അർച്ചന

കണ്ണാ, ഞാൻ നിന്റെ വേണുഗാനത്തിലെ
മധുരാനുരാഗമായ്ത്തീർന്നിടട്ടേ
പാദരേണു തേടി നീ,യണയുംനാളിനായ്
വ്രതം നോറ്റിരുന്നൊരാ രാധയെപ്പോൽ.

നിൻനീലമിഴികളിലെഴുതിയൊരഞ്ജനം
ചുണ്ടിണയാൽ ഞാൻ പകുത്തിടട്ടേ.
ഒരു ദേവരാഗമായ് നിന്നിലലിഞ്ഞു
ഞാനെന്നും നിന്നിൽ ലയിച്ചിടട്ടേ.

ശ്യാമവർണ്ണാ, നിൻ പ്രണയഗീതങ്ങളെ-
ന്നാത്മാവിലലിഞ്ഞിടട്ടേ.
ഒരു തുളസിമാലപോൽ നിൻമാറിൽ
വീണൊരു ഗോപികയായിടട്ടേ ഞാൻ.

കല്പാന്തകാലം ഒരു മയിൽപ്പീലിയായ്
നിൻമുടിച്ചുരുളിൽ ചേർന്നുനില്ക്കാനായ്
യമുനാതീരംകൊതിക്കും നിൻപാദത്തിൽ
എന്നെയർപ്പിക്കുന്നൂ സ്വീകരിക്കില്ലേ കണ്ണാ.

ബെന്നി ടി. ജെ.