അമ്മക്കിളി

.............................

ചില നിമിഷങ്ങളുണ്ട്
ഉള്ളുരുകുമ്പൊ
ചേർത്തണയ്ക്കാൻ ,
ഒന്നാർത്തലച്ചു പെയ്യാനമ്മയെ
തേടുന്ന ചില നിമിഷങ്ങൾ.

നോവു താങ്ങാനമ്മക്കൈകൾക്കും
ബലം പോരെന്നറിഞ്ഞിട്ടും
പിന്നെയുമെന്റെ മനസ്സ്
ഓടിയണയുന്നതവിടേക്കു തന്നെ.

നെഞ്ചു നീറുന്നതും
സ്വരമിടറുന്നതും
അമ്മ മനസ്സല്ലാതെ
വേറാര് മനസ്സിലാക്കാൻ

ഏത് നോവുമലിയുന്നത്
ആ അമ്മത്തലോടലിലൊന്നു മാത്രം.

ഒരമ്മത്തണുപ്പിന്
ഇത്രയും കുളിരെന്ന്
അമ്മ തന്നെയെന്റെ പുണ്യമെന്ന്
എന്നും ഞാനറിയുന്നു.

അകലെയാണെങ്കിലും
നിമിഷങ്ങളെണ്ണി
ഞാൻ കാത്തിരിക്കുന്നതുമാ
അമ്മച്ചില്ലയിലൊന്നു
ചേക്കേറാൻ
അമ്മ മടിയിലൊന്നു
തല ചായ്ക്കാൻ.

ഇരുളിൽ വഴി കാട്ടും
പ്രകാശനാളമായ്,
നന്മയുടെ വിളക്കായ്,
സ്നേഹത്തിൻ പര്യായമായ്
ഉള്ളിന്റെയുള്ളിൽ
നിറയുന്ന രൂപമാണമ്മ.

By Maya Dinesh