ഞാനും എന്റെ മുതലാളിയും.

ഞാനൊരു ഓട്ടോറിക്ക്ഷയാണെ.. ഒരു മഹാനടന്റെ ആരാധകനായ എന്റെ മുതലാളി എനിക്ക് സാഗർ ഏലിയാസ് ജാക്കി ന്ന് പേരിട്ടു... മുതലാളിന്റെ പേര് കുറച്ചു പരിഷ്‌കാര പേരാണ് സുമേഷ് !!....

ഇന്നലെ പെയ്ത മഴയിൽ ഞാൻ കുറെ നനഞ്ഞു. രാവിലെ തന്നെ സുമേഷ് അതൊക്കെ തുടച്ചു മാറ്റുകയാണ്..

"സുമേഷേ"....
അമ്മയുടെ വിളിയിൽ അവൻ കാത് കൊടുത്തതെയില്ല...

ഡാ "! നിന്നെയല്ലേ വിളിചേ....
മോനെ.. ഡാ.. നീ ടൗണിൽ പോയി വല്ല മീനോ.. ചിക്കനോ.. എന്തേലും വാങ്ങി വാ ഡാ... പ്രജിനയും, അവളുടെ ആളും ഇപ്പോത്തും.

പിന്നെ... എന്റെ പട്ടി പൊവ്വും... സുമേഷ് ഇത്തിരി ഉറപ്പിച്ച് തന്നെ പറഞ്ഞു.
അവളും, അവളുടെ ആളും... "ഹും "
ആളല്ല... അവന്റെ പേര് എരപ്പാളി കുറുക്കൻ ബിജുന്നാ..

"എരപ്പാളി കുറുക്കൻ ബിജുവോ"?...! അമ്മയ്ക്ക് അതിശയം.

അവന്റെ വീട്ടുപേര് നിരപ്പാളി ന്നല്ലേ...? അമ്മ വീണ്ടും ചോദിച്ചു.

ആഹ് അതൊക്കെ മാറി എല്ലാരും അവനെ ഇപ്പോഇങ്ങനെയാ വിളിക്ക്ന്നേ...

ആഹ് അത് പോട്ടെ.. നീ ടൗണിൽ പോയി വാടാ...

ഓട്ടോ സ്റ്റാർട്ട്‌ ആവുന്നില്ല... അവനങ്‌ തട്ടി വിട്ടു.

ങേ... എന്റെ മുന്നിൽ വെച്ച് എന്നെ കുറ്റം പറഞ്ഞ സാമ ദ്രോഹി ! അവന്റെ തലയിൽ ഒന്ന് കൊടുക്കാൻ തോന്നിയെങ്കിലും.. പാവം അവനന്റെ ചങ്ക് ആണ്. ഈ പറഞ്ഞ പ്രജിന... അവന്റെ പെങ്ങളാ.. രണ്ട്‌ വർഷം മുൻപ് ബിജുന്റെ കൂടെ ഒളിച്ചോടി പോയതാ. ഇത്രയും കാലം അച്ഛൻ വീട്ടിൽ കയറാൻ സമ്മതിച്ചില്ല.. പക്ഷേ ഇപ്പോൾ അച്ഛന് പേരകുട്ടിയെ കാണാൻ ആശ.

അധികം വൈകാതെ അമ്മാവന്റെ മകൻ അശോകൻ ചിക്കനും മറ്റ് സാധനങ്ങളുമായി ഒരു ബുള്ളറ്റിൽ അവിടെ എത്തി.

കണ്ടോ.. കുഞ്ഞാട്ടൻ സമയത്തു തന്നെ കാര്യങ്ങൾ നീക്കി.. അമ്മ പിറു പിറുത്തു കൊണ്ട് അകത്തേക്ക് പോയി.

അശോകൻ വന്ന ബുള്ളറ്റ് എന്റെ തൊട്ടരികിൽ തന്നെ നിർത്തിയിട്ടുണ്ട്.
ഞാനൊരു ഹായ് പറഞ്ഞെങ്കിലും... അവൾക്ക് വലിയ ഡിമാൻഡ് !!.. പിന്നെ ഞാൻ മിണ്ടാൻ പോയില്ല. ബുള്ളറ്റിന്റെരു ഗമ !!ഹും.. !

പ്രജിനയും ബിജുവും വൈകാതെ തന്നെ എത്തി. പരിഭവങ്ങളും.. ദേഷ്യവും എല്ലാം അവരെല്ലാരും പറഞ്ഞ്തീർത്തു.

സുമേഷ് അല്പ നേരം ജാഡയിട്ട് നിന്നു. പ്രജിന തന്നെ ബിജുവിനു സുമേഷിനെ പരിചയപെടുത്തി. അപ്പോഴാ.. ഞാൻ ശരിക്കും ബിജുനെ കാണുന്നത്.
മ് മോശം ഇല്ല.. ന്നാലും മുതലാളിന്റത്ര പോര.

അളിയൻന്മാർ തമ്മിൽ ഹസ്തദാനം ചെയ്തപ്പോൾ ഞാൻ സത്യത്തിൽ വിക്ലങ്ങ പുളകിതനായി പോയി.
കുറച്ചു സമയം മുൻപ് ഇവനെയല്ലേ മുതലാളി ഇരട്ട പേര് വിളിച്ചത്.
ന്റ മ്മോ... മുതലാളി ഒരു സംഭവം തന്നെ.

പ്രജിന സംസാരിക്കാൻ വരുമ്പോൾ മുതലാളി ഒഴിഞ്ഞുമാറും. പിന്നെ ആരും കാണാതെ പാളി നോക്കും അത് അവളുടെ കയ്യിലെ കുഞ്ഞിനെ യാ ണ് നോക്കുന്നതെന്ന് എനിക്കറിയാം. രാവിലെ അശോകനെ സാധനങ്ങൾ വാങ്ങാൻ ഏൽപ്പിച്ചതും ആ പഹയൻ തന്നെയാ. വലിയ ഗമ കാണിക്കുമെങ്കിലും ശുദ്ധ നാ. ന്റ മുതലാളി!.

വൈകുന്നേരം എന്നെയും കൂട്ടി സുമേഷ് പുറത്തേക്കു പോയി. ബ്യൂട്ടി ഷോപ്പിന്റെ അടുത്ത് നിർത്തിയപ്പോഴ് എനിക്ക് കാര്യം പിടി കിട്ടി. പാർക്കിങ് സ്ഥലത്ത്‌ ഒരു ബെൻസുo,പിന്നെ കുറെ വണ്ടികളും കാണാം. ഞാൻ അക്ഷമയോടെ മുതലാളിയെ കാത്തിരിക്കുമ്പോൾ അതാ.... കുടിച്ചോണ്ട് വരുന്ന ചില ഭർത്താക്കന്മാരെ പോലെ.. ! ഒരു ടിപ്പർ.. ന്റമ്മോ... ശര വേഗത്തിൽ അവൻ പാഞ്ഞു പോയി.

മുതലാളി കയ്യിൽ ഒരു പ്ലാസ്റ്റിക് സഞ്ചിയുമായി പുത്തേക്ക് വന്നു. പിന്നെയത് എന്റെ പോക്കറ്റിലേക്കിട്ടു.

സ്റ്റാർട്ട്‌ ചെയ്ത് മുന്നോട്ടു നീങ്ങുമ്പോതാ... ആ ബെൻസ് എന്നെ നോക്കി കണ്ണിറുക്കുന്നു.
"പിന്നെ.... പോടീ... ഞാൻ നല്ല ബജാജ് തറവാട്ടിൽ പിറന്നതാ... അവളുടെ ഒരു കിന്നാരിപ്പ്.. ! എങ്കിലും ആ മിററിലൂടെ ഞാൻ അവളെ ഒന്നൂടി നോക്കി.

എന്റെ പോക്കറ്റിൽ കിടക്കുന്ന സഞ്ചിയിൽ പ്രജിനയുടെ കുട്ടിക്ക് വേണ്ടുന്ന കരിമഷിയും ബേബി പൌഡറും ഒക്കെയാണ്.അത് ആർക്കും അറിയില്ലന്നാ മുതലാളിയുടെ വിചാരം. പക്ഷേ എനിക്കറിയാം ന്റ മുതലാളീനെ... അത്രക്ക് മനസ്സിലാക്കിയിട്ടുണ്ടീ.. "സാഗർ ഏലിയാസ് ജാക്കി".
രചന
Deepa Palayadan.