മൗനം

മലയുടെ മുകളിലെ ഒറ്റപ്പെട്ട ഒറ്റമുറി വീട് !!. മണ്ണെണ്ണ വിളക്കിന്റെ ശോഭയിൽ ചീവ്വീടുകൾ അസ്വസ്‌ഥമായിരുന്നു !!....

ഇറങ്കല്ലിലെ കോണിലിരുന്ന് ചിരുത തന്റെ ചുണ്ടുകൾ പൊട്ടിയ ഒരു കഷ്ണം കണ്ണാടിയിലൂടെ നോക്കുകയാണ്... !
"സ്വയം വരിഞ്ഞ് കെട്ടിവെച്ച... തന്റെ ചുണ്ടുകൾ "!!!

"ഇന്നേക്ക് നാല് കൂട്ടര് വന്നു ല്ലേ പെണ്ണേ...? "

മണിയനാണ്... ചിരുതയുടെ അച്ഛൻ.

മ്മ്.... ഇപ്രാവശ്യം എന്തൊക്കെയോ സൗജന്യങ്ങൾ കിട്ടൂന്ന് തോന്നണ്... സാറന്മാര് പറഞ്ഞ.. കേട്ടില്ലേ...?

ചിരുതക്ക് തികഞ്ഞ മൗനം മാത്രം !!

ഇന്നീ വീട്ടിൽ അവർ രണ്ടു പേരും മാത്രമേയുള്ളൂ.. അമ്മയും, അനുജനും വർഷങ്ങൾക്കു മുമ്പുള്ള ഉരുൾ പൊട്ടലിൽ മരിച്ചു. മണിയൻ അന്ധനുമാണ്. പട്ടിണിയാണ് പലപ്പോഴും... മലക്ക് താഴെയുള്ള വറീതിന്റെ പീടിക തിണ്ണയിൽ അവരെ യാചകരാക്കുന്നത്.

ഇത് പോലെ വോട്ട് ചോദിച്ചു വരുന്നവരല്ലാതെ വേറെ ആരാ ഈ മലകേറുവ്വ... നെടുവീർപ്പോടെ മണിയൻ തന്റെ അന്ധകാരത്തിൽ" ഒരു കഞ്ഞി കലം നിറയെ അരിമണികൾ പെറുക്കിയിട്ട"! സ്വപ്നവുമായി പായയിലേക്ക് കിടന്നു.

മണ്ണെണ്ണ വിളക്കിന്റെ മുഖത്ത്‌ വെട്ടം മങ്ങി തുടങ്ങിയിരുന്നു!.
ചാരുത തന്റെ കയ്യ് കൊണ്ട് വിളക്കിന്റെ തിരി താഴ്ത്തി... അപ്പോഴും അവൾക്ക് നിശബ്ദത മാത്രം കൂട്ട് !.

ദിവസങ്ങൾക്ക് ശേഷം,... മല കയറി ഒരു ജീപ്പ് വീണ്ടും അവരുടെ കുടിയിലെത്തി.കുറച്ച് പേർ അതിൽനിന്നെറങ്ങി മണിയനെയും, ചിരുതയെയും ജീപ്പിലേക്ക് ആനയിച്ചു.

നേരേ ജീപ്പ് ഒരു സ്കൂൾ മുറ്റത്താണ് അവരെ കൊണ്ടുചെന്നിറക്കിയത്. ക്യുവിന്റെ പിറകിൽ അവർ അനുസരണയോടെ നിന്നു.
ഒടുവിൽ അവരുടെ ഊഴവും വന്നു.

കൈവിരലിൽ മഷി പുരട്ടി.... !താൻ ജീവിച്ചിരിക്കുന്നൂവെന്ന... അടയാളവുമായി ചിരുത പുറത്തേക്കു വന്നു.

എവിടെ? തങ്ങളെ ഇവിടെക്കു കൊണ്ടു വന്നവർ..?

അവിടെ അവരാരും ഉണ്ടായിരുന്നില്ല... പകരം കുറച്ചു പേർ, നല്ല വസ്ത്രധാരികൾ... അവൾക്ക് മുന്നിലൂടെ കടന്നു പോയി.

"അവരുടെ കയ്യിൽ അറ്റം പൊട്ടിയ ഒരു സൂചിയും, പിന്നെ നൈലോണിന്റെ നൂലും "!!
അവർ അടുത്ത് വരുന്നതായി അവൾക്ക് തോന്നി.

ചിരുതയോടായി,... അവർ പറഞ്ഞു....

"നിങ്ങളുടെ ചുണ്ടിലെ ആ പഴയ നൂലുകൾ ദ്രവിച്ചു പോയിരിക്കുന്നു. "
ഇതാ നിങ്ങൾക്കായി ഈ പുതിയ നൂലുകൾ സമ്മാനിക്കുന്നു.
പിന്നീട് അവർ തന്നെ അവളുടെ ചുണ്ടുകൾ ഭംഗിയായി തുന്നിചേർത്തു. !!

കുറച്ചു നിമിഷതെ ചിന്തകൾക്ക് ശേഷം ചിരുത മണിയന്റെ കയ്യും പിടിച്ച് സ്കൂളിന്റെ പടികളിറങ്ങി....
ചിരുതയുടെ ചുണ്ടിൽ നിന്നും ആരും കാണാത്ത രക്തകണങ്ങ ൾ മണിയന്റെ കയ്യിലൂടെ ഒലിച്ച് താഴ്ന്നിറങ്ങി. !
അയാൾ അത് അറിഞ്ഞതെയില്ല.

പക്ഷേ... മണ്ണണ്ണ വിളക്കിന്റെ പ്രഭയിലും അന്ധകാരത്തിന്റെ അകകണ്ണിൽ അയാൾ കരുതി വെച്ച കഞ്ഞി കലത്തിൽ ഇനിയും അരിമണികൾ വീഴില്ലെന്ന സത്യം അയാൾ അറിയുന്നുണ്ടായിരുന്നു!!.
"ചിരുതക്ക് അപ്പോഴും നിശബ്ദത മാത്രം "!.
രചന
Deepa Palayadan.