മാളൂട്ടി..

മാളൂട്ടി..
*******
"സാർ... എനിക്ക് കുറച്ചു ദിവസത്തേക്ക്‌ ലീവ്‌ വേണം" നീട്ടിപ്പിടിച്ച ലീവ് ആപ്ലിക്കേഷനുമായി അഫ്സൽ മുമ്പിൽ നിൽക്കുകയാണ്

"എന്തുപറ്റി അഫ്സലേ....ഇപ്പോൾ പെട്ടന്നൊരു ലീവ് " ആപ്ലിക്കേഷൻ വാങ്ങിക്കൊണ്ട് ഞാൻ ചോദിച്ചു
"സാർ, വൈഫ് ഹോസ്പിറ്റലിലാണ് ഡെലിവറി അടുത്തിട്ടുണ്ട്. ഇന്നുകാലത്താണ് ഹോസ്പിറ്റലിൽ അഡ്മിറ്റ്ചെയ്തത് "

അഫ്സലിന്റെ മുഖത്തെ ഭീതിയും ഉൽക്കണ്ഠയും വായിച്ചെടുത്ത ഞാൻ തനിക്ക് അഭിമുഖമായി ഇട്ടിട്ടുള്ള കസേരയിൽ ഇരിക്കാൻ പറഞ്ഞു

ആപ്ലിക്കേഷനിൽ സൈൻ ചെയ്ത് ലീവിനു വേണ്ടകാര്യങ്ങളൊക്കെ ശരിയാക്കുന്നതിനിടെ കാര്യങ്ങളൊക്കെ ചോദിച്ചു മനസ്സിലാക്കിയപ്പോൾ അയാൾ ഓരോന്നായി പറയാൻ തുടങ്ങി.

അയാളുടെ ജീവിതം എത്തിനിൽക്കുന്ന വഴികൾ പുതുമയും അതിലേറെ വിഷമങ്ങളും നിറഞ്ഞതായിരുന്നുവെന്ന് എനിക്കുതോന്നി
അയാൾ മനസ്സ് തുറന്നു...

"സാർ പതിവിലും നേരത്തെയാണ് അന്ന് ഞാൻ ഓഫീസിൽനിന്നും ഇറങ്ങിയത് എന്റെ മാളൂട്ടിയുടെ ജന്മദിനമായിരുന്നു മാളൂട്ടി എന്റെ ഭാര്യയാണ് ഞാൻ സ്നേഹക്കൂടുതൽകൊണ്ടാ അങ്ങിനെ വിളിക്കുന്നത് കൊച്ചുകുട്ടികളെപ്പോലെ കോരിയെടുത്ത് "മാളൂട്ടി..." എന്നുവിളിക്കുമ്പോൾ ആ മുഖത്തുള്ള സന്തോഷം ഒന്നു കാണേണ്ട കാഴ്ചതന്നെയാണ്"

"നേരെ മലബാർ ജ്വല്ലറിയുടെ മലപ്പുറത്തുള്ള ബ്രാഞ്ചിൽകയറി, വെട്ടിത്തിളങ്ങുന്ന സ്വർണ്ണക്കാഴ്ചകളിൽ നിന്നും
22 കാരറ്റ് സ്വർണ്ണത്തിൽ നിർമിച്ച,
കൂട്ടത്തിൽ ഭംഗിയുള്ള ഒരുനെക്ലസ് വാങ്ങി, വർണ്ണകവറിൽ പേക്കുചെയ്തു കയ്യിൽവെച്ചു. അവൾക്കൊരു സർപ്രൈസ് ആവട്ടേയെന്നുകരുതി"

"ജന്മദിനത്തെ കുറിച്ച് അവൾ കാലത്ത് ഓർമ്മപ്പെടുത്തിയിരുന്നില്ലങ്കിലും മനസ്സിൽ സ്‌നേഹം കൊണ്ടെഴുതിച്ചേർത്ത ആ ദിവസം തെളിഞ്ഞുവന്നിരുന്നു"

"ബൈക്ക് നിർത്തി കോളിംഗ് ബെല്ലടിച്ചു. നിറ പുഞ്ചിരിയോടെ അവൾ വാതിൽ തുറന്നെങ്കിലും പതിവിലും നേരത്തെയുള്ള എന്റെ വരവ് പ്രതീക്ഷിക്കാതെ എന്ത് ചെയ്യണമെന്നറിയാതെ പരുങ്ങി"

പതിവായി എന്നെ കാത്തിരിക്കാറുള്ള അവളിലിൽ പല പുതുമയും കാണാറുണ്ട്..

ഭംഗിയായി വസ്ത്രം ധരിച്ചു മുടിചീകിയൊതുക്കി സുഗന്ധം പൂശി പുഞ്ചിരിതൂകി സ്വീകരിക്കുമ്പോൾ എല്ലാ പ്രയാസങ്ങളും ഇല്ലാതാകുന്നതുപോലെ തോന്നിയിട്ടുണ്ട്

ഇന്നും എന്റെ മാളൂട്ടി എന്നെസ്വീകരിക്കാനുള്ള ഒരുക്കത്തിലായിരുന്നെന്ന് ഒറ്റനോട്ടത്തോൽ അറിയാം. മുഖത്ത് പലയിടങ്ങളിലായി മിനുസപ്പെടുത്താതെ കിടക്കുന്ന ടാൽക്കം പൗഡറും വരച്ചു പൂർത്തീകരിക്കാതെ കയ്യിൽപിടിച്ച ഐ ലൈനറും കാണാമായിരുന്നു.

ചേർത്തുപിടിച്ചു ഒരു ഉമ്മ കൊടുക്കാൻ ശ്രമിക്കവേ അവൾ കുതറിമാറി

"ഇക്കാ ഒരുമിനിറ്റ് ഞാൻ റെഡിയായിട്ടുവരാം"
"ഇങ്ങ് അടുത്തുവാ ഇത്രയൊക്കെ ഒരുങ്ങിയാൽ മതി"
അവളെചേർത്തുപിടിച്ചു മാറോടടുപ്പിച്ചു നെറ്റിയിൽ ചുംബിച്ചു
അതിനിടെ കരുതിവെച്ചിരുന്ന നെക്‌ലസ്‌ എടുത്തു അവളുടെകഴുത്തിൽ അണിഞ്ഞു

ആ മുഖത്തുണ്ടായിരുന്നു സന്തോഷമൊന്നു കാണേണ്ടതുതന്നെ!! എന്നെ ചേർത്തുപിടിച്ചു തുരുതുരാ ഉമ്മവെച്ചുകൊണ്ടവൾ പറയാ
"ഇക്കാ... ഈ സ്വർണ്ണത്തിലല്ല എന്റെ സന്തോഷം എന്നെ ഓർത്തതിനും പരിഗണിച്ചതിനുമാണ്"

നെക്ലേസ് അണിഞ്ഞ മാളൂട്ടി നേരെ കണ്ണാടിയുടെ മുമ്പിലേക്ക് എന്നെയും വലിച്ചു കൊണ്ടുപോയി. എന്റെ കരങ്ങൾ കവർന്നുകൊണ്ട്തന്നെ അതിന്റെ ഭംഗി ആസ്വദിക്കുകയാണ്

"ഞാൻ അവളുടെ കഴുത്തിലൂടെ
എന്റെ വിരലോടിച്ചു. തൊണ്ടയുടെ ഭാഗത്ത് ചെറുതായി തടിച്ചപോലെ! ഒന്നുകൂടെ ഉറപ്പുവരുത്താൻ സൂക്ഷ്മമായി നിരീക്ഷിച്ചു ശരിയാണ് ഒരല്പം വീങ്ങിയിട്ടുണ്ട്"

"അവളോട് അതിനെ കുറിച്ച് പറഞ്ഞപ്പോഴാണ് അവളും ശ്രദ്ദിക്കാൻ തുടങ്ങിയത് തൈറോയിഡ് പ്രോബ്ളമാണെന്ന് നിരീക്ഷണത്തിൽ മനസ്സിലായി ഡോക്ടറെ കാണാൻ തീരുമാനിച്ചു"

"രാവിലെ ഞങ്ങളുടെ കുടുംബ ഡോക്ടറെ കണ്ടു അദ്ദേഹത്തിന്റെ അഭിപ്രായത്തിൽ തൈറോയ്ഡ് ഗ്രന്ധിക്കുള്ള വീക്കമാണ് ഉമിനീരിറക്കാൻ പറഞ്ഞു. ചില പരീക്ഷണങ്ങൾ നടത്തി. കൈവിരലുകൾ നിവർത്തിപ്പിടിച്ചു അവ താഴ്ന്നുപോകുന്നുണ്ടോ എന്നുനോക്കി... അവസാനം Eltroxin100 കുറിച്ച്തന്നു അതൊരാഴ്ച കഴിക്കാനും പിന്നെ ഒരു പ്രഥമ പരിശോധന എന്നനിലയിൽ എഫ് എൻ എ സി ചെയ്യാനും നിർദ്ദേശിച്ചു"

എഫ് ആൻ എ സി റിസൾട് എന്നെവല്ലാതെ ഞെട്ടിച്ചുകളഞ്ഞു "സി എ തൈറോയിഡ് "
എന്നിൽ പടർന്ന ഭീതികണ്ടിട്ടാവാം പുറത്ത് തട്ടി ഡോക്ടർ പറഞ്ഞു "പേടിക്കാനൊന്നുമില്ല തൈറോയിഡ് കാൻസർ പെട്ടന്ന് സുഖപ്പെടുത്താൻ പറ്റുന്നതും ഫലപ്രദമായ ചികിത്സ ലഭിക്കുന്നതുമാണ് "

തിരുവനന്തപുരം ആർ സി സി യിൽ ന്യൂക്ലിയർ മെഡിസിൻ ഡിപ്പാർട്മെന്റിൽ ഡോക്ടർ പ്രദീപ്ന്റെ മുന്നിൽ നിൽക്കുമ്പോഴും തനിക്കുവന്ന രോഗത്തെ കുറിച്ച് അവൾ അറിഞ്ഞിരുന്നില്ല മനപ്പൂർവം അറിയിക്കാതിരുന്നതാ.. രോഗത്തെക്കാൾ വലുതാണ് അതിനെക്കുറിച്ചുള്ള പേടി പിന്നെ സമൂഹത്തിന്റെ പേടിപ്പെടുത്തുന്ന കഥകളും

"ആരെയും അറിയിക്കാതെയാണ് അവിടെ എത്തിയത് ടൂറെന്നു പറഞ്ഞപ്പോൾ ആരും കുത്തിക്കുത്തിച്ചോദിക്കാനും വന്നില്ല"

റേഡിയോ അയോഡിൻ നൽകി സ്കാനിങ് ചെയ്ത ശേഷം ഡോക്റ്റർ എന്നെവിളിച്ചു
"തുടക്കമാണ് പേടിക്കാനൊന്നുമില്ല ഇവിടെ മൂന്നുദിവസം അഡ്മിറ്റ് ചെയ്ത് ഉയർന്ന അളവിൽ റേഡിയോ അയഡിൻ കൊടുത്താൽ തീർച്ചയായും മാറും"

അന്നുതന്നെ അവിടെ അഡ്മിറ്റുചെയ്തു ഐസോലേഷൻ വാർഡിൽ കിടന്നു റേഡിയോ അയോഡിൻ കഴിച്ചു.

മൂന്നാം നാൾ പുറത്തുവന്നപ്പോൾ അവളുടെ മുഖം വളരെ സന്തോഷത്തിലായിരുന്നു കയ്യിൽ പിടിച്ചിരുന്ന റിസൽറ്റുനോക്കി അവൾ പറയാ
"ഇക്ക എന്നിൽനിന്ന് മറച്ചുവെങ്കിലും എല്ലാം ഞാൻ മനസ്സിലാക്കിയിട്ടുണ്ട് . ഇക്ക എനിക്കുവേണ്ടി കുറേ കഷ്ടപ്പെട്ടു അല്ലേ..?

കൂടെ ഉണ്ടായിരുന്ന രോഗിയിൽ നിന്ന് എല്ലാം
മനസ്സിലാക്കിയ അവളുടെ കണ്ണുനിറഞ്ഞു.
അവളുടെ കയ്യിൽനിന്നും റിസൽറ്റുവാങ്ങി വായിച്ചു "നോർമൽ" സന്തോഷം കാരണം അവിടെവവച്ചുതന്നെ അവളെ വാരിപ്പുണർന്നു ഉമ്മവെച്ചു ചുറ്റുമുള്ളതൊന്നും അപ്പോൾ ഞാൻ കാണുന്നുണ്ടായിരുന്നില്ല!

പിന്നെ ഇടക്കൊക്കെ ഡോക്ടറെ കാണും തൈറോയിഡ് പരിശോധയും രക്തത്തിലെ ടി എച് എസ്‌ ഉം നോക്കും എപ്പോഴും നോർമ്മലായിരുന്നു..

റേഡിയോ അയഡിൻ കഴിച്ചുള്ള പരിശോധന സമയത്തും അതിനുശേഷം ആറുമാസവും ഗർഭിണിയാവരുതെന്ന ഡോക്ടറുടെ നിർദ്ദേശമുണ്ടായിരുന്നു...

രണ്ടുവർഷത്തിനു ശേഷമാണ് ഇപ്പോൾ അവൾ ഗർഭിണിയായായത്. എല്ലാം മറന്ന് ഒരു നവ സ്വപ്നലോകം യാഥാർഥ്യമായികാണാനുള്ള തയ്യാറെടുപ്പിലാണവൾ...

എല്ലാം കേട്ട
എന്റെ മനസ്സ് സന്തോഷിച്ചു അഫ്സലിന്റെ
കഥ കേൾക്കുന്നതിനിടയിലും ഞാൻ അവനുവേണ്ടി ടിക്കെറ്റ് ബുക്കുചെയ്യുകയായിരുന്നു

"ഇതാ അഫ്സൽ ടിക്കറ്റ് ഇപ്പോൾ തന്നെ പുറപ്പെട്ടോളൂ എല്ലാം ഞാൻ ശരിയാക്കിയിട്ടുണ്ട് " എന്റെ കൈപിടിച്ചു ഒരുപാട് നന്ദിപറഞ്ഞു അഫ്സൽ ഇറങ്ങി.

ഇ-ഗേറ്റുവഴി ബോർഡിങ്
ചെയ്യാൻ പാസ്‌പോർട്ടിന്റെ ഫസ്റ്റ് പേജ് മറിക്കുമ്പോൾ ഫോൺ റിങ്‌ചെയ്യുന്നുണ്ടായിരുന്നു ഫോണെടുത്തു ചെവിയോട് ചേർത്തുവെച്ചു
"മ്മോനെ...മാളൂട്ടി പ്രസവിച്ചു ആൺകുഞ്ഞാ... നീ എപ്പളാ വര്ആ.."
ഉമ്മയുടെ ശബ്ദം
"ഇതാ ഞാൻ പുറപ്പെട്ടു ഉമ്മാ.."

പാസ്പോർട്ട് എടുത്ത് ഇ-ഗെയ്റ്റിൽ അമർത്തി ഗേറ്റുകടക്കുന്നതിനിടയിലും അയാളുടെ മനസ്സ് തന്റെ മാളൂട്ടിയുടെ അരികിലേക്ക് പറന്നുയരുകയായിരുന്നു...
ഒരു റോക്കറ്റിനേക്കാളും വേഗതയിൽ അത് കുതിക്കുന്നുണ്ടായിരുന്നു...

അബ്ദുൾ ഗഫൂർ