നല്ലച്ഛൻ..(The Great Grandfather)

നല്ലച്ഛൻ..(The Great Grandfather)
__________________________________

നല്ലച്ഛൻ....പേരിനെ അന്വർത്ഥമാക്കുന്ന
കാലത്തിനുപോലും ഓർമ്മകളിൽ നിന്നും
മായ്ക്കാനാവാത്ത എന്റെ മനസ്സിലെ കെടാവിളക്ക്...ഇനി ഒരിക്കലും തിരികെ വരില്ലെന്നറിഞ്ഞിട്ടും വിശ്വസിക്കാനാവാത്ത
ഒരു തീരാ നഷ്ടമാണ് നല്ലച്ഛൻ...യാഥാർത്ഥ്യെത്ത അംഗീകരിക്കാൻ തയ്യാറാവാത്ത മനസ്സും
മിഴിയും ഇന്നും തിരയുകയാണ്...ഉമ്മറത്തെ
ചാരുകസേരയിൽ...പാടവരമ്പത്ത്....അങ്ങനെ എവിടെയൊക്കയോ...ആ തിരച്ചിലിനുളള ഉത്തരം,കവിളിലൂടെ ചാലിട്ടൊഴുകുന്ന കണ്ണുനീരാണ്...

ജീവിതം കല്ലും മുളളും നിറഞ്ഞ പാതയിലൂടെയാണെന്ന് തിരിച്ചറിഞ്ഞ്,
സമ്പത്തിന്റെ മടിയിൽ മയങ്ങാതെ,
അദ്ധ്വാനത്തിന്റെ മഹത്വം എന്നിലേക്ക്
പകർന്നു തന്ന അവസാന ശ്വാസം വരെ വിശ്രമമില്ലാത്ത ജീവിതം നയിച്ച മഹാത്മാവ്...കർഷകന്റെ ആത്മാവ് കൃഷിയിടത്തിലാണെന്ന് ഞാൻ പഠിച്ചത് അവിടെ നിന്നാണ്.
കൊയ്യാനും,മെതിക്കാനും,ഞാറു നടാനും,ഓരോ കതിരും കർഷകന്റെ അദ്ധ്വാനമാണെന്നു പറഞ്ഞ് ,ഉതിർന്നു
വീണ കതിർ മണികൾ പെറുക്കിയെടുക്കാനും...കപ്പ നടാനും ,പയറ്
നടാനും ,പുല്ലറുക്കാനും......അങ്ങനെ... പുതിയ തലമുറയ്ക്ക് അറിയാത്ത വിലപ്പെട്ട
പലതും എനിയ്ക്കു പകർന്നു തന്ന നല്ലച്ഛൻ.

സ്നേഹിക്കാൻ മാത്രം അറിയാമായിരുന്ന
നല്ലച്ഛൻ........

എല്ലാറ്റിനുമൊടുവിൽ മരണത്തിലേയ്ക്കാണെന്നറിയാതെ,
ട്രെയിൻ കയറ്റി വിട്ടപ്പോൾ,അറിയാതെയാണെങ്കിലും
എന്റെ മനസ്സ് മന്ത്രിച്ചിരുന്നു...നീറുന്ന
ഒരു വേദനയോടെ...വിവാഹം കഴിഞ്ഞില്ലായിരുന്നെങ്കിൽ..ആ യാത്രയിൽ
ഒരു പക്ഷേ,കൂട്ടായ് എന്നേയും കൂട്ടുമായിരുന്നു...എന്ന്...

ഹൃദയബന്ധങ്ങളുടെ വിലയറിയാത്ത...
സാഹോദര്യത്തിന്റെ മഹത്വമറിയാത്ത
കാപട്യം നിറഞ്ഞ ഒരു ലോകത്തായിരുന്നു
നമ്മളെന്ന് പഠിപ്പിക്കാൻ മരണമെന്ന
യാഥാർത്ഥ്യത്തിലേയ്ക്ക് നടന്നു നീങ്ങിയ
സ്നേഹ നിധി.....
സാഹോദര്യത്തേക്കാൾ, പണത്തിനു വിലയിട്ട പൂർവ്വീകരേ....മൺമറഞ്ഞ ആത്മാവിന്റെ ശാപാഗ്നിയിൽ എരിഞ്ഞു തീരാതിരിക്കാൻ...നിങ്ങൾക്കു വേണ്ടിയും
ഞാൻ പ്രാർത്ഥിക്കും..
കാരണം,
'നശ്വരമായ ഈ ലോകത്ത്
ശാശ്വതമായത് സ്നേഹം മാത്രമാണ് '
എന്ന് എന്നെ പഠിപ്പിച്ചത് എന്റെ നല്ലച്ഛനാണ്.

താൻ സ്നേഹിക്കുന്ന,തന്നെ സ്നേഹിക്കുന്ന ഏല്ലാവരും തനിക്കു ചുറ്റും
വേണമെന്ന് ആഗ്രഹിച്ച ആ വലിയ മനസ്സിന്റെ മുന്നിൽ...
കണ്ണീർപ്പൂക്കൾ കൊണ്ട് പ്രണാമം അർപ്പിക്കുന്നു....

VeenaBinoop,