തോൽവി

പത്തിലായിരുന്നീ,വർഷമിരുവരും
ബുദ്ധിമുട്ടിപ്പഠിച്ചിരുന്നെങ്കിലും,
ഫലമറിഞ്ഞപ്പോളവൾമാത്രം പുഞ്ചി-
രി,ച്ചഴലുപൊട്ടിച്ചിരിച്ചു ഞാനുംവൃഥാ!

ആകെയുള്ളതീഞങ്ങൾ ഇരട്ടകൾ
പൊന്നുമക്കളായച്ഛനുമമ്മയ്ക്കും,
അവളുപണ്ടേ പഠിയ്ക്കാൻ മിടുക്കി-
യെന്നറിയുമെങ്കിലു,മിതുവലിയ സങ്കടം!

ഊണുപേക്ഷിച്ചുറക്കവുമില്ലാതെ
നീ പഠിച്ചു ജയിച്ചതാണെങ്കിലും,
പ്രിയസോദരി,യഭിനന്ദനം തരാനാ-
വതില്ലയെൻ പെങ്ങൾ ക്ഷമിക്കുക!

എത്രയേറെത്തലപുകച്ചാലുമെൻ
ചിത്തരംഗത്തിലോർമ്മതൻശൂന്യത
വൃത്തിയായി പഠിച്ചപാഠങ്ങളു-
മുത്തരക്കടലാസ്സിൽപ്പിണങ്ങിയോ?

ചാണകംവാരാൻ പോകുവെന്നച്ഛനും
മൂന്നുനേരം വിഴുങ്ങിയതമ്മയും,
എത്രയേറെയെറിഞ്ഞു പരുഷമായ്
കൊള്ളിവാക്കുകൾ, നാണക്കേടായത്രേ?

പോകുകയെന്റെ കൺമുന്നിൽനിന്നു നീ,
ഭ്രാന്തനായി,യലറിയെൻ താതനും,
മൂക്കു ചീറ്റിപ്പറഞ്ഞമ്മ " യെന്തിനാ-
യിപ്രകാരം ഒരുമകൻ ഞങ്ങൾക്ക്?"

എന്തുചെയ്യാം, ക്ഷമിക്കുകയീമകൻ
എങ്ങനെയോ പിറന്നുപോയ്, മാപ്പിതാ!
നാണക്കേടിന്റെ മേലങ്കിയൂരി ഞാൻ
നാടുവിട്ടുപോകട്ടെ, സുനിശ്ചയം?

ബുദ്ധിശൂന്യനല്ലോർക്കുകയീ മകൻ
ശക്തിനേടിത്തിരിച്ചുവരുന്നനാൾ
ഓർത്തുവയ്ക്കുക മുതലുംപലിശയും
തീർത്തുനൽകിയിട്ടീ,പ്പടിചവിട്ടുഞാൻ!

© രാജേഷ് ദാമോദരൻ..✍️

മക്കൾ പരീക്ഷയിൽതോറ്റ എല്ലാ മാതാപിതാക്കളോടും
----------------------------------------------

ഒറ്റത്തോൽവിയല്ലീ,വലിയജീവിതം
താളുകൾപ്പുറകോട്ടു മറിക്കുക!
പണ്ടുകാലപ്പരാജയപ്രതിഭകൾ പിന്നെ
ലോകത്തെ കാൽക്കീഴിലാക്കിയോർ!