Short term memory loss

------===--------====-----===
പലചരക്കു കടയും അടച്ചു കൃഷ്ണേട്ടൻ വീട്ടിൽ എത്തിയപ്പോൾ ഉമ്മറത്ത് തന്നെ ശോഭേച്ചി ചിന്താവിഷ്ടയായി ഇരിപ്പുണ്ടാരുന്നു.

"ഡി ശോഭേ. നീ ഇതെന്താലോചിച്ചു ഇരിക്കുവാ "

"ആഹ്ഹ് കൃഷ്ണേട്ടൻ എപ്പോഴാ വന്നേ "

"വന്നതറിയണേൽ പരിസരബോധം വേണം. പിള്ളേരെന്തിയെ. "
"അവര് പഠിക്കുവാ "

"നീ വേഗം ചോറെടുക് "

ചോറുണ്ണുന്നതിന്റെ ഇടയിലും കൃഷ്ണേട്ടൻ ശോഭയെ തന്നെയാണ് നോക്കിയത്.

"എന്താ നിനക്ക് പറ്റിയെ "
"ഒന്നുല്ല ഞാൻ പറയണ കേട്ടു നിങ്ങൾ പിടിക്കരുത്. "

"പേടിക്കാനോ ഞാനോ. നീ കാര്യം പറ "

"അതെ എനിക്കെന്തോ മാരക രോഗമുണ്ട്. "
"അത്രേയുള്ളോ. ഇതെനിക്ക് നേരത്തെ അറിയാം. "

"തമാശയല്ല കൃഷ്ണേട്ടാ. എനിക്ക് short term memory loss ആണ്. "
"അതെന്ത് കുന്തമാ. "
"ഹാ നമ്മുടെ സൂര്യേടെ ഒരു സിനിമ ഇല്ലേ അതിലുള്ള അസുഖം. "

"ഏത് തല മൊട്ട അടിച്ചുള്ളത്. അത് നല്ല അസുഖമല്ലേ. അപ്പോ നിനക്ക് എന്നെ ഓർമ ഉണ്ടാകില്ലല്ലേ. "

"അയ്യെടാ ആ പൂതി മനസ്സിൽ വച്ചാൽ മതി. എത്ര ബോധമില്ലേലും നിങ്ങളെ ഞാൻ തിരിച്ചറിയും. "

"പുല്ല്. എന്റെ മൂട് പോയി. "
"ഇത് കേള്ക്കുന്നെ. ഇന്നലെ ഞാൻ അമ്പലത്തിൽ പോയപ്പോൾ വല്യവീട്ടിലെ ശാരദ ഇല്ലേ അവള് ശോഭേച്ചിയെന്നും വിളിച്ചു വന്നു. എനിക്കാദ്യം മനസിലായെ ഇല്ല. പിന്നെ ഞാൻ കറന്റ്‌ ചാർജ് അടക്കാൻ പോയപ്പോൾ ആ വർക്കിടെ മോൻ ഓട്ടോ കൊണ്ടേ നിർത്തി. ചേച്ചി കേറിക്കോ ഞാൻ വീട്ടിൽ ആകാമെന്ന്. എനിക്കാണെങ്കിൽ ആ ചെക്കന്റെ പേരാലോചിച്ചിട്ട് ഒട്ടും ഓർമ കിട്ടണില്ല. "

"ഓഹ് ഇതാണോ കാര്യം. അത് പ്രായമായതിന്റെയ. എല്ലാർക്കും ഉണ്ടാകും "

"എനിക്കെവിടുന്ന പ്രായമായേ. 45 വയസ്സ് ഒരു പ്രായമാണോ .അല്ലേലും എനിക്കറിയാം നിങ്ങൾക്കിപ്പോ എന്റെ കാര്യത്തിൽ ഒരു ശ്രദ്ധയും ഇല്ല. ഞാനില്ലാണ്ടാകുമ്പോ നിങ്ങള് പഠിച്ചോളും. "

"മതി മതി നാളെത്തന്നെ നമുക്കൊരു സൈക്കിയാട്രിസ്റ്റിനെ കാണാം "

"അതിനെനിക് എന്താ വട്ടാണോ "
"എന്നാപ്പിന്നെ നമുക്കാ ജേക്കബ് ഡോക്ടറെ കാണാം. അങ്ങേരാകുമ്പോ ഇതൊക്കെ പെട്ടെന്ന് മാറ്റും "

ഇതും പറഞ്ഞു പുള്ളിക്കാരൻ കൈ കഴുകാൻ പോയി. ചാരുകസേരയിൽ കിടന്നു ഓരോന്നാലോചിച്ചപോ കൃഷ്ണേട്ടനും ഒരു ശങ്ക.

"അല്ലേടി ഞാനോര്ക്കുവ എനിക്കും ഇനി നീ പറഞ്ഞ സൂക്കേടാണോ. "

"അതെന്താ "
"അല്ല ഉച്ചക്ക് ഫേസ്ബുക്കിൽ ഒരു friend റിക്വസ്റ്റ് വന്നു. ഒരു പെണ്ണ്. എവിടെയോ കണ്ടു നല്ല പരിചയം. ആലോചിച്ചിട്ട് ഒട്ടും ഓർമ കിട്ടണില്ല. "

പെണ്ണെന്നു കേട്ടതും കൃഷ്ണേട്ടന്റെ കാല് തിരുമ്മിക്കൊണ്ടിരുന്ന ചേച്ചി പെട്ടെന്ന് നിർത്തി.

"പെണ്ണോ എന്നെ ഒന്ന് കാണിച്ചേ. ങേ ഇവളൊ.ഈ മൂദേവിയെ നിങ്ങൾക്ക് അറിയില്ലല്ലേ. "

"മൂദേവിയോ സത്യായും എനിക്കറിയില്ല "

"അയ്യോ പാവം. കല്യാണം കഴിഞ്ഞു നമ്മൾ ആദ്യായി സിനിമേക് പോയപ്പോൾ നിങ്ങൾഇവളെ എനിക്ക് കാണിച്ചു തന്നത് ഓർക്കണില്ലേ. "

"എന്റെ പൊന്നു ശോഭേ വർഷം 20കഴിഞ്ഞു. ഞാനെങ്ങനെ ഓർക്കാനാ "

"വർഷം 20അല്ല 50കഴിഞ്ഞാലും ഞാൻ മറക്കില്ല. അന്ന് ആദ്യായിട്ട് സിനിമക്ക് പോയതാ. മണിവത്തൂരില്ലേ ആയിരം ശിവരാത്രികൾ. കോട്ടയത്ത്‌ അഭിലാഷ് തിയേറ്ററിൽ. മാറ്റിനിക്. ഓർക്കണില്ലേ ഇന്ത്യൻ കോഫി ഹൌസിൽ നിന്നും എനിക്ക് മസാലദോശയും വാങ്ങിത്തന്നു. സിനിമ കഴിഞ്ഞു ഇറങ്ങിയപോയ ദേ ഈ മാരണം മുൻപിൽ. അന്ന് നിങ്ങടെ മുഖത്തെ ശൃംഗാരം ഒന്ന് കാണണമായിരുന്നു. നിങ്ങളല്ലേ പറഞ്ഞത് നിങ്ങടെ ആദ്യത്തെ പ്രണയം ആണ് അവളെന്നു. "
"ഞാനങ്ങനെ പറഞ്ഞോ. "

"പറഞ്ഞു പിന്നെ നിങ്ങള് പറഞ്ഞത് എന്നെകൊണ്ട് പറയിക്കരുത് "

"നീ ഒന്ന് പതുകെ പറ. പിള്ളേര് കേൾക്കും. "

"കേൾക്കട്ടെ പിള്ളേരും അറിയട്ടെ. നിങ്ങൾക്ക് ഏറ്റവും ഇഷ്ടപെട്ടതാണെന്നു പറഞ്ഞ ചുമല ഓയിൽ സാരി ഞാനുടുത്തിട്ടു നിങ്ങൾ നല്ലതാണെന്നു പറഞ്ഞോ. പകരം അവളുടെ മഞ്ഞേൽ കറുപ്പ് പുള്ളികളുള്ള സാരിയിൽ അവൾ സുന്ദരിയാണെന്നും പറഞ്ഞില്ലേ. ആ പറഞ്ഞത് എന്റെ ദേ ഈ ചെങ്കിലാ കൊണ്ടത് .ചത്താലും ഞാൻ മറക്കില്ല. "

"നിനക്ക് എന്ത് അസുഖമെന്ന പറഞ്ഞെ "
"Short term memory loss"

"ജീവിക്കാൻ ഇപ്പോ ഒരു മോഹം തോന്നുന്നു അത്കൊണ്ട് ചോദിക്കുവാ ഈ short term memory loss long term ആകാൻ പറ്റുമോ. ഇല്ലല്ലേ. സാരമില്ല. "

"കൃഷ്ണേട്ടാ.................. !!!"

By Geethu Anoop