മുറിപ്പാടുകൾ

ഇടവഴിയോരത്ത് പതിവായ് കാത്തിരുന്ന വയസ്സനെ അവൾ മുത്തശ്ശാന്നു വിളിച്ചു
വർണ്ണ കടലാസുകളിൽ പൊതിഞ്ഞ തേൻ മധുരമുള്ള മിഠായികൾ
അവൾ കൈകളിൽ എന്നും
ചുരുട്ടിപ്പിടിച്ച് ബാഗിൽ ഒളിച്ചു വയ്ക്കും

ആ മുത്തശ്ശൻ്റെ കവിളിൽ
മുത്തം നൽകി അവൾ
ഓടിയകലും

ആരുമില്ലാത്ത ആ വൃദ്ധന് അവൾ കൊച്ചുമകളായി.

കാലങ്ങൾ പിന്നെയും കൊഴിഞ്ഞു.

അവൾ കൗമാര പ്രായമെത്തി.
അപ്പോഴും ആ വൃദ്ധൻ ആ വഴിയിൽ കാത്തിരുന്നു .

ഒരു ദിവസം അല്പം വൈകി അവൾ അവിടെ എത്തിയപ്പോൾ
ആൾക്കൂട്ടത്തിനു നടുവിൽ
ആ വൃദ്ധൻ കൈകൂപ്പി കരയുന്നു

ആരൊക്കെയൊ ആ പാവത്തിനെ തല്ലുന്നു.

ആൾക്കാർ അടക്കം പറയുന്നതവൾ കേട്ടു
" രണ്ടാം ക്ളാസിൽ പഠിക്കുന്ന കുട്ടിയാ .
എന്നും മിഠായി കൊടുക്കലും,കൊഞ്ചിക്കലും ഇന്നതിനെ മടിയിൽ വച്ച് കവിളിൽ
ഉമ്മ വയ്ക്കുകയായിരുന്നു.

ആ ശരത്തും പിള്ളേരും കണ്ടത് കൊണ്ടാ രക്ഷപെട്ടത്. ആർക്കറിയാം എന്താ ഉദ്ദേശ്യം എന്താണെന്ന് ..

അവളുടെ ശരീരം വിറച്ചു കണ്ണുകൾ നിറഞ്ഞ് കാഴ്ച മങ്ങി
മുത്തശ്ചൻ അത് ചെയ്യില്ല .ആരോ ചതിച്ചതാണ് .

പോലീസ് ജീപ്പിൽ കയറ്റുന്ന ആ വൃദ്ധന്റെ മുഖം അവൾ അവസാനമായി ഒന്നു കൂടി നോക്കി.

കരഞ്ഞു കലങ്ങിയ ആ കണ്ണുകൾ നിരപരാധിയുടേതാണ് .
ശരത്ത് ഒരുക്കിയ വലയിൽ മുത്തശ്ചൻ പെട്ടതാണ്.

അവൾക്ക് നിശ്ചയമുണ്ടായിരുന്നു
ലോകത്തോട് അവൾ വിളിച്ചു പറഞ്ഞില്ല
അവൾ പെണ്ണായിരുന്നു വെറും പെണ്ണ്.

വീട്ടിലെത്തി കട്ടിലിൽ കിടന്ന് അവളോർത്തു
ശരത്തിന്റെ ഭീഷണി "എല്ലാക്കാലവും ഇടവഴിയിൽ ഈ വൃദ്ധൻ നിനക്ക് കാവലുണ്ടാവില്ല .ഒരിക്കൽ നീ എൻ്റെ വലയിൽ വീഴും .

അതെ അവൻ വിരിച്ച വലയിൽ മുത്തശ്ചൻ പെട്ടു.
ഈ സമൂഹം ആ വൃദ്ധനെ
കുറ്റവാളിയാക്കി.

ആണുങ്ങൾ പലതരത്തിൽ ഉണ്ട്.
നല്ലതും ചീത്തയും
അവൾ അപ്പോഴാണ്
ഭുവനയെക്കുറിച്ച് ഓർമിച്ചത് മുത്തശ്ചൻ്റെ മകൾ എട്ടാമത്തെ വയസ്സിൽ ആ ഇടവഴിയിൽ വച്ച് പീഢനത്തിനിരയായി കൊല്ലപ്പെട്ടവൾ
ഭുവന.
ഒറ്റ മകളുടെ വിധി ആർക്കും വരാൻ പാടില്ലെന്ന് കരുതി രാവും ,പകലും ആ വഴിയിൽ കാത്തിരുന്ന അച്ഛൻ
ഓർമകൾ വേദനയിൽ കുതിർന്നു
കണ്ണുകൾ നിറഞ്ഞവൾ ലോകത്തോട്
വിളിച്ചു പറഞ്ഞു കൊണ്ടേയിരുന്നു

മുത്തശ്ചൻ നിരപരാധിയാണ്
മുത്തശ്ചൻ നിരപരാധിയാണ് .............. രാജിരാഘവൻ