ഞാൻ കണ്ട ദൈവങ്ങൾ

ഞാൻ കണ്ട ദൈവങ്ങൾ

ദൈവം ഉണ്ടോ ഇല്ലയോ എന്ന തര്‍ക്കം ഇന്നും ഇന്നലെയും തുടങ്ങിയതല്ല. ഇവിടെ ഒരു തർക്കത്തിന് വേണ്ടി അല്ല ഞാൻ ഇതെഴുതുന്നത്. ഞാൻ അറിഞ്ഞ ദൈവസാന്നിധ്യത്തെ കുറിച്ചു ഒന്നു എഴുതണം എന്നു തോന്നി .

ദൈവം എന്ന ശക്തി ഉണ്ട് എന്ന് തന്നെ ഞാൻ വിശ്വസിക്കുന്നു. ആരാധനാലയങ്ങളിൽ പ്രതിഷ്ഠിച്ചിട്ടുള്ള വിഗ്രഹങ്ങളോ രൂപങ്ങളോ ഒന്നും ദൈവം ഉണ്ട് എന്ന് എനിക്കൊരിക്കലും തോന്നിയിട്ടില്ല. പിന്നെ എന്തിനു ആരാധനാലയങ്ങളിൽ പോകുന്നു എന്ന് തീർച്ചയായും നിങ്ങൾ ചിന്തിക്കും. ഹിന്ദു വിശ്വാസത്തിൽ ജനിച്ച ഞാൻ ഒരിക്കൽ പോലും ആരാധനാലത്തിലെ വിഗ്രഹത്തെ നോക്കി പ്രാർത്ഥിച്ചിട്ടില്ല. അവിടുത്തെ അലങ്കാരങ്ങളും ദീപപ്രഭയും കണ്ണുകളിലേക്ക് എത്തുമ്പോൾ കിട്ടുന്ന ഒരു സുഖം.

അമ്പലമുറ്റത്തെ ശാന്തതയും നാമജപങ്ങളിൽ നിന്നും ഉയരുന്ന നാദത്തിൽ നിന്നും കിട്ടുന്ന ഒരു പോസിറ്റീവ് ഊർജ്‌ജം അതാണ് എന്റെ ആരാധനാലയ ദർശനത്തിന്റെ പിന്നിൽ.

ഇതു വായിക്കുന്ന കടുത്ത ഈശ്വരവിശ്വാസികൾ ഇപ്പോൾ ചിന്തിക്കും ദൈവം ഉണ്ട് എന്ന് ആദ്യം പറഞ്ഞു , പിന്നെ പറയുന്നു ആരാധനാലായങ്ങളിൽ ദൈവം ഇല്ല എന്ന്. ഞാൻ തിരിച്ചറിഞ്ഞ ദൈവം ചില മനുഷ്യരിൽ ആണ്.

ബാല്യത്തിൽ പാടത്ത് കേറ്റിയ വെള്ളത്തിലേക്ക് വീണ് മുങ്ങിത്താണ് കൊണ്ടിരുന്ന എന്നെ സ്വന്തം അവസ്ഥ പോലും മറന്നു രക്ഷപ്പെടുത്തിയ അയൽ വക്കത്തെ ഗർഭിണിയായ ചേച്ചിയിലൂടെ ആദ്യം ഞാൻ ദൈവത്തെ കണ്ടു......പിന്നീട് ഗുജറാത്തിൽ ഭർത്താവിനോടൊപ്പമുള്ള ഒരു ബൈക്ക് യാത്രയിൽ ആക്സിഡന്റിൽ പെട്ട ഞങ്ങളെ തക്ക സമയത്തു ആസ്പത്രിയിൽ എത്തിക്കുകയും പിന്നീട് ഒരു നന്ദി വാക്കു കേൾക്കുവാൻ കൂടി നിൽക്കാതെ എവിടേക്കോ പോയ ഒരു നല്ല മനുഷ്യൻ....ഇപ്പോളും ഗുജറാത്തിൽ പോയാൽ എന്റെ കണ്ണുകൾ തിരയാറുണ്ട് അന്ന് എന്റെ ഭർത്താവിന്റെ ജീവൻ രക്ഷിച്ച ആ ദൈവത്തെ....എവിടെ നിന്നു വന്നതെന്നോ എവിടേക്ക് പോയതെന്നോ അറിയാതെ......

വീണ്ടും ഈ കഴിഞ്ഞ വർഷവും ഞങ്ങളിലേക്ക് ദൈവത്തിന്റെ സാമീപ്യം എത്തി. എന്റെ ഇളയ മകളുടെ ജീവൻ രക്ഷക്കായി. പനി കൂടി ഫിറ്റ് വന്ന മകളെയും കൊണ്ട് അർദ്ധരാത്രിയിൽ കൈയിൽ ഒരു നാണയതുട്ട് പോലും ഇല്ലാതെ ഓടിയ ഞങ്ങൾക്ക് സഹായമായി അടുത്ത വീട്ടിലെ കോടീശ്വരൻ ആയ (കോടീശ്വരൻമ്മാർ പൊതുവെ അഹങ്കാരികൾ എന്നാണല്ലോ അറിയപ്പെടുന്നത് )ആൾ യാതൊരു അഹങ്കാര ഭാവവും ഇല്ലാതെ ആസ്പത്രിയിലേക്ക് ഞങ്ങളുടെ പിന്നാലെ തേടി പിടിച്ചു വന്നപ്പോൾ വീണ്ടും കണ്ടു ദൈവത്തെ.......

എന്റെ അനുഭവങ്ങൾ കൊണ്ടാവാം ഞാൻ ഇങ്ങനെ ചിന്തിക്കുന്നത്. ദൈവം എന്നത് നന്മനിറഞ്ഞ മനുഷ്യരിലാണെന്ന്. ഭഗവാൻ ശ്രീ ധർമ്മശാസ്താവിനെ കാണാൻ ഇരുമുടി കെട്ടും കെട്ടി ശരണം വിളിയുമായി കാടും മേടും കടന്ന് ചെല്ലുമ്പോൾ എഴുതി വെച്ചിരിക്കുന്നു ....തത്വമസി എന്ന്.....

തത്വമസി എന്ന വേദ വാക്യത്തിലൂടെ "തത്‌" എന്ന നീയും "ത്വം" എന്ന ബ്രഹ്മവും ഒന്നാകുന്നു എന്ന്‌ പറയപ്പെടുന്നു. അതായത് "അത് നീയാകുന്നു". ഈശ്വരനെ കാണാനായി വൃതവും നോറ്റ് മലകളും ചവിട്ടി അവിടെ ചെന്ന് ആരെ ആണ് നമ്മൾ കണ്ടത് നമ്മളെ തന്നെ.....ഓരോ മനുഷ്യരുടെയും പ്രവർത്തിയിൽ ആണ് ദൈവം എന്നാണ് എനിക്ക് തോന്നിയിട്ടുള്ളത്........അപ്പോൾ പിന്നെ എന്തിനു ആരാധനാലയങ്ങളിൽ പോയി ദൈവത്തെ വിളിച്ചു ആളുകൾ നിലവിളി കൂട്ടണം.....ചിന്തിച്ചു പോകുന്നു ഇങ്ങനെ ഓരോന്ന്......

മഞ്ജു അഭിനേഷ് 4/6/2017, 2 :12 Am