എന്റെ മകൾ

എന്റെ മകൾ
______________

എനിക്ക് കുറച്ചു ദുശ്ശീലങ്ങൾ ഉണ്ടായിരുന്നു. വലുതായി ഒന്നുമില്ല. ചെറുതായി മൂക്കിപ്പൊടി വലിക്കും, വെറ്റില ചവയ്ക്കും, പിന്നെ വല്ലപ്പോഴും കുറച്ചു കളളും കുടിക്കും. പക്ഷേ ഇന്നുവരെ ഈ ശീലങ്ങൾ കാരണം ആർക്കും ഒരു ബുദ്ധിമുട്ടും ഉണ്ടായില്ല. അതുകൊണ്ട് ഇതൊക്കെ ദുശ്ശീലമായി എനിക്ക് തോന്നിയിട്ടുമില്ല. ഭാര്യയ്ക്ക് ഇഷ്ടമില്ലായിരുന്നു എന്റെ കളളു കുടിയും മൂക്കിപ്പൊടി വലിയും. കാരണം കളളു കുടിച്ചാൽ ഞാൻ വളാ വളാന്നു സംസാരിച്ചു കൊണ്ടിരിക്കും, പിന്നെ മൂക്കിപ്പൊടി വലിച്ചാൽ എന്റെ തുമ്മൽ കേട്ട് പ്ലൂട്ടോ വരെ തെറിച്ചു പോകും.

ഇങ്ങനെയൊക്കെ തന്നെയാണെങ്കിലും ഞാനൊരു മര്യാദരാമനായി ജീവിക്കുകയായിരുന്നു. പക്ഷേ എന്റെ ശീലങ്ങളും തട്ടി തെറിപ്പിച്ചുകൊണ്ടാണ് അവൾ വന്നത്. അവളുടെ വരവ് അറിഞ്ഞത് തന്നെ ഭാര്യയുടെ കരച്ചിലിലൂടെയാണ്. ഭാവി പ്രവചിക്കാൻ വന്ന കാക്കാത്തിയും വയറു കാണാൻ വന്ന ബന്ധുക്കളും ഉറപ്പിച്ചു പറഞ്ഞതാണ് ആൺകുട്ടിയാണെന്ന്. പക്ഷേ സ്കാൻ ചെയ്തപ്പോൾ പെണ്ണാണെന്ന് അറിഞ്ഞപ്പോൾ ഭാര്യ വാവിട്ടു കരഞ്ഞു. എനിക്ക് വലിയ ചലനമൊന്നും ഉണ്ടായില്ല. ആദ്യത്തെ പെണ്ണായതുകൊണ്ട് രണ്ടാമത് പെണ്ണായി കൂടാ എന്നൊന്നും ഇല്ലല്ലോ! ഞങ്ങൾ എന്തായാലും മോളെ വരവേൽക്കാൻ തീരുമാനിച്ചു. എല്ലാവരുടേയും വിഷമം തീർക്കാൻ മോളെ ആൺകുട്ടിയായി വളർത്താമെന്ന് വിചാരിച്ചു.

ശരിക്കും ആണായി വളർത്തണ്ട ആവശ്യമേ വന്നില്ല, ശരിക്കും ആൺകുട്ടിയുടെ സ്വഭാവം തന്നെയായിരുന്നു. കുസൃതിയുടെ ആശാട്ടി. മോളെ പറ്റി വരുന്ന പരാതികൾ തീർക്കാനെ എനിക്ക് സമയമുണ്ടായിരുന്നുളളൂ. സുരേഷ് ഗോപിയുടെ സിനിമ കണ്ട് ഒരു കടക്കാരനെ പോയി "പുല്ലേ" എന്ന് വിളിച്ചതായിരുന്നു ആദ്യത്തെ പരാതി. പിന്നീട് അങ്ങോട്ട് പരാതികളുടെ ഘോഷയാത്രയായിരുന്നു. കൂടെ പഠിച്ച ചെക്കനെ തളളിയിട്ടു, കൂട്ടുകാരിയുടെ കൈ ബ്ലേഡ് കൊണ്ട് മുറിച്ചു.... അങ്ങനെ നീണ്ടു പോയി പരാതികൾ. അടിക്കാൻ പിടിച്ചാൽ കൈയിൽ കിട്ടില്ല പെണ്ണിനെ. ഓടി, വീടിന്റെ മുറ്റത്ത് നിൽക്കുന്ന പേരമരത്തിൽ കേറും. അവസാനം ആ മരം വെട്ടി കളഞ്ഞു. പക്ഷേ ഒരു പ്രയോജനവും ഉണ്ടായില്ല, അവൾ ജനലിൽ ചവിട്ടി വീടിന്റെ മുകളിൽ കേറിതുടങ്ങി. പണികിട്ടിയത് എനിക്കാണ്, ഏണി കൊണ്ടുവന്നു മോളെ താഴെ ഇറക്കേണ്ടി വന്നു. ആ നിഷ്കളങ്കമായ മുഖം കണ്ടാൽ തല്ലാൻ പോലും തോന്നില്ല എന്നതാണ് വാസ്തവം.

പതിവു പോലെ മൂക്കിപ്പൊടി വലിച്ചു. പക്ഷേ അന്ന് ദേഹം മുഴുവൻ പുകഞ്ഞു പോയി. ഉച്ചിക്ക് തീ പിടിച്ച അവസ്ഥ. തുമ്മൽ നിർത്താൻ പറ്റുന്നില്ല. എന്താണ് സംഭവിച്ചതെന്ന് ഒരു എത്തും പിടിയും കിട്ടിയില്ല. കുറേ നേരത്തേക്ക് ഒരു ബോധവും ഉണ്ടായിരുന്നില്ല. ബോധം വന്നപ്പോൾ കുറ്റവാളിയെ പോലെ എന്റെ മുന്നിൽ നിൽപ്പുണ്ട് ഒരാൾ. അപ്പോഴേ മനസ്സിലായി മോള് പറ്റിച്ച പണിയാണെന്ന്. മോള് മൂക്കിപ്പൊടിയിൽ മുളകുപൊടി ഇടുമെന്ന് സ്വപ്നത്തിൽ പോലും വിചാരിച്ചില്ല. ആ സംഭവത്തിന്റെ എഫക്ട് തീരുന്നതിനു മുമ്പ് തന്നെ അടുത്ത പണി എനിക്ക് കിട്ടി. വെറ്റിലയിൽ കാന്താരി വച്ചു തന്നു ആ പെണ്ണ്. അതുകൊണ്ടും തീർന്നില്ല, കട്ടിലിന്റെ അടിയിൽ ഒളിച്ചു വച്ച കുപ്പിയിൽ ചാരം ഇട്ടുവെച്ചു. ഇതൊന്നും അറിയാതെ കുടിച്ച പാവം ഞാൻ.....
വയറും പോയി... കുടിച്ച സാധനം അങ്ങോട്ടുമില്ല ഇങ്ങോട്ടുമില്ല എന്ന അവസ്ഥയിലുമായി. എന്തൊക്കെയായാലും അതോടെ എന്റെ ദുശ്ശീലങ്ങൾക്കെല്ലാം തിരശ്ശീല വീണു.

പക്ഷേ എനിക്ക് ഇന്നും മനസ്സിലാകാത്ത ഒരു കാര്യമുണ്ട്. മോൾക്ക് എന്റെ ശീലങ്ങളൊക്കെ ഇഷ്ടമല്ലെന്ന് ഒരു വാക്ക് പറഞ്ഞിരുന്നെങ്കിൽ പണ്ടേ ഇതൊക്കെ ഞാൻ നിർത്തിയേനെ! എന്തുകൊണ്ടാണ് പറയാഞ്ഞതെന്ന് ചോദിച്ചപ്പോൾ ആറുവയസുകാരിയുടെ ചിരിയായിരുന്നു മറുപടി.

~ ചാരു