ദു:ഖസന്ധ്യ

അസ്തമയസൂര്യന്റെ യാത്രയിൽ നീറിടും
അവനിതൻവിരഹത്തിൻ കണ്ണീർക്കണങ്ങളിൽ,
പ്രണയവർണ്ണങ്ങളാൽ വാനത്തിൽ ചാലിച്ചു
കുങ്കുമംചാർത്തിയ ദു:ഖസന്ധ്യേ!

നിശയുടെ വീചികൾ ശ്രുതിയിട്ട രാഗത്തിൽ
ഓളങ്ങൾ പാടിയതേതു ഗാനം?
കൂടണയാനെത്തും കരകാണാക്കിളി
പാടിയഗാനത്തിൻ പല്ലവിയോ?

ചാകരക്കോളിൽ മുക്കുവൻ പാടും
തോണിപ്പാട്ടിന്റെയീണമാണോ?
പൊൻവല നിറഞ്ഞ മീനുകൾ പിടയും
ജീവന്റെയവസാന കരച്ചിലാണോ?
നിലാവുതേടും പ്രതീക്ഷയാണോ? 

പറയൂ നിൻമൗനം സായംസന്ധ്യേ..?

ബെന്നി ടി ജെ
26/05/2018