ഉപതിരഞ്ഞെടുപ്പ്‌

നേരം വെളുക്കുന്ന നേരത്ത് രാവിലെ
നാലഞ്ചുപേരെന്‍റെ വീട്ടിലെത്തീ.!
നേരിട്ടുകണ്ടാലും മിണ്ടാതെ പോകുന്ന
നാരായണേട്ടനോ മുന്നിലുണ്ട്.!
പണ്ടു പണം കടം വാങ്ങിയിട്ടിന്നോളം
കൊണ്ടുതരാത്ത ഗോപാലനുണ്ട്.!

വന്നവരൊക്കെ വെളുക്കെചിരിച്ചുകൊ-
ണ്ടെന്നോട്‌ ലോഹ്യം പറച്ചിലായി.!
പല്ലുതേച്ചില്ല, കക്കൂസിലും പോയില്ല,
പുല്ലിവന്മാരൊന്നു പോണുമില്ല.!

നാടിന്‍റെ ദുര്‍ഗതിയും വിലക്കേറ്റവും
നാനാതരത്തില്‍ ചികഞ്ഞുവച്ചു.!
നാളെമുതല്‍ക്കൊരു സ്വര്‍ഗരാജ്യം നമു-
ക്കായെത്തുമെന്നും പറഞ്ഞുതന്നു.!
ഞാനും കുടുംബവും ഇത്രമാത്രം മതി,
"നാരയണേട്ടനു വോട്ടുചെയ്യൂ.!"

പിന്നെ കക്ഷത്തിലടുക്കിപ്പിടിച്ചൊരാ
വര്‍ണ്ണനോട്ടീസുമെനിക്കു നല്‍കി.!
പല്ലുമുഴുക്കെ പുറത്തുകാണിച്ചുകൊ-
ണ്ടുള്ള പടത്തിനുതാഴെയായി,
തങ്ങളധികാരമേറിയാലൂഴിയില്‍
വെണ്ണയും പാലുമൊഴുക്കുമെന്നും,
പണ്ടു മാവേലി ഭരിച്ചപോലീയിടം
ഇണ്ടലില്ലാതെയൊരുക്കുമെന്നും.!

ഒക്കെ വായിച്ചുഞാനേറെ കുളിര്‍ന്നുപോയ്‌
മൊത്തത്തിലാകെ വിജൃംഭിതനായ്.!
വന്നുചേരുന്നൊരാ വര്‍ണ്ണലോകത്തിലെ
സ്വര്‍ണ്ണനാരായണാ വാഴ്ക,വാഴ്ക.!!

By: Hari Menon