മരണത്തിൻ്റെ മുഖം

°°°°°°°°°°°°°°°°°°°°°°°
മരണത്തിൻ്റെ മുഖം കണ്ടവരുണ്ടോ
മരണത്തിന്റെ നിശബ്ദതയിൽ
ആ ഭീകരാന്തരീക്ഷത്തിൽ ലയിച്ചു ചേർന്നിട്ടുണ്ടോ

മരണം എന്നത് സത്യമാണ്
എന്നെങ്കിലും നമ്മേ തേടിയെത്തും എന്ന സത്യം
ആ സത്യത്തെ ഒരിക്കൽ ഉൾക്കൊണ്ടേ പറ്റു

നമ്മളില്ലാത്ത ഒരു സൂര്യോദയം
പകൽ,രാത്രി
അങ്ങനെ ചിന്തിക്കുബോൾ
ഉടലാകെ ഒരു തണുപ്പ് അരിച്ചെത്തുന്നു

മരണം ചിലപ്പോൾ ക്രൂരതയുടെ അങ്ങേയറ്റമാണ്

ചിലരുടെ സ്വപ്നങ്ങൾക്ക് മീതെ കനലുകൾ
കോരിയിട്ട്
പ്രതീക്ഷയുടെ മാമ്പൂക്കൾ
തല്ലിക്കൊഴിച്ചു

മരണം ചിലപ്പോൾ നഷ്ടങ്ങളുടെ
നീണ്ട നിരകളാവാം
കാത്തിരുന്നു കാണാതെ
ജീവനറ്റ ദേഹം ഒരു നോക്കു പോലും കാണാനാവാതെ

മനസ്സുലഞ്ഞു സുബോധമില്ലാതെ
അലറി വിളിച്ചു
കരയുബോൾ
കാഴ്ചക്കാരായി നോക്കി നിൽക്കാൻ മാത്രം വിധിക്കപ്പെട്ടവർ നമ്മൾ

അതെ മനുഷ്യാ ഒരു മനുഷ്യായുസ്സിൽ നന്മകൾ ചെയ്യാനും,അറിഞ്ഞോ,അറിയാതെയോ വരുന്ന തെറ്റുകളും,തെറ്റിദ്ധാരണകളും തിരുത്തി മുന്നോട്ടു പോകുവാൻ കഴിയണം

ഒരൊറ്റ ജീവിതം ചിലപ്പോൾ ഒരു നിമിഷ നേരം കൊണ്ട് ഇല്ലാതാവാം

നിത്യ ശൂന്യതയിലേയ്ക്ക്
യാത്രയാവുന്നതിന് മുൻപ്
ചെയ്യാനുള്ളതെല്ലാം നാളേയ്ക്ക് വയ്ക്കാതെ
ഇന്ന് എന്ന നൂല്പാലത്തിലൂടെ സഞ്ചരിച്ചു ആവുന്ന വിധം ചെയ്തു തീർക്കാം

വാശിയും,വെറുപ്പും, വിദ്വേഷവും മറന്ന്
ഒരാൾക്കൊരു പുഞ്ചിരി എങ്കിലും നൽകി മൺമറഞ്ഞു പോവാം
....................രാജിരാഘവൻ