എന്നെ തോൽപ്പിക്കുന്ന ആലുപറാട്ട

എന്നെ തോൽപ്പിക്കുന്ന ആലുപറാട്ട 
---------------------------------------------------------
ചണ്ഡീഗഡിൽ വന്നകാലത്തൊരു ഞായറാഴ്ച ദിവസം പള്ളിയിൽ പോയി മടങ്ങുന്ന വഴിയാണ് ഞാൻ ആദ്യമായി ആലുപറാട്ട കഴിക്കുന്നത്... പഞ്ചാബികളുടെ, ഒരു പക്ഷെ ഉത്തരേന്ത്യക്കാരുടെ ആകമാനം ഇഷ്ട പ്രഭാതഭക്ഷണം.. കൂടെയുണ്ടായിരുന്ന സഹപ്രവർത്തകർ ആലുപറാട്ട കഴിക്കാമെന്ന് പറഞ്ഞപ്പോൾ മറ്റൊന്നുമാലോചിച്ചില്ല...'നാനാക്ക് സ്വീറ്റ്‌സ് ' എന്ന കടയിൽ കയറി രണ്ട് ആലുപറാട്ട പോരട്ടേന്ന് പറഞ്ഞു കാത്തിരിക്കുമ്പോ കട മൊത്തത്തിൽ ഒന്നു വീക്ഷിച്ചു.. കടയുടെ ഒരുവശത്ത് ഒരറ്റം മുതൽ മറ്റേയറ്റം വരെ നീണ്ട ചില്ലലമാരയിൽ പ്രദർശിപ്പിച്ചിരിക്കുന്ന നാനാ വർണ്ണങ്ങളിലും വലിപ്പങ്ങളിലുമുള്ള പലഹാരങ്ങൾ.. മധുരമുള്ളവ.. ഉപ്പും എരിവും പുളിയുമുള്ളവ... പലതരം ബർഫികൾ, ലഡ്ഡു വെറൈറ്റികൾ, ഗുലാബ് ജാമൂൻ, രസ്‌ ഗുള, രസ്‌ മലായ്, വിവിധയിനം പക്കോഡകൾ, പാൽ പേട, പനീർ കൊണ്ടുള്ള പലഹാരങ്ങൾ, സമൂസ, ആലൂ ടിക്കി,വിവിധയിനം കേക്കുകളും പേസ്ട്രികളും, ഐസ് ക്രീം എന്നു വേണ്ട മുഴുവൻ പഞ്ചാബി പലഹാരങ്ങളും അവിടെയുണ്ട്‌... വിത്ത്‌ ലേബൽ ആൻഡ്‌ പ്രൈസ് .. !! നെയ്യ് കൂടുതലായി ചേർക്കുന്നത് കൊണ്ടാവും മധുരപലഹാരങ്ങൾക്കൊക്കെ നല്ല വിലയാണ്... നംകീൻ (എരിവും പുളിയുമുള്ള ഐറ്റംസ് ) താരതമ്യേന വിലക്കുറവിൽ കിട്ടും... അങ്ങനെ കടമൊത്തത്തിലൊന്ന് അവലോകനം ചെയ്തു വെള്ളമിറക്കിയിരിക്കുമ്പോഴേക്കും ആലൂ പറാട്ടയെത്തി.. 
പരന്ന വലിയ സ്റ്റീൽ പാത്രത്തിൽ നിറഞ്ഞു കിടക്കുന്ന ആവി പറക്കുന്ന പറാട്ട ! അതിനു മുകളിൽ ചൂടുതട്ടി അലിഞ്ഞു തുടങ്ങുന്ന ചതുരാകൃതിയുള്ള ഒരു കഷണം ബട്ടർ.. കൂട്ടത്തിൽ രണ്ടു ബൗളുകളിലായി തൈരും കിഴങ്ങുകൊണ്ടുള്ള സബ്ജിയും..കൂട്ടിനു കൊതിപ്പിക്കുന്ന ഗന്ധവും. . പ്രഥമ ദർശനത്തിൽ തന്നെ ആലു പറാട്ട എന്റെ ഹൃദയം കീഴടക്കിയെന്നു പറഞ്ഞാൽ മതിയല്ലോ.. കപ്പലോടിക്കാൻ പാകത്തില് വായിൽ നിറഞ്ഞ കൊതിവെള്ളം കുടിച്ചിറക്കി, വർദ്ധിച്ച ആക്രാന്തത്തോടെ ആലുപറാട്ടയെ കഷണം കഷണമായി അകത്താക്കുമ്പോ എനിക്കാസത്യം മനസ്സിലായി... ഇതൊന്നുകൊണ്ടൊന്നും എന്റെ ആക്രാന്തം തീരില്ലെന്ന സത്യം..! ആദ്യത്തെ പറാട്ട കഴിച്ചു പകുതിയായപ്പോ തന്നെ രണ്ടാമത്തേതിന് ഓർഡർ കൊടുത്തു വിജയകരമായി കഴിച്ചു മുന്നേറുന്നതിനിടയിൽ എന്താണീ സംഭവത്തിന്റെ ഇൻഗ്രീഡിയന്റ്‌സ് എന്നറിയാൻ ഞാനൊരു ശ്രമം നടത്തി.. ചപ്പാത്തിയുടേതുപോലെ മൊരിഞ്ഞ ഗോതമ്പുമാവുകൊണ്ടുള്ള പുറംതോടിനുള്ളിൽ വേവിച്ച ഉരുളക്കിഴങ്ങും ചെറുതായി കൊത്തിയരിഞ്ഞ സവാളയും പച്ചമുളകും മല്ലിയിലയും ജീരകവും പിന്നെ ഏതോ മസാലകളുമൊക്കെങ്ങനെ പേസ്റ്റ് രൂപത്തിൽ പരസ്പരധാരണയോടെയെന്നോണം ചേർന്നിരിപ്പുണ്ട്.. ചപ്പാത്തിയെക്കാൾ കനമുണ്ടെങ്കിലും നല്ല മയം.. കഴിക്കുമ്പോൾ വായിൽ രുചിയുടെ ഉത്സവം.. ! 
വയറും മനസ്സും നിറയെ കഴിച്ച ശേഷം ബില്ലു കൊടുക്കാൻ കടയുടെ മുൻപിൽ നിൽക്കുമ്പോൾ പറാട്ടയുണ്ടാക്കുന്നത് നേരിൽ കാണാനിടയായി.. അപ്പോഴാണ് ഒരു കാര്യം ശ്രദ്ധയിൽ പെട്ടത്.. ആലു മാത്രമല്ല.. പലതരം വെജിറ്റബ്ൾസ് സ്റ്റഫ് ചെയ്ത പറാട്ടകളും അവിടെ ഉണ്ടാക്കുന്നുണ്ട്... സവാളക്കൂട്ടുകൊണ്ടുള്ള പ്യാജ് പാറാട്ട, പനീർ ചേർത്ത പനീർ പാറാട്ട, കോളിഫ്ലവർ സ്റ്റഫ് ചെയ്ത ഗോബി പറാട്ട, റാഡിഷ് അകത്തു വച്ചുള്ള മൂലി പറാട്ട, ഒരു സ്റ്റഫിങ്ങും ഇല്ലാത്ത പ്ലെയിൻ പറാട്ട, ഒരുപാട് പച്ചക്കറികൾ കൊണ്ടുണ്ടാക്കിയ മിക്സ് വെജ് പാറാട്ട അങ്ങനെ നീളുന്ന പറാട്ട വെറൈറ്റികൾ കണ്ടെന്റെ കണ്ണുതള്ളിപ്പോയി.. 
കടയുടെ മുൻപിലുള്ള ചെറിയ അടുക്കള സെറ്റപ്പിൽ മെലിഞ്ഞു വെളുത്തൊരു ബനിയൻകാരൻ ഭയ്യാ എണ്ണയിട്ട യന്ത്രം പോലെ പറാട്ടയുണ്ടാക്കി തള്ളുകയാണ്..ഏതായാലും നമ്മുടെ നാട്ടിലെ പൊറോട്ടാ മേക്കറുടെയത്ര തലക്കനം ഇങ്ങേർക്കില്ല കേട്ടോ.. വലിയൊരു സ്റ്റീൽ ബക്കറ്റിൽ തയ്യാറാക്കിവച്ചിരിക്കുന്ന ആട്ട എണ്ണപുരട്ടി ഉരുട്ടി പിന്നെ അൽപ്പം പരത്തിയ ശേഷം സ്റ്റഫ് ചെയ്യാനുള്ള കൂട്ട് ചെറിയ ഉരുളയാക്കി അതിനു മുകളിൽ വച്ചു കവർ ചെയ്തൊരു വലിയ ഉരുളയുണ്ടാക്കി കൈവഴക്കത്തോടെ പരത്തി ചുട്ടുപഴുത്തു നിൽക്കുന്ന വലിയ തവയിൽ പുരട്ടിയ എണ്ണയിൽ തിരിച്ചും മറിച്ചുമിട്ട് മൊരിയിച്ചെടുക്കുമ്പോ ആവി പറക്കുന്ന രസികൻ പറാട്ട ജനിക്കുകയായി.. കാണാൻ എത്ര രസമുള്ള കാഴ്ച.. പക്ഷെ നമ്മൾ ഉണ്ടാക്കാൻ ശ്രമിച്ചാൽ കാര്യങ്ങൾ അത്ര എളുപ്പമല്ലാട്ടോ.. 
കഴിച്ചു രസം പിടിച്ച ഞാൻ ആലു പാറാട്ട ഉണ്ടാക്കാൻ കച്ചകെട്ടിയിറങ്ങിയിട്ടിപ്പോ വർഷം നാലഞ്ചു കഴിഞ്ഞെങ്കിലും സംഭവം ഇതുവരെ എന്റെ വരുതിക്ക് വന്നിട്ടില്ലത് എന്റെ സ്വകാര്യ ദുഃഖം... ഒന്നുകിൽ മാവു കട്ടികൂടി അറക്കവാൾ കൊണ്ട്‌ മുറിക്കേണ്ടയവസ്ഥ...! അല്ലെങ്കിൽ സ്റ്റഫ് ചെയ്ത സാധനങ്ങൾ മുഴുവനും പുറത്തു ചാടി ചപ്പാത്തിപലകയിൽ പറ്റി ആകെ ചളിപിളി.. ! എന്നാലും ഇപ്പോഴും ഞാൻ തോറ്റു പിന്മാറിയിട്ടില്ല... അല്ലെങ്കിലും ഇഷ്ടപ്പെട്ട ആഹാരം കഴിക്കണമെങ്കിൽ അതുണ്ടാക്കാൻ അറിയണമെന്ന് നിയമം ഒന്നുമില്ലല്ലോ... സാധ്യമായ എല്ലാ അവസരങ്ങളിലും ആലു പാറാട്ട കഴിച്ചു കൊണ്ടും സമയം ഉള്ളപ്പോഴെല്ലാം അതുണ്ടാക്കാൻ ശ്രമിച്ചു ദയനീയപരാജയം ഏറ്റുവാങ്ങിക്കൊണ്ടും ഞാൻ എന്റെ പഞ്ചാബ്‌ പ്രവാസം തുടരുകയാണ്... രുചിയും മണവും മയവുമുള്ള, ആവി പറക്കുന്ന ആലുപറാട്ട സ്വന്തം കൈകൊണ്ടുണ്ടാക്കി വയറുനിറയെ കഴിക്കുന്ന ദിവസത്തിന്റെ സുന്ദരമായ സായാഹ്നവും സ്വപ്നം കണ്ട്‌...

Anju