ആത്മഹനനം

ജീവിത പ്രശ്നങ്ങളിൽ നിന്നൊളിച്ചോടും ഭീരുവിൻ ചിന്തകൾ ...ഹത്യക്കൊരുങ്ങുന്ന നേരത്തെ ചിന്തകൾ ...

ഞാൻ ചെയ്ത തെറ്റിനൊരു പരിഹാരം എൻ മൃത്യു ...എന്റെ പ്രശ്നങ്ങൾക്ക് ഞാൻ കണ്ട മാർഗവും എൻ മൃത്യു .....

ഒരുപാട് പേർ എന്നെ നോക്കി കരയും ...ഒരുപാട് പേർ എൻ നന്മ്മകൾ പാടിപുകഴ്ത്തും ...ഞാൻ ചെയ്ത തെറ്റുകളെ ഏവരും ലളിതമായി ന്യായീകരിക്കും ...

സഹതാപകണ്ണീരിനാൽ പുഷ്പങ്ങളെറി ഞ്ഞവർ .....കാലങ്ങളോളം എന്നെ ഓർത്ത് വിലപിച്ചിടും........

ചിതയിലെ കനലിൻ ചൂടാറുന്ന നേരം ...

ഒറ്റയായ് , കൂട്ടമായി നീങ്ങുന്ന നാട്ടുകാർ .....വിങ്ങുന്ന ഹൃദയമായി കൂട്ടുകാരൊക്കെയും .....ഓർമ്മകൾ തഴുകുന്ന ബന്ധുജനമാകയും .........

എത്ര നാൾ .....എത്രനാൾ.......

ചൂടേറും വാർത്തകൾ കാതിലെത്തും വരെ.....

കാലം മായ്ക്കുമൊരു മുറിവിനെപ്പോലെയീ... ഭീരുവിൻ ഓർമ്മയും മാഞ്ഞുപോകുന്നിതാ ....

മണ്ണോട് മണ്ണിൽ ചേർന്നതിനിപ്പുറം വെറും ഓർമ്മകൾ മാത്രം ...കാതോട് കാതിൽ ചെയ്തുകൂട്ടിയ നന്മ്മകൾ മാത്രം....

പൂമുഖ ചുവരിലായ് 
പുഷ്പങ്ങൾ കോർത്തോരാ ചിത്രമുയരുമ്പോൾ ....അണയാതെ ഒരു ചെറു തിരിനാളം സാക്ഷിയായ്.....

നഷ്ട്ടങ്ങളെന്നും പേറുവാൻ ഒരുകൂട്ടർ ....

ഭാരമൊന്നിറക്കുവാൻ അച്ഛൻ തിരഞ്ഞൊരാ ചുമൽ ........വേച്ചുപോവുന്ന നാൾ കൈപിടിച്ചീടുവാൻ ഒരു കൈ പ്രതീക്ഷിച്ചൊരമ്മ ....

കൂടപ്പിറപ്പിന്റെ കണ്ണുനീർ ഓർമ്മകൾ ...അവസാനശ്വാസംവരേയും കൂടെയെന്ന വാക്കിനാൽ കോർത്തോരാ താലിച്ചരട് .....

പിന്നെ ....പിന്നെ....എത്ര ചേർത്താലും കൂടിച്ചേരാത്ത പിതൃത്വമെന്ന നഗ്‌നമായ യാഥാർഥ്യം .. ....കാതോർത്ത് ....കാതോർത്ത്... നോക്കെത്താ ദൂരത്തു കണ്ണെറിഞ്ഞു നിൽക്കുന്ന പൈതലിൻ ...........ഓർമ്മകൾ , ഇഷ്ട്ടങ്ങൾ ,ഭാവിസ്വപ്നങ്ങളും ....

ഒരു നിമിഷ വ്യർത്ഥ ചിന്തയാൽ കഴുത്തിൽ കുടുക്കിയൊരു കയറിനാൽ......അറ്റുപോയതോ കുറെ ജീവിത സമവാക്യങ്ങളും ..... 

പാത പോലെയീ ജീവിതം ....കയറ്റമോ ദുഃഖങ്ങൾ ....ഇറക്കമോ സന്തോഷങ്ങൾ ....

കയറ്റമെന്നുമെൻ പാതയിലെന്ന ചിന്തയാൽ ഭീരു ...........പോയ് ഒളിച്ചിരിക്കുന്നതോ തെമ്മാടിക്കുഴിയിലും ....

ഊരാക്കുടുക്കുകൾ ഒരുപാട് .....രക്ഷപ്പെടാനുള്ള വഴികളോ അതിലേറെ ......അനുഗ്രഹിച്ചു കിട്ടിയ ജീവൻ ....വലിച്ചെറിയുന്ന നേരം .....ഓർക്കുക ...ഓർമ്മിക്കുക .....

അനുഗ്രഹത്തിനായി കാത്തിരിക്കുന്ന കോടാനു കോടി ജന്മങ്ങളെ .....മാറാരോഗത്തെപ്പുണർന്ന് മരണമെന്ന വിരുന്നുകാരനെ കാത്ത് കാത്തിരിക്കുന്ന .........

ജീവിച്ചും ജീവിച്ചും കൊതിതീരാത്ത നിർഭാഗ്യവാന്മാരെ.....സ്നേഹിച്ചും ലാളിച്ചും കൊതിതീരാത്ത ഉറ്റവരെ ..........

**------------**
ഷിബു ബീ കെ നന്ദനം 
sbknandhanam@gmail.com

ഞാൻ..എന്റെ ലോകം

ഉന്നതകുല ജാതനായ എനിക്ക് എന്റെ ജാതിയും മതവുമാണ് എല്ലാറ്റിനും വലുത് .
എന്റെ മതത്തിന്റെ നിലപാടുകളും പ്രവർത്തനങ്ങളും ആണ് ശരി . അത് മാത്രമാണ് ശരി...ഞാൻ ,എന്റെ ,എനിക്ക് ....ഇതാണെന്റെ ലോകം ..

അറിയാതെ ദേഹത്ത് തട്ടിയ അയല്പക്കക്കാരനായ കീഴ്ജാതിക്കാരനെ ശാസിച്ച് ദൂരേക്ക് അകറ്റിനിർത്തി ... 
കവലയിൽ സൗഹൃദ നോട്ടത്താൽ പുഞ്ചിരി തന്ന അന്യമതസ്ഥനെ പുച്ഛത്തോടെ അവഗണിച്ചു.......

എന്റെ മതത്തിന്റെ ദൈവമാണ് സത്യം ...മറ്റുള്ളതെല്ലാം മിഥ്യയാണ് ...അന്യമതസ്ഥരുടെ ദേവാലയങ്ങളും പ്രാർത്ഥനകളുമെല്ലാം കാണുമ്പോൾ പുച്‌ഛം തോന്നും ...

എന്റെ മതത്തെ അനുകൂലിച്ചും എതിർത്തും സംസാരിച്ച , പ്രവർത്തിച്ച കീഴ്ജാതി ,അന്യമതസ്ഥരെ ശാരീരികമായും മാനസികമായും കീഴ്‌പ്പെടുത്തി .....

എന്റെ സൗഹൃദക്കൂട്ടം എന്നും ശ്രേഷ്ട്ടകുലജാതരിൽ മാത്രം ഒതുങ്ങി നിന്നു...ആരെയും ഗൗനിക്കാതെ എന്റെ ശരിയെ മാത്രം അംഗീകരിച്ചു ഞാൻ തലയുയർത്തി ഉയരങ്ങളിൽ പറന്നു ...
താഴെ ഞാൻ ഒന്നും കണ്ടില്ല ,കണ്ട ഭാവം നടിച്ചില്ല ....

മുരുണ്ടുമ്പോൾ തുളച്ചുകയറുന്ന ബുള്ളറ്റിന്റെ സ്വരം എനിക്കൊരു ലഹരിയായിരുന്നു ....വേഗതയ്ക്ക് കാറ്റിനെ തോൽപ്പിക്കാനാവുമെന്ന എന്റെ ധാരണയെ തിരുത്താൻ ,റോഡിൽ കിടന്ന ഒരു ചെറിയ കരിങ്കൽ കഷ്ണം മതിയായിരുന്നു .....

നിലവിളിച്ചുകൊണ്ട് ഒരുകൂട്ടം ആളുകൾ എന്റെ അടുത്തേക്ക് ഓടിവരുന്നു ..അവർ എന്റെ ചുറ്റും കൂടിനിൽക്കുന്നു .ചിലർ പേടിച്ചു കരയുന്നു ...ചിലർ തലചുറ്റി വീഴുന്നു ...മറ്റു ചിലർ ഒരു ഭാവമാറ്റവും ഇല്ലാതെ കാഴ്ച്ച കണ്ടു നിൽക്കുന്നു ...

എനിക്കൊരു മരവിപ്പ് മാത്രമെ തോന്നിയുള്ളൂ ..എഴുന്നേൽക്കാൻ ശ്രമിച്ചു... ആവുന്നില്ല ..ഒന്ന് കൈപിടിച്ച് സഹായിക്കാൻ ...കൂടിനിൽക്കുന്നവരിലേക്ക് എന്റെ കണ്ണുകൾ പാഞ്ഞു ...കൂടുതലും അന്ന്യമതസ്ഥരും കീഴ്ജാതിക്കാരുമാണല്ലോ !!! 

ശ്രേഷ്ട്ടകുലജാതർക്കു വേണ്ടി എന്റെ കണ്ണുകൾ വീണ്ടും തിരച്ചിൽ നടത്തി ....അതാ ഒരാൾ ....ഞാൻ കവലയിൽ വെച്ച് സ്ഥിരം കുശലം പറയുന്ന ചുരുക്കം ചിലരിൽ ഒരാൾ .....എന്നെ സഹായിക്കാൻ അയാളെന്തേ വൈകുന്നു ??????? ആകാംഷയോടെ 
അയാളെന്തോ ചെയ്‌യുകയാണല്ലോ ????

മൊബൈലിൽ ഫേസ്ബുക്ക് ലൈവ് പോവാനുള്ള തിരക്കിലാണ് അയാൾ ...എന്നെ ആണല്ലോ ഫോക്കസ് ചെയ്യുന്നത് !!!!! ലൈവിൽ ഇത് കാണാൻ എത്രപേർ ഓൺലൈൻ ഉണ്ടെന്നറിയാനുള്ളതായിരുന്നു അയാളുടെ ആകാംഷ എന്നത് എന്നിൽ ഭീതിയായിരുന്നു ജനിപ്പിച്ചത് ...

കണ്ണുകൾ ഒന്നുഅടച്ചു തുറന്നു ..അതാ ഒരാൾ കൂടി ..എന്റെ ശ്രേഷ്ട്ടകുല പരിചയക്കാരൻ ....അയാൾ തന്റെ കാറിൽ അക്ഷമനായി ഇരിക്കുകയാണ്..ഇടയ്ക്ക് തന്റെ വാച്ചിലേക്കും നോക്കുന്നു ...

"ഈ ബ്ലോക്ക് ഒന്ന് മാറിയിരുന്നേൽ പോകാമായിരുന്നു ..ഇപ്പോഴേ സമയം വൈകി "..അയാളുടെ ചുണ്ടുകൾ മന്ത്രിക്കുന്നത് എന്റെ കാതിൽ മുഴങ്ങി ....

കൂടിനിൽക്കുന്ന ആളുകൾക്കിടയിൽ നിന്നും ഒരാൾ എന്റെ അടുത്തേക്ക് ഓടി വന്നു ..

"ജീവനുണ്ട് ..ജീവനുണ്ട് .. "

അയാൾ ഉച്ചത്തിൽ വിളിച്ച് പറഞ്ഞുകൊണ്ട് എന്റെ ശരീരം വാരിയെടുക്കുന്നു ..അസഹനീയമായ ചോരയുടെ മണം അയാൾ ഗൗനിക്കുന്നേയില്ല ...അയാളുടെ കണ്ണുകൾ നിറഞ്ഞൊഴുകുന്നു ..ഞാൻ സൂക്ഷിച്ചു നോക്കി .......

'അതേ..എനിക്കറിയാം .... എനിക്കറിയാം ഇയാളെ' .......

അറിയാതെ എന്റെ ദേഹത്തു തട്ടിയതിനു ശകാരിച്ചു ദൂരേക്ക് അകറ്റിയ എന്റെ അയല്പക്കക്കാരൻ കീഴ്ജാതിക്കാരൻ ......

ഒരാൾ കൂടി മുന്നോട്ട് വരുന്നു .....പാതിയിൽ മുറിഞ്ഞു പോയ ചോരയിൽ കുളിച്ച എന്റെ കൈ അതാ അയാൾ എടുക്കുന്നു ......

കവലയിൽ സൗഹൃദത്തിനായി പുഞ്ചിരി തൂവാറുള്ള,ഞാൻ പുച്ഛത്തോടെ അവഗണിക്കാറുള്ള ആ അന്യമതസ്ഥൻ ........

"24 മണിക്കൂർ കഴിഞ്ഞേ എന്തെങ്കിലും പറയാനാവൂ ...ബ്ലഡ് കുറച്ച് വേണ്ടിവരും..കൃത്യ സമയത്താണ് നിങ്ങൾ എത്തിച്ചത് ..ഞങ്ങൾ ചെയ്യാനാവുന്നത് എല്ലാം ചെയ്യാം ....ദൈവത്തോട് പ്രാർത്ഥിക്കൂ നിങ്ങൾ "

അബോധാവസ്ഥയിലും എനിക്കെല്ലാം കാണാം ...കേൾക്കാം ..പക്ഷെ ..ഒന്നുംചെയ്യാനാകുന്നില്ല ....

ഡോക്ടറുടെ വാക്കുകൾ അവരുടെ മുഖത്തെ പ്രസാദിപ്പിക്കുന്നത് ഞാൻ നിറകണ്ണുകളോടെ കണ്ടു ...അന്യമതസ്ഥൻ തന്റെ ദൈവത്തിനെ വിളിച്ചു പ്രാർത്ഥിക്കുന്നു ,നന്ദി പറയുന്നു ...എനിക്കുവേണ്ടി ....എന്റെ ജീവനിൽ ഇനിയുമുള്ള പ്രതീക്ഷയിൽ... 
ബ്ലഡ് തരാനും അവർ തയ്യാർ .......

അവരുടെ ചോര എന്റെ ശരീരത്തിലേക്ക് കലർത്തിയപ്പോൾ, എന്റെ ശ്രേഷ്ട്ട ചോര അതിനെ തടഞ്ഞില്ല ...പുച്ഛത്തോടെ അവഗണിച്ചില്ല ....അന്യ , കീഴ്ജാതി ചോരയെന്ന ഭ്രഷ്ട്ട് കൽപ്പിച്ചില്ല........തന്റെ സഹോദരനെന്നവണ്ണം വാരിപ്പുണർന്നു ....ജീവനെന്ന സത്യത്തെ യാഥാർഥ്യ മാക്കി തുടരാൻ അവരെന്റെ ശരീരത്തിലൂടെ ഒന്നായി ഒഴുകി ....

ഞാൻ വിശ്വസിക്കുന്ന എന്റെ ദൈവത്തിനെ വിളിക്കാൻ പോലും എനിക്കാവുന്നില്ലല്ലോ ......

കുറ്റബോധം .....

ചെയ്തുകൂട്ടിയതിന്റെ എല്ലാം ........മനുഷ്യർ എന്ന സത്യത്തെ മതത്തിന്റെയും ജാതിയുടെയും ലേബൽ ഒട്ടിച്ച് തരം തിരിച്ചതിന്റെ വേദന .......

ഇന്ന് ഞാൻ മനുഷ്യലോകത്ത് ഒരു മനുഷ്യ ജീവി ആയാണ് ജീവിക്കുന്നത് ..എന്റെ മതം മനുഷ്യനാണ് ....എന്റെ ജാതി പരസ്പ്പര സ്നേഹമാണ് ...

ഇന്ന് ഞാനില്ല ....എന്റേതില്ല...എനിക്കില്ല ..... ഇപ്പോൾ .....

നാം ..നമ്മൾ ,നമ്മുക്ക് ....അതാണെന്റെ ലോകം ....
*----------*

Shibu BK Nandhanam 

കാക്കയ്ക്ക് തൻകുഞ്ഞ്... 'മാത്രം ' ...പൊൻകുഞ്ഞ്

മോളേ നിത്യേ ....വേഗം റെഡിയാവൂ ...അവരിങ്ങെത്തി ..."...മാലതി മുറിയിലേക്ക്‌ നോക്കി വിളിച്ചു പറഞ്ഞു ....

നിത്യമോളെ കാണാൻ ഇന്ന് ഒരു കൂട്ടർ വരുമെന്ന് പറഞ്ഞ് കുറച്ചു മുൻപാണ് ബ്രോക്കർ കുട്ടിരാമേട്ടൻ വിളിച്ചത് ...ഡിഗ്രി രണ്ടാം വർഷമാണവൾ..നാട്ടിൽ നിന്നുതന്നെ ഒരുപാട് ആലോചനകൾ വന്നുതുടങ്ങിയിരിക്കുന്നു ..

നിത്യ മോളുടെ കൂട്ടുകാരി തെക്കേലെ ദേവിയുടെ മോളെ കല്ല്യാണം കഴിച്ചിരിക്കുന്നവൻ പഞ്ചായത്ത് ഓഫീസിലെ പ്യൂൺ ആണ് ..

'എന്റെ മോളെ കല്ല്യാണം കഴിച്ചിരിക്കുന്നത് സർക്കാര് ജോലിക്കാരനാണ് '.. ..കുടുംബശ്രീയിൽ വരുമ്പോൾ ഇടയ്ക്കിടെ അവളുടെ പൊങ്ങച്ചം ..

അവളുടെ ഭർത്താവ് കൂലിപ്പണിക്കാരനാണ് ..ചെറിയ ഒരു വീടും കുറച്ചു സ്ഥലവുമേ ഉള്ളൂ .

അവരെ അപേക്ഷിച്ച് അതിനേക്കാൾ നല്ല ആലോചന നിത്യമോൾക്ക് കിട്ടേണ്ടതാണ് ..

അച്ഛൻ എക്സ് . മിലിട്ടറി ,രണ്ടു മക്കളിൽ ഒരു പെൺകുട്ടി ,പിന്നെ എന്റെ പേരിലും ഇവിടെയുമൊക്കെ ഉള്ള വസ്തുവകകൾ ..

സർക്കാർ ഉദ്യോഗത്തിൽ കുറഞ്ഞ 'ഒരുത്തനേം ' കൊണ്ട് ഇങ്ങോട്ട് വരേണ്ടെന്ന് കുട്ടിരാമേട്ടനോട് പ്രത്യേകം പറഞ്ഞിട്ടുണ്ട് ...

റോഡിൽ ഒരു വാഹനത്തിന്റെ ശബ്ദം ...ഒരു ആൾട്ടോ കാർ പതുക്കെ വന്നു നിൽക്കുന്നു .വീടിന്റെ മുറ്റത്തേക്ക് റോഡ് ശരിയാക്കണമെന്നു വിനുമോന് വലിയ ആഗ്രഹമാണ് ..മോളുടെ വിവാഹത്തിന് മുൻപായി ചെയ്യണം ....

ആൾട്ടോ കാറിൽ നിന്നും കുട്ടിരാമേട്ടനും പ്രായം തോന്നിക്കുന്ന ഒരാളും ഇറങ്ങി .പിന്നാലെ മുൻസീറ്റിൽ നിന്നും സുന്ദരനായ ഒരു ചെറുപ്പക്കാരനും ....

ദേവിയുടെ മോളെ കാണാൻ വന്നത് 'ഡസ്റ്റർ ' കാറിലാണ് എന്നത് കുടുംബശ്രീയിലും അയൽക്കൂട്ടത്തിലുമൊക്കെ വലിയ സംസാര വിഷയമായിരുന്നു .ഇവര് വന്നതോ 'ആൾട്ടോ' യിലും .

'ദൈവമേ ആരേലും കണ്ടാൽ !!!!'.....മാലതി അടുക്കള ജനലിലൂടെ ചുറ്റുപാടും ഒന്ന് കണ്ണോടിച്ചു ..

''"രാധേട്ടാ....അവരാണെന്നു തോന്നുന്നു"...
രാധാകൃഷ്ണൻ മെല്ലെ പുറത്തേക്കു നടന്നു .

കാറിൽ നിന്നും ഇറങ്ങി മൂവരും സ്‌റ്റെപ്പിനടുത്തായി നിന്നു..ഡ്രൈവർ സീറ്റിൽ നിന്നും ഒരു പയ്യൻ ഇറങ്ങിവന്നു അവരോടൊപ്പം കൂടിയപ്പോൾ മെല്ലെ നാലുപേരും വീട് ലക്ഷ്യമാക്കി നീങ്ങി ...

കാത്തുനിന്ന രാധാകൃഷ്ണൻ ഹസ്തദാനം ചെയ്തു സ്വീകരിച്ചിരുത്തി .

" ഇതാണ് പെണ്ണിന്റെ അച്ഛൻ .എക്സ്.മിലിട്ടറിയാ..പട്ടാളത്തിൽ വല്യ സ്ഥാനതൊക്കെ ഇരുന്ന ആളാ...യുദ്ധങ്ങളിലൊക്കെ പങ്കെടുത്തിട്ടുണ്ട് ... "...

കുട്ടിരാമന്റെ പുകഴ്ത്തലിൽ ആൾ ഒന്ന് പൊങ്ങി ..

" ഇതാണ് ചെക്കൻ .ശ്യാമ പ്രസാദ് . കിള്ളിമനശ്ശേരി ടൗണിൽ തന്നെയാണ് വീട് ...ശ്യാമിന് അച്ഛനും അമ്മയും ഒരു ചേട്ടനുമാണുള്ളത് .ചേട്ടൻ ഭാര്യയും കുടുംബവുമായി ഗൾഫിലാണ് ..."...
കുറച്ച് നേരത്തെ മൗനം മുറിച്ചുകൊണ്ട് ശ്യാമിന്റെ അമ്മാവൻ...

രാധാകൃഷ്ണൻ ശ്യാമപ്രസാദിനെ ശ്രദ്ധിക്കുകയായിരുന്നു ..സുമുഖനായ ഒരു ചെറുപ്പക്കാരൻ ,സൗമ്യ ഭാവം ,ആരോഗ്യമുള്ള ശരീരം...നല്ലൊരു വ്യക്തിത്വത്തെ കാഴ്ചവെക്കുന്ന വിനയം .....നിത്യമോൾക്ക് ചേരും ...... 

ഒരു ചെറു പുഞ്ചിരിയുമായി ശ്യാമപ്രസാദ് അവിടെ നിറഞ്ഞു നിന്നു...

" രാധേട്ടന് ￰അറിയാമായിരിക്കുമല്ലോ കിള്ളിമനശ്ശേരി ..പ്രസിദ്ധമായ കൂട്ടക്കാവ് ക്ഷേത്രത്തിൽ നിന്നും ഒരു പത്ത് കിലോമീറ്റർ അപ്പുറം .."...
സോഫയിലേക്ക് ഒന്നുകൂടി അമർന്നിരുന്ന് കുട്ടിരാമൻ അയാളുടെ മുഖത്തേക്ക് കണ്ണോടിച്ചു ....

"അവിടെ അടുത്തല്ലേ പെരിങ്കോടപൊയിൽ ..അവിടെ ഒരു ത്രിവിക്രമൻ പണ്ട് എന്റെ ഒപ്പം ഡെറാഡൂണിൽ ഉണ്ടായിരുന്നു ..ഒരിക്കൽ തീവ്രവാദികളുടെ ഇടയിൽ നിന്നും അവനെ ഞാനാ രക്ഷപ്പെടുത്തിയത് .നാലെണ്ണത്തിനെ പൊട്ടിച്ച് ചിതറിച്ചാ....."....

രാധാകൃഷ്ണൻ വീരവാദത്തിലേക്ക് കയറിയാൽ നിർത്തില്ലെന്ന് അറിയാവുന്ന കുട്ടിരാമൻ മെല്ലെ ഇടയ്ക്കു കയറി ...

" പയ്യൻ സ്റ്റാർ ഗ്രൂപ്പിന്റെ കൊച്ചി HR മാനേജരാണ് .ഈ മാസം അവസാനത്തോടെ കോഴിക്കോട് ബ്രാഞ്ചിലേക്ക് മാറും "...

രാധാകൃഷ്ണന്റെ മുഖം പെട്ടെന്ന് മാറിയതും , വാതിൽ പടിയുടെ അടുത്തായി നിന്ന മാലതി അയാളെ കണ്ണുകൊണ്ട് അകത്തേക്ക് വിളിക്കുന്നതും കുട്ടിരാമൻ ശ്രദ്ധിച്ചു .

ശ്യാമിനും മറ്റും ഒരു സംശയം തോന്നാതിരിക്കാൻ അവിടെ അടുത്തു നടന്നിട്ടുള്ള ഓരോ കാര്യങ്ങൾ അയാൾ അവരോട് സംസാരിച്ചു ...

"കുട്ടിരാമേട്ടനോട് ഞാൻ അന്നേ പറഞ്ഞതാ സർക്കാര് ജോലി ഉള്ളോനെ മാത്രേ ഇങ്ങോട്ട് കൊണ്ടൊരാവൂന്ന്.." 

മാലതിക്ക് രോക്ഷം മറച്ചുവെക്കാനായില്ല ..

" ഇത് നടക്കില്ല ..മോളെ വെറുതെ കെട്ടി ഒരുക്കി കാണിക്കണ്ട..,ആ കുട്ടിരാമനെ ഇങ്ങോട്ട് വിളിച്ച് കാര്യം പറയാം ".... 

ഉള്ളിലേക്ക് വന്ന കുട്ടിരാമന്‌ അടി കിട്ടിയില്ലാ എന്നേ ഉള്ളൂ ...

" രാധേട്ടാ....എനിക്കറിയുന്ന നല്ല കുടുംബത്തിലുള്ള പയ്യനാ അത് .പഠിപ്പും നല്ലൊരു ജോലിയും ഉണ്ട് ..സർക്കാർ ജോലിയെക്കാളും വരുമാനവും . ഒരു ചീത്തപ്പേരും അവനിതുവരെ കേൾപ്പിച്ചിട്ടില്ല .നല്ലൊരു ബന്ധം ആയതോണ്ടാ ഞാൻ ഇങ്ങോട്ട് കൊണ്ടുവന്നത് "....

കുട്ടിരാമന്‌ ദേഷ്യം വന്നു തുടങ്ങിയിരുന്നു ..

" ഞാൻ വെറുതെ പറഞ്ഞതല്ല ..അവൻ ഏതൊക്കെയോ PSC ലിസ്റ്റിൽ ഒക്കെ ഉണ്ട് ..ഈ ജോലി അവന് നല്ലതാണെന്നു തോന്നിയതുകൊണ്ടാവാം ഇതിൽ തുടരുന്നത് ....രാധേട്ടാ....എന്തുകൊണ്ടും നിങ്ങൾക്ക് നല്ലൊരു ബന്ധമാ ഇത് "....

"നിങ്ങളിനി എന്തുപറഞ്ഞാലും ഇത് ശരിയാവില്ല കുട്ടിരാമാ ...പ്രൈവറ്റ് കമ്പനി ജോലി എന്നൊക്കെ പറഞ്ഞാൽ അതൊന്നും ശാശ്വതമല്ല ....ഇതെന്തായാലും നടക്കില്ല .പിന്നെ നിത്യമോളെ എന്തിനാ വെറുതെ കൊണ്ട് കാണിക്കുന്നത് .. ".....

"മാലതിയേച്ചീ ... നിങ്ങൾ ആ കുട്ടിയെ ഒന്ന് കാണിച്ചു കൊടുക്ക് ..നിങ്ങൾക്കിഷ്ടല്ലേൽ എന്തേലും കാരണം പറഞ്ഞു ഇതങ്ങ് ഒഴിവാക്കാം .."

"നിങ്ങൾ പറഞ്ഞോണ്ട് മാത്രം ഇന്ന് ഞങ്ങൾ കാണിക്കാം ..ഇനി ഒരു ആലോചനേം കൊണ്ട് വരുവാണേൽ അത് സർക്കാര് ജോലി ഉള്ളവൻ ആയിരിക്കണം "..

മുഖം ഒന്ന് വക്രിച്ചു കാട്ടി മാലതി അകത്തേക്ക് പോയി ...കുട്ടിരാമൻ രാധാകൃഷ്ണനെയും കൂട്ടി പുറത്തേക്കും ....

ചായയും കൊണ്ട് വന്ന മാലതിയെ കണ്ട് ശ്യാമും കൂട്ടരും ഒന്നമ്പരന്നു ..വാതിൽപ്പടിയിൽ നിത്യയുടെ മുഖം പ്രത്യക്ഷപ്പെട്ടു ....

ഒരു ചെറു പുഞ്ചിരിയോടെ ശ്യാമവളെ നോക്കി ..താല്പര്യമില്ലാത്ത മട്ടിൽ അവളൊന്നു മുഖം വെട്ടിച്ചു ...

"നിത്യ എന്നാണു പേരല്ലേ ?? ഇപ്പോൾ എന്തിനാ പഠിക്കുന്നത് ??"

"BA ഹിസ്റ്ററി സെക്കന്റ് ഇയർ , ഗ്ലോബൽ കോളേജ് കന്നാട്ടി..."...

" ചിത്രം വരയ്ക്കുമല്ലേ ?? ചുവരിലെ ചിത്രത്തിന് അടിയിലായ് കണ്ടു നിത്യ ആർ കൃഷ്ണ ...നന്നായിട്ടുണ്ട് "

" താങ്ക്സ് ..വേറെ എന്തേലും ചോദിക്കാനുണ്ടോ !!??"

അടുത്ത ഒരു ചോദ്യത്തിനിടനൽകാതെ അൽപ്പം ഉച്ചത്തിൽ ആയിരുന്നു അവളുടെ മറുപടിയും...

സംസാരത്തിന്റെ സ്വരത്തിൽ തന്നെ ശ്യാമവളുടെ അതൃപ്തി മനസ്സിലാക്കിയിരുന്നു ..

"എന്നോടൊന്നും ചോദിക്കാനില്ലേ ???"...

"അമ്മ പറഞ്ഞിരുന്നു എല്ലാം ".......അവൾ മെല്ലെ അകത്തേക്ക് കയറി ...

"ക്ഷമിക്കണം ..ഞങ്ങൾ കുട്ടിരാമനോട് ആദ്യമേ പറഞ്ഞതാണ് സർക്കാർ ജോലിയുള്ള ഒരു ബന്ധമാണ് വേണ്ടതെന്ന്‌..നിങ്ങളെ ബുദ്ധിമുട്ടിച്ചതിൽ ഞങ്ങൾക്ക് വിഷമമുണ്ട് ."...രാധാകൃഷ്ണനെ അത്ഭുതത്തോടെ നോക്കിയിരിക്കുകയായിരുന്നു അവർ ...

ശ്യാമിന്റെ അമ്മാവൻ സോഫയിൽ നിന്നും ഒരൽപം മുന്നോട്ടേക്കിരുന്നു ..

"മിസ്റ്റർ രാധാകൃഷ്ണൻ ....ഈ നാട്ടിൽ എല്ലാവരും സർക്കാരിന്റെ ജോലി മാത്രം ചെയ്‌താൽ ബാക്കി ഉള്ള ജോലികളൊക്കെ ആര് ചെയ്യും .....നിങ്ങളെ
പോലുള്ള പെൺകുട്ടികൾ ഉള്ള രക്ഷിതാക്കൾ സർക്കാർ ജോലിക്കാർക്ക് മാത്രമേ വിവാഹം കഴിച്ചു കൊടുക്കൂ എന്ന് വാശിപിടിച്ചാൽ അല്ലാത്തവരൊക്കെ എന്തുചെയ്യും "....

അദ്ദേഹം ,തന്റെ അരിശം മാന്യമായി രാധാകൃഷ്ണന് നേരെ നിറയായൊഴിച്ചു...

" നിങ്ങളുടെ ആഗ്രഹത്തെ ഒരിക്കലും തെറ്റായി കാണുന്നില്ല ..പക്ഷെ ആ ഒരു മാനദണ്ഡം മാത്രം മതി, വേറൊന്നും പ്രശ്നമല്ല എന്ന നിങ്ങളുടെ ധാരണ ശരിയല്ല എന്നത് വിനയപൂർവ്വം താങ്കളെ ബോധ്യപ്പെടുത്താൻ ആഗ്രഹിക്കുകയാണ് . വിവാഹം കഴിക്കുന്നവന്റെ സ്വഭാവം ,മാന്യമായി ജോലി ചെയ്ത് തന്റെ മകളെ സംരക്ഷിക്കാനുള്ള കഴിവുണ്ടോ ,..അതിനുള്ള മനസ്സുണ്ടോ എന്നൊക്കെ അന്വേഷിച്ച് അവളെ കൈപിടിച്ച് കൊടുക്കാൻ ശ്രമിക്കുക .... "..

കൂടുതൽ വാചാലനാവാൻ തുടങ്ങിയ അമ്മാവനെ ശ്യാമപ്രസാദ് തടഞ്ഞു ....

" ശ്യാമിന് നല്ല സാമ്പത്തിക സ്ഥിതിയിലുള്ള , ജോലിയുള്ള പെൺകുട്ടികളെ കിട്ടാഞ്ഞിട്ടല്ല ..സാധാരണ കുടുംബത്തിൽ നിന്നും മതി എന്നാണ് അവന്റെ ഒരു കാഴ്ചപ്പാട് ..അതാണ് ഞങ്ങളെ ഇവിടെ എത്തിച്ചത് "....

അവന്റെ സ്വഭാവം അറിയുന്ന കൂട്ടുകാരനും ഒന്നും പറയാതെ മെല്ലെ എഴുന്നേറ്റു ...

തന്റെ പാകപ്പെടുത്തിയ വ്യക്തിത്വത്തിന്റെ പ്രതിരൂപമായ പുഞ്ചിരിയോടെ ശ്യാo രാധാകൃഷ്ണനെയും മാലതിയെയും ഒന്ന് നോക്കി ...

" സോറി ......"

മുറ്റത്തേക്കിറങ്ങുന്നതിനിടയിലാണ് ഒരു ഓട്ടോറിക്ഷ വന്നുനിന്നത് ...

കാക്കി യൂണിഫോം വണ്ടിയിലേക്കിട്ട് മുണ്ടൊന്നു നേരെയാക്കി മീൻ പൊതിഞ്ഞ കവറുമെടുത്ത് വിനു മുറ്റത്തേക്ക് കയറി ..

വീട്ടിൽ നിന്നുമിറങ്ങിപോവുന്നവരെ സൗഹൃദഭാവത്തിൽ ഒന്ന് നോക്കി അവൻ മീൻ മാലതിയെ ഏൽപ്പിച്ചു ..

ഒരു നിമിഷം അവന്റെ കണ്ണുകൾ ശ്യാമപ്രസാദിന്റെ നേരെ നീണ്ടു ...അത്ഭുതത്തോടെ അവൻ അയാളുടെ അടുത്തേക്ക് ചെന്നു...

" സാർ .....സ്റ്റാർ ഗ്രൂപ്പ് ഓഫ് കമ്പനീസിന്റെ HR മാനേജർ ശ്യാമപ്രസാദ് സാറല്ലേ !!????"....

ശ്യാo അവനെ നോക്കി പെട്ടെന്ന് ഷെയ്ക്കാന്റ് നൽകി ..

"സാർ...എന്റെ പേര് വിനു ആർ കൃഷ്ണ .ഞാനും രണ്ടു മൂന്നു ഫ്രണ്ട്സും കമ്പനിയിൽ ഇന്റർവ്യൂ അറ്റന്റ് ചെയ്തിരുന്നു .അതിൽ രണ്ടു പേർക്ക് ജോലി കിട്ടി ...കമ്പനിയുടെ കർണാടക ബ്രാഞ്ചിലാ അവരിപ്പോൾ ..ഇന്നലെ വരെ ഞാൻ HR ലേക്ക് വിളിച്ചിരുന്നു ..ഇനി അടുത്ത ഒഴിവിലേക്ക് കുറച്ച് കഴിഞ്ഞേ നിയമനം ഉണ്ടാവുമെന്നാ പറഞ്ഞത് ..സാറ് വിചാരിച്ചാൽ എന്തെങ്കിലും !!???......." ഒരൽപം ജാള്യതയോടെ അവൻ പറഞ്ഞു നിർത്തി ..

"ഞാൻ കുറച്ചു ദിവസമായി ലീവിലാണ് ... ഓഫീസിൽ എത്തീട്ട് ഒന്ന് നോക്കട്ടെ "...
ശ്യാമപ്രസാദ് പുഞ്ചിരിയോടെ അവന്റെ തോളിൽ തട്ടി ...

"ബീ ടെക് കഴിഞ്ഞു ജോലിയില്ലാതെ ഇരിക്കുന്നവന്റെ വേദനയാ സാർ ..എന്ത് പണിയും ചെയ്യാൻ ഞാൻ തയ്യാറാ ..കൂലിപ്പണിക്ക് ഇത്രേം പഠിപ്പുള്ളോനെ കൂടെ കൂട്ടാൻ ഏല്ലാവർക്കും മടി ..ഒരു ഓട്ടോറിക്ഷ സ്വന്തമായി അങ്ങെടുത്ത് ഓടാൻ തുടങ്ങി...ഒരുപാട് ഓട്ടോ ഉള്ളതുകൊണ്ടുതന്നെ ഇപ്പൊ ഓട്ടം കുറവാ...കെട്ടിക്കാൻ ഒരു പെങ്ങളുമുണ്ട് സാർ "...അവന്റെ ദൈന്യത ....

"വെരി ഗുഡ് ...എന്ത് ജോലിയും ചെയ്യാനുള്ള വിനുവിന്റെ ആ മനസ്സ് ...ആത്മാർഥത ...അതുതന്നെയാണ് ഇന്ന് നമ്മൾ ഓരോ ചെറുപ്പക്കാർക്കും വേണ്ടത് ..ഹാറ്റ്സ് ഓഫ് യു ... "....

ശ്യാമിന്റെ കൈകളിലേക്ക് തന്റെ കൈ അമരുമ്പോൾ വിനുവിന്റെ ആത്മവിശ്വാസം വർധിക്കുകയായിരുന്നു...

ശ്യാമപ്രസാദിന്റെ ആൾട്ടോ മെല്ലെ മുന്നോട്ടു നീങ്ങിയപ്പോഴാണ് വിനുവിന് പരിസരബോധം ഉണ്ടായത് ..

'അവരെന്തിനാ ഇവിടെ വന്നത്!!!!! ??"

ഇതെല്ലാം കണ്ടും കേട്ടും അമ്പരന്നു നിൽക്കുകയായിരുന്ന രാധാകൃഷ്ണനെ ഒരുചെറു കള്ളച്ചിരിയോടെ ഇടംകണ്ണിട്ട് നോക്കുകയായിരുന്നു ബ്രോക്കെർ കുട്ടിരാമൻ ...

അടുക്കളയിൽ ആയിരുന്ന മാലതി പുറത്തേക്ക് വന്നു ...

" കുട്ടിരാമേട്ടാ ....എത്രയായി പറയുന്നു വിനൂട്ടന് ഒരു പെണ്ണിനെ നോക്കാൻ ..അവൻ ഓട്ടോ ഓടിക്കുന്നതൊന്നും നോക്കണ്ട . നല്ല ഒരു കമ്പനിയിൽ ഇന്റർവ്യൂ കഴിഞ്ഞിരിക്കാ..മാനേജർ പോസ്റ്റിലേക്ക് ..അടുത്ത് തന്നെ ജോലി കിട്ടും .."...

മാലതി അവന്റെ മുടിയൊന്നു കൈകൊണ്ടു ചീകി ഒതുക്കി കൂട്ടിച്ചേർത്തു ...

"നല്ല സുന്ദരിയായ ജോലിയുള്ള കുട്ടിത്തന്നെ ആയിക്കോട്ടെട്ടോ ...നല്ല പഠിപ്പും വേണം "...

തരുണീമണികളുടെ ഫോട്ടോ കാണിക്കാനായി കുട്ടിരാമൻ തന്റെ പുതിയ ലാപ്ടോപ്പ് എടുത്ത് ഓൺ ചെയ്ത് മേശപ്പുറത്തേക്ക് വെച്ചു....സ്‌ക്രീനിൽ തെളിഞ്ഞു വന്ന ഒരു പിക്ച്ചറിൻ അടിയിൽ കണ്ടത് മാലതി മെല്ലെ വായിച്ചു....

" കാക്കയ്ക്ക് തൻകുഞ്ഞ്... 'മാത്രം '... പൊൻകുഞ്ഞ് "

***---------------***
ഷിബു ബീ കെ നന്ദനം 
sbknandhanam@gmail.com

ആത്മഹനനം

ജീവിത പ്രശ്നങ്ങളിൽ നിന്നൊളിച്ചോടും ഭീരുവിൻ ചിന്തകൾ ...ഹത്യക്കൊരുങ്ങുന്ന നേരത്തെ ചിന്തകൾ ...

ഞാൻ ചെയ്ത തെറ്റിനൊരു പരിഹാരം എൻ മൃത്യു ...എന്റെ പ്രശ്നങ്ങൾക്ക് ഞാൻ കണ്ട മാർഗവും എൻ മൃത്യു .....

ഒരുപാട് പേർ എന്നെ നോക്കി കരയും ...ഒരുപാട് പേർ എൻ നന്മ്മകൾ പാടിപുകഴ്ത്തും ...ഞാൻ ചെയ്ത തെറ്റുകളെ ഏവരും ലളിതമായി ന്യായീകരിക്കും ...

സഹതാപകണ്ണീരിനാൽ പുഷ്പങ്ങളെറി ഞ്ഞവർ .....കാലങ്ങളോളം എന്നെ ഓർത്ത് വിലപിച്ചിടും........

ചിതയിലെ കനലിൻ ചൂടാറുന്ന നേരം ...

ഒറ്റയായ് , കൂട്ടമായി നീങ്ങുന്ന നാട്ടുകാർ .....വിങ്ങുന്ന ഹൃദയമായി കൂട്ടുകാരൊക്കെയും .....ഓർമ്മകൾ തഴുകുന്ന ബന്ധുജനമാകയും .........

എത്ര നാൾ .....എത്രനാൾ.......

ചൂടേറും വാർത്തകൾ കാതിലെത്തും വരെ.....

കാലം മായ്ക്കുമൊരു മുറിവിനെപ്പോലെയീ... ഭീരുവിൻ ഓർമ്മയും മാഞ്ഞുപോകുന്നിതാ ....

മണ്ണോട് മണ്ണിൽ ചേർന്നതിനിപ്പുറം വെറും ഓർമ്മകൾ മാത്രം ...കാതോട് കാതിൽ ചെയ്തുകൂട്ടിയ നന്മ്മകൾ മാത്രം....

പൂമുഖ ചുവരിലായ് 
പുഷ്പങ്ങൾ കോർത്തോരാ ചിത്രമുയരുമ്പോൾ ....അണയാതെ ഒരു ചെറു തിരിനാളം സാക്ഷിയായ്.....

നഷ്ട്ടങ്ങളെന്നും പേറുവാൻ ഒരുകൂട്ടർ ....

ഭാരമൊന്നിറക്കുവാൻ അച്ഛൻ തിരഞ്ഞൊരാ ചുമൽ ........വേച്ചുപോവുന്ന നാൾ കൈപിടിച്ചീടുവാൻ ഒരു കൈ പ്രതീക്ഷിച്ചൊരമ്മ ....

കൂടപ്പിറപ്പിന്റെ കണ്ണുനീർ ഓർമ്മകൾ ...അവസാനശ്വാസംവരേയും കൂടെയെന്ന വാക്കിനാൽ കോർത്തോരാ താലിച്ചരട് .....

പിന്നെ ....പിന്നെ....എത്ര ചേർത്താലും കൂടിച്ചേരാത്ത പിതൃത്വമെന്ന നഗ്‌നമായ യാഥാർഥ്യം .. ....കാതോർത്ത് ....കാതോർത്ത്... നോക്കെത്താ ദൂരത്തു കണ്ണെറിഞ്ഞു നിൽക്കുന്ന പൈതലിൻ ...........ഓർമ്മകൾ , ഇഷ്ട്ടങ്ങൾ ,ഭാവിസ്വപ്നങ്ങളും ....

ഒരു നിമിഷ വ്യർത്ഥ ചിന്തയാൽ കഴുത്തിൽ കുടുക്കിയൊരു കയറിനാൽ......അറ്റുപോയതോ കുറെ ജീവിത സമവാക്യങ്ങളും ..... 

പാത പോലെയീ ജീവിതം ....കയറ്റമോ ദുഃഖങ്ങൾ ....ഇറക്കമോ സന്തോഷങ്ങൾ ....

കയറ്റമെന്നുമെൻ പാതയിലെന്ന ചിന്തയാൽ ഭീരു ...........പോയ് ഒളിച്ചിരിക്കുന്നതോ തെമ്മാടിക്കുഴിയിലും ....

ഊരാക്കുടുക്കുകൾ ഒരുപാട് .....രക്ഷപ്പെടാനുള്ള വഴികളോ അതിലേറെ ......അനുഗ്രഹിച്ചു കിട്ടിയ ജീവൻ ....വലിച്ചെറിയുന്ന നേരം .....ഓർക്കുക ...ഓർമ്മിക്കുക .....

അനുഗ്രഹത്തിനായി കാത്തിരിക്കുന്ന കോടാനു കോടി ജന്മങ്ങളെ .....മാറാരോഗത്തെപ്പുണർന്ന് മരണമെന്ന വിരുന്നുകാരനെ കാത്ത് കാത്തിരിക്കുന്ന .........

ജീവിച്ചും ജീവിച്ചും കൊതിതീരാത്ത നിർഭാഗ്യവാന്മാരെ.....സ്നേഹിച്ചും ലാളിച്ചും കൊതിതീരാത്ത ഉറ്റവരെ ..........

**------------**
ഷിബു ബീ കെ നന്ദനം 
sbknandhanam@gmail.com