അവധിക്കാലം

- - - - - - - - - - - - - - -

പതിവിലും നേരത്തെ ഉറക്കമുണർന്ന് ''അമ്മേ ഒന്നിങ്ങോട്ടു വര്വോ ''എന്ന ദർശൂട്ടന്റെ വിളി കേട്ട് അടുക്കളയിൽ പാത്രങ്ങൾ കഴുകി കൊണ്ടിരുന്ന ഞാൻ കിടപ്പു മുറിയിലേക്കോടി. കടുപ്പിച്ചുള്ള ആ വിളി കേട്ടപ്പോൾ തന്നെ എന്തോ ഒരു പന്തിക്കേട് തോന്നിയെങ്കിലും അതൊന്നും പുറത്ത് കാണിക്കാതെ ബെഡിനരികിലെത്തിയ എന്നെ കൈ പിടിച്ച് ഇരുത്തി. അവധിക്കാലം ആയത് കൊണ്ട് തന്നെ നേരത്തെ വിളിച്ചുണർത്തുന്ന പതിവില്ലായിരുന്നു.

''എന്താ മോനൂ ഇന്ന് നേരത്തെ'' എന്ന് ചോദിച്ചപ്പോൾ ഉത്തരം തരാതെ അവന്റെ ചോദ്യങ്ങളുടെ കെട്ടയിച്ചു.അമ്മക്ക് ഇന്നും പോകണോ ആദ്യം അവനറിയേട്ടത് അതായിരുന്നു. അതേ മോനേ എന്ന് പറഞ്ഞപ്പോളേക്കും അവന്റെ മട്ടും ഭാവവും മാറി.

സ്കൂൾ പൂട്ടിയത് കൊണ്ട് ഞാമ്പോനില്ലല്ലോ അച്ഛാ.പിന്നെന്തിനാ അമ്മ പോകുന്നേ അവിടെ കുട്ട്യോളൊന്നും വരില്ലല്ലോ അമ്മയോടും പോകണ്ടന്ന് പറയ്യോ. അല്ലെങ്കിൽ എനിക്കും പോണം.

മോനേ അമ്മക്ക് കോഴ്സാണ് പോകാതിരിക്കാൻ പറ്റില്ല. സ്കൂൾ തുറന്നാൽ മോനേയും അതേപോലുള്ള മറ്റ് കുട്ടികളെയും പഠിപ്പിക്കാൻ ടീച്ചർമാർക്കും പരിശീലനം നൽകും.കോഴ്സിന് പോയി പഠിച്ചാലേ സ്കൂൾ തുറന്നാൽ കുട്ടികളെയും അതേപോലെ പഠിപ്പിക്കാൻ പറ്റൂള്ളൂ. മോനേ കൂട്ടാൻ പറ്റാത്തത് കൊണ്ടല്ലേ. കോഴ്സിന് പോകുമ്പോൾ ആരും കുട്ടികളെയൊന്നും കൂട്ടില്ല. ഇങ്ങനെയൊക്കെ പറഞ്ഞെങ്കിലും അവന്റെ പരിഭവത്തിന് കുറവൊന്നും ഉണ്ടായില്ല.

ആന്റിയുടെ വീട്ടിൽ മാളു ഏച്ചിയുടെയും ഏട്ടന്റെയും കൂടെ കളിക്കാലോ മോന്. വൈകുന്നേരം അമ്മ വന്നാൽ നമുക്ക് പുറത്ത് എവിടെങ്കിലും പോകാലോ. അതിനൊന്നും ചെവി കൊടുക്കാതെ അവൻ പരാതികൾ പറഞ്ഞു.അമ്മ പോയാൽ ഏട്ടൻ പേടിപ്പിക്കും. മാളു ഏച്ചി മിണ്ടൂല.അങ്ങനെ അങ്ങനെ ഓരോ പരാതികളും പരിഭവങ്ങളും നിരത്തി.അതോണ്ട് എനിക്ക് അച്ഛാച്ചന്റെ വീട്ടിൽ പോയാമതി.

ഓഹ്.അപ്പോ അച്ഛാച്ചന്റെ വീട്ടിൽ പോകാനുള്ള അവന്റെ ഐഡിയ ആണെന്ന് എനിക്ക് മനസ്സിലായെങ്കിലും ഞാൻ പുറമേ കാണിച്ചില്ല. എന്തായാലും അച്ഛാച്ചന്റെയും, അച്ഛമ്മയുടെയും കൊഞ്ചിക്കലും ലാളനയും ഒന്നും ആന്റിയുടെ വീട്ടിന്ന് കിട്ടില്ലല്ലോ.എനിക്ക് മുന്നെ തന്നെ അവൻ റെഡിയായി.അച്ഛനവന അച്ഛാച്ചന്റെ വീട്ടിലും കൊണ്ടു വിട്ടു. അനിയൻ പോയതോടെ ഏട്ടനും ഒരു ചാട്ടം,അവനും പോയി.

പിള്ളേര് പോയതോടെ വീടും ഉറങ്ങി.ശങ്കും മങ്കും തനിച്ചായി.കോഴ്സും കഴിഞ്ഞു ദിവസങ്ങളുമായി. ഇങ്ങോട്ട് വരണമെന്ന ചിന്തയെ പിള്ളേർക്കില്ല. അവിടെ നിക്കട്ടെന്ന് ഞാനും കരുതി. എന്തായാലും അവധിക്കാലമല്ലേ പേരക്കിടാങ്ങളെ സ്നേഹിക്കാനും ലാളിക്കാനും അവർക്കും ആഗ്രഹമുണ്ടാവില്ലേ. പിള്ളേരുടെയും സന്തോഷമല്ലേ വലുത്.അവരും അവധിക്കാലം ആഘോഷിക്കട്ടെ.

മക്കളിൽ പ്രതീക്ഷ വെക്കരുത്. ആൺ പിള്ളേരാണ്. ജോലിയൊക്കെയായി പലസ്ഥലങ്ങളിൽ കഴിയേണ്ടവരാണ്. എനിക്ക് നീയും നിനക്ക് ഞാനും മാത്രമേ ഉണ്ടാവുള്ളൂ. അതിന്റ ആദ്യ പരിശീലനാന്ന് കൂട്ടിക്കോ എന്ന് വീട്ടുകാരന്റെ വകയൊരു കമന്റും.

ബേബിസബിന