വേട്ടക്കാരൻ

ഒരേ സമയം ഒരു മാന്ത്രികനും
വേട്ടക്കാരനും ആവാൻ ആഗ്രഹിക്കുന്നുവോ?
എങ്കിൽ നിങ്ങൾ ഒരു വായനക്കാരനായിരിക്കുക.

ഒരു വായനക്കാരൻ ആവുക എന്നാൽ
ഒരു മാന്ത്രികൻ ആവുക എന്നതു കൂടിയാണ്.
അക്ഷരങ്ങളിലൂടെ മാത്രം കണ്ട
ഏതോ കാലത്തിലേയ്ക്ക്
മാന്ത്രിക ക്കുതിരയിൽ ചെന്നിറങ്ങണം.
ഭാവനയിൽ പിറന്ന അപരിചിതരായ മനുഷ്യരിലേക്ക്
പരകായ പ്രവേശം നടത്തണം.
അവർക്കു വേണ്ടി ചിരിക്കണം, കരയണം , ചിന്തിക്കണം.
അപ്രതീക്ഷിതമായ വഴിത്തിരിവുകളിലൂടെ
നടന്നു നീങ്ങണം.
അവസാനത്തെ താളിൽ നിന്ന് യാത്ര പറഞ്ഞ്
പുറത്തേക്ക് ചാടുമ്പോൾ
എന്തൊക്കെയോ ഹൃദയത്തിൽ
ബാക്കി വയ്ക്കണം.

ഒരു വായനക്കാരനാവുകയെന്നാൽ
ഒരു വേട്ടക്കാരൻ ആവുക എന്നത് കൂടിയാണ്.
ഹൃദയത്തിൽ എന്തോ ബാക്കി വയ്ക്കാൻ കഴിയുന്ന
ഒരു തൂലികയെ തേടുക എന്നതാണ്.
നിങ്ങൾ നായാട്ട് തുടങ്ങിക്കഴിഞ്ഞെങ്കിൽ
പുലിക്കുട്ടിയിൽ കുറഞ്ഞ ഒന്നിലും തൃപ്തനാവാതിരിക്കുക.
മൂർച്ചയുള്ള നഖങ്ങളിൽ നിന്ന്
ഒഴിഞ്ഞു മാറാൻ നിങ്ങൾക്ക് അറിയാമെങ്കിൽ
കളിക്കുവാൻ നല്ലത് പുലിക്കുട്ടി തന്നെയാണ്..!!

Resmi