സ്നേഹമെന്ന നൂലിഴ

"അയ്യേ... നീ മാത്രമേ ഉള്ളൂ മല്ലു ഗേൾ ആയീ !!!!!കഷ്ടം.... നീ എങ്ങനെ ആ തമിഴ്സിനെ സഹിക്കും ????"...ബെറ്റർ മോളെ നീ ഡിപ്പാർട്മെന്റ് ചേഞ്ച്‌ കൊടുക്ക്‌... ഞങ്ങൾടെ ഒപ്പം പോരെ...!!

മലയാളികളുടെ കൂടെപ്പിറപ്പായ പുച്ഛഭാവത്തിൽ എന്റെ മല്ലുസ് എന്നോട് പറഞ്ഞു... ദുബായിൽ വളർന്ന എനിക്ക് എന്ത് മല്ലു... ???എന്ത് തമിൾ.. ??..അതുകൊണ്ട് തന്നെ അവടെ തുടരാൻ ഉള്ള തീരുമാനം എന്റെത് ആയിരുന്നു....

അതിൽ കുറച്ചു സ്വാർത്ഥത ഉണ്ടെന്ന് വെച്ചോളൂ.....മലയാളി പയ്യന്സിന്റെ വിഹാരകേന്ദ്രമായിരുന്നു ഡിപ്പാർട്മെന്റ്...!!!!.. ഒരേഒരു മലയാളി ഗേൾ..!!!. വി വി ഐ പി ട്രീട്മെന്റ് ആരുന്നു നമ്മൾക്ക് ഫസ്റ്റ് ഡേ തന്നെ... ഇത്രയും ഇമ്പോർട്ൻസ് വേറെവിടെ കിട്ടാൻ ??

രണ്ടാമത്തെ ദിവസം തൊട്ടു പണി പാലും വെള്ളത്തിൽ കിട്ടി തുടങ്ങി...എന്റെ ക്ലാസ്സിലെ പാവം തമിൾകൊടികൾക്ക് ഇംഗ്ലീഷ് അറിയില്ല... എനിക്കാണേൽ നേരെ ചൊവ്വേ മലയാളം അറിയില്ല... പിന്നെയാ തമിഴ്..!!!..അറിയാവുന്ന എല്ലാ ആംഗ്യങ്ങളും വേണ്ടിയിരുന്നു ആദ്യമൊക്കെ .. കാര്യങ്ങൾ മനസ്സിലാക്കാൻ ഭാഷ ഒരു പ്രശ്നമല്ല എന്ന് എന്നെ പഠിപ്പിച്ചത് അവരായിരുന്നു .... അവരെന്നെ തമിഴ് ഉം ഞാൻ അവരെ മലയാളവും പെട്ടന്ന് തന്നെ പഠിപ്പിച്ചു.....

ആദ്യമൊക്കെ ക്ലാസ്സിൽ ടോപ്‌ ആയി നിന്ന എന്നെ അടുത്ത സെമെസ്റ്ററിൽ ഒരു പെണ്കുട്ടി കവർ ചെയ്തു.... സത്യം പറഞ്ഞാൽ അന്നാണ് ഞാൻ അവളെ ശ്രദ്ധിക്കുന്നത് തന്നെ.... ക്ലാസ്സിലെ പൂച്ചക്കുട്ടി... ചെറുതായി അവളോട്‌ എനിക്കമർഷം തോന്നി ഇല്ലാ എന്നില്ല..... സ്റ്റാർ ആയ എന്നെ എന്നാലും അവൾ !!!..കണ്ടാലും മതി.... ഹും !!!!....പിന്നെ ഞാൻ അവളെ ശ്രദ്ധിക്കാൻ തുടങ്ങി എന്നതാണ് വേറൊരു വസ്തുത... അതും ആരും അറിയാതെ..... എന്തൊക്കെ കഷ്ടപ്പാടാലേ... പിന്നെ എല്ലാ സെമെസ്റ്ററിലും അവൾ എന്നേക്കാൾ മാർക്ക്‌ വാങ്ങി.... എനിക്ക് ആണേൽ ആകെ അവളോട്‌ ആകെ ദേഷ്യം ആയി....

അടുത്ത ചതി എന്നോട് ചെയ്തത് എന്റെ ട്യൂട്ടറും ഹോസ്റ്റൽവാർഡനും ആയ മാഡം ആയിരുന്നു... മലയാളീസിന്റെ അടുത്തുനിന്നു എന്നെ തമിഴ് റൂമിലേക്ക്‌ തട്ടി.... .. ഒരേ ഡിപ്പാർട്മെന്റ് സ്ടുടെന്റ്സ് നെ അവർ ഒരേ റൂമിൽ ആക്കി...പഠിക്കാൻ എളുപ്പത്തിനത്രേ .. കഷ്ടകാലത്തിനു അവൾ എന്റെ റൂമിലും വന്നു പെട്ടു.... ഞാൻ റൂം വേണ്ട എന്ന് വീട്ടിൽ വിളിച്ചു കരച്ചിൽ തുടങ്ങി.....

അപ്പോൾ ആണ് കഥാനായിക ആദ്യമായി എന്നോട് സംസാരിക്കുന്നതു... "നിനക്ക് ഞാൻ തമിഴ് ആയതു കൊണ്ട് ഇഷ്ടമല്ലല്ലേ... അതുകൊണ്ട് അല്ലേ റൂം മാറാൻ വാശി പിടിക്കണേ "എന്ന് ..അവൾ എന്നോട് ചോദിച്ചു... "ആണ് " എന്ന് മനസ്സ് മന്ത്രിക്കുമ്പോളും "ഇല്ല... "എന്ന് എനിക്ക് പറയേണ്ടി വന്നു... ഉടനെ തന്നെ റൂം മാറേണ്ട എന്ന് ഞാൻ പ്ലേറ്റ് തിരിച്ചു..... പാവം അവൾ അത്രക്കും നിഷ്കളങ്കമായിരുന്നു ചോദിച്ചത്.....

ഞാൻ വന്നപ്പോൾ തൊട്ട് അവളോട്‌ തൊട്ടതിനും പിടിച്ചതിനും വഴക്കിടും ദേഷ്യപ്പെടും... ഒന്നും പറയാതെ നിന്നു കേൾക്കും.... യേശുക്രിസ്തുവിന്റെ ന്യൂ ജനറേഷൻ ഫോം ആണോ എന്ന് പോലും തോന്നി പോയി .. പലപ്പോഴും....

ഇവിടെ വന്നിട്ടാണ് അവളെപ്പറ്റി ഞാൻ ശരിക്കും അറിയുന്നത്...ഇടയ്ക്കു ഡൌട്ട് ചോദിക്കുമ്പോൾ ഞാൻ ഒഴിവു കഴിവ് പറയുമായിരുന്നു.... .ബിസി ചാറ്റിംഗിൽ ആവുമേ... ഒരു ദിവസം ഡാറ്റ തീർന്നത് കൊണ്ട് അവള്ക്ക് പറഞ്ഞുകൊടുക്കാൻ ഇരുന്നു.... അപ്പോളാണ് അറിയുന്നത് .... അവൾക്കു ഇംഗ്ലീഷ് തരിമ്പു പോലും അറിയില്ല... മുഴുവൻ മനഃപാഠം പഠിച്ചാണ് എന്നേക്കാൾ മാർക്ക്‌ വാങ്ങുന്നത്.... രാത്രി മുഴുവൻ കഷ്ടപ്പെടും.... ഇത്രേം കാലം ഓർത്തത്‌ ഈ രാത്രികാല പഠനം എന്നേ തോൽപ്പിക്കാൻ ആണെന്നാണ്

പിന്നെ ഞങ്ങൾ നല്ല സുഹൃത്തുക്കൾ ആയി....ഞാൻ അവളുടെ കൂടെ ആയി എപ്പോഴും. ആർക്കും അതിഷ്ടപ്പെട്ടില്ല.. പരസ്യമായും രഹസ്യമായും എന്നോട് അവളെപ്പറ്റി കുറ്റം പറഞ്ഞു... .. അവൾ ഒരു സാധു പെണ്കുട്ടി ആരുന്നു.... ഗവണ്മെന്റ് കോട്ട ഇല്ലാരുന്നേൽ എഞ്ചിനീയറിംഗ് സ്വപ്നം പോലും കാണാൻ പറ്റില്ലായിരുന്നു എന്ന് അവൾ പറയും...അച്ഛന്റെ ഉപദ്രവം കാരണം .. അമ്മ ചെറുപ്പത്തിലെ ആത്മഹത്യാ ചെയ്തു..... അച്ഛൻ രണ്ടാമത് വിവാഹം കഴിച്ചു.... കേരളത്തിൽ ഏതോ ലയത്തിൽ ജോലി ആണ്... അവിടെ രണ്ടാമത്തെ ഭാര്യക്ക്‌ ഒപ്പം ആണ് താമസം... ആ വിവാഹത്തിൽ രണ്ടു കുട്ടികൾ വേറെയും ഉണ്ട്....

ഇവൾക്ക് ഒരനിയൻ ഉണ്ട്.... അതിനെ അയാൾ കൊണ്ടുപോയി...പെണ്കുട്ടി ആയതു കൊണ്ട് ഇവളെ ആർക്കും വേണ്ട..അച്ഛൻ അവളെ ഉപേക്ഷിച്ചു പൊകുവേം ചെയ്തു ...

കുഞ്ഞായിരിക്കുമ്പോൾ അച്ഛന്റെ അനിയന്റെ വീട്ടിലെ ജോലികൾ മുഴുവൻ ചെയ്യണം... ഇല്ലേൽ ഭക്ഷണം കൊടുക്കില്ല .. അത് കഴിഞ്ഞാണ് അവൾ പഠിക്കാൻ പോയിരുന്നത്.. .. സഹിക്കാൻ പറ്റാതെ വന്നപ്പോൾ ഒരിക്കൽ അമ്മ വീട്ടിലേക്കു ഇറങ്ങി നടന്നു.. അതുകഴിഞ്ഞ് .. ഇവടെ അമ്മയുടെ അച്ഛനും അമ്മക്കുമൊപ്പം ആയിരുന്നു.... ഞങ്ങൾ ഫസ്റ്റ് സെമെസ്റ്ററിൽ പഠിക്കുമ്പോൾ അമ്മമ്മ കാൻസർ വന്നു മരിച്ചു...കാശ് ഇല്ലാതെ ചികിത്സ കിട്ടാതെ ആണെന്ന് അവളുടെ പറച്ചിലിൽന്നു എനിക്ക് മനസ്സിലായി....

ബുക്സ് വാങ്ങാൻ കാശ് ഇല്ലാത്തതു കൊണ്ടാവണം അവൾ പിന്നെ ഞാൻ പഠിച്ചു കഴിഞ്ഞു എന്റെ ബുക്ക്‌ വെച്ചു പഠിക്കാൻ തുടങ്ങിയത്..... ആ സെമെസ്റെർ ഞാൻ ടോപ്‌ ആയി എങ്കിലും എനിക്ക് ഒരു സന്തോഷവും തോന്നിയില്ല... പക്ഷെ അവൾ എനിക്ക് വേണ്ടി ഒരുപാട് ഹാപ്പി ആയിരുന്നു .... . വൈകുനേരം ഹോസ്റ്റലിലേക്ക് നടക്കുമ്പോൾ ഞാൻ അവളോട്‌ പറഞ്ഞു..... ഞാൻ ആകെ ഡിസ്ട്രക്ടഡ് ആവുന്നു... നമ്മൾക്ക് ഇനി ഒരുമിച്ചു പഠിക്കാം എന്ന്....... അന്ന് തൊട്ടു ഞങ്ങൾക്ക് എല്ലാം ഒന്നേ ഉണ്ടായുള്ളൂ... ഒരു പ്രത്യേക അടുപ്പം ആയിരുന്നു ഞങ്ങളുടെ.....

ഒരു വൈകുനേരം അവളുടെ മുത്തച്ഛൻ മരിച്ചുപോയി എന്ന് പറഞ്ഞു കാൾ വന്നു.... അവൾക്കിനി ആരുമില്ലല്ലോ എന്നോർത്ത് എനിക്ക് ഒരുപാട് വിഷമം തോന്നി.... പക്ഷെ കരയാതെ സ്ട്രോങ്ങ്‌ ആയി.... യാത്രക്ക് തയാറാകുന്ന അവളെ അത്ഭുതത്തോടെ നോക്കി നിൽക്കാനേ എനിക്ക് പറ്റിയുള്ളൂ....

പിന്നെ സെമെസ്റെർ ബ്രേക്ക്‌ വന്നപ്പോൾ എവിടെപോകുമെന്നറിയാതെ നിൽക്കുന്ന അവളെ ഞാൻ കണ്ടു........ അവിചാരിതമായി അവളെ അവളുടെ അച്ഛൻ വിളിച്ചു കേരളത്തിലേക്ക് വരാൻ പറഞ്ഞു.... അവളെ ബസിൽ കയറ്റിവിട്ടു പോകുമ്പോൾ അൽപ്പം സന്തോഷം തോന്നി... പാവം തനിച്ചായില്ലല്ലോ...

ഏറ്റവും ആദ്യം ഹോസ്റ്റലിൽ തിരിക വരുന്ന എന്നേക്കാൾ മുൻപേ ഇത്തവണ അവൾ വന്നു.... രണ്ടാനമ്മയുടെ പോരിന്റെ കഥയായിരുന്നു അത്തവണ ഞാൻ കേട്ടത്..... നിനക്ക് തോന്നുന്നതാണ് എന്ന് പറഞ്ഞു സമാധാനിപ്പിച്ചു ഒരു തവണ കൂടി ഞാൻ അവളെ ബസ്‌ കയറ്റി വിട്ടു.... തിരികെ വന്നപ്പോൾ... എന്തോ കൊണ്ട് തല്ലി വീർത്ത കൈത്തണ്ടകൾ ആണ് ഞാൻ കണ്ടത്....

അന്ന് ഞാൻ അനുഭവിക്കുന്ന സൗഭാഗ്യങ്ങൾ ഓർത്തു എനിക്ക് തന്നെ അത്ഭുതം തോന്നി.... എന്റെ വീട്ടിൽ ഞാൻ എന്ത് ഭാഗ്യവതി ആണെന്ന തിരിച്ചറിവും.... ഞാൻ എന്റെ കുടുംബത്തിലെ ഒരേ ഒരു പെൺകുട്ടി ആയിരുന്നു.... അതുകൊണ്ട് തന്നെ ഒരു രാജകുമാരിയെപ്പോലെ ആയിരുന്നു എന്നെ എല്ലാവർക്കും നോക്കിയിരുന്നത്...... എന്നാലും അത്രയും കാലം ഞാൻ എന്റെ കുറ്റങ്ങളെയും കുറവുകളെക്കുറിച്ചും മാത്രമായിരുന്നു ചിന്തിച്ചിരുന്നത് ..... ആദ്യമായി ആയിരുന്നു എനിക്ക് അങ്ങനെ ഒരു ബോധോദയം ഉണ്ടാവുന്നത്.....

ഒരു സെമെസ്റ്റർ പെട്ടെന്ന് ഓടിപ്പോയി.... എക്സാം കഴിഞ്ഞു അടുത്ത ബ്രേക്ക്‌ സ്റ്റാർട്ട്‌ ആയി .... ബസ്‌ കയറാൻ പോകുന്ന അവളെ കണ്ടപ്പോൾ എന്തോ വിഷമം തോന്നി.. വല്ലാത്ത ഒരു പേടിയും ..

"വാ.. ഇനി മുതൽ സെമസ്റ്റർ ബ്രേക്ക്ന് എന്റെ വീട്ടിൽ നിന്നാൽ മതി "...എന്ന് പറഞ്ഞു അവളെ ചേർത്തു നടക്കുമ്പോൾ.... എന്റെ അമ്മ അവളെ പൊന്നുപോലെ നോക്കും എന്ന വിശ്വാസം ഉണ്ടായിരുന്നു.... ഞാൻ വിചാരിച്ച പോലെ തന്നെ അമ്മക്ക് അവളെ ഒരുപാടിഷ്ടം ആയി...

എങ്ങനെ ഇഷ്ടപ്പെടാതിരിക്കും വീട്ടിൽ എത്തുമ്പോൾ തൊട്ട് വാലുപോലെ അമ്മേടെ പുറകെ കാണും.....പാചകം തൊട്ട് എല്ലാത്തിലും അവൾ അമ്മയുടെ സഹായി ആവും ... ഞാൻ ഫോൺ കിട്ടിയാൽ നോർമൽ ആയി ആരെയും മൈൻഡ് ചെയ്യാറില്ല ...അതുകൊണ്ട് തന്നെ അമ്മ എന്നിൽ നിന്നു എന്തെങ്കിലും ഒക്കെ പ്രതീക്ഷിച്ചിട്ടുണ്ട്ങ്കിൽ അതെല്ലാം അവളിലൂടെ ആണ് സാധിച്ചത് എന്ന് ഞാൻ തന്നെ അങ്ങ് സമ്മതിച്ചു തരും ..

പിന്നെ അവൾ എല്ലാ അവധിക്കും എന്റെ വീട്ടിൽ വരാൻ തുടങ്ങി.....അങ്ങനെ ന്റെ അമ്മടെ പുന്നാരമോളായി..... !!!!!

" എന്നിട്ട് ??"...മാളൂട്ടി ആകാംഷയോടെ ചോദിച്ചു.....

"എന്നിട്ടെന്താ... കണ്ണീച്ചോര ഇല്ലാതെ അവളെന്റെ ഏട്ടനെ കറക്കി എടുത്തു... അവളാ നിന്റെ ഈ പുന്നാര അമ്മ... !!!!"...

അടുത്തിരുന്ന അവളെ കണ്ണിറുക്കി കാട്ടിക്കൊണ്ടു ഞാൻ പറഞ്ഞു.....

"എടി.... കള്ളി!!!..... കൊച്ചിനെ ആവശ്യം ഇല്ലാത്തതു പറഞ്ഞു പഠിപ്പിച്ചോ!!!...ഇവളാ മാളുസെ ഈ കല്യാണം നടത്തിയത്.... ആന്റി ചുമ്മാ പറയുന്നതാട്ടോ .. ."അവൾ അവളെതന്നെ ന്യായികരിക്കാൻ നോക്കി....

"അല്ല മാളു ... കള്ളം. !!!" പറഞ്ഞു തീരുന്നതിനു മുൻപ് അവൾ എന്റെ വായ് അമർത്തിപ്പിടിച്ചു ചെവിയിൽ മന്ത്രിച്ചു

"നിനക്കിട്ടു ഞാൻ വെച്ചിട്ടുണ്ട് "

"ചുമ്മാതെ ആണേ !!!!".... ഒരു കള്ളച്ചിരി ചിരിച്ചു കൊണ്ട് ഞാൻ പറഞ്ഞു....

"മ്മം.... വാവേ... നിന്റെ അമ്മ പറയണ കള്ളം ഒന്നും കേട്ട് വളരല്ലേ കെട്ടോ... വേഗം പുറത്തു വാ.... പിന്നെ ആന്റി നോക്കിക്കൊള്ളാം നല്ല മിടുക്കി ആയിട്ട് "....എന്റെ നിറവയർ തലോടിക്കൊണ്ട് അവൾ പറഞ്ഞു

"നിന്റെ വാവ വരട്ടെ കാട്ടിത്തരാം...!!!! "

സത്യം പറഞ്ഞാൽ ഞാൻ തന്നെ ആണ് രണ്ടാളുടെ മനസ്സിലും പ്രണയത്തിന്റെ വിത്തുകൾ പാകിയത്.....അവളെ പിരിയാൻ എനിക്ക് വിഷമം ആയിരുന്നു... ഏട്ടൻ എത്ര ശ്രമിച്ചിട്ടും പക്ഷേ ഒരിക്കലും അവൾ ആ ഇഷ്ടം ഏട്ടന്റെ അടുക്കൽ സമ്മതിച്ചു കൊടുത്തില്ല....നന്ദി കേടാവുമെന്ന് തോന്നിക്കാണും ....

അതുകൊണ്ട് തന്നെ എനിക്ക് അത് വിവാഹമായി ആലോചിക്കേണ്ടി വന്നു ...... അച്ഛനും അമ്മയ്ക്കും അതിൽ എതിർപ്പൊന്നും ഉണ്ടായിരുന്നില്ല....അവർക്ക് ഞാൻ അത് പറയുന്നതിന് മുൻപേ അങ്ങനെ ഒരു ചിന്ത ഉണ്ടായിരുന്നു.... അത്രയ്ക്ക് നല്ല കുട്ടിയായിരുന്നു അവൾ.....എന്തായാലും അതികം താമസിക്കാതെ തന്നെ അവൾ എന്റെ നാത്തൂൻ കൂടി ആയി

"രണ്ട് എണ്ണത്തിനും പോത്തുപോലെ വളർന്നുന്നുള്ള ഒരു ചിന്ത ഇല്ല...പിന്നെ നീ ആമീ ഇതൊക്കെ ആണോ കുഞ്ഞു പിള്ളാർക്ക് പറഞ്ഞു കൊടുക്ക!!"....കേട്ട് വന്ന അമ്മ എന്നെ വഴക്ക് പറഞ്ഞു

അത് കേട്ട് അവൾ എന്നെ അമ്മകാണാതെ കളിയാക്കി ചിരിച്ചുകൊണ്ടിരുന്നു... ലോകത്തിലെ ഏറ്റവും നിഷ്കളങ്കമായ ചിരി ആയി എനിക്ക് അത് തോന്നി.....ഞങ്ങൾ എന്താ പറയുന്നതെന്ന് പോലും മനസ്സിലാകാതെ ഞങ്ങളുടെ നാലുവയസ്സുള്ള മാളൂട്ടി മിഴിച്ചിരിപ്പുണ്ടായിരുന്നു.... അവൾക്കു ഞാൻ കഥ പറഞ്ഞു കൊടുക്കുക ആയിരുന്നു
അതിനെ മടിയിൽ എടുത്തു വെച്ചുകൊണ്ട് ഞാൻ അവളെ നോക്കി ... അപ്പോളും അവളുടെ ചിരി നിന്നിട്ടുണ്ടായില്ല.. .

"നിന്നെക്കാൾ നിഷ്കളങ്കയായ ഒരു പെണ്കുട്ടിയെ എനിക്കെവിടെന്നു കിട്ടാനാ കുട്ട്യേ എന്റെ ഏട്ടന് വേണ്ടി ???"...ഞാൻ എന്റെ മനസ്സിൽ നിശബ്ദമായി പറഞ്ഞു...മനസ്സ് തുറന്നു ചിരിക്കുന്ന അവളെ നോക്കി ഇരിക്കുമ്പോൾ എവിടെയോ ഒരു ചെറിയ സുഖം തോന്നി.... ഒരു ചെറിയ നിർവൃതി...
സ്നേഹത്തിനു അതിരുകൾ ഇല്ലല്ലോ അല്ലേ....??

വരുന്ന പെണ്ണിന്റെ ജാതിയും മതവും നിറവും ഭാഷയും ഉന്നതമാവണമെന്നു ഒരു നിർബന്ധവും ഇല്ലാ എന്ന് തോന്നിയിരുന്നെങ്കിൽ.... സ്നേഹത്തിന്റെ അളവുകോൽ കൊണ്ട് അളന്നിരുന്നെങ്കിൽ.... നമ്മളുടെ കുടുംബങ്ങളും ഒരു സ്വർഗമായേനെ... കാരണം കുടുംബമഹിമയിലും പാരമ്പര്യത്തിലും അല്ലല്ലോ ബന്ധങ്ങൾ നിലനിൽക്കുന്നത് ... അത് വെറും സ്നേഹമെന്ന നൂലിഴയിൽ അല്ലേ..... അതിനു വേർതിരിവുകൾ ഇല്ലല്ലോ
(കുത്തിപ്പൊക്കിയ പഴയ കഥ )

Shilpa