Showing posts with label SherbinAntony. Show all posts
Showing posts with label SherbinAntony. Show all posts

എഗ്രിമെൻ്റ്

 

ഹസ്സിനെന്താ പരിപാടി....?കിച്ചണിലൊക്കെ ഹെൽപ്പ് ചെയ്യാറുണ്ടോ....?
ഹസ്സ് അത്യാവശ്യം നന്നായിട്ട് കിസ്സൊക്കെചെയ്യും.
ഉരുളയ്ക്ക് ഉപ്പേരി പോലായിരുന്നു അവരുടെ ചാറ്റിംഗ്.
എന്നാപ്പിന്നെ കിസ്സ്ബൻ്റന്ന് വിളിക്കാല്ലേ....
ആ... ബെസ്റ്റ് കണ്ണാ ബെസ്റ്റ്.
ഇങ്ങടെ വൈഫിനെന്തെങ്കിലും ജോലിയുണ്ടോ...?
ഉം... പിടിപ്പത് പണിയുണ്ട് പക്ഷേ ശമ്പളമില്ല.
വോ... മനസ്സിലായി ഹൗസ് വൈഫാണല്ലേ.
മറുപടി ചിരിച്ചോണ്ടുള്ള ഇമോജിയായിരുന്നു അവൻ കൊടുത്തത്.
പരസ്പരം കണ്ടിട്ടില്ലെങ്കിലും എഫ്.ബി വഴിയായിരുന്നു അവരുടെ സൗഹൃദം തുടർന്ന് പോന്നിരുന്നത്.
ഒരിക്കൽ അവൾ അവനോട് ചോദിച്ചു തനിക്കെന്നെ പ്രണയിക്കാൻ താത്പര്യമുണ്ടോന്ന്.
എന്തായിപ്പോ പെട്ടെന്നിങ്ങനെ തോന്നാൻ....?
നല്ല സമയത്തൊന്നും അതിനുള്ള അവസരം ഉണ്ടായിട്ടില്ല.സിരീയസ്സായിട്ടൊന്നും എടുക്കണ്ട ജസ്റ്റ് ഒരു ടൈം പാസ്സ്.
നമ്മുക്കിങ്ങനെയൊക്കെ തന്നെ അങ്ങ് പോയാൽ പോരേടോ...? അവന് പ്രണയവും അതിലെ നൈരാശ്യയും നന്നായിട്ടറിയാവുന്നത് കൊണ്ടാണ് തിരിച്ചങ്ങനെ അവളോട് പറഞ്ഞത്.
ചുമ്മാ ഒന്ന് പ്രണയിക്കാമെടോ... അവള് വിടുന്ന മട്ടില്ല. ഒരിക്കലും പരസ്പരം കാണാതെ ഇങ്ങനെ എന്നും സ്നേഹിച്ച് കൊണ്ടിരിക്കാം. നോ കോളിംഗ് ഒൺലി ചാറ്റിംഗ്.
ആഹാ.... ഇൻ്ററെസ്റ്റിംഗ്... പക്ഷേ എന്നെങ്കിലും നേരിട്ട് കാണണമെന്ന് തോന്നിയാലോ...?
അന്ന് നമ്മുക്ക് പിരിയാം. അതായിരുന്നു അവളുടെ കരാർ.
അങ്ങനെ അവരുടെ പ്രണയസല്ലാപങ്ങൾ തകൃതിയായിട്ട് പൊയ്ക്കൊണ്ടിരുന്നു.
അവളുടെ fb മുഴുവൻ അരിച്ച് പെറുക്കിയിട്ടും ഒരു പിക്ക് പോലും അവന് കിട്ടിയില്ല. നേരിട്ട് കണ്ടില്ലെങ്കിലും ഒരു ഫോട്ടോ എങ്കിലും കാണാൻ അവന് അതിയായ ആഗ്രഹം ഉണ്ടാര്ന്നു.
എന്താ ഇത് വരെ തൻ്റെ ഒരു ഫോട്ടോ പോലും അപ് ലോഡ് ചെയ്യാത്തേ.....?
തനിക്കെന്നെ കാണണമെന്ന് തോന്നുന്നുണ്ടോ...? അവൾ അവൻ്റെ മനസ്സ് വായിച്ചിരുന്നു.
എന്ത് പറയണമെന്നവന് കൺഫ്യൂഷനായി.അവൻ്റെ മറുപടി കാണാതായപ്പോൾ അവൾ വീണ്ടും മെസ്സേജ് അയച്ചു.
നമ്മുക്ക് പിരിയാൻ നേരമായീന്നാ തോന്നുന്നത്, അല്ലേടോ....?
ഉം... ശരിയാടോ. എനിക്ക് പലപ്പോഴും തന്നെ ഒന്ന് കാണാൻ തോന്നാറുണ്ട്. അവൻ ഒരാഗ്രഹം കൂടി അവളോട് ചോദിച്ചു. പിരിയുന്നതിന് മുൻപ് ഒരു ഫോട്ടോയിലൂടെ എങ്കിലും എനിക്കൊന്ന് കാണണം.
അവൾ അവൻ്റെ ഫോണിലേക്ക് അവസാനമായി ഒരു ഫോട്ടോ സെൻഡ് ചെയ്യ്തു കൊടുത്തു.
നെറ്റ് സ്ലോയാണെന്ന് തോന്നുന്നു ലോഡാവുന്നില്ലല്ലോ.... അവൻ പിറുപിറുത്ത് കൊണ്ടിരുന്നു. യേസ്... അവസാനം അവൻ അവളുടെ മുഖം കണ്ടു....!
എടീ....നീയായിരുന്നോ? പക്ഷേ മെസ്സേജ് പോകുന്നില്ല. അതിന് മുന്നേ അവൾ ബ്ലോക്ക് ചെയ്യ്ത് പോയിരുന്നു.മാത്രവുമല്ല അവൾ ആ ഐഡി തന്നെ ഡീ ആക്ടിവേറ്റ് ചെയ്യ്തിരുന്നു.
ഡിഗ്രിക്ക് പഠിച്ച് കൊണ്ടിരുന്നപ്പോൾ തൻ്റെ കൂടെ മൂന്ന് വർഷം ഉണ്ടായിരുന്നു അവളും....! അന്നേ ഒരിഷ്ട്ടം തോന്നിയിരുന്നെങ്കിലും ഒരിക്കൽ പോലും സൂചിപ്പിരുന്നില്ല.
അവൻ അവര് തമ്മിലുള്ള ചാറ്റുകൾ തുടക്കം മുതലേ ഒന്ന് കൂടി വായിക്കാൻ തുടങ്ങി. ഇങ്ങള് ആരെയെങ്കിലും സീരിയസ്സായി പ്രേമിച്ചിട്ടുണ്ടോ...? അവളുടെ ആ ചോദ്യവും തൻ്റെ മറുപടിയും ഒന്നൂടെ വായിച്ചു.
ഒരിക്കൽ ഒരുത്തിയോട് തോന്നിയിരുന്നു പക്ഷേ പറയാൻ പറ്റിയിരുന്നില്ല.
അവൾ എല്ലാം ചികയുന്നുണ്ടായിരുന്നു. അവളെ കണ്ട് മുട്ടിയതും കണ്ണുകൾ കൊണ്ട് കഥ പറഞ്ഞിരുന്നതും എല്ലാം. മിക്കവാറും ദിവസങ്ങളിൽ അവളെപ്പറ്റി സംസാരിച്ചിരുന്നതും അവൻ ഓർത്തെടുത്തു.
തന്നെപ്പോലെ തന്നെ അവൾക്കും നല്ലൊരു ഫാമിലി ലൈഫായിരിക്കും ഉള്ളത്, പണ്ടെന്നോ തോന്നിയ ഇഷ്ട്ടം അതറിയാനായിരിക്കും അവൾ വന്നത്. അതോർത്ത് അവൻ ഒരു ദീർഘനിശ്വാസം വിട്ടു.
എന്നെങ്കിലും ബ്ലോക്ക് മാറ്റി അവൾ വരുന്നതും പ്രതീക്ഷിച്ച് അവൻ കാത്തിരുന്നു.

Written by Sherbin Antony

അവൾ


ഫോൺ റിംഗ് ചെയ്തപ്പോഴേ അയാളോർത്തു അവളായിരിക്കുമെന്ന്. ഇന്ന് ഓഫീസിൽ നിന്ന് നേരത്തേ ഇറങ്ങണമെന്ന് രാവിലെ തന്നെ പറഞ്ഞിരുന്നു. ഫോൺ അറ്റൻഡ് ചെയ്യാതെ അയാൾ പുറത്തേക്കിറങ്ങി.

ഡ്രൈവിംഗിനിടയിലും അയാൾ അവളെ പറ്റിയാണ് ഓർത്തത്.കല്യാണം കഴിഞ്ഞിട്ട് എട്ട് മാസം ആകുന്നു. എല്ലാവരോടും നല്ല സ്നേഹത്തോടെയും ബഹുമാനത്തോടെയുമാണ് അവളിതുവരേയും പെരുമാറിയത്. ആർക്കും അവളെ പറ്റി ഒരു പരാതിയുമുണ്ടായിരുന്നില്ല.

ആദ്യ നാളുകളിൽ തനിക്കും ഒന്നും മനസ്സിലായിരുന്നില്ല, പിന്നീടാണറിഞ്ഞത് മനസികമായിട്ട് അവൾക്ക് എന്തൊക്കെയൊ പ്രശ്നങ്ങൾ ഉണ്ടെന്ന്. അപ്പോഴേക്കും താനവളെ ഒത്തിരി സ്നേഹിച്ചു പോയിരുന്നു, പിരിയുന്നത് സ്വപ്നത്തിൽ പോലും ചിന്തിക്കാൻ പറ്റുമായിരുന്നില്ല.

തൻ്റെ വീട്ടുകാരോട് പോലും അയാൾ ഒന്നും പറയാതിരുന്നതിന് കാരണം അവളോടുള്ള ഇഷ്ട്ട കൂടുതലാണ്. ആരുടെ മുന്നിലും അവളെ കുറച്ച് കാണുന്നത് താനാഗ്രഹിച്ചിരുന്നില്ല.

സ്വന്തം വീട്ടിൽ നിന്ന് വാടക വീട്ടിലേക്ക് മാറാനുള്ള കാരണം ജോലി സൗകര്യത്തിനാണെന്നാണ് താനെല്ലാവരോടും കള്ളം പറഞ്ഞത്. അവൾക്കും വീട് വിട്ട് പോരാൻ താത്പര്യമില്ലായിരുന്നു. അത്രയ്ക്കിഷ്ട്ടമായിരുന്നു അവൾക്ക് എല്ലാവരോടും.

വീട് മാറാൻ നേരം അമ്മയും പറഞ്ഞതാണ് കൂടെ വരാന്ന്. പക്ഷേ തൻ്റെ എതിർപ്പ് ശക്തമായതിനാലാണ് അമ്മ പിന്മാറിയത്.ഇറങ്ങാൻ നേരം അമ്മ അവളുടെ നെറ്റിയിൽ ചുംബിച്ച് എൻ്റെ മോളേ നല്ലോണം നോക്കണേടാന്ന് പറഞ്ഞപ്പോൾ തൻ്റെ നെഞ്ച് വിങ്ങുകയായിരുന്നു. കുറഞ്ഞ കാലത്തിനുള്ളിൽ അത്രമേൽ പ്രീയമായിരുന്നു അവർ തമ്മിൽ.

വീട് മാറി കുറച്ച് നാൾ ജോലിയിൽ നിന്ന് ലീവെടുത്ത് അവളോടൊപ്പം നിന്നത് അവൾക്കൊരാശ്വാസം തന്നെയായിരുന്നു. ഒരു ഡോക്ടറെ കാണിക്കുവാനോ, ചിക്സയുടെ കാര്യമോ അവളോട് അവതരിപ്പിക്കുവാനുള്ള മനോ:ധൈര്യം തനിക്കില്ലായിരുന്നു. അതവളുടെ മനസ്സിന് മുറിവാകുമെന്ന് കരുതിയാണ് പറയാതിരുന്നത്.

അവൾക്കുള്ള അസുഖം താനറിഞ്ഞിട്ടില്ലെന്ന രീതിയിൽ എല്ലാം സാധാരണ രീതിയിലായിരുന്നു പൊയ്ക്കൊണ്ടിരുന്നത്. അവിടെയും അവൾ തന്നെ കടത്തിവെട്ടി. സാരമില്ല ചേട്ടാ നമ്മുക്കേതെങ്കിലും നല്ല ഡോക്ടറെ കാണാം, തുടക്കമല്ലേ ഭേദമാവുമെന്ന് അവൾ പറയുമ്പോൾ പുറമെ കാണിച്ചില്ലെങ്കിലും ഉള്ളിൽ സന്തോഷമായിരുന്നു തനിക്ക്.

അവളുടെ വീട്ടിലോ മറ്റ് ബന്ധുക്കൾക്കോ പാരമ്പര്യമായോ ആർക്കും തന്നെ ഇങ്ങനെ ഒരസുഖം ഇല്ലായെന്ന തിരിച്ചറിവ് ശരിക്കും തന്നെ ഞെട്ടിച്ചിരുന്നു. കല്യാണത്തിനു ശേഷമാണ് ഇങ്ങനെയൊരു തോന്നലെന്ന് അവൾ തന്നെ പറഞ്ഞപ്പോൾ ചെറിയൊരാശ്വാസം തോന്നി.

പലപ്പോഴും ഒരായിരം ചോദ്യങ്ങളുണ്ടായിരുന്നെങ്കിലും അവളുടെ നിഷ്കളങ്കമായ മുഖത്ത് നോക്കി ഒന്നും ചോദിച്ചിരുന്നില്ല. ആ മുഖം ഒന്ന് വാടുന്നത് പോലും സഹിക്കില്ല അത്രമേൽ സ്നേഹിച്ചിരുന്നു താനവളെ.

പതിവിലും നേരത്തെ അയാൾ വീട്ടിലെത്തുമ്പോൾ അവൾ തയ്യാറായിട്ടുണ്ടായിരുന്നു. അവളുടെ കുഞ്ഞ് മുഖം രണ്ട് കൈക്കുള്ളിലാക്കി അവളോട് ചേർന്ന് നിന്ന് കൊണ്ട് അയാൾ പറഞ്ഞു ഇന്ന് നീ ഒത്തിരി സുന്ദരിയായിട്ടുണ്ടല്ലോ പെണ്ണേ.അത് പറയുമ്പോൾ അവളുടെ കണ്ണിൽ വിരിഞ്ഞ നാണം അവളെ കൂടുതൽ മനോഹരിയാക്കി.

അറിയാത്ത ഭാവത്തിൽ അയാൾ അവളോട് ചോദിച്ചു നേരത്തെ വരണമെന്ന് പറഞ്ഞപ്പോൾ എന്തിനാണെന്ന് ചോദിക്കാൻ വിട്ട് പോയി, എന്താ പുറത്ത് നിന്ന് വല്ലതും വാങ്ങണോ...?

ഈ ഏട്ടൻ്റെ ഒരു കാര്യം എന്താ ഒരു മറവി ഇന്നലെയും ഞാൻ പറഞ്ഞതല്ലേ മരുന്ന് ഇന്നത്തേക്ക് കൂടി ഉള്ളൂന്ന്, ഡോക്ടറെ കാണാനുള്ളതല്ലേ വേഗം റെഡിയായി വരൂ അത് പറഞ്ഞവൾ പരിഭവിച്ചു.

സൈക്ക്യാട്രിസ്റ്റിനെ കാണാൻ പോകുമ്പോഴും അയാളുടെ ശ്രദ്ധ ആരെങ്കിലും കാണുന്നുണ്ടോ. പരിചയക്കാർ ആരെങ്കിലും ഉണ്ടോ എന്നായിരുന്നു.

ഡോക്ടർ വളരെ ഫ്രണ്ട്ലിയായതിനാൽ അയാൾ എല്ലാ വിവരവും നേരത്തെ തന്നെ ധരിപ്പിച്ചിരുന്നു. പരിശോധനയ്ക്ക് ശേഷം ഇപ്പോൾ നല്ല ഭേദമുണ്ടെന്ന് പറഞ്ഞപ്പോൾ അവളുടെ മുഖത്തുണ്ടായ സന്തോഷം അയാൾ ശ്രദ്ധിച്ചു.

ഇത്തവണ സൈക്യാട്രിസ്റ്റിൻ്റെ കൂടെ ഒരു പ്രായം കുറഞ്ഞ ഡോക്ടറും ഉണ്ടായിരുന്നു.അവർ തമ്മിൽ ഡിസ്കസ്സ് ചെയ്തതിനു ശേഷം ഡോക്ടർ അയാളോട് പറഞ്ഞു. ലുക്ക് മിസ്റ്റർ,ഒരു കാര്യം പ്രത്യേകം ശ്രദ്ധിക്കണം നിങ്ങൾ പുറത്തിറങ്ങുമ്പോൾ പരസ്പരം സംസാരിക്കാതിരിക്കാൻ ശ്രദ്ധിക്കണം.തനിച്ചുള്ളപ്പോൾ മാത്രം സംസാരിച്ചാൽ മതി. അതൊരു ഓർഡർ പോലെ അയാൾക്ക് തോന്നി.

അവർ പോയതിനു ശേഷം കൂടെ ഉണ്ടായിരുന്ന ജൂനിയർ ഡോക്ടർ, സൈക്യാർട്ടിസ്റ്റിനോട് ചോദിച്ചു ശരിക്കും അയാളുടെ ലൈഫിലെന്താണ് സംഭവിച്ചത് ഡോക്ടർ....?

ഇത് ഒരു സ്പെഷ്യൽ കേസ്സാണ്, ഒരാക്സിഡൻറിനു ശേഷം അയാളുടെ മാനസ്സിക നില ആകെ തെറ്റിയിരിക്കുകയാണ്.

അപ്പോൾ അയാളുടെ വൈഫ്...?

ആ ആക്സിഡൻ്റിൽ വൈഫ് മരിച്ച വിവരം അയാളുടെ ഉപബോധമനസ്സ് ഉൾക്കൊള്ളുന്നില്ല. ഭാര്യ കൂടെ ഉണ്ടെന്ന സങ്കല്പത്തിലാണ് അയാൾ ഇപ്പോഴും ജീവിച്ചിരിക്കുന്നത് തന്നെ.

ഒന്നും മനസ്സിലാവാതെ ജൂനിയർ ഡോക്ടർ അയാളെ ഒരിക്കൽ കൂടി കാണാനായ്
വെളിയിലേക്ക് ചെന്നു. ശൂന്യതയിൽ ശരിക്കും ആരോ ഉള്ളത് പോലെ അയാൾ വാചാലനായ് നടന്ന് പോകുന്ന ആ കാഴ്ച ഡോക്ടറെ തീർത്തും അത്ഭുതപ്പെടുത്തി.

തിരികെ വീട്ടിലേക്കുള്ള വഴിയിലുടനീളം ഒരു കൊച്ച് കുട്ടിയെ പോലെ അയാൾ അവളുടെ കൈയ്യിൽ പിടിച്ചിട്ട് മനസ്സിൽ ഉരുവിട്ടു കൊണ്ടിരുന്നു. ഈ ലോകം തന്നെ നിന്നെ ഒരു ഭ്രാന്തിയെന്ന് വിളിച്ചാലും ഞാൻ വിശ്വസിക്കില്ല....!!

Written by 

Sherbin Antony

ഉണ്ണിക്കണ്ണൻ (കഥ)


കല്ല്യാണം കഴിഞ്ഞ് അഞ്ച് കൊല്ലത്തിനു ശേഷമാണ് അവർക്ക് കുട്ടികൾ ഉണ്ടാകുന്നത്, അതും ഇരട്ടക്കുട്ടികൾ..!!
നാട്ടുകാരും വീട്ടുകാരും ഒത്തിരി സന്തോഷിച്ചു.ആ രണ്ട് തക്കിടു മുണ്ടന്മാരെ അച്ഛനും അമ്മയ്ക്കും വരെ തിരിച്ചറിയാൻ പറ്റാതെ വരും ചില നേരങ്ങളിൽ.അത്രയ്ക്ക് ഒരു പോലേയാണ് രണ്ടിൻ്റേം കളിയും ചിരിയും മറ്റും.
കണ്ണനും ഉണ്ണിയും പരസ്പരം പേര് മാറ്റി പറഞ്ഞ് അവരുടെ മുത്തച്ഛനേം പറ്റിക്കാറുണ്ട് പലപ്പോഴും.ഇത് കണ്ട് മാറി നിന്ന് അവരുടെ അച്ഛനും അമ്മയും ചിരിക്കാറുണ്ടായിരുന്നു.
കഴിഞ്ഞ മാസം അഞ്ചാമത്തെ പിറന്ന നാളായിരുന്നു ഉണ്ണി കണ്ണന്മാരുടെ. എവിടെ പോകുമ്പോഴും ഒരാളെ മുന്നിലും മറ്റയാളെ ബൈക്കിൻ്റെ പിന്നിലിരുത്തിയാണ് പോകാറ്. അന്ന് കേക്ക് വാങ്ങാൻ പോയതും തിരികെ വന്നപ്പോൾ മഴ പെയ്തതും ഇന്നലെ കഴിഞ്ഞ പോലെ തോന്നി അയാൾക്ക്.
മഴ നനഞ്ഞ് ഈറനോടെ വീട്ടിലെത്തിയപ്പോൾ പിള്ളേരെ എന്തിനാടാ കൂടെ കൂട്ടിയതെന്ന് ചോദിച്ച് അമ്മ രണ്ടിൻ്റെം തല തുവർത്തി. കേക്ക് മുറിയൊക്കെ കഴിഞ്ഞ് കിടക്കാൻ നേരം കണ്ണന് നേരിയ ചൂടുണ്ടായിരുന്നു.
ഒരാൾക്ക് വന്നാൽ മറ്റെയാൾക്കും പതിവായിരുന്നു പനി. പക്ഷേ രാവിലെ തൊട്ട് നോക്കുമ്പോൾ കണ്ണന് മാത്രമായിരുന്നു ചൂട്.
എണീറ്റയുടനെ ആശുപത്രിയിൽ കൊണ്ട് പോയി കാണിക്കാം ആ ചിന്തയിൽ അയാൾ അന്ന് ജോലിക്ക് പോയില്ല.
പത്ത് മണി ആയിട്ടും ഉണ്ണി എണീറ്റില്ല.കണ്ണൻ പനി ചൂടിൽ അമ്മയുടെ മടിയിൽ ഇരുന്ന് ചിണുങ്ങുന്നുണ്ടായിരുന്നു.
ഉണ്ണി എഴുന്നേല്ക്കുന്നതിന് മുന്നേ പോയാലോ...? അല്ലെങ്കിൽ അവനും കൂടെ വരാൻ ശാഠ്യം പിടിക്കും. മറുപടിക്കായ് അയാൾ അവളെ നോക്കി.
രണ്ട് പേരേയും കൂട്ടാം വരുന്ന വഴി ഡ്രെസ്സ് ഒക്കെ വാങ്ങാം, ഇത്തവണ സ്കൂളിൽ ചേർക്കാനുള്ളതാണ്.അത് പറഞ്ഞിട്ടവൾ ഉണ്ണിയെ വിളിക്കാനായ് അകത്തേക്ക് പോയി.
ഏട്ടാന്നുള്ള വിളി കേട്ട് അയാളോടി അകത്തേക്ക് ചെന്നു. അവനെണീക്കുന്നില്ലേട്ടാ...അവളുടെ ഉച്ചത്തിലുള്ള നിലവിളി അയാളെ തളർത്തിക്കളഞ്ഞു.
ഉണ്ണിയുടെ ശരീരം തണുത്ത് മരവിച്ചിരിക്കുന്നു....!
മനസ്സിനേറ്റ മരവിപ്പ് മാറാൻ പിന്നേയും നാളേറേയെടുത്തു.
പക്ഷേ പിന്നീട് ഒരിക്കൽ പോലും കണ്ണൻ,ഉണ്ണിയെ തിരക്കിയിട്ടില്ല. ഇരട്ടകളിൽ ഒന്ന് പോയാൽ മറ്റേതിനും ആയുസ്സ് അധികം ഉണ്ടാവില്ലെന്ന് അടക്കം പറയുന്നത് കേട്ട് നെഞ്ച് പിളരുന്നുണ്ടായിരുന്നു പലപ്പോഴും.
ഒരു വർഷം വരെ ആപത്തൊന്നും വരാതെ ശ്രദ്ധിച്ചാൽ മതി പിന്നെ എല്ലാം ഈശ്വരൻ കാത്തോളും ഉണ്ണീടെ സഞ്ജയന കർമ്മങ്ങൾക്ക് ശേഷം ജോത്സ്യൻ പറഞ്ഞ വാക്കുകളായിരുന്നത്.കണ്ണന് ഒരാപത്തും കൂടാതെ കൃഷ്ണമണി പോലെ അവർ കാത്ത് സൂക്ഷിച്ചു.
അവൾ നേർച്ച നേരാത്ത അമ്പലങ്ങളില്ല, പോകാത്ത പള്ളികളില്ല. ഏട്ടാ ഞാനിനി എങ്ങോട്ടും ഇല്ല, ഇനിയും നമ്മുടെ കണ്ണനെ കൊണ്ട് പോകാനാണ് ഈശ്വര നിശ്ചയമെങ്കിൽ ഒരു മുഴം കയറിൽ നമ്മുക്കും പോകാം കൂടെ....!കൈകൾ കൂട്ടി പിടിച്ച് അവളത് പറയുമ്പോൾ അയാളും മനസ്സിൽ ഉറപ്പിച്ചിരുന്നു...!!
വർഷം ഒന്നാകുന്നു ഉണ്ണി പോയിട്ട്.ആണ്ട് ബലിയൊക്കെ കഴിഞ്ഞ് എല്ലാവരും പോയതിന് ശേഷം അയാൾ വെളിയിലേക്ക് പോകാൻ ബൈക്ക് സ്റ്റാർട്ടാക്കിയപ്പോൾ കണ്ണനും ഓടി വന്നു.
ഞാനും വരുന്നച്ഛാന്ന് പറഞ്ഞ് അവനും ചാടി കയറി മുന്നിലിരുന്നു. വണ്ടിയുടെ കണ്ണാടിയിൽ പിടിച്ചിട്ട് കണ്ണൻ പറഞ്ഞു ദേ അച്ഛാ നമ്മുടെ ഉണ്ണി..!
അയാൾ ഒരു നിമിഷം തരിച്ചിരുന്നുപോയി.കണ്ണാടിയിൽ തൻ്റെ മുഖം കണ്ട കണ്ണൻ വീണ്ടും വിളിച്ചു ഉണ്ണീ.... നീയിത്രയും നാളിതിനകത്ത് ഒളിച്ചിരിക്കുകയായിരുന്നോടാ......!!!
By
ഷെർബിൻ ആന്റണി

DON'T MISS

Nature, Health, Fitness
© all rights reserved
made with by templateszoo