു നോക്കി. കാക്കകൾ കൊത്തി മുറിവേൽപ്പിച്ചതിനാൽ ഒന്നുറക്കെ കരയാൻ പോലുമുള്ള ഒച്ചയില്ലാത്ത പാവം നായക്കുട്ടിയെ ഞാൻ മൃഗാശുപത്രിയിൽ കൊണ്ടുപ്പോയി മരുന്നു വാങ്ങുകയും, മുറിവുകൾ നന്നായി വൃത്തിയാക്കി മരുന്ന് പുരട്ടി കൊടുത്തു. അതിനുശേഷം ആ നായക്കുട്ടിയെ ക്രീമി എന്ന് പേരിട്ടു വീട്ടിൽ കൊണ്ടുവന്നു വളർത്തി. അവൻ വളരുംതോറും അവന്റെ സ്നേഹവും വളർന്നു കൊണ്ടിരുന്നു. നിത്യജീവിതത്തിൽ
ജീവിക്കാൻ വേണ്ടിയുള്ള തൊഴിൽതേടിയുള്ള യാത്രകൾ ആയിരുന്നു അന്നെല്ലാം. ഒരു സ്വകാര്യ സ്ഥാപനത്തിൽ ജോലി കിട്ടി. ആഴ്ചയിൽ ആറുദിവസം ജോലി . എല്ലാ ശനിയാഴ്ചയും പാതിരാത്രിയിൽ ഏതെങ്കിലും പാണ്ടിലോറിയിൽ കയറി പാട്ടുകുളങ്ങരയിൽ വന്നിറങ്ങി വീട്ടിലേക്കു പോകും. അങ്ങിനെ ജോലികിട്ടിയതിനു ശേഷമുള്ള ആദ്യത്തെ ശനിയാഴ്ച രാത്രി പാട്ടുകുളങ്ങരയിൽ വന്നിറങ്ങി. തട്ടുകട നടത്തുന്ന ഇക്കയുടെ കടയിൽ നിന്നും ഒരു ചായയും കുടിച്ച്, രണ്ടു ഓംലറ്റും വാങ്ങി വീട്ടിലേയ്ക്ക് നടന്നു. അമ്പലത്തിനു പടിഞ്ഞാറു ഭാഗത്ത് നിന്നും താഴോട്ടുള്ള പടികൾ ഇറങ്ങിയ നേരം അത്ഭുതപ്പെട്ടുപോയി. പടിക്കെട്ടിനു താഴെയായി അവിടെ പാതിരാത്രിയിൽ എന്നെ കാത്തിരിക്കുന്ന ക്രീമി. എന്നെ കണ്ടപ്പോൾ അവൻ കാട്ടിയ സ്നേഹപ്രകടനങ്ങൾ അവന്റെ സന്തോഷം. കാലുകളിൽ തലയുരുമിയുള്ള അവന്റെ കുറുകൽ എന്തൊക്കെയോ പറയുന്ന പോലെ തോന്നി. അങ്ങിനെ ഞങ്ങൾ ഒന്നിച്ചു വീട്ടിലേക്കു പോയി. വഴിയിൽ വീരൻ പ്രത്യക്ഷപ്പെടും എന്നും എന്നെ ഒരു കുര കൊണ്ട് ഭയപ്പെടുത്തും എന്നെല്ലാം ചിന്തിച്ചെങ്കിലും വീരൻ പിന്നീടൊരിക്കലും ഞങ്ങളുടെ യാത്രകളുടെ ഇടയിലേക്ക് വന്നില്ല.
എന്നാലും എനിക്ക് മനസ്സിലാകാതെ ഇരുന്നത് ഞാൻ വരുന്ന ശനിയാഴ്ചകൾ അവൻ എങ്ങിനെ അറിയുന്നു എങ്ങിനെ എനിക്കായ് കാത്തുനിൽക്കുന്നു എന്നതെല്ലാമായിരുന്നു. ഹൃദ്യമായ സ്നേഹത്തിന് മനുഷ്യനും മൃഗങ്ങളും തമ്മിൽ പോലും അതിർവരമ്പുകളില്ല എന്ന തിരിച്ചറിവ്, ചിലപ്പോൾ അവൻ എന്നും രാത്രി സമയത്ത് കാത്തു നിൽക്കാറുണ്ടായിരുന്നിരിയ്ക്കാം. ആരോട് ചോദിച്ചാൽ അതിന് ഉത്തരം കിട്ടും. അല്ലെങ്കിൽ തന്നെ ചില ചോദ്യങ്ങൾക്ക് ഉത്തരമില്ലല്ലോ. ചില ഉത്തരങ്ങൾക്ക് ചോദ്യത്തിന്റെ പ്രസക്തിയും ഇല്ലല്ലോ.
അങ്ങിനെയങ്ങിനെ കുറെ നാളുകൾ കഴിഞ്ഞുപോയി. പതിവുപോലെ ഒരു ശനിയാഴ്ച രാത്രി ഞാൻ അമ്പലത്തിന്റെ പടികൾ ഇറങ്ങി നോക്കിയപ്പോൾ അന്നെന്നെ കാത്തു നില്ക്കാൻ ക്രീമി എത്തിയിട്ടില്ല. അതെന്തായിരിക്കും, എന്തോ ഒരു വല്ലായ്മ, പ്രതീക്ഷീച്ചിരുന്ന ചില സ്നേഹ സാമീപ്യങ്ങൾ കാണാതാകുമ്പോൾ ഉള്ളിലെ ഒരു നീറ്റലുണ്ടാകുന്നല്ലോ
എന്നോർത്ത് ഞാൻ വീട്ടിലേക്കു നടന്നെത്തി. വീട്ടിലെത്തിയപ്പോൾ വാതിൽ തുറന്നു തന്ന അനിയത്തിയോട് ചോദിച്ചു.
ഇന്ന് നമ്മുടെ ക്രീമിയെ സ്ഥിരം കാത്തു നിൽക്കുന്നിടത്തും കണ്ടില്ല, വീട്ടിലെത്തിയിട്ടും ഇവിടെയും കണ്ടില്ല. എവിടെ പോയി കക്ഷി.
അനല്പമായ വിഷമത്തോടെ അനിയത്തി മറുപടി പറഞ്ഞു.
ഇനി അവനെ കാണാനാവില്ല, നമ്മുടെ ക്രീമി രണ്ടു ദിവസത്തിന് മുമ്പ് മരിച്ചു പോയി.
എനിക്ക് വിശ്വസിക്കാൻ സാധിച്ചില്ല. പാവം ക്രീമി.
അവനെന്താണ് സംഭവിച്ചത്.
അറിയില്ല കഴിഞ്ഞ ദിവസം രാവിലെ മരിച്ചു കിടക്കുന്നതാണ് കണ്ടത്.
പാവം നമ്മുടെ ക്രീമി.
പിന്നീടാണ് അറിഞ്ഞത് ഇരുട്ടിന്റെ ഇടവഴിയിലൂടെ ഇനിയും നടന്നു തീർന്നിട്ടില്ലാത്ത ചില ഇരുണ്ട മനസ്സിന്നുടമകൾ അവരുടെ യാത്രക്ക് തടസം ആകാതിരിക്കാൻ ക്രീമിയെ എന്നത്തേക്കും ആയി ഉറക്കിയതാണ്.
എങ്കിലും എന്നും മനസ്സിൽ സ്നേഹിച്ചു തീരാത്ത ഒരോർമയായി അവനെന്നും ഉണ്ടാകും.

By: PS Anilkumar

കറുത്തസുന്ദരി


മന്ദംമന്ദംമൃദുപാദപതനങ്ങളോടെ കാറ്റു പോലെയവൾ കടന്നുവന്നു. ഏഴു നിറങ്ങളും തോൽക്കുന്ന എണ്ണക്കറുപ്പിൽ അവൾ പതിവിലും സുന്ദരിയായിരുന്നു. കർപ്പൂരം കലർത്തിയ കാച്ചിയ എണ്ണയുടേയും കൈതപ്പൂവിന്റേയും ഗന്ധം മുറിമുഴുവൻ സുഗന്ധപൂരിതമാക്കി. പക്ഷെ അവളുടെ ചുണ്ടുകളിൽ ഉറകൂടിയിരുന്നത് തിളങ്ങുന്ന ഗൂഢസ്മിതമായിരുന്നു. അവളുടെ കൈയ്യിലെ മൂർച്ചയേറിയ കത്രികയാലെന്റെ സ്വപ്ന വർണ്ണച്ചിറകുകളെ കത്രിച്ചെറിയുന്നതിൽ അവൾ വല്ലാത്തൊരുന്മാദം കണ്ടെത്തി. കൈയ്യിലിരുന്ന കാൽചങ്ങലകൾ ബലമായി കാലിലണിയിച്ചപ്പോൾ നഷ്ടമായൊരെൻ സഞ്ചാര സ്വാതന്ത്യം ഓർത്തു ഞാനൊന്നു വിതുമ്പിയോ? വിതുമ്പിയ ചുണ്ടുകളിൽ കനത്തചുംബനത്തിന്റെ താഴിട്ടു പൂട്ടിയ നിമിഷം തന്നെ കൈകളിൽ വിലങ്ങണിയിക്കുന്നതുമറിയുന്നുണ്ടായിരുന്നു. മൃദുവെന്നു തോന്നലുളവാക്കിയ ഇളം കാറ്റിടവിട്ട് കൊടുങ്കാറ്റായി പെയ്തിറങ്ങിയതിൻ ശേഷമുള്ളക്ഷീണവേളകളിൽ പോലും മുന്നിലൊന്നും കാണാനാവാതെ കാഴ്ച മറച്ച കറുപ്പിന്റെ കാരിരുമ്പുപാളികൾ കണ്ണിണകളെ കാരാഗൃഹത്തിൽ പെടുത്തിയിരുന്നു. പെട്ടെന്നായിരുന്നു കറുപ്പിന്റെ തിളങ്ങുന്നകറുത്തപാളികൾകൾക്കിടയിലൂടെ താമരനൂലിടയിൽ വെളിവായ പ്രകാശരേണുക്കൾ. പിന്നീട് മുറി മുഴുവൻ പറന്നിറങ്ങിയ പ്രകാശത്തുമ്പികൾ അവളിലേക്ക് പറന്നിറങ്ങി, നിറഞ്ഞുകവിഞ്ഞകറുപ്പിന്റെ ഓരോചെറുതുള്ളികളുടേയും ചെറുതെളിവുകൾകൂടി ബാക്കി വയ്ക്കാതെയവളെ തിന്നു തീർത്തിരുന്നു, ഇരുട്ടിന്റെ മാറാല നീക്കി ഞാൻ കണ്ണു തുറന്നപ്പോഴേയ്ക്കും കറുത്ത സുന്ദരി തീർത്തും അപ്രത്യക്ഷയായിരുന്നു.

By: PS Anilkumar Devidiya

വൈവാഹിരിക യങ്ങ്വാസിസ്


ദുഫായ് വിജയൻ കാളിംഗ് .
ഹലോ എന്തെല്ലാം ഉണ്ടെടാ വിശേഷങ്ങൾ
അൽ വിവാഹവാർഷിക മംഗളാശംസകൾ
അതെന്താടാ വിജയാ പുതിയ ഒരു അൽ ചേർത്ത ആശംസകൾ.
നമ്മളെല്ലാം ഇങ്ങ് അറബി നാട്ടിലെ പ്രവാസികൾ അല്ലേ ദാസാ അതിനാൽ മലയാള വാക്കിനോട് അൽ ചേർത്ത് പറഞ്ഞാൽ അറബി വാക്ക് ആകുമെന്ന് പണ്ട് ഗഫൂർക്കാ ദോസ്ത് പഠിപ്പിച്ച് തന്നത് ഓർത്തു പറഞ്ഞതാണ്.
അതേതായാലും നന്നായി എനിക്കും അറിയില്ല അതിന്റെ മലയാളം, വിവാഹത്തിന് അറൂസ് എന്നാണ് പറയുന്നത് എന്നറിയാം. അതു കഴിഞ്ഞ് നീ പറഞ്ഞ മംഗളത്തിനും മനോരമയ്ക്കും എന്താണ് അറബിയിൽ പറയുന്നതെന്ന് അറിയില്ല. ആശംസകൾക്ക് മബ്റൂക്ക് എന്നാണെന്ന് തോന്നുന്നു. ഏതായാലും ഇവിടെ ഒരു ഒമാനി പയ്യൻ നിൽക്കുന്നുണ്ട് അവനോട് ഒന്നു ചോദിക്കട്ടെ വിവാഹ വാർഷികമംഗളാശംസകൾക്ക് അറബിയിൽ എന്താണ് പറയുന്നതെന്ന്.
"വൈവാഹാരികയങ്ങ്വാസിസ് " എന്നാണ് അവൻ പറയുന്നത്. ശരിയാണോ എന്ന് ദൈവത്തിന് മാത്രം അറിയാം.
ഇതൊരു തരം ചൈനീസ് വാക്ക് പോലിരിക്കുന്നല്ലോ ?
അതിന് വിജയാ നിനക്ക് ചൈനീസ് അറിയുമോ?
പിന്നേ ചൈനീസ് കേട്ടാൽ മനസ്സിലാകില്ലെങ്കിലും പറയാൻ അറിയില്ല എന്നു മാത്രം.
വളരെ ഞഞ്ഞായി.
അതു പോട്ടെ ഞാൻ മറൊരു സംശയം ചോദിച്ചോട്ടെ? നമ്മളിൽ ആരുടെ കല്യാണം ആണ് ആദ്യം കഴിഞ്ഞത്.
അത് എന്റേതായിരിക്കും.
അതെങ്ങിനെ ശരിയാകും എന്റെ വിവാഹം മെയ് മാസത്തിൽ ആയിരുന്നല്ലോ.
ശരി എങ്കിൽ സമ്മതിച്ചു. നിന്റെയാണ് വിവാഹം ആദ്യം നടന്നതെങ്കിലും വാർഷികം എന്റെയാണ് ആദ്യം.
അതെങ്ങിനെയാണ് ?
എടാ എന്റെ വാർഷികം ഇന്ന് ഇനി ഏഴു മാസത്തിനു ശേഷമല്ലേ നിന്റെ വാർഷികം.
നിന്റെ ബുദ്ധി സമ്മതിക്കാതെ തരമില്ല. എങ്കിലും ഒരു കാര്യം ഞാൻ ഓർക്കുന്നുണ്ട് എന്റെ കല്യാണത്തിന് നിന്റെ ഭാര്യ ഒരു പച്ചനിറമുള്ള ചൂരിദാർ അണിഞ്ഞാണ് വന്നത്.
ചൂരിദാറിന്റെ കാര്യം നീ മിണ്ടരുത്. അതിന്റെ പേരിൽ ഒരു വഴക്ക് ഇപ്പോൾ കഴിഞ്ഞ തേയുള്ളു. ഒന്നാമതെ എത്ര തിരഞ്ഞെടുത്താലും അവസാനമൊരു പച്ചകലർന്ന നിറത്തിലാണ് എപ്പോഴും പ്രിയതമ ചൂരിദാർ സെലക്ടു ചെയ്യുന്നത്.
അതിനെന്തിനാ ദാസാ നീ വഴക്കിടുന്നത്.
വഴക്കിടുന്നതതിന്റെ കാരണം പുള്ളിക്കാരിയുടെ ചൂരിദാർ എല്ലാം ഞാനാണ് നശിപ്പിക്കുന്നത് എന്നു പറഞ്ഞ് കൊണ്ടാണ്.
നീയെന്താ ചുണ്ടെലിയാണോ ചൂരിദാർ നശിപ്പിക്കാൻ.
കടിച്ചു മുറിച്ചു നശിപ്പിക്കുന്നു എന്നല്ല. FB യിൽ ഇട്ട് നശിപ്പിക്കുന്നു എന്നാണ് പരാതി. ഇന്നു തന്നെ നാളെ കല്യാണത്തിന് ഇടാൻ വച്ചിരുന്ന രണ്ടു പുതിയ ചൂരിദാർ ഇട്ട ഫോട്ടോ FB യിൽ ഇട്ടതിനാൽ ഇനി അത് കാണാൻ ആരും ബാക്കിയില്ല , അതിനി എങ്ങിനെ ആൾക്കാരുടെ മുന്നിൽ ഇട്ടോണ്ട് പോകും എന്ന പരാതി, പരിഭവം. വഴക്ക്, ബഹളം.
നമ്മളെല്ലാം നല്ലൊരു ഷർട്ട് ഇട്ട ഫോട്ടോ FB യിൽ ഇട്ടാൽ പിന്നത് മാറ്റില്ല. പത്തുപേർ കണ്ട് തിരിച്ചറിഞ്ഞോട്ടെ എന്നു കരുതും. വഴക്കിടാൻ ഓരോരോ കാരണങ്ങൾ തപ്പി നടക്കുകയാണ് ദാസാ, നമ്മുടെ പ്രിയതമകൾ.
അതാണ് കഴിഞ്ഞ ദിവസം ഞാൻ പറഞ്ഞത് ആദ്യമായി ചെയ്ത ഒരു മണ്ടത്തരമാണ്
ഇതു പോലൊരു പെണ്ണിനെ കെട്ടിയതെന്ന് .
അത് കേട്ടിട്ട് എന്തു മറുപടി തന്നു.
നിങ്ങൾക്കല്ല മനുഷ്യാ മണ്ടത്തരം പറ്റിയത് എനിക്കാണ്. എന്റെ ആനമണ്ടത്തരമാണ് നിങ്ങളെ പോലെ ഒരു മനുഷ്യനെ കെട്ടിയത് എന്നു പറഞ്ഞ് അന്നത്തേക്ക് ഒരു ചെറിയ വഴക്കിന് കാരണം കിട്ടി.
രസമതല്ല വിജയാ, ഇത് കേട്ട് പിള്ളേർ പറഞ്ഞതാണ് ഞങ്ങളെന്തു മണ്ടത്തരം കാട്ടിയിട്ടാണ് ദൈവം ഞങ്ങളെ ഈ മണ്ടന്റേയും മണ്ടിയുടേയും ഇടയിലേയ്ക്ക് പറഞ്ഞു വിട്ടത്. എന്നാലും ഞങ്ങൾക്ക് ഒത്തിരി ഇഷ്ടമാണ് ഇവരെ രണ്ടിനേയും എന്നാണ്.
എന്നാൽ ശരി ദാസാ, പിന്നെ വിളിക്കാം, അപ്പോൾ എല്ലാം പറഞ്ഞ പോലെ . "വൈവാഹാരികയയങ്ങ് വാസിസ്.

By PS ANilkumar

രാജാവിന്റെ മകൻ


തിളങ്ങുന്ന ചെഞ്ചായം പൂശിയ അരണ്ടവെളിച്ചത്തിലുള്ള ബാറിന്റെ വലത്തെ കോണിലുള്ള നാലു പേർക്കിരിയ്ക്കാവുന്ന ടേബിളിന്റെ പിന്നിലെ കസേരയിൽ ഒറ്റയ്ക്കിരുന്ന് ആറാമത്തെ പെഗ്ഗിലേക്ക് സോഡ ഒഴിയ്ക്കുമ്പോൾ നുരഞ്ഞു പൊന്തിയ ചെറു കുമിളകളിലേയ്ക്കാണോ ഐസ് ക്യൂബ്കൾ ഇട്ടത് അതോ ഐസ് ക്യൂബിനും മുകളിലേയ്ക്കാണോ സോഡ ഒഴിച്ചത് എന്ന് തീർച്ചയില്ല. മുമ്പിലിരിയ്ക്കുന്ന പ്ലേറ്റിലെ മിച്ചറിൽ നിന്ന് കഷ്ടപ്പെട്ട് തപ്പിയെടുത്ത കപ്പലണ്ടിമണികൾ വളരെ ശ്രദ്ധയോടെ തുറന്നു പിടിച്ചിരുന്ന വായിലേയ്ക്ക് അഞ്ചാറെണ്ണം വീതം ഒന്നിനു പുറകെ ഒന്നായി എറിഞ്ഞെങ്കിലും ഒന്നോ രണ്ടെണ്ണം മാത്രമേ ലക്ഷ്യസ്ഥാനം കണ്ടുള്ളു. പുറകിലെവിടേക്കോ പറന്നു പോയ കപ്പലണ്ടിമണികൾ ഉള്ളിൽ ലേശം നഷ്ടബോധം ഉണർത്തി. അല്പം നേരം കൊണ്ട് അതിൽ നിന്ന് മുക്തമായെങ്കിലും അടുത്ത ചിന്ത മനസ്സിനെ അല്പം അലോസരപ്പെടുത്തി. എല്ലാം മറക്കാനും അല്പം മനസ്സമാധാനത്തിനുമാണ് രണ്ടെണ്ണം അടിക്കുന്നത് അപ്പോഴാണ് അതിനേക്കാൾ രസം ഉണ്ടായത് പഴയ ഓർമ്മകളെല്ലാം ഒന്നൂടെ തെളിഞ്ഞു വരുന്നു , അതും നല്ല പുളിയും ചാരവും ഇട്ടു തേച്ചുമിനുക്കിയെടുത്ത ഓട്ടുവിളക്ക് പോലെ, അല്ലെങ്കിൽ തന്നെ ഈ ഓർമ്മകൾക്ക് എന്തു തിളക്കമാണ്.
സത്യം, അപ്പോഴാണ് മറ്റൊരു ചിന്ത ഉള്ളിലുയർന്നുവന്നത് ആൻസിയെ ഒന്നു കാണണമെന്ന ചിന്ത.
അതിനു കാരണമായതോ ടിവിയിലെ ഏതോ ചാനലിൽ ഓടിക്കൊണ്ടിരിക്കുന്ന ഓൾഡ് ഹിറ്റ് കാറ്റഗറിയിലെ സിനിമയിലെ ലാലേട്ടന്റെ ത്രസിപ്പിക്കുന്ന മാസ്സ് ഡയലോഗ്.
ക്ഷമ ചോദിയ്ക്കാൻ തക്ക എന്തു തെറ്റാണ് ആൻസി എന്നോട് ചെയ്തത്. ശരിയാണ് ആൻസി തന്നോട് തെറ്റൊന്നും ചെയ്തില്ലല്ലോ, പാവം ആൻസി. ചെയ്തതത്രയും താൻ , എന്നിട്ട് തന്നെ തേച്ചിട്ടു പോയി എന്ന കുറ്റം മുഴുവൻ പാവം അവളുടെ തലയിൽ കെട്ടിവച്ചു. അതിന്റെയെല്ലാം അനന്തരഫലമാണല്ലോ താനിപ്പോൾ ഇങ്ങിനെ അനുഭവിച്ചു കൂട്ടുന്നത്.
മനസ്സിൽ കുറ്റബോധം തോന്നിത്തുടങ്ങിയാൽ പിന്നെ ചെയ്യുന്നതെല്ലാം യാന്ത്രികമായിരിക്കും, ദൈവമേ അതും ശരിയാണല്ലോ കഴിഞ്ഞ അഞ്ചാറു വർഷമായിട്ട് താൻ ചിന്തിക്കുന്നതും പ്രവർത്തിക്കുന്നതുമെല്ലാം അങ്ങിനെ തന്നെയല്ലേ .
യെസ് ഐ ആം എ പ്രിൻസ്, കിരീടവും ചെങ്കോലും പലിശയ്ക്ക് കൊടുപ്പും, കൊല്ലും കൊലയും ഉണ്ടായിരുന്ന പലിശക്കാരൻ തോമസ്സിന്റെ മകൻ. കടുത്ത ലാൽ ആരാധകൻ ആയ തന്റെ പപ്പ രാജാവിന്റെ മകൻ കണ്ട ഹാങ്ങ് ഓവറിൽ ആണെന്ന് തോന്നുന്നു താൻ ജനിച്ചപ്പോൾ തനിക്കിട്ടു തന്ന പേരാണല്ലോ വിൻസെന്റ് എന്നത്. അങ്ങിനെ താനും ഒരു രാജാവിന്റെ മകൻ ആയി, വിൻസെന്റ് തോമസ്സ്. അഞ്ചാം വയസ്സിൽ അപ്പച്ചൻ പതിവുള്ള കള്ളുകുടിയ്ക്കിടയിൽ കുട്ടിയായ തനിക്കും ചെറിയ ഗ്ലാസ്സിൽ ഇത്തിരി ഒഴിച്ചു തന്നത് കുടിച്ചപ്പോൾ ഇതെന്താണപ്പച്ചാ അടയ്ക്കാ വെള്ളമാണോ എന്നു ചോദിച്ചതിന് അപ്പച്ചൻ തന്ന മറുപടി
എടാ സാഗർ ഏലീയാസ് ജാക്കീ ഇതാടാ ബിയർ, അതവിടെ നിൽക്കട്ടെ നിനക്കെവിടുന്നാണ് ബിയറിന്റെ സ്വാദ് അടയ്ക്കാവെള്ളത്തിന്റേതാണ് എന്നറിവ് കിട്ടിയത്.
അതോ വല്യാപ്പച്ചന് മുറുക്കാനായി അടയ്ക്ക വെള്ളത്തിലിട്ടു വച്ചിരിക്കുന്ന മൺകുടത്തിന്റെ മൂടി തുറക്കുമ്പോൾ കിട്ടുന്നത് ഇതേ മണമാണ്.
ശരി എങ്കിൽ ഇതിന്റെ രുചി ഒന്നു കണ്ടു പിടിയ്ക്കൂ എന്നു പറഞ്ഞ് അപ്പച്ചൻ മറ്റൊരു കുപ്പിയിൽ നിന്ന് ഒഴിച്ചു തന്നത് സ്വാദോടെ നുണച്ചിറക്കിയപ്പോഴും അതെന്താണെന്ന് തിരിച്ചറിഞ്ഞില്ല. ഉള്ളെരിഞ്ഞിറങ്ങിയപ്പോഴും ഉള്ളിൽ ഒരു സുഖത്തോടെ ഇതെന്തു സാധനമാണപ്പാ ചോദിച്ചതിന് അപ്പൻ തന്ന ഉത്തരം ഇന്നും കാതിൽ മുഴങ്ങുന്നുണ്ട്. ഗ്രീൻ ലേബൽ സ്കോച്ച് വിസ്കിയാണെടാ മോനേ ഇതെന്ന് .
ആദ്യമായി അപ്പച്ചൻ കുറിച്ചു തന്ന വിദ്യാരംഭം നാവിൽ ഇറ്റിച്ചു തന്ന മദ്യത്തുള്ളികളും, ഉള്ളിൽ പകർന്നു തന്ന ആദ്യത്തെ അറിവുകൾ ബന്ധങ്ങൾ എല്ലാം പണയപ്പണ്ടമായി കരുതണം എന്നുമായിരുന്നല്ലോ. ഏതു ബന്ധങ്ങളിലായാലും നമ്മൾ കൊടുക്കുന്ന സ്നേഹത്തെ പോലും പലിശയായി തിരിച്ചെടുക്കണമെന്ന ബാലപാഠങ്ങൾ അപ്പച്ചൻ പഠിപ്പിച്ചുത്തന്നത് അക്ഷരംപ്രതി അനുസരിച്ചതാണോ താൻ ജീവിതത്തിൽ ചെയ്ത തെറ്റ്.
ആൻസിയുടെ കല്യാണത്തിന്റെ തലേദിവസം വരേ അവൾക്ക് ഒരു പ്രതീക്ഷയുണ്ടായിരുന്നു താനവളെ വിളിച്ചിറക്കി കൊണ്ടു പോരും എന്ന്, അപ്പച്ചന്റെ എതിർപ്പിന്റെ പേരും പറഞ്ഞ് അവളെ നൈസായി ഒഴിവാക്കിയതാണ് എന്ന് പാവം അവൾ അറിഞ്ഞില്ലായിരുന്നു. അവളേയും താൻ ഒരു പണയപ്പണ്ടമായാണ് കരുതിയിരുന്നതെന്ന് അവൾ അറിഞ്ഞില്ലല്ലോ. പലിശ പലപ്പോഴുമായി പല രീതിയിൽ വസൂലാക്കിയതിനാൽ അവൾ വിട്ടു പോകുന്നതിൽ വലിയ കുറ്റബോധം ഒന്നുമില്ലായിരുന്നു. പക്ഷെ നേട്ടങ്ങൾ എല്ലാം നഷ്ടമായിരുന്നു എന്നു തിരിച്ചറിഞ്ഞപ്പോഴേയ്ക്കും ചെങ്ങണ്ടപ്പാലത്തിനടിയിലൂടെ ഒത്തിരി വെള്ളമൊഴുകി പോയിട്ടുണ്ടായിരുന്നു.
ശരിയാണ് ഇപ്പോൾ നന്നായി ഓർക്കുന്നു ആൻസി അന്ന് പറഞ്ഞത് ചെങ്ങണ്ടപ്പാലത്തിന്റെ തെക്കേക്കരയിലൂടെ ഏകദേശം ഒന്നൊന്നര കിലോമീറ്റർ കിഴക്ക് വശത്തു നിന്നാണ് അവളെ വിവാഹം കഴിയ്ക്കാനായി വന്നിരിക്കുന്ന പീറ്ററിന്റെ വീട്. സ്വന്തമായി ചീനവലയെല്ലാം ഉണ്ട്. കായലിൽ നിന്ന് മീൻ പിടുത്തവും,ബാക്കിയുള്ള സമയത്ത് കായലിൽ നിന്ന് കക്കാവാരാനും എല്ലാം പോകുന്ന നല്ല അദ്ധ്വാനിയായ കുടുംബ സ്നേഹിയായ ചെറുപ്പക്കാരനാണ്. വീടു കാണാൻ പോയിട്ടു വന്ന അവളുടെ അപ്പച്ചനും അമ്മച്ചിയും പറഞ്ഞു അവരുടെ വീട്ടിൽ ആവശ്യത്തിന് തെങ്ങും, മാവും ,പ്ലാവും പച്ചക്കറി കൃഷിയുമെല്ലാം ഉണ്ട്. വീടിനു ചുറ്റും ഒത്തിരി പൂവരശ് മരങ്ങളും ഉണ്ട്. അങ്ങിനെയെല്ലാം പറഞ്ഞത് കഴിഞ്ഞ ദിവസം ആയിരുന്നു എന്നു തോന്നിപ്പോകുന്നു പക്ഷെ അഞ്ചാറു വർഷങ്ങൾക്ക് മുമ്പായിരുന്നു എന്നു തോന്നുന്നതേയില്ല.
പാതിരാത്രിയായി സാറേ, ബാർ അടയ്ക്കാറായി. സാറിന് വീട്ടിൽ പോകാൻ ഊബർ വിളിയ്ക്കണോ? ബാറിലെ ജോലിക്കാരന്റെ ചോദ്യമാണ് തന്നെ ചിന്തയിൽ ഉണർത്തിയത്.
വേണ്ട, ഞാൻ എന്നത്തേയും പോലെ എന്റെ ബൈക്കിനു തന്നെ പൊയ്ക്കോളാം.
ചെങ്ങണ്ടപ്പാലത്തിന്റെ കൈവരികൾ തുടങ്ങുന്നയിടത്ത് ബൈക്കൊതുക്കി വച്ചു. ചാവി ഊരിയെടുത്ത് ചൂണ്ടുവിരലിൽ ഇട്ട് കറക്കി പാലത്തിന്റെ താഴോട്ടുള്ള പടികൾ ഇറങ്ങി. കായലരികിലെ കരിങ്കൽ ഭിത്തി കിഴക്കോട്ട് നീണ്ടു കിടന്നു. പരിചിത ഭാവത്തിൽ അപരിചിതമായ വഴിയിലൂടെ യാത്ര തുടർന്നു. ശാന്തമായ കായലിൽ നിലാവ് പരന്നൊഴുകി പടർന്നു കിടന്നു.
പാതിരാത്രിയിൽ പതിവായി പോകാത്ത വഴിയിലൂടെ പഴയ കാമുകിയെ തേടിയുള്ള യാത്ര.
ഇപ്പോൾ എന്തോരം നടന്നു എന്നറിയില്ല വഴിയിൽ എത്ര ചീനവലകൾ കണ്ടു , എത്ര പൂവരശുകൾ കണ്ടു എന്നാലും ആൻസിയുടെ വീടു മാത്രം കണ്ടില്ല. അഥവാ കണ്ടാൽ തന്നെ തിരിച്ചറിയാൻ താൻ ഇതിനു മുമ്പ് ആ വീട് കണ്ടിട്ടില്ലല്ലോ. ഒത്തിരി നടന്നുനടന്ന് ഇപ്പോൾ തൊട്ടുമുന്നിൽ വഴിയെല്ലാം അവസാനിച്ചു, ഇനി മുന്നിൽ കായലാണ്, നടന്ന ക്ഷീണം തീർക്കാൻ അടുത്തു കണ്ട തെങ്ങിൽച്ചാരി ഇരുന്നു.
കണ്ണെത്താത്ത ദൂരം വരെ നീണ്ടുകിടക്കുന്ന കായൽക്കരയിൽ, കായലിൽ നിന്ന് വരുന്ന ചെറിയ തണുപ്പുള്ള ഉപ്പുക്കാറ്റേറ്റ് ഇങ്ങിനെ ഇരിയ്ക്കാൻ എന്തുരസം.
By PS Anilkumar

ആകാശ്മോനോന്റെ ആകാശയാത്രകൾ :


നമുക്കൊരു യാത്ര പോയാലോ? ഒരു ആകാശയാത്ര. അങ്ങിനെയെങ്കിൽ നമുക്ക് അടുത്ത് കാണാമല്ലോ ആകാശിന്റെ യാത്രയും കൂടെ യാത്രികനേയും. ആകാശിന്റെ യാത്ര ആകാശത്തിലൂടെയാണെങ്കിലും എന്തോ ആകാശിന്റെ മട്ടും ഭാവവും കണ്ടിട്ട് എന്തോ ഒരു വല്ലായ്മ. ജീവിതത്തിലും മരണത്തിനും ഇടയിലൂടെയുള്ള ഒരു യാത്രയിലാണ് എന്നു തോന്നുന്നു. സുഖസുഷുപ്തിയുടെ ഇടയിലെപ്പോഴോ ഒരു നൈറ്റ്മെയർ കണ്ട് ഞെട്ടി എഴുനേറ്റ് ഉറക്കവും നഷ്ടപ്പെട്ട് പാതി വഴിയിൽ ജീവിതവും നഷ്ടപ്പെട്ട തോന്നലിള്ളൊരവസ്ഥ. പറന്നുയർന്നു പകുതിവഴിയിൽ ചിറകു തളർന്ന ആൺകിളി, മുട്ടവിരിഞ്ഞെങ്കിലും പറക്കമുറ്റാത്ത പൈതങ്ങൾ, പാതിയായ കൂടുനിർമാണം, കൂട്ടിലൊറ്റായ്ക്കായേക്കാവുന്ന തള്ളക്കിളിയുടെ മൗനനൊമ്പര വേദനപ്പാടുകൾ ഇവയെല്ലാമായിരിക്കും അവനെ ചൂഴ്ന്നു നിൽക്കുന്ന പ്രവാസദുഃഖങ്ങൾ എന്ന് നമുക്ക് വിലയിരുത്താം.
ആകാശിന്റെയാത്രയിലെ വിശേഷങ്ങളിലേയ്ക്ക് നമുക്കും കടന്നു ചെല്ലാം .
ആകാശ്മോനോൻ ആകാശയാത്രയിലാണ്. നീലാകാശത്തിൽ വെളുവെളുത്ത പഞ്ഞിക്കെട്ടുകൾക്കിടയിലൂടെ സുന്ദരമായ അരയന്നം പോലെ തെന്നി നീങ്ങുന്ന വിമാനം. സീറ്റിലിരുന്ന് സുന്ദരമായ പുറംകാഴ്ചകൾ കാണാനാവാതെ വേദന കൊണ്ട് പുളയുന്ന ശരീരത്തിൽ നിന്ന് പറന്നകന്ന് വെളുത്ത മേഘങ്ങൾക്കിടയിലേയ്ക്ക് പറന്നു പോകാൻ കൊതിക്കുന്ന ജീവനെ മുറുക്കെ പിടിച്ച് അവൻ സീറ്റിൽ നിന്നെഴുനേറ്റു. ലോഹഭിത്തിയിലൂടെ പുറത്തേയ്ക്ക് പറന്ന് ചെല്ലാൻ വെമ്പൽ കൂട്ടുന്ന ആത്മാവിനെ സ്വീകരിച്ച് കൊണ്ടുപോകാൻ വെള്ള മേഘശകലങ്ങൾ വിമാന ചിറകിനിടയിലൂടെ പറന്ന് വന്ന് ജാലക വാതിലിൽ നിന്നെത്തി നോക്കി മുട്ടി വിളിയ്ക്കുന്നു, വിട്ടു കൊടുക്കില്ല എന്ന ദൃഢനിശ്ചയത്തോടെ സീറ്റിൽ നിന്നെഴുന്നേറ്റ് അവൻ മുന്നോട്ടും പിന്നോട്ടും നടന്നു. മുന്നോട്ട് നടന്ന് വിമാനത്തിലെ ടോയ്ലറ്റിന്റെ മുന്നിലെത്തി ഒരു മാത്ര അവിടെ സംശയിച്ചു നിന്നു, സാധാരണയായി അവിടെ ഇരു വശങ്ങളിലും നല്ല ക്യൂ കാണാറുള്ളതാണ് പക്ഷെ വിമാനം പറന്നു പൊങ്ങിയ ഉടനെയായതിനാൽ രണ്ടു വാതിലുകളുടെ മുൻഭാഗവും ആളൊഴിഞ്ഞു കിടന്നു പക്ഷെ ആകാശിന് ടോയ്ലറ്റിന് അകത്തു കയറാൻ പറ്റിയ അവസ്ഥയിൽ ആയിരുന്നില്ല. ശരീരം മുഴുവൻ പറഞ്ഞറിയിക്കാൻ ആവാത്ത വേദന. നിൽക്കാനും ഇരിയ്ക്കാനും ആവാത്ത അവസ്ഥ, നടക്കുമ്പോൾ ചെറിയൊരാശ്വാസം. വേദനയിൽ നിന്ന് രക്ഷപ്പെടാൻ പിന്നോട്ട് തിരിഞ്ഞു നടന്നു. അല്പം മുമ്പ് എഴുനേറ്റു പോയ സീറ്റും കടന്ന് പിന്നെയും പുറകിലേക്ക് നടന്നു. ഫസ്റ്റ്ക്ലാസ്സും സെക്കന്റ് ക്ലാസ്സും തമ്മിൽ വേർതിരിയ്ക്കുന്ന കർട്ടന്റെ അടുത്തെത്തിയൊരു നിമിഷം അവിടെയും നിന്നു. പിന്നീട് തിരിച്ചു നടന്നു രണ്ടാം വട്ടവും യാത്ര തുടർന്നപ്പോൾ സഹയാത്രികർ എന്തുപറ്റിയെന്ന് പുരികമുയർത്തി ചോദ്യശരങ്ങൾ എയ്തുവിടുന്നതു കണ്ടില്ലെന്ന് നടിച്ചു. അല്ലങ്കിൽ തന്നെ എന്തെങ്കിലും പറയാൻ പറ്റുന്ന മാനസികാവസ്ഥയിൽ അല്ലാ യിരുന്നല്ലോ , നടപ്പു വീണ്ടും തുടർന്നപ്പോൾ കാര്യം തിരക്കിയ എയർഹോസ്റ്റസിന്റെചോദ്യത്തിന് മറുപടി പറഞ്ഞതിനൊപ്പം കടിച്ചു പിടിച്ചിട്ടും കയറുപ്പൊട്ടിയ കണ്ണുനീർ തുള്ളികൾ നിലത്തുവീണു പൊട്ടിച്ചിതറി. കണ്ണീർപ്പുഞ്ചിരിയ്ക്കിടയിലൂടെ ആകാശ് പറഞ്ഞൊപ്പിച്ചു അവൻ അനുഭവിക്കുന്ന വേദനയുടെ രത്നച്ചുരുക്കം. ഭാഷയ്ക്കതീതമായി അവൻ അനുഭവിക്കുന്ന വേദനയുടെ ചൂടും ചൂരും തിരിച്ചറിഞ്ഞ എയർഹോസ്റ്റസ് സന്ദർഭത്തിന്റെ ഗൗരവം ഉൾക്കൊണ്ടുക്കൊണ്ട് ക്യാബിനിലെത്തി മൈക്കിലൂടെ കൂടെ യാത്ര ചെയ്യുന്ന ഡോക്ടേഴ്സിന്റെ സേവനം അഭ്യർത്ഥിച്ചു. എന്തു സഹായവും ചെയ്യാനായി മൂന്നു ലേഡി ഡോക്ടറുമാരും, മാറ്റാരു ഡോക്ടറും വളരെ പെട്ടെന്ന് അവരുടെ സന്നദ്ധത അറിയിച്ചു. എയർഹോസ്റ്റസ് ആകാശിനെ ഫസ്റ്റ് ക്ലാസ്സിലേക്ക് കൊണ്ടുചെന്നതും ഡോക്ടേഴ്സ് അരികിലെത്തി വിവരങ്ങൾ തിരക്കി.
ആകാശിന്റെ കൈകൾ കൈയിലെടുത്ത് എന്താണ് അസുഖമെന്ന് സ്നേഹമസൃണമായ സ്വരത്തിൽ ചോദിച്ച ഡോക്ടറിന്റെ കരുണ നിറഞ്ഞ കണ്ണുകളിലേയ്ക്ക് നോക്കിയപ്പോൾ അവനു ലഭിച്ചത് വലിയൊരാശ്വാസത്തിന്റെ മഞ്ഞുമലയുള്ളിലേയ്ക്ക് കടന്നുവന്നൊരു സുഖശീതളിമ.
അസുഖം എന്താണെന്ന് അറിയില്ല സാർ, ശരീരം പൊട്ടിച്ചിതറി പോകുന്ന വേദനയാണ്. ഹോസ്പിറ്റലിൽ പോകാനായിട്ടാണ് നാട്ടിലേക്ക് പോകുന്നത്.
അവിടെ ഡോക്ടറെ കണ്ടില്ലായിരുന്നോ? എന്നിട്ട് എന്താണ് ഡോക്ടർ പറഞ്ഞത്.
ഡോക്ടർ പറഞ്ഞത് ഹെപ്പറ്റൈറ്റ്സിന്റെ ഏതോ വകഭേദമാണ് എന്നു സംശയം ഉണ്ട് അതിനാൽ ബ്ലഡ് കൾച്ചർ ചെയ്ത് നോക്കാനായി പറഞ്ഞു.
എന്നിട്ട് ബ്ലഡ് കൾച്ചർ ചെയ്ത് നോക്കിയോ ?
ഇല്ല അതിന് ചില പ്രശ്നങ്ങൾ ഉണ്ട്. ബദർ അൽ സമയിൽ ആണെങ്കിലും, മറ്റേത് നല്ല ഹോസ്പിറ്റലിൽ ആണെങ്കിലും ബ്ലഡ് ടെസ്റ്റ് ചെയ്തിട്ട് ചികിത്സിച്ച് ഭേദമാക്കാൻ ബുദ്ധിമുട്ടുള്ള ഹെപ്പറ്റെസിന്റെ വകഭേദങ്ങൾ ഏതെങ്കിലും ആണെങ്കിൽ അവർ റിപ്പോർട്ട് ഗവൺമെന്റിലേക്ക് റഫർ ചെയ്യും. പിന്നീട് ഒരു മാസം ഗവൺമെന്റ് സൗജന്യചികിത്സ നൽകുകയും അതിനു ശേഷം വിസ കാൻസൽ ചെയ്ത് നാട്ടിലേക്ക് കയറ്റി വിടുകയും ചെയ്യും. പിന്നീട് ഒരിയ്ക്കലും വിസിറ്റ് വിസ പോലും തരാതിരിക്കുകയും ചെയ്യും. ഒറ്റയ്ക്ക് ഒരു സ്ഥാപനം നടത്തുന്ന തന്നെ പോലുള്ളവരെ അങ്ങിനെ വിസ കാൻസൽ ചെയ്ത് നാട്ടിലേയ്ക്ക് കയറ്റി വിടുമ്പോൾ , തറവാട് ഭാഗം വയ്ക്കുന്നതിന് മുമ്പ് തറവാടിനു വേണ്ടി എല്ലുമുറിയെ പണിയെടുത്ത ചില മൂത്ത മക്കളെ മുറ്റത്തു വീണു കിടക്കുന്ന ഒരു കരിയില പോലും എടുക്കാൻ സമ്മതിക്കാതെ പടിയടച്ച് പിണ്ഡം വയ്ക്കുന്നതിന് സമാനമായിരിക്കും. പുറത്താക്കിയിട്ട് പിന്നൊരു ഉപ്പു ചിരട്ടയ്ക്കായി പോലും തറവാട്ടിൽ കാലുകുത്താൻ ആവാത്ത അവസ്ഥയായിരിക്കും പിന്നീട് ഞങ്ങൾ. അതുകൊണ്ട് വിശദമായ ബ്ലഡ് ചെക്കിംഗിന് നിന്നില്ല. നാട്ടിൽ പോയി ചികിത്സിക്കാം എന്നോർത്ത് യാത്ര തിരിച്ചതാണ്. ഇന്നലെ യൂറിനും ബ്ലഡ്ഡും ടെസ്റ്റ് ചെയ്ത ചെറിയ ക്ലിനിക്കിലെ ഡോക്ടർ ഹെപ്പറ്റെറ്റിസ് എന്നെഴുതിയിട്ട് അതിന്റെ മുന്നിൽ ഒരു ക്വസ്റ്റിൻമാർക്കും ഇട്ടപ്പോൾ മുതൽ നല്ല ജീവൻ പോയി. അതിന്റെ കൂടെ ശരീരം പൊട്ടിപ്പിളരുന്ന വേദനയും. വേദനസംഹാരികൾ കൊണ്ട് വേദനയെ പിടിച്ചു നിർത്താൻ ആവുന്നില്ല.
ശരി എങ്കിൽ തല്ക്കാലം വേദന മാറാനുള്ള ഒരു മരുന്ന് തരാം. ഡോക്ടർ ബ്രീഫ്കെയ്സ് തുറന്ന് ഒരു ഗുളിക എടുത്ത് എയർ ഹോസ്റ്റസിനോട് അല്പം വെള്ളം ആവശ്യപ്പെട്ടു. കൊണ്ടുവന്ന അരഗ്ലാസ്സ് വെള്ളത്തിലേക്ക് കൈയ്യിലെടുത്ത ഗുളിക ഇട്ട നേരം നുരയും പതയും പതഞ്ഞു പൊങ്ങി. അതു കുടിച്ചു കഴിഞ്ഞ് മൂന്നാലു മിനിട്ടിനകം ആകാശിന്റെ മുഖത്തു നിന്നും വേദനയുടെ ലാഞ്ചനകൾ അരങ്ങൊഴിഞ്ഞ് പ്രസന്നചിത്തനായി.
ഇപ്പോൾ നല്ല ആശ്വാസം തോന്നുന്നുണ്ട് ഡോക്ടർ.
ആകാശ് നിങ്ങളിൽ കാണുന്ന ലക്ഷണങ്ങൾ ഒന്നും ഹെപ്പറ്റൈറ്റ്സിന്റെ അല്ല, അതിന് ഇതു പോലുളള വേദന കാണില്ല.
പക്ഷെ ഡോക്ടർ ക്ലിനിക്കിലെ റിപ്പോർട്ടിൽ ബിലിറൂബിന്റെ അളവ് വളരെ കൂടുതൽ കാണിക്കുന്നുണ്ടല്ലോ? ആറോ ഏഴോ മില്ലിഗ്രാം വരെ ഉണ്ടെന്നാണ് തോന്നുന്നത്. അതറിഞ്ഞ് നാട്ടിൽ വിളിച്ചു പറഞ്ഞപ്പോഴാണ് നേഴ്സായ സഹോദരി പെട്ടെന്ന് നാട്ടിലെത്താൻ പറഞ്ഞത്.
അതേതായാലും നന്നായി പെട്ടെന്ന് നാട്ടിലേയ്ക്കുള്ള പോക്കും ഉടനെയുള്ള ചികിത്സയും . ടോട്ടൽ ബിലിറൂബിൻ ആണോ, ഡയറക്ട് ബിലിറൂബിൻ ആണോ എന്നത് റിപ്പോർട്ട് നോക്കിയാലേ അറിയാനാവൂ ടോട്ടൽ ബിലിറൂബിൻ കൂടുതൽ ആയാൽ ആണ് കുഴപ്പം എന്തെങ്കിലും കാരണം കൊണ്ട് ഡയറക്ട് ആയി കൂടിയാൽ അതുപോലെ തന്നേ കുറഞ്ഞു കൊള്ളും. ഇത്തരത്തിൽ ഉള്ള വേദനയും ലക്ഷണങ്ങളും കണ്ടിട്ട് സ്റ്റോൺ സംബന്ധമായതാണ് എന്നാണ് തോന്നുന്നത്. ഏതായാലും ഇപ്പോൾ വേദനക്ക് അല്പം ആശ്വാസമില്ലേ, അതുകൊണ്ട് അധികം പേടിയ്ക്കാനില്ല എന്നാണ് തോന്നുന്നത്.
അല്പമല്ല സാറേ നല്ല രീതിയിൽ ഉള്ള ആശ്വാസം ഉണ്ട്. ഒരു സംശയം ചോദിച്ചോട്ടെ അവിടെ നിന്ന് ബ്ലഡ് ടെസ്റ്റ് ചെയ്തപ്പോൾ ഹെപ്പറ്റൈറ്റിസ് എന്നെഴുതി ക്വസ്റ്റിൻ മാർക്ക് ഇട്ടതെന്താണ് , ആർക്കാർ ഹെപ്പറ്റൈറ്റിസ് ABCD എന്നെല്ലാം പായുന്നത് അതിന്റെ തീവ്രത കൊണ്ടാണോ അങ്ങിനെയുള്ള തരം തിരിവ്, ഏറ്റവും കുറഞ്ഞത് A യും ഏറ്റവും കൂടിയത് D യും ആണോ ?
അത് ചോദിച്ചത് നന്നായി നാലഞ്ചുതരത്തിൽ ഉള്ള ഹെപ്പറ്റൈറ്റിസ് ആണ് പൊതുവായി കണക്കാക്കിയിട്ടുള്ളത്. അതിൽ തന്നെ ഹെപ്പറൈറ്റിസ് A യും Eയും വലിയ ഉപദ്രവകാരികൾ അല്ല സാധാരാണ മഞ്ഞപ്പിത്തത്തിന്റെ വക ഭേദങ്ങൾ എന്നു പറയാം. പക്ഷെ ഹെപ്പറ്റൈറ്റസ് ബി ഭയങ്കര അപകടകാരിയാണ്, കരൾ കാൻസറിന് വഴി കാട്ടിയാണ് , ക്രോണിക് ഹെപ്പറ്റൈറ്റിസ് ആയി മാറിയാൽ കരൾ കാൻസർ, സിറോസിസ് എന്നിവയ്ക്ക് വഴിവയ്ക്കും. ടോട്ടൽ ബിലിറൂബിൻ ഡയറക്ട് ബിലി റൂബിൻ പരിശോധനയിലൂടെയും , ലിവർ ഫംഗ്‌ഷൻ ടെസ്റ്റിലൂടെയും രോഗ നിർണ്ണയം നടത്താം. അതിനാവശ്യമുളള മരുന്നുകളുടെ ഉപയോഗത്തിലൂടെ അവയുടെ അളവ് കുറയ്ക്കുകയാണ് പിന്നീട് വേണ്ടത്.
അപ്പോൾ സാറെ ഹെപ്പറ്റെറ്റിസ് C യുടെ കാര്യം ഒന്നും പറഞ്ഞില്ലല്ലോ?
ഹെപ്പറ്റെറ്റിസ് സി എന്നാൽ പതുങ്ങി ഇരുന്ന് ആക്രമിക്കുന്ന സ്വഭാവം ആണതിന്, അത്യന്തം അപകടകാരി. രോഗലക്ഷണങ്ങൾ തിരിച്ചറിയാതിരിക്കുക പെട്ടെന്ന് ഒരു സുപ്രഭാതത്തിൽ ക്രോണിക്ക് ഹെപ്പറ്റൈറ്റിസ് ആയി
തീരുകയായിരിക്കും അതിന്റെ രീതി.
അപ്പോൾ ഇനി ബാക്കിയുള്ളത് ഹെപ്പറ്റൈറ്റിസ് D അല്ലേ , അതെങ്ങിനെ താരതമ്യേന അപകടം കുറഞ്ഞതാണോ അതോ ഇതിനെയെല്ലാം കടത്തി വെട്ടുന്നതാണോ ?
അതിനെ പറ്റി പറയാനാണെങ്കിൽ ഇത്തിരി കൂടെ കടുപ്പക്കാരനാണ്. ഹെപ്പറ്റൈറ്റിസ് D എന്നാൽ ബിയുടെ പിൻഗാമിയും Cയുടെ ലക്ഷണങ്ങളോട് കൂടിയതുമായ കൊലയാളി.
ഒരു സംശയം കൂടെ ചോദിച്ചോട്ടെ ഡോക്ടറേ ഈ ബിലിറൂബിൻ എന്നു പറഞ്ഞാൽ എന്താണ് ?
ബിലിറൂബിൻ ഉണ്ടാകുന്നത് രക്തകോശങ്ങളിൽ നിന്നാണ്, ചുവന്ന രക്താണുക്കൾക്ക് 120 ദിവസത്തെ ആയുസ്സാണ് ഉള്ളത്. ഇവ പ്രായമായി നശിക്കുമ്പോൾ ആണ് ബിലിറൂബിൻ ഉണ്ടാകുന്നത് , ഈ ബിലിറുബിൻ കരൾ സംസ്കരിക്കപ്പെടുകയും ഒരു ഭാഗം പിത്തനീരിലൂടെ പിത്താശയത്തിലേയ്ക്കും ബാക്കിഭാഗം വൻകുടലിലൂടെ കടന്നു പുറത്തേയ്ക്ക് പോകുകയും ചെയ്യുന്നു.
സാധാരാണ രക്തത്തിൽ 0.3 മുതൽ 0.8 വരെ ബിലിറൂബിൻ ഉണ്ടാകുന്നു. ഒരു മില്ലിഗ്രാമിൽ കൂടുതൽ ആകുമ്പോൾ മഞ്ഞപ്പിത്തത്തിന്റെ ലക്ഷണങ്ങൾ തുടങ്ങുകയുള്ളു. 3 മില്ലിഗ്രാമിൽ കൂടുമ്പോൾ മഞ്ഞപ്പിത്തം സ്ഥിതീകരിക്കുന്നു.
ഡോക്ടർ അപ്പോൾ 6 മില്ലിഗ്രാമിൽ കൂടുതൽ ബിലിറൂബിൻ ഉള്ള എന്റെ കരളിനെയെല്ലാം ഇപ്പോൾ മഞ്ഞപ്പിത്തം കൂടിയ രീതിയിൽ ബാധിച്ചിട്ടുണ്ടാകുമോ ?
ആകാശ് പേടിയ്ക്കണ്ട, നിങ്ങളുടെ കണ്ണുകളിലും, കൈവിരലുകളിൽ ഒന്നും മഞ്ഞ നിറമൊന്നും കാണാനില്ല. അതുകൊണ്ട് പേടിയ്ക്കാനുള്ള കാര്യങ്ങൾക്കൊന്നുമൊരു സാധ്യതയുമില്ല. ബിലിറൂബിൻ 6,7 മില്ലിഗ്രാം എന്നത് കൂട്ടിയ അളവാണ് പക്ഷ ഡയറക്ട് ബിലിറൂബിൻ ആണെങ്കിൽ മറ്റെന്തെങ്കിലും കാരണം കൊണ്ടും ആവാം. അത് ഉയർന്നതു പോലെ ഉടനെ തന്നേ താഴാനും സാദ്ധ്യതയുണ്ട്.
അതുകൊണ്ട് ആകാശ് ധൈര്യമായിരിക്ക്, ഒന്നും സംഭവിക്കില്ല. ശുഭയാത
ഡോക്ടറോട് നന്ദി പറഞ്ഞ് ആകാശ് മേനോൻ സീറ്റിലേയ്ക്ക് ചാരി കിടന്നു , പയ്യെ മിഴിയിണകൾ അടച്ചു. കുഞ്ഞുകുട്ടിയുടെ ശാന്തമായ ഉറക്കം പോലെ, നിശബ്ദമായ നീലജലാശത്തിലേക്ക് ഒരു ചെറിയ കല്ലിടുമ്പോൾ താഴ്ന്നു താഴ്ന്നു പോകുന്ന പ്രതീതിയിൽ ആകാശ് ഉറക്കത്തിലേയ്ക്ക് ഊർന്നിറങ്ങിപ്പോയി.

By PS Anilkumar

DON'T MISS

Nature, Health, Fitness
© all rights reserved
made with by templateszoo