Showing posts with label Anishlal. Show all posts
Showing posts with label Anishlal. Show all posts

B Tech (ഒരു ദുരന്ത സ്മരണ !!! )

Image may contain: 1 person, closeup

അന്നൊരു ബുധനാഴ്ചയായിരുന്നു
നേരം ഉച്ച തിരിഞ്ഞിരുന്നു
നാളെ നാളെയാണ് എന്ന് ചോന്നെപ്പോഴോ
ലോട്ടറിക്കാരൻ വിളിച്ചുകൂവി
നാളെയാണ് എൻ്റെ സെമസ്റ്റർ പരീക്ഷ
എന്നാത്മഗതം ഞാനും മൊഴിഞ്ഞു
അതിസമ്മർദമോടെ ചിലരോടിനടക്കുന്നു
പാഠ പുസ്തകം കാർന്നു തിന്നുന്നു
കഷ്ടപെട്ടിന്നുപകൽ ഒപ്പിച്ച ടെക്സ്റ്റ് ബുക്ക്
എന്നെ നോക്കിക്കൊണ്ടു പല്ലിളിക്കുന്നു
മോഡ്യൂളുകൾ നെഞ്ച് വിരിച്ചു നിന്നു
എൻ്റെ കണ്ണുകൾ തകധിമി ആടിനിന്നു
അടുക്കുന്തോറും അകലുന്ന സാഗരം
ഇതുതന്നെയിതുതന്നെ വേറെയെന്താവാൻ
നോക്കി പഠിക്കുവാൻ ആവില്ലെന്നറിയുകിൽ
കേട്ടുപഠിക്കുവാൻ കൂടെ ഞാൻ കൂടി
പൊട്ടക്കണ്ണൻ ആനയെ കണ്ടപോൽ
ഓരോരുത്തരുമോരോന്നു ചൊല്ലി
ഏതാണ് സത്യം ഏതാണ് മിഥ്യ ?
അതുപോലുമെനിക്കറിയില്ല കഷ്ടം !!!
കാവിലെ പാട്ടുമത്സരത്തിനു കാണാം
എന്ന് കരുതി ഞാനും പിന്തിരിഞ്ഞു
ഹോസ്റ്റൽ വരാന്തകടന്നു ഞാനെന്നുടെ
മുറിയിൽ പ്രവേശിച്ചു തത്സമയം
പരീക്ഷ എന്ന വാക്കു കേൾക്കുമ്പോഴേ
ഉറങ്ങും സഹമുറിയനെ കണ്ടു ഞാൻ
വിളിച്ചെഴുന്നേല്പിച്ചു പഠിക്കെന്നു ചൊന്നപ്പോ
പുതപ്പെടുത്തു തലവഴി മൂടി
ഹാവൂ!!! അടുത്ത വരവിനു ഞാൻ മാത്രമല്ല
എന്നാശ്വസിച്ചുപോയ് അറിയാതെ ഉള്ളം
നാളെ പരീക്ഷക്ക് ഇന്നുതൊട്ടേ തന്നെ
കോപ്പികൾ തീർക്കുന്നു മറ്റൊരുവൻ
ഇവനേറ്റം ആത്മാർത്ഥം ഈ കർമ്മമണ്ഡലം
കോപ്പികൾ കൊണ്ടൊരു പുസ്തകം നെയ്തു
നോക്കിയെഴുതാൻ അറിയില്ലയെങ്കിൽ നിൻ
പാട്ടിനു പോടാ എന്നവൻ മൊഴിഞ്ഞു
അവിടെയും ഞാനിന്നു തോറ്റു പോയി
തോല്കുവാൻ ജീവിതം ഇനിയും ബാക്കി !!!
ഒൻപതിൽ ഒൻപതും തോറ്റു വന്നപ്പോഴും
തോഴൻ ഒരുവൻ തമാശ ചൊല്ലി
ദൈവത്തെയോർത്താരും ഓൾ ദി ബെസ്ററ് പറയല്ലേ
വെറുതെ ഒരാശംസ പാഴാക്കല്ലേ
കടത്തനാടൻ ഗുരുക്കളെ പ്രാർത്ഥിച്ചു നൊന്തു
 ചാവേറായി ഞാൻ ഇറങ്ങി
അരികിലിരുന്നെഴുതും പുസ്തകപ്പുഴുവിൻ്റെ
പേപ്പറിൽ എത്തി വലിഞ്ഞു നോക്കി
ആലുവ ശിവരാത്രി കണ്ടൊരു സ്മൃതിയില്ല
അവനിപ്പോ നട്ടു നനച്ചു വളർന്ന പോലെ
കാലം സെമെസ്റ്ററുകളായി കടന്നു പോയ്
എൻ്റെ വിധിയ്ക്കൊട്ടും മാറ്റമില്ല
കൂടെപരീക്ഷ എഴുതിയവരിൽ ചിലർ
ടീച്ചറും സാറും നിരീക്ഷകരുമായ്
മുടിവളർന്നു പിന്നെയത് നരച്ചു പക്ഷെ
ബി ടെക് മാത്രം അകന്നു നിന്നു
നക്ഷത്രമൊക്കെയും നേർ രേഖ എത്തുകിൽ
പഠിക്കാതെതന്നെ നീ പാസ്സായിടും
എൻ്റെ കുറ്റംകൊണ്ടു തോറ്റതല്ലെന്നാ-
ശ്വസിപ്പിക്കാൻ സുഹൃത്ത് ചൊല്ലി
യൂണിവേഴ്സിറ്റിക്കു ദയതോന്നിയെപ്പോഴോ
ഞാനും കൂട്ടരും ജയിച്ചു കേറി
എണ്ണിയാലൊടുങ്ങാത്ത മാർക്ലിസ്റ്റുകൾ താങ്ങി
ജോലിതേടി വാതായനങ്ങൾ താണ്ടി
ബി ടെക് നേടിയോൻ എന്തിനീ ജോലിക്കു
പതിവ് ചോദ്യങ്ങളിൽ പ്രഥമസ്ഥാനീയം
കഷ്ടപ്പെട്ടങ്ങനോ പാസ് ആയതാണേ
തെറ്റുപറ്റി ഒരു കൈയബദ്ധം !!!
പഠനശേഷം വസന്തകാലം എന്ന് കരുതീട്ടു
ഇപ്പോഴോ കോഴി വസന്ത പോലായി
തൊഴിലും മരീചികയാവുമോ ദൈവമേ
എന്നെ കണ്ണീർക്കയങ്ങളിൽ ആക്കരുതേ
എന്നെ ഞാനങ്ങോട്ടു ഏല്പിക്കുവാണെൻ്റെ
തമ്പുരാനേ തുണയേകീടണേ....!!!!!!!
അനീഷ്ലാൽ

എൻ്റെ മകൻ്റെ ചോദ്യങ്ങൾ

Image may contain: 1 person, night, fire and candles

അച്ഛനെക്കാൾ വലുതായിടും നാളിൽ
അച്ഛനെ ഞാനെന്തു പേർ വിളിക്കും
എന്നുണ്ണി ചോദിച്ച ചോദ്യത്തിനുത്തരം
അമ്പരപ്പും പിന്നെ പൊട്ടിച്ചിരീം
അന്ന് ഞാൻ അച്ഛനെ പിറകിലിരുത്തി
ഈ ബുള്ളറ്റിൽ നാട് കറക്കീടട്ടെ
വീഴാതെയെന്നെ മുറുകെ പിടിക്കണേ
ഞാനെന്നുംഅച്ഛനെ പിടിക്കുന്നപോൽ
ഒട്ടേറെ ചോദ്യങ്ങൾ ഈ കുഞ്ഞു നാവിൽ നി-
ന്നിറ്റിറ്റു വീഴുന്നു തേൻ തുള്ളി പോലെ
പലതും വെറുതെ ചിരിച്ചു തള്ളാനെങ്കിലും
ചോദ്യങ്ങൾ ചിലവ സമസ്യ പോലെ !!!!!
ഏതൊരു പ്ലേയ് സ്കൂളിൽ ആദ്യം പോയച്ഛൻ
ഏതു ടീച്ചർ അച്ഛനൂണു തന്നു ?
ഞാനെവിടെയും പോയില്ലെന്നെന്നുത്തരം
പിന്നെന്തിനായ് എന്നെ എന്ന് മറു ചോദ്യം
കൂട്ടരില്ലാതച്ഛൻ ഒറ്റയ്കിരുന്നെന്നോ
എങ്ങനെ പകലുകൾ തള്ളിനീക്കി ?
അജ്ഞത കൂടു കൂട്ടുന്നോരാ ചോദ്യത്തിൽ
ഒത്തിരി ആഴങ്ങൾ കണ്ടു വീണ്ടും
വട്ടംപിടിച്ചിട്ടെൻ ചോദ്യത്തിനുത്തരം
ചൊല്ലിമടങ്ങു എന്നുണ്ണി ചൊല്ലി
നാടായ നാടും ഈ വീടായ വീടുകളും
ബാല്യത്തിലൊരു കുഞ്ഞു പ്ലേ സ്കൂളുകൾ
എന്തോ അബദ്ധം ഞാൻ ചൊന്നെന്നപോലവൻ
ഉച്ചത്തിൽ പൊട്ടിച്ചിരിച്ചു ചൊല്ലി
അപ്പുറത്തെ വീട്ടിൽ ആരെല്ലാമുള്ളതു
ഞാനിന്നു വരെ അവരെ കണ്ടതില്ല !!!
പിന്നെങ്ങനെ അച്ഛൻ്റെ വീടാകുംഅവിടം
ചുമ്മാ പൊള്ളു പറഞ്ഞിടാതെ
പൊന്നുതാക്കോലിട്ടു മൂടി വെച്ചിട്ടുള്ളൊരാ
കുഞ്ഞു ബാല്യച്ചെപ്പു ഞാൻ തുറന്നു
ചെവിയോർത്തിരിക്കുമെൻ മകനോട് ഞാൻ ചൊല്ലി
കേൾക്കുക നീയെൻ്റെ ബാല്യകാലം
പുഴയിലെ കുളികഴിഞ്ഞെത്തുന്ന സൂര്യൻ
പ്രാതൽ കഴിക്കാനിലയിടുമ്പോ
കണ്ണ് തുറന്നു ഞാൻ കാത്തു കൂർപ്പിച്ചിടും
കൂട്ടുകാരെത്തിയോ തൊടിയിലെങ്ങാൻ
വല്ലോണം ഒന്നങ്ങു രാത്രി വെളുപ്പിച്ചു
എന്നെപ്പോലവരെല്ലാം കാത്തിരുന്നു
നേതാവുമായ് ചേർന്നാന കളിച്ചിടും
ഓലമടലൊരു തുമ്പിക്കൈയായ്
പാട്ടകൾ ചെണ്ടകളായ് തീർന്നപ്പോഴോ
കുഞ്ഞു പാത്രങ്ങൾ ചില്ലം മുഴക്കി നിന്നു
പാളയോല കൊണ്ടാഞ്ഞു ശ്രമിച്ചൊരു
പന്തലുണ്ടാക്കി ശീവേലി കൂടാൻ
അച്ഛൻ വാങ്ങിത്തരുന്ന കളിപ്പാട്ടം
എൻ്റെയല്ലെല്ലാർക്കും സ്വന്തമായി
ഊണുകഴിക്കാനായി 'അമ്മ വിളിക്കിലും
ആദ്യം കളി പിന്നെ കുളിയെന്നു ഞാൻ
കൂട്ടുകാർ ചേർന്നൊരു സദ്യയുണ്ടക്കിട്ടു
കുഞ്ഞാലിലയിൽ വിളമ്പി തിന്നു
ഓട്ടമത്സരം എന്നും വിജയിക്കും
തോഴനെ തോളിൽ തട്ടി നിന്നു
ഓലമേഞ്ഞു കുഞ്ഞു കൂരയുണ്ടാക്കി
തറയിൽ ചാണകം മെഴുകി ഞങ്ങൾ
പത്തിലേറെപ്പേരൊരുമിച്ചു കൂരയിൽ
വിശ്രമം നേരം ഇരുട്ടും വരെ
അമ്മയറിയാതെ കൂട്ടരോടൊന്നിച്ചു
ആദ്യത്തെ മഴയിൽ നനഞ്ഞു മുങ്ങി
ഈ പനിയൊന്നു മാറീട്ടു വേണം പുതിയ
കളികൾ കളിച്ചീടാനെന്നു തോന്നി
ചെറുതോടിൽ ഓരുവെള്ളം നിറഞ്ഞപ്പോ
തോർത്തുമുണ്ട് മുക്കി മീൻ പിടിച്ചു
മണ്ണിര തേടി നടന്നു ചിലരപ്പോൾ
ചൂണ്ടയിൽ കോർക്കുവാൻ ഏറെനേരം
പായലുകൾ ചേർത്തോരോടമുണ്ടാക്കിട്ടു
അക്കരെയിക്കരെ തുഴഞ്ഞു ഞങ്ങൾ
കായലിനരുകിലെ കണ്ടൽ വനങ്ങളിൽ
ഏറ്റവും ഉയരത്തിൽ കേറി നിന്നു
പഴയ ചെരുപ്പുകൾ വെട്ടി മിനുക്കി ഒന്നാന്തരം
വണ്ടികൾ ഉണ്ടാക്കി ആടിയോടി
സൈക്കിളിൻ ടയറിൽ വടികൊണ്ടടിച്ചിട്ടു
നേതാവ് ഞങ്ങടെ മുന്നിലോടി
സന്ധ്യ മയങ്ങുമ്പോ ഏറെ നിരാശയിൽ ചെം-
സൂര്യനെ നോക്കി ഞാൻ പിറുപിറുത്തു
ഈ കളി ഒന്ന് തീർന്നിട്ട് പോരായോ
വെട്ടം മറയുവാൻ എന്ന് ചോദ്യം
നാളെ പകലിനെ സ്വപ്‌നങ്ങൾ കണ്ടുകൊണ്ടീ
കുഞ്ഞു പായയിൽ ഞാൻ ഉറങ്ങി
കൺചിമ്മി അമ്പരപ്പോടെ നില്കുന്നൊരെൻ
ഉണ്ണിക്കിതൊന്നും ഗ്രഹിച്ചതില്ല
നഷ്ടമാണുണ്ണീ നിനക്ക് ലഭിച്ചില്ല
ലോകം വളർന്നുപോയ് ഏറെയേറെ
നഷ്ടമെന്തെന്നു തിരിച്ചറിയാനാവാതെ
ചോദ്യാവലികൾ തുടർന്നു വീണ്ടും
അനീഷ്‌ലാൽ

DON'T MISS

Nature, Health, Fitness
© all rights reserved
made with by templateszoo