ന്യായീകരണ അവാർഡ്

രാവിലെ എഴുന്നേറ്റയുടനെ പത്രം കിട്ടിയില്ലെങ്കിൽ കുടിയന്മാരുടെ അവസ്ഥയാണ് പത്രം വരുന്നതും നോക്കി അങ്ങോട്ടുമിങ്ങോട്ടും നടക്കും.

"ഹാവൂ പത്രക്കാരൻ ചെക്കൻ വരുന്നുണ്ട്."

പത്രം വായിച്ചതിനു ശേഷം മറ്റു കലാപരിപാടികളെല്ലാം കഴിഞ്ഞ്ചായ കുടിച്ചു കൊണ്ടിരിക്കുമ്പോൾ മകന്റെ സംശയം
" പപ്പാ നൂറ്റിനാലിനേക്കാൾ ചെറുതാണോ നൂറ്റിപതിനാറ് ".

"എന്താ നീ പഠിച്ച് പഠിച്ച് പടവലങ്ങ പോലെയായോ കണക്കിന്റെ കാര്യത്തിൽ "

"നൂറ്റി നാല് വലുതാണന്നാണല്ലോ പത്രത്തിൽ കാണുന്നത്, നൂറ്റി പതിനാറ് ഗവർണ്ണർക്കു കിട്ടി, നൂറ്റി നാലും കിട്ടി.. നൂറ്റി നാലിന്റെ കത്തി നെ ക്ഷണിച്ചു.അപ്പോൾ ഞാൻ പറഞ്ഞതല്ലേ ശരി".
പകച്ചു പണ്ടാരമടങ്ങിപ്പോയി ഞാൻ.

"മോനേ അത് കർണ്ണാടകത്തിലെ കണക്കാകണക്ക് "

"ഇപ്പം പിടി കിട്ടി കന്നഡ കണക്ക് ".
104 = 10 + 4 = 14
ഇനി 116 = 1 +1 + 6 = 8

"അതെന്തു കണക്കാമോനേ ",

"അങ്ങിനെയാണെങ്കിൽ 11 + 6 അല്ലേ വേണ്ടത് "

"ഏയ് അല്ല, രണ്ടും വൺ അല്ലേ, ഒരേ സംഖ്യയായതിനാൽ 1+1, വൺ ആൻഡ് സീറോ വ്യത്യസ്ത സംഖ്യയായതിനാൽ 10
അതു കൊണ്ട് 1+1 + 6= 8, 10 + 4 = 14
8 < 14, അതു പ്രകാരം 104 > 116
എങ്ങനെയുണ്ട് കന്നഡ കണക്ക് "

"എടാ ഫയങ്കരാ...
ഭയങ്കര ഫുദ്ധിയാണല്ലോ".

"വല്യ ആൾക്കാരു പറയുന്നത് തെറ്റൂല പപ്പാ....
ഇങ്ങനെ ശരിയാണെന്ന് കാണിച്ചു കൊടുക്കണം".

"മിടുക്കൻ ന്യായീകരണം 2018 ഈ ലെവലിൽ എത്തിച്ചതല്ലേ
നമുക്ക് നോബൽ സമ്മാനത്തിനയക്കാം".

"പക്ഷേ എനിക്ക് കിട്ടൂലല്ലോ പപ്പാ "

"അതെന്താടാ "

"അവരല്ലേ കണ്ടു പിടിച്ചത് നൂറ്റിനാലാ നൂറ്റിപതിനാറിനേക്കാൾ വലുതാണെന്ന് ".

"അതു സാരമില്ല ന്യായീകരണ അവാർഡിന് അയക്കാം നമുക്ക് "
കേട്ടുകേട്ട് എനിക്കും ഇപ്പോൾ സംശയം നൂറ്റി നാലല്ലേ വലുത് നൂറ്റിപതിനാറിനേക്കാൾ. മസ്തിഷ്ക പ്രക്ഷാളനമെന്നാൽ ഇതാണ്.. ഏത്..?

(ശുഭം)
സജി വർഗീസ്
Copyright protected.