ആദ്യ ശമ്പളം == ( ചെറുകഥ )

മോൾടെ ആദ്യത്തെ ശമ്പളം ഇന്ന് കിട്ടുവാണല്ലോ.
മകളെ പഠിപ്പിച്ചു ഒരു ജോലിയാക്കിക്കഴിഞ്ഞു..ഇന്ന് അവളുടെ ആദ്യത്തെ ശമ്പളം കൊണ്ട് കയ്യിൽ തരും.

..ഇനിയും രണ്ടു മണിക്കൂറും കൂടിയുണ്ടല്ലോ വരാൻ..സമയം ഒച്ചിഴയുന്ന പോലെ തോന്നുന്നു.

ഞാൻ ഭാവനയിൽ കണ്ടു .അവൾ കയറി വരുന്നു.."ഇന്നാ അച്ഛാ എന്റെ ആദ്യത്തെ ശമ്പളം.."

ഞാൻ കയ്യിൽ വാങ്ങുന്നു ...എന്നിട്ടു അതിൽ നിന്നും ആകെ 100 രൂപ എടിത്തിട്ടു ബാക്കി മുഴുവൻ തിരിച്ചു അവളുടെ കയ്യിൽ തന്നെ കൊടുക്കുന്നു...

. "എനിക്ക് സന്തോഷമായി ...മക്കളെ വളർത്തി വലുതാക്കുന്നതു ഞങ്ങളുടെ കടമയാണ്..അവരിൽ നിന്നും മാതാപിതാക്കൾ ഒന്നും പ്രതീക്ഷിക്കുന്നില്ല ...."അങ്ങനെ പറഞ്ഞു ബാക്കി ശമ്പളം തിരിച്ചു കൊടുക്കുന്ന രംഗം...

മനസിനകത്തു കുളിരു കോരുന്നു..

."ഇതെന്താണ് ഉച്ചസമയത്താണോ സ്വപ്നം കാണുന്നത്... "ഭാര്യയുടെ കളിയാക്കല് വന്നു

.."അല്ല ഞാനോര്ക്കുവാരുന്നു "..
സ്വതവേ ഉള്ള പുഞ്ചിരിയോടെ ഞാൻ ഭാര്യയോട് പറഞ്ഞു

"എന്റെ ആദ്യത്തെ ശമ്പളത്തിന് മുത്തശ്ശനൊരു തോർത്ത് മുണ്ടു,മുത്തശ്ശിക്ക് കസവിന്റെ ഒരു സാരി,അച്ഛനും അമ്മയ്ക്കും ,അമ്മാവന്മാർക്കും.. ഒക്കെ വാങ്ങിക്കൊടുത്തു.ബാക്കി മുഴുവൻ കാശും അച്ഛന്റെ കയ്യിൽ കൊടുത്തു

."ദാ.... മോള് വന്നല്ലോ... "ഭാര്യ ആവേശത്തോടെ പറഞ്ഞു.

ഞാനിത്തിരി ഗൗരവത്തോടെ സോഫയിൽ തന്നെ ഇരുന്നു...ഹൃദയം പട പടാന്നു ഇടിക്കുവാണല്ലോ.ഇത് പേടിക്കാനുംമാത്രമുള്ള വലിയ കാര്യമൊന്നുമല്ലല്ലോ....

കൈനറ്റിക് ഹോണ്ട സ്റ്റാൻഡിൽ വെച്ചിട്ടു അവൾ അകത്തേക്ക് വരുന്നു...കയ്യിൽ ഒരു ചെറിയ പൊതിയും ഉണ്ട്. ഞാൻ ശ്വാസം പിടിച്ചു തന്നെ ഇരിക്കുവാണ്...

."അച്ഛൻ വേണമെങ്കിൽ ഇനി മുതല് ഈ മൊബൈല് ഉപയോഗിച്ചോളൂ.... "അവളുടെ പഴയ മൊബൈൽ ഫോൺ എന്റെ കയ്യിൽ തന്നു.

" ഏറ്റവും ലേറ്റസ്റ്റ് മോഡല് ഒരെണ്ണം ഞാൻ വാങ്ങി "അവൾ അടുക്കളയിൽ കയറി പാത്രങ്ങൾ ഒക്കെ പൊക്കി നോക്കി

"അമ്മെ വിശക്കുന്നു..ഇവിടൊന്നും ഉണ്ടാക്കിയില്ലേ.... "..അവള് മുറിയിലേക്കു പോയി

"ഇന്നാ അച്ഛാ ബാക്കി കാശു " വീട്ടിലിടുന്ന ഡ്രെസ്സും ഇട്ടു അവള് വന്നു ഒരു കേട്ട് നോട്ടുകൾ എന്റെ കയ്യിൽ തന്നു

"മൊബൈല് വാങ്ങിച്ചോട്ടെ എന്ന് ചോദിച്ചാൽ അച്ഛൻ സമ്മദിക്കില്ലെന്നെനിക്കറിയാം..അതിനാണ് വാങ്ങിയിട്ട് ബാക്കി ശമ്പളം കയ്യിൽ തന്നത് ..."

ഭാര്യ അടുക്കളയിൽ നിന്ന് ചിരിക്കുന്നത് കാണാം

"എല്ലാരും കൈകഴുകിയിട്ടു വാ.."ഭാര്യ വൈകുന്നേരം ഉള്ള ലഘുഭക്ഷണത്തിനു ക്ഷണിക്കുന്നു..ഓഫീസിലെ തമാശകൾ ഒന്നൊന്നായി മോള് വിവരിക്കുന്നു.

.രാത്രിയിൽ കിടക്കാൻ നേരവും ഞാൻ ചിന്തിക്കുകയാരുന്നു തന്റെ ചെറുപ്പകാലത്തൊക്കെ ഒരു ജോലി കിട്ടുന്നതും ആദ്യത്തെ ശമ്പളവും ഒക്കെ ഒരു വലിയ കാര്യം ആയിരുന്നു...മോളെന്നോട് തെറ്റൊന്നും ചെയ്തിട്ടില്ലല്ലോ...

.ഞാൻ തിരിഞ്ഞും മറിഞ്ഞും കിടന്നു ചിന്തിച്ചു

***ബാക്കി കാശ് എന്റെ കയ്യിൽ കൊണ്ട് തന്നല്ലോ...രാത്രിയുടെ ഏതോ യാമത്തിൽ ഞാനും ഉറക്കമായി. ****

=====
*രചന - രാജേഷ് ഇരവിനല്ലൂർ കോട്ടയം *