Showing posts with label ShabnamSiddeequi. Show all posts
Showing posts with label ShabnamSiddeequi. Show all posts

ബലിയാടുകൾ

ബലിയാടുകൾ
........................
ദൈവപ്രീതിക്കായി
ബലിക്കല്ലിൽ
കൈകാലുകൾ അടക്കിവെച്ച്
ശ്വാസം അടക്കിപ്പിടിച്ച്
കണ്ണുകളിറുക്കിയടച്ച്
കഴുത്തു നീട്ടി
കിടക്കുന്നുണ്ട്
ബലിയാടുകൾ...
ദൈവപ്രീതിക്കായി
മിണ്ടാട്ടം നിർത്തി
വാലാട്ടി നടന്നിരുന്ന
ഗതകാല സ്മരണകൾ
അയവിറക്കി,
ജീവനെടുക്കാൻ
പാഞ്ഞടുക്കുന്ന
മൂർച്ചയേറിയ കത്തിയെ കണ്ടു
പുഞ്ചിരിക്കാൻ
പാടുപെടുന്നുമുണ്ട്..
നടക്കാൻ മടിച്ചപ്പോൾ
പഴുത്തില കാട്ടി
മോഹിപ്പിച്ച ആരാച്ചാരെ
രക്ഷകനായി കണ്ടു
ദിവ്യബലിക്കായി
സ്വയം തയ്യാറായിരുന്നു..
ജീവരക്തം
കുതിച്ചു ചാടി
തറയെ ചെഞ്ചായമണിയിക്കുമ്പോൾ
ദൈവഭക്തന്മാർ
കൈകൂപ്പി
രക്ഷകനെ വാഴ്ത്തിപ്പാടുന്നു..
ആടുകൾ
ബലി നൽകാനായി
പിറവിയെടുത്തവരാണ്..
ദൈവപ്രീതിക്കായി
ആത്മാവിനെ സമർപ്പിച്ചു
വിട കൊള്ളാനായി
ജനിച്ചു വീണവർ..
ശബ്നം സിദ്ദീഖി
27-06-2017

മഴക്കാലം


മഴക്കാലം
.................
ആറു മാസം
ഭോഗിച്ചു നടന്ന വാനം
ഗർഭ ലക്ഷണങ്ങൾ കാട്ടി
ഛർദ്ദിച്ചു തുടങ്ങുന്നു..
വേനൽ വറ്റിച്ചെടുത്ത
ചോരയും നീരും
വയറ്റിൽ കിടന്നു
തിളച്ചുമറിയുന്നു.
ഛർദിയുടെ
ഓക്കാനങ്ങൾ
ഇടിമുഴക്കങ്ങളായി
പ്രകമ്പനം കൊള്ളുന്നു.
കാത്തിരിപ്പിനൊടുവിൽ
ചോരച്ചാലുകളൊഴുക്കി
പുഴകളും കുളങ്ങളും
ജന്മമെടുക്കുന്നു.
ശബ്നം സിദ്ദിഖി
28-05-2017

വൻമതിലുകൾ തകരുമ്പോൾ


വൻമതിലുകൾ തകരുമ്പോൾ
...................................................
അന്നു നാം
ഒരു വൻമതിലായിരുന്നു.
പറിച്ചെറിയാൻ
പറന്നു വന്ന കൊടുങ്കാറ്റിനെ
ജനിച്ച മണ്ണിൽ കാലൂന്നി നിന്ന്
പിടിച്ചുകെട്ടിയവർ.
മലവെള്ളപ്പാച്ചിലിനെ
നെഞ്ചൂക്കു കൊണ്ട് തടഞ്ഞു നിർത്തി
വിളകൾക്കു ദാഹജലമായി
നദികൾ തീർത്ത്
ഒഴുക്കിയിരുന്നവർ.
കൊടുങ്കാറ്റുകൾ ശമിച്ചു
കാർമേഘങ്ങൾ ഒഴിഞ്ഞു
മാനം തെളിഞ്ഞപ്പോൾ
ചേർത്തുവെച്ച കരങ്ങൾ
മെല്ലെ മെല്ലെ അകലാൻ തുടങ്ങി.
കല്ലും മണ്ണും മണൽ തരികളും
തമ്മിൽ തമ്മിൽ
കണ്ടു കൂടാത്തവരായി.
അവകാശത്തർക്കങ്ങൾക്കൊടുവിൽ
നിലത്തു വീണുടഞ്ഞ
കല്ലുകൾ
മണ്ണിനോടു ചേർന്നു.
പുതിയ കാർ മേഘങ്ങൾ
ഉരുണ്ടു കൂടുമ്പോൾ
ഒന്നിച്ചു നിന്നതിന്റെ യോർമ്മകളിൽ
നീറി സങ്കടപ്പെടുന്നു..
കൊടുങ്കാറ്റിനൊപ്പം
പേമാരിയുംവന്നപ്പോൾ
കല്ലും മണ്ണും
കടലിൽ ചെന്നു നിന്നു..
ഒന്നിച്ചു നിന്നപ്പോൾ
നെഞ്ചുവിരിച്ചു നിന്ന
കന്മതിലിന്റെ
ഭൂതകാലസ്മരണകളിൽ
നൊമ്പരപ്പെട്ടു
കടലാഴങ്ങൾ തേടി നടക്കുന്നു.
പുതിയ പടവുകാർ വന്നു
പിണങ്ങിയ പ്പിരിഞ്ഞ
കല്ലും മണ്ണും മണലും
നയനാശ്രുക്കൾ ചേർത്തു
കുഴച്ചെടുത്തു
പുതിയ മതിലുകൾ തീർക്കുന്നതും
സ്വപ്നം കണ്ടിരിക്കാം.
ശബ്നം സിദ്ദീഖി
23-07-2017

വേനൽ

Image may contain: 1 person, beard, outdoor and nature

ഉരുണ്ടുകൂടുന്ന
വാക്കുകൾ
കവിതയായി
പെയ്തിറങ്ങുന്നില്ല.
ചുട്ടുപൊള്ളുന്ന
സൂര്യപ്രകാശത്തിൽ
ആവിയായി മേലോട്ടുയരുന്ന
പ്രതിഷേധ ധൂമങ്ങൾ
ഒന്നിച്ചു ചേർന്ന്
തണുത്തുറയാൻ
തയ്യാറാകുന്നില്ല.
കാർമേഘങ്ങൾ കണ്ടു
പീലി വിടർത്തിയ
മയിൽക്കൂട്ടങ്ങൾ
നൃത്തം നിർത്തിവെച്ച്
വിശ്രമം തേടുന്നു.
വരണ്ടുണങ്ങിയ
പുൽച്ചെടികൾ
ഉയർത്തെഴുന്നേൽപ്പിനായി
കവിതാ ശകലങ്ങൾ
കാത്തിരിക്കുന്നു.
ഇനിയും കാത്തിരിക്കുന്നു
ഉപ്പുരസമുള്ള
കടൽക്കാറ്റിനായി.
തുള്ളിമുറിയാത്ത
അക്ഷരപ്പെയ്ത്തിനായി.
കരകവിഞ്ഞൊഴുകുന്ന
ചോര നിറം ചാലിച്ച
വാചകപ്പുഴകൾക്കായി.
തവളക്കരച്ചിലുകൾക്കായി..
ശബ്നം സിദീഖി
26-04-2017

ദൈവങ്ങളോട് ഒരു അപേക്ഷ


ദൈവങ്ങളോട് ഒരു അപേക്ഷ
...................................................
നിങ്ങളുടെ
കഴിഞ്ഞതും
വരാനിരിക്കുന്നതുമായ
അവതാരങ്ങൾ
ഒരു വെള്ളപ്പേപ്പറിലെങ്കിലും
എഴുതിത്തരിക.
എന്റെ പിച്ച പാത്രത്തിൽ
വൈകുന്നേരങ്ങളിൽ
കണക്കെടുക്കുമ്പോൾ
നാണയത്തുട്ടായി
അവതരിക്കാതിരിക്കുക.
തിളച്ചു മറിയുന്ന
കഞ്ഞിക്കലങ്ങളിൽ
വെളുത്ത വറ്റായി
പിറവിയെടുക്കാതിരിക്കുക.
ചമ്മന്തിയരക്കാൻ
അമ്മിയിൽ വെച്ച
ഉപ്പും മുളകുമായി
അവതരിക്കാതിരിക്കാൻ
കരുണയുണ്ടെങ്കിൽ ശ്രമിക്കുക.
ജീവിതസുഖം
അനുഭവിച്ചറിഞ്ഞ
കക്കൂസ് മുറികളിൽ
പിറവിയെടുക്കാതിരിക്കുക.
ലോകം മുഴുവനും
നിങ്ങളുടെതായിരുന്നിട്ടും
എന്റെ രഹസ്യയിടങ്ങളിൽ
ജന്മമെടുക്കണമെന്ന്
വാശി പിടിക്കാതിരിക്കുക.
എഴുത്തുകാരന്റെ തൂലികയിലും
വായിക്കുന്ന പുസ്തകങ്ങളിലും
ചിന്തകന്റെ തലച്ചോറിലും
ഇനിയെങ്കിലും
കൂടുകെട്ടിത്താമസിക്കാതിരിക്കുക.
വിശുദ്ധ സ്ഥലമായി പ്രഖ്യാപിച്ച്
ഭക്തജനങ്ങൾ കയ്യടക്കുമ്പോൾ
പടി കടത്തപ്പെടുന്നവരുടെ
കണ്ണീർത്തുള്ളികൾ കൂടെ
കാണാൻ ശ്രമിക്കുക.
റെയിൽവേ പുറംപോക്കിലും
ഗുഹാമുഖങ്ങളിലും
നിങ്ങൾ അതിഥിയായി
വരാതിരിക്കുക.
ഇലനക്കിപ്പട്ടികളുടെ
ചിരി നക്കികളായി
ചങ്ങാത്തം കൂടാതിരിക്കുക.
വെയിലും മഴയും കാക്കാൻ
അഴയിൽ കെട്ടിക്കുണ്ടാക്കിയ തമ്പുകളിൽ
ഐശ്വര്യങ്ങളായി വന്നു
ചുമരുകളിൽ
ആത്മഹത്യ ചെയ്യാതിരിക്കുക.
ശബ്നം സിദ്ദീഖി
08-04-2017

പച്ചക്കുതിരകൾ


പച്ചക്കുതിരകൾ
............................
ചെളിയിലിറങ്ങിയ
വേരുകൾ
മോലോട്ട്
ഇടമുറിയാതെ
എത്തിച്ചു കൊടുക്കുന്ന
ജീവജലം
ഊറ്റിക്കുടിക്കാൻ
അഞ്ചാണ്ടു കഴിയുമ്പോൾ
പാറി വരാറുണ്ട്
സുന്ദക്കുട്ടൻ മാരായ പച്ചക്കുതിരകൾ.
ഏണി വെച്ചും
കൈ കൊടുത്തും
സായൂജ്യമടയുന്ന
നീരുവറ്റിയ
നെല്ലോലകൾ
കാറ്റിനൊപ്പം ഇടത്തോട്ടും
വലത്തോട്ടും പാറിക്കളിക്കാറുമുണ്ട്.
നിലത്തിറങ്ങാൻ മടിച്ച
പച്ചക്കുതിരകൾ
വായുമാർഗ്ഗം
പുതിയ വയലേലകൾ തേടി
വേഗത്തിൽ പറക്കാറുമുണ്ട്.
വയലുകൾ മുഴുവൻ
തങ്ങളുടെതാണെന്ന്
വീമ്പു പറയുമ്പോഴും
ചെളി പിടിച്ച വേരുകൾ
പിന്നെയും
വെളിച്ചം കാണാത്ത
മൺകൂനകളിൽ
മോലോട്ട് കൊടുക്കാനുള്ള
ജീവജലത്തുള്ളികൾക്കായി
പരക്കം പായുന്നുണ്ടാവും.
ശബ്നം സിദ്ദീഖി
05-04-2017

മാറാപ്പ്


മാറാപ്പ്
.............
ഈ മാറാപ്പ്
ഇവിടെ
തെരുവിൽ ഇറക്കി വെക്കുന്നു.
ഉള്ളിൽ
ചീഞ്ഞുനാറുന്ന
മാലിന്യക്കൂമ്പാരങ്ങൾ
വഴിയാത്രക്കാർക്കായി
ഇവിടെ തുറന്നു വെക്കുന്നു.
മാനം വിറ്റതിന്റെ
വരവുചെലവുകൾ
വരിയും നിരയുമായി
നിറം പിടിപ്പിച്ചു വരച്ചു വെച്ചതിന്റെ
ബാക്കിപത്രങ്ങൾ.
ഒളിഞ്ഞുനോട്ടത്തിന്റെ
വൈറലായ ലൈവുകൾ.
തട്ടിയെടുത്ത
മനുഷ്യ മാനത്തിന്റെയും
മാംസത്തിന്റെയും
വിഘടിക്കപ്പെടാതെ കിടക്കുന്ന
ചെറുകഷ്ണങ്ങൾ.
കുതികാൽ വെട്ടിന്റെ
സൂത്രവാക്യങ്ങൾ.
തമ്മിലടിപ്പിച്ചു
കൊന്നും തിന്നും തീർത്ത ശരീരങ്ങൾ
തെറിപ്പിച്ച ചോരപ്പാടുകൾ.
ബന്ധങ്ങൾ അറുത്തുമാറ്റി
കബന്ധങ്ങൾ സൃഷ്ടിച്ചെടുത്ത
സ്റ്റിംഗ് ഓപ്പറേഷനുകൾ.
നഗ്നരാജാവിന്
നാണം തുന്നിക്കൊടുത്തതിന്
കൂലിയായി കിട്ടിയ
സമ്മാനത്തിന്റെ
ചിതലെടുക്കാത്ത ഭാഗങ്ങൾ.
ഒറ്റിക്കൊടുത്തു നേടിയ
വെള്ളിക്കാശുകൾ..
ഈ വിഴുപ്പുഭാണ്ഡം
ഇനിയും വഹിക്കാൻ കഴിയാത്തതിനാൽ
"മാപ്പ് " എന്നെഴുതി
മാലോകർക്കായി
വഴിത്താരയിൽ തുറന്നു വെക്കുന്നു.
കാക്കകൾ കൊത്തിവലിച്ചതിന്റെ
അവശിഷ്sങ്ങൾ
തെരുവുപട്ടികൾക്കു
ദാനം കൊടുത്ത മഹാമനസ്കതയ്ക്കു
മംഗളാശംസകൾ.
ശബ്നം സിദ്ദീഖി
01-04-2017

ചോണനുറുമ്പുകൾ


ചോണനുറുമ്പുകൾ
................................
മൃതശരീരങ്ങളിലെ
ചോരയൂറ്റിക്കുടിക്കാൻ
മരണം കഴിഞ്ഞു
നാഴികകൾക്കു ശേഷം
മന്ദം മന്ദം നടന്നു വരാറുണ്ട്
കാക്കി വേഷമിട്ട ചോണനുറുമ്പുകൾ.
ചക്കരക്കുടങ്ങളിൽ
മധുരം നുണഞ്ഞു
പിന്നിലെ ഭരണി നിറച്ചാൽ
മന്ദം മന്ദം നടന്നു
വീടണയാറുമുണ്ട്
ചോണനുറുമ്പുകൾ.
തലമുറകൾക്കു
നൊട്ടിനുണയാനുള്ള മധുരം
വീട്ടിനുള്ളിലെ രഹസ്യ അറകളിൽ
സൂര്യപ്രകാശം കാണാതെ
പൂഴ്ത്തിവെച്ചു കാത്തിരിക്കാറുമുണ്ട്
ചോണനുറുമ്പുകൾ.
മുങ്ങി മരിച്ചവന്റെ അടിവസ്ത്രവും
തൂങ്ങിയവന്റെ കാലടികളും
പര്യവേഷണം നടത്തി
പിന്നാമ്പുറങ്ങളിലേക്ക്
ഊളിയിട്ടു പോകുമ്പോഴും
വേഗത കുറവാണെന്ന പഴി കേൾക്കണം.
തന്നെക്കാൾ വലിയ ഭാരം
ഉയർത്തുമ്പോഴും
ഒന്നിനും കൊള്ളാത്തവനായി
പഴികേൾക്കാനായി പിറന്ന ജന്മമായി
ഇനിയും അരിച്ചു നടക്കണം
ബൂട്ടുകൾക്കിടയിൽ കിടന്ന്
ഞരങ്ങിത്തീരും വരെ
വഴിത്താരകളിൽ.
ശബ്നം സിദ്ദീഖി
29-03-2017

കവിതകൾ


കവിതകൾ
.....................
കണ്ണും കാതുമുള്ളവന്റെ
വായ ബലമായി പൊത്തി വെക്കുമ്പോൾ
വിരൽ തുമ്പിലൂടെ സ്വതന്ത്രമാവുന്ന
നിലവിളികളാണു കവിതകൾ.
അടിയിൽ നിന്നുള്ള
അഗ്നിയുടെ താപവും
അകത്തു നിന്നുള്ള
മർദവും ഒന്നിച്ചു വന്നു
നോവിച്ചപ്പോൾ
ആവി പോകാൻ മാത്രമുള്ള
സുഷിരത്തിലൂടെ
ആകാശം തേടിപ്പറക്കുന്ന
ചൂളം വിളികളാണു കവിതകൾ.
കെട്ടിനിർത്തിയ വെള്ളത്തുള്ളികൾ
ഒഴുകാൻ കഴിയാതെ
മൗനമാചരിക്കുമ്പോൾ
ഉറക്കം കെടുത്താനായി
ജന്മമെടുക്കുന്ന
കൊതുകുകളാണു കവിതകൾ.
ആവാസസ്ഥലങ്ങളിൽ നിന്നും
ആട്ടിയകറ്റപ്പെട്ടു
തെരുവിന്റെ ദൈന്യതകളിൽ
തള്ളിനീക്കപ്പെടുന്ന
പട്ടി ജന്മങ്ങളുടെ
അർധരാത്രികളിലെ
ഓരികളാണു കവിതകൾ..
ദാഹജലം കിട്ടാതെ
വരണ്ടുണങ്ങിയ വിത്തുകൾ
കണ്ണീർ തുള്ളികൾ കുടിച്ചു
തോടു പൊട്ടിച്ചു
പുറത്തേക്കു നീട്ടുന്നതലയും
മണ്ണിലേക്ക് താഴ്ത്തുന്ന
വേരുകളുമാണു കവിതകൾ.
ആത്മസംഘർഷങ്ങൾ തീർത്ത
സമരങ്ങൾക്കൊടുവിൽ
തീയും വെളിച്ചവും ശബ്ദവുമായി
പൊട്ടിച്ചിതറുന്ന
വെടിമരുന്നുകളാണു കവിതകൾ.
ശബ്ദം സിദ്ദീഖി
21-03-2017

കാർമേഘങ്ങൾ


കാർമേഘങ്ങൾ
..........................
ഉരുണ്ടുകൂടുന്ന കാർമേഘങ്ങൾ
എത്ര സമയം തിളങ്ങുന്ന സൂര്യനെ
ഒളിപ്പിച്ചു വെക്കും?
അടങ്ങിയൊതുങ്ങിക്കഴിഞ്ഞ
സമുദ്രജലത്തെ
ആകാശത്തോളം വലിയ
സ്വാതന്ത്ര്യം കാണിച്ചു വശീകരിച്ചു
തട്ടിക്കൊണ്ടുപോയപ്പോൾ
ഒന്നുമില്ലാതെയാകുമെന്ന്
സ്വപ്നം പോലും കണ്ടിരുന്നില്ല.
കാർ മേഘങ്ങൾ വെറും
ഇരുട്ടുപാളികൾ മാത്രവുമല്ല.
വെളിച്ചത്തിലേക്കുറ്റുനോക്കുന്ന
കണ്ണുകൾ ഇരുട്ടിനുള്ളിലും
പ്രകാശിച്ചു കാണാം.
കാർ മേഘങ്ങൾ
പ്രതീക്ഷകൾ കൂടിയാണ്.
തെറ്റിനൊപ്പം ഒളിച്ചോടിയ
തണ്ണീർ തുള്ളികൾ
തെറ്റുതിരുത്തിക്കരഞ്ഞു
മഴയായ് പെയ്തൊഴിയുന്നതു കാണാം.
കാർമേഘങ്ങൾ കണ്ടു
നൃത്തം വെക്കുന്ന
മയിൽക്കൂട്ടങ്ങളുടെ
കാൽപാദങ്ങൾ നോക്കുക.
വൈരൂപ്യത്തിന്റെ
അറ്റങ്ങൾ കാണാം..
ശബ്നം സിദ്ദീഖി
14-03-2017

ചെറുമീനുകൾ


ചെറുമീനുകൾ
..........................
ആദ്യം ശാന്തമായിക്കിടക്കുന്ന
കുളങ്ങൾ കലക്കി മറിക്കണം.
പിന്നെ
ചെറിയ കണ്ണികളുള്ള വലവിരിക്കണം.
കണ്ണികൾ കുരുങ്ങുമ്പോൾ
സാവധാനം മേലേക്കു വലിക്കണം.
കരയ്ക്കടുപ്പിച്ചു
മെല്ലെ വലതുറക്കുമ്പോൾ
ജീവവായുവിനായി പിടയുന്ന
ചെറുമീനുകൾ
നേതൃത്വമില്ലാതെ
നൃത്തം വെക്കുമ്പോൾ
കൂടെ ചുവടു വെക്കണം.
നൃത്തം കഴിഞ്ഞു
ഉറക്കമാവുമ്പോൾ
കുട്ടകളിൽ താങ്ങി
വറവുചട്ടികളിലേക്കു നയിക്കണം.
വലക്കണ്ണികൾ
വരിഞ്ഞു കെട്ടിക്കുണ്ടാക്കിയത്
ചെറുമീനുകൾക്ക് വേണ്ടി മാത്രമാണ്.
പിട യാതെ
തോണി മറിച്ചിടാതെ
അനുസരണയോടെ കീഴടങ്ങാൻ
ചെറുമീനുകൾക്കേ കഴിയൂ.
വലകൾ ഇനിയും
നെയ്തെടുക്കണം.
തടാകത്തിനപ്പുറത്തും
വിശാലമായൊരു ലോകമുണ്ടെന്നറിയാതെ
വലക്കണ്ണികൾ തേടുന്ന നീന്തലിന്
ചെറുമീനുകളോടൊപ്പമെത്താൻ
മറ്റാർക്കും കഴിയില്ലല്ലോ.
ശബ്നം സിദ്ദീഖി
11-03-2017

മെലിഞ്ഞ പുഴ


മെലിഞ്ഞ പുഴ
.........................
വയറൊട്ടി
അങ്ങിങ്ങായി വെള്ളാരം കല്ലുകൾ
വെളിച്ചമായി മിന്നുന്ന
മെലിഞ്ഞൊട്ടിയ പുഴയ്ക്കും
സന്തോഷകരമായ ഒരു ബാല്യവും
സാഹസികമായൊരു കൗമാരവും
ശക്തമായൊരു യുവത്വവുമുണ്ടായിരുന്നു.
ബാല്യം
............
കൊച്ചു കുട്ടികളുടെ
ആർപ്പുവിളികൾക്കായി
നെഞ്ചിൽ ഊഞ്ഞാലൊരുക്കി
കാലവർഷം മുറുക്കിത്തുപ്പിയ
ചുവന്ന നീരുമായി
കരകളെ ആശ്ലേഷിച്ചു
കുതിച്ചുപാഞ്ഞിരുന്നു.
കൗമാരം
.................
കുസൃതികൾ കുറഞ്ഞെങ്കിലും
സാഹസികമായി
പരന്നൊഴുകി
പാറക്കെട്ടുകളിൽ
പ്രണയ ചുംബനങ്ങൾ അർപ്പിച്ചു
മണൽക്കൊലുസുകൾ കിലുക്കി
നാണം കുണുങ്ങി ഒഴുകിയിരുന്നു
കൗമാരത്തിൽ.
യൗവ്വനം
..............
ചുട്ടുപൊള്ളുന്ന പകലുകളിലും
സൂര്യന്റെ പ്രതിബിംബത്തിനു
നെഞ്ചിൽ വിരുന്നൊരുക്കി
കൈവഴികൾ ജനിപ്പിച്ചു
ഓളങ്ങളില്ലാതെ
പരന്നൊഴുകിയിരുന്നു.
വിസർജ്യങ്ങൾ
സ്വന്തം മടിത്തട്ടിൽ ഏറ്റുവാങ്ങി
മനുഷ്യജന്മങ്ങളെ ശുദ്ധീകരിച്ചു
സ്വയം അശുദ്ധയായി മാറി.
ഒളിഞ്ഞുനോട്ടങ്ങളും
കുത്തുവാക്കുകളും
പരിഭവങ്ങളില്ലാതെ
ഏറ്റുവാങ്ങി നിർവ്വികാരയായി
ഒഴുകിപ്പരന്ന കാലം.
വാർധക്യം
.................
കൈ വഴികൾ
പുതിയ ജീവിതങ്ങൾ കെട്ടിപ്പടുത്തപ്പോൾ
വെള്ളം ലഭിക്കാതെ
മെലിഞ്ഞു തുടങ്ങി
ഒഴുകാൻ ശക്തിയില്ലാതെ
മണ്ണിനെ കെട്ടിപ്പിടിച്ചു
കാലാവധിയും കാത്തിരിക്കുന്നു.
വെയിൽതട്ടിത്തിളങ്ങുന്ന
വെള്ളാരം കല്ലുകൾ
പ്രായം വിളിച്ചോതുന്നു.
പിന്നിട്ട വഴികളിലേക്ക്
പിന്നെയും പിന്നെയും തിരിഞ്ഞു നോക്കി
കാലം തീർത്ത തുടലുകളിൽ
ബന്ധനസ്ഥയായി
കണ്ണീർ വറ്റി കാത്തിരിക്കുന്നു..
ശബ്നം സിദ്ദീഖി
08-03-2017

വേനൽക്കവിതകൾ


വേനൽക്കവിതകൾ
..................................
പൊട്ടിച്ചിരിക്കുന്ന
സൂര്യനെ നോക്കി
എങ്ങനെ ദു:ഖത്തിന്റെ
കവിതയെഴുതും?
കണ്ണീർ തുള്ളികൾ
ആദ്യമേ വറ്റിയിരുന്നു.
പിന്നെ വിയർപ്പുതുള്ളികളും.
ചുക്കിച്ചുളിഞ്ഞ തൊലിക്കുള്ളിൽ
ചോരപ്പാടുകൾ തേടുന്ന
വെയിൽ നാക്കുകൾ.
ചോര വറ്റിയ ശരീരങ്ങൾ
ചുടുനിശ്വാസങ്ങൾതട്ടി
പറന്നു പോകുന്നതും കാത്തിരിക്കുന്നു.
മാനത്തിന്റെ
ചെറു ചുംബനം കാത്ത്
വിടരാൻ കാത്തിരിക്കുന്ന
വിത്തുകൾ
നിശ്ശബ്ദതയുടെ
താരാട്ടു കേട്ടുറങ്ങുന്നു.
ഇനിയെങ്കിലും
ഈ ചിരി നിർത്തുക.
തമാശകൾ
ഇപ്പോൾ കാണികളെ
ചിരിപ്പിക്കാതായിരിക്കുന്നു.
കട്ടെടുത്ത കണ്ണീർ തുള്ളികളും
ഉപ്പു രുചിയുള്ള വിയർപ്പുതുള്ളികളും
വറ്റിച്ചെടുത്ത ചോരത്തുള്ളികളും
പലിശ സഹിതം
മഴയായി തിരിച്ചു തരിക.
ശബ്നം സിദ്ദീഖി
03 - 03 -2017

ഉള്ളി തൊലിക്കുന്നവർ


ഉള്ളി തൊലിക്കുന്നവർ
.......................................
ഓരോ ദിവസവും
പീഡനത്തിന്റെ
ഓരോ വലിയ ഉള്ളികൾ
കയ്യിൽ തന്നു പോകുന്നു.
ആദ്യത്തെ തൊലി
ഉച്ചപ്പത്രങ്ങൾപൊളിച്ചു പോകുന്നു.
ടെലിവിഷൻ ചാനലുകൾ
പിന്നീടുള്ളത് കട്ടെടുത്തു പോകുന്നു.
അവശേഷിച്ചതിൽ നല്ലൊരു ഭാഗം
അഭിഭാഷകർ ന്യായം പറഞ്ഞു
എടുത്തു പോയി.
കുറച്ചുഭാഗം
നിയമപാലകർ.
ബാക്കി വന്നത്
ജനപ്രതിനിധികൾ ഒളിപ്പിച്ചു വെക്കുന്നു.
എല്ലാ പാളികളും
പൊളിഞ്ഞു തീരുമ്പോൾ
കണ്ടു നിന്നവരുടെ
കണ്ണീർ തുള്ളികൾ മാത്രം
ബാക്കിയാവുന്നു.
തൊലിയുരിക്കപ്പെട്ടിട്ടും
തെളിവുകളില്ലാത്ത
പച്ചക്കറിയായി
സവോള വിധിയെ പഴിച്ചു കഴിയുന്നു.
ശബ്നം സിദ്ദീഖി
24-02-2017

മലയാളം


മലയാളം
...............
പുള്ളിയില്ലാതെയെഴുതിക്കുറിക്കുവാൻ
പിള്ളമാരെ പഠിപ്പിച്ച ഭാഷ നീ
കള്ളമില്ലാതെ ജയിച്ചു ജീവിക്കുവാൻ
ഉള്ളുണർത്തി പഠിപ്പിച്ച ഭാഷ നീ
വെള്ളമൊഴുകും കളകളാരവം
തുള്ളിയായ് വീഴും മഴതൻ ഗീതവും
വെള്ളി വരകളായ് മേഘപാളികളിൽ
കൊള്ളിയാനായ് മിന്നി മറഞ്ഞതും
കള്ളിമുൾച്ചെടിയായി മരുഭൂവിൽ
ഉള്ളറിഞ്ഞു ചിരിതൂകി നിന്നതും
വെള്ള നിറമായ് കൂരിരുൾ നിശയിലും
വെളുക്കെച്ചിരിച്ചുല്ലസിപ്പിച്ച ഭാഷനീ.
കൈവളയിട്ടു കൊലുസിട്ടു വാക്കിനെ
താളത്തിൽ താരാട്ടുപാടിയുറക്കി നീ
തറയും പറയും തുമ്പയും തുളസിയും
തുള്ളിക്കളിച്ചു പഠിച്ചുള്ള നാളുകൾ
നളനും നിളയും കിളിപ്പാട്ടു കൊഞ്ചലും
നീളത്തിൽ മൂളിപ്പഠിപ്പിച്ച ഭാഷ നീ.
കേരളമെന്നൊരു കേളീധരിത്രിക്കു
വെള്ളവും വളവുംവെളിച്ചവും നൽകി നീ
ഭാഷകളുലകിലൊരായിരമെങ്കിലും
വേഷങ്ങളെത്ര,ഘോഷങ്ങളെങ്കിലും
ഉള്ളിലെന്നുമണയാതെ കത്തുന്ന
മാതൃഭാഷയാമെന്റെ മലയാളമാണു നീ.
ശബ്നം സിദ്ദീഖി
21_02_2017

ഭാവനാസൃഷ്ടികൾ


ഭാവനാസൃഷ്ടികൾ
................................
ഇന്നലെ
ഞാനൊരു ഇരായായിരുന്നതും
ഇന്ന് വേട്ടക്കാരനായതും
നാളെ ആത്മകഥയെഴുതാനുള്ള
ഭാവനാസൃഷ്ടികളായിരുന്നു.
എന്റെ വാക്കുകൾ
മസാല ചേർത്ത്
മീഡിയാ പാനിൽ
ഫ്രൈ ചെയ്തെടുത്ത്
സായാഹ്നങ്ങളിൽ
വിൽക്കപ്പെടുമെന്നും അറിയാമായിരുന്നു.
തെരുവോരങ്ങളെ
ചോരയിൽ മുക്കി
പൂക്കളമെന്ന് പേരെഴുതി വെച്ചിരുന്നു.
മാനം നഷ്ടപ്പെടാനില്ലാത്തവരുടെ
നിശ്ശബ്ദത മഷിയാക്കി
കാമക്കണ്ണുകൾ ചെത്തിക്കൂർപ്പിച്ച
തൂലികത്തുമ്പുകൾ
ഇരുട്ടിന്റെ മറവിൽ
വർത്തമാനപ്പത്രത്തിന്റെ ചാരിത്ര്യം
അപഹരിച്ചെടുത്തപ്പോഴും
ഭാവനകൾ മൂടുപടത്തിന്റെ
പിറകിൽ ഒളിച്ചിരിപ്പുണ്ടായിരുന്നു.
19-02_2017

By
Shabnam Siddeequi

പ്രണയം പറയാതെ ബാക്കി വെച്ചത്


പ്രണയം പറയാതെ ബാക്കി വെച്ചത്
...............................................
ചുംബനമർപ്പിച്ച പാറ്റയുടെ
കരിഞ്ഞ മാംസ ഗന്ധം
മറഞ്ഞപ്പോഴും
ഊറിച്ചിരിച്ചു കെടാതെ നിന്നു
രണ്ടിറ്റ് മുതലക്കണ്ണീരൊഴുക്കി
അടുത്ത പാറ്റകൾക്കായി
കാത്തിരിക്കുന്നു
മെഴുകുതിരികൾ.
വലിച്ചടുപ്പിച്ച്
ഗാഢാലിംഗനം ചെയ്ത ശേഷം
അകലങ്ങളിലേക്കെറിയപ്പെട്ടപ്പോഴും
അമ്പിനറിയില്ലായിരുന്നു
'ശിഷ്ടകാലം
കരഞ്ഞു തീർക്കണമെന്ന്.
അവനാഴിയിലെ
അടുത്ത അസ്ത്രങ്ങളിൽ
കണ്ണും നട്ടിരുന്നു
വില്ലുകൾ.
പുൽക്കൊടിയിൽ
പറ്റിപ്പിടിച്ചിരുന്നു
സ്വപ്നങ്ങൾ നെയ്തപ്പോഴും
മഞ്ഞുതുള്ളിക്കറിയില്ലായിരുന്നു
അലിഞ്ഞില്ലാതാവുമെന്ന്.
പുതിയ മഞ്ഞുതുള്ളികൾക്കൊപ്പം
രാവുറങ്ങാൻ
പുൽ ക്കൊടികൾ
കാത്തിരിക്കുന്നുണ്ടായിരുന്നു.
അള്ളിപ്പിടിച്ചിരുന്നു
മധുനുകർന്നപ്പോഴും
മൂളിപ്പാട്ടു പാടി രസിപ്പിച്ച മധുപങ്ങൾ
വയറുനിറച്ചുണ്ടു
പുതിയ പൂക്കൾ തേടിപ്പറന്നു പോയി.
തന്റേതു മാത്രമാണെന്നു കരുതി
എല്ലാം കൊടുത്ത പൂക്കൾ
നടവഴികളിൽ കരിഞ്ഞു വീണിരുന്നു.
ശബ്നം സിദ്ദീഖി

തെരുവുനായ്ക്കൾ


തെരുവുനായ്ക്കൾ
..................................
സുഖമായുറക്കുമ്പോൾ
ചെറ്റക്കുടിലുകൾ
ബോംബിട്ടു തകർത്ത്
സ്വപ്നങ്ങൾ തുണ്ടമാക്കപ്പെട്ട്
തെരുവിൽ
അലമുറയിട്ട് തണുത്തു
വിറച്ച് രാത്രിയാമങ്ങൾ തള്ളിനീക്കുന്നു
തെരുവുനായ്ക്കൾ.
ഉയർത്തിക്കെട്ടിയ മതിലുകൾക്കരികിൽ
നിസ്സഹായരായി കണ്ണീരൊഴുക്കുമ്പോൾ
പടമെടുത്ത് പത്രത്തിൽ കൊടുക്കണം.
പുഴ കടക്കവെ മണലിൽ തണുത്തുറഞ്ഞ്
ഉറങ്ങിപ്പോയവന്റെ ഫോട്ടോ എടുത്ത്
വിതരണം ചെയ്യണം.
തണുത്തുറഞ്ഞ ഹിമക്കാറ്റ്
മാംസം തുളച്ച് എല്ലു തെരയുമ്പോൾ
തൊണ്ട പൊട്ടിയ നിലവിളികൾ
കേൾക്കാതിരിക്കാൻ
വാതിലുകൾ കൊട്ടിയടക്കണം.
കമ്പിളി പുതപ്പുകൾ കൊണ്ട്
ചെവികൾ മൂടി ഉറങ്ങണം.
എങ്കിലും ഓർക്കുക,
ശവശരീരങ്ങൾ അഴുകി
പുഴുത്തരിച്ച് മണക്കുമ്പോൾ
അറേബ്യൻ അത്തറുകൾ
തികയാതെ വരും.
കാട്ടിൽ നിന്നും
തെരുവിലിറക്കിയതിന്റെ കാരണങ്ങൾ
വിശ്വസിപ്പിക്കാൻ
പത്രക്കടലാസുകൾ
മതിയാകാതെ വരും.
ഉറക്കം കെടുക്കാനായി
രാത്രികൾ കട്ടെടുക്കാൻ
ശരീരം നഷ്ടപ്പെട്ട ആത്മാക്കൾ
മതിലുകൾ കടന്നെത്തും.
അന്ന് അറിയാതെ പറഞ്ഞു പോകും
"വാതിലുകൾ തുറക്കാമായിരുന്നു ".
ശബ്നം സിദ്ദീഖി
11.02.2017

മരീചികകൾ


മരീചികകൾ
......................
കോഴിക്കുഞ്ഞിനെ
റാഞ്ചിയെടുക്കാൻ
വട്ടമിട്ട് പറക്കുന്ന പരുന്തും
ചുട്ടുപൊള്ളുന്ന ഭൂമിയിൽ
ഇത്തിരി തണൽ കൊണ്ടുവരാറുണ്ട്.
റാഞ്ചുന്നതിന് മുമ്പ്
ഉന്നം പിടിച്ച്
ഒറ്റക്കുതിപ്പിന്
കാൽവിരലുകൾക്കുള്ളിൽ
അമർത്തിപ്പിടിക്കാനും
ഇര ഇലകൾക്കിടയിൽ
ഒളിക്കാതിരിക്കാനും
മറ്റു വഴികളില്ലാത്തതിനാൽ
മണ്ണിൽ അറിയാതെ
പതിഞ്ഞ ചിറകിന്റെ നിഴൽ..
കണ്ടു നിന്നവർ പരുന്തിന്റെ
വിശാലഹൃദയത്തിന് നന്ദി പറഞ്ഞു
പിരിഞ്ഞു പോയി.
ഒച്ചവെച്ച് ഓടി നടക്കുന്ന ചെന്നായ്ക്കളും
ആട്ടിൻകുട്ടിയെ കാണുമ്പോൾ
അൽപ്പം നിശ്ശബ്ദമാവാറുണ്ട്.
പിന്നിൽ പതുങ്ങിയിരുന്ന്
ഒറ്റച്ചാട്ടത്തിന്
അന്നനാളവും ശ്വാസനാളവും
ഒന്നിച്ച് കടിച്ച് ഞെരിക്കാൻ
അൽപ്പസമയം
നിശ്ശബ്ദ ആവശ്യമാണ്.
കണ്ടു നിന്നവർ ചെന്നായ്ക്കളുടെ
നിശ്ശബ്ദതയെ വാനോളം പുകഴ്ത്തി
പിരിഞ്ഞു പോയി.
വേട്ടയാടിപ്പിടിച്ച
കലമാൻ കിടാവിനെ
ഉടനെ തന്നെ
കടുവകൾ കടിച്ചുകീറി കൊല്ലാറില്ല.
വേട്ടയാടാൻ പഠിക്കുന്ന
കുട്ടിക്കടുവകൾക്ക്
തട്ടി നോക്കിയും
എടുത്തെറിഞ്ഞും
ആർത്തു ചിരിക്കാൻ
അൽപ്പം ജീവൻ ആവശ്യമാണ്.
കണ്ടു നിന്നവർ
കടുവയുടെ കാരുണ്യം വാഴ്ത്തി
പിരിഞ്ഞു പോയി.

By
Shabnam Siddeequi

രണ്ടായിരത്തിപ്പതിനാറ്


.........................................
അസൂയാവഹമായൊരു
ചരമഗീതത്തിന്റെ
ഉപ്പു രുചിയുള്ള
മരുഭൂമിയുടെ,
ഉജ്ജയ്നിയിലൂടെയുള്ള
അഗ്നിശലഭങ്ങളുടെ,
മയിൽപ്പീലി വർണ്ണങ്ങളുടെ
തിരോധാനമായിരുന്നു.
മാരാരുടെ ചെണ്ട നാദവും
ഉടുക്കിന്റെ കൊട്ടും
നിലച്ച കലാ ഭാവങ്ങളുടെ
തിരശ്ശീല വീണ
നാടകാന്ത്യ മായിരുന്നു.
തൊലിപ്പുറം കറുത്ത
ഒരാമയെ തോൽപ്പിച്ച
വെളുത്ത മുയലിന്റെ
ഡംഭിൽ
അന്തം വിട്ടവരുടെ
നെടുവീർപ്പായിരുന്നു.
ലോകത്തിന്റെ
പഞ്ചസാര പാത്രത്തിന്
കാവലിരുന്ന
രക്തതാരകത്തിന്റെ
അസ്തമയമായിരുന്നു.
പഴയ ഗാന്ധിജിയെ
പുതുക്കി വാങ്ങാൻ
വരിനിന്ന കരിയുറുമ്പുകളുടെ
വിയർപ്പിൽ നാണിച്ച്
തുലാവർഷത്തിന്റെ
ഒളിച്ചോട്ടമായിരുന്നു.

By
Shabnam Siddeequi

DON'T MISS

Nature, Health, Fitness
© all rights reserved
made with by templateszoo