ബാധ്യത

.

.........
നാലാം ക്ലാസിലെ അസംബ്ലിയിൽ പ്രതിജ്ഞ ചൊല്ലിക്കൊണ്ട് നിന്നപ്പോഴാണ് നിക്കറിന്റെ പിന്നാമ്പുറത്തൊരു ദ്വാരം കൂട്ടുകാർ കണ്ടത് ...

നനഞ്ഞൊലിച്ച കൂരയ്ക്ക് കീഴെ പാതിരാ വരെ ഷീറ്റു മൂടി ഉറക്കമിളച്ചിരുന്ന രാത്രികളിലൊക്കെയും സൂചിയും നൂലുമായി അതിനോട് മത്സരിക്കുമായിരുന്നു .....

പഠിത്തം പകുതിക്കു നിർത്തി പല പണിക്കു പോയി പാതിരാവോളം പണി ചെയ്‌തു വീട്ടിലേക്കു വരുമ്പോൾ ഉച്ചയ്ക്ക് വച്ച കഞ്ഞിയുടെ വെളളത്തിൽ ഉപ്പും നാരങ്ങ അച്ചാറുമിട്ടൊരു മോന്തലാണ് ....

ഇളയ സഹോദരന്മാരുടെ പഠിപ്പും അമ്മയ്ക്കുള്ള അപസ്മാരത്തിന്റെ മരുന്നിനും അന്തിക്ക് കിട്ടുന്ന കൂലി തികയാതെ വന്നപ്പോളാണ് പാതിരാവിൽ പെട്രോൾ പമ്പിലെ ജോലിക്കും അയാൾ പോയി തുടങ്ങിയത് .....

ബാധ്യതകളോരോന്നായി തീർത്തു വന്നൊരു കാലയളവിലൊക്കെയും അയാളുടെ കണ്ണുകളിലെ പ്രകാശം അതീവ തീവ്രതയുള്ളതായി തോന്നിയിരുന്നു ....

ഇളയ സഹോദരങ്ങൾക്ക് മംഗല്യ പ്രായമായപ്പോൾ തലയ്ക്ക് മൂത്തയാൾ ഒരു ബാധ്യതയായി മാറിയത്രെ .....
ബാധ്യതകൾ പലകുറി വീട്ടിൽ ചർച്ചയായി മാറിയപ്പോ നിശബ്ദനായി അയാൾ കിണറ്റിൻ വക്കത്തു പോയിരുന്നു ....

തുള്ളിയ്‌ക്കൊരു കുടം പോലെ പെയ്തുവീണ മഴചാറ്റലോക്കെയും അയാളുടെ കണ്ണിൽ നിന്നടർന്നു വീണ രണ്ടു തുള്ളി കണ്ണുനീരായി തോന്നി ....

വർഷങ്ങൾക്ക്‌ മുമ്പു ചോർന്നൊലിച്ച കൂരയിൽ ഇളയ സഹോദരങ്ങളെയും അമ്മയെയും ഒരു പുതപ്പിനുള്ളിൽ നനയാതെ കാത്തുവച്ച ഒരാളുടെ തോൽവിയായിരുന്നു ഇന്നത്തെ ബാധ്യത ......

രണ്ടുമുഴം കയറിൽ ശീമപ്ലാവിന്റെ തെക്കേമൂലയിലെ ചാഞ്ഞകൊമ്പിൽ അയാളുടെ ബാധ്യതകളോടൊപ്പം അയാളും തൂങ്ങിയാടി .....
മഴ പെയ്തു തോർന്നൊരു സന്ധ്യയ്ക്കു അയാളുടെ മരണാനന്തര ചടങ്ങുകളോടൊപ്പം അയാളും ഓർമ്മയായി .......

പറയാതെ പോയ ഒരുപാടു കഥകളുണ്ട് ....
തീർച്ചയായും മുകളിൽ വിവരിച്ച കഥാനായകന്റെ പേര് ബോധപൂർവം എഴുതാത്തതാണ് ....

കാരണം

നമുക്ക് ചുറ്റുമുണ്ടാകും കുടുംബത്തിനു വേണ്ടി പ്രയത്നിച്ചു ഒടുവിൽ കുടുംബാംഗങ്ങൾക്ക് ബാധ്യതയായി മാറുന്നൊരാൾ .....

ഒടുവിലെ കണക്കു പുസ്‌തകത്തിൽ അവർ ബാധ്യതകളാണ് .....
തികച്ചും ..........
കഥയില്ലാതെ പേരില്ലാതെ നമുക്കവരെ കാണാം ...........

നമുക്ക് ചുറ്റും .......
#ആദി