വൈറൽ വീഡിയോസും.....തകരുന്ന ജീവിതങ്ങളും

വൈറൽ വീഡിയോസും.....തകരുന്ന ജീവിതങ്ങളും
********************* *********************
വീട്ട് മുറ്റത്ത് വന്നുനിന്ന ആംബുലൻസിൽ നിന്നും എന്റെ സൂര്യയുടേയും പൊന്നുമോളുടേയും ജീവനറ്റ ശരീരം ഉമ്മറത്തിണ്ണയിലേക്ക് എടുത്തു കിടത്തുന്നത് മുറിക്കുള്ളിലെ ജനലഴികളിലൂടെ ഞാൻ കാണുന്നുണ്ടായിരുന്നു.

വീടിനകത്തും പുറത്തുമായി ആളുകൾ എന്നെ ഒരു കൊലപാതകിയോടെന്ന പോൽ നോക്കുകയും പെരുമാറുകയും ചെയ്യുമ്പോഴും
എന്നെ സങ്കടപ്പെടുത്തിയത് എട്ട് വർഷം ഒന്നായി ജീവിച്ച എന്റെ ഭാര്യ എന്നെ മനസ്സിലാക്കാതെ പോയതിലായിരുന്നു.

ആരൊക്കെ എന്നെ അവിശ്വസിച്ചാലും തള്ളിപ്പറഞ്ഞാലും എന്റെ സൂര്യ എനിക്കൊപ്പം എന്നും ഉണ്ടാകുമെന്ന് കരുതിയ ഞാനാണ് മരിക്കേണ്ടിയിരുന്നത്.പക്ഷേ അവൾക്കുണ്ടായ ആ മനക്കരുത്തിന്റെ പകുതി പോലും എനിക്കുണ്ടായില്ല..എങ്കിൽ അവൾക്കും എന്റെ പൊന്നുമോൾക്കും പകരം എന്റെ ജീവനറ്റ ശരീരം ഉമ്മറത്തിണ്ണയിൽ കിടന്നേനെ...

"നിനക്ക് തൃപ്തിയായില്ലേടാ എന്റെ മോളേയും കുഞ്ഞിനേയും കൊലയ്ക്കു കൊടുത്തപ്പോൾ?
നിന്നെ സ്നേഹിച്ചതാണോടാ എന്റെ മോൾ ചെയ്ത തെറ്റ്..ചതിയനാ നീ..ഒരു പെണ്ണ് പിടിയനായ നിന്നെ ഇനി ഒരിക്കലും, മോനേ, എന്ന് വിളിക്കാൻ ഞങ്ങൾക്കാവില്ലടാ?"

സൂര്യയുടെ അമ്മ ദേഷ്യത്തോടെ എനിക്ക് നേരെ അത് പറയുമ്പോൾ എനിക്കറിയാമായിരുന്നു ഒരു പെറ്റമ്മയുടെ വേദനയുടെ ആഴമേറിയ സങ്കടമാണതെന്ന്...

അതേ ...ഞാനിന്ന് ...സമൂഹത്തിന് മുന്നിൽ, എന്റെ വീട്ടുകാർക്കും നാട്ടുകാർക്കും മുന്നിൽ ഒരു പെണ്ണ് പിടിയനാണ്..പുറത്തിറങ്ങിയാൽ കല്ലെറിയാനും കൂകി വിളിക്കാനും തുടങ്ങുന്ന ആൾക്കൂട്ടത്തെ ഭയന്ന് ഞാനീ മുറിയിൽ നിന്നും പുറത്തിറങ്ങിയിട്ട് ദിവസം ഒന്നു കഴിഞ്ഞു.....
ഞാൻ ചെയ്ത തെറ്റെന്താണെന്ന് എനിക്കിപ്പോഴും അറിയില്ല...

ഓഫീസിൽ പോകാനിറങ്ങുമ്പോഴാണ്
സൂര്യയുടെ അമ്മയും അച്ഛനും അമ്പലത്തിൽ പോയിട്ട് ആ വഴി വീട്ടിലേക്ക് വന്നത്. അതുകാരണം പത്ത് മിനിറ്റ് താമസിച്ചാണ് വീട്ടിൽ നിന്നും ഇറങ്ങിയത്,അതിനാൽ പതിവായി പോകുന്ന ബസ് കിട്ടിയില്ല, ബസ്സ്റ്റോപ്പിൽ ആരും ഒട്ടു ഉണ്ടായിരുന്നതുമില്ല.അപ്പോഴാണ് കോളേജിൽ പഠിക്കുന്ന ഒരു പെൺകുട്ടി ഓടിക്കിതച്ച് വന്ന് വെയിറ്റിംഗ് ഷെഡ്ഡിനുള്ളിലേക്ക് കയറിയത്.

ആകെ വിയർപ്പിൽ മുങ്ങിയ ആ കുട്ടി നന്നായി കിതയ്ക്കുന്നുണ്ടായിരുന്നു. പതിവായി കോളേജിൽ പോകുന്ന ബസ് കിട്ടാൻ വേണ്ടി ഓടിയതാണെന്ന് എനിക്ക് മനസ്സിലായി.
മുഖത്തെ വിയർപ്പ് തുടക്കാനായി ഞാനെന്റെ തൂവാല ആ കുട്ടിക്ക് കൊടുത്തു.

"ഇന്നെന്റെ ലാസ്റ്റ് എക്സാമാണ്.അമ്മയ്ക്ക് നല്ല പനിയായതിനാൽ വീട്ട് ജോലി തീർന്നപ്പോഴേക്കും ഇത്തിരി താമസിച്ചു.ബസ് കിട്ടാൻ വേണ്ടി ഓടി വന്നതാ ,പക്ഷേ അപ്പഴേക്കും ബസ് പോയി.ഇനി അടുത്ത ബസ് വരുമ്പഴേക്കും എക്സാം തുടങ്ങിയിരിക്കും.അവരിനി എന്നെ എക്സാമിനിരുത്തുമോയെന്നറിയില്ല ?"

പറഞ്ഞു തീർന്നതും ആ കുട്ടിയുടെ കണ്ണുകൾ നിറയുന്നത് ഞാൻ കണ്ടു.
അവളുടെ വീടിന്റെ ദയനീയാവസ്ഥ ആ മുഖത്ത് നിന്നും മനസ്സിലാക്കാൻ പറ്റുന്നതായിരുന്നു.
കുഴിഞ്ഞ കണ്ണുകളും മെലിഞ്ഞ ശരീരവും ...
പഴയ നിറം മങ്ങിയ ഒരു ചുരിദാറായിരുന്നു വേഷം.

ബസ് വരുന്നത് കണ്ട് ഞാനും ആ കുട്ടിയും ഇരിക്കുന്നിടത്ത് നിന്നും എഴുന്നേറ്റതും ആ കുട്ടി ശരീരം കുഴഞ്ഞ് വീഴാൻ പോയതും ഒരുമിച്ചായിരുന്നു.പെട്ടെന്ന് ഞാനാ കുട്ടിയെ താങ്ങിപിടിച്ചില്ലായിരുന്നെങ്കിൽ അതിന്റെ തല ഭിത്തിയിലിടിച്ചേനെ..ഞാനാ പെൺകുട്ടിയെ താങ്ങി ഇരുത്തുന്ന വീഡിയോ സ്റ്റോപ്പിൽ വന്ന് നിന്ന ബസിൽ ഇരുന്ന ഏതോ ഒരുത്തൻ മൊബൈലിൽ പകർത്തി.....

! കാമുകനും കാമുകിയും പരസ്യമായി ബസ്സ്റ്റോപ്പിൽ പ്രണയകേളികൾ.ഇവളൊക്കെ രാവിലെ പഠിക്കാൻ തന്നെയാണോ കോളേജിലേക്ക് പോകുന്നത്.കഷ്ടം തന്നെ വീഡിയോ കണ്ട് നോക്ക് .പരമാവധി ഷെയർ ചെയ്ത് ഇവനേയും ഇവളേയും നാറ്റിക്കണം.!

ഈയൊരു തലക്കെട്ടോടെ എന്റേയും ആ കുട്ടിയുടേയും വീഡിയോ നിമിഷങ്ങൾക്കകം വാട്സ് ആപിലും , ഫേസ്ബുക്കിലും ,യൂട്യൂബിലും വൈറൽ ആയിക്കൊണ്ടേയിരുന്നു.

അപ്പോഴും ഇതൊന്നുമറിയാതെ ഞാൻ എന്റെ കയ്യിലുള്ള കുപ്പിയിലെ വെള്ളം ആ കുട്ടിക്ക് കുടിക്കാൻ കൊടുത്ത ശേഷം അവളെ ഒരു ആട്ടോറിക്ഷയിൽ കയറ്റി അവളുടെ വീട്ടിലെത്തിച്ചു.കാര്യങ്ങൾ പറഞ്ഞ് ആ കുട്ടിയുടെ അമ്മയെ ബോധ്യപ്പെടുത്തിയ ശേഷം ഞാൻ ആ ആട്ടോറിക്ഷയിൽ തന്നെ ഓഫീസിലെത്തി.പക്ഷേ അപ്പോഴേക്കും സമയം ഏറെക്കുറെ താമസിച്ചിരുന്നു.

സഹപ്രവർത്തകരുടെ കളിയാക്കിയുള്ള ചിരിയും അർത്ഥം വെച്ചുള്ള സംസാരവും ഒക്കെ എന്നെ വല്ലാതെ അലോസരപ്പെടുത്തി.കാര്യമെന്താണെന്ന് അല്പം നീരസത്തോടെയാണ് ഞാനവരോട് ചോദിച്ചത്.അപ്പോഴാണ് മൊബൈലിൽ എന്നേയും ആ കുട്ടിയേയും തമ്മിൽ തെറ്റായ രീതിയിൽ കാണിച്ചുള്ള വീഡിയോ അവരെനിക്ക് കാട്ടിത്തന്നത്...ഇന്നലെ വരെ എന്നെ സ്നേഹത്തോടെ നോക്കിയ കണ്ണുകളിൽ ഞാനിപ്പോൾ ഒരു സ്ത്രീലമ്പടനാണ്.ചുറ്റും പരിഹാസ മുഖങ്ങൾ മാത്രം..

" ഞാൻ....ഞാനൊരു തെറ്റും ചെയ്തിട്ടില്ല..ഇതൊന്നും സത്യമല്ല.."
വിറയലോടെ ഞാൻ പറഞ്ഞതൊക്കെ പുച്ഛത്തോടെ മാത്രമേ എനിക്കൊപ്പമുള്ളവർ കേട്ടുള്ളു..എത്രയും വേഗം എനിക്കെന്റെ വീട്ടിലെത്തിയാൽ മതിയെന്നായിരുന്നു. മനസ്സ് നിറയെ സൂര്യയുടെ മുഖമായിരുന്നു.അവളീ വീഡിയോ കണ്ടു കാണുമോ എന്നുള്ള ആധിയായിരുന്നു..

വീടിന്റെ ഗേറ്റ് തുറന്ന് കിടപ്പുണ്ടായിരുന്നു.മുറ്റം നിറയെ അയൽക്കാരും അടുത്ത ബന്ധുക്കളും.
എല്ലാവരും ഒരു പുഴുത്ത പട്ടിയെ നോക്കുന്ന അവഞ്ജയോടെ എന്നെ നോക്കുന്നതായി എനിക്ക് തോന്നി.
ഓടി വീടിനകത്തേക്ക് കയറിയപ്പോഴാണ് എനിക്ക് മനസ്സിലായത്.എന്നെ തനിച്ചാക്കി സൂര്യ, മോളേയും കൂട്ടി ഈ ഭൂമിയിൽ നിന്നും തന്നെ പോയെന്ന സത്യം.

"നിങ്ങളെ പോലെ ഒരു വൃത്തികെട്ടവന്റെ ഭാര്യയായി എനിക്കിനി ജീവിക്കണ്ട.നമ്മുടെ മോൾ
നാട്ടുകാരുടെ മുന്നിൽ പരിഹസിക്കപ്പെടുന്നത് കാണാൻ എനിക്ക് വയ്യ.നിങ്ങളെ സ്നേഹിച്ചതിനും വിശ്വസിച്ചതിനും എനിക്ക് എന്നോട് തന്നെ വെറുപ്പ് തോന്നുന്നു.അതിനുള്ള പ്രായ്ശ്ചിത്തമാകട്ടെ എന്റെ മരണം."

അവളുടെ ആ കത്ത് ,അതൊരു തീഗോളം എന്റെ കയ്യിലിരിക്കുന്ന പോലെ എനിക്ക് തോന്നി.എന്നെ മനസ്സിലാക്കാതെ ,സംഭവിച്ചതെന്താണെന്ന് ഒന്ന് ചോദിക്കാൻ പോലും നിൽക്കാതെ അപമാന ഭാരത്താൽ അവളെന്നെ വേണ്ടെന്നു വെച്ചു എന്നന്നേക്കുമായി പോയി.

ആ വീഡിയോയ്ക്ക് പിന്നിലെ സത്യമെന്താണെന്ന് എന്നോടാരും ചോദിച്ചില്ല., മറിച്ച് അത് അങ്ങനെ തന്നെയാണെന്ന് സ്ഥാപിച്ചെടുത്തു പലരും.ആ വീഡിയോ തെറ്റായ രീതിയിൽ പ്രചരിപ്പിച്ചവന് എന്താണ് അതുമൂലം നേട്ടമുണ്ടായതെന്നെനിക്കറിയില്ല.പക്ഷേ എനിക്കെന്റെ കുടുംബം നഷ്ടപ്പെട്ടു.ഒരു പാവം പെൺകുട്ടിയുടെ ജീവിതം തകർന്നു.

"ഇനി ഞാനാർക്കു വേണ്ടി ,,എന്തിനു വേണ്ടിജീവിക്കണം ?ചിത കത്തി തീരും മുൻപേ എനിക്കും അവരോടൊപ്പം യാത്രയാകണം.പരിഹാസങ്ങളും കുറ്റപ്പെടുത്തലുകളുമില്ലാത്തിടത്തേക്ക്."

(പരമാവധി ഷെയർ ചെയ്യൂ എന്ന തലക്കെട്ടോടെ ഇന്ന് നമ്മൾ കാണുന്ന പല വീഡിയോകൾക്ക് പിന്നിലേയും സത്യസ്ഥിതി മറ്റൊന്നാകാം.കാണുന്ന വീഡിയോ സത്യമാണെന്ന് ഉറപ്പുണ്ടെങ്കിൽ മാത്രം ഷെയർ ചെയ്യുക. നന്മയുള്ള കരങ്ങൾ ഇത്തരം ചതിയിലൂടെ അറ്റുപോകാതിരിക്കട്ടെ)

By....RemyaRajesh