Showing posts with label HakkeemVengoor. Show all posts
Showing posts with label HakkeemVengoor. Show all posts

ആട് i Hakkeem Vengoor‌

 

എനിക്ക്‌ മാത്രമല്ല വീട്ടിലെ എല്ലാവർക്കും ആട്ടിറച്ചി വലിയ ഇഷ്ടമാണ്‌. ഫുഡ്‌ വ്ലോഗ്‌ നോക്കിയല്ല ഞങ്ങൾ ആട്ടിറച്ചി വെക്കാറ്‌.
വീട്ടിലെ ഏല്ലാവരും ചേർന്ന് ഒരു വെപ്പാണ്‌.
ഉമ്മയും വല്ലിമ്മയും ഒക്കെ ആടു വെച്ചിരുന്ന ചേൽക്ക്‌.
ഒന്നരക്കിലോ മട്ടൻ വാങ്ങി കഴുകി വെള്ളം വാരാൻ വച്ചപ്പോഴാണ്‌ ഒരു ചങ്ങാതിയുടെ വിളി. ഒന്ന് പുറത്ത്‌ പോയാലോ?പാലക്കാടൻ ചൂടിൽ പോയി തണുത്ത പുഴവെള്ളത്തിൽ കുളിക്കാം...
പുതിയ നല്ല റോഡിലൂടെ പൂതി തീരുവോളം വണ്ടിയോടിക്കാം...
കുറച്ച്‌ ദിവസങ്ങളായി പുറത്ത്‌ പോയിട്ട്‌.
ചങ്ങാതിമാരോടൊത്തള്ള യാത്രക്ക്‌
ഇളയ ആട്‌ വരട്ടിയ രുചിയാണ്‌.
നേരിയ വിശപ്പ് തുടങ്ങിയപ്പോഴാണ്‌ അവൻ ഫുഡ്‌ വ്ലോഗിൽ കണ്ട
"യാക്കര മീൻകട"യെക്കുറിച്ച്‌ പറഞ്ഞത്‌.
മീൻ പൊരിച്ചതും നാടൻ ചോറും വെളുത്ത ആവോലിയും കരിമീനും എരിവുള്ള മീൻകറിയും ചേർത്ത്‌...
കഴിക്കാനിരുന്നപ്പോൾ നേരെ മുന്നിൽ ഒരു മോളും അച്ഛനും. പത്തിൽ എത്തിയിട്ടുണ്ടാവില്ല അവൾ.
സ്കൂൾ യൂണിഫോം പോലുള്ള ഒരു ഉടുപ്പാണ്‌. അച്ഛൻ തലമുടി എണ്ണതേച്ച്‌ മിനുക്കി ഒരു സൈഡിലേക്ക്‌
നല്ലപോലെ ചീകിവെച്ചിട്ടുണ്ട്‌.
അത്ര പ്രായമൊന്നുമില്ല, ചെറിയൊരു അച്ഛൻ.
അയാളുടെ മൂത്തമോളാവും. അവരും ഫുഡ്‌ വ്ലോഗ്‌ കണ്ട്‌ വന്നതാവും.
കരിമീനാണ്‌ അവർ എടുത്തിട്ടുള്ളത്‌. കരിമീൻ തന്നെയാണ്‌ നല്ല രുചിയുള്ളതും,
അയാൾ ഭക്ഷണം കഴിക്കുകയല്ല, മോള്‌ കഴിക്കുന്നത്‌ കണ്ടിരിക്കുകയാണ്‌. അത്ര സ്നേഹത്തോടെ
പതുക്കെയാണ്‌ അവൾ കഴിക്കുന്നത്‌.
അത്ര വാത്സല്യത്തോടെ,
കൊതിയോടെയാണ്‌ അയാളതു കണ്ടിരിക്കുന്നതും.
മീൻ കറിക്ക്‌ നല്ല എരിവുള്ളതു കൊണ്ടാവാം എന്റെ കണ്ണുകളിൽ കണ്ണുനീർ പൊടിയുന്നുണ്ട്‌...
കുന്തിപ്പുഴയുടെ തണുത്ത നീരൊഴുക്കിൽ മണിക്കൂറുകൾ നീന്തി നല്ല വിശപ്പുമായാണ്‌
അടുക്കളയിലെത്തിയത്‌.
ആട്ടിറച്ചി വയ്ക്കുന്ന പാത്രങ്ങളൊക്കെ കഴുകി വച്ചിട്ടുണ്ട്‌,
അടച്ചുവച്ച പാത്രങ്ങൾ ഓരോന്ന് തുറന്ന് നോക്കിയപ്പോൾ നല്ലപാതിയാണ്‌ പറഞ്ഞത്‌.
"മട്ടൻ വെച്ചിട്ടില്ല വാപ്പയുണ്ടാകുമ്പൊൾ വയ്ക്കാമെന്ന് പറഞ്ഞ്‌ മക്കളത്‌ ഫ്രിഡ്ജിലേക്ക്‌ മാറ്റി"
കണ്ണുകളിൽ നേരിയ ന്നനവ്‌ പടരാൻ എരിവുള്ള കറികൾ തന്നെ
വേണമെന്നില്ല....
ഹക്കീം വെങ്ങൂർ

പെൺകുട്ടി

Image may contain: 1 person

വീട്ടിലേക്ക്‌ പാലുകൊണ്ടുവരുന്ന പെൺകുട്ടിയെ പെൺകുട്ടി
യെന്നു വിളിക്കേണ്ട പ്രായം എന്നോ കഴിഞ്ഞിരുന്നു.
പതിനാറിനു മുമ്പാണോ പതിനെട്ട് തികഞ്ഞിട്ടാണോ
പെൺകുട്ടികളുടെ കല്യാണം നടത്തേണ്ടതെന്ന ചർച്ച സജീവമായതു കൊണ്ടാവാം കല്യാണം കഴിയാതെ മുപ്പത്‌ കഴിഞ്ഞ പെണ്ണിനെ പെൺകുട്ടിയായി തന്നെ തോന്നിയത്‌.
കണ്ണുകളിൽ നിന്ന് സ്വപ്നങ്ങൾ നഷ്ടപ്പട്ടിട്ടുണ്ടങ്കിലും മുഖത്ത്‌ ഒരു മായാത്ത പുഞ്ചിരി അവൾ കാത്തു സൂക്ഷിച്ചിരുന്നു
മൈസൂർ കല്യാണം കഴിച്ച്‌ ഒരു പെൺക്കുട്ടിയുമായി വീട്ടിൽ വന്നിരിക്കുന്ന ഇതാത്തയും, തുണിപീടികയിൽ നിൽപു
പണിക്കു പോകുന്ന അനിയത്തിയും,
ഉപ്പ മരിച്ചതിന്നു ശേഷം മറയിൽ ഇരുന്ന് പിന്നെ മറയിൽ തന്നെ ആയി പോയ ഉമ്മയും ചേർന്നതായിരുന്നു അവളുടെ ലോകവും കുടുംബവും.
അയൽപക്കത്തെ വീട്ടിലെ അടുക്കള പണിയിൽ നിന്ന് കിട്ടുന്ന കൂലിയും പാലു വിറ്റുക്കിട്ടുന്ന കാശും ചേർന്നിട്ടും ദാരിദ്ര്യം മാത്രം അവളുടെ വീടിനെ വിട്ടു പോവാൻ മടിച്ചു.
തെക്കുനിന്ന് വന്ന് നെന്മിനി മലയുടെ അപ്പുറത്ത്‌ ചെറിയ ആത്മീയ കച്ചവടം നടത്തുന്ന ഒരാളാണ് അവൾക്ക്‌‌ കല്യാണാലോചനയുമായി വന്നത്‌.
തെക്ക്‌ ഭാര്യയും രണ്ടു പെൺകുട്ടികളും ഉള്ള അയാൾക്ക് 'മാനസികരോഗി' എന്ന് അയാൾ പറഞ്ഞ ഭാര്യ ഈ കല്യാണം അറിയരുതെന്നു നിർബന്ധ മുണ്ടായിരുന്നു.
വർഷങ്ങളായി ഒരുക്കൂട്ടി വച്ച പൊന്നിനു പുറമെ കുറച്ചു കൂടുതൽ പൊന്നു കൂടി അയാൾ ആവശ്യപ്പെട്ടിരുന്നു.
മുഖത്ത്‌ അവൾ സൂക്ഷിച്ച പുഞ്ചിരിയും,
കണ്ണുകളിൽ സ്വപ്നങ്ങളും നിറഞ്ഞപ്പോൾ അവൾ അതീവ സുന്ദരിയായി.
ഒരു കനത്ത മഴക്ക്‌ ശേഷം ഞങ്ങളുടെ മതിൽ
പൊളിഞ്ഞതിൻറെ
അടുത്ത ദിവസം ഞങ്ങൾ മുറ്റത്ത്‌ നിൽക്കുമ്പോഴാണു അവൾ പാലുമായി വന്നത്‌.
അവളുടെ മായാത്ത പുഞ്ചിരിക്ക്‌ പകരം മുഖത്ത്‌ ഒരു കൃത്രിമ സന്തോഷം ഉണ്ടാക്കിയിട്ടാണ്‌ അവൾ ഞങ്ങളോട്‌ സംസാരിച്ചത്‌.
"ഇക്കാ ഇന്നലെ അവരു വന്നിരുന്നു കല്യാണംനിശ് ചയിച്ചു.
അവർക്ക്‌ അനിയത്തിയെയാണ്‌ ഇഷ്ടപ്പെട്ടത്‌ ഞാറായ്ച്ചയാണു അവരുടെ നികാഹ്‌"
അതു പറഞ്ഞു തീരുന്നതിനു മുൻപു തന്നെ...
സ്വപ്നങ്ങൾ പടിയിറങ്ങി പോയ അവളുടെ കണ്ണുകളിൽ പൊടിഞ്ഞ കണ്ണുനീർ ധാരയായി കവിളിലൂടെ ഒലിച്ചു തുടങ്ങിയിരുന്നു.
"പെണ്ണേ "
എന്ന എന്‍റെ സഹധർമ്മിണിയുടെ വിഷമത്തോടെയുള്ള വിളികേട്ടതും
അവൾ ഒരു കൊച്ചു പെൺകുട്ടിയെ പോലെ വിതുമ്പി കരയാൻ തുടങ്ങി......
ആ കണ്ണുനീർ തുള്ളികൾ ഭൂമിയിൽ പതിച്ച ആ വർഷമാണ്‌ ഞങ്ങളുടെ നാട്ടിൽ കൊടും വരൾച്ചയുണ്ടായത്‌.
ഹക്കീം വേങ്ങൂർ

DON'T MISS

Nature, Health, Fitness
© all rights reserved
made with by templateszoo