ഹൊറര്‍ സിനിമ

ഹൊറര്‍ സിനിമ എനിയ്ക്ക് എപ്പോഴും ഹരമായിരുന്നൂ... ( മലയാള സിനിമയില്‍ പോലും വരുന്ന വെട്ട് , കുത്ത് / വൈകാരിക സീനുകള്‍ കാണാന്‍ കരുത്തില്ലാതെ കണ്ണടച്ചിരിയ്ക്കുന്ന ലോലഹൃദയനാണെങ്കിലും ) ഡ്രാക്കുള , ദ മമ്മി റിട്ടേണ്‍സ് തുടങ്ങിയ സിനിമകളൊക്കെ കണ്ണടച്ചിരുന്ന് ഛെ.. കണ്ണ് തുറന്നുപിടിച്ചിരുന്നു ഇന്നും ഞാന്‍ കാണാറുണ്ട്.............
എന്റെ കുട്ടിക്കാലത്തെ വേനലവധികള്‍ മിക്കപ്പോഴും അമ്മയുടെ തൃക്കുന്നപ്പുഴയിലെ വീട്ടിലായിരിയ്ക്കും... അവിടെയാണ് എനിയ്ക്ക് കൂടുതല്‍ കളിക്കൂട്ടുകാര്‍ ഉള്ളതും...

അമ്മയുടെ കുടുംബത്തിലെ കൊച്ചുമക്കളില്‍ ആദ്യത്തെ ആള് ഞാനായത് കൊണ്ടും എല്ലാപേരുടേയും കണ്ണിലുണ്ണിയായതുകൊണ്ടും എനിയ്ക്ക് അത്യാവശ്യം സ്വാതന്ത്ര്യമൊക്കെ തന്നിരുന്നു.....

കൂട്ടുകാരുമായി കൂടിയാല്‍ പിന്നെ എന്നെ കണികാണാന്‍ പോലും ആര്‍ക്കും കിട്ടില്ലായിരുന്നൂ... കണ്ട മാവിലും പറങ്കിമാവിലും പ്ലാവിലുമൊക്കെ കേറി അങ്ങിനെ നടക്കും... ഉച്ചയൂണ് കഴിയ്ക്കുവാന്‍ പോലും മെനക്കെടാറില്ലായിരുന്നൂ...

അപ്പോഴൊക്കെ ഞങ്ങളുടെ വൈകിട്ടത്തെ പരിപാടി സിനിമ കാണാന്‍ പോകലാണ്...
അങ്ങിനെ ഒരു ദിവസം മഹാദേവികാട് ശ്രീകൃഷ്ണ തിയേറ്ററില്‍ ( ഇപ്പോള്‍ ആ തിയേറ്റര്‍ ഇല്ല, അതൊക്കെ പൊളിച്ച് അവിടെയിപ്പോള്‍ നൃത്ത വിദ്യാലയം നടത്തുകയാണെന്ന് തോന്നുന്നൂ ) ഡ്രാക്കുള സിനിമ പ്രദര്‍ശനം നടക്കുന്നു .. ഞങ്ങള്‍ കൂട്ടൂകാരെല്ലാം പോകാന്‍ പ്ലാന്‍ ചെയ്തു...

എനിയ്ക്ക് സ്വന്തമായി സൈക്കിള്‍ ഇല്ലാത്തതിനാല്‍ കൂട്ടകാരെ സോപ്പിട്ട് അവരുടെ സൈക്കിളില്‍ വേണം പോകാന്‍, അങ്ങിനെ അവന്മാരെ സോപ്പിടാനായി കൂട്ടുകാരന്‍ ഷാഫിയുടെ ബാപ്പായുടെ കടയില്‍ നിന്നും 20 പൈസയ്ക്ക് ഉണ്ടശര്‍ക്കരയും പച്ചകപ്പലണ്ടിയും വാങ്ങി ( ബാപ്പായ്ക്ക് എന്നോട് വലിയ സ്നേഹമാണ്, കപ്പലണ്ടിയും ഉണ്ടശര്‍ക്കരയും തരുന്നതിന് മുന്‍പ് എന്നെക്കൊണ്ട് പാട്ട് പാടിപ്പിച്ചിട്ടേ തരൂ..) കൂട്ടുകാരുമായി പോകും... പോകുന്നതിന് മുന്‍പ് എല്ലാപേരും നല്ല ബലമുള്ള കുറച്ച് നീളം കൂടിയ കമ്പ് കയ്യില്‍ കരുതും.... കാരണം തിരിച്ച് വരുമ്പോള്‍ പട്ടികളെ ഓടിയ്ക്കാനാണ് , മഹാദേവികാട് -തൃക്കുന്നപ്പുഴ റോഡില്‍ രാത്രിയില്‍ വലിയ പട്ടിശല്യമാണ്... ഇപ്പോഴും അതിന് വലിയ മാറ്റമൊന്നുമില്ല.. ഈ അടുത്തും എനിയ്ക്കൊരു പണികിട്ടി അത് ഞാന്‍ പിന്നീട് പറയാം...
അങ്ങിനെ ഞങ്ങള്‍ സിനിമ കാണാന്‍ പോയി... സിനിമ കണ്ട് തിരിച്ച് വന്നു... എല്ലാ കൂട്ടുകാരും തൃക്കുന്നപ്പുഴ ജംഗ്ഷന് അടുത്തുള്ളവരാണ് ...എല്ലാപേര്‍ക്കും സിനിമ കണ്ടതിന് ശേഷം നല്ല ധൈര്യമുള്ളതിനാല്‍ ആരും എന്നെ വീടുവരെ കൊണ്ടാക്കാന്‍ മെനക്കെട്ടില്ല...

കൈയ്യില്‍ വടിയുള്ള ഒരേയൊരു ധൈര്യത്തില്‍ ഞാന്‍ വീട്ടിലേക്ക് വിറയ്ക്കാതെ നടന്നൂ...( ചുമ്മാ ) വീടിന് കുറച്ച് മുന്‍പായി ഒരു തോടുണ്ട് ... കുറുകെ ഒരു തെങ്ങിന്‍ തടിപ്പാലവും.... അത് കടക്കുന്നതിന് മുന്‍പായി ഞാന്‍ വെറുതെയൊന്ന് പിന്നിലേക്ക് തിരിഞ്ഞ് നോക്കി.... വെറും....വെറുതെ...

ദാണ്ടെടാ .... അവിടെ .... പത്ത് പന്ത്രണ്ടടി പൊക്കത്തില്‍ ഒരു സാധനം... അത് അതിന്റെ വീതിയുള്ളതും നീളമുള്ളതുമായ കൈ കൊണ്ടെന്നെ മാടി വിളിയ്ക്കുന്നൂ... ഓ എനിയ്ക്ക് ചുമ്മാ തോന്നിയതായിരിയ്ക്കും.... രണ്ട് കണ്ണുകളും തിരുമ്മിതുറന്ന് ഒന്നും കൂടി നോക്കി ... ദേ പിന്നെയും അതെന്നെ വിളിയ്ക്കുന്നൂ..... എന്റെ മുട്ടുകള്‍ തമ്മില്‍ ശിങ്കാരി മേളം കൊട്ടി .... പുണ്യാഹം തളിച്ചോ....ന്നൊരു തംശയം...

കണ്ണടച്ച്തുറന്ന് ഒന്നും കൂടി നോക്കി .... ദേ പിന്നേം അത് വിളിയ്ക്കുന്നൂ.... ഒന്നും നോക്കിയില്ല ഇല്ലാത്ത ധൈര്യം എവിടുന്നോ കടം വാങ്ങി ... കൈയിലിരുന്ന വടികൊണ്ട് കറക്കി ഒരടിയും കാല് കൊണ്ടൊരു തൊഴിയും കൊടുത്ത് പറന്ന് ചന്ദ്രനില്‍ പോയ ജീവന്‍ ചാടിപിടിച്ച് ആ തെങ്ങിന്‍ തടി പാലത്തിലൂടെ ഞാന്‍ വീട്ടിലേക്ക് പറന്നൂ......

വീട്ടില്‍ ചെന്നപാടെ ... പായയിലേക്ക് വീണ് ഞാന്‍ തളര്‍ന്നുറങ്ങി....

രാവിലെ തന്നെ അപ്പന്റെ ( അമ്മയുടെ അച്ഛന്റെ അനുജന്‍ ) വര്‍ത്തമാനം കേട്ടാണ് ഞാന്‍ ഉണര്‍ന്നത്.. എന്താണെന്നറിയാന്‍ കാത് കൂര്‍പ്പിച്ചു.... '' ഏത് കഴ്വര്‍ടാ മോനാണെന്നറിയില്ല .... കയ്യില്‍ കിട്ടിയാലവന്റെ എല്ലു ഞാനൂരും... കുലച്ചു നിന്ന എന്റെ ഏത്തവാഴയാ മഹാപാപി ചവിട്ടി ഒടിച്ചത്....''

പുതപ്പ് വലിച്ച് തലവഴി മൂടി ഞാൻ മിണ്ടാതങ്ങനെ കിടന്നു ....

Mind it :- വാഴ ചവിട്ടി ഒടിച്ചത് ഞാനാണെന്ന് ഇത് എഴുതും വരെ അപ്പനറിയില്ല........... ഇതിന് ശേഷം എനിക്ക് എന്ത് സംഭവിച്ചാലും ഉത്തരവാദികൾ ഇത് വായിച്ചവർ മാത്രമായിരിക്കും........

ഫഹദ് ലവ്ഷോർ.........