മനുഷ്യത്വം മരിച്ചിട്ടില്ല.

രാവിലെ ആരെ കണികണ്ടിട്ട് ഇറങ്ങിയതാണോ ഭഗവാനേ ? ഇരച്ചു വന്ന ദേഷ്യം തീർക്കാൻ പഞ്ചറായ ടയറിൽ ഒന്നുകൂടി ആഞ്ഞു തൊഴിച്ചു. ലക്ഷ്യം തെറ്റിയ തൊഴിയിൽ ഉള്ക്കിയ കാൽ ഇരട്ടി വേഗത്തിൽ തന്നെ പിന്നിലേക്കും വലിച്ചു.

നാശം സമയദോഷമെന്നല്ലാതെ എന്ത് പറയാൻ. ഉള്ക്ക് വീണ കാലുമായി അല്പം കൂടി മുന്നിലേക്ക് നടന്നു. ഈശ്വരാ ഇവിടെങ്ങും ഒരു പെട്ടിക്കട പോലും കാണാനില്ലല്ലോ.

"എന്ത് പറ്റി ബ്രോ?"

പതിനെട്ട് ഇരുപത് വയസ്സ് തോന്നിക്കുന്ന ഒരു ചെറുപ്പക്കാരൻ.

ഓട്ടോയുടെ ടയർ പഞ്ചറായി സഹോ, സ്റ്റെപ്പിനിയിലും എയർ കുറവാണ്. അടുത്ത് എവിടെയെങ്കിലും ഇതൊന്ന് ഒട്ടിക്കാൻ വഴിയുണ്ടോ?

"നോ ബ്രോ, ഇവിടെ അടുത്തൊന്നും ഒരു കടയുമില്ല. സാരമില്ല എന്റടുത്ത് ബൈക്കുണ്ട്. ബ്രോയ്ക്ക് എവിടെയാ പോവേണ്ടതെന്ന് വച്ചാൽ ഞാൻ ഡ്രോപ്പ് ചെയ്യാം." വളരെ സ്നേഹത്തോടെ അവൻ മറുപടി നൽകി.

ഒരുപാട് സന്തോഷം സഹോ, എങ്കിൽ എന്നെയൊന്ന് അടുത്ത ഓട്ടോ സ്റ്റാന്റ് വരെ ആക്കാമോ? ഞാൻ അവിടെന്നാരെയെങ്കിലും കൂട്ടി വന്ന് ടയർ മാറ്റിക്കൊള്ളാം.

ഓക്കേ ബ്രോ...

സാധാരണ വഴിയിൽ നിന്ന് തൊഴുത് കൈ കാട്ടിയാൽ പോലും ആരും വണ്ടി നിർത്തുന്നതല്ല. മനുഷ്യത്വം മരിച്ചിട്ടില്ലെന്നുള്ളതിന്റെ തെളിവാണിത്.. ബൈക്കിന്റെ പിന്നിലിരിക്കുമ്പോ വെറുതെ മനസ്സിലോർത്തു.

വല്യ ഉപകാരം സഹോ, കാണാം.. അയാളോടുള്ള സ്നേഹം ഒരു നന്ദിവാക്കിലൊതുക്കി ഞൊണ്ടി ഞൊണ്ടി മെല്ലെ സ്റ്റാന്റിലേക്ക് നടന്നു.

നിൽക്ക് ബ്രോ..... അങ്ങനങ്ങ് പോവല്ലേ, ഒരു സെൽഫിയൊക്കെ എടുത്തിട്ട് പോവാന്നേ... ഒന്നൂല്ലേലും നമ്മളൊക്കെ നാളേം കാണേണ്ടവരല്ലേ ?

ശരിക്കും സന്തോഷം തോന്നിയ നിമിഷം. എത്ര നല്ല മനുഷ്യൻ. ഉറപ്പാണ്‌ ഇനിയും മനുഷ്യത്വം മരിച്ചിട്ടില്ല.

അയാളോട് യാത്ര പറഞ്ഞ് മറ്റൊരോട്ടോ വിളിച്ച് ടയർ മാറി തിരികെ സ്റ്റാന്റിലെത്തിയപ്പോഴേക്കും ഹംസ ഓടിയെത്തി..

ടാ മനുവേയ് ഇതെന്താടാ?

ഞാനവന്റെ കൈയിലിരുന്ന മൊബൈലിലേക്ക് നോക്കി.

നേരത്തെ പരിചയപ്പെട്ട ചെറുപ്പക്കാരനും ഞാനും വെളുക്കെ ചിരിച്ചു നിൽക്കുന്ന അതേ സെൽഫിയും കൂടെയൊരു ക്യാപ്‌ഷനും...

" വാഹനം കേടായി വഴിയിലകപ്പെട്ട വികലാംഗനായ ഓട്ടോ ഡ്രൈവറെ സുരക്ഷിതമായി സ്റ്റാന്റിലെത്തിച്ച ചങ്ക് ബ്രോയ്ക്ക് എത്ര ലൈക്ക് കൂട്ടുകാരേ? "

ശരിയാ, മനുഷ്യത്വം മരിച്ചിട്ടില്ല..

"പ്രിയപ്പെട്ട സുക്കറണ്ണാ...
എന്തിന്റെ പേരിലായാലും അണ്ണനെന്നും എപ്പോഴും സ്തുതിയിരിക്കട്ടെ......"