Showing posts with label Chithradeepa. Show all posts
Showing posts with label Chithradeepa. Show all posts

നല്ലെഴുത്തിലെ നന്മമരങ്ങൾ



എങ്ങനെ തുടങ്ങണം എന്ന് ചോദിച്ചാൽ എനിക്കറിയില്ല.. എന്റെ ഓർമ്മയിൽ കലാലയ ജീവിതം കഴിഞ്ഞ് ഞാൻ ഏറ്റവും കൂടുതൽ സന്തോഷിച്ചത് ,ഏറെ ആസ്വദിച്ചത് 2017 വർഷം അത് നല്ലെഴുത്തിൽ എത്തിയതിന് ശേഷമാണ്. നല്ലെഴുത്തിൽ വരുമ്പോൾ ഒരു കോളേജിൽ എത്തിയ പ്രതീതിയാണ്. ഗുരുക്കൻമാരും കൂട്ടുകാരും സീനിയേഴ്സും ജൂനിയേഴ്സും ഒക്കെയായിട്ട് ഒരു കലാലയം പോലെ ..
അവിചാരിതമായിട്ടാണ് ഞാൻ നല്ലെഴുത്തിൽ എത്തുന്നത്. എന്റെ പ്രിയ സഹോയെ പരിചയപ്പെട്ടതിൽ നിന്നും ഉണ്ടായ ഒരു കഥയിൽ തുടങ്ങി പിന്നീട് അനുഭവങ്ങളെല്ലാം ചെറിയ തമാശ രീതിയിയിൽ എഴുതി തുടങ്ങി. ആദ്യമേ എന്റെ എഴുത്തിന്റെ ശൈലികൊണ്ടാവാം ഞാനൊരു സ്ത്രീയാണെന്ന് അംഗീകരിക്കാൻ പലരും മടിച്ചു. (ചിലപ്പോ എനിക്കും തോന്നിയിട്ടുണ്ട്)എന്നാലും എറെ പേരും എന്റെ കഥകൾ ആസ്വദിച്ചു സപ്പോർട്ടു ചെയ്തു.
ഒരു കഥ എഴുതാനുള്ള കഴിവൊന്നും എനിക്കില്ലായിരുന്നു. ജീവിതത്തിൽ നടക്കുന്ന പല സംഭവങ്ങളും തമാശ രൂപത്തിൽ എഴുതി. എന്റെ പ്രീയപ്പെട്ടവരും, സഹപ്രവർത്തകരും ,പിന്നെ നല്ലെഴുത്തിലെ കൂട്ടുകാരും ഒക്കെ എന്റെ കഥാപാത്രങ്ങളായി .ഒരുപാട് നല്ല സൗഹൃദങ്ങൾ ഉണ്ടായി.. ഗുരുവിനെപ്പോലെ , ഏട്ടനെപ്പോലെ, കൂട്ടുകാരെപ്പോലെ കൂടെപ്പിപ്പുകളെപ്പോലെ ,ചിലപ്പോൾ അതിനേക്കാൾ മേലെയുള്ള ആത്മബന്ധങ്ങൾ .. അതും നല്ലെഴുത്തിൽ നിന്നും കിട്ടി.
മുൻപൊക്കെ പല ഗ്രൂപ്പുകളിൽ ഉണ്ടായിരുന്നിട്ടും അവിടെ നിന്നൊന്നും കിട്ടാത്ത ഒന്ന് .നമ്മുടെ സ്വഭാവരൂപികരണം .അതിന് നല്ലൊരു പങ്ക് വഹിക്കാൻ നല്ലെഴുത്തിന് സാധിച്ചു എന്നെനിക്ക് തോന്നിയിട്ടുണ്ട്. പ്രായത്തിന് ഇളയവരോടും മുതിർന്നവരോടും ഒക്കെ ഒരു സ്നേഹത്തോടും ബഹുമാനത്തോടും ഇടപെടാൻ പഴയ എഴുത്തുകാരും പുതിയ പുതിയ എഴുത്തുകാരും ശ്രദ്ധിക്കുന്നു എന്നത് ശ്രദ്ധേയമാണ്. പുതിയ എഴുത്തുകാരുടെ രചനകളെ രണ്ടും കൈയും നിട്ടീ സ്വീകരിക്കുകയും അകമഴിഞ്ഞ് പോത്സാഹിപ്പിക്കുകയും ചെയ്യുന്നു..
ഇതിനിടെ ഒരുപാട് മികച്ച എഴുത്തുകാരെ പരിചയപ്പെടാൻ കഴിഞ്ഞു. അവരുടെ മികച്ച രചനകൾ വായിക്കാൻ കഴിഞ്ഞു. പല മികച്ച എഴുത്തുകാർ നമ്മുടെ സൗഹൃദവലയത്തിൽ ഉണ്ടെന്നത് അഭിമാനത്തോടെ ഓർക്കുന്നു. എങ്കിലും ചിലപ്പോഴെങ്കിലും ആരുടെയോ മനസ്സ് വേദനപ്പിച്ചു. ഈയവസരത്തിൽ ഞാനതിന് ക്ഷമ ചോദിക്കുന്നു.
കൊഴിഞ്ഞ് പോകാൻ തുടങ്ങുന്ന ഈ വർഷത്തിൽ എനിക്ക് കിട്ടിയത് ഒരുപിടി നല്ല സൗഹൃദങ്ങളാണ്. ഓരോരുത്തരോടും ഒരുപാട് നന്ദിയുണ്ട്. സ്നേഹമുണ്ട്.. എന്റെ പ്രിയ കൂട്ടുകാരൻ.. എനിക്ക് നല്ലെഴുത്തിൽ നിന്നും കിട്ടിയ എന്റെ ആത്മമിത്രം ..ഒരുപാട് പ്രോത്സാഹിപ്പിച്ച നല്ലെഴുത്തിലെ നന്മ മരം ഉണ്ണി മാഷ് , എന്റെ ഉണ്ണിച്ചേട്ടനും മായക്കുട്ടിയും ,ബാബു ചേട്ടൻ ,എന്റെ ഗഡി ,ശ്രീക്കുട്ടൻ ,രമേശ് ജി............................. ( എന്നെ സ്നേഹിക്കുന്നവർ എല്ലാവരും )അങ്ങനെ പോകുന്നു എന്റെ നല്ല സൗഹൃദങ്ങൾ ..
2017 വർഷം കടന്നു പോകുമ്പോഴേക്കും നല്ലെഴുത്ത് ഉയർച്ചയുടെ പടവുകൾ താണ്ടുകയാണ്. നല്ലെഴുത്ത് ഗ്രൂപ്പിൽ നിന്ന് ഓൺ ലൈൻ ദ്വൈവാരികയിൽ എത്തി നിൽക്കുന്നു നല്ലെഴുത്തിന്റെ വളർച്ച . ഒരുപിടി നല്ലെഴുത്തുകാരുടെ രചനകൾ അച്ചടിമഷി പുരണ്ടു. നല്ലെഴുത്തിന്റെ ഈ ഉയർച്ചയുടെ പടവുകളിലൂടെ നടക്കാൻ കഴിഞ്ഞതിൽ നല്ലെഴുത്തിന്റെ ഒരു ചെറിയ ഭാഗമാവാൻ കഴിഞ്ഞതിൽ ഞാൻ അഭിമാനിക്കുന്നു.
2018 വർഷവും നല്ലെഴുത്തിനും ,നല്ലെഴുത്തുകാർക്കും ഇനിയും ഒരുപാട് ഉയരങ്ങളിൽ എത്താൻ കഴിയട്ടെ എന്ന് പ്രാർത്ഥിക്കുന്നു..
നല്ലെഴുത്ത് തറവാട്ടിലെ എല്ലാ അംഗങ്ങൾക്കും അവരുടെ കുടുംബാഗങ്ങൾക്കും ഈ വർഷത്തെ ആദ്യത്തെ പുതുവത്സര ആശംസകൾ എന്റേതാവട്ടെ. എല്ലാവർക്കും വരുന്ന വർഷത്തിൽ എല്ലാ വിധ സൗഭാഗ്യങ്ങളും സന്തോഷവും ഉണ്ടാകട്ടെ എന്ന് പ്രാർത്ഥിക്കുന്നു.
പ്രിയ സൗഹൃദങ്ങൾക്ക് എന്റെ ഹൃദയം നിറഞ്ഞ പുതുവത്സരാശംസകൾ...

#നാത്തൂൻ

ഞാൻ ജനിക്കുന്നതിന് നാലു ദിവസം മുന്നേ ജനിച്ചവൻ. അതു കൊണ്ട് തന്നെ നാട്ട് നടപ്പ് പ്രകാരം എന്റെ ചേട്ടൻ..വെറും നാല് ദിവസം മൂത്തവനെ ചേട്ടാന്ന് വിളിക്കേണ്ട ഗതികേടും ഉണ്ടായി.. എന്തായാലും ചെറുപ്പം മുതൽ ഞങ്ങള് ഭയങ്കര ദോസ്തുക്കളാണ്.. ഞങ്ങൾ പരസ്പരം കൈമാറാത്ത രഹസ്യങ്ങളില്ല. ഞാനീ പറഞ്ഞു വന്നത് എന്റെ വല്യച്ചന്റെ മൂത്ത സന്താനത്തെ പറ്റിയാണ് .. എന്റെ പൊന്നാങ്ങള...
അങ്ങനെ ഞങ്ങൾ വളർന്ന് വലുതായി.. ഞാൻ പടർന്ന് പന്തലിച്ചപ്പോൾ വീട്ടുകാർ എന്നെ കെട്ടിച്ചു വിട്ടു.. എനിക്കാണേൽ മൂന്നാലു കൊച്ചുങ്ങളുമായി .. അപ്പോഴും നമ്മുടെ ആത്മമിത്രം സ്റ്റിൽ ബാച്ചിലർ .. കെട്ടാൻ ആഗ്രമില്ലാത്തതു കൊണ്ടോ ജോലിയില്ലാത്തതു കൊണ്ടോ ഒന്നുമല്ല.. സർവ്വസാധാരണ നമ്മുടെ നാട്ടിൽ നടക്കുന്നത് തന്നെ..
ജാതക പൊരുത്തം.. ശുക്രനും ശനിയും ചൊവ്വയുമൊക്കെ അവന്റെ കല്യാണത്തിന് വഴിമുടക്കി നിന്നു.. പെണ്ണിനെ പിടുക്കുമ്പോ നാള് ചേരൂല്ല. നാള് ചേരുമ്പോ പെണ്ണിനെ പിടിക്കൂല്ല. അങ്ങനെ അവൻ ചായയും കുടിച്ച് മിച്ചറും തിന്നു മടുത്തു. .അവനെ പെണ്ണ് കാണിക്കാൻ കൊണ്ടു നടന്ന ബ്രോക്കറുടെ രണ്ട് പെൺമക്കളേം അങ്ങേര് കെട്ടിച്ചു വിട്ടു.. അപ്പോഴും നമ്മടെ ചങ്ക് പിന്നേം തെങ്ങേ തന്നെ..
പെണ്ണ് കെട്ടിക്കാൻ നമ്മളേക്കാലും ഉത്സാഹം നാട്ടുകാർക്കാണല്ലോ.. അവന്റെ സമപ്രായക്കാരൊക്കെ കെട്ടി കുട്ടികളുമായി .. നാട്ടുകാരൊക്കെ ചോദ്യവുമായി ..പാവം എന്റ ചങ്ക് ബ്രോ അങ്ങനെ നാട്ടിൽ ഉണ്ടാരുന്ന ജോലിയൊക്കെ കളഞ്ഞ് അവൻ ദുബായിക്ക് വിമാനം കയറി.. പിന്നൊരു അഞ്ചാറ് വർഷത്തേക്ക് ദുബായിൽ .. ഇടയ്ക്ക് ഒരു തവണ ലീവിന് നാട്ടിൽ വന്നു .. അതിനിടയ്ക്ക് രണ്ടു മൂന്ന് ചായ കുടി കൂടി ഒരാവശ്യമില്ലതെ നടത്തി.. ഇനി എന്റെ കാര്യം ആരും നോക്കണ്ട അനിയന് പെണ്ണ് നോക്കിക്കോ എന്നും പറഞ്ഞ് അവൻ പിന്നേം സ്ഥലം വിട്ടു..
പിന്നെ വല്ലപ്പോഴും ഒന്നു വിളിക്കും.. അത്ര തന്നെ.. ഞാൻ സൗദിക്ക് വന്നപ്പോഴാണ് വീണ്ടും അവനോട് നേരെ ചൊവ്വിന് സംസാരിക്കാൻ തുടങ്ങിയത്.. കല്യാണ കാര്യത്തെ കുറിച്ച് പറഞ്ഞപ്പോൾ അവന് ഭയങ്കര നിരാശ..
"എനിക്ക് മടുത്തു ..ഇനി ഞാൻ കെട്ടുന്നൊന്നുമില്ലെടീ.. ഞാൻ വല്ല സന്യസിക്കാനും പോകുവാന്ന്.. "
ഇത് കേട്ട് എനിക്ക് ചിരിയാണ് വന്നത്.. ഞാനൊന്ന് അവനെ ഒരു സന്യാസിയായി സങ്കൽപ്പിച്ചു നോക്കി.. സന്യാസിയാവാനുള്ള ഒരു ലുക്കുമില്ല.. കഴിഞ്ഞാഴ്ച കൂടി വിളിച്ചപ്പോ ഒരിക്കലും വളരാത്ത അവന്റെ താടിയിലെ നാലും മുന്നേഴ് രോമത്തെ തെറി പറഞ്ഞവനാണ്.. നീണ്ട താടിയില്ലാത്ത സന്യാസി ...
ഇവന്റെ സ്ഥാനത്ത് ഞാനാരുന്നെങ്കിൽ എന്റെ സ്വഭാവത്തിന് ഒരെണ്ണത്തിനെ വളച്ച് പ്രേമിച്ച് അടിച്ചോണ്ട് പോയി കെട്ടിയേനെ. പറഞ്ഞിട്ട് കാര്യമില്ല..
അങ്ങനെ സംസാര മദ്ധ്യേ ഞാനവന് ഒരു ഐഡിയ പറഞ്ഞു കൊടുത്തു. എന്റെയും അവനെയും കൂട്ടുകാര് എല്ലാവരും ഒന്ന് തന്നെ .. പഠിച്ചിരുന്ന കാലത്തും ഇപ്പോഴും.. പരസ്പരം എല്ലാവർക്കും അറിയുകയും ചെയ്യാം. അതു കൊണ്ട് അതിൽ കെട്ടാത്ത ഏതെങ്കിലും ഒരെണ്ണമുണ്ടെങ്കിൽ നോക്ക്.. നമുക്ക് ശരിയാക്കാം.. നാളും പക്കമൊന്നും നോക്കണ്ട.. ഞാൻ നിന്റെ കൂടെ നിന്നോളാം എന്ന് പറയുകയും ചെയ്തു.. എന്തായാലും ഇതൊക്കെ കേട്ട് അവൻ പോയി.
മൂന്നാലു ദിവസമായിട്ടും ആളെ കാണാനില്ല.. ഫോൺ വിളിയില്ല . മെസേജില്ല.. ഇനി പെണ്ണു കിട്ടാതെ, പറഞ്ഞ പോലെ അവൻ സന്യസിക്കാൻ പോയെന്ന് ഞാൻ വിശ്വസിച്ചു. അവന്റെ വീടിന്റെ മുറ്റത്ത് ഒരു ആശ്രമം ഉയർന്ന് വരുന്നതും ,ഞാനുൾപ്പടെ നാട്ടിലുള്ള ഭക്തജനങ്ങൾ അവന്റെ അനുഗ്രഹം വാങ്ങുന്നതുമെല്ലാം ഞാൻ മനസ്സിൽ കണ്ടു ..
അങ്ങനിരിക്കുമ്പോ ദാ പിറ്റേന്ന് അവന്റെ മെസേജ് വന്നൂ..
"ഡീ.. ഒരാളുണ്ട് .. നീയറിയും ആളെ .. നിന്റെയും കൂട്ടുകാരി ആണ്. ഞാൻ ഒന്നും ചോദിച്ചില്ല. നീ വേണം പോയി ചോദിക്കാൻ ."എന്റെ ഐഡിയ ഇത്ര പെട്ടന്ന് വർക്കൗട്ടാകുമെന്ന് ഞാൻ പോലും കരുതിയില്ല.
ആളും പേരുമൊക്കെ പറഞ്ഞപ്പോൾ എനിക്കും സന്തോഷം. അവന്റെ ഫ്രണ്ടാണെങ്കിലും എനിക്കും അറിയാവുന്ന കുട്ടി. ഞാൻ തല്കാലം സഹോദരിയുടെ വേഷം അഴിച്ചു വച്ച് ഒരു മൂന്നാന്റെ വേഷം കെട്ടി ..
പതുക്കെ നമ്മുടെ കുട്ടിയുടെ അടുത്തു ചെന്നു .. ആദ്യം വീട്ടുവിശേഷങ്ങൾ തിരക്കി.. വിശേഷങ്ങൾ അങ്ങോട്ടും ഇങ്ങോട്ടും കൈമാറി.. ആ കൊച്ചും വിദേശത്ത് തന്നെ..അവസാനം കല്യാണ കാര്യം ചോദിച്ചു.. ഇതു വരെ ഒന്നും ആയില്ല. വീട്ടുകാർ ആലോചിക്കുന്നു .. കുട്ടിക്ക് പ്രണയം വല്ലതും.. ഏയ് ഇല്ല ചേച്ചി.. വീട്ടുകാർ പറയുന്ന ആളെ കെട്ടും .. എനിക്കും സന്തോഷമായി..
പിന്നെ ഞാൻ പതുക്കെ വിഷയത്തിലേക്ക് കടന്നു ..
"അതേ കൊച്ചേ എന്റെ സഹോദരന് കൊച്ചിനെ ആലോചിക്കാനാണ് എന്തേലും എതിരഭിപ്രായമുണ്ടോ എന്നറിയണം ".
ഞങ്ങരണ്ടും നല്ല കൂട്ടാന്ന് അറിയുന്ന കൊണ്ട് കൊച്ചിന് സഹോദരനെ പെട്ടന്ന് പിടി കിട്ടി.
"എനിക്ക് ഇഷ്ടക്കുറവ് ഒന്നും ഇല്ല ചേച്ചി. വീട്ടിൽ വന്നു ചോദിക്കാൻ പറയൂ ..വീട്ടുകാർ സമ്മതിച്ചാൽ എനിക്കും സമ്മതമാണെന്ന് പറഞ്ഞു .. എന്തായാലും ഞങ്ങടെ വീട്ടിൽ നിന്ന് ആ കൊച്ചിന്റെ വീട്ടിൽ പോയി കണ്ടു ..ഇഷ്ടമായി .. രണ്ടു പേരും ലീവിന് ചെല്ലുമ്പോൾ കല്യാണം നടത്താമെന്ന് ഉറപ്പിച്ചു ..
അങ്ങനെ അവളെ ഞാൻ അര നാത്തൂനായി അംഗീകരിച്ചു .. അങ്ങനെയിരിക്കെ ഒരു ദിവസം അവൾടെ ഒരു മെസേജ് ദേ ദിങ്ങനെ വന്നൂ..
"ചേച്ചി.. നിങ്ങടെ ആ മാക്കാൻ ആങ്ങളെയെ എനിക്ക് വേണ്ട .. ഞാൻ ഞാൻ കളയാൻ പോകുന്നു. ഛെ വൃത്തികെട്ടവൻ.."
"എന്നതാ കൊച്ചേ" എന്ന് ചോദിക്കാൻ വാ തുറക്കും മുമ്പേ അവള് പോയി.. ഇതിപ്പോ എന്നതാ കാര്യം ഇത്രയും കാലം പെണ്ണ് കെട്ടാതെ സഹിച്ച് ക്ഷമിച്ചിരുന്നവൻ ഇപ്പോ എന്നാ വൃത്തികേടാ അവളെ കാണിച്ചതെന്നറിയാതെ ഞാൻ വിഷമിച്ചു. ഒരു വിധത്തിൽ ഒരു പെണ്ണിനെ തപ്പി കണ്ടു പിടിച്ചു വന്നപ്പോ ദാണ്ടേ പടിക്കൽ കൊണ്ട് അവൻ കലമിട്ടുsച്ചു .
വന്ന ദേഷ്യം അടക്കിപ്പിടിച്ച് നേരെ അവന് മെസേജ് അയച്ചു ..
ഡാ!!! മാക്കാനേ..
അവള് വിളിച്ച വിളി ഞാനും വിളിച്ചു ..
"മാക്കാൻ നിന്റെ ....... " അവന്റെ മറുപടിയിൽ നാട്ടിൽ കിടക്കുന്ന എന്റെ കെട്ടിയോൻ ആഞ്ഞു തുമ്മി ..
" നീ ആ കൊച്ചിനോട് എന്ത് വൃത്തികേടാ പറഞ്ഞത്?
ങേ !!! ഞാനോ? അവൻ ഞെട്ടി..
"ങ്ങാ.. അവള് പറഞ്ഞല്ലോ .. നീയേതാണ്ട് വൃത്തികേട് പറഞ്ഞെന്ന് .. ഇതും പറഞ്ഞ് ഞാനാ മെസേജ് അവന് അയച്ചു കൊടുത്തു.
"എടീ.. നിനക്കൊരു സത്യം അറിയാവോ.. അവള് കുളിക്കൂല്ലടീ.. വല്ലപ്പോഴും ആണ് കുളിക്കുന്നതെന്ന് .. ഇന്ന് കുളിച്ചിട്ട് വന്നിട്ട് എന്നെ വിളിച്ചാൽ മതിയെന്ന് ഞാൻ പറഞ്ഞു.. അതിന് പിണങ്ങി പോയതാണ്."
കുളിക്കാൻ പറഞ്ഞതിനാണ് കുളിക്കാത്ത വൃത്തിയുള്ളവൾ അവനെ വൃത്തികെട്ടവൻ എന്ന് വിളിച്ച് എന്നെ തെറ്റിദ്ധരിപ്പിച്ചത് .എനിക്ക് ചിരിക്കണോ കരയണോ എന്നറിയാത്ത അവസ്ഥയായി..
ഇതിപ്പോ ജാതകമൊന്നും നോക്കാതെ ഒരു പെണ്ണി കണ്ടു പിടിച്ചപ്പോൾ കിട്ടിയത് ഇങ്ങനൊരെണ്ണം.. പിന്നെ അവളെ ന്യായീകരിക്കാൻ എന്നോണം "ഓ പിന്നെ നീയെന്നു മുതലാ കുളിക്കാൻ തുടങ്ങിയത് ഒന്ന് പോടാ "ന്ന് പറഞ്ഞിട്ട് ഞാൻ മെല്ലെ മുങ്ങി ..
അവൾ പറഞ്ഞതും ശരിയാവും.. ഇവിടെയാന്നെങ്കിൽ നമ്മുടെ നാട്ടിലെ പോലെ നല്ല വെള്ളമില്ല. ഈ വെള്ളത്തിൽ കുളിച്ചാൽ മുടിയൊക്കെ മുഴുവൻ കൊഴിഞ്ഞ് കയ്യിരിക്കുകയും ചെയ്യും. കൂടുതലും പ്രവാസികളൊക്കെ മുട്ടത്തലയൻമാരയതിന് കാരണവും ഇതൊക്കെ തന്നെ ആയിരിക്കും.. (തലയിൽ തപ്പണ്ട.. ഉള്ളതാ) നല്ല തലമുടിയുള്ളവരൊക്കെ ചിലപ്പോ കുളിക്കാത്തവരും ആയിരിക്കാം...
ഇവിടെ പെർഫ്യൂമൊക്കെ വളരെ ചീപ്പായത് കൊണ്ട് ഒരാഴ്ച്ച വരെ കുളിക്കാതെ അഡ്ജസ്റ്റ് ചെയ്യാം.. ( പിന്നെ നിങ്ങൾ വിശ്വസിച്ചാലും ഇല്ലെങ്കിലും ഞാൻ എന്നും കുളിക്കൂട്ടാ.. നല്ല തലമുടിയും ഉണ്ട്..)
അവളുടെ കാരണവും ഇതൊക്കെ തന്നെ.. വിദേശത്ത് വരുമ്പോ കെട്ടിയാലും ഒതുങ്ങാത്ത അവളുടെ മുടി ഇപ്പോ പൂച്ച വാല് പോലെയായത്രേ.. അതോണ്ട് തല കഴുകുന്നത് മൂന്നാല് ദിവസം കൂടുമ്പോൾ മാത്രം.. മേല് എന്നും കഴുകുമെന്നും .. കാണാത്ത കൊണ്ട് ഇതൊക്കെ എനിക്ക് വിശ്വസിക്കുകയേ തരമുണ്ടായിരുന്നുള്ളൂ..
എന്നാലും ഞാനവളെ ഉപദേശിച്ചു. അവൾ കുളിക്കാത്തതാണല്ലോ അവന് പ്രശ്നം.. കെട്ടും മുമ്പേ കലഹം തുടങ്ങണ്ട.. നമ്മുടെ ചങ്ക് ബ്രോക്ക് പണ്ട് വെള്ളം കണ്ടാൽ ചൊറിയുമായിരുന്നെന്നും .. അവസാനം ദിവസങ്ങളോളം കുളിക്കാതിരുന്ന അവനെ ചേച്ചിമാരെല്ലാം കൂടി കൈയിലും കാലിലും തൂക്കിയെടുത്ത് തോട്ടിലിട്ടതും ,തോട്ടിൽ വീണ് പേടിച്ച പേരും പറഞ്ഞ് അവൻ ഒരു മാസം കുളിക്കാതിരുന്ന കാര്യം കൂടി പറഞ്ഞാൽ അവളാ സെക്കന്റിന് അവനെ ഇട്ടേച്ച് പോകുന്നറിമെന്നതുകൊണ്ടും ഞാനിങ്ങനെ പറഞ്ഞു ..
"കൊച്ചേ നമ്മടെ ഗാന്ധിജി എന്താ പറഞ്ഞിരിക്കുന്നത് നിരുപദ്രവകരമായ കള്ളങ്ങൾ പറയാം എന്നല്ലേ.. ( ഇതൊക്കെ എപ്പോ പറഞ്ഞു എന്ന് ചോദിക്കരുത്. എന്നോ ആരാണ്ട് പറഞ്ഞതാ) അതുകൊണ്ട് അവൻ വിളിക്കുമ്പോ ചോദിച്ചാ നീ കുളിച്ചൂ എന്നങ്ങ് പറഞ്ഞേക്കണം.. "
"പിന്നെ എന്റെ കൊച്ചേ..ഈ കുളി എന്ന പറയുന്ന സംഭവത്തിന് ദാമ്പത്യ ജീവിതത്തിൽ വല്യ പ്രാധാന്യമുണ്ട്.. അതൊന്നും പറഞ്ഞാൽ നിനക്കിപ്പോ മനസ്സിലാവില്ല. അതോണ്ട് ഇപ്പോഴേ കുളിച്ച് ശീലിക്കുന്നത് നല്ലതാണ് ട്ടോ " എന്നൊരു ഒരു ഫ്രീ ഉപദേശവും കൊടുത്തു...
അപ്പോ അവള് ലങ്ങേരുടെ പെങ്ങളായി.. ശ്വൊ ആ പേരും മറന്നല്ലോ.. ആ ഹരിശ്ചന്ദ്രന്റെ പെങ്ങളായി..
"അതെങ്ങനാ ചേച്ചി ഇഷ്ടമുള്ളവരോട് കള്ളം പറയുന്നത് .. എനിക്കങ്ങനെ പറ്റൂല്ല."
എന്ന് .. എന്നാപ്പിന്നെ നിങ്ങളായി നിങ്ങളുടെ പാടായി എന്നും ഞാനും പറഞ്ഞു..
രണ്ടീസം കഴിഞ്ഞ് ഞാനവളെ വിളിച്ചു.. ഫോണെടുത്തപ്പോഴേ അവൾ പറഞ്ഞു .. "ചേച്ചീ ഭയങ്കര തണുപ്പ് .. കൈയിലെ രോമങ്ങളൊക്കെ തണുത്തിട്ട് എഴുന്നേറ്റ് നിൽക്കുന്നു .. ഞാൻ ബ്ലാങ്കറ്റിന്റെ അടിയിലാണ് .. എനിക്ക് തണുപ്പ് സഹിക്കാൻ വയ്യ.. "
ദൈവമേ പനി .. പാവം.. ഒറ്റയ്ക്കാണ്.. കൊച്ചേ നീ പെട്ടന്ന് പോയി ഡോക്ടറെ കാണ്.. പനിയും വച്ച് ഡ്യൂട്ടിക്ക് പോകരുത്.. വൈറൽ പനിയാകും സൂക്ഷിക്കണം .. ഞാൻ നാത്തൂന്റെ കരുതലോടെ പറഞ്ഞൂ..
അന്നേരം എന്റെ അരനാത്തൂൻ പറയുവാ.. "പനിയൊന്നും അല്ല ചേച്ചി.. മിനിയാന്നും ഞാൻ കുളിച്ചപ്പോ ഭയങ്കര തണുപ്പ് ..എന്റെ പല്ലുകൾ തമ്മിൽ കിടുകിടുകിടാന്ന് കൂട്ടിയടിച്ചു.. അതുകൊണ്ട് ഞാൻ ഇന്ന് കുളിക്കുന്നില്ല "
ഈശ്വരൻമാരേ!!!! പല കേസിനും മുൻകൂർ ജാമ്യം എടുക്കുന്നത് ഞാൻ കണ്ടിട്ടുണ്ട് .. പക്ഷെ കുളിക്കാതിരിക്കാൻ മുൻകൂർ ജാമ്യം എടുക്കുന്ന ഒരാളെ ഞാൻ ആദ്യമായി കാണുകയായിരുന്നു .. ഇതിലും ഭേദം അന്നവൻ സന്യസിക്കാൻ പോകാൻ തുടങ്ങിയപ്പോ സമ്മതിച്ചാൽ മതിയാരുന്നെന്ന് ഞാൻ ഓർത്തു പോയി ..
ഫോണിൽ കൂടി തലയിൽ വെള്ളം കോരിയൊഴിക്കാൻ വല്ല സംവിധാനവും ഉണ്ടായിരുന്നെങ്കിൽ അപ്പോൾ അതും ഞാൻ ചെയ്തേന്നെ..
എന്തായാലും കുറച്ച് കഴിഞ്ഞപ്പോൾ എന്നെ ഞെട്ടിച്ച് കൊണ്ട് അവൾടെ ഒരു ഫോട്ടോ വന്നൂ..
പല്ലൊക്കെ കടിച്ച് പിടിച്ച്, രൂക്ഷമായി നോക്കിക്കൊണ്ട് , മുടിയൊക്കെ അഴിച്ചിട്ട് ഒരു മാതിരി ഭദ്രകാളി ലുക്കിൽ .. ആ മുടിയിൽ നിന്ന് ഇറ്റു വീഴുന്ന വെള്ളം എന്റെ ഫോണിന്റെ ഡിസ്പ്ലേയിൽ വീഴുമോ എന്ന് ഞാൻ ഒരു നിമിഷം ശങ്കിച്ചു (ഫോട്ടോ ഇടാൻ നിവൃത്തിയില്ല .. അല്ലെങ്കിൽ ഞാനതും കാണിച്ചേനെ) എന്നിട്ട് അതിന്റെ താഴെയായി ദേ ഈ സ്മൈലിയോടു കൂടി ഒരു മെസ്സേജും... ഫോട്ടോയിലും അവൾടെ മുഖം ഏതാണ്ട് ഇതുപോലാ ഇരുന്നത് ..
"കുളിച്ചു😏😏😏😏😏 "
കുറച്ച് മുമ്പ് കുളിക്കാതിരിക്കാൻ മുൻകൂർ ജാമ്യവും എടുത്ത് പോയവൾ ഇപ്പോ കുളിച്ച് കലിച്ച് വരാൻ ലവൻ എന്തു സൂത്രമാണ് ഉപയോഗിച്ചതെന്ന് എനിക്ക് എത്ര ആലോചിച്ചിട്ടും പിടികിട്ടിയില്ല. എന്തായാലും വേണ്ടിയില്ല.. അവളിത് തുടർന്നാൽ മതിയാർന്ന്.. അല്ലെങ്കിൽ ചിലപ്പോ കല്യാണത്തലേന്നാണ് അവൾ നാട്ടിൽ വരുന്നതെങ്കിൽ രണ്ടീസം മുമ്പ് ഞാൻ കുളിച്ചതാണെന്നും പറഞ്ഞ് അവൾ അന്നും ചിലപ്പോ കുളിക്കാതിരിക്കും...
പിന്നെ ഈ പറഞ്ഞതൊക്കെ നിങ്ങൾ ഇനി ആരോടും പറയാൻ നിൽക്കണ്ട.. കല്യാണം കഴിയുമ്പോൾ ആ കുളിക്കാത്തവൾ "നാത്തൂൻ പോര് "എന്ന സുകുമാര കല ചിലപ്പോ എനിക്ക് നേരെ പുറത്തെടുക്കും.. ഞാനും ജിവിച്ചു പൊയ്ക്കോട്ടെ .. ഭാവിനാത്തൂനെ ഒരു കുറ്റവും പറയാത്ത ഒരു പാവം നാത്തൂൻ..

#പെങ്ങൾ

ഞാൻ പണ്ട് ഡിഗ്രിക്ക് പിഠിക്കണ കാലം. എന്റെ ചേച്ചിക്ക് ഒരു പി എസ് സി പരീക്ഷ .. സ്ഥലം ദൂരെ ആയതു കൊണ്ട് ഒരു ശനിയാഴ്ച ദിവസം പരീക്ഷയ്ക്ക് പോവാൻ കൂട്ടിന് എന്നെ വിളിച്ചു. നമ്മടെ സ്വന്തം ജില്ലേടെ അപ്രത്തെ ജില്ലയിലാരുന്നു പരീക്ഷ ..ഞാനും ചേച്ചിയും കൂടി അണിഞ്ഞൊരുങ്ങി രാവിലെ അപ്രത്തെ ജില്ലയിലേക്ക് ബസ്സ് പിടിച്ചു..
കേട്ടുകേൾവി പോലുമില്ലാത്ത സ്ഥലം ബസിറങ്ങി അടുത്തുള്ള കടയിൽ കയറി സ്കൂൾ എവിടാന്ന് ചോദിച്ച് കണ്ടു പിടിച്ചു അന്നീ മൊബൈൽ ഫോൺ ഒന്നൂല്ലാത്ത കൊണ്ട് നമ്മുടെ നാക്ക് തന്നെ ശരണം.. അല്ലെങ്കി തന്നെ നമ്മടെ ഈ നാക്ക് ഇല്ലാരുന്നേൽ ഞാനെന്നാ ചെയ്യുമെന്ന് ഞാൻ പല തവണ അലോചിച്ചിട്ടുണ്ട് .. ഇല്ലേ പണ്ടേ ..... (അല്ലേ വേണ്ട )
അങ്ങനെ നടന്ന് നടന്ന് ഞങ്ങ രണ്ടും സ്കൂളിലെത്തി.. ചേച്ചി പരീക്ഷാ റൂമ് തപ്പി കണ്ടു പിടിച്ച് അവിടെ കയറി ഇരുന്നു.ഞാൻ സ്കൂളിന്റെ വരാന്തയിൽ പോയി കുത്തിയിരുന്നു .. എന്നെപ്പോലെ തന്നെ പരീക്ഷ എഴുതാൻ വന്നോർക്ക് കൂട്ടു വന്ന ഒത്തിരി പേർ അവിടെയുണ്ട്. കുറച്ച് നേരം ഇരുന്നപ്പോൾ എനിക്ക് വെള്ളം കുടിക്കാൻ തോന്നി.. കൈയിൽ വെള്ളം കൊണ്ടുവന്നിട്ടുമില്ല.. കടയിൽ പോകാനാണെങ്കിൽ പരിചയമില്ലാത്ത സ്ഥലം.. അപ്പോഴാണ് അടുത്തിരിക്കുന്ന ഒരു ചേട്ടനെ കണ്ടത്. കുടിക്കാൻ ശകലം വെള്ളമല്ലേ ചോദിച്ച് കളയാം. ഞാൻ ചെന്ന് കാര്യം പറഞ്ഞു. .ഭാഗ്യത്തിന് ആ ചേട്ടന്റെ വണ്ടിയിൽ വെള്ളമുണ്ടായിരുന്നു എനിക്ക് കൊണ്ടുവന്ന് തന്നു.. ഞാൻ അത് വാങ്ങി നന്ദി പറഞ്ഞു..
ഒരു സാമാന്യ മര്യാദക്ക് ഞാൻ വെള്ളം തന്ന ചേട്ടനെ പരിചയപ്പെട്ടു.ആ നാട്ടുകാരൻ തന്നെ. എന്നെ പോലെ തന്നെ ആർക്കാണ്ടും കൂട്ടു വന്നതാണ് കക്ഷി.. ജോലി ചോദിച്ചപ്പോൾ പറഞ്ഞത് കേട്ട് ഞാൻ ഞെട്ടി..ആള് പോലീസുകാരനാണ്.. തോളത്തെ നക്ഷത്രത്തിന്റെ കണക്കും പറഞ്ഞു. ഞാൻ പോലീസ് കാരെയൊക്കെ വഴിയിൽ വച്ച് കണ്ടിട്ടേയുള്ളൂ.. ഇത്ര അടുത്ത് കാണുന്നത് ആദ്യവും .. ഞെട്ടിയതിന് കാരണം മറ്റൊന്നാണ്..
"കുട്ടിയാനയെ പോലെ കുടവയറും, ഉണ്ടക്കണ്ണും ,മൂരാച്ചി ലുക്കും ,കൊതുമ്പു വള്ളം പോലെ മൂക്കിന് താഴെ ഒട്ടിച്ച് വച്ച പോലെ കൊമ്പൻ മീശയും ഒന്നുമല്ലായിരുന്നു "ഈ കക്ഷിക്ക് ..
ഇതൊരു സുന്ദരൻ സുമുഖൻ സുശീലൻ .. ഇന്നത്തെ പിള്ളേരുടെ ഭാഷയിൽ പറഞ്ഞാൽ ഒരു ഫ്രീക്കൻ പോലീസുകാരൻ ..
ഒരു പോലീസുകാരനെ അടുത്ത് കണ്ടപ്പോ എനിക്ക് ഒരു ആഗ്രഹം.ഭരത് ചന്ദ്രൻ ഐ പി എസും ,സേതുരാമയ്യർ സി ബി ഐ യും ഒക്കെ നുമ്മ ആരാധിക്കുന്ന കാലം.. നമ്മടെ സങ്കൽപ്പത്തിലെ പോലീസ് അതാണ് .. ഞാനീ പോലീസ് ചേട്ടനോട് ചോദിച്ചു..
"ഇങ്ങടെ രൂപം കണ്ടിട്ട് ഒരു പോലീസിന്റെ ലുക്കില്ല. എന്നാലും വിശ്വസിച്ച് ..നിങ്ങ ഈ കേസൊക്കെ തെളിയിച്ചിട്ടൊണ്ടാ.. ഈ കൊലപാതകം ,മോഷണം, പീഢനം ഇതൊക്കെ ..
ആ ഉണ്ട് ഇഷ്ടം പോലെ .. ചേട്ടൻ പറഞ്ഞു:
"എന്നാ കേസ് തെളിയിച്ച ഒരു കഥ പറയാവോ? ഞാനിതൊക്കെ സിനിമേല് മാത്രമേ കണ്ടിട്ടുള്ളൂ ..ഞാൻ ചോദിച്ചു ..
ചേട്ടൻ ചിരിച്ചിട്ടു പറഞ്ഞു ആ പറയാം..
ഞാൻ ഒരു നിമിഷം നമ്മുടെ ആരാധന കഥാപാത്രങ്ങളായ ഭരത് ചന്ദ്രനെയും സേതുരാമയ്യരെയും ഒന്നോർത്ത് മുഖത്ത് പുച്ഛം വാരി വിതറി.. "നിങ്ങളൊക്കെ എന്ത് വെറും ഡൂപ്ലിക്കേറ്റ് പോലീസ്.ദേ ദിത് ഒറിജിനൽ കാണ് "എന്നായിരുന്നു ആ ഭാവം.
അങ്ങനെ ഞാൻ കഥ കേൾക്കാൻ കണ്ണും കാതും കൂർപ്പിച്ചിരുന്നു..
പോലീസ് ചേട്ടൻ കഥ പറഞ്ഞ് തുടങ്ങി ..
ലോനപ്പൻ ചേട്ടനും അന്നക്കുട്ടിയും മാതൃകാ ദമ്പതികൾ .. കല്യാണം കഴിഞ്ഞ് വർഷങ്ങളായിട്ടും കൊച്ചുങ്ങളുണ്ടായില്ല.. രണ്ടു പേരും ലോകത്തുള്ള ആശുപത്രി മുഴുവൻ കേറിയിറങ്ങി.. സകലമാന പള്ളികളിലും മെഴുക് തിരി കത്തിച്ചു.. ആരാണ്ടൊക്കെ പറഞ്ഞത് കേട്ട് ഉരുളി വരെ കമഴ്ത്തി.. എന്നിട്ടും ഒരു ഫലവുമുണ്ടായില്ല. കൊച്ച് നഹീ..
അങ്ങനെ പാവം അന്നക്കുട്ടി നേരമ്പോക്കിനായി ആടു വളർത്തലും ജ്വാലയായ് സീരിയലും ഒക്കെ കണ്ട് സമയം തള്ളി നീക്കി.. ലോനപ്പൻ ചേട്ടനാട്ടെ ജോലിയും കഴിഞ്ഞ് കൂട്ടുകാരോട് കവലയിൽ വർത്തമാനമൊക്കെ കഴിഞ്ഞ് പതുക്കെ വരവായി .. ഇതിനിടെ കൊച്ചുങ്ങളില്ലാത്തതിന്റെ ദു:ഖം കൊണ്ടാണോ ലോനപ്പൻ ചേട്ടൻ ചെറിയ രീതിയിൽ മദ്യപാനം തുടങ്ങി.
ജോലിയും കഴിഞ്ഞ് രണ്ടെണ്ണം വീശിയിട്ട് വരുന്ന ലോനപ്പൻ ചേട്ടൻ അടുത്ത് വന്നപ്പോൾ അന്നക്കുട്ടിക്ക് എതാണ്ട് ചീഞ്ഞ മണമടിച്ചു. അതു വരെ മദ്യത്തിന്റെ മണമറിയാത്ത അന്നക്കുട്ടി കാര്യം മനസ്സിലാകാതെ ചീഞ്ഞ മണത്തിന്റെ ഉറവിടമായാതെ വീടിന്റെ അകം ഒന്നൂടെ അടിച്ചു കഴുകി വൃത്തിയാക്കി.. പക്ഷെ ഊണും കഴിഞ്ഞ് ഉറങ്ങാൻ ചെന്നതോതെ മുറിക്കകത്തൂന്നല്ല സ്വന്തം കെട്ട്യോന്റെ വായ്ക്കകത്തൂന്നാണ് നാറ്റം എന്ന് അന്നക്കുട്ടി മനസിലായി. അന്നക്കുട്ടി മദമിളകിയ ആനക്കുട്ടിയായി .. ഇനി കുടിച്ചിട്ട് വന്നാൽ പെട്ടിയും കിടക്കയും എടുത്ത് താൻ വീട്ടിൽ പോകും എന്ന് അന്നക്കുട്ടി ഭീഷണിപ്പെടുത്തി.. അന്നത്തെ ദിവസം ലോനപ്പൻ കുടിക്കില്ലാ എന്ന് പറഞ്ഞ് അന്നക്കുട്ടിയെ സമാധാനിപ്പിച്ചു ..
പക്ഷെ പിറ്റേന്നും കൂട്ടുകാരെയും കുപ്പിയും കണ്ടപ്പോൾ ലോനപ്പൻ അന്നക്കുട്ടിയെ മറന്നു.. രണ്ടിന് പകരം നാലെണ്ണം വീശി .. നാലു കാലിൽ വീട്ടിലെത്തി .. വീടിന്റെ മുറ്റത്ത് നിന്ന് ഉറുമി പോലെ നിന്ന് വളയുന്ന ലോനപ്പന്റെ മുന്നിൽ അന്നക്കുട്ടി ഉണ്ണിയാർച്ചയായി .. ഒന്നും രണ്ടും പറഞ്ഞ് വഴക്കായി.. അവസാനം കള്ളും പുറത്ത് ലോനപ്പനും കട്ടിലിന് പുറത്ത് അന്നക്കുട്ടിയും കിടന്നുറങ്ങി..
ഓരോ ദിവസം ചെല്ലുന്തോറും ലോനപ്പന്റെ കുടി കൂടി .. അന്നക്കുട്ടിയുടെ മുഖത്തിന്റെ വീർപ്പും കൂടി .. അങ്ങനെ അവസാന ആയുധം അന്നക്കുട്ടി പുറത്തെടുത്തു .. കിടപ്പുമുറി തിരസ്കരണം .. അന്നക്കുട്ടി അകത്ത് മുറിയിലും ലോനപ്പൻ തിണ്ണയിലും .. പക്ഷെ അന്നക്കുട്ടിയുടെ കണക്കുകൂട്ടലുകൾ പാടേ തെറ്റി.. വാതിലിന്റെ വിജാഗിരിക്ക് വിചാരിച്ചത്ര ഉറപ്പുണ്ടായിരുന്നില്ല. ലോനപ്പൻ വാതിൽ ചവിട്ടി പൊളിച്ചു.. അന്നക്കുട്ടിയുടെ പുറവും ലോനപ്പന്റെ കൈയും ചേർന്നമർന്നപ്പോൾ അന്നക്കുട്ടിയുടെ നാക്ക് ഇങ്ങനെ വിളിച്ചു പറഞ്ഞു. "അയ്യോ നാട്ടുകാരേ ഓടിവായോ ഇതിയാനനെന്നെ തല്ലിക്കൊല്ലുന്നേ" എന്ന് ..
അവസാനം ഇടിയായി.. ബഹളമായി..അത് അയൽവക്കക്കാർക്ക് ശല്യമായി .. അവസാനം ഗത്യന്തരമില്ലാതെ അന്നക്കുട്ടി പോലീസിൽ പരാതി പറഞ്ഞു. അങ്ങനെ നമ്മടെ കഥായകന്റെ അടുത്ത് ലോനപ്പനും അന്നക്കുട്ടിയും എത്തി..
ലോനപ്പൻ പോലീസിനെ കണ്ട് തൊഴുത് നിന്നു.. അന്നക്കുട്ടി പരാതിയുടെ ഭാണ്ഡക്കെട്ട് അഴിച്ച് നിവർത്തി വച്ചു.. "എന്തും സഹിക്കാം സാറേ ഈ കുടിക്കുന്ന സാധനത്തിന്റെ മണം എനിക്ക് തീരെ പിടിക്കുന്നില്ല .. "
പോലീസ് ഏമാൻ അന്നക്കുട്ടി കാൺകെ ലോനപ്പന്റ നേരെ രണ്ടു ചാട്ടം ചാടി.. എന്നിട്ട് ഒന്ന് രഹസ്യമായി ഉപദേശിച്ചു.. ഡേയ് ഇനി വീശുമ്പോൾ മണമില്ലാത്തത് മതി .. പിന്നെ കുടിച്ചിട്ട് വരാതെ വീട്ടിൽ വാങ്ങി വച്ച് വൈകിട്ട് രണ്ടെണ്ണം വീശണം"
മാതൃകാ പോലീസുകാരനിൽ നിന്ന് മാതൃകാ പരമായ ഉപദേശവും സ്വീകരിച്ച് മാതൃകാ ദമ്പതികൾ വീട്ടിലെത്തി..
പോലീസ് ഏമാന്റെ ഉപദേശ പ്രകാരം മണമില്ലാത്ത ഒരു കുപ്പി മദ്യം വാങ്ങി ലോനപ്പൻ ചേട്ടൻ വീടിനുത്ത് തന്നെയുള്ള ഒരു മരത്തിന്റെ പൊത്തിൽ ഒളിച്ചു വച്ചു. .രാത്രി ഊണൊക്കെ കഴിഞ്ഞ് ഒന്നിന് പോകാനെന്ന വ്യാജേന മുറ്റത്തിറങ്ങി മരത്തിനടുത്ത് പോയി രണ്ടെണം വീശിയിട്ട് വരും..
ഇതൊന്നും തിരിച്ചറിയാതെ അന്നക്കുട്ടി അടച്ച വാതിൽ പിന്നെയും മലർക്കെ തുറന്നു. പൂമുഖ വാതിൽക്കൽ സ്നേഹം വിടർത്തുന്ന ഭാര്യയായി..
അങ്ങനെ ഒരു രാത്രി ലോനപ്പൻ പതിവുപോലെ മരത്തിന്റെ ചാഞ്ഞ കൊമ്പിൽ കയറി പതിവ് മദ്യസേവ കഴിഞ്ഞ് താഴോട്ട് ഇറങ്ങിയതും, എങ്ങാണ്ടൂന്നും കറങ്ങിത്തിരിഞ്ഞ് ,ക്ഷീണം തീർക്കാൻ ലോനപ്പൻ മരത്തിന് മുകളിലുണ്ടെന്നറിയാതെ ഒരു പട്ടി താഴെ കിടപ്പുണ്ടായിരുന്നു. ലോനപ്പൻ ചാടിയിറങ്ങിയത് പട്ടിയുടെ ദേഹത്ത് .. പട്ടി അന്നക്കുട്ടിയെ പോലെ അല്ലാരുന്നു. അതിന് വേദനിച്ചപ്പോ കിട്ടിയ ചവിട്ടിന് പകരം പട്ടി നല്ലൊരു കടി തിരിച്ചു കൊടുത്തു. തിരിച്ച് കടിക്കാൻ നിർവാഹമില്ലാത്തോണ്ട് ലോനപ്പൻ ചേട്ടൻ അലറി വിളിച്ചു.. അന്നക്കുട്ടിയും അയൽവക്കക്കാരും ഒച്ച കേട്ട് ഓടി വന്നു..
ലോനപ്പൻ ചേട്ടന്റെ ഒളി മദ്യസേവ തൊണ്ടി സഹിതം അന്നക്കുട്ടിയും നാട്ടുകാരും ചേർന്ന് കണ്ടു പിടിച്ചു. ഇത്തവണ അന്നക്കുട്ടി ഭദ്രകാളിയായി ഉറഞ്ഞ് തുള്ളി.. പിന്നെയും വഴക്ക് ബഹളം ..ലോനപ്പന് പേവിഷ ബാധയ്ക്കുള്ള കുത്തി വയ്പ് എടുക്കുമ്പോൾ പട്ടി കടിക്കാതെ തന്നെ അന്നക്കുട്ടിക്ക് പേയിളകി.. അതും വെള്ളം കാണുമ്പോഴല്ല.. ലോനപ്പനെ കാണുമ്പോൾ .. അങ്ങനെ വീണ്ടും പരാതിയുമായി പോലീസ് ഏമാന്റെ മുൻപിൽ ..
രണ്ടു പേരെയും ഉപദേശിച്ചു. ഇനി കുടിച്ച് വഴക്കുണ്ടാക്കിയാൽ കുടിച്ച് കൂമ്പു വാടാതെ തന്നെ നിന്നെ ഇടിച്ചു കൂമ്പുവാട്ടുമെന്ന് പോലീസ് ഏമാൻ സൈസായിട്ട് ലോനപ്പനെ ഭീഷണിപ്പെടുത്തി... ലോനപ്പൻ തല കുലുക്കി സമ്മതിച്ചു..
എന്നിട്ട് അന്നക്കുട്ടിയെ ഒന്ന് നന്നാക്കാൻ "ലോനപ്പനെ നീ ഡിവോഴ്സ് ചെയ്യ് നിന്നെ ഞാൻ കെട്ടിക്കോളാം" എന്ന് പോലീസ് ഏമാൻ രഹസ്യമായി പറഞ്ഞു.. സിൽമാ നടനെ പോലെ ആണെങ്കിലും പോലീസിന്റെ ഇടിക്ക് ഒരു മയവും കാണില്ല എന്നറിയാവുന്നതു കൊണ്ടും, തന്നെയുമല്ല ലോനപ്പനെ അടക്കി നിർത്തുന്നതുപോലെ, വെടിയുണ്ട പറന്ന് വന്നാൽ തന്റെ നാക്ക് കൊണ്ട് തടുക്കാൻ പറ്റില്ല എന്ന കാരണം കൊണ്ടും ,പോലീസ് ഏമാന്റ ഓഫർ സ്വീകരിക്കാതെ ലോനപ്പനെയും വിളിച്ച് അന്നക്കുട്ടി സ്ഥലം വിട്ടു. പിന്നെ രണ്ടു പേരെയും ആ ഏരിയയിൽ കണ്ടിട്ടില്ല ..
ഇത്രയും കഥ പറഞ്ഞ് ചേട്ടൻ നിർത്തി...
കുടിച്ച് മദോന്മത്തനായി വന്ന് ഉപദ്രവിക്കുന്ന ആമ്പ്രന്നോനെ പെമ്പ്രന്നോത്തി തല്ലിക്കൊന്ന് കുഴിച്ചിട്ടപ്പോ, പോലീസ് നായ വന്ന് മണത്ത് കണ്ടുപിടിച്ച് ,കേസ് തെളിയിക്കുന്ന കഥ കേൾക്കാനിരുന്ന ഞാൻ ...
പെട്ടന്ന് ഞാൻ കണ്ടു.. ഞാനേ കണ്ടുള്ളൂ.. നമ്മുടെ ഐപിഎസും ,സിബിഐയും ഒരു മിന്നായം പോലെ വന്ന് എന്നെ കൊഞ്ഞനം കുത്തി കാണിക്കുന്നു ...
ഈ കഥ കേട്ട് അന്തം വിട്ട് കിളി പോയ എന്നെ നോക്കി പോലീസ് ചേട്ടൻ ചോദിച്ചു.
എങ്ങനെ കൊച്ചേ നല്ല കഥയാണോ?
അപ്പോൾ ഞാൻ ചോദിച്ചു..
"ഇതെന്തോന്ന് ചേട്ടാ.. ഇതൊരു പെറ്റി കേസല്ലേ? ഇതിൽ കൊലപാതകം എവിടെ? കത്തിക്കുത്ത് എവിടെ? മോഷണം എവിടെ? "
അപ്പോ അങ്ങേര് ചോദിക്കുവാ. നീയെത്രയിലാ പഠിക്കുന്നത്?.
ഞാൻ പറഞ്ഞു .. "ഡിഗ്രി സെക്കന്റിയറിന്..
നിന്റെ പേരെന്നതാ കൊച്ചേ..
ചിത്രദീപ..
എന്നിട്ട് എന്നെ നോക്കി നമ്മടെ മമ്മൂട്ടിയെ പോലിരിക്കുന്ന പോലീസുകാരൻ സുരേഷ് ഗോപിയുടെ ഭാവത്തിൽ മോഹൻലാലിന്റെ മാസ് ഡയലോഗും തട്ടി വിട്ടു..
"ചിത്രദീപേ.. നീ കുട്ടിയാണ് ..വെറും കുട്ടി. നിനക്ക് ഇതുപോലുള്ള പെറ്റി കേസുകൾ മാത്രമേ പറഞ്ഞിട്ടുള്ളൂ .. അതു കൊണ്ട് വല്യ വല്യ കാര്യങ്ങളൊന്നും അറിയണ്ടാന്ന്.. എന്നാ നീ വിട്ടോ മോളേ ദിനേശീ ന്ന് "
ഇതൊക്കെ കേൾക്കുമ്പഴാ നമ്മക്ക് പേരിട്ടവരെയൊക്കെ ഓടിച്ചിട്ട് തല്ലാൻ തോന്നണത് .. വല്ല "ശശിനിയെന്നോ സോമിനിന്നോ "ഒക്കെ പേരിടണ്ടതിന് പകരം ചിത്ര ദീപ ... അല്ല ഒരു കൊലപാതക കഥ കേൾക്കാൻ ഇരുന്ന നമ്മളാരായി ?? ശശിയുടെ പെങ്ങളായി.
നിങ്ങളോട് ഇനിയൊരു സത്യം പറയാം..ശരിക്കും പറഞ്ഞാൽ ഈ ശശിയൊക്കെ ഉണ്ടായത് എന്റെയൊക്കെ കാലഘട്ടത്തിലാണെന്ന് തോന്നുന്നു..എന്തിന് പറയണ് .. ഈയിടെ തെങ്ങിൽ കെടക്കണ തേങ്ങ മുതൽ വഴിയിൽ നിൽക്കണ പുല്ലു വരെ നമ്മളെ ശശീന്റെ പെങ്ങളാക്കി ..ഇനിയും ഇതുപോലെ ശശിയുടെ പെങ്ങളാവാൻ നുമ്മടെ ജന്മം ബാക്കി.. പക്ഷെ നുമ്മക്ക് അതിന്റെയൊന്നും ഒരഹങ്കാരവും ഇല്ലട്ടാ.. സത്യം ...

#സൂക്കർ ഭായിയും ഞാനും എന്റെ ഐഡിയും #

#സൂക്കർ ഭായിയും ഞാനും എന്റെ ഐഡിയും #
ഞായറാഴ്ച്ച വൈകുന്നേരം ഡ്യൂട്ടി സമയം ഒരു എട്ട് എട്ടര എട്ടേമുക്കാൽ ആയിക്കാണും. രണ്ടാമത്തെ സല (പ്രാർത്ഥന) കഴിഞ്ഞ് ഷോപ്പ് തുറന്നിട്ടും ഞാൻ കിച്ചണിൽ തന്നെ കുത്തിയിരുന്നു..അസ്സി.മാനേജർ മാഡം"ദലാൽ " മുകളിലെ ഓഫീസിൽ എന്തോ വർക്കിലാണ്.. അല്ലെങ്കിൽ ഞാനീ മൊബൈലിൽ തോണ്ടിക്കൊണ്ടിരുന്നാൽ മാഡം എന്നെ തോണ്ടും ..
വൈകിട്ട് ഇട്ട കത്ത് പോസ്റ്റിലെ കമൻറ്സ് ഒക്കെ നോക്കി മറുപടി കൊടുത്തു കൊണ്ടിരുന്നപ്പോഴാണ് നമ്മുടെ മറ്റൊരു സെയിൽസ് ഗേൾ "അമൽ " ( സമയെയും റീമയെയും നിങ്ങൾക്ക് പരിചയം ഉണ്ടല്ലോ. ഇത് അമൽ ഇവുടുത്തെ സെയിൽസ് ഗേൾസിൽ ഏറ്റവും സുന്ദരി .. ശാലീന സുന്ദരി എന്ന് തന്നെ പറയാം .. ഒരു സൗദി പെൺകുട്ടിക്ക് മുട്ടറ്റം വരെ മുടിയുള്ളത് ഞാൻ കാണുന്നത് ആദ്യമായാണ് ) വന്ന് എന്നോട് പറഞ്ഞു.
"ചിത്ര നിന്നെ കാണാൻ ആരോ വന്നിരിക്കുന്നു "
എന്നെ കാണാനോ ?ആരാണ് അമൽ .ഞാൻ ചോദിച്ചു ..
''അറിയില്ല ആൾ വന്നിട്ട് നിന്നെ ചോദിച്ചു. പുറത്ത് സെറ്റിയിൽ ഇരിപ്പുണ്ട്." ഇതും പറഞ്ഞ് അമൽ പോയി ..
ഫോൺ കിച്ചണിൽ വച്ചിട്ട് ഞാൻ ഓടിച്ചെന്ന് CCTV ക്യാമറ ചെക്ക് ചെയ്തു. ശരിയാണ് വാച്ച് സെക്ഷനിലെ സെറ്റിയിൽ ആരോ ഇരുപ്പുണ്ട്. പക്ഷെ മുഖം ശരിക്ക് വ്യക്തമല്ല.. ആരായിരിക്കും എന്നെ കാണാൻ വന്നത്. എന്റെ കുഞ്ഞുകൃഷ്ണാ ഇനി എന്റെ ഫേസ് ബുക്ക് ഫ്രണ്ട് ആരെങ്കിലും .? കഥ എഴുതുമ്പോൾ എല്ലാം വള്ളി പുള്ളി വിടാതെ എഴുതാറുണ്ട്.. ആരേലും കടയും തപ്പി കണ്ടു പിടിച്ച് വന്നതാവുമോ .. ഞാൻ ചിന്തിച്ചു.
കഴിഞ്ഞ ദിവസം ഒരു സെൽഫി പോസ്റ്റു ചെയ്യുകയും ചെയ്തു. ആ കോലം പ്രതീക്ഷിച്ചായിരിക്കും നമ്മുടെ ഫ്രണ്ടിന്റെ വരവ്.. ഫോട്ടോ എഡിറ്റിംങ്ങിന്റെ ഭയാനക വേർഷൻ കണ്ട് മിക്കവാറും ചങ്ങായി ബോധം കെടും.. എന്തായാലും വേണ്ടിയില്ല. ഒരാൾ നമ്മളെ തിരക്കി ആദ്യമായി ഷോപ്പിൽ വന്നതല്ലേ .ചെന്ന് കണ്ട് കളയാം. ഓടിച്ചെന്ന് സമയുടെ മേക്കപ്പ് ബോക്സ് എടുത്ത് മുഖമൊന്ന് മിനുക്കി ലൈറ്റായി ലിപ്സ്റ്റിക്കും തേച്ച് ഒന്നു ഒരുങ്ങി ..
പർദ്ദയുടെ ഷാളൊക്കെ തലയിലിട്ട് ഞാൻ പുറത്തേക്ക് ,എന്നെ കാണാൻ വന്ന ആളുടെ അടുത്തു ചെന്നു.. ആളെ നോക്കിയതും ഞാൻ ഞെട്ടി.. കാരണം ഇങ്ങേരെ ഞാൻ ആലുവാ മണപ്പുറത്ത് കണ്ട പരിചയം പോലും ഇല്ല .. എന്റെ ഫേസ് ബുക്കിലാണെങ്കിൽ ഇങ്ങനൊരു ഫ്രണ്ടുമില്ല.. സുന്ദരൻ സുമുഖൻ.. നല്ല വെളുത്ത് ചുവന്ന് തുടുത്ത പാന്റ്സും കോട്ടും ഒക്കെ ധരിച്ച ഒരു ജന്റിൽമാൻ .. നമ്മടെ ഭാഷയിൽ പറഞ്ഞാൽ ഒരു ചുള്ളൻ..എനിക്ക് സംശയമായി എന്നെ തന്നെ കാണാൻ വന്നതാകുമോ? ആവാൻ വഴിയില്ല.. എന്നാലും ഒന്നു ചോദിച്ചു നോക്കാം.. മെല്ലെ ഞാൻ അടുത്തുചെന്നു.
"ഹലോ എക്സ്ക്യൂസ് മീ .. ആയാം ചിത്രദീപ.".ഞാൻ പറഞ്ഞു..
അയാൾ എന്നെ നോക്കി ചിരിച്ചിട്ട് "ഹായ് ചിത്ര ദീപ ഹൗ ആർ യൂ.". എന്ന് തിരിച്ചും ചോദിച്ചു..
"അയാം ഫൈൻ താങ്ക് യൂ ആൻറ് യൂ " ?എന്ന് ഞാൻ എന്റെ കൈയിലുള്ള അവസാനത്തെ ഇഗ്ലീഷും പറഞ്ഞു...
"ഗുഡ് ..താങ്ക് യൂ " എന്ന് അങ്ങേര് പറഞ്ഞപ്പോഴേക്കും മൂന്നാമത്തെ ചോദ്യം ഇംഗ്ലിഷിൽ ആവും എന്നറിയാവുന്നതുകൊണ്ടും അതിന് ഞാൻ ബബ്ബബ്ബ വയ്ക്കേണ്ടി വരും എന്നറിയാവുന്നതുകൊണ്ടും അടുത്ത ചോദ്യം നല്ല പച്ചമലയാളത്തിൽ ഞാൻ അങ്ങോട്ട് ചോദിച്ചു.
"താങ്കൾ ആരാണ് .എനിക്ക് മനസിലായില്ല .എന്തിനാണ് എന്നെ കാണാൻ വന്നത്.. "
എന്റെ ചേദ്യം കേട്ട് അങ്ങേര് ഒന്നു ചിരിച്ചു.. എന്നിട്ടു പറഞ്ഞു
"ഞാൻ മാർക്ക് സൂക്കർ ബർഗ്ഗ് " നിന്റെ പേരിൽ ഒരു പരാതി കിട്ടി അത് അന്വേഷിക്കാൻ വന്നതാണ് "
കർത്താവേ പണി പാളി.. ഫേസ്ബുക്കിൽ കളിക്കുന്നതിന് കമ്പനിയിൽ വരെ പരാതി ചെന്നിരിക്കുന്നു .. ഇനിപ്പോ ഇത് പുതിയ പ്രൊജക്റ്റ് കൺട്രോളർ എങ്ങാനും ആണോ?
"എന്റെ കൺട്രോളർ സാലേഹ് മിറാസ് ആയിരുന്നല്ലോ.. സാറ് പുതിയ കൺട്രോളർ ആണോ? മാഡം ദലാൽ ആണോ പരാതി പറഞ്ഞത് .. "
ഇതു കേട്ടതും അങ്ങേര് പിന്നേം ചിരിച്ചു..
എന്നിട്ട് പറഞ്ഞു ..
"ചിത്ര.. ഞാൻ നിന്റെ കമ്പിനിയിൽ നിന്ന് ഒന്നുമല്ല. നിന്റെ ഫേസ്ബുക്ക് അക്കൗണ്ടിനെ പറ്റി ഒരു പരാതി കിട്ടി .. നീ ഡ്യൂപ്ലിക്കേറ്റ് ആണെന്ന് .. എന്നാ പിന്നെ നേരിട്ട് അന്വേഷിച്ച് കളയാമെന്ന് കരുതി "
അപ്പോഴാണ് ഞാൻ ആ പേര് ഒന്നുകൂടി റിവൈന്റ് ചെയ്തത്.. "മാർക്ക് സൂക്കർ ബർഗ്.." ഈ ലോകം മുഴുവൻ പടർന്ന് പന്തലിച്ച് കിടക്കുന്ന ഫേസ്ബുക്ക് എന്ന മായിക ലോകത്തിന്റെ സൃഷ്ടാവ് മാർക്ക് സൂക്കർ ബർഗ് ..സൂക്കറണ്ണൻ സൂക്കർ ഭായ് എന്നൊക്കെ കേട്ടിട്ടുള്ളതല്ലാതെ ഈ മൂന്നു പേരും കൂടി ഒന്നിച്ച് ഞാൻ കേൾക്കുന്നത് ആദ്യമായാണ് .. അന്തം വിട്ട് നിൽക്കുന്ന എന്നെ നോക്കി സൂക്കർ ഭായ് പിന്നെയും ചോദിച്ചു..
"ചിത്രാ നീയെന്താ ഒന്നും മിണ്ടാത്തത്. "
"അതെന്ത് ചോദ്യമാ ഭായ്.. ഈ അഞ്ചരയടി (അത്രയൊന്നും ഇല്ല ഒരു പഞ്ചിനാ) പൊക്കത്തിൽ അറുപത് കിലോ തൂക്കത്തിൽ ഉള്ള ഞാൻ നിങ്ങടെ മുന്നിൽ ഇങ്ങനെ വടി പോലെ നിൽക്കുമ്പോ വിശ്വാസം വരുന്നില്ലേ.. പിന്നെ ഇന്നലത്തെ ഫോട്ടോ .. അത് ഫോണിന്റെ ക്യാമറ ചതിച്ചതാ.. അത്രയും കളറ് കൂടിയത് .. ദേ.. ഈ കാണുന്നതാ ... ഒറിജിനൽ .. വേണെങ്കിൽ ഒന്നു നുള്ളി നോക്കിക്കോ " എന്ന് പറഞ്ഞ് ഞാൻ ഞാനെന്റെ കൈ നീട്ടി..
ചിരിച്ചു കൊണ്ട് സൂക്കർ ഭായ് എന്റെ കൈപ്പത്തിയുടെ മുകളിൽ പതുക്കെ ഒന്നു നുള്ളി .. "ങ്ങാ വിശ്വാസമായി. " അത് കേട്ട് ഞാനും ചിരിച്ചു..
"നിന്നെ കണ്ടപ്പോ കാര്യം മനസ്സിലായി ചിത്ര.. എന്നാലും ഒരു പരാതി കിട്ടിയാൽ അന്വേഷിക്കാതിരിക്കാൻ പറ്റുമോ?"
"ഇന്നാളും ഇതു പോലെ പരാതി വന്നിട്ട് ഞാൻ ഫോട്ടോ തന്നപ്പോ ഇങ്ങള് ഒന്നും തിരക്കാതെ ഐ ഡി തിരിച്ച് തന്നല്ലോ.. ഇതിപ്പോ എന്താ."
"എന്റെ ചിത്രേ.. ഒരു പ്രാവശ്യം ചക്ക വീണ് മുയല് ചത്തെന്ന് കരുതി എപ്പോലും മുയല് ചാവണംന്നും ചക്ക വീഴണംന്നും ഉണ്ടോ? ഞാനതിൽ നിന്റെ ഫോൺ നമ്പർ കോഡ് ചോദിച്ചിട്ടുണ്ട് .. അത് തന്നിട്ട് നീ ഐഡി തിരിച്ച് എടുത്തോ?"
"അതെങ്ങനെ ശരിയാവും ഭായ് .. ഞാനീ കോമഡിയൊക്കെ എഴുതുന്നത് നമ്മടെ സ്വന്തം ഗഡി പറഞ്ഞ പോലെ ആർക്കെങ്കിലും ജീവിതത്തിന്റെ ഓട്ടപ്പാച്ചിലിനിടയിൽ കുറച്ചെങ്കിലും റിലാക്സേക്ഷൻ കിട്ടട്ടെ എന്ന് ഓർത്തിട്ടാണ്.. ആ ഫോൺ നമ്പർ കട്ടായി പോയി.. ഇനിപ്പോ എങ്ങനാ.. എന്നാലും ആരാ എനിക്കെതിരെ പരാതി തന്നത് ?''
"അതൊന്നും പറയില്ല.. നിന്നെ കണ്ട് എനിക്ക് ബോധ്യപ്പെട്ടു... ഇനി ഞാൻ നീ പറഞ്ഞതുപോലെ ചെയ്യൂ.. ഇതാണ് എന്റെ നമ്പർ എന്തെങ്കിലും സംശയം ഉണ്ടെങ്കിൽ മെസേജ് അയച്ചാൽ മതി."
എന്നു പറഞ്ഞ് ഒരു വിസിറ്റിംങ്ങ് കാർഡ് തന്നു.(നമ്പർ ആരും ചോദിക്കണ്ട.. തരില്ല) എന്നാൽ ഞാൻ ഇറങ്ങട്ടെ. എന്നു പറഞ്ഞ് സൂക്കർ ഭായ് എഴുന്നേറ്റു..
"അല്ല ഭായ് കുടിക്കാനെന്തെങ്കിലും ഞാൻ " ചോദിച്ചു..
"അയ്യോ വേണ്ട വേണ്ട.. ഞാൻ കഴിഞ്ഞ ദിവസത്തെ ഓറഞ്ച് ജ്യൂസിന്റെ കഥ വായിച്ചു.. എന്നെ വിട്ടേയ്ക്ക് ചിത്ര."
അത് കേട്ട് ഞാനൊന്നു ചമ്മിപ്പോയി.. വളിച്ച ചിരിയും ചിരിച്ച് വാതിൽ വരെ സൂക്കർ ഭായിയെ കൊണ്ട് വിട്ട് യാത്ര പറഞ്ഞു ..
തിരിച്ച് അകത്ത് വന്ന് ഫോൺ എടുത്ത് നോക്കിയപ്പോഴേക്കും പറഞ്ഞ പോലെ തന്നെ ഐഡി ക്ലോസ് .. ലോഗൗട്ട് ചെയ്ത് വീണ്ടും ലോഗിൻ ചെയ്യാൻ പറയുന്നു ..അതു പോലെ ചെയ്തപ്പോ ഫോൺ നമ്പരിലേക്ക് കോഡ് സെന്റ് ചെയ്തു .. അതെടുത്തോണ്ട് വരാൻ.. ഇല്ലാത്ത ഫോൺ നമ്പരീന്ന് ഞാനെവിടുന്ന് കോഡ് എടുക്കാൻ ... എന്തേലും ചെയ്യാൻ പറ്റുമോന്നറിയാൻ ഒരു നമ്മുടെ ഒരു ചാങ്ങായിയോട് ചെന്ന് പറഞ്ഞു .. ചങ്ങായി പറഞ്ഞ പോലൊക്കെ ചെയ്ത് നോക്കി നോ രക്ഷ..
എന്നാ പിന്നെ ലാപ് വഴി കയറി നോക്കാൻ ചങ്ങായി .. ലാപിന് ഞാൻ എവിടെ പോവാൻ അത് ചോദിച്ചപ്പോൾ വിശ്വാസമുള്ള ലാപുള്ള ആർക്കേലും ഐഡിയും പാസ് വേഡും കൊടുക്കാൻ പറഞ്ഞു..ഞനതാ ചങ്ങായിക്ക് തന്നെ കൊടുത്തു. എന്റെ പാസ്സ് വേഡ് കണ്ട് ആ ചങ്ങായി ഞെട്ടിയോ എന്തോ? അല്ല ലോകത്ത് എനിക്ക് മാത്രമേ അത്തരം ഒരു പാസ് വേഡ് കാണൂ..എനിക്ക് വേണ്ടി പാവം ഒത്തിരി സമയം ശ്രമിച്ചു എന്നിട്ടും കിട്ടിയില്ല.. സാരമില്ല പുതിയ ഐഡി എടുക്കാം എന്ന് പറഞ്ഞ് എന്നെ ആശ്വസിപ്പിച്ചു ..
ഞാൻ മെല്ലെ സൂക്കർ ഭായിയുടെ നമ്പരിലേക്ക് ഒരു മെസേജ് അയച്ചു.. "ഭായ് എനിക്ക് പറഞ്ഞ പോലെ ചെയ്യാൻ കഴിയില്ല ഞാൻ പുതിയ ഐഡി എടുക്കുകയാണ് വിരോധം എന്തെങ്കിലും ഉണ്ടോ " എന്ന് ..
"ഒരു വിരോധവും ഇല്ല നീ ധൈര്യമായി എടുത്തോ "എന്ന് സൂക്കർ ഭായിടെ മെസേജ് വന്നൂ..
എന്തായാലും വേണ്ടിയില്ല പുതിയ ഐഡി എടുത്ത് പഴയ നമ്മുടെ ബ്രാന്റഡ് പ്രൊഫൈൽ പിക്ചറും വച്ചു എല്ലാ ചങ്ങായിമാർക്കും റിക്വസ്റ്റ് അയച്ചു. എന്നോടുള്ള ഇഷ്ടം കൊണ്ടാണോ, അതോ എന്റെ എഴുത്തിനോടുളള ഇഷ്ടം കൊണ്ടാണോ എല്ലാവരും കണ്ണും പൂട്ടി അക്സപ്റ്റ് ചെയ്തു .. പലർക്കും സംശയം ഞാൻ ബ്ലോക്കിയോ അൺ ഫ്രണ്ട് ചെയ്തോ എന്നൊക്കെ... എല്ലാവർക്കും മറുപടി കൊടുത്ത് ഞാൻ ഉറങ്ങി..
രാവിലെ എഴുന്നേൽക്കുമ്പോഴേക്കും എന്നെ ആരോ ഗ്രൂപ്പിൽ ആഡ് ചെയ്തിരുന്നു.. എഴുതിയ രചനകളിൽ കുറച്ച് തിരികെ കിട്ടിയെങ്കിലും ആദ്യം എഴുതിയതൊക്കെ നഷ്ടപ്പെട്ടിരുന്നു.. അതിലേറെ എന്നെ സങ്കടപ്പെടുത്തിയത് ഓരോ ഞാൻ വായിച്ച കഥകളിലും കവിതകളിലും എന്റെ സാന്നിദ്ധ്യം ഇല്ലാതായതാണ്.. ഒരു ദിവസം കൊണ്ട് ഞാൻ മരിച്ച് പോയത് പോലെ .. ഒന്നുമല്ലാതായതു പോലെ തോന്നി എനിക്ക് ..
എന്തിനെന്ന് അറിയില്ല എങ്കിലും എനിക്ക് എതിരെ പരാതി കൊടുത്ത ആളോട് എനിക്ക് സ്നേഹവും നന്ദിയും തോന്നി.. കാരണം ഒരാൾ നമ്മളെ പുറകിൽ നിന്ന് കുത്തിയെങ്കിലും, ഇന്നുവരെ നേരിൽ കാണാത്ത കമന്റ് ബോക്സുകളിലൂടെ മാത്രം പരിചയമുള്ള കുറെ നല്ല മനസ്സുകളുടെ കരുതലും സ്നേഹവും അനുഭവിച്ചറിയാൻ കഴിഞ്ഞു.
എഴുതിയതെല്ലാം നഷ്ടപ്പെട്ടു പോയി എന്ന് പറഞ്ഞ് ഒരു പ്രിയ കൂട്ടുകാരി പറഞ്ഞു "നീ എഴുതിയത് നഷ്ടപ്പെടുത്താനല്ലേ കഴിഞ്ഞുള്ളൂ നിന്റെ എഴുതാനുള്ള കഴിവ് നഷ്ടപ്പെടുത്താൻ കഴിയില്ലല്ലോ എന്ന് ".. കാണാമറയത്തിരുന്ന് പറഞ്ഞ ഈ വാക്കുകൾ ഒത്തിരി ഊർജ്ജം പകർന്നു തന്നു.. അതിന്റെ ആത്മവിശ്വാസത്തിലാണ് ഇത് എഴുതിയതും.
ഈ അവസരത്തിൽ പ്രേം മാഷ് പറഞ്ഞ ഈ വാക്കുകൾ ഞാൻ കടമെടുക്കുന്നു ..
"എഴുതുന്നതെന്തിനു വേണ്ടിയാണ്?
നല്ല ആദായകരമായ ഒരു തൊഴിലല്ല ഒരിക്കലും എഴുത്ത്.. മഹത്തായ കുറേ കാര്യങ്ങൾ ലോകത്തിനോടു പറയുവാനുമല്ല എഴുത്തുകൾ എന്നു ഞാൻ വിശ്വസിക്കുന്നു.
സാഹിത്യത്തിൽ എഴുത്തുകാരൻ പ്രശ്നമല്ല. എഴുത്തേ പ്രശ്നമാവുന്നുള്ളൂ.
ഒരാൾ എഴുതുന്നതു അയാൾക്കു വേണ്ടി തന്നെയാണ്...എഴുതുമ്പോൾ ഓൺലൈനെന്നോ ,പത്രക്കാരെന്നോ പ്രസാധകരെന്നോ ആരും ചിന്തിക്കുന്നില്ല എന്നതു യാഥാർത്ഥ്യം തന്നെയാണ്. സ്വന്തം ഹൃദയത്തിൽ അതു മുളയ്ക്കുന്നു. പിന്നെ കിളിർക്കുന്നു. പടരുന്നു. സ്വന്തം വിഹ്വലതകളും സ്വപ്നങ്ങളും കീഴടക്കുമ്പോൾ എനിക്കെഴുതണം.. എഴുതാതെ വയ്യ എന്ന ചിന്തയുണ്ടാവുന്നു. ഓരോരുത്തരുടെ അന്വേഷണപഥങ്ങളിലൂടെ അവ വളരുന്നു. യഥാർത്ഥ്യത്തെക്കാളും മനോഹരമായ സ്വപ്നങ്ങളിലൂടെ സഞ്ചരിക്കുന്നു. ഭാവനയിലൂടെ ആവിഷ്കരിക്കുന്ന ജീവിതത്തിന്റെ നുറുങ്ങിനെ വരച്ചുകാട്ടുന്നു.. "
ഇങ്ങനെയാണ് നമ്മൾ ഓരോരുത്തരും .. എഴുതാൻ കഴിവുണ്ടോ .. നമ്മുടെ മനസ്സിൽ അശയങ്ങളും എഴുതാനുള്ള അഭിവാജ്ഞയും ഉണ്ടോ എഴുതുക.. എന്നെ സംബന്ധിച്ചാണെങ്കിൽ ഓൺലൈൻ വേണം എന്ന് തന്നെയില്ല.. എന്റെ ഡയറിയിലെ താളുകളിൽ മാത്രം മതിയാകും.. എന്റെ ആത്മസംതൃപ്തി അതാണ് പ്രധാനം.. ഇനീപ്പോ ആരെതിർത്താലും ഞാനീ അക്ഷരമുറ്റത്ത് ഓടിക്കളിച്ച് വളരുക തന്നെ ചെയ്യും..
ഇത് ഞാൻ എഴുതി പൂർത്തിയാക്കുമ്പോഴേക്കും സൂക്കർ ഭായിയുടെ നമ്പരിലേക്ക് എന്റെ അവസാന മെസേജ് ചെന്നിരുന്നു.
"സൂക്കർ ഭായ്.. നിങ്ങൾക്ക് കൊല്ലാം .. പക്ഷെ തോല്പിക്കാനാവില്ല .. എന്റെ മനസ്സിൽ ആശയങ്ങളും എന്റെ കൈയിൽ ഈ തൂലികയും ഉള്ളടുത്തോളം കാലം .. "
ചിത്രദീപ

ഒരമ്മയുടെ കത്ത്

ഒരു എഴുത്ത് ഗ്രൂപ്പിലെ കത്തെഴുത്ത് മത്സരത്തിലെ ഒരു പോസ്റ്റിന് "എനിക്കും ആരെങ്കിലും കത്തെഴുതിയിരുന്നെങ്കിൽ ' എന്ന എന്റെ ചോദ്യത്തിന് മറുപടിയായ് നമ്മുടെ പ്രീയപ്പെട്ട ടീച്ചറമ്മ Ambika Menon എനിക്ക് വേണ്ടി എഴുതിയ കത്ത്.. ഒരുപാട് സ്നേഹത്തോടെ ഞാനിത് ഇവിടെ സമർപ്പിക്കുന്നു.
ഒരമ്മയുടെ കത്ത്
- - - - - - - - - - - - - - -
പ്രിയ ചിത്തൂ,
ഏറെ നാളായല്ലോ നിന്റെ കത്ത് കിട്ടിയിട്ട്! വയ്യായ്കയൊന്നുമില്ലല്ലോ...ല്ലേ..? എനിക്കറിയാം നീ ഓവർടൈം ജോലി ചെയ്യുന്നുണ്ടെന്ന്. എന്തിനാ കുട്ട്യേ നീ അന്യനാട്ടിൽ പോയി ഇങ്ങനെ കഷ്ടപ്പെടുന്നേ? നീ കഴിഞ്ഞവട്ടം കത്തിന്റെ കൂടെ അയച്ചിരുന്ന ഫോട്ടോ കണ്ടു. അല്പം തടി കൂടിയിട്ടുണ്ട്, മുഖമെല്ലാം വിളറിയിരിക്കുന്നല്ലോ! പുറത്തു നിന്നുള്ള ഭക്ഷണം ആകുന്നതും കുറയ്ക്കൂ. രാത്രിയെങ്കിലും വീട്ടിൽ കുറച്ച് ഭക്ഷണം ഉണ്ടാക്കി കഴിക്കാൻ നോക്കു, നിങ്ങൾ നാലുപേരില്ലേ.? എല്ലാരും കൂടി ഉത്സാഹിച്ചാൽ എന്തെങ്കിലുമൊക്കെ പാകം ചെയ്ത് കഴിക്കാലോ. കഴിഞ്ഞ വട്ടം ഷാജിയുടെ കയ്യിൽ കൊടുത്തയച്ച അച്ചാറും ചമ്മന്തിപ്പൊടിയും തീർന്നോ?
ഇവിടെ മധുവും, നിന്റെ മിട്ടുമോനും സുഖായിരിക്കുന്നു. മിട്ടു, വിനൂന്റെ കുട്ടി, ആദിയുമായ് നല്ല കൂട്ടാ. ഇപ്പൊ ശരിക്കും തോന്നുന്നു, നിന്റേയും വിനുവിന്റേയും കല്ല്യാണം ഒരേ വീട്ടിൽ നിന്നും നടത്തിയത് എത്ര നന്നായെന്ന്!
വിനവും മജ്ഞുവും മിട്ടൂനെ സ്വന്തം മോനെപ്പോലെ തന്നേയാ നോക്കുന്നത്. അവന്റെ പഠിത്തകാര്യങ്ങളെല്ലാം അവൾ തന്നേയാ നോക്കുന്നേ. നീ അവനെക്കുറിച്ചോർത്ത് ഒട്ടും വിഷമിക്കണ്ട.
മിട്ടുമോൻ ഇടക്ക് നിന്റെ ഫോട്ടോ എടുത്ത്, ആരും കാണാതെ ഉമ്മ വെക്കുന്നതു കാണുമ്പോൾ സങ്കടം തോന്നും. അവന് പ്രായത്തിനേക്കാൾ കൂടുതൽ പക്വത വന്നിരിക്കുന്നു. ഒരു ദിവസം രാത്രി എന്നെ കെട്ടിപ്പിടിച്ച് കിടന്ന് അവൻ ചോദിക്കാ, "മുത്തശ്ശി.., എന്റെ അമ്മ കുട്ടിയായിരിക്കുമ്പോൾ കുറുമ്പിയായിരുന്നോ, പഠിക്കാൻ മിടുക്കി ആയിരുന്നോ", എന്നൊക്കെ. ഇടക്ക് അവന് പനി വരുമ്പോഴാണ് പേടി, വീണ്ടും ഫിറ്റ്സ് വരോന്ന്! രണ്ടാഴ്ച മുന്നേ ശക്തിയായ പനി വന്നു.. ഞാനുമച്ഛനും ഉറക്കമൊഴിച്ചിരുന്ന്, നെറ്റിയിൽ നനഞ്ഞ തുണിയിട്ടും, കാലുകൾ തണുത്ത വെള്ളത്തിൽ വെച്ചും നേരം വെളിച്ചാക്കി. ഭാഗ്യത്തിന് പിറ്റേ ദിവസമായപ്പോഴേക്കും പനി കുറഞ്ഞു.
നിന്റെ മോൻ മിടുക്കനാ പഠിക്കാൻ. ടീച്ചർമാർക്കൊക്കെ ജീവനാ അവനെ! നിന്നെപ്പോലെത്തന്നെ അവനും ഡയറിയിൽ എന്തൊക്കേയോ കുത്തിക്കുറിക്കണ കാണാം. ചോദിച്ചാൽ പറയും," ഞാൻ കവിത എഴുതാ മുത്തശ്ശീ" ന്ന്. ഒരു ഡയറി നിറച്ച് എന്തൊക്കേയോ എഴുതിയിട്ടുണ്ട്, വായിക്കാൻ ചോദിച്ചാൽ പറയും, " ഇതെന്റെ അമ്മ വരുമ്പോൾ കാണിക്കാനുള്ളതാ, ഞാനാർക്കും കാണിച്ച് തരില്ല" ന്ന്.
നിനക്കറിയോ, അവൻ അസ്സലായി പെൻസിൽ സ്‌കെച്ച് വരക്കും. നിന്റെ ഒരു ഫോട്ടോ വരച്ചത് കാണിച്ചു തന്നു. എന്ത് ഭംഗിയാ കാണാനെന്നോ! ങ്ഹാ, പിന്നെ അടുത്ത മാസം അവന്റെ പതിനൊന്നാം പിറന്നാളല്ലേ, ഞാനൊരു സൈക്കിൾ വാങ്ങി കൊടുക്കണമെന്ന് ഇപ്പോൾ തന്നെ ചട്ടം കെട്ടിയിരിക്കുന്നു.
മധു പതിവുപോലെ എല്ലാ ശനിയാഴ്ചയും വരും. വന്നു കഴിഞ്ഞാൽ മിട്ടൂന് ഉത്സവം പോലാ പിന്നെ. അച്ഛനും മോനും കൂടിയുള്ള പൊട്ടിച്ചിരികളും ചെറിയ വഴക്കുകളും കൊണ്ട് വീടുണരും. പാവം മധു, എത്ര നാളാ ഇങ്ങനെ ഒറ്റക്ക് ജീവിക്കാ..! അവനും ചെറുപ്പമല്ലേ!
നീ പറഞ്ഞ പോലെ അഞ്ചു കൊല്ലമൊന്നും നീ സൗദിയിൽ നിൽക്കണ്ട, നമുക്കെല്ലാവർക്കും കൂടി വീടിന്റെ ലോൺ അടച്ചു തീർക്കാം. ഞാനും ട്യൂഷനെടുക്കുന്നില്ലേ..
ഇക്കൊല്ലം കുട്ടികൾ നിറയെ ഉണ്ട്. നീ അവിടെ കിടന്ന് ബുദ്ധിമുട്ടുന്നത് കാണാൻ വയ്യ. അച്ഛന് വയ്യായ്കയൊന്നുമില്ല. വാഴ കൃഷിയും പച്ചക്കറിക്കൃഷിയുമായി കൂടിയിരിക്കുന്നു. കഴിഞ്ഞ വട്ടം നീ വന്നപ്പോൾ നട്ട പേരയും അരിനെല്ലിയും കായ്ക്കാൻ തുടങ്ങി.
നിന്റെ സുഹൃത്തുക്കൾ ശ്രീക്കുട്ടനും ഷാജിയും ഇവിടെ വന്നിരുന്നു. സൗദിക്ക് തിരിച്ചു പോകുന്നതിന് മുന്നേ വീണ്ടും വരാം, നിനക്ക് തന്നയക്കാനെന്തെങ്കിലുമുണ്ടെങ്കിൽ റെഡിയാക്കി വെച്ചോളാൻ പറഞ്ഞിട്ടുണ്ട്.
നമ്മുടെ തെക്കേതിലെ അമ്മിണ്യേച്ചിയില്ലേ, അവരുടെ മകൻ ഗോപുവിനെ നിനക്കോർമ്മയുണ്ടോ..? നിന്റെ പ്രായമാ.അവൻ രണ്ടു ദിവസം മുന്നേ ഒരു ബസ്സപകടത്തിൽ മരിച്ചു. പാവം.., അമ്മിണി തനിച്ചായി..!
നിന്റെ കൂടെ പഠിച്ച ആമിനയും ജമാലും ഇടക്കിവിടെ വരാറുണ്ട്.
നീ നിന്റെ ആരോഗ്യം ശ്രദ്ധിക്കണം.മറുപടി എഴുതാൻ അമാന്തിക്കരുത്. ഇവിടെ നിന്റെ വിവരങ്ങളറിയാൻ എല്ലാരും കാത്തിരിക്കാ.രാത്രി കിടക്കും നേരം ഞാൻ പറഞ്ഞു തന്ന നാമങ്ങളൊക്കെ ചൊല്ലണം. നല്ലത് മാത്രം ചിന്തിക്കാ.., നീ ഇവിടുത്തെ കാര്യങ്ങളോർത്ത് ഒട്ടും വിഷമിക്കണ്ട.സമാധാനമായിരിക്കൂ. കുറച്ച് എഴുതാൻ തുsങ്ങിയാൽ കണ്ണു വേദന തുടങ്ങായി. ഇനി പിന്നെ എഴുതാം ട്ടൊ.
സസ്നേഹം,
അമ്മ.

ChithraDeepa

****റീമയാണ് താരം ****

****റീമയാണ് താരം ****
പതിവ് പോലെ അന്നത്തെ ദിവസവും ഷോപ്പിൽ വലിയ തിരക്കൊന്നും ഉണ്ടായിരുന്നില്ല .. ഈവനിംങ്ങ് ഷിഫ്റ്റായിട്ടും ഏഴു മണി വരെ ഒരു ഈച്ച പോലും വന്നില്ല .. ബോറടിച്ചപ്പോ ഞാൻ മൊബൈലിൽ കുത്തിക്കളിച്ചോണ്ട് ഇരുന്നപ്പോഴാണ് മുകളിലത്തെ ഡ്രസ്സിന്റെ സെക്ഷനിൽ നിന്ന് താഴത്തെ പാക്കിംങ്ങ് സെക്ഷനിലെ ഫോണിലേക്ക് കോൾ വന്നത്.. ഞാൻ ഫോൺ അറ്റൻറ് ചെയ്തതും റീമയാണ് .. "ചിത്ര എനിക്ക് കസ്റ്റമേഴ്സ് ഉണ്ട് ..നാല് ഓറഞ്ച് ജ്യൂസും ഒരു ആപ്പിൾ ജ്യൂസും വേണം ".. ഞാൻ ഓക്കെ പറഞ്ഞ് ഫോൺ വച്ചു..
ഷോപ്പിൽ കസ്റ്റമറുടെ വലിപ്പമനുസരിച്ചാണ് വെള്ളം ജ്യൂസ് ,എക്സ്പ്രെസോ (കോഫി മെഷീനീ നിൽ കാപ്പിക്കുരു ഇട്ട് ഉണ്ടാക്കുന്ന ഒരു കൈപ്പുള്ള കാപ്പി) കാപ്പിച്ചീനോ എന്നിങ്ങനെ എല്ലാം കൊടുക്കുന്നത് .. സാധാ കസ്റ്റമർ , ഒരു സൺഗ്ലാസോ പെർഫ്യൂമോ വാങ്ങുന്നവർ വെള്ളം ചോദിച്ചാൽ കൊടുക്കും.. പിന്നെ ഒരു ബാഗ് രണ്ട് ബാഗ് വാങ്ങുന്നവർക്ക് ജ്യൂസ് എക്സ്പ്രെസോ അങ്ങനെ ..വിഐപി കസ്റ്റമറാണെങ്കിൽ (സൗദി രാജകുടുംബം ,വിദേശികൾ ) ജ്യൂസ്, കാപ്പിച്ചീനോ ഒക്കെയാവും കൊടുക്കുക ..
അല്ല ഇവരുടൊക്കെ പറച്ചിൽ കേട്ടാൽ തോന്നും ഫ്രൂട്ട് മുഴുവൻ വാങ്ങി വച്ചിട്ട് ഫ്രഷ് ജ്യൂസടിച്ച് കൊടുക്കാനാവും എന്ന്.. അതൊന്നുമല്ല .. ഞങ്ങടെ മാനേജർ മിസ്റ്റർ "മഹിർ അഹമ്മദ് " ഞങ്ങൾക്ക് വേണ്ടിയും, കസ്റ്റമറെ പറ്റിക്കാൻ വേണ്ടിയും Al Rabie ടെ പല തരം ജ്യൂസും വാങ്ങി വച്ചിട്ടുണ്ട് .. അതൊരു ഗ്ലാസ്സിൽ പകർത്തുക. കസ്റ്റമറിന് കൊടുക്കുക..
ഞാനെന്തായാലും ഫ്രിജ്ഡ് തുറന്ന് നോക്കിയപ്പോൾ ആപ്പിൾ ജ്യൂസിന്റെ പാക്കറ്റ് ഏറെയുണ്ട്.. പക്ഷെ നാല് ഓറഞ്ച് ജ്യൂസിന്റെ പാക്കറ്റ് മാത്രമേ ഉള്ളൂ.. അതും ചെറുത്. ഒരു പാക്കറ്റ് പൊട്ടിച്ച് ഒഴിച്ചാലും ഗ്ലാസിൽ പകുതി ജ്യൂസേ കാണൂ..മൂന്നു ഗ്ലാസിലും കൂടി ഓരോന്ന് വച്ച് പൊട്ടിച്ച് ഒഴിച്ചിട്ട് നാലാമത്തെത് പൊട്ടിച്ച് മൂന്നു ഗ്ലാസും മുക്കാൽ ഭാഗത്തോളം ഒഴിച്ച് ലവൽ ചെയ്തു .. നാലാമത്തേതിൽ ആപ്പിൾ ജ്യൂസും എടുത്തു വച്ചു.. (ഇങ്ങനെ ഒരു ജ്യൂസ് പകുതി വരുന്ന പല ഘട്ടങ്ങളിലും മറ്റൊരു സെയിൽസ് ഗേൾ "സമ "ചെയ്യുന്നത് കുറച്ച് തണുത്ത വെള്ളവും പഞ്ചസാരയും കൂടി ചേർത്ത് ജ്യൂസിന്റെ അളവങ്ങ് കൂട്ടും.. ഇവ്വിധമുള്ള കച്ചവട തന്ത്രങ്ങൾ കണ്ട് ഞാൻ പല തവണ കണ്ണും തള്ളി നിന്നിട്ടുണ്ട് )
ജ്യൂസ് എടുത്തപ്പോഴേക്കും റീമ ഓടി വന്നു. "കസ്റ്റമേഴ്സ് താഴെ വന്നിട്ടുണ്ട് .. ജ്യൂസ് ഇവിടെ കൊടുത്താൽ മതി.. ഞാൻ ഒരു ബാഗ് അവിടെ വച്ചിട്ടുണ്ട് നീ പാക്ക് ചെയ്തോളൂ ഞാനിത് കൊടുത്തോളാം" എന്ന് പറഞ്ഞ് റീമ ജ്യൂസിന്റെ ട്രേയും കൊണ്ടു പോയി .. ഞാൻ ചെന്നപ്പോൾ ഒരു Diorama എന്ന ബാഗ്. അത് ഞാൻ പാക്ക് ചെയ്യുമ്പോഴേക്കും റീമ വീണ്ടും ഓടി വന്നു. അതേ കസ്റ്റമർ തന്നെ ഒരു വാച്ച് കൂടി വാങ്ങി.. ഡയമണ്ട് വച്ച വാച്ചാണ്..അത് ഗിഫ്റ്റായി പാക്ക് ചെയ്യണം. ..അപ്പോ കാശുള്ളവർ തന്നെ ..
"റീമാ കസ്റ്റമർ ഏതു നാട്ടുകാരാണ്.. ?" ഞാൻ ചോദിച്ചു ..
''മലേഷ്യയിൽ നിന്നാണ് "റീമ പറഞ്ഞു.
ഞാൻ വാച്ചും ഗിഫ്റ്റായി പാക്ക് ചെയ്ത് പുറത്ത് ഇറങ്ങി നോക്കിയപ്പോ മൂന്ന് സ്ത്രീകൾ ആണ് റീമയുടെ കസ്റ്റമേഴ്സ് .. മൂന്നു പേരും സെറ്റിയിൽ ഇരിപ്പുണ്ട്. ടീപ്പോയിൽ ഇരുന്ന ട്രേയിൽ കാൽ ഭാഗത്തോളം ബാക്കി വച്ച രണ്ട് ഓറഞ്ച് ജ്യൂസ് ഗ്ലാസും ആപ്പിൾ ജ്യൂസിന്റെ ഗ്ലാസും ഉണ്ട്.. ഒരു ഓറഞ്ച് ജ്യൂസ് ഗ്ലാസ് അങ്ങനെ തന്നെ ഇരിക്കുന്നു .. അല്ലെങ്കിൽ തന്നെ മൂന്ന് പേർക്ക് എന്തിനാ നാല് ഗ്ലാസ് ജ്യൂസ് .റീമ പറഞ്ഞതിന്റെ കുഴപ്പമോ ഞാൻ കേട്ടതിന്റെ കുഴപ്പമോ .. ചിലപ്പോൾ ഞാൻ കേട്ടതിന്റെ കുഴപ്പം ആവും. ഹെന്റെ പൊന്നു കൂട്ടുകാരേ അല്ലേലും ഈ എഫ്ബിയിൽ കുത്തിക്കളിക്കുമ്പോ ചുറ്റുമുള്ളതൊന്നും കാണാനും കേൾക്കാനും പറ്റൂല്ല..
എന്തായാലും ഞാനാ ട്രേയും എടുത്ത് കിച്ചണിൽ കൊണ്ട് വച്ചു. കൂടുതൽ വന്ന ഓറഞ്ച് ജ്യൂസ് അവിടിരുന്നാലും പിന്നെ എടുത്ത് കളയുകയേ ഉള്ളൂ.. വെറുതെ കളയുന്നത് എന്തിനാന്ന് ഓർത്ത് അതെടുത്ത് പകുതി കുടിച്ച് കഴിഞ്ഞപ്പോഴാണ് പിന്നേം റീമയുടെ വിളി.അതവിടെ വെച്ച് വീണ്ടും പുറത്തേക്ക് ഓടി.. റീമയ്ക്ക് ഇന്നത്തെ ദിവസം ചാകരയാണെന്ന് തോന്നുന്നു. വീണ്ടും രണ്ട് ബാഗും കൂടി അവർ വാങ്ങി. അതു തന്നെയുമല്ല അവരെ കൂടാതെ ആ സ്ത്രീകളുടെ കൂട്ടത്തിലുള്ള നാലു ആണുങ്ങൾ കൂടി വന്നിരിക്കുന്നു. അതിലൊരാൾക്ക് റെഡ് ടീ വേണം.. (നമ്മടെ കട്ടൻ ചായ ..സുലൈമാനി ) ഓരാൾക്ക് എക്സ്പ്രെസോ.. ഒരാൾക്ക് വെള്ളം മതി.. ഒരാൾക്ക് ഓറഞ്ച് ജ്യൂസും. എല്ലാവരുടേം മുന്നിൽ വച്ചാണ് റീമ ഇതൊക്കെ അക്കമിട്ട് റീമ പറയുന്നത്. ഓറഞ്ച് ജ്യൂസ് എന്ന് കേട്ടതും ഞാൻ ഞെട്ടി. വേറെ ജ്യൂസ് ഇല്ല .. ഉണ്ടായിരുന്നതിന്റെ പകുതി എന്റെ വയറ്റിലും ...ഞാൻ റീമയെ അവിടെ നിന്ന് കയ്യും കലാശവും കണ്ണ് കൊണ്ട് ആക്ഷൻ കാണിച്ചിട്ടും റീമയ്ക്ക് ഒന്നും മനസ്സിലായില്ല.
സഹികെട്ട് ഞാൻ രണ്ട് ബാഗുമെടുത്ത് പാക്കിംങ്ങ് സെക്ഷനിൽ വച്ചിട്ട് കിച്ചണിലേക്ക് ചെന്നു .. ആപ്പിൾ ജ്യൂസ് ഉണ്ട് അതു കൊടുക്കാം.. കാപ്പി ഉണ്ടാക്കാൻ മെഷീൻ ഓൺ ചെയ്തപ്പോഴേക്കും റീമ ഓടി വന്നൂ.. നീ പോയി ബാഗ് പാക്ക് ചെയ്യ് ഞാനിത് ഉണ്ടാക്കാം .. അവളെന്നോട് പറഞ്ഞു.
"റീമാ ഓറഞ്ച് ജ്യൂസ് ഇല്ല .. തീർന്നു ആപ്പിൾ ജ്യൂസ് മതിയോ.. "
"ഇത്രയും സാധനങ്ങൾ വാങ്ങിയ കസ്റ്റമേഴ്സ് അല്ലേ .അപ്പോ പിന്നെ ചോദിച്ച ജ്യൂസ് തന്നെ കൊടുക്കണം ."റീമ എന്നോട് പറഞ്ഞു.ഇത് കേട്ട് എന്ത് ചെയ്യണംന്നറിയാതെ ഞാൻ അന്തം വിട്ടുനിന്നു.. ഞാനാണെ കൊണ്ടു വച്ചത് കുടിച്ചും പോയി .. അതൊട്ട് പറയാനും വയ്യ..
അപ്പോഴാണ് മുൻപേ ജ്യൂസ് കൊടുത്ത ഗ്ലാസും ഞാൻ പകുതി കുടിച്ചു വച്ച ഓറഞ്ച് ജ്യൂസിന്റെ ഗ്ലാസും റീമ കാണുന്നത്. ഞാൻ എന്തെങ്കിലും പറയാൻ വാ തുറക്കുന്നതിന് മുൻപേ ഞാൻ കുടിച്ചതിന്റെ പകുതി ഓറഞ്ച് ജ്യൂസിലേക്ക് , ആ സ്ത്രീകൾ കുടിച്ചിട്ട് കാൽ ഭാഗത്തോളം വച്ചിരുന്ന ഓറഞ്ച് ജ്യൂസിന്റെ ബാക്കി കൂടി ഒഴിച്ച് ഗ്ലാസ്സ് നിറച്ചു.. എന്നിട്ട് ചിരിച്ച് കൊണ്ട് ഒരു സൊയമ്പൻ ഡയലോഗും. അത് കേട്ട് ഞാനും ചിരിച്ചു പോയി..
''അവര് എല്ലാം ഒരു ഫാമിലി അല്ലേ.. അഡ്ജസ്റ്റ് ചെയ്യാം .. സാരമില്ല "എന്ന് .. "അപ്പോ ഞാനോ "എന്ന് അവളോട് ചോദിക്കണമെന്നുണ്ടായിരുന്നു.അത് ഞാൻ തല്കാലം വിഴുങ്ങി .. എന്തായാലും വേണ്ടിയില്ല അവളതും കൊണ്ട് പോയി..
ബാഗ് എല്ലാം പാക്ക് ചെയ്ത് ഞാൻ കൗണ്ടറിൽ കൊടുക്കാൻ പോകുമ്പോൾ ഞാൻ കണ്ടു.. ഓറഞ്ച് ജ്യൂസും കൈയ്യിൽ പിടിച്ച് ഒരു മലേഷ്യൻ സുന്ദരൻ.. ബാഗ് കൗണ്ടറിൽ കൊടുത്ത് തിരിച്ച് വരുമ്പോഴേക്കും ആ ജ്യൂസ് ഒരു തുള്ളി പോലുമില്ലാതെ കുടിച്ച് ഗ്ലാസ് അവിടെ ടീപ്പോയിൽ വച്ചിട്ടുണ്ടായിരുന്നു ..
എന്തായാലും അവര് ബില്ല് പേ ചെയ്ത് പോകുമ്പോൾ ഞാൻ ആ മലേഷ്യൻ സുന്ദരനെ ഒന്നുകൂടി ഏറ് കണ്ണിട്ട് നോക്കി.. കാരണം എന്താന്ന് വച്ചാ പണ്ട് നമ്മടെ ആദ്യരാത്രിയിൽ പാലും കൊണ്ട് ചെന്നിട്ട് , പാൽ ഞാൻ പകുതി കുടിച്ചിട്ട് എന്റെ കെട്ട്യോന് കൊടുത്തപ്പോ ,പാലും പാൽ ചായയൊന്നും കുടിക്കണത് എനിക്ക് ഇഷ്ടമില്ലാന്നും പറഞ്ഞ് അങ്ങേര് അന്നത് കുടിച്ചില്ല.. അപ്പോപ്പിന്നെ ഞാൻ കുടിച്ചിട്ട് വച്ച ജ്യൂസിന്റെ പകുതി തുള്ളി പോലും വയ്ക്കാതെ കുടിച്ച ആ മലേഷ്യൻ സുന്ദരനെ ഞാൻ ഒന്നല്ല ഒമ്പത് വട്ടം നോക്കണ്ടായോ..

****നീതിമാൻ****

****നീതിമാൻ****
"ഹൊ!!! ചട്ടീം കലവുമായാൽ തട്ടീം മുട്ടീം ഇരിക്കണം എന്ന് പറഞ്ഞവനെ ഒലക്ക കൊണ്ടടിക്കണം. ഇതിപ്പോ ബാക്കിയുള്ളോരുടെ വക്കുപൊട്ടിയും ചളുങ്ങിയും പിളുങ്ങിയും ഒക്കെ ആണിരിക്കുന്നത് "
നൈറ്റി എടുത്തുകുത്തി അടുക്കളയിൽ പാത്രം കഴുകുന്നതിനിടെ ലില്ലിക്കുട്ടി പാത്രങ്ങളോട് പരാതി പറഞ്ഞു...
"അല്ലേലും ഇതിയാനങ്ങനാ.. എനിക്കൊരു ഗുണോം ഇല്ല .. കമഴ്ന്ന് കിടക്കണ പ്ലാവില പോലും ഒന്ന് മലർത്തിപോലും ഇടൂല്ല.. അല്ല എന്നെ പറഞ്ഞാ മതി.. ഞാനായിട്ട് സഹിക്കുന്നതാ."
"എന്നതാടീ ലില്ലിക്കുട്ടി.. നീ തന്നെ നിന്ന് പിറുപിറുക്കുന്നത് .. കടുംകാപ്പി അനത്തിയില്ലേടീ." അടുക്കളയിലേക്ക് വന്ന ജോസൂട്ടി ചോദിച്ചു..
"ഓ!! ഒന്നുമില്ല ഇച്ചായാ.. ഞാൻ അപ്രത്തെ രാജപ്പൻ ചേട്ടന്റെ ഉഷ ചേച്ചീടേം കാര്യം പറഞ്ഞതാ." കാപ്പി എടുത്ത് കൊടുത്തുകൊണ്ട് ലില്ലിക്കുട്ടി പറഞ്ഞു.
"എന്നതാടീ ഇത്ര രാവിലെ അയൽവക്കക്കാരെ സ്മരിക്കാൻ കാരണം.. അവരെന്നാ ചെയ്തു "
"അല്ല ഇച്ചായാ.. ആ രായപ്പൻ ചേട്ടൻ വീട്ടിൽ മുറ്റമടിക്കും ,തുണിയലക്കും, പാത്രം കഴുകും.. എന്തിന് പറയുന്നു നമ്മുടെ കിണറ്റീന്നല്ലേ വന്ന് വെള്ളം കോരിക്കൊണ്ട് പോകുന്നത് .. കെട്ടിയോൻ മായരായാൽ ഇങ്ങനെ വേണം.. അല്ലാതെ .. ഇതു പോലെ .. ( വേറെന്തോ പറയാൻ വന്നത് അടുക്കളയിലെ സാധന സാമഗ്രികളെ ഓർത്ത് ലില്ലിക്കുട്ടി വിഴുങ്ങി)
"ഓ അതാണോ ടീ കാര്യം .. നീ ശ്രദ്ധിച്ചിട്ടുണ്ടോ രാജപ്പനും ഉഷയും നടന്ന് പോകുന്നത് .. ഉഷ മുൻപേയും രാജപ്പൻ പുറകെയും .. എടീ നാട്ടുകാരെല്ലാം പറയുന്നത് ഉഷയും " ഭാര്യയും '' വരുന്നുണ്ടെന്നാ.. അല്ലാതെ രാജപ്പനും ഭാര്യയും വരുന്നുണ്ടെന്നല്ല. നീ രാവിലെ എന്നെക്കൊണ്ട് ഒന്നും പറയിക്കരുത് ലില്ലിക്കുട്ടി.. രാവിലെ കഴിക്കാൻ എന്തേലും ഉണ്ടാക്കാൻ നോക്കടീ." ഇതും പറഞ്ഞ് ജോസൂട്ടി കാപ്പിയുമെടുത്ത് സിറ്റൗട്ടിലേക്ക് പോയി..
ഓ ഞാൻ പറയാൻ മറന്നൂ.. ഇത് ജോസൂട്ടിയും ലില്ലിക്കുട്ടിയും .. ഇന്നത്തെ എന്റെ കഥയിലെ നായകനും നായികയും.. വാട്ടർ അതോറിട്ടി ജോലിക്കാരനായ ജോസൂട്ടിക്ക് ഏഴ് വർഷം മുൻപ് വിവാഹമെന്ന സുദിനത്തിൽ ( ദുരന്തത്തിൽ) കിട്ടിയതാണ് ലില്ലിക്കുട്ടിയെ..സർക്കാർ ജോലിക്കാരായ ലില്ലിക്കുട്ടിയുടെ അപ്പനും അമ്മയും ആവശ്യത്തിലേറെ സ്വർണ്ണം കൊടുത്ത് വിട്ടത് കൊണ്ട് വിവാഹ കമ്പോളത്തിൽ നിന്ന് ജോസൂട്ടിയെ താൻ വാങ്ങി എന്നായിരുന്നു ലില്ലിക്കുട്ടിയുടെ വിചാരം ..
ആ വിവരംകെട്ട വിചാരം കൊണ്ട് ജോസൂട്ടി പലതും അനുഭവിക്കേണ്ടി വന്നു.. ജോസൂട്ടി തന്റെ മാത്രം കുത്തകയാണെന്നും അമ്മയും നാത്തൂനും അയൽവക്കക്കാരും നാട്ടുകാരും രണ്ടാം കുടിയിലുള്ളതാണെന്നും ലില്ലിക്കുട്ടി കരുതി.. അമ്മയോടോ പെങ്ങളോടോ കൂടുതൽ തമാശ പറഞ്ഞ് ചിരിച്ചാൽ ലില്ലിക്കുട്ടിയുടെ മുഖം കടന്നൽ കുത്തിയത് പോലാകും .. അയൽവക്കത്തെ പെണ്ണുങ്ങൾ എന്തെങ്കിലും വിശേഷങ്ങൾ ചോദിച്ചാൽ അന്നത്തെ ദിവസം പിറുപിറുത്ത് ജോസൂട്ടിക്ക് മന:സ്സമാധാനം കൊടുക്കില്ല.. പുതുമോടി ആയതു കൊണ്ടും , പറഞ്ഞ് മനസ്സിലാക്കാം എന്ന വിചാരം കൊണ്ടും ..പൊതുവേ സമാധനപ്രീയനായ ജോസൂട്ടി പലതും കണ്ടില്ലെന്ന് നടിച്ചു..
പണ്ട് കൂട്ടുകാരുടെ കൂടെ അത്യാവശ്യം കറക്കവും കവലയിൽ വൈകിട്ട് സൊറ പറഞ്ഞിരിക്കലും ഉണ്ടായിരുന്നു ജോസൂട്ടിക്ക് .. ലില്ലിക്കുട്ടി വലത് കാൽ വച്ച് ജീവിതത്തിലേക്ക് കയറി വന്നേപ്പിന്നെ കവലയും കൂട്ടുകാരുമൊക്കെ ജോസൂട്ടി ക്ക് അന്യമായി .. കവലയിലെത്തി കൂട്ടുകാരോട് മിണ്ടാൻ തുടങ്ങുമ്പോഴേക്കും ലില്ലിക്കുട്ടിയുടെ ഫോൺ വരും.. അന്നേരം അത്യാവശ്യമായി എന്തെങ്കിലും സാധനം വാങ്ങി വരാൻ.. ഇത് പതിവായപ്പോൾ ജോസൂട്ടിക്ക് കാര്യം മനസിലായി.. പിന്നെ ഫോൺ എടുക്കാതെയായി ജോസൂട്ടിയുടെ കവലയ്ക്ക് പോക്ക് ..അതും കാൽനടയായി..
സ്വാർത്ഥത കൊണ്ടാണോ വിവരക്കേട് കൊണ്ടാണോ ഓരോ ദിവസം ചെല്ലുന്തോറും ലില്ലിക്കുട്ടി തല്ലിപ്പൊളി കുട്ടിയായി മാറി.. എവിടെയങ്കിലും പോയാൽ തന്നേക്കാൾ നിറമുള്ള ജോസൂട്ടിയെ ആരേലും നോക്കുന്നുണ്ടോ എന്നായിരുന്നു ലില്ലിക്കുട്ടിയുടെ നോട്ടം മുഴുവൻ... ഏതാവശ്യത്തിന്ന് പോയാലും ജോസൂട്ടിയുടെ മൂട്ടീന്ന് ലില്ലിക്കുട്ടി മാറൂല്ല.. കാണുന്നവർ വിചാരിക്കും മാതൃകാ ദമ്പതികൾ .. ജോസൂട്ടി പലപ്പോഴും ചിന്തിച്ചു ഇതിലും ഭേദം ശ്വാസം മുട്ടി മരിക്കുന്നതാണെന്ന്..
ബസിൽ കയറി മുൻപിലും പുറകിലും ഇരുന്നാൽ പുറകിലിരിക്കുന്ന ജോസൂട്ടിയെ നോക്കി നോക്കി ലില്ലിക്കുട്ടിയുടെ കഴുത്തുളുക്കി.. ബസിലെ മറ്റു തരുണീമണികളെ തന്റെ സുന്ദരൻ കെട്ടിയോൻ നോക്കുന്നുണ്ടോ എന്നറിയാൻ നോക്കിയതാണ് പാവം ലില്ലിക്കുട്ടി.. എന്തായാലും വേണ്ടിയില്ല നോട്ടത്തിന് ഫലമുണ്ടായി .. ലില്ലിക്കുട്ടി ഒരാഴ്ച്ച "പിടലി " എന്ന വിളി കേൾക്കേണ്ടി വന്നെങ്കിലും ജോസൂട്ടി ഒരു കാർ സ്വന്തമായി വാങ്ങി..
കാർ വാങ്ങിയപ്പോ വിചാരിച്ചു കുറച്ച് സമാധാനം കിട്ടുമെന്ന് ..പക്ഷെ മുൻപിലത്തെ സീറ്റിൽ ജോസൂട്ടിയുടെ കൂടെ താനല്ലാതെ ആരും ഇരിക്കാൻ പാടില്ലെന്ന് ലില്ലിക്കുട്ടി കട്ടായം പറഞ്ഞപ്പോൾ പാവം കെട്ട്യോൻ ഞെട്ടി.. അല്ലെങ്കിൽ അവളുടെ സ്വഭാവത്തിന് സീറ്റെടുത്ത് മാറ്റാനും മടിക്കില്ലെന്ന് അറിയാവുന്ന കൊണ്ട് ജോസൂട്ടി ഒന്നും മിണ്ടിയില്ല. അങ്ങനെയിരിക്കെ ലില്ലിക്കുട്ടിക്ക് മോഹം ഡ്രൈവിംങ്ങ് പഠിക്കണം എന്ന് ..അതും സ്വന്തം കാറിൽ.. ഡ്രൈവിംങ്ങ് സ്ക്കൂളിൽ പോയി പഠിച്ചോളാൻ ജോസൂട്ടി സമ്മതിച്ചിട്ടും ലില്ലിക്കുട്ടി പോയില്ല.. ഇച്ചായൻ തന്നെ എന്നെ പഠിപ്പിച്ചാൽ മതി എന്ന വാശിയിൽ ലില്ലിക്കുട്ടി ഉറച്ചു നിന്നു..
അങ്ങനെ ഒരു അവധി ദിവസം ലില്ലിക്കുട്ടിയെ ഡ്രൈവിംങ്ങ് പഠിപ്പിക്കാൻ കാറുമെടുത്ത് ജോസൂട്ടി ഇറങ്ങി.. ആദ്യ പാഠങ്ങൾ ചൊല്ലി കൊടുത്തും നുള്ളി കൊടുത്തും ദിവസങ്ങൾ കഴിഞ്ഞു പോയി .. അങ്ങനെ ഡൈവിംങ്ങിൽ ലില്ലിക്കുട്ടി പിച്ച വച്ച് കാറ് ഓടിച്ച് തുടങ്ങിയ ആ ദിവസം ഒരു തരുണീമണി മന്ദം മന്ദം റോഡിലൂടെ നടന്നു വരുന്നൂ.. അവളെ കണ്ടതും ബ്രേക്കേതാ ഗിയറേതാ എന്ന് ലില്ലിക്കുട്ടി മറന്നു.. കെട്ടിയോൻ അവളെ നോക്കുന്നുണ്ടോ എന്നറിയാൻ ആ മുഖത്തേക്കായി കണ്ണ് .. ലില്ലിക്കുട്ടിയുടെ നിയന്ത്രണത്തോടൊപ്പം കാറിന്റെ നിയന്ത്രണവും വിട്ടു.. പക്ഷെ ലില്ലിക്കുട്ടിയുടെ മനസ്സ് അറിയാവുന്നതുകൊണ്ടും ഇതൊക്കെ തന്നെ സംഭവിക്കും എന്നുള്ളതുകൊണ്ടും ജോസൂട്ടി കാറിന്റെ കൺട്രോൾ ഏറ്റെടുത്തിരുന്നു.. എന്നാലും ആരാന്റെ മതിലിൽ കാറ് പോയി ഉമ്മ വയ്ക്കുകയും അതിന്റെ ഭാഗമായി കുറച്ച് പെയിന്റ് ഇളകിപോകുകയും ചെയ്തു.. അതോടു കൂടി ലില്ലിക്കുട്ടിയുടെ ഡ്രൈവിങ്ങ് പഠനം പാതിവഴിയിൽ അവസാനിച്ചു.
അങ്ങനെ തട്ടലും മുട്ടലും കരച്ചിലും പിഴിച്ചിലുമൊക്കെയായി കാലം കടന്നു പോയി. ഇതിനിടയിൽ സഹികെട്ട് ജോസൂട്ടി ഇടയ്ക്ക് ഒന്നു രണ്ട് വാക്ക് മൊഴിഞ്ഞു .. അന്നേരം അവൾ വീട്ടിൽ പോകാൻ തോന്നും ... (കുടുംബക്കാരെ ഓർത്തു )പലവട്ടം ലില്ലിക്കുട്ടിയുടെ പാവം അച്ഛൻ ആഞ്ഞു തുമ്മി .. എന്നാലും ലില്ലിക്കുട്ടിയുടെ സമരമുറകൾ തുടർന്നു കൊണ്ടേയിരുന്നു .. മുഖം വീർപ്പിക്കും പരാതി പറച്ചിലും.. പിറുപിറുക്കലും.. പാത്രം താഴെയിടലും തുടങ്ങി കിടപ്പു മുറിയിൽ തറയിൽ പാ വിരിച്ച് ഒറ്റയ്ക്ക് കിടക്കുന്നതു വരെ എത്തി കാര്യങ്ങൾ.. പാവം ജോസൂട്ടി .. സഹിച്ചു ക്ഷമിച്ചു. സമാധാനപ്രീയൻ...അതിനിടയിൽ രണ്ടു പിള്ളേരും ആയി.. കുട്ടികൾ രണ്ടായിട്ടും ലില്ലിക്കുട്ടി പഴയ ലില്ലിക്കുട്ടി തന്നെ ..
അങ്ങനെ ജോസൂട്ടിയുടെ മൂത്ത പെങ്ങളുടെ മകളുടെ കല്യാണം ഉറപ്പിച്ചു.പെങ്ങളും അളിയനും കൂടി കല്യാണത്തെ കുറിച്ച് സംസാരിക്കാനും ജോസൂട്ടിയെ കാണാൻ എത്തി.. പതിവുപോലെ നാത്തൂൻമാരെ ചെകുത്താൻ കുരിശ് കാണുന്ന പോലെ കണ്ടിരുന്ന ലില്ലിക്കുട്ടക്ക് ,തന്റെ കെട്ടിയോൻ അവർക്ക് കാശോ സ്വർണ്ണമോ കൊടുക്കും എന്നറിയാവുന്നതുകൊണ്ട് അങ്കലാപ്പിലായി. അവരെ കണ്ടപ്പോൾ ചിരിച്ചെങ്കിലും ലില്ലിക്കുട്ടിയുടെ മോന്ത കരിക്കലം പോലെ ആയി.. പെങ്ങൾക്കും അളിയനും ഊണ് കൊടുക്കാൻ ചിക്കൻ കറി വയ്ക്കാൻ ജോസൂട്ടിയും കൂടെ കൂടി.. രാത്രി ഊണ് കഴിക്കാൻ ചോറ് എടുത്ത് മേശപ്പുറത്ത് വച്ചു.. നാത്തൂനോട് ഉണ്ടായ എല്ലാ കുശുമ്പോടും കുന്നായ്മയോടും കൂടി ലില്ലിക്കുട്ടി ചിക്കൻ കറിയുമായി വന്നു.. പാത്രത്തിന്റെ കുഴപ്പമോ ലില്ലിക്കുട്ടിയുടെ കുഴപ്പമോ ചിക്കൻ കറി പാത്രം മേശയിൽ വച്ചതിന് കുറച്ച് ശക്തി കൂടി .ചിക്കൻ ചാറ് മേശപ്പുറത്ത് പൂക്കളമിട്ടു .. പെങ്ങളുളുടേയും അളിയന്റേയും മുഖം വല്ലാതെയായി ..
ജോസൂട്ടി ലില്ലിക്കുട്ടിയെ നോക്കി അടുക്കളയിലേക്ക് വരാൻ കണ്ണുകാണിച്ചിട്ട് അടുക്കളയിലേക്ക് പോയി.. ചാടിത്തുള്ളി ലില്ലിക്കുട്ടി അടുക്കളയിൽ ചെന്നതും ജോസൂട്ടി കഴുത്തിന് പിടിച്ച് ലില്ലിക്കുട്ടിയെ ഭിത്തിയോട് ചേർത്ത് നിർത്തി.. കണ്ണും മിഴിച്ച് ശ്വാസം മുട്ടി നിൽക്കുന്നതിടയിലും തന്റെ നേർക്ക് വരുന്ന ജോസൂട്ടിയുടെ മുട്ടുകാൽ ലില്ലിക്കുട്ടി കണ്ടു.. ഒരു തൊഴി കിട്ടിയാൽ നാണക്കേടാകും .. തനിക്ക് ആരുടേം മുമ്പിൽ വിലയുണ്ടാവില്ല. നാത്തൂൻ എല്ലാവരോടും പറഞ്ഞ് നടക്കുകയും ചെയ്യും.. ഒരു മിന്നായം പോലെ എല്ലാം ഓർത്തപ്പോൾ ലില്ലിക്കുട്ടിക്ക് ബോധം കെടാൻ തോന്നി .. പിന്നെ ഒട്ടും അമാന്തിച്ചിച്ചില്ല.. അടുത്തു കണ്ട പാത്രം കൈ നീട്ടി തട്ടി താഴെയിട്ടു കൊണ്ട് ഒറ്റ ബോധം കെടൽ..
തീരെ വെളിവും ബോധവും ഇല്ലാത്ത തന്റെ ഭാര്യ ബോധംകെട്ട് താഴെ വീണത് കണ്ട് ജോസൂട്ടിയും ഒരു നിമിഷം അന്തം വിട്ടുനിന്നു. പാത്രം താഴെ വീണ ഒച്ച കേട്ട് പെങ്ങളും അളിയനും ഓടി വന്നു.. ലില്ലിക്കുട്ടിയുടെ പോയ ബോധം തിരിച്ച് വരുത്താൻ നാത്തൂൻ മുഖത്ത് വെള്ളം തളിച്ചു.. വെള്ളം തളിച്ചിട്ടും അനങ്ങിയില്ല ലില്ലിക്കുട്ടി.. ലില്ലിക്കുട്ടി ആരാമോള് .. പാലം കുലുങ്ങിയാലും കേളൻ കുലുങ്ങൂല്ല എന്ന മട്ടിൽ ബോധം കെട്ട് കിടന്നു.. ഈ ബോധം വെള്ളം തളിച്ചാൽ വരില്ല എന്ന് മനസിലാക്കിയ ജോസൂട്ടി പണ്ട് സ്ക്കൂളിൽ പഠിക്കുമ്പോൾ സാറന്മാര് നുള്ളുന്ന പോലെ ലില്ലിക്കുട്ടിയുടെ പിൻഭാഗത്ത് ഒന്നു നുള്ളി ..പതുക്കെ ആ നുള്ളലിന്റെ ശക്തി ഒന്നു കൂട്ടി.. കുറച്ചു കൂടി കഴിഞ്ഞാൽ അത്രയും ഭാഗത്തെ തൊലി ജോസൂട്ടിയുടെ കൈയിൽ ഇരിക്കുമെന്ന് മനസ്സിലായ ലില്ലിക്കുട്ടി പതിയെ കണ്ണു തുറന്നു.. എന്നിട്ട് ജോസൂട്ടിയെ നോക്കി ഒരു വളിച്ച ചിരി പാസ്സാക്കി.. പാവം അളിയനും നാത്തൂനും ലില്ലിക്കുട്ടിക്ക് ബോധം വന്നതുകണ്ട് സന്തോഷിച്ചു.. കാര്യങ്ങൾ സംസാരിച്ചതിന് ശേഷം കുറച്ച് സ്വർണ്ണവും മണവാട്ടി പെണ്ണിന് (പെങ്ങളുടെ മകൾ) ഡ്രസ്സ് എടുക്കുന്നത് താനാണെന്നും ജോസൂട്ടി പറഞ്ഞു.. തന്റെ ബോധം കെടലും ,തനിക്ക് കിട്ടിയ ആ നുള്ളും, ഇനി ചിലപ്പോ കിട്ടാൻ സാദ്ധ്യതയുള്ള തൊഴിയും ഓർത്ത് ലില്ലിക്കുട്ടി ഒന്നും മിണ്ടാതെ നിന്നു..അടുത്ത ദിവസം രണ്ടു പേരോടും ഡ്രസ്സ് എടുക്കാൻ എത്താമെന്ന് പറഞ്ഞിട്ട് പെങ്ങളും അളിയനും അവർ തിരിച്ച് പോയി..
അങ്ങനെ പെങ്ങൾ പറഞ്ഞദിവസം ലില്ലിക്കുട്ടിയെയും കൂട്ടി മണവാട്ടി പെണ്ണിന് ഡ്രസ്സ് എടുക്കാൻ നഗരത്തിലെ പ്രശസ്തമായ ഒരു വസ്ത്രാലയത്തിൽ പോയി .. കൂടെ ലില്ലിക്കുട്ടിക്കും മക്കൾക്കും ഡ്രസ്സ് എടുക്കണം.. ജോസൂട്ടിയുടെ പെങ്ങളും മകളും കുറച്ച് ബന്ധുക്കളും അവിടെ എത്തിയിട്ടുണ്ടായിരുന്നു .. കടയിൽ ചെന്നതും സെയിൽസ് ഗേൾസ് അവരെ സ്വീകരിച്ചിരുത്തി.. സാരികൾ വാരി മുൻപിലിട്ടു. അതു കണ്ടപ്പോൾ ലില്ലിക്കുട്ടിയുടെ കുശുമ്പും കുശാഗ്രബുദ്ധിയും തലപൊക്കി .. ഡ്രസ്സ് എടുക്കുന്നത് നാത്തൂന്റെ മോൾക്കാണെങ്കിലും കാശു മുടക്കുന്നത് തന്റെ കെട്ടിയോനാണ്.. അപ്പോ തന്റെ ഇഷ്ടത്തിന് എടുത്താൽ മതി.. പെങ്ങൾ കൂടെ മകൾക്ക് ഇഷ്ടപ്പെടുന്ന സാരി ലില്ലിക്കുട്ടിക്ക് ഇഷ്ടപ്പെടില്ല ..അഥവാ ഇഷ്ടപ്പെട്ടാലും അവർക്ക് ഇഷ്ടപ്പെട്ടത് താൻ എടുക്കാൻ സമ്മതിക്കില്ലാ എന്ന് ലില്ലിക്കുട്ടി മനസ്സാൽ ഉറപ്പിച്ചു .. സെയിൽസ് ഗേൾ കൊച്ച് സാരി വിടർത്തിയും മടക്കിയും മടുത്തു .. ജോസൂട്ടി ഇതൊക്കെ മാറി നിന്ന് നിശബ്ദം കണ്ടു നിന്നു..
കുറേ നേരമായിട്ടും സാരി എടുക്കുന്നതിൽ ഒരു പുരോഗതിയും ഇല്ല.. ലില്ലിക്കുട്ടി തന്റെ കലാ പരിപാടി നിർബാധം തുടർന്നുകൊണ്ടിരുന്നു.. അവസാനം പെങ്ങളുടെ മകൾ തന്നെ തനിക്ക് ഇഷ്ടപ്പെട്ട മനോഹരമായ ഒരു സാരി എടുത്ത് ഇത് മതിയെന്ന് എവിടുന്നോ കിട്ടിയ ധൈര്യത്തിൽ പറഞ്ഞു.. നമ്മുടെ ലില്ലിക്കുട്ടിക്ക് അത് തീരെ പിടിച്ചില്ല.. ആ സാരി അവൾക്ക് ചേരില്ലെന്ന് ലില്ലിക്കുട്ടി തർക്കിച്ചു. ഇതൊക്കെ കണ്ട് എന്തു ചെയ്യണമെന്നറിയാതെ സെയിൽസ് ഗേൾ കൊച്ച് വിഷമിച്ചു നിന്നു..പെട്ടന്നാണ് ജോസൂട്ടി അവരുടെ അടുത്തേക്ക് വന്നത്.. മരുമകൾ എടുത്തു വച്ച സാരി തന്നെ പാക്ക് ചെയ്ത് ബില്ലടിച്ചോളാൻ സെയിൽസ് ഗേളിനോട് പറഞ്ഞു .. ലില്ലിക്കുട്ടിക്ക് അത് തീരെ ഇഷ്ടമായില്ല. തന്റെ അഭിമാനത്തിന് ക്ഷതമേറ്റത് ലില്ലിക്കുട്ടിയെ തെല്ല് ചൊടിപ്പിച്ചു ..
"ഓ..ഇതെന്റെ കെട്ടിയോനാന്നേ.. ജോസൂട്ടി ..ഇങ്ങേരുടെ പെങ്ങൾടെ മകൾക്കാ സാരി എടുക്കുന്നത്. അല്ലേലും ഇവറ്റകൾക്കൊന്നും തീരെ കളർ സെൻസില്ല "...
എന്ന ലില്ലിക്കുട്ടി ഇച്ചിരി ഉറക്കെ സെയിൽസ് ഗേളിനോട് പറഞ്ഞ് തിർന്നതും
പെട്ടന്നാണ് "പ്ടേ "എന്നൊരു ഒച്ച കേട്ടത്.. ലില്ലിക്കുട്ടിയുടെ മുൻപിൽ ജോസൂട്ടി വിറഞ്ഞു തുള്ളി നിൽക്കുന്നു. ലില്ലിക്കുട്ടി ഒരു കൈ കൊണ്ട് കവിൾ പൊത്തി നിൽക്കുന്നു. കണ്ണിൽ കൂടി കുടുകുടാ കണ്ണീര് വരുന്നുണ്ട്. കടയിലെ ജീവനക്കാരും കസ്റ്റമേഴ്സും അന്ധാളിച്ച് നിന്നു. അന്തം വിട്ട് നിന്ന എല്ലാവരെയും ജോസൂട്ടി ഒന്നു നോക്കി.. എന്നിട്ട് വളരെ സമാധാനത്തോടെ എല്ലാവരോടുമായി പറഞ്ഞു..
"അല്ല പിന്നെ.. നിവൃത്തിയില്ലെങ്കിൽ നീതിമാൻ എന്തു ചെയ്യും.. ഇതൊക്കെ തന്നെ ചെയ്യും."
ഈ ഡയലോഗ് കേട്ടതും ആ കടയിൽ വന്ന പല തരുണീമണികളും കൂടുതലൊന്നും വാരിവലിച്ചിട്ട് അവിടുത്തെ സെയിൽസ് ഗേൾസിനെ ബുദ്ധിമുട്ടിക്കാതെ പെട്ടന്ന് സാരിയുമെടുത്ത് കാശും കൊടുത്ത് വീട്ടിൽ പോയി ..
എന്നാലും ഇപ്പോഴും ലില്ലിക്കുട്ടിക്ക് ഒരു മാറ്റമൊന്നുമില്ല.. അടിച്ച വഴിയേ പോയില്ലെങ്കിൽ പോയ വഴിയേ അടിക്കുക എന്ന് പറഞ്ഞതുപോലെ ജോസൂട്ടി ഇന്നും ലില്ലിക്കുട്ടിയെ സ്നേഹിക്കുന്നു. (സഹിക്കുന്നു).. ലില്ലിക്കുട്ടിയുടെ ലീലാവിലാസങ്ങൾ ഇന്നും തുടരുന്നു.. അല്ലെങ്കിലും ജോസൂട്ടി സമാധാനപ്രീയനാണല്ലോ?

# കനവുകൾക്കുമപ്പുറം #

# കനവുകൾക്കുമപ്പുറം #
നിലാവുള്ള ആ രാത്രിയിൽ കടൽത്തീരത്ത് കൂടി ഹരിയോടൊപ്പം അവൾ നടന്നു.. അവൾ പറയുന്നതൊക്കെയും ഹരി സാകൂതം കേട്ടുകൊണ്ടിരുന്നു.. ആ നനുത്ത കാറ്റിൽ പറക്കുന്ന മുടിയിഴകൾ കോതിയൊതുക്കിക്കൊണ്ട് അവൾ കരയിലേക്ക് അടുക്കുന്ന വെള്ളിത്തിരമാലകളെ നോക്കി നിന്നു.. ഹരി ആ പൊടി മണലിൽ കൈകൾ രണ്ടും തലയ്ക്ക് പിന്നിൽ വച്ച് കണ്ണു ചിമ്മുന്ന നക്ഷത്രങ്ങളെ നോക്കിക്കിടന്നു.. അവനരികിലായി അവളും വന്നിരുന്നു.. കുറച്ച് നേരത്തേക്ക് അവർക്കിടയിലേക്ക് മൗനം കടന്നു വന്നു.. അതിനെ ഭഞ്ജിച്ചു കൊണ്ട് അവൾ പറഞ്ഞു. "വെള്ളി നിലാവ് പൊഴിച്ചു നിൽക്കുന്ന അമ്പിളിയോട് എനിക്ക് ഒറ്റക്കാലിൽ പാദസരം തീർക്കാൻ ഒരു ചീന്ത് ചോദിക്കണം. ഇന്ന് നമ്മളെ തഴുകിത്തലോടുന്ന നനുത്ത കാറ്റിനോട് ഈ കുളിരും സുഖമാണെന്ന് പറയണം ". ഹരി അത്ഭുതത്തോടെ അവളെ നോക്കി.. അവൾ നിലാവു പോലെ പുഞ്ചിരിച്ചു...
-------------------------------------
അവൾ കൃഷ്ണ. ജീവിതയാത്രയ്ക്കിടയിലാണ് അവൾ ഹരിയെ കണ്ടുമുട്ടുന്നത് .. ഒരിക്കൽ ഒരു നഗരത്തിലെ പ്രശസ്തമായ ഒരു ഐ ടി കമ്പനിയിൽ ഇന്റർവ്യൂ ന് പോയപ്പോൾ കണ്ടുമുട്ടിയതാണ് അവർ... സൗഹൃദ സംഭാഷണത്തിനിടയിൽ പരസ്പരം പരിചയപ്പെടുകയും ജോലി സംബന്ധമായ കാര്യങ്ങൾ അറിയാൻ നമ്പർ കൈമാറുകയും ചെയ്തിരുന്നു.. അന്നേ ദിവസം അവർ പിരിഞ്ഞെങ്കിലും ഒരാഴ്ച്ചയ്ക്ക് ശേഷം ഹരി അവളെ വിളിച്ചു.. പങ്കെടുത്ത ഇന്റർവ്യൂവിൽ അവന് സെലക്ഷൻ കിട്ടിയെന്നും രണ്ടു ദിവസത്തിന് ശേഷം അവൻ ജോലിക്ക് ജോയിൻ ചെയ്യുമെന്നും പറയുവാനായിരുന്നു അത്.. അന്നത്തെ ഇന്റർവ്യൂവിൽ താനും സെലക്ട് ചെയ്യപ്പെട്ടന്നും രണ്ടു ദിവസത്തിനുള്ളിൽ താനും ജോലിക്ക് ജോയിൻ ചെയ്യുമെന്നും അവളും അറിയിച്ചു.. രണ്ടു ദിവസത്തിനു ശേഷം ജോലി സ്ഥലത്ത് കാണാമെന്ന് പറഞ്ഞ് ഹരി ഫോൺ വച്ചു..
രണ്ടു ദിവസത്തിന് ശേഷം കൃഷ്ണ ജോലിക്ക് ജോയിൻ ചെയ്തു. അതേ ബിൽഡിംങ്ങിൽ രണ്ടാമത്തെ നിലയിലായിരുന്നു ഹരിയുടെ ഓഫീസ് . അഞ്ചു മണിക്ക് അവൾ ഓഫീസ് വിട്ടിറങ്ങുമ്പോൾ ഹരി പുറത്ത് കാത്തുനിൽപ്പുണ്ടായിരുന്നു .. അവർ പരസ്പരം നോക്കി പുഞ്ചിരിച്ചു..
''ജോലി കിട്ടിയ ചിലവൊന്നും ഇല്ലേ "? അവൻ അവളോട് ചോദിച്ചു..
"ചിലവ് ഉണ്ട്.. എന്റെ ആദ്യ സാലറി കിട്ടുമ്പോഴേക്കും എന്റെ വക ചിലവ് . ഇന്ന് ഹരിയുടെ ചിലവ് . അതു കൊണ്ട് വാ നമുക്ക് ഒരു കോഫി കുടിക്കാം ..'' അവൾ പറഞ്ഞു ..
രണ്ടു പേരും അടുത്ത കോഫി ഷോപ്പിൽ കയറി കോഫിക്ക് ഓർഡർ ചെയ്തതിന് ശേഷം അവിടെ ടേബിളിനോട് ചേർന്ന കസേരയിൽ ഇരുന്നു.
ജോലിക്ക് ജോയിൻ ചെയ്ത ആദ്യത്തെ ദിവസത്തെ കുറിച്ചും ജോലിയുടെ സ്വഭാവത്തെക്കുറിച്ചും ഹരി അവളോട് ചോദിച്ചു. ആദ്യ ദിവസമായതുകൊണ്ടും ആരേയും പരിചയമാകാത്തതു കൊണ്ടും മാത്രമേ ബുദ്ധിമുട്ടുള്ളൂ എന്ന് അവളും പറഞ്ഞു. സംസ്ഥാനത്തിന്റെ വടക്കേ അറ്റത്തെ ജില്ലയിൽ നിന്ന് വന്ന താൻ ഇവിടെ ഒരു ബന്ധുവിന്റെ വീട്ടിലാണ് താമസമെന്ന് ഹരി അവളെ അറിയിച്ചു. താനിവിടെ അടുത്ത് തന്നെയാണെന്നും വീട്ടിലുള്ളവരെ കുറിച്ചും കൃഷ്ണ പറഞ്ഞു.. അതിനടയിൽ എത്തിയ കോഫി കുടിച്ചു കൊണ്ട് കുറച്ച് കാര്യ കൂടി സംസരിച്ചത് ശേഷം അവർ യാത്ര പറഞ്ഞിറങ്ങി..
പിന്നീടുള്ള ഓരോ ദിവസങ്ങളിലും അവർ കൂടുതൽ കൂടുതൽ അടുത്തു ..പരസ്പരം എല്ലാ കാര്യങ്ങളും തുറന്ന് പറഞ്ഞു. ആകർഷകമായ മുഖവും, ഹരിയുടെ സൗമ്യതയുള്ള പെരുമാറ്റവും ,സംസാരവും ഓഫീസിലെ മറ്റുള്ളവരെക്കാൾ അവളെ ആകർഷിച്ചു.ഹരിയുടെ ചെറുപ്പകാലത്തെ കുറിച്ചും അമ്മയെയും അച്ഛനെയും സഹോദങ്ങളെയും പറ്റി അവളോട് പറഞ്ഞു .. ജീവിതത്തിൽ നേരിടേണ്ടി വന്ന കാര്യങ്ങളെ പറ്റി.. സ്കൂൾ ജീവിതത്തെ പറ്റി.. കൂട്ടുകാരെ പറ്റി..പഠിക്കുന്ന കാലത്ത് ഒപ്പം നിൽക്കേണ്ട കൂട്ടുകാർ അവന്റെ ഇല്ലായ്മ കണ്ട് മനപ്പൂർവ്വം അകറ്റി നിർത്തിയത് പറയുമ്പോൾ ഹരിയുടെ മനസിലെ വിങ്ങൽ അവൾക്ക് കാണാമായിരുന്നു. ഇന്ന് അവർക്കൊക്കെയും ഒരു പടിമേലെയാണ് താന്നെന്ന് പറയുമ്പോൾ അവന്റെ കണ്ണുകളിൽ ആത്മവിശ്വാസം തുടിച്ചിരുന്നു..
ജീവിതത്തിലെ സൗഭാഗ്യങ്ങൾ എല്ലാം നഷ്ടപ്പെട്ട് ... ഒന്നുമില്ലായ്മയെ ധൈര്യത്തോടെ നേരിട്ട ആ നിമിഷത്തെപ്പറ്റി .. ആസ്വദിച്ചു നടക്കേണ്ട കൗമാരയ്യവനങ്ങൾ കുടുംബത്തിന് വേണ്ടി മറന്നതിനെ പറ്റി .. ഇതൊന്നും പറയുമ്പോഴും അവന്റെ വാക്കുകളിൽ നിരാശയോ ദുഃഖമോ ഒന്നുമില്ലായിരുന്നു .. ആത്മവിശാസവും അഭിമാനവും അവന്റെ വാക്കുകളിൽ നിഴലിച്ചിരുന്നു.. "അന്നത്തെ ഒന്നുമില്ലായ്മയാണ് എന്റെ ജീവിതത്തിൽ എല്ലാം നേടിത്തത്തന്നത് .. അന്നങ്ങനെ സംഭവിച്ചിരുന്നെങ്കിൽ ഞാനിന്ന് ഒന്നുമാകില്ലായിരുന്നു "എന്ന് ഹരി പറയുമ്പോൾ ആ വാക്കുകളിലെ ഊർജ്ജം അവളിലേക്ക് കൂടി പകർന്നു കിട്ടിയിരുന്നു .. അച്ഛനെ കുറിച്ച് ..അമ്മയെ കുറിച്ച്...സഹോദരിയെ കുറച്ച് .. പിന്നെ അവന്റെ ദേവിയെ കുറിച്ച്..അവളെ പറ്റി പറയുമ്പോൾ അവന്റെ കണ്ണുകൾ തിളങ്ങിയുരുന്നു .. തന്റെ മോശം അവസ്ഥയിലും തന്നെ വിട്ടു പോകാതെ ഇന്നും തനിക്ക് വേണ്ടി മാത്രം കാത്തിരിക്കുന്ന അവളെ പറ്റി പറയുമ്പോൾ അവളോട് ഉള്ള അഗാധമായ സ്നേഹം അവന്റെ മുഖത്ത് നിന്ന് വായിച്ചെടുക്കാൻ അവൾക്ക് കഴിഞ്ഞു ..
അവൾക്കുമുണ്ടായിരുന്നു പറയാൻ.. സാധാരണ ഒരു കുടുംബത്തിലെ മൂത്ത മകൾ.. തനിക്ക് താഴെ ഒരു അനിയനും അനിയത്തിയും .. അച്ഛൻ അമ്മ.. പഠിച്ചു ജോലി വാങ്ങണം സ്വന്തം കാലിൽ നിൽക്കണം എന്നായിരുന്നു ആഗ്രഹം. തന്നെ നല്ല സുഹൃത്തായി കാണുന്ന, എല്ലാം തുറന്ന് പറയാൻ കഴിയുന്ന, മനസ്സിനിണങ്ങിയ ഒരാളെ വിവാഹം കഴിക്കണം .. അതൊക്കെ മാത്രമായിരുന്നു കൃഷ്ണയുടെ ആഗ്രഹങ്ങൾ ..
അങ്ങനെ കൊച്ചു കൊച്ചു പിണക്കങ്ങളും ഇണക്കങ്ങളും തമാശകളുമൊക്കെയായി അവരുടെ ദിവസങ്ങൾ കടന്നു പോയി.. ഇതിനിടെ അവളെപ്പോഴോ ഹരിയെ ഇഷ്ടപ്പെട്ടു തുടങ്ങിയിരുന്നു ..
അങ്ങനെ ഒരു ദിവസം സംസാരത്തിനിടയിൽ ഹരിയോട് കൃഷ്ണ ചോദിച്ചൂ.. ഞാനൊന്നു ചോദിച്ചാൽ ഹരി പിണങ്ങുമോ?
അവൻ ചോദ്യരൂപേണ അവളെ നോക്കി..
"എനിക്കൊന്ന് പ്രണയിക്കണം ..ഞാൻ ഹരിയെ പ്രണയിച്ചോട്ടെ? "
അവൻ ഒരു നിമിഷം അന്തം വിട്ട് അവളെ നോക്കി..
"കടൽ കാണാത്ത പെൺകുട്ടിയിലെ അന്നയെ പോലെ .. ഉപാധികളൊന്നുമില്ലാതെ... ഒരു കരാർ അടിസ്ഥാനത്തിൽ ".. അവൾ തുടർന്നു ..
ഹരി ഒന്നു പുഞ്ചിരിച്ചു.. " ശരി കേൾക്കട്ടെ എന്തൊക്കെയാണ് നിന്റെ കരാറുകൾ "
ഒന്നിനും നിർബന്ധിക്കരുത്.. അവരോട് മിണ്ടരുത് ഇവരോട് മിണ്ടരുത് എന്നൊന്നും പറയരുത്. എപ്പോഴും നിന്നെ മാത്രം വിചാരിച്ചിരിക്കണം എന്ന് പറയരുത്. എന്നും കൃത്യസമയത്ത് ഫോൺ ചെയ്യാൻ പറയരുത്. ഉമ്മ തരുമോ എന്ന് ചോദിക്കരുത്.. പിന്നെ സാൾട്ട് ആന്റ് പെപ്പർ സിനിമയിലെ പോലെ .. "ഹലോ മോളെ ഇന്ന് ഏത് ഡ്രസ്സാ ഇട്ടിരിക്കുന്നേ" എന്നൊന്നും ചോദിക്കരുത്... പിന്നെ ഏറ്റവും പ്രധാനം മുഖപുസ്തകത്തിന്റെ പാസ്സ് വേഡും ചോദിക്കരുത്.. അവൾ ചിരിച്ചു കൊണ്ട് പറഞ്ഞ് നിർത്തി...
ഇതെല്ലാം കേട്ട് .. "ഇതിലും ഭേദം ഞാൻ ഒരു സർവ്വേ കല്ലിനെ പ്രണയിക്കുന്നതാണ് നല്ലത് " എന്ന ഹരിയുടെ മറുപടി കേട്ട് അവൾ പൊട്ടിച്ചിരിച്ചു.. ചിരിക്കുന്ന അവളെ നോക്കിയിട്ട് എന്തോ പറയാൻ വന്ന ഹരിയെ അവൾ തടഞ്ഞു..
"ഹരി.. എനിക്കറിയാം നീയെന്താണ് പറയുക എന്ന് ..നിനക്ക് നിന്റെ ദേവിയെ അല്ലാതെ മറ്റാരെയും പ്രണയിക്കാൻ കഴിയില്ല.. അത് ഞാൻ മനസ്സിലാക്കുന്നു .. പിന്നെ ഒരിക്കലും അന്നയെ പോലെ ആവാൻ എനിക്കും ഒരിക്കലും കഴിയില്ല.. "
നീ പറഞ്ഞത് ശരിയാണ് കൃഷ്ണേ.. എനിക്ക് എന്റെ ദേവിയെ അല്ലാതെ മറ്റാരെയും പ്രണയിക്കാൻ കഴിയില്ല.. നീ അന്നയെ പോലെ ആണെങ്കിലും എനിക്കൊരിക്കലും അതിന് കഴിയില്ല. കാരണം സ്നേഹത്തിന്റെ കാര്യത്തിൽ ഞാൻ സ്വാർത്ഥനാണ്..എല്ലാവരേയും പോലെ ..
"ശരിയാണ് ഹരി.. എനിക്കും ഒരിക്കലും അന്നയാകാൻ കഴിയില്ല.. അതുപോലെ ചിന്തിക്കാനും പ്രണയിക്കാനും അന്നയ്ക്ക് മാത്രമേ കഴിയൂ..അന്നയെ പോലെ അന്ന മാത്രം .. എന്നോ എപ്പോഴോ തന്റെ സ്വാർത്ഥത കൊണ്ടും പിടിവാശികൾ കൊണ്ടും നഷ്ടപ്പെട്ടു പോയ കുറെ നല്ല നിമിഷങ്ങളെപ്പറ്റി അവർ വൃഥാ ചിന്തിച്ചു നെടുവീർപ്പിട്ടു .. എന്നിട്ടു പറഞ്ഞു ..
"എങ്കിൽ ശരി പ്രണയം വേണ്ട .. എന്നും നമുക്ക് നല്ല സുഹൃത്തുക്കളായിരിക്കാം."
അവളുടെ കണ്ണുകളിലെ ഭാവം കണ്ടിട്ടാണോ എന്തോ ഹരി പറഞ്ഞു.. " "ഇല്ല കൃഷ്ണ ഒരിക്കലും കഴിയില്ല.. ഒരു സ്ത്രീക്കും പുരുഷനും എല്ലാ കാലവും നല്ല സുഹൃത്തുക്കളായിരിക്കാൻ കഴിയില്ല.. എപ്പോഴെങ്കിലും ചിന്തകൾ വഴി മാറും. വികാരങ്ങൾക്ക് അടിമപ്പെടും."
അത് കേട്ട് കുറച്ച് നേരം നിശബ്ദമായി എന്തോ ചിന്തിച്ചിട്ട് അവൾ പറഞ്ഞു. "അത് കാലം തെളിയിക്കട്ടെ.." അതു പറയുമ്പോൾ അവളുടെ ഭാവം മറ്റൊന്നായിരുന്നു എന്നത് അവൻ ശ്രദ്ധിച്ചു.
ഋതുഭേദങ്ങൾ ഓരോന്നായി കൊഴിഞ്ഞു പോയി .. ദിവസങ്ങൾ കഴിയുന്തോറും ആ സൗഹൃദത്തിന് ആഴം കൂടി വന്നു.. ഹരി എപ്പോഴും നല്ല സുഹൃത്തായും എട്ടനായും ചില സമയങ്ങളിൽ തെറ്റുകൾ ചൂണ്ടിക്കാട്ടുന്ന ഗുരുവായും അവളുടെ കൂടെ നിന്നു.. മറ്റെന്തിനേക്കാളും അവൾ ആ സൗഹൃദം ഇഷ്ടപ്പെട്ടിരുന്നു..
അന്നൊരു വൈകുന്നേരം അവൾ ഹരിയെ കണ്ടുമുട്ടുമ്പോൾ അവൻ വളരെ സന്തോഷത്തിലായിരുന്നു .. മുൻപ് പങ്കെടുത്ത ഇന്റർവ്യൂ യിൽ താൻ സെലക്ടായി എന്നും ഒരു അമേരിക്കൻ ഐടി കമ്പനിയിൽ ഉയർന്ന ശമ്പളത്തിൽ ജോലി ലഭിച്ചുവെന്നും അവൻ അവളോട് പറഞ്ഞു. അവന്റെ സന്തോഷത്തിന് അതിരില്ലായിരുന്നു.. അടുത്ത ആഴ്ച്ച തന്നെ ജോലിക്ക് ജോയിൻ ചെയ്യണം...തന്റെ സ്വപ്നങ്ങളെല്ലാം യാഥാർത്ഥ്യമാകാൻ പോകുന്നു .. അച്ഛന്റെ സ്ഥാനത്ത് നിന്ന് അനിയത്തിയുടെ വിവാഹം നടത്തണം .. നഷ്ടപ്പെട്ടതെല്ലാം തിരിച്ച് പിടിക്കണം. അവസാനം ആഗ്രഹിച്ചവളെ സ്വന്തമാക്കണം.. അവന്റെ സന്തോഷത്തിൽ അവളും പങ്കു ചേർന്നു..
ഒരു മേശയ്ക്കിരുവശവും ഇരുന്ന് ഓരോ ഐസ്ക്രീമും കഴിച്ച് ആ സന്തോഷം പങ്കിടുമ്പോൾ അവൾ അവനോട് ചോദിച്ചു.. "ഹരി .. നിന്നെ എനിക്ക് ഇഷ്ടമാണെന്ന് നിനക്ക് അറിയാം. ഞാൻ മുൻപ് പലരെയും കണ്ടിട്ടുണ്ട് .. ഒരു നേരമ്പോക്കിന് വേണ്ടിയും കാര്യസാധ്യത്തിന് വേണ്ടിയും സ്ത്രീകളെ സമീപിക്കുന്നവരെ .. കാര്യം കഴിഞ്ഞ് ഉപേക്ഷിക്കുന്നവരെ .. പക്ഷെ നീ ഞാൻ പ്രണയിക്കട്ടെ എന്ന് ചോദിച്ചിട്ടു പോലും.. നിനക്ക് വേണമെങ്കിൽ എന്നെ പറ്റിച്ചിട്ട് പോകാമായിരുന്നു .. പക്ഷെ നീ എന്തുകൊണ്ട് അങ്ങനെ ചെയ്തില്ല .. "
അവൻ ഒരു നിമിഷം ചിന്തിച്ചു .. എന്നിട്ട് പറഞ്ഞു ..
" കൃഷ്ണേ..ഇല്ലായ്മയിലും എന്റെ അച്ഛൻ പഠിപ്പിച്ച ചില നല്ല കാര്യങ്ങൾ ഉണ്ട്.. മനുഷ്യരെ മനുഷ്യരായി കാണാനും.. മറ്റുള്ളവരോട് നന്നായി ഇടപഴകാനും ..എനിക്കും അമ്മയും അനുജത്തി ഉള്ളതുകൊണ്ട് മറ്റു സ്ത്രീകളെ ബഹുമാനിക്കുവാനും .. പിന്നെ ചിലത് .. അത് പൈതൃകമായി കിട്ടിയ ചില നന്മകൾ അത് നമ്മുടെ രക്തത്തിൽ അലിഞ്ഞ് ചേർന്നിട്ടുണ്ടാകും .. ഒരിക്കലും നമ്മളെ വിട്ട് പോകാത്ത നല്ല ഗുണങ്ങൾ..അതെല്ലാം മറന്ന് ഞാനെന്തെങ്കിലും തെറ്റ് ചെയ്താൽ എന്റെ അച്ഛൻ പഠിപ്പിച്ച മൂല്യങ്ങളോട് .. എന്റെ അച്ഛന്റെ ആത്മാവിനോട് ഞാൻ ചെയ്യുന്ന ഏറ്റവും വലിയ തെറ്റായിരിക്കും .."
അതു കേട്ടപ്പോൾ അവളുടെ കണ്ണുകൾ നിറഞ്ഞു ..ഹരിയെ തന്റെ ഏറ്റവും നല്ല സുഹൃത്തായി കിട്ടിയതിൽ അവൾക്ക് അഭിമാനം തോന്നി ..
------------------------------------------------------------
നാളെ രാവിലെ ഹരിക്ക് വീട്ടിലേക്ക് മടങ്ങിപ്പോകണം.. വീട്ടിൽ ചെന്ന് മൂന്നാല് ദിവസങ്ങൾക്ക് ശേഷം അമേരിക്കയിലേക്ക് .. അതിന് മുൻപ് അവസാനമായി ഒന്നു കാണുവാൻ വേണ്ടിയാണ് ഹരിയോട് അവൾ കടൽത്തീരത്ത് വരാൻ പറഞ്ഞത് .. കരയെ പുൽകി മടങ്ങിപ്പോകാൻ വരുന്ന തിരമാലകളെ നോക്കിയിരിക്കുന്ന കൃഷ്ണയോട് ഹരി പറഞ്ഞു.. "നേരം ഒരുപാടായി നമുക്ക് പോകാം.. " ആ നനഞ്ഞ മണലിൽ നിന്ന് എഴുന്നേറ്റ് അവർ നടന്നു. കൃഷ്ണ ഒരക്ഷരം സംസാരിച്ചില്ല..
കൃഷ്ണേ.. നിന്നോടൊരു കാര്യം പറയാനുണ്ടായിരുന്നു. എന്താണ് എന്ന ഭാവത്തിൽ അവൾ അവനെ നോക്കി.. അന്ന് ആദ്യമായി അവളുടെ രണ്ടു കൈകളും ചേർത്തു പിടിച്ചു കൊണ്ട് അവൻ പറഞ്ഞു.
"അന്ന് നീയെന്നോട് പറഞ്ഞു .. നമുക്ക് നല്ല സുഹൃത്തുക്കളാകാം എന്ന് .. അന്ന് ഞാൻ നിന്നോട് പറഞ്ഞിരുന്നു ഒരിക്കലും സ്ത്രീക്കും പുരുഷനും നല്ല സുഹൃത്തുക്കളാകാൻ കഴിയില്ല എന്ന് .. ഒരു സ്ത്രീയുടെ പ്രണയം നിറഞ്ഞ നോട്ടമോ..വാക്കുകളോ സ്പർശനമോ മതി ഒരു പുരുഷനെ വികാരാധീനനാക്കാൻ.. സാഹചര്യങ്ങൾ ഉണ്ടായിട്ടും നീയങ്ങനെ പെരുമാറിയില്ല .. ഒരുപാട് ഇഷ്ടമുണ്ടായിട്ടും നീയൊരിക്കലും എന്നോടുള്ള നിന്റെ ഇഷ്ടം പുറത്ത് കാണിച്ചില്ല. നീയെന്നെ എല്ലാ അർത്ഥത്തിലും മനസ്സിലാക്കി.. നീയെനിക്ക് തെളിയിച്ചു തന്നു.. ഒരു സ്ത്രീക്കും പുരുഷനും എന്നും നല്ല സുഹൃത്തുക്കളായിരിക്കാം എന്ന സത്യം.. എന്നും എപ്പോഴും നീയെന്റെ നല്ല കൂട്ടുകാരി ആയിരിക്കും. ഞാൻ ലോകത്തിന്റെ ഏതു കോണിൽ പോയാലും എന്റെ വിശേഷങ്ങൾ ഞാനും നിന്റെ വിശേഷങ്ങൾ നീയും പങ്കുവയ്ക്കും .. അതു കൊണ്ട് ഈ വേർപിരിയൽ ഓർക്കുമ്പോൾ നീ സങ്കടപ്പെടരുത്.. ഇത് താല്ക്കാലികം മാത്രമാണ്.. നമ്മൾ തമ്മിലുള്ള അകലം കൂടിയാലും മനസ്സുകൾ തമ്മിലുള്ള അകലം കൂടില്ല. "
അവൾ പുഞ്ചിരിയോടെ തലയാട്ടി..
"എന്നാൽ വാ നമുക്ക് പോകാം."
അവളുടെ കൈവിട്ട് അവൻ മെല്ലെ നടന്നു.. തന്നിൽ നടന്നകലുന്ന തന്റെ പ്രിയ സൗഹൃദത്തെ നോക്കി അവൾ ഒരു നിമിഷം നിന്നു.. സ്വാന്തനിപ്പിക്കാനെന്ന പോലെ ഒരു കുഞ്ഞിളം കാറ്റ് അവളെ തഴുകി തലോടി കടന്നു പോയി... അപ്പോഴും അങ്ങാകാശത്ത് താരകക്കുഞ്ഞുങ്ങൾ ആ അപൂർവ്വ സൗഹൃദത്തെ നോക്കി കണ്ണു ചിമ്മുന്നുണ്ടായിരുന്നു .. കരയെ ചുംബിക്കാനെത്തിയ ആ വെള്ളിത്തിരമാലകൾ അവളുടെ ഒറ്റക്കാലിലെ പാദസരത്തിൽ വന്ന് ചുംബിച്ച് മടങ്ങിപ്പോയ്ക്കൊണ്ടിരുന്നു ..
ചിത്രദീപ...

DON'T MISS

Nature, Health, Fitness
© all rights reserved
made with by templateszoo