ത്യോഹാർ

..................

ഒരു വൈകുന്നേരം ഞാൻ വീട്ടില് ടീവി കണ്ടു കൊണ്ടിരിക്കുമ്പോൾ എന്റെ അമ്മാവന്റെ മൂത്ത പുത്രൻ ഓടി വന്നിട്ട് പറയാ ...
മാമ, എനിക്കു ഹിന്ദിയിലൊരു കുറിപ്പ് എഴുതാൻ സഹായിക്കോ ..
സത്യത്തിൽ അവന്റെ ചോദ്യം കേട്ട് ഞാൻ ആദ്യമൊന്നു പകച്ചെങ്കിലും അച്ഛനും ചേട്ടനും തൊട്ടടുത്ത് ഇരിക്കുന്നതിനാൽ എന്റെ അഭിമാനത്തെ ഓർത്തു ഞാൻ ആ ഉദ്യമം ഏറ്റെടുത്തു ...
ഇതൊക്കെ എന്ത് എന്ന മുഖഭാവത്തോടെ ഒരല്പ്പം പരുക്കത്തോടെ ഞാൻ അമ്മാവന്റെ മോനോട് ചോദിച്ചു ..
എന്താടാ ടോപിക്‌ ..
ഞാൻ ടോപിക്‌ എന്ന് പറഞ്ഞപ്പോൾ അവൻ ഞെറ്റി ചുളിച്ചു ..
അവനു ടോപിക്കിന്റെ അര്ത്ഥം മനസിലായില്ല എന്ന് എനിക്ക് ബോധ്യായി ..ആറിൽ പഠിക്കണവന് എന്ത് ടോപിക് .
ഡാ വിഷയമെന്താന്നു ..
കേരൾക്ക തൊഹ്യാർ ..
എന്റെ നിർവം തലയിൽ ഒരു മിന്നലുണ്ടായി ..
ഞാൻ ഒന്നൂടി ചോദിച്ചു ..
ഏന്തുന്നു കേരൾക്കാ ..
ഒരൽപ്പം സങ്കോചത്തോടെ അവൻ മറുപടി പറഞ്ഞു ..
തൊഹ്യാർ..
ഈശ്വാരാ ചെക്കൻ വലിയൊരു ഉൽക്കയും കൊണ്ടാണല്ലോ വന്നത് ..
ഛേ എക്കണ്ടാർന്നു എന്ന് എനിക്ക് തോന്നിപ്പോയി ..
മാമൻ പറഞ്ഞോ ..
എന്റെ വായിൽ നിന്നും പുറത്തു ചാടുന്ന ഹിന്ദി വാക്കുകൾ നോട്ട് ബുക്കിലോട്ടു പകർത്താൻ അവൻ റെഡിയായി കഴിഞ്ഞിരിക്കുന്നു ..
മാമ, പറ വേഗം ..
സ്കൂളിൽ എന്നെ പഠിപ്പിച്ച സകല ഹിന്ദി അധ്യാപകരെയും മനസ്സിൽ ധ്യാനിച്ചു ഞാൻ പറഞ്ഞു ..
ഉം എഴുതിക്കോ ...
ഞാൻ എഴുതിക്കോ എന്നും പറഞ്ഞതും ചേട്ടൻ ടിവിയുടെ ഒച്ച കുറച്ചു ..അച്ഛൻ ചെവി കൂർപ്പിച്ചു ..അടുക്കളയിൽ മിക്സിയിൽ തേങ്ങ അരച്ചുകൊണ്ടിരുന്ന 'അമ്മ മിക്സി ഓഫാക്കി ..
ആകെ നിശ്ചലം ...
കേരൾക്കാ തൊഹ്യാർ ഓണം ഹെ ...
ഹാച്ചി...":;!*"'
ആദ്യത്തെ തുമ്മൽ ചേട്ടന്റെ വക ..
സത്യത്തിൽ ചേട്ടൻ എന്നെ കളിയാക്കി ഹാച്ചിതാ ...ഹും ..
ഓണം കേരൾക്കാ ബഡാ തൊഹ്യർ ഹെ ..
ക്കു ക്കു ക്കു ...
എടിയേ കൊറച്ചു വെള്ളമിങ്ങെടുത്തേ ..
അച്ഛന് പെട്ടെന്നൊരു ചുമ ..
സത്യത്തിൽ അച്ഛനും ഒന്നാക്കിയതാണോ ...ഹും ..
എന്തായാലും ചെക്കൻ ഞാൻ പറഞ്ഞ രണ്ടു വാചകങ്ങളും സ്വർഗം കിട്ടിയ പോലെ ബൂകിലെഴുതി ചേർത്തു ..
ഓണം ദസ് ദിവസ്ക്ക തൊഹ്യർ ഹെ ...
ഇത്തവണ അടുക്കളയിൽ നിന്നും അമ്മയുടെ വക മീൻ വറക്കുന്ന ചട്ടിയിൽ രണ്ടു തട്ടും ഒരു ഹാച്ചിയും ..
അമ്മയും കൂടി ആക്കിപ്പോ ഞാൻ കേരളക്കാ തൊഹ്യർ അവിടെ നിർത്തിയിട്ടു പറഞ്ഞു ..
പൊന്നു മോനെ ബുക്ക് അവിടെ വച്ചിട്ട് മോൻ പൊക്കോ മാമൻ എഴുതി വച്ചേക്കാം ..
അല്ല പിന്നെ കുറച്ചു ഹിന്ദി പറഞ്ഞപ്പോ എല്ലാവർക്കും ചുമയും തുമ്മലും ..
ബാക്കിയുള്ളോന് ഇച്ചിരി ഹിന്ദി അറിയാന്നെ ...
അതിനു ഇങ്ങനെ പുച്ഛിക്കണോ ....
ഇവരോടൊക്കെ ഒന്നേ എനിക്ക് പറയാനൊള്ളൂ ..
പൽദേസി പൽദേസി
ജന നഹി
മുജേ ചോടുക്കോ
മുജേ ചോടുക്കോ
പൽദേസി മേരെ യാറ
വാതാപി ജാന ...

by Aneesh PT