മത സൗഹാർദ വിരുന്നു ..

മത സൗഹാർദ വിരുന്നു ..

തിരുമേനി : "മതങ്ങളെല്ലാം വല്ലാതെ വെറി പിടിച്ചു വിറളി പിടിച്ചു നടക്കുന്ന ഈ സമയം നമ്മൾ വെറുതെ ഇങ്ങനെ കയ്യും കെട്ടി നോക്കി നിന്നാൽ മതിയോ ? എന്തെങ്കിലും ഉടനെ ചെയ്തെ പറ്റൂ .നമുക്ക് ഒരു മത സൗഹാർദ വിരുന്നു സംഘടിപ്പിച്ചാലോ ?"

വിരുന്നെന്നു കേൾക്കേണ്ട താമസം പരികർമിയും ശിങ്കിടികളും എല്ലാം വായിൽ വാസ്കോഡ ഗാമയ്ക്ക് കപ്പലിറക്കാവുന്നത്ര വെള്ളവുമായി ഹാജരായി .

"തീർച്ചയായും തിരുമേനി ഒരു വിരുന്നിനുള്ള സമയം വല്ലാതെ അതിക്രമിച്ചിരിക്കുന്നു . ഇനി ഒട്ടും അമാന്തിക്കരുത് , ശുഭസ്യ ശീഘ്രസ്യ എന്നല്ലേ ..."

" എന്നാൽ സ്ഥലത്തെ പ്രധാന ദിവ്യന്മാർക്കും പണ്ഡിതന്മാർക്കും സന്ദേശം എത്തിക്കുക . ഇതര മതങ്ങളുടെ പ്രതിനിധികൾ വേണം , മതെതരന്മാർ വേണ്ട അലമ്പാകും. മതം ഒന്നിന് രണ്ടാൾ വെച്ച് ഒരു പത്തിരുപതു പേർ, അധികമായാൽ സ്ഥലം തികയില്ല ."

ഉടനെ പരികർമി ഐ ഫോണെടുത്തു മാന്തി പുണ്ണാക്കാൻ തുടങ്ങി . പട്ടണത്തിന്റെ പല ഭാഗത്ത് നിന്നും മറുവിളിയായി റിംഗ് ടോണുകൾ പൊങ്ങി . കൗസല്യ സുപ്രഭാതം , ബാങ്ക് വിളികൾ , പള്ളിമണി , കൃസ്ത്മസ് കരോൾ എന്തിനേറെ കൊടുങ്ങല്ലൂർ പാട്ട് വരെ റിംഗ് ടോണായി അന്തരീക്ഷത്തിൽ ഉയർന്നു വിലസി .

ശീഘ്രം തിരുമേനിയെ ഉണർത്തിച്ചു . "എല്ലാവരും റെഡി ആണ് . സൌഹാർദം അത്ര താല്പര്യമില്ലെങ്കിലും വിരുന്നു എല്ലാവർക്കും "ക്ഷ " പിടിച്ചിട്ടുണ്ട് .

" അപ്പോൾ ശരി , ശ്രീമതിയും കുട്ടികളും അമ്മാത്തേക്ക് പോകുന്ന ദിവസം രാത്രി സൂര്യൻ അസ്തമിച്ചു ഒന്നേ മുക്കാൽ നാഴിക കഴിഞ്ഞു യുദ്ധം തീരുമാനമായി . എന്നാലെ ബ്രാഹ്മ മുഹൂർതത്തിനു മുന്നേ കലാശം നടക്കുള്ളൂ .”

പൂജാ ദ്രവ്യങ്ങൾ കുറിച്ചെടുക്കാൻ പരികർമി ചാർത്തുമായി മുന്നിലെത്തി . സസ്യനും സസ്യെതരനുമായി വിഭവങ്ങൾ .തന്ദൂരിയിൽ ചുട്ടെടുത്ത കോഴികൾ ആൾക്കൊന്നിനു ഒന്ന് വെച്ച് ( വേണമെങ്കിൽ ഇവിടെയെത്തിയാൽ അവയെ പറപ്പിക്കാൻ ശ്രമിക്കാം )

പിന്നെ ഷഡ്ജം പാടി റിഷഭത്തിലെക്കു കടന്ന ശിങ്കിടിയെ തിരുമേനി വിലക്കി . രിഷഭം വേണ്ട , കേന്ദ്രൻ വിലക്കിയിരിക്കുകയല്ലേ , അവന്റെ പോലീസിനും പട്ടാളത്തിനും ഇപ്പോൾ അത് മണത്തു പിടിക്കുന്നതിലാണ് ശുഷ്കാന്തി .”അത് കൊണ്ട് ഗാന്ധാരം മതി , ന്നു വെച്ചാൽ ആട് ,ഒരു "ഭീകര ജീവി" തന്നെയാണല്ലോ അതും ."

"അല്ല തിരുമേനി , ചിലർക്ക് മറ്റവൻ തന്നെ വേണം എന്നാലെ വിരുന്നു പൊടി പൊടിക്കൂള്ളൂ"

" എന്നാൽ താനൊരു കാര്യം ചെയ്യുക , സ്പെഷൽ ആടുകറി എന്ന് പറഞ്ഞു ഇത്തിരി മാറ്റിവെക്കുക , ആട്ടിൻ തോലിട്ട പോത്ത് എന്നൊക്കെ കേട്ടിട്ടില്ലേ അത്ര തന്നെ "

"സേവയില്ലേ ??"

തിരുമേനി : ഇതെന്തു ചോദ്യം , സേവയില്ലാതെ എന്ത് വിരുന്നു ? " ന ദ്രവ്യ സേവാ ന ഡിന്നർ " എന്ന പ്രമാണം കേട്ടിട്ടില്ലേ ?

പരികർമി തിരുമേനിയുടെ ജ്ഞാനത്തിനു മുന്നിൽ വാ പൊളിച്ചു.

"എന്താണ് സാധനം ?"

"മെക്സികൊ വിൽ നിന്ന് നേരിട്ടു ഇറക്കുമതി ചെയ്ത ശുദ്ധമായ ടക്കീല കുമാരികൾ , ആറു കുപ്പികൾ (അശുദ്ധമാവരുതു പല സ്വാമികളും എഴുന്നള്ളുന്നതാണ്) ചിട്ട പ്രകാരം ചെറുനാരങ്ങയും ഉപ്പും ചേർത്തു പ്രയോഗം.

**************

അങ്ങിനെ കേമന്മാരും പ്രഭാഷകരും സംസ്കാരത്തിന്റെ ഉത്തുംഗ ശ്രിംഗങ്ങളിലിരിക്കുന്നവരും സർവോപരി മത പണ്ഡിതന്മാരും ആയിട്ടുള്ള പടയാളികൾ അണി നിരന്നു. പറഞ്ഞതിനും പത്തു മിനുട്ട് മുൻപേ അടി തുടങ്ങി. ഈയൊരു പരിപാടിയിൽ സ്വതവേ നമ്മൾ കൃത്യ നിഷ്ഠരാണല്ലൊ.

കോഴികൾ കൂവി ക്കൊണ്ടും ആടും പോത്തും കരഞ്ഞു കൊണ്ടും അന്നനാളത്തിലൂടെ ഇറങ്ങി കീഴടങ്ങി .ടക്കീലയും ഒന്നിച്ചു നൃത്തം ചെയ്യാൻ തുടങ്ങിയതോടെ രംഗം കൊഴുത്തു. ദ്രവം ഉള്ളു ദ്രവിപ്പിച്ചു എമ്പക്കങ്ങളായി പുറത്തു വരാൻ തുടങ്ങി.
പിന്നീടാണ് വിരുന്നിന്റെ നിറം മാറിത്തുടങ്ങിയത് .(പണ്ഡിതന്മാരുടെ തനി നിറം പുറത്തു വരാൻ തുടങ്ങിയെന്നു സാരം ) ആദ്യം എന്റെ മതം വലുത് ,നല്ലത് നിന്റെ മതം ത്ഫൂ ... എന്ന് മലയാളത്തിലാണ് തുടങ്ങിയത് പിന്നെ മേരാ മത് തേരാ മത് എന്ന് ഹിന്ദിയിലും മൈ റിലീ... യുവർ റിലീ ..എന്ന് ഇംഗ്ലീഷിലും അങ്ങ് കത്തി കയറി (അല്ലെങ്കിലും കലയ്ക്കും കലാപത്തിനും ഭാഷയില്ലെന്നല്ലേ!)
ഇതിനിടയിൽ അധികം തീ പറ്റിയില്ലാത്ത ഒരുത്തൻ മേരാ ഭാരത് മഹാൻ എന്ന് പറയുന്നത് ആരും ശ്രദ്ധിച്ചില്ല. പിന്നെ ഗ്വാ ഗ്വാ വിളികളായി, അക്രമവാസന കുറഞ്ഞ ചിലർ നിന്നെ ഞാൻ ഫേസ് ബുകിലോ വട്സാപ്പിലോ വെച്ച് എടുത്തൊളാമെന്നായി. ടക്കീല കുപ്പികൾ ബാറ്റ് ആയി , ഗ്ലാസ്സുകൾ ബോൾ ആയി , 20 - 20 ആയി . ആദ്യം സമാധാനമായി പൊട്ടിയ കുപ്പികൾ പിന്നെ ശരിക്കും പൊട്ടി .കത്തിക്കുത്തായില്ല എന്നേയുള്ളു , കുപ്പി ക്കുത്തായി .

ഒടുവിൽ വിവരം കിട്ടുമ്പോൾ രണ്ടെണ്ണം മോർച്ചറിയിലും മൂന്നെണ്ണം ഐ സി യു വിലും തിരുമേനിയും പരികർമിയും രണ്ടു ശിങ്കിടികളും ഒളിവിലും ആണ് കലാശിച്ചതു .

ചത്തതിന്റെയും മറ്റും നിറവും മണവും ഒന്നും വെളിയിൽ അറിയിക്കരുതെന്ന് പ്രത്യേകം പോലിസിനെ ശട്ടം കെട്ടിയിട്ടുണ്ട് , അല്ലെങ്കിൽ അതും പറഞ്ഞാവും പുറത്തുള്ളവർ വാളെടുക്കുന്നതും ഒരു രണ്ടായിരത്തിനെ തട്ടുന്നതും !!
തിരുമേനി മുൻകൂർ ജാമ്യത്തിന് വേണ്ടി മുദ്ര കടലാസിൽ ഇങ്ങനെ എഴുതി ഒപ്പിട്ടുകൊടുത്തു .

"ഞാൻ ഇനി മേലാൽ യാതൊരു മത സൗഹാർദ വിരുന്നും നടത്തുകയില്ലെന്നു ഈ ടക്കീലയിലെ പുണ്യ തീർത്ഥം സാക്ഷിയാക്കി ഉറപ്പു നൽകുന്നു"

മുകളിൽ നിന്നുള്ള നിർദേശപ്രകാരം മുൻകൂർ ജാമ്യം തരമാവുന്നത് വരെ മൃഷ്ടാന്ന ഭോജനവും സുഖചികിത്സയും അല്പസ്വല്പം സേവയും രാസലീലയുമൊകെ ആയി തിരുമേനിയും ശിങ്കിടികളും ഇപ്പോൾ തല്ക്കാലം ഒളിവിലാണ്.

ശുഭം

ജിതേഷ് പോയിലൂർ .