അറിവ് തേടി

***************
കഥ:

അയാൾ യാത്രയിലായിരുന്നു.ഏറ്റവും മെച്ചപ്പെട്ട അറിവ് നേടുകയായിരുന്നു ലക്ഷ്യം.
പല ഗുരുഭൂതരേയും സമീപിച്ചു, ഒന്നിലും തൃപ്തി വന്നില്ല .അങ്ങിനെയാണ് ഒരുപാട് ദൂരത്തുള്ള സൂഫി വര്യനെ കുറിച്ച് അറിയാൻ ഇടയായത്.
പ്റയാസങ്ങൾ ഏറെ സഹിച്ച് സൂഫി വര്യൻറെ സന്നിദാനത്തിലെത്തി.
പാറാവുകാരൻ അദ്ദേഹത്തെ ഗുരുവിന്റെ അടുത്തേക്ക് കൂട്ടി കൊണ്ടു പോയി.
വിശാലമായ ഹാൾ...... ഒരേ വേഷത്തിൽ ധാരാളം പേർ ഒരേ പായയിൽ വട്ടത്തിലിരിക്കുന്നു.കൂട്ടത്തിൽ കുട്ടികളും മുതിർന്നവരും ആണും പെണ്ണും ഒക്കെ ഉണ്ട്.
തൊട്ടടുത്തുള്ള സന്ദർഷകരുടെ ഇരിപ്പിടത്തിലിരുന്ന് സൂഫി വര്യനെ തിരിച്ചറിയാനാവാതെ അയാൾ വിയർത്തു.
'അങ്ങയ്ക് എന്ത് വേണം?'....കൂട്ടത്തിൽ ഒരാൾ ചോദിച്ചു.
' ഞാൻ സൂഫി വര്യനെ കാണാൻ വന്നതാണ്. ന്യൂനതകളില്ലാത്ത ഏറ്റവും ശരിയായ അറിവ് ഗുരു ഭൂതരിൽ നിന്നും നേരിട്ട് പഠിക്കലാണ് എൻറെ ലക്ഷ്യം.'
അയാൾ മൊഴിഞ്ഞു.
'കുടിക്കാൻ ചായ,കാപ്പി, വെള്ളം എന്താണ് വേണ്ടത്?
'വെള്ളം,'......
ഉടനെ ഒരു ഗ്ലാസ് വെള്ളം കൊണ്ടു വന്ന് നൽകി.

വളരെ അകലെ നിന്നും ദിവസങ്ങളോളം യാത്ര ചെയ്താണ് അയാൾ ഇവിടെ എത്തിയതെന്ന് അയാളുടെ സംസാരത്തിൽ നിന്നും മനസ്സിലാക്കിയ ശേഷം കൂട്ടത്തിൽ നിന്നും മറ്റൊരാൾ ചോദിച്ചു.
'വീട്ടിൽ കുടിക്കാൻ വെള്ളം എവിടെ നിന്നാണ് കിട്ടുന്നത്?'
'കിണറ്റിൽ നിന്നാണ്' '
'കിണറ്റിൽ നിന്ന് എങ്ങിനെയാണ് വെള്ളം ലഭിക്കുന്നത് '?
'തൊട്ടി ഉപയോഗിച്ച് കോരി എടുക്കുന്നതാണ്, '
' തൊട്ടിയിൽ നിന്ന് നേരിട്ടാണോ കുടിക്കുന്നത്?'
'അല്ല,
ഗ്ളാസിൽ ഒഴിച്ചാണ്.'
ഇത് കേട്ട് ചിരിച്ചു കൊണ്ട് മറ്റൊരാൾ പറഞ്ഞു...
'സുഹൃത്തെ വിവരവും ഇതുപോലെയാണ് .ചെറിയവരിൽ നിന്നാണ് നമുക്ക് ആവശ്യമായ വിവരങ്ങൾ നേരിട്ട് പഠിക്കാൻ കഴിയുക.എല്ലാവരിലുമുണ്ട് വ്യത്യസ്തമായ നൻമകളും,അറിവുകളും..... മുഖം നോക്കാതെ വലുപ്പ ചെറുപ്പം പരിഗണിക്കാതെ അവ കണ്ടെത്തി, മനസ്സിലാക്കി, ജീവിതത്തിൽ പകർത്താൻ നാം തയ്യാറാകുമ്പോളാണ് യഥാർത്ഥ ജ്ഞാനം നേടാൻ കഴിയുന്നത്.'
ലളിതമായ ഉത്തരം കേട്ട് പൂർണ്ണ സംതൃപ്തിയോടെ അറിവ് നേടാനായി അയാൾ സ്വന്തം ഗ്രാമത്തിലേക്ക് തന്നെ തിരിച്ചു. ....
എൻ.സൂപ്പി, വാണിമേൽ.