ലവ് ലെറ്റർ

ലവ് ലെറ്റർ
__________

(Take from someone's life )

ഞാൻ ഹൈസ്ക്കൂളിൽ പഠിക്കുമ്പോഴാണ് ആദ്യമായി പ്രണയമെന്നുളളിൽ മൊട്ടിട്ടത്. പ്രണയമാണെന്ന് പറയാനാവുമോന്നറിയില്ല. ഒരു പെണ്ണിനേയും നോക്കാത്ത ഞാനാണല്ല എന്ന് കൂട്ടുക്കാര് പറഞ്ഞ് കളിയാക്കിയപ്പോൾ, വാശിയ്ക്ക് പ്രേമിച്ചതാണ് അവളെ. അന്ന് കൂട്ടുകാരുമായി വഴക്കിട്ടപ്പോൾ ക്ലാസിന് മുന്നിൽ കൂടെ ആദ്യം പോകുന്ന പെണ്ണിനെ വളയ്ക്കുമെന്ന് ബെറ്റ് വച്ചു. എന്റെ ഭാഗ്യത്തിന് പ്രായത്തിന് മൂത്തവരും ടീച്ചേഴ്സും പോയില്ല അതുവഴി. പോയത് സുന്ദരിയായ ഒരു യു പി യിൽ പഠിക്കുന്ന ഒരു കൊച്ച്. ഒരാഴ്ച മുഴുവൻ അവളെ നിരീക്ഷിച്ചു. നല്ല കുട്ടിയാണ്. എനിക്ക് പെരുത്തിഷ്ടായി.

ഞാൻ പറയുന്നതിന് മുൻപേ അവൾ എന്റെ ഇഷ്ടം കണ്ടുപിടിച്ചു. ഇൻട്രവെൽ സമയത്ത് അവൾ എന്നോട് വന്ന് ചോദിച്ചു.

"എന്തിനാ ചേട്ടാ, എന്റെ പിന്നാലെ നടക്കുന്നത്?"

ഇഷ്ടമായതുകൊണ്ടാണെന്ന് ആവേശം മൂത്തറിയാതെ പറഞ്ഞുപോയി ഞാൻ. സത്യത്തിൽ തിളങ്ങുന്ന കണ്ണുകളും ആ പാൽ പുഞ്ചിരിയും എന്നെ ഹിപ്നോട്ടസ് ചെയ്തതാണ്. അതോടെ എന്റെ കണ്ടകശനി തുടങ്ങി. സ്കൂളിൽ സൽപ്പേര് രാമൻകുട്ടിയായ ഞാൻ ഒറ്റയടിക്ക് വിലയില്ലാത്ത 50 പൈസയായി. തൊട്ടതിനും പിടിച്ചതിനുമെല്ലാം ചുമ്മ പരാതി കൊടുത്തു അവൾ. എന്റെ തലവെട്ടം കണ്ടാൽ അപ്പോ പറയും, ഞാൻ വായിനോക്കി എന്ന്. ഒരു വർഷമായപ്പോൾ എനിക്ക് മടുത്തു, ദിവസം ടീച്ചേഴ്സിന്റെ വായിൽ വഴക്ക് കേട്ട്. ഞാൻ ശ്രദ്ധിക്കാതെയായപ്പോൾ അവളുടെ ശിങ്കിടി വന്ന് ചോദിച്ചു.

"അവളെ ഇഷ്ടമല്ലേ ചേട്ടാ?"

ഞാൻ പറഞ്ഞു.

"എനിക്കൊരു ഒരു ഭൂതനേയും ഇഷ്ടമല്ലെന്ന്"

പറഞ്ഞത്ര എളുപ്പമായിരുന്നില്ല അവളെ മറക്കാൻ. ഞാനൊരു മിഡിൽ ബെഞ്ചറാണ്. അവളാണെങ്കിൽ കട്ട ബുജിയും. മുടങ്ങാതെ എന്നും ക്ലാസിലും വരും. പഠിപ്പിയാണെന്ന് അറിഞ്ഞപ്പോൾ വിടാമെന്ന് കരുതിയതാ. പക്ഷേ പറ്റിയില്ല എന്നെക്കൊണ്ട്. ഇഷ്ടമല്ലെന്ന് പറഞ്ഞിട്ടും അവളറിയാതെ നോക്കാൻ തുടങ്ങി ഞാൻ. വാശിയ്ക്കാണ് സ്നേഹിച്ച് തുടങ്ങിയതെങ്കിലും അവളോടുളള സ്നേഹമെന്റെ അസ്ഥിയ്ക്ക് ഇതിനോടകം പിടിച്ചിരുന്നു.

3 വർഷം ഞാനവളുടെ പിന്നിലെ നടന്നു ഒരു നിഴലായി. പക്ഷേ അവളെന്നെ ഗൗനിച്ചത് പോലുമില്ല. ഞാനുളളത് കൊണ്ട് സ്കൂളിലാരും അവളെ ശല്യപ്പെടുത്തിയിരുന്നില്ല. അവൾക്ക് ആൺസുഹൃത്തുകളും പെൺസുഹൃത്തുക്കളും ഒരുപോലെയുണ്ടായിരുന്നു. അവളുടെ ആൺക്കുട്ടികളുമായുളള കൂട്ടുക്കെട്ട് തീരെ ഇഷ്ടമല്ലായിരുന്നു. ഒരുപക്ഷേ അതെന്റെ സ്വാർത്ഥതയും കുശുമ്പുമായിരിക്കാം. 3 വർഷം കഴിഞ്ഞപ്പോൾ ഞാനാസ്സ്ക്കൂളിൽ നിന്ന് പഠിച്ചിറങ്ങി. സ്കൂളിലെ അവസാന ദിവസം ഞാനവളോട് കൂട്ടുകാരുടെ മുന്നിൽ വച്ച് ചോദിച്ചു

"എന്നെ ഇഷ്ടമാണോ ഇപ്പോഴെങ്കിലും?"

"അല്ല."

ഇത് പറഞ്ഞ് അവളോടി പോയി, മുഖത്ത് പോലും നോക്കാതെ. അവിടെ നിന്ന് ഇറങ്ങിയ ശേഷമാണ് എനിക്കവളോടുളള സ്നേഹത്തിന്റെ ആഴം മനസിലായത്. ഒന്ന് കാണാതെയും മിണ്ടാതെയും വർഷങ്ങൾ കടന്നു പോയി.

ഇന്ന് എന്റെ കുഞ്ഞിന് പാൽ കൊടുത്തു കൊണ്ട് അവളെന്റെ അടുത്ത് കിടക്കുമ്പോൾ എന്താ ഞാൻ പറയുക? എങ്ങനെ പ്രകടിപ്പിക്കും എന്റെ സന്തോഷം?

"ഡീ പാറൂ.... സ്കൂളിൽ വച്ച് എന്താ നീ എന്നെ സ്നേഹിക്കാതെ ഇരുന്നത്. അപ്പോഴേ സ്നേഹിച്ചിരുന്നെങ്കിൽ എത്ര വർഷം നമുക്ക് പ്രേമിച്ചു തകർക്കാമായിരുന്നു."

"ആര് പറഞ്ഞു സ്നേഹിച്ചില്ലായിരുന്നെന്ന്? ആദ്യമൊന്നും ഇഷ്ടമല്ലായിരുന്നു. പിന്നെ ഇഷ്ടായി. അതുകൊണ്ടല്ലേ ഇത്രയും കാലം കാത്തിരുന്നത്, ആർക്കും പിടി കൊടുക്കാതെ! എനിക്കറിയാമായിരുന്നു ഏട്ടൻ വന്ന് കല്ല്യാണമാലോചിച്ചിക്കുമെന്ന്."

"ഓഹോ! നുണ പറയാതെ. ഞാൻ വന്നാലോചിച്ചതുകൊണ്ടല്ലേ നീയിപ്പോൾ ഇങ്ങനെ പറഞ്ഞത്? "

"അല്ല. എനിക്ക് ഉറപ്പുണ്ടായിരുന്നു ഏട്ടൻ വരുമെന്ന്. സ്ക്കൂളിൽ വച്ചത്രയും ദ്രോഹിച്ചിട്ടും,വെറുക്കാതെ വീണ്ടും സ്നേഹിച്ചപ്പോൾ മനസ്സിലായി എന്നെ വിട്ട് പോകില്ല എന്ന്."

"ഇഷ്ടമുണ്ടെങ്കിൽ പറഞ്ഞൂടായിരുന്നോ?"

"നല്ല കഥയായി! എന്നിട്ട് വേണം ഏട്ടനത് ഫ്ലാഷാക്കാൻ. സ്കൂളിലെ എന്റെ ഇമേജ് പോകില്ലേ? പിന്നെ രഹസ്യമായി പറയാൻ ഏട്ടനെ തനിച്ച് കിട്ടില്ലല്ലോ? അതുകൊണ്ടല്ലേ ഞാൻ ലവ് ലെറ്റർ തന്നത്?"

"ലവ് ലെറ്ററോ? എപ്പോ? "

"അപ്പോ ഏട്ടന് അത് കിട്ടിയില്ലേ? എന്റെ പേനയില്ലേ, അതിൽ നമ്മൾ പേര് പേപ്പറിൽ എഴുതി റീഫില്ലിന്റെ കൂടെ ഇടില്ലേ മാറി പോകാതെയിരിക്കാൻ. ഞാനവിടെ ഐ ലവ് യു എന്നെഴുതി ഏട്ടന് നേരെ എറിഞ്ഞായിരുന്നല്ലോ, ഒരു ഇൻട്രർവെൽ സമയത്ത്. ഏട്ടനത് കിട്ടിയില്ലെങ്കിൽ പിന്നെ അതാർക്കായിരിക്കും കിട്ടിയിരിക്കുക? എന്റെ 10 രൂപയുടെ പേനയാ. ശോ കഷ്ടമായി പോയല്ലോ!"

അവളുടെ പറച്ചിൽ കേട്ടിട്ട് എനിക്ക് ചിരി നിയന്ത്രിക്കാൻ പറ്റിയില്ല. ലോകത്ത് ഇങ്ങനെ ഒരു ലവ് ലെറ്റർ ആദ്യമായിട്ടായിരിക്കും. ഇത്രയ്ക്ക് പൊട്ടിയാണല്ലോ എന്റെ പെണ്ണ്! ഒടുവിൽ എന്റെ അട്ടഹാസം കേട്ട് കുഞ്ഞ് കരഞ്ഞപ്പോഴാണ് ചിരി ഞാൻ നിർത്തിയത്.

~ ചാരു