ചതി

ഇതൊരു കഥയോ കവിതയോ അല്ല, രണ്ട് ദിവസം മുന്നേ പത്രത്തിൽ കണ്ട ഒരു വാർത്തയാണ് ഇതെഴുതാൻ കാരണം. ടെക്നോളജി വളരുകയാണ്. അതിനൊപ്പം എത്താൻ നമുക്കെല്ലാവർക്കും കഴിഞ്ഞെന്ന് വരില്ല എന്നാൽ നമ്മൾ ചതിക്കപ്പെടാതിരിക്കാൻ അല്ലെങ്കിൽ നമ്മുടെ ജീവിതത്തിൽ നഷ്ടങ്ങൾ സംഭവിക്കാതിരിക്കാൻ ഇന്നത്തെ ലോകം എങ്ങനെയുള്ളതാണെന്നു കുറച്ചെങ്കിലും നമ്മൾ മനസ്സിലാക്കിയിരിക്കണം.

"ഭർത്താവിന്റെ സ്വകാര്യദൃശ്യങ്ങൾ പകർത്തി ഭാര്യയും കാമുകനും ചേർന്ന് തട്ടിയെടുത്തത് ലക്ഷങ്ങൾ"

കഴിഞ്ഞ ദിവസം നമ്മുടെ നാട്ടിൽ നടന്ന ഒരു സംഭവമാണിത്. അന്വേഷിക്കാനെത്തിയ പോലീസിനോട് അദ്ദേഹത്തിന് പറയാനുള്ളത് ഇതാണ്

"എന്‍റെ പിന്നാലെ ആരോ ഉണ്ടെന്നായിരുന്നു ഞാന്‍ വിചാരിച്ചത് സാറെ. ഞാന്‍ എപ്പോള്‍ ഉണര്‍ന്നു,എപ്പോള്‍ ഉറങ്ങി,എവിടെയൊക്കെ പോയി, ആരോടൊക്കെ സംസാരിച്ചു ,എന്തൊക്കെ സംസാരിച്ചു തുടങ്ങിയെല്ലാം എന്‍റെ ഭാര്യ എന്നോട് അക്ഷരം തെറ്റാതെ പറയുമ്പോള്‍ ഞാന്‍ പിന്നെയെന്തു കരുതണം. എന്നെ നിരീക്ഷിക്കാന്‍ ഭാര്യ ആരെയോ പിന്നാലെ വിട്ടിട്ടുണ്ടെന്ന പേടിയില്‍ ദിവസങ്ങളോളം വീട്ടില്‍ നിന്ന് പുറത്തിറങ്ങാതെ ഞാനിരുന്നു..."

മറ്റൊന്ന് കൂടി അദ്ദേഹം പറയുന്നുണ്ട്, ഞാൻ ഫ്രഷ് ആകാനും മറ്റും ബാത്‌റൂമിൽ പോകുമ്പോൾ മൊബൈൽ കൂടെ കൊണ്ടുപോകാറുണ്ട്.

ഇതാണ് ഇന്നത്തെ ലോകം. മൊബൈൽ വഴി ആണ് ഭാര്യയും കാമുകനും ചേർന്ന് സ്വകാര്യ ദൃശ്യങ്ങൾ പകർത്തിയതെന്ന് തെളിഞ്ഞിട്ടുണ്ട്. ഒന്നും രണ്ടുമല്ല അഞ്ച് മാസത്തെ ദൃശ്യങ്ങൾ ആണത്രേ ഇവർ പകർത്തിയത്. പക്‌ഷേ എന്റെ സംശയം ഇതാണ് ബാത്‌റൂമിൽ പോകുമ്പോൾ നമ്മൾ ആരെങ്കിലും ഭാര്യയെ കൂടെ കൊണ്ടു പോകാറുണ്ടോ? അങ്ങനെയെങ്കിൽ ഭാര്യ റെക്കോഡ് ചെയ്ത് കാമുകന് അയച്ചു കൊടുത്തതാകാം എന്ന് നമുക്ക് വിശ്വസിക്കാം. അല്ലെങ്കിലോ? അവിടെയാണ് മറ്റൊരാൾക്ക് നമ്മുടെ മൊബൈലിൽ ഒളിപ്പിച്ചു വയ്ക്കാൻ കഴിയുന്ന ചതികൾ എന്തൊക്കെയാണെന്ന് നാം മനസ്സിലാക്കിയിരിക്കേണ്ടത്.

സ്ത്രീകളും കുട്ടികളുമുൾപ്പടെ സ്മാർട്ട്ഫോണുകൾ ഉപയോഗിക്കാത്തവർ ഇന്ന് ചുരുക്കമാണ്. എന്നാൽ നമ്മൾ സ്വന്തം സുഹൃത്തിനെപ്പോലെ കൂടെ കൊണ്ടു നടക്കുന്ന മൊബൈൽ ഫോണുകളിൽ മറ്റൊരാൾക്ക് ഒളിപ്പിച്ചു വയ്ക്കാൻ കഴിയുന്ന ചതികൾ എന്തൊക്കെയാണെന്ന് നമുക്ക് എത്ര പേർക്കറിയാം? എല്ലാവരും ഉപയോഗിക്കുന്നു എന്നല്ലാതെ അതിൽ ഒളിഞ്ഞിരിക്കുന്ന ഇത്തരം അപകടങ്ങളെക്കുറിച്ച് എപ്പോഴെങ്കിലും നമ്മൾ ചിന്തിച്ചിട്ടുണ്ടോ?

ഏതൊരു നല്ല കാര്യത്തിനും മോശമായ ഒരു മറുവശം കൂടി ഉണ്ട്. മൊബൈലിനെക്കുറിച്ചുള്ള എല്ലാ ദൂഷ്യവശങ്ങളും പറയുകയെന്നുള്ളത് നടക്കുന്ന കാര്യമല്ല. എന്നാൽ മുകളിൽ പറഞ്ഞ കാര്യത്തിൽ അയാൾ എങ്ങനെ വഞ്ചിക്കപ്പെട്ടു എന്ന് നമുക്ക് നോക്കാം.

ഒരു മൊബൈൽ അപ്പ്ളിക്കേഷൻ വഴിയാണ് ഇവർ ഇതെല്ലാം പകർത്തിയതെന്ന് പോലീസ് അന്വേഷണത്തിൽ തെളിഞ്ഞു കഴിഞ്ഞു. അപ്പ്ളിക്കേഷന്റെ പേരും വിവരങ്ങളും പത്രങ്ങൾ വഴി മിക്കവരും അറിഞ്ഞിട്ടുണ്ടാകും എന്നാലും അറിയാത്തവരും ഏറെയാണ്. ചിലർ ഇതിനെ ദുരുപയോഗം ചെയ്യുമെന്നുള്ളത് കൊണ്ട് അപ്പ്ളിക്കേഷന്റെ പേര് ഞാനിവിടെ പറയുന്നില്ല. എന്താണ് ആ അപ്പ്ളിക്കേഷൻ അല്ലെങ്കിൽ എങ്ങനെയാണത് നമ്മുടെ ഫോണിൽ പ്രവർത്തിക്കുന്നതെന്ന് നോക്കാം. പലർക്കും അറിയാവുന്ന കാര്യം ആയിരിക്കാം, അറിയാവുന്നവർ ക്ഷമിക്കുക ഇതിനെക്കുറിച്ച് അറിവില്ലാത്തവർ ഒരുപാട് പേരുണ്ട്. അവർക്ക് വേണ്ടിയാണ് ഈ പോസ്റ്റ്.

ഇത്തരം അപ്പ്ളിക്കേഷനുകളെ സ്പൈ ആപ്പുകൾ എന്നാണ് പറയാറുള്ളത്. നമ്മളറിയാതെ മറ്റൊരാൾ ഇത്തരം സ്പൈ അപ്പ്ളിക്കേഷനുകൾ ഏതെങ്കിലും നമ്മുടെ ഫോണിൽ ഇൻസ്റ്റാൾ ചെയ്തു എന്ന് കരുതുക. നമ്മുടെ ഫോണിൽ ഇന്റർനെറ്റ് ഓൺ ആണെങ്കിൽ ആ വ്യക്തിക്ക് മറ്റൊരു ഫോൺ ഉപയോഗിച്ച് നമ്മുടെ ഫോണിന്റെ രണ്ട് ക്യാമറകളും പ്രവർത്തിപ്പിക്കാനും അതിലൂടെ കാണുന്നതും കേൾക്കുന്നതുമായ എല്ലാം റെക്കോർഡ് ചെയ്‌ത് സൂക്ഷിക്കാനും സാധിക്കും. എന്നാൽ അങ്ങനെ ഒരു അപ്പ്ളിക്കേഷൻ നമ്മുടെ ഫോണിൽ പ്രവർത്തിക്കുന്നതായി ഒറ്റനോട്ടത്തിൽ അറിയാനും നമുക്ക് സാധിക്കില്ല. ഫോൺ ലോക്ക് ആയിരുന്നാലും ഡിസ്‌പ്ലേ ഓഫ് ആയിരുന്നാലും ഇത് വർക്ക് ചെയ്യിക്കാൻ യാതൊരു പ്രയാസവുമില്ല എന്നുള്ളതാണ് ഇത്തരം ആപ്പുകളുടെ പ്രത്യേകത. ലൊക്കേഷൻ ട്രാക്ക് എന്ന ഓപ്‌ഷനിലൂടെ നമ്മൾ എവിടെയൊക്കെ പോകുന്നുവെന്ന് മനസ്സിലാക്കാനും സാധിക്കും. ഒരു ജിമെയിൽ ഐഡി ഉപയോഗിച്ചാണ് ഇത് കണക്റ്റ് ചെയ്തിരിക്കുന്നത്. അതേ ഐഡി ഉപയോഗിച്ചു ഒന്നിലേറെ ഫോണുകളിൽ ഒരേ സമയം ഈ അപ്പ്ളിക്കേഷൻ വർക്ക് ചെയ്യിക്കാനും സാധിക്കും.

സ്പൈ അപ്പ്ളിക്കേഷനുകൾ പെട്ടെന്ന് ശ്രദ്ധിക്കാൻ കഴിയാത്ത രീതിയിൽ ഹൈഡ് ചെയ്ത് വയ്ക്കാൻ സാധിക്കുന്നവയാണ്. ഗൂഗിൾ പ്ലെസ്റ്റോറിൽ ഉൾപ്പടെ ഒരുപാട് സൈറ്റുകളിൽ നിന്ന് ഇത്തരം അപ്പ്ളിക്കേഷനുകൾ നമുക്ക് ഡൌൺലോഡ് ചെയ്യാൻ സാധിക്കും. സൗജന്യമായി ലഭിക്കുന്നതും പണം കൊടുത്തു വാങ്ങുന്നതുമായ ആപ്പുകൾ ഇന്ന് ഒരുപാട് സൈറ്റുകളിൽ ലഭ്യമാണ്.

ബെഡ്റൂമിലും ബാത്റൂമിലും എന്ന് വേണ്ട എല്ലായിടത്തും ഫോൺ കൂടെ കൊണ്ടുനടക്കുന്നവർ ആണ് ഇന്ന് കൂടുതൽ പേരും. നമ്മൾ അറിയാതെ ഇങ്ങനെയൊരു അപ്പ്ളിക്കേഷൻ നമ്മുടെ ഫോണിൽ പ്രവർത്തിക്കുന്നുണ്ടെങ്കിൽ ഒന്ന് ഓർത്തു നോക്കൂ. അല്ലെങ്കിൽ നമ്മൾ ഡ്രസ് മാറുന്ന സമയത്തോ, ഭാര്യയും ഭർത്താവുമൊരുമിച്ചുള്ള സ്വകാര്യ നിമിഷങ്ങളിലോ ഈ അപ്പ്ളിക്കേഷൻ നമ്മുടെ മൊബൈലിൽ പ്രവർത്തിക്കുന്നുണ്ടെങ്കിൽ ആലോചിച്ചു നോക്കൂ, നമ്മൾ പോലുമറിയാതെ നമ്മുടെ സ്വകാര്യ നിമിഷങ്ങൾ മറ്റൊരു വ്യക്തിയുടെ കൈകളിലെത്തും. അത് അയാൾക്ക് ഏതൊക്കെ രീതിയിൽ ദുരുപയോഗം ചെയ്യാമെന്ന് നമുക്ക് ഊഹിക്കാവുന്നതെയുള്ളൂ.

ശാസ്ത്രം വളരുകയാണ്, ഇതിലും കൂടുതൽ ഓപ്‌ഷനുകളുമായി ഇനിയും ഇത്തരം അപ്പ്ളിക്കേഷനുകൾ ഇറങ്ങിയേക്കാം. അതൊന്നും തടയാൻ നമുക്കാവില്ല. അതുകൊണ്ട് ഇത്തരം സന്ദർഭങ്ങൾ ഉണ്ടാവാതിരിക്കാൻ നമുക്ക് എന്തൊക്കെ മുൻകരുതൽ എടുക്കാൻ കഴിയുമെന്ന് നോക്കാം.

ഒരാൾക്ക് ഇത്തരം ഒരു അപ്പ്ളിക്കേഷൻ നമ്മുടെ ഫോണിൽ ഇൻസ്റ്റാൾ ചെയ്യണമെങ്കിൽ നമ്മുടെ ഫോൺ അയാളുടെ കൈവശം ലഭിക്കണം എന്നുള്ളത് കൊണ്ട് എത്ര വിശ്വസ്തൻ ആയിരുന്നാലും മറ്റൊരാൾക്ക് നമ്മുടെ ഫോൺ കൈമാറാതിരിക്കുക. എന്തെങ്കിലും കാരണവശാൽ ഫോൺ റിപ്പയറിനോ മറ്റോ ഷോപ്പുകളിൽ നല്കുന്നുവെങ്കിൽ തിരികെ വാങ്ങിയതിന് ശേഷം ഫാക്റ്ററി റീസെറ്റ് (ഫോർമാറ്റ് ) ചെയ്തതിന് ശേഷം ഉപയോഗിക്കുക, ഫോണിൽ സ്ട്രോങ്ങ് ആയ പാറ്റേൺ അല്ലെങ്കിൽ പാസ്സ് വേർഡ് ഉപയോഗിച്ചു ലോക്ക് ചെയ്യുക. നമ്മുടെ സ്വകാര്യ നിമിഷങ്ങളിൽ ഇന്റർനെറ്റ് ഓഫ് ചെയ്ത് വയ്ക്കുക, നേരിട്ട് അറിയുന്നതും വിശ്വസ്തരായവരും അയക്കുന്ന ലിങ്കുകൾ ആണെങ്കില്പോലും ആവശ്യമെങ്കിൽ മാത്രം ഓപ്പൺ ചെയ്യുക. സ്ഥിരമായി ഉപയോഗിക്കുന്ന ചില അപ്പ്ളിക്കേഷനുകളുടെ കൂടെ പരസ്യങ്ങളും ഉണ്ടാകാറുണ്ട്. അത്തരം പരസ്യങ്ങളിൽ ക്ലിക്ക് ചെയ്യാതിരിക്കുക, തുടങ്ങിയ ചെറിയ ചെറിയ കാര്യങ്ങൾ ശ്രദ്ധിച്ചാൽ പൂർണമായി അല്ലെങ്കിലും ഒരുപരിധി വരെ ഫോണിന്റെ സുരക്ഷ ഉറപ്പാക്കാൻ നമുക്ക് സാധിക്കും.

ഇനിയുമുണ്ട് മറ്റൊരു കാര്യം, രാമായണത്തിലെ ഏത് കഥാപാത്രമാണ് നിങ്ങൾ, നിങ്ങൾക്ക് ചേർന്ന സെലിബ്രെറ്റി ആരാണ്, എന്നൊക്കെയുള്ള രീതിയിൽ കാണുന്ന ഒരുപാട് ലിങ്കുകൾ നമ്മൾ ഓപ്പൺ ചെയ്യാറുണ്ട്. എന്നാൽ ഇവ ഓപ്പൺ ചെയ്യുന്ന സമയത്ത് നമ്മളോട് ലോഗിൻ ചെയ്യാൻ അവർ ആവശ്യപ്പെടാറുണ്ട്. ഒന്നും ആലോചിക്കാതെ നമ്മൾ ലോഗിൻ ചെയ്യാറുമുണ്ട്. എന്നാൽ അങ്ങനെ ലോഗിൻ ചെയ്യുന്നതിലൂടെ നമ്മുടെ ഐഡി, പാസ്സ്‌വേർഡ്‌ എന്നിവ അവരുടെ സെർവറിൽ സേവ് ചെയ്യപ്പെടുന്നു. കൂടാതെ നമ്മുടെ ഡാറ്റകൾ, ഗാലറി, ഇമെയിൽ, കോണ്ടാക്റ്റ് ലിസ്റ്റ്, തുടങ്ങിയവ പരിശോധിക്കാനുള്ള പെർമിഷൻ കൂടിയാണ് നമ്മൾ അവർക്ക് നൽകുന്നതെന്ന് എത്ര പേർക്കറിയാം?

ഒരിക്കൽ എനിക്ക് പരിചയമുള്ള ഒരു വ്യക്തിയോട് ഇത് പറഞ്ഞപ്പോൾ....
"നമ്മുടെ ഗാലറിയിലെ നാല് ഫോട്ടോയോ കുറച്ചു ഫോൺ നമ്പറുകളോ കിട്ടിയിട്ട് അവർക്കെന്ത് ലാഭം അല്ലെങ്കിൽ തന്നെ ഇതിന് കാശൊന്നും കൊടുക്കണ്ടല്ലോ"
എന്നാണ് അയാൾ മറുപടി പറഞ്ഞത്. എന്നാൽ ഒന്ന് ആലോചിക്കുക, നമ്മളിലെ കഥാപാത്രത്തെ കണ്ടെത്തി തന്നിട്ട് അവർക്കെന്ത് ലാഭം. സൗജന്യമായി ആരും ഒന്നും നമുക്ക് തരുന്നില്ല ഒന്നല്ലെങ്കിൽ മറ്റൊരു തരത്തിൽ അത്തരക്കാർക്ക് അതിനുള്ള പ്രതിഫലം ലഭിക്കുക തന്നെ ചെയ്യും. ഒരു ലാഭവുമില്ലാതെ ഇന്നത്തെക്കാലത്ത് ആരും ഒന്നും ചെയ്യില്ലെന്ന് മനസ്സിലാക്കുക, ചിന്തിക്കുക, അതനുസരിച്ചു പ്രവർത്തിക്കുക...

ഉണ്ണി ആറ്റിങ്ങൽ