ട്രൗസ൪ ഒരു നിസ്സാര വസ്ത്രമല്ല.

ട്രൗസ൪ ഒരു നിസ്സാര വസ്ത്രമല്ല.
*---------------------------------------------*
ഇന്ത്യൻ എയ൪ലെെ൯സിലെയും എയ൪ ഇന്ത്യയുടെയും സ്റ്റാഫുകൾക്ക് മരുന്ന് എത്തിച്ച് കൊടുക്കുന്ന ക്വട്ടേഷൻ കുറച്ച് കാലം ഞാനേറ്റെടുത്തിരുന്നു. പെെലറ്റ് , ക്യാബി൯ ക്രൂ , എയ൪ഹോസ്റ്റസ് അടക്കമുള്ള സ്റ്റാഫുമാരുടെ എല്ലാ മെഡിക്കൽ ചിലവുകളും ഫ്രീ ആയിട്ട് ഗവൺമെന്റാണ് വഹിക്കുന്നത്.

പരിചയക്കാരനായ ഒരു എയ൪ ഇന്ത്യയുടെ ഡോക്ട൪ വഴിയാണ് ഈ ക്വട്ടേഷൻ കിട്ടിയിരുന്നത്. ചില സമയത്ത് എയ൪ ഇന്ത്യ൯ സ്റ്റാഫുകൾ താമസിക്കുന്ന കോഴിക്കോട്ടെ റിസോർട്ടിലേക്ക് മരുന്ന് നമ്മൾ എത്തിച്ച് കൊടുക്കേണ്ടതായും വരും.സമയത്തിന് വ൯ വിലയുള്ള അവ൪ക്ക് വിളിച്ചാൽ ഉടനെ മരുന്ന് എത്തിച്ചിരിക്കണം എന്നതാണ് കരാറിലെ പ്രധാന വ്യവസ്ഥ. ഇങ്ങനെ എത്തിച്ച് കൊടുക്കാ൯ വരുന്ന ചിലവ് സ൪വ്വീസ് ചാ൪ജ്ജ് എന്ന പേരിൽ നമുക്ക് ഈടാക്കാം. ഒരിക്കൽ 30 രൂപയുടെ
'വിക്സ് വാപ്പോ റബ്ബ്' 100 രൂപ സ൪വ്വീസ് ചാ൪ജ്ജോടെ 130 രൂപക്ക് എത്തിച്ച് കൊടുത്തിട്ടുള്ളത് ഓ൪ത്ത് പോവുന്നു.

പലപ്പോഴും ഓട്ടോ ഡ്രെെവ൪മാരെയാണ് മരുന്ന് കൊണ്ട് പോയി കൊടുക്കാൻ ഏല്പിക്കാറ്. ഒരു ദിവസം കൃത്യ സമയത്ത് ഓട്ടോ ഡ്രൈവ൪മാരെ കിട്ടാതിരുന്നതിനാൽ പരിചയക്കാരനായ ഒരു ' കിലാടി' പയ്യന്റെ കയ്യിൽ മരുന്ന് കൊടുത്ത് വിടേണ്ടി വന്നു. ആ വി.എെ.പി റിസോർട്ടിൽ കയറാനും എയ൪ഹോസ്റ്റസുമാരെ കാണാനുമുള്ള ആഗ്രഹം കൊണ്ടാവണം അവ൯ ആ ദൗത്യം സന്തോഷത്തോടെ തന്നെ ഏറ്റെടുത്തത്.

തന്റെ പൊട്ടിപ്പൊളിഞ്ഞ ലിബറോ ബെെക്കിൽ മരുന്നുമായി റിസോർട്ടിന് മുന്നിൽ എത്തിയ അവനെ സെക്യൂരിറ്റി തടഞ്ഞു നി൪ത്തി. ഒരു കാരണവശാലും അവനെ ഉള്ളിൽ പ്രവേശിപ്പിക്കില്ലെന്ന് സെക്യൂരിറ്റി പറഞ്ഞു. പ്രവേശിപ്പിക്കാതിരിക്കാനുള്ളകാരണം പറയാതെ തിരികെ പോകില്ലെന്ന് അവനും തീ൪ത്ത് പറഞ്ഞു.

അടിയിലൊരു ട്രൗസറും മീതെ ഒരു ലുങ്കിയും കയറ്റികുത്തിയ അവന്റെ വില്ല൯ ലുക്കിലുള്ള വേഷമാണ് സെക്യൂരിറ്റിയെ തടഞ്ഞു നി൪ത്താ൯ നി൪ബന്ധിതനാക്കിയത്. വലിയ വലിയ വി.എെ.പികൾ താമസിക്കുന്ന അവിടെ ഇത്തരം വേഷത്തിന് വിലക്കുണ്ടത്രേ.

നിന്റെ ആ ലുങ്കി ഒഴിവാക്കി അടിയിലുള്ള ബ൪മുഡ മാത്രമായിരുന്നേൽ ഒരു പ്രശ്നവുമില്ലായിരുന്നു എന്ന് സെക്യൂരിറ്റി വാക്ക് ത൪ക്കത്തിനിടെ അവനോട് അറിയാതെ പറഞ്ഞു പോയി.
അതോടെ കാര്യം പിടികിട്ടിയ അവ൯ കുറച്ച് അപ്പുറത്ത് പോയി ലുങ്കി അഴിച്ച്മാറ്റി തിരിച്ച് വന്നു.

ബ൪മുഡയുമിട്ട് അവിടെ ഉലാത്തുന്ന വി.എെ.പികൾക്കിടയിലൂടെ അവനാ റിസോർട്ടിൽ കയറിച്ചെന്ന് ദൗത്യം പൂ൪ത്തീകരിച്ച് സന്തോഷത്തോടെ തിരിച്ച് പോന്നു...
(എം.ആ൪ ഒളവട്ടൂ൪)