കറുത്ത പെണ്ണ്...

(കഥ )

''ആ പെൺകുട്ടിയെ എനിക്ക്
ഇഷ്ടമായി അമ്മേ..."

പെണ്ണു കണ്ട് വന്ന ഉടനെ '' പെണ്ണിനെ "
ഇഷ്ടപ്പെട്ടുവെന്ന് പറഞ്ഞ് അമ്മയുടെ പിന്നാലെ നടന്ന അനിൽ ,ചിരിയോടെ
ഒന്നുകൂടി പറഞ്ഞു,...

''പെണ്ണ് കറുത്തിട്ടാ...... എന്റെ വെളുപ്പിനോട്
ചേർന്നാൽ അവൾക്കും നിറമുണ്ടാക്കും.... "

അവിയലിനുള്ള തേങ്ങ ചിരകുന്നതിനിടയിൽ
അനിലിന്റെ സംസാരം കേട്ട് അമ്മയ്ക്ക്
ദേഷ്യം വന്നു.....

''എന്തോന്നാടാ ഇത്രമാത്രം തമാശയാക്കാൻ .
നാട്ടിൽ തെണ്ടി നടന്ന് വെളുത്ത പെണ്ണിനെ
തിരഞ്ഞ് കിട്ടാതായപ്പോഴാണല്ലോ നീയിന്ന്
കറുത്തവളെ കാണാൻ ചെന്നത്.....
കറുപ്പും വെളുപ്പും നോക്കാതെ പെണ്ണിന്റെ
സ്വഭാവം അന്വേഷിക്ക് .... "

പാത്രത്തിൽ ചിരികയിട്ട തേങ്ങ ഒരു നുള്ള്
എടുത്ത് വായിലേക്കിട്ട് അനിൽ വീണ്ടും
ഉറക്കെചിരിച്ചു...

''അമ്മേ.... ഇതിലുണ്ട് ഒരു തമാശ...
ഞാൻ പറഞ്ഞാൽ അമ്മ ചിരിച്ച് .... ചിരിച്ച് ..."

അനിലിന്റെ തമാശ എന്തെന്നറിയാൻ
അനുജത്തി നിഷയും അടുക്കളയിലേക്ക്
വന്നു....

"എന്താ ഏട്ടാ... കാര്യം പറ.... പെണ്ണ് വല്ല
ഒളിച്ചോട്ടക്കാരിയോ മറ്റോ ആണോ..?

അവൾ ജിജ്ഞാസയോടെ ചോദിച്ചു...

''അവൾ നല്ല കുട്ടിയാണെന്നല്ലേ
ബ്രോക്കർ സഹദേവൻ പറഞ്ഞത് "

അമ്മ സംശയത്തോടെ പറഞ്ഞു...

''അതെ.... കുട്ടിക്ക് ഒരു കുഴപ്പവുമില്ല.
പക്ഷേ, ആൾ ഒരു പുലിക്കുട്ടി തന്നെ ....!"

'' എന്നാപ്പിന്നെ അമ്മായിയമ്മയും പെങ്ങളുമൊക്കെ സിംഹക്കുട്ടികളാകണ
മല്ലോ .....? അല്ലേ അമ്മ ? "

അനുജത്തിയുടെ തമാശ കേട്ട് അമ്മയ്ക്ക്
ദേഷ്യം വന്നു..

'' ടീ ..... നീ മിണ്ടാതെ ... നീ കാര്യം പറ
അനി...''

''..അമ്മേ, പെണ്ണ് കറുത്ത സുന്ദരിയാ....
പക്ഷേ,വിവാഹം ഒന്നു നിശ്ചയിച്ചതുമാ.....
കാര്യം എന്താന്ന് വെച്ചാ ...സ്ത്രീധനം ആവശ്യപ്പെട്ട് കല്യാണച്ചെക്കൻ അവളെ ഫോൺ വിളിച്ചപ്പോൾ നിശ്ചയത്തിന്അവൻ അണിയിച്ച മോതിരം അവന്റെ
വീട്ടിൽ ചെന്ന് അവൾ ഊരി എറിഞ്ഞത്രെ.....!
എങ്ങനെയുണ്ട് പെണ്ണ് ? പുലിക്കുട്ടിയല്ലേ....?
നല്ല കുട്ടിയാണെന്ന് ബ്രോക്കർ പറഞ്ഞ
പ്പോൾ ഇത്രേം പ്രതീക്ഷിച്ചില്ല....
ഏതായാലും എനിക്ക് ആളെ നല്ലപോലെ
പിടിച്ചു.... സ്ത്രീധനം എനിക്ക് വേണ്ടല്ലോ..
അച്ഛൻ മരിക്കും മുമ്പ് എന്നോട് പറഞ്ഞ ആഗ്രഹമാണല്ലോ?എന്താ അമ്മേ ?... "

അനിൽ പറഞ്ഞത് മുഴുവൻ കേട്ടപ്പോൾ
അമ്മയും അനുജത്തിയും സ്തംഭിച്ചിരുന്നു...
എന്തു പറയണമെന്നറിയാതെ...! മരിച്ചു പോയ അച്ഛന്റെ ആഗ്രഹം നിറവേറ്റാൻ
സ്ത്രീധനമില്ലാതെ ഒരു പെൺകുട്ടിയെ
വിവാഹം കഴിക്കാൻ തയ്യാറായി നടക്കുന്ന ചെറുപ്പക്കാരനാണ് അനിൽ..
മനസ്സിനിണങ്ങിയ ഒരുപെണ്ണിനെ തിരഞ്ഞിറങ്ങിയിട്ട് വർഷം ഒന്നായി...
എവിടെയും മനസ്സിന് പിടിച്ച പെണ്ണില്ല.....
പക്ഷേ, വെളുത്തവൾ തന്നെ വേണമെന്ന
തീരുമാനം അനിൽ ഇന്ന് ഉപേക്ഷിച്ചു ...
ഒരു കറുത്ത സുന്ദരിയെ കണ്ടതോടെ
അനിൽ വെളുത്ത പെണ്ണ് എന്ന ചിന്ത തന്നെമാറ്റി...
പക്ഷേ, കാര്യമറിഞ്ഞപ്പോൾ അനിലിന്റെഅമ്മയുടെ മുഖം ഇരുണ്ടു.
അനുജത്തി നെറ്റി ചുളിച്ചു...
മകൻകണ്ടു പിടിച്ച ഒരു പെണ്ണ്...!
അമ്മ ഒന്നും പറയാതെ മിക്സി ഓൺ
ചെയ്തു ...
അനുജത്തി ചൂലുമെടുത്ത് മുറ്റത്തേക്ക്
പോയി...
അനിൽ ഉമ്മറത്തേക്ക് നടന്നു...

ഇനി എവിടെ പെണ്ണ് തേടും...?
സങ്കല്പത്തിലുള്ള എല്ലാം തികഞ്ഞ ഒരു
പെണ്ണ്.!
പക്ഷേ,എല്ലാം തികഞ്ഞ പെണ്ണാണ് അവൾ...
വിദ്യാഭ്യാസവും ജോലിയും പോരാത്തതിന്
നല്ല സ്വഭാവവും ....! കറുത്തധൈര്യശാലിയായ ആ പെണ്ണ്....!! വെളുപ്പിലും കറുപ്പിലും ഒരു കാര്യവുമില്ല....

സ്ത്രീധനം ചോദിച്ചവനെ നിഷ്കരുണം, സധൈര്യംവേണ്ടെന്നു വച്ച പെണ്ണാണവൾ!...
അവൾ മതി തനിക്ക് ....! ആ കറുത്ത പെണ്ണ്!
സ്ത്രീധനം ആവശ്യമില്ലാത്ത തന്റെ വിവാഹത്തിന് അവൾ തന്നെ വധു..അനിൽ തീരുമാനിച്ചുറച്ചു ...

ശുഭം... ബിന്ദു.എം.വി.