ചേലക്കരയുടെ ഹരിത മനോഹാരിതയിൽ ഒരു പാവം ബാലന്റെ മൂന്നാമത്തെ മകനായിട്ടാണ് എന്റച്ഛൻ ജനിച്ചത്.ബാലൻ. കെ.നായരൊന്നുമല്ലെങ്കിലും രണ്ടു ഭാര്യമാരിലായി ഏഴുമക്കളായിരുന്നു അച്ഛാച്ഛന്റെ സമ്പാദ്യം.മൂന്നാണും നാലു പെണ്ണും.സഹ്യപർവ്വതവും എവറസ്റ്റും മനസ്സുവെച്ചാൽ ഒന്നിച്ചു ചേർക്കാമെങ്കിലും രണ്ടു പെണ്ണുങ്ങൾ പ്രത്യേകിച്ചും രണ്ടു ഭാര്യമാരെ ഒരിക്കലും ഒന്നിച്ചു ചേർക്കാനാവില്ല എന്നു നന്നായിയറിയുന്ന അച്ഛാച്ഛൻ ദശരഥൻ രണ്ടു ഭാര്യമാർക്കു രണ്ടു നാട്ടു രാജ്യങ്ങൾ പകുത്തു നൽകി.ചേലക്കരദേശം ആദ്യ പട്ടമഹിഷിക്കും കട്ടിലപ്പൂവ്വം ദേശം രണ്ടാമത്തെ രാജ്ഞിക്കും നൽകി മഹാരായാവ് മികച്ച ഭരണകർത്താവായി.അങ്ങനെ അച്ഛനും രണ്ടു പെങ്ങന്മാരും അച്ഛമ്മയടക്കം കട്ടിലപ്പൂവ്വം രാജ്യത്തേക്കു പാലായനം ചെയ്തു.സാമാന്യം നല്ല കുരുത്തക്കേടുകളും രാഷ്ട്രീയവുമൊക്കെയായി അച്ഛൻ അവിടെ വളർന്നു വളർന്നു മോന്തായമടക്കം വളഞ്ഞു തുടങ്ങിയപ്പോ അപ്പോത്തന്നെ പിടിച്ച് കൂച്ചു വിലങ്ങിട്ടു.പിന്നേം കുട്ടിക്കളി തീരാഞ്ഞതിനാല് ആ രാജ്യത്ത് നിന്ന് അച്ഛനെ രാജകുടുംബം തുരത്തിയോടിച്ചു.അങ്ങനെ തെക്കു ദേശത്തെത്തി പുള്ളി ജീവിതം തുടങ്ങി.
അങ്ങനെ ഞാനും അനിയനും ജനിച്ചു അംഗ സംഖ്യ വർദ്ധിപ്പിച്ചുവെങ്കിലും ഞങ്ങളു മക്കള് പഴയ ആ നാട്ടു രാജ്യം കാണണതു മുതിർന്നതിനു ശേഷമാണ്.ഞങ്ങള് കഷ്ടപ്പെട്ട് കണ്ടു പിടിക്കേണ്ടി വന്നത് ചരിത്രത്താളുകളിൽ എഴുതിയിടാൻ എന്നേ പഠിപ്പിച്ച ചരിത്രാദ്ധ്യാപകനും സാധിക്കാതെ പോയി.
അങ്ങനെ ആ സുദിനം വന്നെത്തി.അച്ചന്റെ മൂത്ത ചേച്ചിയുടെ മകന്റെ കല്യാണം.ഹരിച്ചേട്ടനും മാലതി ചേച്ചിയും.അച്ഛൻ കുടുംബത്തിലെ ആകെ അടുത്തറിയാവുന്നതവരും വലിയച്ഛന്റെ മകൾ ശാലുവും മാത്രമേ ഞങ്ങൾക്കുണ്ടായിരുന്നുള്ളൂ.പൈങ്കുളത്താണ് അവരുടെ വീട്.ചേട്ടൻ കല്യാണം കഴിക്കുന്നത് കോഴിക്കോടു നിന്നാണ്.ചെറുപ്പത്തിൽ ചെരിപ്പു കുത്താനായി കോഴിക്കോടെത്തിയ ചേട്ടനവിടെ ചെരുപ്പു കുത്തിനൊപ്പം ഒരു തിരുവാതിര ഞാറ്റുവേലയ്ക്കൊരു പ്രണയക്കമ്പൊടിച്ചും കുത്തി.കുത്തിയ കമ്പ് വളർന്ന് വൈദ്യുത കമ്പിയില് തട്ടാതിരിക്കാനവരു പിടിച്ചു കെട്ടിയിടുന്ന ചടങ്ങിനാണ് ഞാനും എന്റനിയനും സാക്ഷിയാവാൻ പോയത്.ചെറുതുരിത്തിയില് ഗേയ്റ്റടവുണ്ടാവുമെന്ന് പറഞ്ഞു ചേലക്കര വഴി ഞങ്ങൾ കോഴിക്കോടേക്കു പുറപ്പെട്ടു.ഇന്നത്തേപ്പോലെയല്ല അന്നൊക്കെ താലികെട്ടെന്ന കർമ്മം കാണാനുള്ള ശക്തിയുണ്ടായിരുന്നതു കൊണ്ട് മുൻ നിരയിലിരുന്നു വീഡിയൊ പിടിച്ചു.കെട്ടു കഴിയുന്നതിനുമുമ്പ് തന്നെ വയറിനകത്തു വിശപ്പിന്റെ വിളി കേട്ടു ഞാനും അനിയനും വലിയച്ഛനും മകളും കൂടി കസേര കളിക്കോടി.കുറച്ചു നേരത്തെ വാശിയേറിയ മത്സരത്തിനൊടുവിൽ ഞങ്ങൾ നാലുപേരും കൂടി ഒരു മേശയ്ക്കു ക്വാറം തികച്ചു.
നല്ല വിശപ്പുണ്ടായിരുന്നതു കൊണ്ടാവും ഇലയിട്ടിട്ടും അര മണിക്കൂറ് കഴിഞ്ഞിട്ടും വിളമ്പലു കാരെ ഒരാളേയും ആ ഭാഗത്തേക്കു കാണാനില്ല.ഇതെന്തര് ഭാരത് ഹോട്ടലില് പോയാലിതിലും നേരത്തേ കിട്ടുമല്ലോന്നോർത്ത് ഞാൻ വിളമ്പുന്നവരുടെ മാതാപിതാക്കളെ നന്ദി പുരസ്സരം മനസ്സില് സ്മരിച്ചു.സ്മരണകള് തരംഗരൂപേണ അവരു കേട്ടതു കൊണ്ടാണോ എന്നറിയില്ല ഏറ്റുമീൻ കയറുന്നപോലെ ഒന്നിനു പുറകേ അവരവിടേക്കു വന്നു.ആവി പറക്കുന്ന കോഴി ബിരിയാണി വിളമ്പിയവര് ദൈവങ്ങളായ് മറഞ്ഞു.ആക്രാന്തം കൊണ്ടാണോ വിശപ്പു കൊണ്ടാണോ എന്നൊന്നുമറിയില്ലെങ്കിലും എന്റെ കണ്ണുകള് തള്ളി പുറത്തേക്കു വന്നു.മുന്നിലിരിക്കണത് അനിയനാ വിശന്നാലവന് കണ്ണു കാണില്ല കണ്ണാണെന്നൊന്നും നോക്കൂലാ മുട്ട പുഴുങ്ങിയത് വിഴുങ്ങുന്നപോലവനിതും വിഴുങ്ങുമെന്ന ഭയം മൂലം ഞാൻ മുഖമൊന്നു വെട്ടിച്ചു പിടിച്ചു.എനിക്കു മണിച്ചേട്ടനേപ്പോലെ അന്ധനാവാൻ അറിഞ്ഞൂടെന്നവനറിയില്ലല്ലോ.അങ്ങനെ ഇടതു കൈയ്യില് താലവുമേന്തി മുമ്പേ മറഞ്ഞ ദൈവങ്ങള് പിന്നേം അവിടവിടെയായി പ്രത്യക്ഷപ്പെട്ടു.ഇതുവരേയും കേരളാ നിയമസഭാ തിരഞ്ഞെടുപ്പിനു പോലും കാണാത്ത കനത്ത പോളിംഗ്!
അങ്ങനെ ഞങ്ങളുടെ അടുത്തേക്കും ഒരു തമ്പാച്ചനെത്തി പ്ലേറ്റില് റൈസ് മലകൾ വീണ്ടുമുയർന്നു.വിളമ്പിയ തമ്പാച്ചനോട് അനിയൻ സവിനയം മൊഴിഞ്ഞു.ചേട്ടാ ഇത്തിരി സർല്ലാസ്...
സർല്ലാസോ? ??
അയിനെന്താണ് മ്വാനേ ജ്ജ് ബെസ്മിക്കണ്ടാ ഇനീം അനക്ക് ചോറ് തരൂന്ന് ...
മൂപ്പര് പിന്നേയും അവന്റെ റൈസ് മല വലുതാക്കാനൊരുങ്ങി.
അയ്യോ ചേട്ടാ ഇതല്ല സർല്ലാസ്,,, സർല്ലാസാ വേണ്ടേ അനിയൻ പിന്നേയും അവന്റെ നയം വ്യക്തമാക്കി. ആ തമ്പാച്ചൻ മുഖം പുച്ഛപാത്രത്തിലേക്കു തട്ടിയിട്ട് വലിച്ചു വെച്ചു നടന്നു.പുറകിലെത്തിയ അച്ചാറു പാത്രക്കാരനോടും അനിയൻ തിരുവായ്കൊണ്ടു മൊഴിഞ്ഞു ചേട്ടാ ഇത്തിരി സർല്ലാസ്...
കഥകളിക്കാരന് വേഷം കെട്ടിയ ഭാവത്തോടെ ആ പാവം മുമ്പേ പോയ തമ്പാച്ചനെ വിളിച്ചു ടാ സുകോ ഈടെ കൊർച്ച് റൈസേയ്...
ആ തമ്പാച്ചൻ ഞങ്ങളുടെ മാതാപിതാക്കളെ സ്മരിച്ചോന്നൊരു സംശയമില്ലാതില്ല കടിച്ചാൽ പൊട്ടാത്ത കഠിനമായ എന്തോ വായിലിട്ട് ചവച്ചുകൊണ്ട് അനിയനു നേരെ കൈ നീട്ടി ഓന് ഞാനൊരു തവണ കൊടുത്തേനീ പിന്നേം ഓനിതു തന്ന്യാ പറേന്നേ ഓനെന്താ ആളെ മക്കാറാക്കാണോ...
അനിയന്റെ കണ്ണ് നിറുകയിൽ കയറി ഒളിച്ചിരിക്കുവാണോ എന്നൊരു സംശയം.ഞാനൊരു വലിയ സഹായം ചെയ്യുന്ന ഭാവത്തില് ഒരു അഞ്ചാറു കിലോയുടെ കട്ടിയെടുത്ത് തൊണ്ടയില് കുരുക്കി ചേട്ടാ സാലഡില്ലേ അതാ അവൻ ചോദിച്ചേ...
😏😏😏 പാവങ്ങൾ ഒന്നുമറിയില്ല.ആ തുലാസിന്റെ ആണിയൂരി ഒരു ചേട്ടൻ എന്റെ മുഖത്തേക്കരുളി അതെന്താ ??
എന്താണ് ആ സാനം അതൊന്നും ഇവ്ടെ ഇല്ല..
തേവ്യേ!!
ആരേലും വന്ന് ഈ മാറാല വലിച്ചൂരണേ!!
ആളുകള് ഞങ്ങളുടെ മേശയ്ക്കു ചുറ്റും കൂടി തുടങ്ങി.ഞങ്ങളെ രക്ഷിക്കാൻ വലിയച്ഛൻ കയറി പറഞ്ഞു.അതെ നമ്മുടെ കച്ചമ്പറേ കച്ചമ്പറ്!
!!!കച്ചമ്പറോ!!!
അകത്ത് വീണ കൈ കമ്പനിക്കടിച്ചപോലെ അവിടുള്ള നാലഞ്ച് പേര് കോറസ്സുപാടി...
ഞാൻ മെല്ലെ തിരിഞ്ഞു ഓടാനുള്ള വട്ടം കൂട്ടി വെടിയൊച്ച കാത്തു ജാഗരൂഗരനായി. കോഴിക്കോട്ടുന്ന് ആർക്കോ ഉഴിഞ്ഞു വെച്ച തല്ല് വാങ്ങേണ്ടി വരുമല്ലോ എന്തായാലും അടി ഉറപ്പ് എന്നാലും ഒന്നോടി നോക്കുന്നതില് തെറ്റില്ലാലോ എന്ന ചിന്തയില് വെടിശബ്ദം ശ്രദ്ധിച്ച് ഞാനിരുന്നു.ഓടിവയറിലൊളിച്ച നാവ് പുറത്തേക്ക് വലിച്ചിട്ട് അനിയൻ അവതരിപ്പിച്ചു തുടങ്ങി.അതേ ചേട്ടാ ഈ തൈരില്ലേ തൈര് ,ആ തൈരില് സബോളയൊക്കെ അരിഞ്ഞിട്ടിട്ട് തരില്ലേ അത്...
അതിനു കോറസ്സായി അവിടെ കൂടിയ ചെട്ടന്മാര് ശ്രുതിയിട്ട് ഒരഞ്ചരക്കട്ടിക്ക് ആശ്വാസ ശബ്ദത്തില് ആഞ്ഞു പാടി...
ആഹ്! തൈര് !!!
അതാണോ അതനക്ക് ബാ തൊർന്ന് ചോയ്ച്ചൂടാർന്നൊ പഹയാ!
ബെർതേ മനുശ്ശേനെ മക്കാറാക്കാന്...
ഇതു കേട്ടപ്പോഴാണ് എവിടേക്കോ പറന്നു പോയെന്റെ കിളികള് മെല്ലേ തിരിച്ചു വന്നത്.അഞ്ചു പത്തുമിനിട്ട് ഒരുരുള കയ്യിൽ പിടിച്ച് അണ്ണാക്കില് തള്ളണോ അതോ എഴുന്നേറ്റോടണോ എന്നു ചിന്തിക്കുന്നവന്റേ വേദന നിങ്ങൾക്കു മനസ്സിലാവില്ല സൂർത്തോളേ! വേദന മനസ്സിലാവില്ല.അതു മനസ്സിലാവണമെങ്കിൽ സെൻസസ് വേണം. അതിൽപിന്നെ എപ്പോൾ ബിരിയാണി കഴിച്ചാലും തൈര് !
അത് ഞാനിനി കഴിക്കൂലാ...
നഹീന്ന് പറഞ്ഞാ നഹീഹേ!
നന്ദൻ...
