ഇമ്മിണിബല്യഒന്ന്..!!

നാം കണ്ട ഏറ്റവും മികച്ച ഒറ്റസംഖ്യ ഒരുപക്ഷെ! ഒന്നായിരിക്കും..

എന്തെന്നാല്‍ പഠിയ്ക്കുന്ന കാലംതൊട്ടേ
ഒന്നാമനാവാനാണ് എല്ലാവരും പറയുക..

പ്രണയിക്കുമ്പോഴും ഒന്നാവണമെന്നാണ്
എല്ലാവരും ആഗ്രഹിയ്ക്കുക..

പ്രണയവിരഹം അനുഭവിക്കുന്നവരും
ഒന്നാവണമായിരുന്നെന്ന് ആശിക്കും..

വിവാഹം കഴിക്കുമ്പോഴും ഒന്നിനെ വല്ലാതങ്ങു സ്നേഹിക്കും..

രണ്ടാള്‍ക്കും ജോലി ദൂരെയാണെങ്കില്‍
രണ്ടാളും ഒന്ന് കാണാന്‍ കൊതിക്കും..

ഡെെവോഴ്സ് പേപ്പറില്‍ ഒപ്പിട്ട് രണ്ടായവരും
ഒന്നായിരുന്നെങ്കിലെന്ന് മക്കളാഗ്രഹിക്കും..

തത്ത്വമസിയും അദ്വെെതവും പറയുന്നതും
ഒരൊന്നിനെപ്പറ്റി തന്നെയാണ്..

വിശ്രമമില്ലാത്ത പരിശ്രമമാണ് ആമയെ ഒന്നാമനാക്കിയതെന്ന് മുയല്‍..

പിന്നിലേക്ക് മാറിനിന്നും ഒന്നാമനാകാമെന്ന്
പഠിപ്പിച്ചുതന്നത് വടംവലിയാണ്..

മുല്ലപ്പൂമ്പൊടിയേറ്റ് ചില വട്ടപ്പൂജ്യങ്ങളും ഒന്നിനൊപ്പംചേര്‍ന്ന് മൂല്യമുളളതായി..

ഒന്ന് ശ്രദ്ധിക്കാതെ ചില വാക്കുകള്‍ ഉപയോഗിച്ചാല്‍ വലിയ മുറിവുണ്ടാവും..

ഒന്നും ഒന്നും ഇമ്മിണിബല്യ ഒന്നാണെന്ന്
പറഞ്ഞ ഒരാളുണ്ടായിരുന്നു..

എത്രകോടി കെെയ്യില്‍ കിട്ടിയാലും
ഒരൊറ്റകോടി പുതച്ചേ പോകാനാവൂ..

നേരാണ് ഒന്നിനേക്കാള്‍ വലുതാണ് രണ്ട്
രണ്ടാവാന്‍ കാരണങ്ങളും പലതാണ്..

രണ്ടായ് പിരിഞ്ഞിട്ടും ഒന്നായിത്തീര്‍ന്ന
കയര്‍ കാട്ടിത്തന്നതും അതാണ്..

ഉപാധികളില്ലാത്ത സ്നേഹമാണെങ്കില്‍
രണ്ടാവുന്നതിലും നല്ലതല്ലേ ഒന്നാവുന്നത്..!!

©.......ആര്‍.ശ്രീരാജ്.............
22/05/2018, IST 10:10 pm