സൗഹൃദപ്പൂക്കള്‍

--------------------------

ഇന്നലെ പെയ്ത മഴയ്ക്കിന്നു കിളിര്‍ക്കുന്ന
ഇളംതളിരുകളെല്ലാം പൂത്തുലയാറില്ല!

മെല്ലെ കണ്ണുതുറന്നിരുപുറം നോക്കിയും
മൃദുമാരുതനെ തൊട്ടറിഞ്ഞും

നനുത്തൊരിലകളോരോന്നായ് വിടര്‍ത്തിയും
നിവര്‍ന്നു നില്ക്കാന്‍ ശ്രമം നടത്തിയും

നാളുകളെത്രയോ ഉറങ്ങിയുമുണര്‍ന്നും
നാമ്പെടുത്തെന്നുറപ്പു വരുത്തിയും

മണ്ണിലൊന്നു കാലുറപ്പിച്ചു നില്‍ക്കവേ
മനസ്സറിഞ്ഞു നോക്കുന്നു ചുറ്റുമെത്ര തൈകള്‍!

വിടരും മുകുളങ്ങളെയോമനിയ്ക്കുമ്പോഴും
വീക്ഷിയ്ക്കുന്നുവോ ചുറ്റിലും മുന്നിലും

ഇത്തിരി വെട്ടവും വെള്ളവും പോലും
ഇരുപുറം മേവും വേരുകള്‍ക്കുമേകിയും

വിളറുന്നുവെന്നറിയുമ്പോള്‍ പതറാതെ
വീശിത്തണുപ്പേകി ആശ്വാസമോതിയും

പകിട്ടോടെ പൂത്തുലയുമ്പോള്‍ പുഞ്ചിരിയോടെ
പതിയെയന്യോനം നോക്കി ലാളിച്ചും

ശലഭങ്ങളെത്തുമ്പോള്‍ നാണിച്ചു
വിവശയായ് കള്ളച്ചിരിയോടെ നോക്കിയും

ദളമര്‍മ്മരങ്ങളാലെത്രയോ കിന്നാരം
സഹജരാം മലരുകളോതുന്നു മെല്ലെ!

വര്‍ണ്ണപ്പകിട്ടും ഹൃദ്യസുഗന്ധവും
കേവലം ക്ഷണികമെന്നറിയുമ്പോഴും

കൈചേര്‍ത്തുപിടിച്ചൊരു പൂക്കൂടയിലായ്
കിലുകിലെ ചിരിയ്ക്കുന്നു പിന്നെയും!

വാടിക്കൊഴിഞ്ഞീടിലും വാര്‍മുടിയിലൊളിച്ചീടിലും
വാഴുക സൗഹൃദമലരുകളായ് നമ്മളെന്നല്ലോ
വഴിയും സ്നേഹമോടോതുന്നീ പൂക്കള്‍!

[ സൗഹൃദദിനാശംസകള്‍]

രാധാ സുകുമാരന്‍
05.08.2018