കാലം

വളപ്പൊട്ടു തൻ കഷ്ണമെല്ലാം പൊറുക്കീ-
ട്ടെടുത്തിട്ടു പങ്കിട്ടുവച്ചും കളിച്ചും
മഷിത്തണ്ടു പൊട്ടിയ്ക്കലും, സ്റ്റേറ്റിനേറ്റം
തിളക്കം വരുത്തുന്നതും പോയ ബാല്യം.(ഭ്ജംഗപ്രയാതം)

മിഴിക്കോണുകൊണ്ടൊന്നു നോക്കാൻ മടിച്ചും
മനസ്സിന്നകത്തായൊളിച്ചൊട്ടു വച്ചും
നിനയ്ക്കുന്ന നേരം തുടുക്കും മുഖത്തിൻ
വെളിച്ചം പകർന്നോരു കൌമാരകാലം.

കുറച്ചൊക്കെ മോഹങ്ങളെത്തുന്നനേരം
തിരച്ചിൽ ന്നടത്തുന്നൊരാഘോഷകാലം
മടി,യ്ക്കില്ലനേരം, തിടുക്കത്തിൽ ലക്ഷ്യ-
ത്തിലെത്താൻ തുടിയ്ക്കുന്നൊരാ യൌവനം പോയ്.

മടുക്കുന്ന വേഷങ്ങൾ, ഞാണറ്റ പട്ടം
കണക്കേയുലഞ്ഞുള്ള നിൽ‌പ്പും കുരുക്കും
മനുഷ്യൻ മറക്കുന്നിതെല്ലാമൊടുക്കം
നമുക്കായിയൊന്നില്ല കൊണ്ടങ്ങുപോകാൻ.
.

(ഭുജംഗപ്രയാതം)

-ജ്യോതിർമയി ശങ്കരൻ