ന്യൂഡിൽസ്

"അമ്മേ..... ന്യൂഡിൽസ് ഉണ്ടാക്കിത്തരാമോ...?"

" നീയല്ലേ... തന്നതാനേ .. ഉണ്ടാക്കിക്കഴിക്കാറ്.... അതോണ്ട് നീ തന്നെ ഉണ്ടാക്കിക്കഴിച്ചോ...." രാവിലെ വായിച്ച പേപ്പർ വൈകുന്നേരവും ഒന്നൂടെ വായിക്കുകയായിരുന്ന ഞാൻ നീരസത്തോടെ മറുപടി പറഞ്ഞു.

" എന്റെ പൊന്നു അമ്മയല്ലേ.... പ്ലീസ്... ഒന്നുണ്ടാക്കിത്താ..."

"ശരി .., ഒരു കണ്ടീഷൻ .., നീ എനിക്ക് ചായ ഉണ്ടാക്കിത്തരണം... പറ്റ്വോ..?"

"അം...മ്....മ്മേ....."

" പറ്റ്വോന്ന് ...പറ. എന്നാൽ ഞാൻ നിനക്ക് ന്യൂഡിൽസ് ഉണ്ടാക്കിത്തരാം... ഒരു പാലം ഇട്ടാൽ അങ്ങോട്ടും ഇങ്ങോട്ടും എന്നാണല്ലോ പ്രമാണം... എന്തു പറയുന്നു."

അവനെ അങ്ങനെ വിട്ടാൽ പറ്റില്ല... ഓന് സ്വയം പര്യാപ്തത വേണം എന്നുള്ള ചിന്തയിൽ, ഞാൻ അവനോട് ചോദിച്ചു.

അവൻ അല്പനേരം ചൂണ്ടുവിരൽ താടിക്ക് കുത്തി ആലോചിച്ചു. എന്നിട്ട് പറഞ്ഞു,

" ശരി അമ്മേ.... അമ്മ ന്യൂഡിൽസ് ഉണ്ടാക്കിത്താ... ഞാൻ അമ്മയ്ക്ക് ചായ ഉണ്ടാക്കിത്തരാം..."

അതു പറയുമ്പോ അവന്റെ മുഖത്തിന് "തീരെ ഇഷ്ടപ്പെടായ്ക " എന്ന ഭാവം തെളിഞ്ഞു നിന്നു. അതൊന്നും ഗൗനിക്കാതെ ഞാൻ ഇങ്ങനെ ആത്മഗതം നടത്തി,

" ഹമ്പടാ.. കേമാ.... മടിയാ...എന്നോടാ കളി... ഹും.."

ആ പറഞ്ഞത് പുറത്തേക്ക് കേട്ടോ എന്നറിയില്ല, അവൻ ചോദിച്ചു,

"അമ്മ എന്തേലും പറഞ്ഞോ..."

" ഹേയ് ഇല്യ... വാടാ.. നമുക്ക് അടുക്കളയിൽ പോകാം..."

ഞങ്ങൾ രണ്ടാളും അടുക്കളയിൽ ചെന്നു. ഞാൻ സ്റ്റൗ ഓണാക്കി, ന്യൂഡിൽസ് ഉണ്ടാക്കാനുള്ള പാത്രം വച്ചു. അപ്പോൾ അവൻ പറഞ്ഞു,

"അമ്മേ... രണ്ടാമത്തെ സ്റ്റൗ ഓണാ
ക്കിയേ... "

" ങ്ഹാ.... ശരി" അതും പറഞ്ഞ് ഞാൻ സ്റ്റൗ ഓണാക്കി. അവൻ പാല് ചൂടാക്കാൻ മിൽക്ക് കുക്കർ എടുത്ത് സ്റ്റൗവിൽ വച്ചു.

ഞാൻ ന്യൂഡിൽസിനുള്ള പരിപാടികൾ തുടങ്ങി. അല്പം കഴിഞ്ഞപ്പോൾ ,

"അമ്മേ.... മിൽക്ക് കുക്കർ കൂവുന്നു. തീ കുറയ്ക്ക്."

" ങ്ഹാ.... ശരി"

"അമ്മേ... ചായ പാത്രം ഏതാ...?"

" ങ്ഹാ.... അത് " ഒരു പാത്രം ചൂണ്ടിക്കാണിച്ചു കൊണ്ട് ഞാൻ മറുപടി പറഞ്ഞു.

"അമ്മേ... ആവശ്യമുള്ള വെള്ളം ഒഴിക്കാമോ...?"

" ങ്ഹാ... ഒഴിച്ചു. "

"അമ്മേ..... വെള്ളം തിളയ്ക്കുന്നു . ചായപ്പൊടി ഇടാമോ..."

"ങ്ഹാ... ഇട്ടു."

"അമ്മേ.... ഇതാ ഗ്ലാസ്. ., ആവശ്യത്തിനുള്ള പാല് ഒഴിക്കാമോ...."

" ങ്ഹാ.... ഒഴിച്ചു. "

"അമ്മേ...അരിപ്പ എടുത്തേ... "

" ങ്ഹാ.... എടുത്തു."

"അമ്മേ.... ചായ എന്തോരം ഒഴിക്കണം.?"

" ങ്ഹാ.... ഇത്രേം മതി.. " ഞാൻ ചായ ഒഴിച്ചു കൊടുത്തു.

"അമ്മേ... പഞ്ചസാര വേണോ...?"

"ങ്ഹാ... വേണ്ട."

അവൻ ഒരു ടി. സ്പൂൺ എടുത്ത് ഇളക്കിയിട്ട്
ഗ്ലാസ് എന്റെ നേരെ നീട്ടിയിട്ട് പറഞ്ഞു,

"ഇതാ ചായ ... "

അപ്പോഴേക്കും തയ്യാറായിക്കഴിഞ്ഞ ന്യൂഡിൽസ്, പ്ലേറ്റിലാക്കിയിട്ട് അവൻ തിരിഞ്ഞു നടന്നു. നടക്കുന്നതിനിടയിൽ പതുക്കെ എന്തോ ഒരു വാചകം അവൻ പറഞ്ഞു..

" എന്നോടാ ..... കളി... ഹി...ഹി...."

''ഇനി അതാണോ പറഞ്ഞെ.. എന്ന് എനിക്ക് ഉറപ്പില്ല .. അതോ എന്റെ തോന്നലോ... ആ ആർക്കറിയാം... " എന്ന ചിന്താഭാരത്തോടെ, അവന്റെ നിർദ്ദേശപ്രകാരം ഞാൻ തന്നെ ഉണ്ടാക്കിയ ചായ ഊറ്റിക്കുടിക്കാൻ തുടങ്ങി.

സുമി ആൽഫസ്
*****************